རྒྱ་གར་ལྷོ་ཕྱོགས་འབྲས་སྤུངས་དགོན་པའི་གྲྭ་བསྟན་པ་རྒྱ་མཚོ་གཞིས་རྩེ་བཙོན་ཁང་གིས་གཅར་རྡུང་མནར་གཅོད་བཏང་མཐར་ད་ལྟ་དབང་བོ་སྐྱོན་ཅན་དུ་གྱུར་ཡོད་འདུག་ཟེར།
ཟླ་འདིའི་ཚེས་ ༧ ཉིན་འདི་གའི་གསར་འགོད་པར་བོད་ནས་འབྲེལ་ཡོད་མི་སྣ་ཞིག་གིས་ཁུངས་ལྡན་གནས་ཚུལ་མཁོ་སྤྲོད་བྱས་པ་ལྟར་ན། ཕྱི་ལོ་ ༢༠༠༥ ལོར་བོད་ནས་རྒྱ་གར་ནང་བཙན་བྱོལ་ཏུ་འབྱོར་ཞིང་ལྷོ་ཕྱོགས་འབྲས་སྤུངས་དགོན་པའི་ཀླུ་འབུམ་ཁང་ཚན་དུ་སློབ་གཉེར་གནང་བའི་གྲྭ་བསྟན་པ་ལགས། ཕྱི་ལོ་ ༢༠༠༦ ལོའི་༧གོང་ས་མཆོག་གི་དཔལ་དུས་ཀྱི་འཁོར་ལོའི་དུས་དབང་དང་ལོ་གསར་སྐབས་ཀྱི་གསུང་ཆོས་གྲུབ་རྗེས་ཕྱིར་རང་ཡུལ་དུ་ལོག་ཡོད་པ་དང་། བལ་ཡུལ་མཐའ་མཚམས་བརྒལ་ཏེ་ལྷ་རྩེ་གྲོང་ཁྱེར་དུ་སྤྱི་སྤྱོད་རླངས་འཁོར་ཞིག་གི་ནང་ལོག་འགྲོ་སྐབས་རྒྱ་ནག་གི་ཉེན་རྟོག་མི་སྣས་འཛིན་བཟུང་བྱས་ཡོད་འདུག སྐབས་དེར་ཁོང་གི་ལག་ཏུ་དཔལ་དུས་ཀྱི་འཁོར་ལོའི་དུས་དབང་གི་འོད་སྡེར་དང་གསུང་ཆོས་སྐོར་གྱི་འོད་སྡེར། དེ་བཞིན་༧གོང་ས་མཆོག་གི་བཀའ་སློབ་དང་དཔེ་དེབ་ཁག་ཅིག་ཡོད་པ་ཉེན་རྟོག་མི་སྣས་ཤེས་རྟོགས་བྱུང་སྟེ། ཁོང་ལ་ཁྲིམས་ཆད་ཀྱི་བརྡ་ལན་ཅི་ཡང་མེད་པའི་ཐོག་ལྷ་རྩེ་བཙོན་ཁང་དུ་ལོ་གཅིག་དང་ཟླ་ལྔའི་རིང་བཀག་ཉར་བྱས་པ་རེད་ཅེས་བརྗོད་བྱུང། ཡང་འབྲེལ་ཡོད་མི་སྣས་མུ་མཐུད་བརྗོད་དོན། ཕྱིས་སུ་ཁོང་ལ་འབྲེལ་བ་ཡོད་པའི་མི་སྣ་ཁག་ཅིག་ལྷ་སར་མཇལ་སྐོར་ལ་འགྲོ་བའི་གོ་སྐབས་དང་བསྟུན་ཏེ་ཁོང་ལ་ཐེངས་དང་པོར་བལྟ་རུ་ཕྱིན་པ་རེད། སྐབས་དེར་ཉེན་རྟོག་མི་སྣས་ཁོང་ཚོར་ཐུག་འཕྲད་ཀྱི་གོ་སྐབས་སྤྲད་ཡོད་པ་དང་ཆབས་ཅིག་ཁོང་གི་ནང་མིར་བརྗོད་དོན། ཐེངས་འདིར་ཁོང་བཀག་ཉར་བྱས་དོན་འོད་སྡེར་དང་དཔེ་དེབ་ཁོ་ན་མིན་པར། ཁོང་གིས་བཙོན་ཁང་ནང་ཁུལ་གྱི་སློབ་གཅུན་ཅུའུ་ཟེར་བའི་སྡེ་ཚན་དེས་སློབ་གསོ་དང་ལེན་མ་བྱས་པ་དང་རྣམ་འགྱུར་མི་ལེགས་པ་བསྟན་པའི་རྐྱེན་གྱིས་ལོ་གཅིག་དང་ཟླ་ལྔའི་རིང་སློབ་གསོ་སྤྲོད་ཀྱིན་ཡོད་པ་དང་། གནས་འདི་བཙོན་ཁང་མིན་པར་སློབ་གསོ་སྤྲོད་སའི་ཁོར་ཡུག་ཡིན་པའི་གནས་ལུགས་སོགས་བཤད་དེ་མི་དེ་དག་ཕྱིར་ལོག་ཏུ་བཅུག་ཡོད་འདུག རྗེས་སུ་ཁོང་ལྷ་རྩེ་བཙོན་ཁང་ནས་གཞིས་རྩེ་བཙོན་ཁང་དུ་གནས་སྤོར་བྱས་ཡོད་སྐབས་ཁོང་གི་ནང་མི་ཐེངས་གཉིས་པར་བལྟ་རུ་ཕྱིན་ཡོད་འདུག སྐབས་དེར་ཁོང་ལ་སྔར་གྱི་ཁྲིམས་ཆད་ལས་ཟླ་ལྔ་རིང་དུ་བཏང་སྟེ་ལོ་གཉིས་ལ་བཏང་ཡོད་འདུག་ལ། ཁོང་གི་ནང་མིས་བཙོན་ཁང་གི་གནད་ཡོད་མི་སྣར་ཅི་ཡིན་གྱི་གནས་ཚུལ་དྲིས་སྐད། ཁོང་གི་རྣམ་འགྱུར་མི་ལེགས་ཚུལ་དང་བཙོན་ཁང་གི་སློབ་གསོ་དང་ལེན་མ་བྱས་པ་དང་བཙོན་ཁང་གི་ཁས་ལེན་ཡི་གེ་ལ་ས་ཡིག་མ་བཀོད་པའི་དབང་གིས་ཡིན་ཚུལ་བརྗོད་པ་དང་ལྷན་དུ། ནང་མིར་བརྗོད་དོན། གལ་སྲིད་ཁྱེད་ཅག་ནང་མི་ཚོས་ང་ཚོའི་སྒྲིག་གཞི་ལྟར་བསླབ་བྱ་བཏང་སྟེ་ཁོང་གིས་ངོས་ལེན་བྱས་པ་ཡིན་ན་དེ་རིང་འཁྲིད་ཆོག་ལ། དེ་ལྟར་མིན་ཚེ་ཁོང་ལ་ཉེན་ཁ་ཡོད་པའི་འཇིགས་སྐུལ་བཏང་རྗེས་ནང་མིར་ཐུག་འཕྲད་ཀྱི་གོ་སྐབས་སྤྲད་ཡོད་འདུག སྐབས་དེར་ཁོང་གི་གཟུགས་པོའི་གནས་སྟངས་སྐྱོ་རུ་ཕྱིན་ཡོད་སྟབས་ནང་མི་ཚོས་སེམས་ཀྱིས་མ་བཟོད་ཀྱང་ཉེན་རྟོག་མི་སྣས་བཤད་པ་བདེན་པར་འདོད་དེ་བསླབ་བྱ་བརྒྱབ་པར། གྲྭ་བསྟན་པ་རྒྱ་མཚོས་མིག་ཆུ་ཤམ་ཤམ་དུ་བཞུར་གྱིན་བརྗོད་དོན། ནམ་རྒྱུན་ཁོང་ཚོས་ང་ལ་བསླབ་བྱ་འདྲ་མིན་རྒྱག་གིན་འདུག ཡིན་ནའང། ང་ལ་འགྱུར་བ་མེད་པའི་དམ་བཅའ་དང་ངོས་ལེན་བྱེད་མི་ཐུབ་པ་ཞིག་ཡོད་པ་ནི། སྐྱབས་མགོན་རིན་པོ་ཆེ་མེས་རྒྱལ་ཁ་བྲལ་གཏོང་མཁན་དང་མི་རིགས་མཐུན་སྒྲིལ་ལ་གཏོར་བརླག་གཏོང་མཁན་ཡིན་པའི་སྐོར་གྱི་དོན་ཚན་ཁག་ལ་ངོས་ལེན་དང་མིང་རྟགས་འགོད་དགོས་པ་དེ་རེད་ལ། དེར་ང་རང་གིས་ངོས་ལེན་བྱེད་ཐུབ་ཀྱི་མི་འདུག་ཅེས་དང་། དོན་ཚན་དེ་དག་ལ་ངོས་ལེན་བྱས་ཏེ་གློད་གྲོལ་ཐོབ་པ་ལས་ང་མི་ཚེ་གང་བོར་བཙོན་འོག་ཏུ་འདུག་དགོས་པ་དང་། ཁོང་ཚོས་ང་བསད་རུང་འགྱོད་པ་སྤུ་ཙམ་ཡང་མེད། གལ་སྲིད་སྐྱབས་མགོན་རིན་པོ་ཆེས་དེ་ལྟ་བུའི་ལས་ཞིག་བསྒྲུབ་ཀྱིན་ཡོད་ན་ངས་ངོས་ལེན་བྱེད་ཆོག་གི་རེད་ཅེས་མིག་ཆུ་ཤམ་ཤམ་དུ་བཞུར་གྱིན་ནང་མིར་བརྗོད་སྟབས། ནང་མི་ཚོར་ཡང་ཐབས་ཤེས་ཅི་ཡང་མེད་པར་ཕྱིར་ལོག་དགོས་བྱུང་འདུག་ལ། ཁོང་ཉིད་བཙོན་ཁང་དུ་མནར་གཅོད་དང་བཙོན་འཇུག་བྱས་དོན་གྱི་རྒྱུ་རྐྱེན་གཙོ་བོའང་སློབ་གཅུན་ཅུའུ་ཡི་དོན་ཚན་དེ་དག་ལ་ཁས་མ་བླངས་བའི་དབང་གིས་ཡིན་པ་ཤེས་རྟོགས་བྱུང་ཡོད་འདུག དེ་ལྟ་ནའང་། ཕྱིས་སུ་གཞིས་རྩེ་བཙོན་ཁང་གིས་ཁོང་ལ་ཡང་བསྐྱར་ཟླ་དྲུག་གི་བཙོན་འཇུག་གི་དུས་ཡུན་རིང་དུ་བཏང་འདུག་ལ། དེ་ལྟར་བྱས་དོོན་ནི། སྐབས་དེར་རང་ལོ་དྲུག་ཅུར་བརྒལ་བའི་རྒན་པོ་ཞིག་གིས་རྒྱ་གར་ནས་ཕྱིར་ལོག་སྐབས་༧གོང་ས་མཆོག་ལ་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་ཕུལ་བའི་སྐབས་ཀྱི་སྐུ་པར་ཞིག་འཁུར་ཡོད་པར་ཉེན་རྟོག་མི་སྣས་འཛིན་བཟུང་གིས་ཁོང་ཚོའི་བཙོན་ཁང་དེ་རུ་འཁྲིད་འོང་སྟེ་ཁོང་ཚོ་བཙོན་པ་དག་གི་རིག་ས་ནས་གཅར་རྡུང་བྱེད་ཀྱིན་པར། ཁོ་བོའི་སེམས་ཀྱི་སམ་བཟོད་པར་ཉེན་རྟོག་མི་སྣར་ཁ་གཏད་དང་ངོ་རྒོལ་བྱས་ཏེ་རྒན་པོར་གཅར་རྡུང་བྱས་པར་བཀག་འགོག་བྱས་རྐྱེན་ཟླ་དྲུག་གི་བཙོན་འཇུག་གི་དུས་ཡིན་རིང་དུ་བཏང་བ་དང་། དུས་དེ་ནས་བཟུང་ཁོང་ལ་མནར་གཅོད་གཏོང་མགོ་བརྩམས་འདུག་ལ། བདུན་ཕྲག་གཅིག་རིང་སྐར་ཁུང་སོགས་ཅི་ཡང་མེད་པའི་ཁང་ཆུང་ཞིག་ཏུ་བཙོག་པ་ཕྱི་རོལ་ཏུ་གཏོང་བའི་དབང་ཚད་ཀྱང་མེད་པར་བཅུག་ཡོད་པ་མ་ཟད། ཆུ་གཤོང་ཆེན་པོ་ཞིག་གི་ནང་དུ་བཙན་གྱིས་འདུག་ཏུ་བཅུག་རྗེས་གློག་དྲངས་ཏེ་བཟོད་ཐབས་བྲལ་བའི་ན་ཟུག་འོག་ཁོང་དྲན་པ་བརྒྱལ་བ་ཡང་བྱུང་ཡོད་འདུག དེ་བཞིན་སྐབས་དེར་བྱེད་ཐབས་འདྲ་མིན་དང་ལག་ཆ་འདྲ་མིན་བེད་སྤྱོད་ཀྱིས་བཟོད་ཐབས་བྲལ་བའི་མནར་གཅོད་ཚད་ལས་བརྒལ་བ་བཏང་མཐར་ ༢༠༠༩ ལོའི་ཟླ་ ༤ པའི་ཚེས་ ༢༠ ཡས་མས་སུ་གཞིས་རྩེ་བཙོན་ཁང་ནས་ནང་མིར་གཉེན་འབྲེལ་སོགས་སུའང་བརྡ་ལན་ཅི་ཡང་མེད་པའི་ཐོག་གློད་གྲོལ་བཏང་ཡོད་འདུག ཅེས་བརྗོད་བྱུང་།
མཐའ་མར་འབྲེལ་ཡོད་མི་སྣས་ཁོང་གི་ད་ལྟའི་གནས་སྟངས་སྐོར་བརྗོད་དོན། སྐབས་དེར་ཁོང་གིས་རང་གི་གཟུགས་པོར་ནག་ཉེས་ཅི་འབྱུང་གི་ཚོར་བ་སོགས་ཅི་ཡང་གསལ་བོར་ཤེས་རྟོགས་བྱུང་མེད་ནའང་། ཕྱིར་ཕ་ཡུལ་དུ་ལོག་རྗེས་གྲོགས་པོ་ཚོར་སྐབས་དེའི་གནས་སྟངས་འགྲེལ་བརྗོད་བྱས་སྐབས་དྲན་པ་བརྒྱལ་བ་དང་དངས་སྐྲག་སྐྱེས་པ་སོགས་སྙིང་མི་བདེ་བའི་ན་ཚ་ཞིག་བྱུང་འདུག་ལ། དུས་ད་ལྟ་འང་མི་སྣ་འདུ་འཛོམས་དང་ཟང་ཟིང་གི་སྐབས། དེ་བཞིན་མི་ཕན་ཚུན་འཁྲུག་པ་རྒྱག་པའི་སྣང་ཚུལ་སོགས་མཐོང་སྐབས་གློ་བུར་སྙིང་འཕར་བ་དང་སྐྲག་སྣང་ངང་དྲན་པ་བརྒྱལ་ཏེ་འགྱེལ་འགྲོ་བའི་གནས་ཚུལ་ཐེངས་མང་བྱུང་འདུག་ལ། ད་ལྟའང་མི་སྣ་འདུ་འཛོམས་སོགས་སུ་འགྲོ་གི་མེད་པ་དང་དུས་ནམ་ཡིན་ཡང་གཟབ་ནན་གྱི་འོག་ཏུ་གནས་དགོས་པར་ལྷག་འདུག་ཅེས་བརྗོད་བྱུང།
ད་ལྟ་འདིར། སློབ་གཅུན་ཅུའུ་ཡི་སློབ་གསོའི་འོག་གི་་་་་། ཞེས་འགོ་བརྗོད་དུ་ཡོད་པ་བཞིན་ལས་ཁུངས་འདི་ཡི་འགོ་བྱེད་ཀྱི་མིང་དང་། རྡུང་རྡེག་བྱེད་མཁན་གྱི་མིའི་མིང་སོགས་བཀོད་ཐུབ་ན་དགེ་མཚན་ཆེ་བ་མཐོང་།
ལས་རྒྱུ་འབྲས་འདི་ཡང་འདི་ཡང་འགའ་ཞིག་ལ་སྐྲག་གིན་ཡོད་པ་འདྲ།།
གསར་འགོད་པ་ཚོ། ཁྱེད་རང་ཚོས་འདི་ལྟར་བྲིས་འདུག༼ རྒྱ་གར་ལྷོ་ཕྱོགས་འབྲས་སྤུངས་དགོན་པའི་གྲྭ་བསྟན་པ་རྒྱ་མཚོ་གཞིས་རྩེ་བཙོན་ཁང་གིས་གཅར་རྡུང་མནར་གཅོད་བཏང་མཐར་ད་ལྟ་དབང་བོ་སྐྱོན་ཅན་དུ་གྱུར་ཡོད་འདུག་ཟེར།༽
གཞིས་རྩེ་བཙོན་ཁང་ནི་ཁང་ཞེས་པ་དེ་ཁང་པ་རེད། ཁང་པས་མི་གཅར་རྡུང་མནར་གཅོད་བཏང་ཅི་འདྲ་བྱེད་ཚུལ་ཡོད།
སྤྱིར་བོད་མི་རྣམས་ཀུན་མནར་བཏང་ཆོག་ཆོག་ཡོད་པ་འདྲ་ཡིནའང་ཁང་པས་གཅར་རྡུང་མནར་གཅོད་བཏང་རྒྱུ་མ་རེད།
གཞིས་རྩེ་བཙོན་ཁང་ཞིག་གི་ནང་དུ་གཅར་རྡུང་མནར་གཅོད་བཏང་མཐར་ད་ལྟ་དབང་བོ་སྐྱོན་ཅན་དུ་གྱུར་ཡོད་འདུག
འདིའི་མཚོན་ཁྱེད་ཚོ་གསར་འགོད་ཐུང་ཐུང་འདིའི་ནང་དུ་ནོར་འཁྲུལ་ཧ་ཅིང་མང་པོ་ཡོད་ཕྱིར་བཅོས་རོགས་ཞུ།
༸གོང་ས་མཆོག་གིས་ཐེངས་འདིའི་གྲོས་ཚོགས་ཐོག་ཕེབས་པའི་གསུང་འཕྲིན་ལ་ཁྱེད་ཀྱི་གང་འདྲ་གཟིགས་བྱུང་། ངས་གནད་དོན་འདི་མཐོང་བྱུང་། ངའི་ཟིན་བྲིས་སུ་གཟིགས་རོགས།
རང་གི་ཕ་ཡུལ་དུ་ལོག་ནའང་ཉེས་ཆད་བཅད་པ་དང་འཛམ་གླིང་ཞི་བདེ་དད་དཔོན་ཆེན་པོའི་སྐུ་པར་སོགས་གཉེར་ན་བཙོན་ཁང་དུ་ལོ་མང་འདུག་དགོས་པ་ནི་ཀླ་ཀློར་གྱི་བྱས་སྟངས་རང་རེད་ སྐུ་ཞབས་ཁོང་གི་སྙིང་སྟོབས་ལ་རྗེས་སུ་ཡིད་རང་དང་ཁོང་བདེ་ཐང་ཡོང་བར་སྨོན་ལམ་ཤུགས་དྲག་ཞུ
ཚེ་ལྷག་དོན་ལྡན་ཡོང་བའི་མཆོག་གསུམ་རྒྱལ་བ་རྒྱ་མཚོར་སྨོན་འདུན་ཤུགས་དྲག་དང་བཅས།།