མི་ཚེ་ནི་རྨི་ལམ་ལྟ་བུ་ཞིག་ཡིན་ཟེར་བ་ནི་དངོས་ནས་བློ་བཟང་ལ་མཚོན་ན་ཅི་མ་བདེན་སྙམ་ཞོར་དུ། རང་གིས་སེམས་ནང་དུ་སྔོན་ཆད་གཏན་ནས་དྲན་མྱོང་མེད་པའི་རྨི་ལམ་ལྟ་བུའི་རི་གྲོང་འདིའི་ཞིང་ཁམས་ནས་རྟ་ཕོ་མང་བོ་ཞིག་ལ་སྤྱང་བརྡར་སྤྲད་པ་དང་། ཉིན་མོ་ཁ་ཤས་ཀྱི་རང་དུ་དབྱིན་ཡུལ་ནས་ཕེབས་པའི་གློག་བརྙན་འཁྲབ་སྟོན་པར་སློབ་ཁྲིད་བྱེད་མཁན་ཞིག་གམ་ནས་སློབ་ཁྲིད་ལ་ཉན་པ་དང་། རྒྱ་གར་བ་རླུང་བསྒོམ་སྒྱུ་རྩལ་བ་ཞིག་འགྲམ་ནས་ཞོགས་པ་དུས་རྒྱུན་དུ་ལུས་རྩལ་སྤྱོང་བ། ད་དུང་ས་ཁུལ་དེ་ཡི་མགྲོན་ཁང་ནང་ནས་སྔོན་ཆད་མི་ཤེས་པའི་བོད་པའི་ཕོ་གསར་མོ་གསར་མང་བོ་ཞིག་ཀྱང་རང་བཞིན་གྱིས་ངོ་ཤེས་དེ་འོང་གི་ཡོད་པ་རེད།
བློ་བཟང་ལ་ལ་དྭགས་སུ་འབྱོར་ནས་ཉིན་གྲངས་ཉི་ཤུ་ཙམ་ཞིག་འགྲོ་བཞིན་ཡོད་ལ། གློག་བརྙན་འཁྲབ་སའི་མི་ཡང་མི་ཉུང་བ་ཞིག་གསར་དུ་ངོ་ཤེས་ཀྱི་ཡོད་པ་མ་ཟད། ལྷག་པར་དུ་ཁོ་རང་གི་ཉིན་ཉི་ཤུའི་རིང་དུ་མགྲོན་ཁང་གི་ནང་དུ་ཁང་མིག་གཅིག་གི་ནང་དུ་མི་གཉིས་རེ་བསྡོད་ཀྱི་ཡོད་པ་ལྟར། ཁོ་རང་གི་ཉིན་མ་ཉི་ཤུའི་རིང་གི་བསྡོད་རོགས་ནི་རྡོར་རྗེ་སྐྱབས་ཡིན་པ་རེད། ཁོ་རང་ནི་དངོས་ནས་མི་གཤིས་ཧ་ཅང་བབ་ཆགས་དང་བློ་བཟང་ལ་སེམས་འཁུར་དང་རོགས་རམ། དུས་རྒྱུན་དུ་བློ་བཟང་གི་སེམས་ཁོང་གི་ན་ཟུག་ལ་གདུང་སེམས་མཉམ་བསྐྱེད་བྱེད་མཁན་ཞིག་ཆགས་ཡོད་པ་རེད།
བློ་བཟང་ཁོ་རང་རྡ་ས་ནས་འདེམ་ཐོན་བྱུང་དུས་སུ། གློག་བརྙན་ནང་གི་འཁྲབ་མཁན་མི་སྣ་གཙོ་བའི་གྲངས་དུ་ཡོད་རབས་བཤད་ཡོད་ཀྱང་། ལ་དྭགས་སུ་སླེབས་ནས་གློག་བརྙན་འཁྲབ་ཁྲིད་འགན་འཛིན་གྱིས་བསམ་བློ་མི་གཞན་ཞིག་གིས་རང་གི་གྲོགས་པོའི་ཆེད་དུ་འགྱུར་བ་སོང་བ་འམ། ཡང་ན། ཁོང་ཚོས་ངོ་ཤེས་གསར་བུ་ཞིག་ཕྱི་རྒྱལ་ནས་གློག་བརྙན་འདིའི་ནང་དུ་འཛུལ་ཞུགས་བྱེད་རྒྱུར་ཐོ་འགོད་བྱས་ཡོད་པ་དེ་ཡི་སྟབས་ཀྱི་གང་ཡིན་མི་ཤེས་ཀྱང་། ཁོ་རང་ནི་གློག་བརྙན་འཁྲབ་ཁྲིད་པས་བོས་དེ། ཁྱེད་རང་ནི་གློག་བརྙན་འདིའི་ནང་གི་ཚབ་མཚོན་མི་སྣ་རེ་ཟུང་ཞིག་གི་འཁྲབ་ཚན་ཁྱེད་རང་ལ་འཁྲབ་རྒྱུ་ཡོད་པ་མ་ཟད། ཁྱེད་རང་གི་གླ་ཆ་ཁོང་ཚོ་དང་གཅིག་པ་ཡིན་ལ། ཁྱེད་རང་གི་བསྡོད་ཡུན་ཡང་ཁོང་ཚོ་དང་གཅིག་མཚུངས་ཡིན།
བློ་བཟང་གིས་འཁྲབ་ཁྲིད་འགན་འཛིན་གྱིས་སྐད་ཆ་དེ་དག་གོ་བ་དང་རང་ཉིད་ནི་རྡ་ས་ནས་འདེམ་ཐོན་བྱུང་བའི་སྐད་ཆ་དེ་དང་འགྱུར་བ་སོང་ཡོད་པ་དེར་ཅུང་བློ་ཕམ་བྱུང་ན་ཡང་། དུས་ཐོག་དེར་རང་གིས་བློ་ཕམ་དེ་ནི་རྒྱལ་ཁའི་ངོ་བོ་རུ་སྒྱུར་ནས། འགྲིག་གི་རེད། ང་རང་ལ་འཁྲབ་ཚན་གང་ཞིག་འཚམ་པོ་ཡོད་ན་དེ་གོ་སྒྲིག་བྱས་པ་ཡིན་ན་འགྲིག་གི་རེད། སྤྱིར་བཏང་བྱས་ན་ང་རང་འཁྲབ་སྟོན་པ་གཙོ་བའི་གྲངས་སུ་འགྲོ་མ་ཐུབ་པའི་རྒྱུ་མཚན་གང་ཡིན་ནམ། དེ་གསལ་བཤད་ཅིག་བྱས་པ་ཡིན་ན་འགྲིག་གི་རེད་དམ།
འཁྲབ་ཁྲིད་འགན་འཛིན་ན་ལེན་གྱིས། དེ་ནི་ཁྱེད་རང་གི་ངོ་གདོང་དཀར་དྲགས་པ་དང་ལོ་ན་ཆུང་བ། ད་རེབས་ཀྱི་གློག་བརྙན་འདིའི་ནང་གི་ལོ་རྒྱུས་ནི་མི་ལོ་ཉིས་བརྒྱའི་གོང་གི་ལོ་རྒྱུས་དང་འབྲེལ་བའི་ཇག་སྒྲུང་ཞིག་ཡིན་དུས། ཁྱེད་རང་གི་གདོང་བ་དེ་ཡང་ཇག་པ་དང་དེ་ཙམ་འཚམ་པོ་མི་འདུག་པ་ང་ཚོ་འཁྲབ་ཁྲིད་པ་ཚང་མས་གྲོས་ཁ་བྱུང་བ་ལྟར་ཐག་གཅོད་བྱས་པ་དང་། ཁྱེད་རང་ས་ཐག་རིང་དེ་འདྲ་ཞིག་ནས་ང་ཚོས་ཁྲིད་ཡོང་བ་ཡིན་དུས། ཁྱེད་རང་ལ་འཁྲབ་ཚན་གཞན་ཞིག་ལ་གོ་སྒྲིག་བྱེད་རྒྱུར་ཡང་ང་ཚོ་མོས་མཐུན་བྱུང་བ་དེ་ཡི་སྐོར་སྔོན་ལ་ཁྱེད་རང་བཤད་པ་ལྟར་རེད།
མུ་འགོད།
