བོད་རིགས་བུད་མེད་རྩོམ་པ་པོ་འོད་ཟེར་ལགས་ལ་སྐབས་བདུན་པའི་རྒྱའི་རང་དབང་སྨྱུག་ཚོགས་ཀྱི་ལེན་ཊོ་ཞི་རྗེས་དྲན་རྟགས་མའི་གཟེངས་རྟགས་ཕུལ་ཡོད་འདུག
ཕྱི་ཚེས་ ༢༡ ཉིན་རྒྱའི་རང་དབང་སྨྱུག་ཚོགས་ཀྱི་གོ་སྒྲིག་འོག་ཧོང་ཀོང་དུ་ ༢༠༠༩ ལོའི་སྐབས་བདུན་པའི་ལེན་ཊོ་ཞི་རྗེས་དྲན་རྟགས་མ་འབུལ་བཞེས་ཀྱི་མཛད་སྒོ་ཞིག་འཚོགས་ཏེ། རྒྱ་ཡིག་གི་ལམ་ནས་རྩོམ་ཡིག་སྤེལ་བཞིན་པའི་རང་དབང་གི་རྩོམ་པ་པོ་གསུམ་ལ་ཐེངས་འདིའི་རྗེས་དྲན་རྟགས་མ་ཕུལ་ཡོད་འདུག་ལ། བོད་ཀྱི་བུད་མེད་རྩོམ་པ་པོ་འོད་ཟེར་ལགས་ཀྱང་ཐེངས་འདིའི་གཟེངས་རྟགས་ཐོབ་མཁན་གསུམ་གྱི་གྲས་སུ་ཡོད་འདུག ཐེངས་འདིར་ཁོ་མོ་ལས་གཞན། ཀྲུང་གོའི་ས་ཁྲའི་དཔང་རྟགས་ཞེས་པའི་བརྩམས་ཆོས་ཀྱི་རྩོམ་པ་པོ་ཝང་ཅན་ཧེ་དང་། རྒྱ་གཞུང་གིས་ཁྲིམས་འགལ་གྱི་དཔེ་དེབ་པར་བསྐྲུན་བྱེད་མཁན་དང་རྒྱལ་ཁབ་ཀྱི་གསང་བ་ཕྱིར་སྒྲོག་མཁན་གྱི་ཉེས་མིང་འོག་ལོ་ ༡༣ གྱི་ཁྲིམས་ཐག་བཅད་དེ་ད་ལྟའི་ཆར་བཙོན་ཁང་དུ་ཡོད་པའི་ཀུང་ཀྲིག་གྲོང་ཁྱེར་སྤྱི་ཚོགས་ཚན་རིག་ཞིབ་འཇུག་ཁང་གི་ཞིབ་འཇུག་པ་ཞོའུ་ཙི་རོན་ཡིན་འདུག
ཐེངས་འདིར་རྒྱའི་རང་དབང་སྨྱུག་ཚོགས་ཀྱིས་མི་སྣ་འདི་གསུམ་ལ་གཟེངས་རྟགས་ཕུལ་ཡོད་ཀྱང་། རང་དབང་ཅན་གྱི་རྩོམ་པ་འདི་གསུམ་དངོས་སུ་གཟེངས་རྟགས་འབུལ་བཞེས་ཀྱི་མཛད་སྒོའི་སྟེང་ཞུགས་ཐུབ་མེད་པར་མི་སྣ་གཞན་དག་གིས་ཁོང་གསུམ་གྱི་ཚབ་བྱས་ཏེ་གཟེངས་རྟགས་བཞེས་ཡོད་པ་རེད། རྩོམ་པ་པོ་འོད་ཟེར་ལགས་ཐེངས་འདིའི་གཟེངས་རྟགས་འབུལ་བཞེས་ཀྱི་མཛད་སྒོར་ཞུགས་མ་ཐུབ་པའི་རྒྱུ་རྐྱེན་གཙོ་བོ་ནི། རྒྱ་གཞུང་གིས་ཁོ་མོར་ཕྱི་བསྐྱོད་ཡིག་ཆ་བཟོ་བར་བཀག་འགོག་བྱས་པར་བརྟེན་ཁོ་མོ་དངོས་སུ་བཅར་ཐུབ་མེད་ཀྱང་། འོད་ཟེར་ལགས་ཀྱིས་ཐེངས་འདིའི་གཟེངས་རྟགས་འབུལ་བཞེས་གནང་མཁན་གྱི་རང་དབང་སྨྱུག་ཚོགས་དང་འབྲེལ་ཡོད་སྡེ་ཚན་གྱི་མི་སྣར་བཀའ་དྲིན་ཞུ་ཡིག་ཅིག་ཕུལ་ཡོད་འདུག ཁོ་མོར་གཟེང་རྟགས་འདི་ཕུལ་དོན་ཐད་རང་དབང་སྨྱུག་ཚོགས་ཀྱི་བསྒྲགས་གཏམ་ཞིག་སྤེལ་བའི་ནང། བུད་མེད་རྩོམ་པ་པོོ་འོད་ཟེར་ལགས་ནི། ཕྱི་ལོ་ ༡༩༩༠ ལོ་ནས་བཟུང་རྒྱ་ཡིག་གི་ལམ་ནས་བོད་མི་རིགས་ཀྱི་བདེ་སྡུག་དང་གནས་སྟངས་སོགས་རྩོམ་ཡིག་གི་ལམ་ནས་རྒྱ་རིགས་མི་མང་གཙོས་པའི་རྒྱལ་སྤྱིའི་ནང་འགྲེལ་བརྗོད་གནང་བ་ལ་བརྟེན་ནས་ཁོ་མོ་ལས་གནས་ནས་ཕྱིར་ཕུད་བཏང་བའི་གནས་སྟངས་ཆགས་ཡོད་པ་དང་། ལྷག་པར་ ༢༠༠༨ ལོའི་བོད་མིའི་ཞི་རྒོལ་ཆེན་མོ་ནས་བཟུང་ཁོ་མོས་སྙིང་སྟོབས་ཆེན་པོས་བོད་མི་རིགས་ཀྱི་དངོས་ཡོད་ཀྱི་གནས་ཚུལ་དྲང་བདེན་གྱི་ལམ་ནས་སྤེལ་ཡོད་ཚུལ་སོགས་ལ་བལྟས་ཏེ། ཐེངས་འདིར་ཁོ་མོའི་ཞུམ་མེད་ཀྱི་སྙིང་སྟོབས་ལ་བསྔགས་བརྗོད་དང་མ་འོངས་མུ་མཐུད་རྒྱུན་སྐྱོང་བྱ་རྒྱུའི་རེ་སྐུལ་བྱ་ཆེད་དུ་ཕུལ་བ་ཡིན། ཞེས་བརྗོད་ཡོད་འདུག
རྒྱའི་རང་དབང་སྨྱུག་ཚོགས་ཀྱིས་གོ་སྒྲིག་གནང་བཞིན་པའི་ལེན་ཊོ་ཞི་རྗེས་དྲན་རྟགས་མའི་གཟེངས་རྟགས་འདི་ནི། རྒྱ་ནག་གིས་རིག་གནས་གསར་བརྗེ་ཆེན་མོའི་སྐབས་སུ་ཡ་ང་སྙིང་རྗེ་མེད་པའི་ཐོག་དྲག་གནོན་དང་གདུག་རྩུབ་ཀྱི་བྱ་སྤྱོད་སྤེལ་ཏེ། མྱ་ངན་ལས་འདས་པའི་བུད་མེད་སློབ་མ་ལེན་ཊོ་ཞི་རྗེས་དྲན་གྱི་ཚུལ་ཏུ་སྤེལ་བའི་རྟགས་མ་ཞིག་ཡིན་འདུག་ལ། ལོ་རེའི་ནང་རྒྱའི་རང་དབང་སྨྱུག་ཚོགས་ཀྱིས་རྒྱ་ཡིག་གི་ལམ་ནས་དྲང་བདེན་དང་དངོས་ཡོད་ཀྱི་ལམ་ནས་མི་རིགས་དང་མི་མང་གི་བདེ་སྡུག་གླེང་བ་དང་རྒྱལ་ཁབ་ཀྱི་དྲང་བདེན་མིན་པའི་བྱ་སྤྱོད་སུན་འབྱིན་བྱེད་པའི་རྩོམ་པ་པོར་གཟེངས་རྟགས་འདི་འབུལ་གནང་གི་ཡོད་པ་རེད།
མཚམས་འདྲི་བཀྲ་ཤིས་བདེ་ལེགས་གྲངས་མེད་ཡོད་ད་བོད་ཀྱི་དཔལ་མོ་ལགས།
མཚམས་འདྲི་ཡོད། ཁྱེད་ཀྱི་རྩོམ་ཡིག་རེ་རེའི་ནུས་ཤུགས་ཀྱིས་ཀྱང་འཛིམ་གླིང་གི་
རྣ་བ་འུར་འུར་དུ་བཏངས། ཅི་འདྲའི་ཉན་སྤྲོ་བ་ཞིག་ལ། མི་རིགས་ཀྱི་ལ་རྒྱ་
གླེང་བ་དང་། བདེན་དོན་གྱི་གནས་ཚུལ་བསྒྲགས་པ་འདི་ཆེས་བཀུར་འོས་པའི
ཡ་རབས་ཀྱི་བྱ་བ་ཞིག་རེད། ངས་ཁྱོད་ལ་ནམ་ཡང་རྒྱབ་སྐྱོར་དང་། གདང་འཇོག་
བྱེད་ངེས་ཡིན།
གལ་སྲིད་གུས་འོས་བུད་མེད་འདི་རྒྱའི་མནའ་མ་མིན་ན་རྒྱའི་ནང་གདེངས་འཇོག་འདི་འདྲ་ཞིག་ཡོང་སྲིད་དམ། བོད་ཀྱི་རྩོམ་པ་པོ་ག་ཚད་བཙོན་ནང་དུ་ཡོད་དམ། གཅིག་ལའང་རྒྱས་གདེངས་འཇོག་མི་བྱེད་དོན་ཅི་ཡིན་ནམ།
རྗེས་སུ་ཡི་རང་དང་ཐུགས་རྗེ་ཆེ་ཞུ།
ཡག་གི་ཡ།
མཛངས་མ་འོད་ཟེར་ལགས་ཀྱིས་དཔའ་བོའི་སྙིང་ལ་ལ་རྒྱའི་གཟེངས་བསྟད་ཅིང་། བདེན་པའི་ལུགས་ལ་གནས་ལུགས་ཀྱིས་ཟུངས་སྤྲོས་པའི་བརྩམ་ཆོས་དག་ལ་ནམ་ཡང་མཇལ་འདོད་པ་དང་། ནམ་ཡང་རེ་ཞིང་སྒུག་གིན་ཡོད། འདི་འདྲའི་རྟིང་སྐུལ་གྱིས་ཁོ་མོའི་རྣོ་བའི་སྨྱུག་རྩེ་ཡོན་པོའི་ལམ་དུ་མ་ལྷུང་བར། སྒེར་གཤིས་ཀྱི་སྐྱུགས་དྲོ་བའི་དུངས་ཀ་ཐེད་ལ་བོར་བའི་རྩོམ་ཡིག་རིན་པོ་ཆེ་དག་གཡུལ་ལས་རྒྱལ་བའི་སྨོན་འདུན་ཞུ།
བོད་ཀྱི་བུ་མེད་རྒྱལ་གྱུར་ཅིག འོད་ཟེར་རྒྱལ་གྱུར་ཅིག རང་དབང་གི་རྩོམ་ཡིག་དེ་དག་རྒྱལ་གྱུར་ཅིག
འཛམ་གླིང་ནང་ཆེས་སྙན་གྲགས་ཡོད་པའི་བོད་རིགས་བུ་མེད་རྩོམ་པ་པོ་འོད་ཟེར་ལགས་ལ་དེ་རིང་རྒྱའི་རང་དབང་སྨྱུག་ཚོགས་ཀྱི་ལེན་ཊོ་ཞི་རྗེས་དྲན་རྟགས་མའི་གཟེངས་རྟགས་ཐོབ་པར་དགའ་བསུ་ཞུ་རྒྱུ་དང་གཞིས་བྱེས་གཉིས་སུ་ད་ཡོད་བོད་རིགས་རྩོམ་པ་པོའི་མིང་གཞུང་དུ་འཁོད་པའི་ཚོགས་སྡེ་དང་འཐུན་ཚོགས་སོགས་སྤྱིར་སྒེར་སུ་འདྲ་ཞིག་གི་སོ་སོའི་ཁན་ཕན་མ་ཡིན་པར་དོན་དམ་བོད་མི་རིགས་ལ་བཅངས་པའི་ལ་རྒྱ་ཡོད་ན་ཤེས་འགྱོན་དང་སྙིང་སྟོབས་སོགས་དེ་སྔར་བྱུང་མ་མྱོང་བ་ཟེར་ན་ཆོག་དངོས་ཡོད་ད་སྐབས་འགྲན་ཟླ་མེད་པའི་ཕུལ་བྱུང་བུ་མེད་རྩོམ་པ་པོ་འོད་ཟེར་ལགས་ཀྱི་ལམ་སྟོན་འོག་འགྲོ་དགོས་གལ་ཆེ་བ་དང་དུས་རྒྱུན་ཉམས་ལེན་གནང་གལ་ཆེ་བ་མཐོང་།།
སྙིང་ནས་བཀྲ་ཤེས་བདེ་ལེགས་ཞུ།
ཐོབ་དགོས་ས་ཞིག་ལ་ཐོབ་འདུག སྤྲད་དགོས་ས་ཞིག་སྤྲད་འདུག
འདི་ལྟ་བུའི་བོད་རིགས་བུད་སྨན་ཞིག་ཡིན་ཚེ། བུད་སྨན་ལ་ཐོབ་ཐང་ཡོད་མེད་དང་དགོས་སོགས་ཀྱི་སྐད་ཆ་གཅིག་མི་བཤད་པར་རང་ཤུགས་ཀྱིས་ཐོབ་ཐང་དེ་བླངས་ཡོད་པ་མ་ཟད། ང་ལྟ་བུའི་སྐྱེ་པ་ཕོ་ལུས་བླངས་ཀྱང་ཅི་ཡང་མི་འཇོན་མཁན་དག་གི་ལྟག་པར་ཞོན་བསྡད་མི་འདུག་གམ། ཨ་ཅེ་འོད་ཟེར་ལ་སྙིང་ཐག་པ་ནས་ཐུགས་རྗེ་ཆེ་ཞུ་བ་དང་། འབྱུང་འགྱུར་ཡང་མུ་མཐུད་ནས་བརྩོན་པ་ཆེན་པོས་བོད་རིགས་སྤྱི་དང་། ལྷག་པར་དུ་ཚུལ་མིན་སྡུག་སྦྱོང་མནར་སྤྱོད་འོག་མྱོང་སྡོད་པའི་འགྲོ་མིའི་ཐོང་ཐང་ཐད་བརྩོད་པ་ཆེར་བསྐྱེད་ཀྱིས། ཁྱེད་ཀྱི་ཅི་བསམ་འགྲུབ་པའི་སྨོན་འདུན་ཞུ་ཞུ་ཞུ།