སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} བརྒྱ།

ཕུ་བོ་ཟླ་བ་ལགས།
ང་རང་གཏན་ཁྱེད་རང་དང་ལྷན་དུ་བོད་ལ་མི་འགྲོ ཁྱེད་རང་གིས་ངའི་ཆེད་དུ་སེམས་ཁྲལ་བྱེད་མི་དགོས། ང་རང་ལ་མངལ་སྤྲུམ་ཡོད། དེ་ཡི་ཕ་རྒན་ནི་ཁྱེད་རང་གི་ཤེས་པ་རེད། ང་ཚོ་བལ་ཡུལ་ནས་ཡར་ཡོང་དུས་ལམ་སྐབས་སུ་ཐུག་པའི་བློ་བཟང་ཟེར་བའི་ཕོ་གསར་དེ་རེད། ཁོ་རང་ནི་བྱིས་པ་འདིས་ཕ་རྒན་ཡིན། ད་ལྟ་ཁྱེད་རང་གི་ཁོ་ལ་འབྲེལ་བ་བྱེད་འདོད་ཡོད་ན། ཁ་པར་ཨང་གྲངས་འདི་རེད། དེང་སྐབས་ཁོ་རང་ལ་དྭགས་སུ་གློག་བརྙན་ཞིག་འཁྲབ་བཞིན་ཡོད་པ་རེད། ངས་ཁོ་རང་ལ་སྒུག་ནས་འདུག་རྒྱུ་ཡིན། ཁྱེད་རང་ཕྱིར་འགྲོ་རོགས་ཞུ།

ཁྱེད་རང་གི་ནུ་མོ་མཚམས་སྐྱིད་ནས།

བློ་བཟང་གིས། ཟླ་བ་ལགས། ངས་ཁྱེད་རང་ལ་སྐད་ཆ་མང་བོ་ཞིག་བཤད་རྒྱུ་མེད། ཁྱེད་རང་གི་ནུ་མོ་དང་ངེད་གཉིས་སྔ་ས་ནས་འབྲེལ་བ་གང་ཡང་མེད། དེ་ནི་ཁོ་མོ་སློབ་གྲྭ་ནས་བུད་དེ་རྡེ་ར་སྒྲོང་དུ་སོང་བའི་ཕྱིར་ཉིན་དེ་ནས་ངེད་གཉིས་གཏན་ཐུག་འཕྲད་ཀྱང་བྱས་མྱོང་མེད། གལ་སྲིད་བྱིས་པ་འདྲ་ཡོད་ན་དེ་ནི་ང་རང་གི་བྱིས་པ་མིན་པ་ངས་ཁས་ལེན་བྱེད་ཐུབ་ཀྱི་ཡོད།

ཟླ་བས། ཁྱེད་རང་གི་དངོས་ནས་ཐག་རིང་ས་ནས་སྐད་ཆ་བརྫིག་པོ་ཞིག་བཤད་ཀྱི་འདུག ཐག་ཉེ་འདི་ཞིག་ན་ཡོད་ན་་དེ་འདྲ་ཞིག་ཨེ་ཡིན་ན།

བློ་བཟང་གིས་སྐད་ཆ་དེ་ལྟར་བཤད་པ་ཐོས་མ་ཐག རེད། ཁྱེད་རང་གིས་དེ་འདྲ་བསམ་གྱི་ཡོད་ན་འགྲིག་གི་རེད། ང་རང་ཐག་རིང་ཐུང་གང་དུ་ཡོད་ཀྱང་སྐད་ཆ་གཅིག་ལས་གཉིས་མེད། ཁྱེད་རང་གི་ནུ་མོ་དེ་ནི་ཁྱེད་རང་ལྟ་བུ་ཁ་ཚིག་བརྟན་པོ་ཅན་ཞིག་ཡིན་རྒྱུ་ན་དངོས་ནས་རེ་བ་ཞིག་ཡོད་ངེས་ཡིན། ཁྱེད་རང་གི་ནུ་མོ་ལ་ང་ལས་ཀྱང་ཁྱེད་རང་ལ་རྒྱུས་མངའ་ཡོད་ངེས་ཡིན།

ཟླ་བས། ངས་དྲང་མོ་བཤད་པ་ཡིན་ན། ང་རང་གི་ནུ་མོ་འདི་ལ་བྱིས་པ་འདྲ་འཁོར་ཡོད་པ་བདེན་པ་ཡིན་ན། བྱིས་པ་དེ་ཡི་ཕ་རྒན་དང་ལྷན་དུ་བཟའ་ཚང་ཞིག་ཆགས་སོང་བ་ཡིན་ན་ཡག་པོ་ཡོད་པ་རེད་་བསམ་གྱི་ཡོད། དེ་མ་གཏོགས་ང་རང་ངོས་བཤད་ན་ད་དུང་ངའི་ནུ་མོ་འདི་བཟའ་ཚང་བྱེད་དུ་འཇུག་རྩིས་མེད།

བློ་བཟང་གིས། དེས་ན་ཁྱེད་རང་གི་ནུ་མོ་ང་དང་ལྷན་དུ་བསྡད་ཉིན་ནས་ཁྱེད་རང་གི་འགན་ཨེ་ཆགས། སྔོན་ཆད་ལྟར་མི་བྱེད་པར། བབ་ཆགས་པོ་ཞིག་དང་མི་ཚེ་ལ་འགན་ཡོད་པ་ཞིག་ཡོང་རྒྱུར། ངས་ཁྱེད་རང་ལ་མཐའ་གཅིག་དུ་ཐག་བཅད་ནས་བཤད་ཐུབ་པ་ཞིག་ནི། གལ་སྲིད་ཁོ་མོ་མངལ་སྤྲུམ་ཡོད་སྲིད་ཀྱང་། དེ་ཡི་ཕ་རྒན་ནི་ང་རང་གཏན་ནས་མིན། རྒྱུ་མཚན་ནི་ཁོ་མོ་དང་བྲལ་ནས་འགྲོ་བའི་སྐབས་དེར་ངེད་གཉིས་ཀྱིས་བརྟག་དཔྱད་བྱས་པ་ཡིན།

ཟླ་བས། དེ་འདྲ་ཞིག་ཡིན་ན་ནི་དངོས་ནས་ཡག་པོ་རེད། ངས་བསམ་ན་ཁྱེད་རང་ལ་ཁ་པར་གཏོང་ངེས་ཡིན། དེ་ཡིན་ན་ཁོ་མོ་གང་དུ་ཡོད་མེད་གསལ་བོ་ཞིག་འདྲི་རོགས། ང་རང་ཕར་མི་འགྲོ་རང་འགྲོ་ཡིན། དུས་ཚོད་ཀྱི་འདང་གི་མེད། ཕར་སླེབས་ནས་ཁྱེད་རང་ལ་འབྲེལ་བ་བྱེད་ཆོག

བློ་བཟང་གིས། ངས་བལྟས་པ་ཡིན་ན། ཁོ་མོས་ད་ནི་ང་རང་ལ་གཏན་ནས་ཁ་པར་གཏོང་གི་མ་རེད། རྒྱུ་མཚན་ནི་ཉེ་སྔོན་ངས་ཁོ་མོ་ལ་ང་རང་ལ་ཁ་པར་མ་གཏོང་ཟེར་ནས་སེམས་ཐག་བཅད་པ་ཡིན། དེ་ནས་བཟུང་ཁོ་མོས་ང་རང་ལ་ཁ་པར་གཏན་ནས་སླེབས་མ་སོང་། གལ་སྲིད་སླེབས་སོང་བ་འདྲ་ཡིན་ན་ངས་འདྲི་ངེས་ཡིན།

མཚན་མོ་དེར་བློ་བཟང་གི་སྤི་རེག་འཐུང་བཞིན་ཡོད་ལ། མཚན་ཚོགས་དེ་ནི་འཁྲབ་སྟོན་མ་གཙོ་བོའི་སྐྱེ་སྐར་ལ་ཚོགས་པ་ཞིག་ཡིན་ཡང་། བློ་བཟང་ལ་མཚོན་ན་སྤི་རེག་འཐུང་བའི་སྐོ་སྐབས་ཡག་པོ་ཞིག་སྤྲད་པ་ལྟ་བུ་ཆགས་ནས་ག་ལེར་ཟུར་ཞིག་ནས་འཐུང་བཞིན་པའི་སྐབས་སུ། བདེ་འཚོ་ཁོ་རང་གི་ཟུར་དུ་ཡོང་ནས། ཁྱེད་རང་གི་འདི་ན་ཁེར་འཐུང་བྱས་དེ་བསྡད་ཡོད་དམ། སེམས་པ་མི་སྐྱིད་ནི་མིན་ན།

བློ་བཟང་གིས། སེམས་པ་མི་སྐྱིད་ཀྱང་ཐབས་ཤེས་འདྲ་གང་ཡོད། དེ་ལས་སྤི་རེག་ཞིག་འཐུང་ན་དེ་སྐྱིད་པོ་རེད། ར་བཟི་སོང་། དོན་དག་ཚང་མ་བརྗེད་འགྲོ་བ་རེད།

བདེ་འཚོས། དེ་ལས་ང་དང་ལྷན་དུ་ཞབས་བྲོ་ཞིག་འཁྲབ་དུ་འགྲོ ལྟོས་དང་ཕར་ཕྱོགས་དེ་རུ་བོད་པའི་བུ་མོ་ཚོ་དང་བོད་པའི་ཕོ་གསར་ཚོ་མི་འདུག་གམ། འགྲོ་ཟེར་ནས་བློ་བཟང་གི་ལག་མགོ་ནས་འཐེན།

བར་སྐབས་ཤིག་ལ་བདེ་འཚོས། བློ་བཟང་ལ་ད་བདེ་མོ་བྱོས། ང་རང་ཉལ་དུ་འགྲོ་རྒྱུ་ཡིན། སང་ཞོགས་སྔ་བོ་ནས་བླངས་དགོས་ཀྱི་ཡོད་པ་རེད། ཁྱེད་རང་ཡང་ཕར་ནང་དུ་སོང་བ་ཡིན་ན་ཡག་ས་རེད།

བློ་བཟང་གིས་ཁྱེད་རང་གི་ཉལ་ས་གང་དུ་ཡོད་ང་སོང་ནས་གཅིག་བལྟས་པ་ཡིན་ན་འགྲིག་གི་རེད་དམ་ཟེར་ནས་ཁོ་མོའི་རྗེས་སུ་སྙེགས་ནས་ཁོང་ཚོའི་རས་གུར་ཆུང་ཆུང་དེ་ཡི་འགྲམ་དུ་ཕྱིན། འདི་རེད་དམ། ཡ་ཡ་་ ད་ཤེས་སོང་བདེ་མོ་བྱོས། ང་འགྲོ་རྒྱུ་ཡིན་ཟེར་ཞོར་གཙང་འགྲམ་ཕྱོགས་སུ་འགྲོ་མགོ་བཙུགས་པ་རེད།

བདེ་འཚོས། ཁྱེད་རང་གཙང་འགྲམ་ཕྱོགས་སུ་གང་ལ་འགྲོ་བཞིན་ཡོད། དེ་ཕྱོགས་ནས་སོང་ན་དངོས་ནས་ཉེན་ཁ་ཆེན་པོ་རེད། མུན་ནག་པའི་སྒང་ལ་བརྩིགས་པ་བརྒལ་བའི་སྐབས་སུ་གཙང་བོའི་ནང་དུ་ཟེགས་པ་ཡིན་ན་ཤི་རྒྱུའི་ཉེན་ཁ་ཡོད། གཙང་བོ་དེ་ཡི་ནང་དུ་ལྷུང་བ་ཡིན་ན། ཁྱེད་སྔོན་ཆད་ཆུ་རྐའི་ནང་དུ་ལྷུང་བ་དང་གཏན་ནས་མི་འདྲ། ཁྱེད་རང་དེ་ནས་མ་འགྲོ ངས་ཁྱེད་རང་ལ་ཞུ་བ་བྱེད།

བློ་བཟང་གིས་བདེ་འཚོས་ཁ་ལ་ཉན་ནས། ཁོ་མོས་སྤྲད་པའི་གློག་སྒྲོན་ཆུང་ཆུང་དེ་ཁུར་ནས་ག་ལེར་ལམ་ཆེན་ཕྱོགས་སུ་ཕྱིན་པ་རེད།