ཆོས་རིག་དྲུང་ཟུར་ཚེ་རིང་དོན་འགྲུབ་ལགས་ཀྱིས་༧གོང་ས་མཆོག་གི་སྐུ་མདུན་ནས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པའི་མཛད་ཁུར་དམ་བཅའ་ཕུལ་ཡོད་འདུག
ྋགོང་ས་མཆོག་གིས་བོད་གཞུང་ཆོས་རིག་དྲུང་ཟུར་ན་མེ་བླ་ཁང་ཚེ་རིང་དོན་གྲུབ་མཆོག་ལ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པའི་འོས་འཛུགས་གནང་བ་དང་། སྐབས་བཅུ་བཞི་པའི་བོད་མི་མང་སྤྱི་འཐུས་གྲོས་ཚོགས་ཚོགས་དུས་དགུ་པའི་ཐོག་བཙན་བྱོལ་བོད་མིའི་བཅའ་ཁྲིམས་ལེའུ་ ༦ དོན་ཚན་རེ་གསུམ་ ༦༣ པའི་ནང་གསེས་གསུམ་ ༣ པའི་དགོངས་དོན་བཞིན་སྤྱི་མོས་འོས་འདེམས་བྱུང་བ་ལྟར། ཕྱི་ཚེས་ ༢༤ ཉིན་ཁོང་བཞུགས་སྒར་གཟིམ་ཆུང་ཕོ་བྲང་དུ་བཅར་ཏེ་ྋགོང་མཆོག་དབུས་པའི་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་དང་། ལྷན་ཁང་ཁག་གི་བཀའ་བློན་རྣམ་པ་དང༌ལྡི་ལི་དོན་གཅོད་དང་བཀའ་བློན་གཅིག་ལྕོགས་བསྟན་པ་ཚེ་རིང་མཆོག བོད་མི་མང་སྤྱི་འཐུས་ཚོགས་གཙོ་ཚོགས་གཞོན་མཆོག་བཅས་ལྷན་ཞུགས་ཐོག་བོད་གཞུང་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པའི་མཛད་ཁུར་དམ་བཅའ་ཕུལ་ཡོད་པ་རེད།
ཁྲིམས་ཞིབ་པ་ན་མེ་བླ་ཁང་ཚེ་རིང་དོན་འགྲུབ་ལགས་ནི། ༡༩༧༥ ལོའི་ཟླ་ ༡༠ པའི་ཚེས་ ༡ ཉིན་ནས་གཞུང་ཞབས་ལས་བྱེད་ཀྱི་ཁོངས་སུ་ཞུགས་པའི་རྒན་རབས་ལས་བྱེད་ཞིག་ཡིན་འདུག་ལ། ཁོང་གིས་སྔ་ཕྱི་བར་གསུམ་དུ་བོད་གཞུང་ལྡི་ལི་དོན་གཅོད་དང་མོན་གྷོ་ཊི་ས་གནས་ཀྱི་དངུལ་གཉེར་བ། མན་སྤར་མཉམ་དྲུང་ལས་ཚབ། སྦེ་རི་བོད་ཚོགས་ཀྱི་གཞི་མགོ་བཅས་ལོ་བཅུ་ཕྲག་དུ་མའི་རིང་བོད་གཞུང་གི་གཞུང་ཞབས་ལས་བྱེད་ཕྱག་ལས་རྣམ་གྲངས་ ༡༤ ནང་འཛུགས་ཞུགས་གནང་ཡོད་པ་དང་། ལྷག་པར་ཕྱི་ལོ་ ༡༩༩༤ ལོ་ནས་ཁྲིམས་ཞིབ་ཟུང་དྲུང་དང་ཆེས་མཐོ་ཁྲིམས་ཞིབ་ཁང་གི་དྲུང་འཕར། བཀའ་དྲུང་ཡིག་ཚང་གི་དྲུང་འཕར་དང་བཀའ་དྲུང་ལས་ཚབ་བཅས་གནང་བ་མ་ཟད། ༢༠༠༦ ལོ་ནས་བཟུང་བོད་གཞུང་ཆོས་རིག་དྲུང་ཆེའི་ཕྱག་ལས་གནང་བ་དང་། ༢༠༠༨ ལོའི་ཕྱི་ཟླ་ ༨ པའི་ཚེས་ ༢༧ ཉིན་རྒས་ཡོལ་གྱི་བཀའ་འཁྲོལ་བསྩལ་ཡོད་པ་རེད།
སྐུ་ངོ་དྲུང་ཟུར་མཆོག་ལ་བཀྲ་ཤིས་བདེ་ལེགས་ཀྱི་རྟེན་འབྲེལ་ཞུ། གྲོ་མ་འབྲས་བསིལ་དང་མོ་མ་ཚ་པོ་དེ་དཔེ་ཞིམ་པོ་བྱུང་། ཐུགས་རྗེ་ཆེ་ཞུ། གཞན་སྐུ་ངོའི་ལས་རྒྱུན་རིང་མཛད་པ་མཐའ་འཁྱོལ་དང་ཁྲིམས་དོན་དྲང་པོ་ལམ་ལྷུང་ཡོང་བར་སྨོན།