༧གོང་ས་མཆོག་གིས་རྒྱ་གར་གྱི་གནའ་བོའི་སྲོལ་རྒྱུན་གྱི་འཇིག་རྟེན་མི་ཆོས་ནི་དེང་རབས་ཀྱི་འཛམ་གླིང་འདིའི་ནང་ལྷག་པར་དུ་འབྲེལ་ཆག་པོ་འདུག་ཅེས་བསྟོད་བསྔགས་གནང་འདུག
ཕྱི་ཚེས་ ༡༧ ཉིན་གྱི་ཕྱི་དྲོ་༧གོང་ས་མཆོག་གིས་མ་ཌེ་ཡ་མངའ་སྡེའི་གྲོས་ཚོགས་འཐུས་མིའི་ཟུར་བཅད་ཚོགས་ཁང་ནང་དུ། གོ་ལ་རང་བཞིན་གྱི་འགན་ཁུར་འོག་གི་འགྲོ་བ་མིའི་ཐོབ་ཐང་ཞེས་པའི་བརྗོད་གཞིའི་སྟེང་གསུང་བཤད་ཅིག་གནང་ཡོད་པ་རེད། སྐབས་དེར་༧གོང་ས་མཆོག་གིས། རྒྱ་གར་གྱི་གནའ་བོའི་འཇིག་རྟེན་མི་ཆོས་ནི་རྒྱ་གར་གྱི་དེང་རབས་དམངས་གཙོ་འདི་ལམ་ལྷོང་ཡོང་བའི་རྐྱེན་རྩ་གལ་ཆེན་ཞིག་ཏུ་གྱུར་ཡོད་པ་རེད་ཅེས་དང་། རྒྱ་གར་ནང་དུ་གྲལ་རིམ་རིང་ལུགས་དང་དབུལ་བོའི་གནས་སྟངས་རྒྱ་ཁྱབ་རང་བཞིན་དུ་ཡོད་སྟབས་འཛམ་གླིང་སྟེང་གི་འགྲོ་བ་མིའི་ཐོབ་ཐང་སྲུང་སྐྱོབ་བྱེད་པ་ལ་གལ་ཆེ་ཤོས་ཤིག་ནི་རྒྱ་གར་རེད་ཅེས་གསུངས།
ཚོགས་འདུ་དེ་ནི་མ་ཌེ་ཡ་མངའ་སྡེའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་གོ་སྒྲིག་འོག་འཚོགས་པ་དང་། མངའ་སྡེའི་སྲིད་སྐྱོང་བ་ རཱ་མི་ཤི་ཝར་ ཐ་ཀོར་ལགས་ཀྱིས་གཙོ་སྐྱོང་དང་མངའ་སྡེའི་བློན་ཆེན་མཆོག་དམིགས་བསལ་སྐུ་མགྲོན་དུ་ཕེབས་ཡོད་པ་རེད།
༧གོང་ས་མཆོག་གིས་ཐུགས་ནན་ཆེན་པོས་གསུངས་དོན། རྒྱ་གར་གྱིས་དབུལ་ཕོངས་ཀྱི་དཀའ་ངལ་འདི་སེལ་རྒྱུར་དོ་སྣང་ཆེན་པོ་སྤྲོད་དགོས་ཀྱི་འདུག་ཅེས་དང་། དེང་སྐབས་འཛམ་གླིང་གང་སར་སྤྱི་ཚོགས་མི་འདྲ་བ་མང་པོ་ཕན་ཚུན་འབྲེལ་འདྲིས་ཀྱིས་རྩོད་རྙོག་སེལ་བ་དང་འཆམ་མཐུན་གོང་སྤེལ་བྱེད་པའི་རྣམ་པ་ཤུགས་ཆེ་རུ་འཕེལ་གྱིན་འདུག་ཅེས་གསུངས། དེ་བཞིན་༧གོང་ས་མཆོག་གིས་བྱམས་སྙིང་རྗེ་དང་བཟོད་བསྲན་གྱི་རིན་ཐང་གོང་སྤེལ་བྱེད་པ་ལ་བུད་མེད་ཚོས་ནུས་པ་ཆེན་པོ་འདོན་དགོས་པ་རེད་ཅེས་འབོད་སྐུལ་ཡང་ཞུས་ཡོད་པ་རེད།
༧གོང་ས་མཆོག་གིས་མི་སྒེར་གྱི་རང་དབང་མེད་ན་མི་རང་རང་གི་སྤུས་ཚད་དེ་སྤྱོད་མི་ཐུབ་པས་མི་སྒེར་གྱི་རང་དབང་གལ་ཆེན་པོ་ཡིན་པ་དང་། སྤྱི་ཚོགས་ནི་མི་སྒེར་བ་རེ་རེའི་གསར་གཏོད་ཀྱི་རྣམ་དཔྱོད་མེད་པར་འགྲུབ་མི་ཐུབ་སྐོར་གསུངས་ཡོད།
སྙིང་རྗེ་དང་བརྩེ་བ་ནི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ལྡེ་མིག་ཡིན།
༧གོང་ས་མཆོག་གིས་ཐེངས་འདིར་བྱམས་བརྩེ་དང་འགྲོ་བ་མིའི་ཐོབ་ཐང་སྲུང་སྐྱོབ་སྐོར་ལ་གསུངས་དོན། གོ་ལ་རང་བཞིན་གྱི་མཛའ་འབྲེལ་དང་། བྱམས་སྙིང་རྗེ། བརྩེ་བ་བཅས་ཀྱི་མངོན་འདོད་ནི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ལྡེ་མིག་ཡིན། མངོན་འདོད་འདི་ལ་བརྟེན་ནས་དཔལ་ཡོན་ལྡན་པའི་མིའི་སྤྱི་ཚོགས་ཤིག་གྲུབ་པ་དང་། དབུལ་ཕོངས་དང་གྲལ་རིམ། ཆོས་ལུགས། སྤྱི་ཚོགས་ཀྱི་དབྱེ་ཁྱད་བཅས་ལས་བྱུང་བའི་འགྲོ་བ་མིའི་ཐོབ་ཐང་བརྡལ་བཤིག་གི་གནས་སྟངས་དེ་ཚོ་རྩ་མེད་བཟོ་གི་ཡོད་པ་རེད།
ཆོས་ལུགས་དང་། སྐད་ཡིག ས་གནས་མི་འདྲ་བ་བཅས་ལ་མ་ལྟོས་པར་འགྲོ་བ་མིའི་རིགས་ཚང་མ་འདྲ་མཉམ་ཡིན། སྒོར་མོ་དང་འབྱོར་བ་ཁོ་ནས་མི་ཚེ་ལ་བདེ་སྐྱིད་སྐྲུན་མི་ཐུབ་ཅེས་གསུངས་ཡོད།
སྲིད་སྐྱོང་བ་ རཱ་མི་ཤི་ ཐ་ཀོར་ལགས་ཀྱིས་༧གོང་ས་མཆོག་ནི་དེང་གི་འཛམ་གླིང་སྟེང་འགྲོ་བ་མིའི་ཐོབ་ཐང་གླེང་མཁན་གྱི་གྲགས་ཅན་མི་སྣ་ཞིག་ཡིན་ལ། དེང་སྐབས་ཤེས་ཡོན་དང་ཚན་རིག འཕྲུལ་ལས་སོགས་གང་སར་དར་བར་མ་ལྟོས་པར་འགྲོ་བ་མིའི་ཐོབ་ཐང་བརྡལ་བཤིག་ནི་མུ་མཐུད་ནས་རྒྱ་ཁྱབ་ཏུ་འགྲོ་བཞིན་པ་ནི་ཡ་མཚར་བ་ཞིག་རེད་ཅེས་གསུངས།
དེ་འདྲ་དེ་ཡང་བཟང་གི
ང་ལ་མཚོན་ན་མཆན་འབྲི་རྒྱུར་དཀའ་ངལ་མི་འདུག འོན་ཀྱང་དུས་བབ་དྲ་རྒྱ་ནང་འཛུལ་རྒྱུར་དཀའ་ངལ་ཞིག་འཕྲད་བཞིན་འདུགས།
ངའི་འདི་ནས་མཆན་འབྲི་མ་ཐུབ་པ་ཅང་མི་འདུག འོན་ཀྱང་དྲ་གྲོགས་མང་པོ་ཞིག་ལ་དཀའ་ངལ་འཕྲད་ཀྱིན་ཡོད་པ་འདྲ།
དེ་རིང་མཆན་འབྲི་ཐུབ་གི་མེད་པ་འདྲ། དེ་བས་ངས་འདིར་ཆེད་དུ་ཚོད་ལྟ་བྱས་པ་ཡིན། མཆན་འགོད་ཐུབ་གི་འདུག འདི་ནས་མཆན་འགོད་ཐུབ་ཚེ་གཞན་དུའང་གཅིག་མཚུངས་ཡིན།