མདོ་དབུས་མཐོ་སྒང་གི་ཚ་དྲོད་འཕར་བ་དེ་རྒྱ་ནག་གིས་བཟོས་པ་མིན་པར། དབུས་ཤར་ཤར་ཨེ་ཤ་ཡ་དང་ལྷོ་ཨེ་ཤ་ཡའི་རྫས་འགྱུར་དུག་རྫས་ཀྱི་མཁའ་དབུགས་མཉམ་དུ་བསྲེས་ནས་བཟོས་པ་རེེད་ཟེར།
སྔར་ལོར་༧གོང་ས་མཆོག་གིས་ཁོ་པེན་ཧ་གྷན་གྱི་ནམ་ཟླའི་འགྱུར་ལྡོག་སྐོར་གྱི་ཚོགས་ཆེན་དང་སྟབས་བསྟུན་བཀའ་སློབ་ཞིག་བསྩལ་བའི་ནང་། བོད་ནང་གི་ཚ་དྲོད་འཕར་བ་དེ་ད་ལྟའི་བོད་ནང་གི་མིའི་རིགས་ཀྱི་འགུལ་བསྐྱོད་དང་ལྷག་པར་རྒྱ་ནག་གི་བཟོ་ལས་འཕེལ་རྒྱས་སུ་འགྲོ་བའི་ཁྲོད་ཀྱི་འབག་བཙོག་གི་མཁའ་དབུགས་འདྲ་མིན་ལ་བརྟེན་ནས་བྱུང་བ་ཡིན་ཚུལ་གསུངས་ཡོད་ནའང་། ཟླ་འདིའི་ཚེས་ ༤ ཉིན་རྒྱ་ནག་ཆབ་སྲིད་ཅུའུ་རྒྱུན་ལས་དང་མདོ་དབུས་མཐོ་སྒང་ཞིབ་འཇུག་ཚན་པའི་འགན་འཛིན་ཡོ་ཐན་ཏུང་གིས། མདོ་དབུས་མཐོ་སྒང་གི་ཚ་དྲོད་འཕར་བའི་གནོད་སྐྱོན་གཙོ་བོ། དབུས་ཤར་ཨེ་ཤ་ཡ་དང་ལྷོ་ཨེ་ཤ་ཡའི་ནང་གི་རྫས་འགྱུར་གྱི་དུག་རྫས་འདྲ་མིན་གྱི་མཁའ་དབུགས་མཉམ་བསྲེས་ལས་བྱུང་བ་ཡིན་པ་ལས། མདོ་དབུས་མཐོ་སྒང་གི་མཁའ་དབུགས་ནི་བོད་ནང་གི་ད་ལྟའི་མིའི་རིགས་ཀྱི་འགུལ་བསྐྱོད་དང་རྒྱ་ནག་གི་བཟོ་ལས་འཕེལ་རྒྱས་ལ་བརྟེན་ནས་བྱུང་བ་མིན་ཚུལ་བརྗོད་ཡོད་པར་མ་ཟད། མདོ་དབུས་མཐོང་སྒང་ནི་ནུབ་རླུང་དང་དུས་རླུང་གཉིས་ཀྱི་འགོག་རྐྱེན་ཁྲོད་གནས་ཡོད་པ་དང་། དེ་ཡང་ནུབ་རླུང་གིས་གཙོ་བོ་དབུས་ཤར་ས་ཁུལ་གྱི་བཟོ་གྲྭའི་འབག་བཙོག་གི་མཁའ་དབུགས་མདོ་དབུས་མཐོ་སྒང་དུ་བསྐྱལ་ཡོང་གི་ཡོད་པ་དང་། དུས་རླུང་སྟེ།ཞི་བདེ་རྒྱ་མཚོའི་རླུང་གིས་ལྷོ་ཨེ་ཤ་ཡའི་འབག་བཙོག་གི་མཁའ་དབུགས་གནས་དེར་བསྐྱལ་ཡོང་ཚུལ་བརྗོད་འདུག་ལ། རྒྱ་ནག་གི་བཟོ་གྲྭས་ཀྱང་གནོད་སྐྱོན་བཟོ་གི་ཡོད་ནའང་། ལྷོ་དང་དབུས་་ཤར་ཨེ་ཤ་ཡའི་གནོད་སྐྱོན་དེ་ཧ་ཅང་ཚབས་ཆེན་ཡིན་ཚུལ་བརྗོད་ཡོད་འདུག
གནས་ཚུལ་འདིའི་ཐད་ཆབ་སྲིད་དབྱེ་ཞིབ་པས། ༧གོང་ས་མཆོག་གིས་གསུང་བཞིན་པའི་གནོད་སྐྱོན་དེ་རྒྱ་ནག་ནང་ཁུལ་གྱི་མཁའ་དབུགས་དང་ཁོར་ཡུག་འབག་བཙོག་ལ་བརྟེན་ནས་བྱུང་བ་ཞིག་ཡིན་པ་དང་། ལོ་ ༡༠༠ ཡས་མས་ཀྱི་དུས་ཡུན་ནང་མདོ་དབུས་མཐོ་སྒང་དུ་ལོ་རེར་ཏུའུ་གཅིག་རེའི་དྲོད་ཚད་མཐོ་རུ་འགྲོ་གིན་ཡོད་པ་དང་། གལ་སྲིད་ ༢༠༦༠ ལོའི་བར་འདི་ལྟར་ཕྱིན་ཚེ་མདོ་དབུས་མཐོ་སྒང་གི་གངས་རིའི་སུམ་ཆ་གཅིག་བཞུར་ཚར་རྒྱུའི་ཚོད་དཔག་བྱེད་ཀྱིན་ཡོད་འདུག་ལ། རྒྱ་ནག་གི་ཧི་མ་ལ་ཡའི་བརྟག་དཔྱད་ཚན་ཆུང་གིས་ཀྱང་འདི་ལྟར་ཡུན་རིང་ཕྱིན་ཚེ་ཧི་མ་ལ་ཡའི་གངས་ཀྱི་བརྒྱ་ཆའི་ ༧༠ ཞུ་རྒྱུ་ཡིན་པའི་སྐོར་བརྗོད་ཡོད་འདུག
