ཉི་ཧོང་དུ་བོད་ཀྱི་གསོ་རིག་བགྲོ་གླེང་།

             
ཉི་ཧོང་གི་རྒྱལ་ས་ཊོག་ཀྱོར་བོད་དང་ཉི་ཧོང་སྨན་པའི་བར་ལྟ་ཚུལ་བརྗེ་རེས་ཀྱི་བགྲོ་གླེང་ཞིག་འཚོགས་ཡོད་འདུག 


ཕྱི་ཚེས་ ༡ ཉིན་བོད་གཞུང་དྲ་རྒྱའི་ཐོག་གནས་ཚུལ་སྤེལ་བ་ལྟར་ན། ཚེས་ ༢༧ ཉིན་ནས་བསྟུད་མར་བདུན་ཕྲག་གཅིག་རིང་བོད་ཀྱི་སྨན་པའི་ལྷན་ཚོགས་ཀྱི་འགན་འཛིན་སྨན་པ་སྣེ་ཤར་རྡོ་རྗེ་རབ་བརྟན་མཆོག་གིས་ཉི་ཧོང་གི་རྒྱལ་ས་ཊོག་ཀྱོར་བོད་ལུགས་ཀྱི་ནད་བཅོས་བྱ་ཐབས་སྐོར་ངོ་སྤྲོད་གཏམ་བཤད་བྱས་འདུག་ལ། དེ་ནི་ཡུལ་དེའི་ས་གནས་ཁག་ཏུ་བོད་ལུགས་གསོ་རིག་གི་གོ་རྟོགས་སྤེལ་ཆེད་དུ་རེད་འདུག ཁོང་གི་ཕེབས་རོགས་སུ་ངྷ་སའི་སྨན་པའི་ལྷན་ཚོགས་ཀྱི་ཉམས་ཞིབ་འགན་འཛིན་སྨན་པ་ཚེ་རིང་མཚམས་གཅོད་ལགས་ཀྱང་ཕེབས་ཡོད་པ་དང་།  ཐེངས་འདིའི་བགྲོ་གླེང་ནི་ཉི་ཧོང་གི་ཚོགས་སྡེ་ཞིག་ནས་གོ་སྒྲིག་བྱས་པའི་བོད་ལུགས་གསོ་རིག་དང་ཉི་ཧོང་གི་ཆེད་ལས་སྨན་པའི་བར་གྱི་གོ་བསྡུར་བགྲོ་གླེང་ཞིག་ཡིན་ལ། སྐབས་དེར་མི་མང་ཚོར་ཟུར་ཉན་གྱི་གོ་སྐབས་ཀྱང་ཕུལ་ཡོད་འདུག སྨན་པ་རྡོ་རྗེ་ཚེ་བརྟན་ལཊ་ཀྱིས་ཉི་ཧོང་གི་སྨན་པ་དང་ཚོགས་བཅར་ནུབ་ཕྱོགས་པ་ཚོར་བོད་ཀྱི་གསོ་རིག་དང་དེའི་བཅོས་ཐབས་སྐོར་གསལ་བཤད་བྱས་ཡོད་པ་མ་ཟད། ལྷག་པར་དུ་ཁོང་གིས་གསུང་བཤད་ཀྱི་མགོ་བཙུགས་པ་དང་སྦྲགས་སངས་རྒྱས་སྨན་བླའི་ཁྱད་ཡོན་སྐོར་ངོ་སྤྲོད་གནང་ཡོད་ལ། བོད་ཀྱི་གསོ་རིག་གི་འགྲོ་ལུགས་དེ་ནི་ཚན་རིག་གཞི་རྩར་བཞག་པའི་ཕུགས་ཕན་ལྡན་པ་ཞིག་དང་། ཆོས་ཕྱོགས་དང་སོ་སོ་སྒེར་གྱི་སྤྱོད་ལམ་སོགས་ལའང་འབྲེལ་བ་ཡོད་ཚུལ་སོགས་གསུངས་འདུག སངས་རྒྱས་ཀྱིས་བདེན་པ་བཞིའི་ཉམས་ལེན་ལ་བརྟེན་ནས་འཁོར་བའི་སྡུག་བསྔལ་སེལ་ཐུབ་ཀྱི་ཡོད་ཅེས་གསུངས་བ་བཞིན་བོད་ཀྱི་གསོ་རིག་ལ་རྒྱུས་ལོན་བྱེད་པར་ཡང་བདེན་པ་བཞི་ལས་སྡུག་བསྔལ་བདེན་པ་དེ་ཤེས་རྒྱུ་གལ་ཆེ་ཡིན་ཚུལ་ཁོང་གིས་གསུངས་ཡོད་འདུག དེ་བཞིན་འཕྲོད་བསྟེན་གང་ལེགས་ཞིག་ཡོང་བར་ཁོར་ཡུག་གཙང་མ་ཞིག་དགོས་རྒྱུ་དེ་གལ་ཆེན་ཡིན་ལ། ནད་རིགས་མཐའ་དག་ནི་ས་ཆུ་མེ་རླུང་ནམ་མཁའ་སོགས་འབྱུང་བ་ལྔ་ལས་འབྱུང་བཞིན་ཡོད་ཚུལ་སོགས་གསུངས་འདུག