ཁམས་སྐད་བརྙན་འཕྲིན།

སེམས་འཁྱམ་ལགས།་་་་ཅིའི་ཕྱིར།

དེང་སང་ཚང་མས་ཕ་སྐད་གཙང་མ་རྒྱག་གི་ཡིན་ཟེར་ནས་ཤོར་ཤོར་རེད། ཡིན་ཡང་ཕ་སྐད་གཙང་མ་ཞེས་པ་འདིར་ཐུན་མོང་སམ་བྷོ་ཊས་བཟོས་པའི་བོད་ཀྱི་སྐད་ཡིག་ལ་གོ་དགོས་པ་མ་གཏོགས་རང་རང་གི་ཨ་ཕའི་སྐད་དེར་བོད་ཀྱི་ཕ་སྐད་གཙང་མ་གོ་བ་ལེན་ན་འགྲིག་གིན་མེད།
བོད་ཀྱི་སྐད་ཡིག་སྲུང་སྐྱོབས་བྱེད་མདོག་བྱས་ནས་རང་གི་ཨ་ཕའི་ལུང་ཆུང་ནང་གི་སྐད་ཆུང་དེ་རང་གི་བེད་སྤྱོད་བྱེད་པ་འདི་ནི། བོད་ཀྱི་སྐད་ཡིག་ལ་སྲུང་སྐྱོབ་བྱེད་པ་མ་ཡིན་པར་རྩ་གཏོར་གཏོང་བ་ཡིན།

འདྲི་བ་ཅིག་ཡོད་པ་དེ་ནི། ཡུལ་ལུང་སོ་སོའི་ཡུལ་སྐད་བརྙན་འཕྲིན་གྱིས་བོད་རིགས་སྤྱི་སྐད་ཀྱི་ཡར་རྒྱས་ལ་ཕན་པ་ཆེའམ་གནོད་ཆེ། ཤེས་མཁན་ཅིག་ལ་ཕན་པ་ཆེ་བ་ཡོད་རེད། མི་ཤེས་མཁན་ཅིག་ལ་གནོད་ཆེ་བ་ཡོད་རེད། འོ་ན། ཤེས་མཁན་མང་བ་ཡོད་དམ། མི་ཤེས་མཁན་མང་བ་ཡོད་རེད། དེ་ལ་གཟིགས་ནས་སོམས་དང་།

གོང་གི་གསར་འགྱུར་དེའི་གཤལ་ལ། མཆན་ ༤༤ ཙམ་བཏབས་འདུག་པ་དག་ནས་དོན་ལ་གནས་ཤིང་གནད་དུ་འཁེལ་བ། ཕྱོགས་ལྷུང་བྲལ་ཞིང་དྲང་ཚུགས་ཐུབ་པ་ནི། དོན་འགྲུབ་བཀྲ་ཤིས་ལགས་ཀྱིས་དཔྱད་གཏམ་དེ་རེད།

་དོན་འགྲུབ་བཀྲ་ཤིས་ལགས་ནས་གསུང་པ་ལྟ་ཁམས་སྐད་བརྙན་འཕྲིན་གསར་འཛུགས་སྤེལ་གནང་བར་འདི་དགའ་སུ་ཡོད་་་་་་བོད་སྤྱིའི་སྐད་ཡིག་གཅིག་གྱུར་ཡོང་དགོས་ན་ཡོང་ཁམས་སྐད་ཀྱི་ལས་རིགས་འདི་གསར་འཛུགས་བྱེད་འོས་པ་ཡིན་གང་ཡིན་ལབ་ན་སྟག་ཆེན་རྒྱ་ཁབ་རྒྱ་གར་ལ་དམིགས་སྤེལ་ལྟར་ན་བཟང་་་ཁམས་སྐད་བརྙན་འཕྲིན་གསར་འཛུགས་བྱེད་པ་འདི་ཡག་པོ་མ་རེད་ལབ་ངན་འདི་བོད་མའི་ཡུལ་ལུང་སོ་སོའི་སྐད་རིགས་རྣམས་རྩ་མེད་བྱེད་འདོད་ཡོད་པ་ཞིག་མ་ཡིན་ནམ་་་་་་་

ལས་མཐུན་གྱི་དྲ་གྲོགས་རྣམ་པས། གནད་དོན་རང་སྟེང་ལ་བགྲོ་གླེང་འོས་འཚམ་གནང་སོང་། ཐེངས་འདིར་ཁམས་སྐད་བརྙན་འཕྲིན་གསར་དུ་འཁྲུངས་པ་དེར་བཟང་ཕྱོགས་དང་ངན་ཕྱོགས་གཉིས་ངོས་ནས་གླེང་སོང་། བཟང་ཕྱོགས་གླེང་མཁན་ཚོས་ཁམས་པ་མི་མང་གིས་སོ་སོའི་ཕལ་སྐད་ཐོག་ནས་རྒྱལ་ཁབ་ཕྱི་ནང་གི་གནས་ཚུལ་ལ་ལྟ་ཉན་ཐུབ་པ་དང་། བོད་པའི་ཆོས་ལུགས་རིག་གནས་སྲུང་སྐྱོབ་ཐུབ་པ་སོགས་ལ་ངོས་འཛིན་བྱེད་ཀྱིན་འདུག་ཅིང་། ངན་ཕྱོགས་གླེང་མཁན་ཚོས་ཆོལ་ཁ་རེ་རེའི་ཁ་སྐད་སྟེང་ནས་བརྙན་འཕྲིན་བརྒྱུད་གཏོང་བྱས་ན། བོད་པའི་སྐད་ཡིག་གཅིག་གྱུར་དང་སྤྱི་སྐད་ལ་འགོག་རྐྱེན་ཡོད་རབས་དང་། ཆོལ་ཁ་གཅིག་ལའང་ལུང་པ་རེ་རེར་ཕལ་སྐད་མ་འདྲ་བ་ཡོད་སྟབས། དེ་ལ་རྡོག་རོལ་དང་མཐུན་ལམ་འབྲེལ་འདྲེས་ཐད་གནོད་རབས་བཤད་སོང་།

འོན་ཀྱང་། གླེང་གཞིའི་སྟེང་ནས་ཐལ་གྱིན་མེད་ཀྱང་། དེ་ཙམ་གནད་དུ་འཁེལ་བ་ཞིག་མ་རེད་སྙམ། དེར་བརྟེན། ངས་ཀྱང་བཟང་ཕྱོགས་དང་ངན་ཕྱོགས་གཉིས་ཐད་ནས་ལྟ་ཚུལ་ཞིག་གླེང་འདོད་བྱུང་། ངན་ཕྱོགས་ནས་ཁམས་སྐད་བརྙན་འཕྲིན་སྤེལ་གཏོང་བྱས་པ་དེས། རྒྱ་ནག་གཞུང་གི་གཡོན་ཐལ་ཆེ་བའི་ཆབ་སྲིད་དྲིལ་བསྒྲགས་དང་། བོད་ཕྱི་ནང་ཁ་བྲལ་དབྱིན་དཀྲུགས་ཀྱི་ལག་ཆར་བེད་སྤྱོད་གཏོང་རྒྱུར་གྲ་སྒྲིག་ཡོད་པ་དེ་རེད། འོན་ཀྱང་། དེ་ལ་གཡོལ་ཐབས་ཡོད་པ་མ་རེད། དབུས་སྐད་དང་ཨམ་སྐད་གཉིས་སྔ་མོ་ནས་གཏོང་མུས་རེད། བཟང་ཕྱོགས་ནས་བཤད་ན་དགེ་མཚན་མང་པོ་ཡོད་པ་རེད་སྙམ། བོད་སྤྱིའི་སྐད་ཡིག་རིག་གནས་སྲུང་འཛིན་དང་། བྱེ་བྲག་ས་གནས་ཀྱི་རིག་གནས་ཁྱབ་སྤེལ། ཚོང་འཕྲིན་དང་ཡུལ་སྐོར་ལྗོང་རྒྱུའི་ལས་རིག་དར་རྒྱས། རྒྱ་ཆེའི་མང་ཚོགས་ཚོས་རང་གི་ཕལ་སྐད་ཐོག་ནས་རྒྱལ་ཁབ་ཕྱི་ནང་གི་གནས་ཚུལ་མང་པོར་གསན་གཟིགས་ཐུབ་པ། བྱིས་པ་ཚོར་ཆུང་ངུའི་དུས་ནས་དེང་རབས་རང་བཞན་གྱི་སད་རྟོགས་དང་། གསར་གཏོད་རང་བཞིན་གྱི་སྤོབས་པ། གུ་ཡངས་རང་བཞིན་གྱི་བསམ་བློའི་རྨིང་གཞི་ཆགས་ཐུབ་པ་སོགས་ལ་ངོས་འཛིན་བྱེད་ཀྱིན་ཡོད།

ལྷག་པར་དུ་གོང་ནས་བོད་པའི་སྤྱི་སྐད་སྐོར་ལ་མང་པོ་ཞིག་བཤད་འདུག སྤྱིར་འཛམ་གླིང་སྐད་བརྡ་རིག་པའི་གཞུང་ལུགས་ལྟར་ན། མི་རིགས་མང་པོ་འདུས་སྡོད་ཀྱི་རྒྱལ་ཁབ་དང་། སྐད་རིགས་མང་པོ་མཉམ་སྤྱོད་ཀྱི་རྒྱལ་ཁབ། ཡང་ན། ཕལ་སྐད་མང་པོ་ལས་གྲུབ་པའི་མི་རིགས་སམ་སྤྱི་ཚོགས་གང་ཞིག་ཡིན་རུང་། དེ་ལ་སྤྱི་སྐད་ཅིག་གྲུབ་པར་བྱེད་པ་ལ། མི་རིགས་བྱེ་བྲག་པ་དག་གི་ཕལ་སྐད་ལ་དངོས་ཤུགས་བརྒྱུད་གསུམ་ནས་གནོན་བཙིར་སྤྲད་དེ་ཉམ་དམས་སུ་གཏོང་བ་དང་། ཆབ་སྲིད་དང་སྒྲིག་གཞི། བཀའ་ལུང་རང་བཞིན་གྱི་ཐོག་ནས་བཀག་བསྡོམས་བྱེད་པ། སྒྲིག་འཛུགས་དང་འཆར་གཞི་ལྡན་པའི་ཐོག་ནས་སྐད་ཡིག་གསར་བཟོ་བྱས་ཏེ། བཙན་ཚུགས་ཀྱིས་སྤྱི་ཚོགས་ནང་ཁྱབ་སྤེལ་གཏོང་བ་སོགས་ནི། ཐུན་མོང་གི་སྤྱི་སྐད་ཆགས་པར་ཕན་པ་ལས་གནོད་ཚབས་ཆེ་བ་མ་ཟད། མི་རིགས་དེ་དང་རྒྱལ་ཁབ་དེའི་སྲིད་འབྱོར་རིག་གསུམ་འཕེལ་རྒྱས་ལ་བརྡབ་གསིག་ཆེན་པོ་འགྲོ་བ་རེད། དེ་བས་ཕན་ཚུན་ལ་གུ་ཡངས་དང་མཐུན་སྒྲིལ། འབྲེལ་འདྲིས། མཉམ་སྤྱོད། བརྗེ་རེས། འགྲོ་འོང་། བརྩི་བཀུར། སློབ་སྦྱོང་བྱེད་པ་སོགས་ཀྱི་གོ་རིམ་བརྒྱུད་པ་ཡིན་ན། ད་གཟོད་གཅིག་གྱུར་རམ་ཐུན་མོང་གི་སྤྱི་སྐད་ཅིག་ངང་ངམ་ཤུགས་ཀྱིས་གྲུབ་ཡོང་བའི་སྐོར་བསྟན་ཡོད།

གང་ལྟར། ཐེངས་འདིར་ཁམས་སྐད་བརྙན་འཕྲིན་བརྒྱུད་གཏོང་བྱས་པ་དེའི་བཟང་ཕྱོགས་དང་ངན་ཕྱོགས་ཀྱི་ཧེ་བག་བསྡུར་བ་ཡིན་ན། ང་རང་གིས་བཟང་ཕྱོགས་ལྡབ་འགྱུར་གྱིས་མང་བར་ངོས་འཛིན་བྱེད་ཀྱིན་ཡོད། དེར་བརྟེན། ཁམས་སྐད་བརྙན་འཕྲིན་ཐད་གཏོང་བྱས་པར་རྟེན་འབྲེལ་ཞུ་རྒྱུ་ཡིན་ལ། མཁྱེན་ལྡན་འབྲེལ་ཡོད་དག་གིས་འབྱུང་འགྱུར་གྱི་ཁ་ཕྱོགས་མ་ནོར་བ་ཞིག་ལ་འབད་འབུང་བྱ་རྒྱུར་གསོལ་འདེབས་ཞུ་རྒྱུ་ཡིན།

མ་གཞིར་ལྷ་སའི་བརྙན་འཕྲིན་ཁང་དང།མཚོ་སྔོན་བརྙན་འཕྲིན་ཁང་ཞེས་གོ་མྱོང་དང་མཐོང་མྱོང་ཡོད་མོད།དབུས་དང་ཨ་མདོའི་བརྙན་འཕྲིན་ཁང་ཞེས་གོ་མྱོང་མེད་ལ་མཐོང་མྱོང་ཀྱང་དེ་བས་མེད།ལྷ་སའི་བརྙན་འཕྲིན་ཁང་ཞེས་མིང་བཏགས་ཡོད་སྟབས་ལྷ་སའི་སྐད་རང་བེད་སྤྱོད་བྱེད་ཆོག་་་་་་མཚོ་སྔོན་བརྙན་འཕྲིན་ཁང་གིས་ཕལ་ཆེར་མ་མདོ་མཚོ་སྔོན་གྱི་སྐད་བེད་སྤྱོད་གཏོང་བཞིན་ཡོད་པ་འདྲ།་ཁམས་སྐད་བརྙན་འཕྲིན་ཁང་གིས་ཁམས་སྐད་གང་ཞིག་གཙོ་བཟུང་བྱེད་རྩིས་ཡིན་ནམ།ཁམས་སྐད་ལ་ཏྲེ་ཧོར་སྐད།རྟའུ་སྐད།སྨར་ཁམས་སྐད།ལི་ཐང་སྐད།འབའ་ཐང་སྐད།ད་དུང་སྡེ་དགེ་དང་བྲག་གཡབ་སོགས་ཀྱི་སྐད་ཡོད་པས་ཧ་ཅང་རྙོག་དྲ་ཚ་པོ་ཞིག་མ་རེད་དམ།དྲ་གྲོགས་ཚོ།བོད་སྤྱིའི་སྐད་ཡིག་གཅིག་གྱུར་ཡོང་བ་ལ་བྱེ་བྲག་ཁམས་ཀྱི་སྐད་ཡིག་ལྟ་བུ་གཅིག་གྱུར་ཅིག་མ་བྱུང་ཐབས་མེད་ཡིན་སྟབས།འདི་ལ་དགོངས་ཚུལ་འདྲ་གསུང་རྒྱུ་ཨེ་ཡོད།

རྒྱ་རྡེའུ་ལགས་མི་མང་ན་རོ་མང་མ་གསུངས་དང་བོད་ཡིག་བོད་སྐད་མ་ཤེས་ཡང་ཁོག་ལ་བོད་མི་ཞིག་གི་ཁྲག་བཞུར་བཞིན་ཡོད་པའི་མི་རིགས་ཀྱི་ལ་རྒྱ་འདྲ་ཡི་མི་འདུག་དྲན་བཞིན་ཡོད།དཔེ་ན་༢༠༠༨་ལོ་གང་ས་ཅི་ཐད་ནས་རྒྱ་གཞུང་ལ་དཀའ་ངལ་མི་མྱུང་བ་ཞིག་སྤྲད་མ་སོང་ངམ།ག་རེ་བྱེད་ནའང་མི་ག་ཚད་མང་ན་ཡག་གི་རེད།

དཔེ་ན།ཁམས་སྐད་ནང་དུ་༼བྱ༽ལ་ས་སྒྲ་འདོན་མཁན་གཅིག་དང་ཙ་སྒྲ་འདོན་མཁན་བཅས་གཉིས་འདུག་དེ་ལས་གཞན་པ་ཐམས་ཅད་སྒྲ་མདངས་གཅིག་པ་རེད་འདུག་དྲན།

མདོ་དབུས་ཁམས་གསུམ་ཀྱི་བོད་མི་ཚོའི་རང་རང་སོ་སོའི་ས་ཆའི་ཆས་གོས་དང་སྐད་རིགས་བརྙན་འཕྲིན་སོགས་དར་རྒྱས་སོང་ན་ཧ་ཅིང་ཡག་པོ་རེད། དེ་མིན་ཁྱེད་ཀྱི་ངའི་སྐད་ལུགས་ནང་ལྟར་བཤད་དགོས་ལ་ང་ཡི་ཆས་གོས་བཞིན་བསྒོ་དགོས་ཞེས་བཀའ་ཕབ་དོན་ཅི་ཡོད། བོད་སྤྱི་སྐད་ནི་ཡིག་སྐད་རེད། དེས་ན་སུམ་རྟགས་དག་གསུམ་དང་མཐུན་པའི་སྒོ་ནས་ཡི་གེ་ཚུལ་བཞིན་འབྲི་ཤེས་རྒྱུ་གལ་ཆེ།
དེ་མིན་ཨ་མདོའི་མོག་མོག ་ཁམས་པའི་དཀྲུགས་ཇ། དབུ་གཙང་གི་ཆུར་གྱོང་ཞེས་པ་ཙམ་གྱི་བོད་སྤྱིའི་ཆོས་དང་རིགས་གཞུང་ལ་གནོད་པ་ཆེར་མ་མཐོང་། དེ་ནི་ས་ཚུགས་རང་རང་སོ་སོའི་ཐུན་མོང་མ་ཡིན་པའི་ཁ་ཟས་མཚོན་པ་ཙམ་ཞིག་རེད།

ཁམས་སྐད་བརྙན་འཕྲིན་ཚུགས་པ་ནི། བོད་གངས་ཅན་པ་ཚང་གི་རྒྱལ་ཁ་ཞིག་ཏུ་བརྩི་ཆོག་པ་ལས། དེ་ནི་ཕལ་སྐད་རེ་བརྙན་འཕྲིན་རེ་ལྟ་བུའི་སྐྱོན་ཞིག་ཏུ་གཏན་ནས་བརྩི་མི་རུང་། ཁམས་ཕྱོགས་ལ་སྐད་རིགས་མང་ཙམ་ཡོད་ན་ཡང་འདི་ལྟར་ཐུན་མོང་གི་བརྙན་འཕྲིན་དང་རླུང་འཕྲིན་སོགས་བཙུགས་ན་ཐུན་མོང་གི་འབབ་ས་ཞིག་ཡོད་སོང་བ་དང་། དེས་བོད་མི་རིགས་མ་འོངས་པའི་སྐད་བརྡ་གཅིག་གྱུར་ལ་བསུབ་ཐབས་བྲལ་བའི་བྱས་རྗེས་འཇོག་ངེས་ཡིན། ཉེ་བའི་ལོ་འདི་དག་གི་རིང་མཚོ་སྔོན་བརྙན་འཕྲིན་དང་རྒྱང་བསྒྲགས། ལྷ་ས་བརྙན་འཕྲིན་དང་རྒྱང་བསྒྲགས་གཉིས་ཀྱིས་རིག་གནས་གོམས་སྲོལ་དང་། སྒྱུ་རྩལ་སྐད་ཡིག་སོགས་ཀྱི་ཐད་འགྲན་ཟླ་མེད་པའི་ཕན་ནུས་རྒྱ་ཆེར་ཐོན་ཡོད། ཁམས་སྐད་བརྙན་འཕྲིན་དེ་དང་གཅིག་མཚུངས་རེད། ངེས་པར་དུ་ཕན་ནུས་བསྐྲུན་ཐུབ་པ་མ་ཟད། ཁམས་ཕྱོགས་ཀྱི་གྲོང་བརྡལ་དག་ན་གཞོན་སྐྱེས་ཚོའི་ངག་སྒོའི་བོད་སྐད་འཆོར་བཞིན་པའི་སྣང་ཚུལ་ལ་ཡང་། དུས་ཐོག་ཆར་པ་ལྟ་བུའི་ནུས་ཤུགས་སྩོལ་ཐག་ཆོད་ཡིན་ངེས།
མདོར་ན། ཁྱབ་རྒྱ་ཆེ་བའི་བོད་སྐད་བརྙན་འཕྲིན་གསར་པ་ཞིག་བྱུང་བར་དགའ་སྤྲོས་བརྟས་ཡོད།

ཁམས་་སྐད་མེད་པ་ལས་ཡོད་པ་བཟང་་དེས་བོད་ཀྱིས་ས་ཁྱོན་དང་མངའ་ཐང་མི་རིགས་དང་སྐད་རིོགས་་སྣེ་འཛོམས་ཡིན་པ་ཤེས་ནུས་་
འོན་ཀྱང་ཁམས་སྐད་འདི་ལ་སྣ་ཚོགས་་ཡོད་པས་གདམས་ཀ་རྒྱོབས་ཟེར་ན་ སྡེ་དགེ་སྐད་གདམས།
དེ་མིན་ན་བྱང་འབྲོག་པའི་སྐད་གདམས་

རྒྱ་རྡེའུའི་དགེ་འདུན་ལགས་ཀྱིས་དེ་འདྲ་རང་གསུངས་རྒྱུ་ཨེ་ཡོད་ ཕྱི་རྒྱལ་ཁག་ལའང་བོད་པ་ཉུང་དྲགས་པའི་སྐྱོན་འདུག་
སྐད་འབོད་དང་ལས་འགུལ་དེ་འདྲ་སྐབས་སུ་བྱེས་སུ་འཁྲུངས་པའི་གཞོན་སྐྱེས་དེ་ཚོ་དྲགས་བ་འདུག་ ངས་ཉམས་མྱོང་ཡིན་

ཕལ་སྐད་ནས་སྤྱི་སྐད་བར་གྱིས་བགྲོ་གླེང་འདིའི་བྲོ་བ་མ་འདྲ་བ་ཞིག་རེད།
མི་མཐུད་ནས་བགྲོ་གླེང་བྱོས་དང་རྗེས་སུ་ཡི་རང་བྱེད་གི་ཡོད་ཡ། སྤུན་གྲོགས་ཚོར།

༄༅།། ཧོར་བུ་ལགས་
སྡུག་བསྔལ་བྱེད་དགོས་དོན་མི་འདུག
བོད་ཀྱི་སྐད་ཡིག་སྤྱོད་མི་ཉུང་འདུག་པ་ལས་བོད་པ་ཚང་ལ་མི་ཉུང་མི་འདུག་འདོད།

མི་མང་ན་རོ་མང་ཟེར་བ་ཨེ་གོ ལྷག་པར་དུ་བཙན་འབྱོར་ནང་ལ་ཕྲུ་གུ་མང་པོ་སྐྱེ་རྒྱུ་མེད་
གང་ལ་ཞེ་ན་་་་་་་དེ་དག་ལ་རྩམ་དྲི་མི་བྲོ་བ་མ་ཟད་ཁུང་གང་དུ་མི་གཏོགས་ཤིང་བོད་མི་ཞེས་པས་ཐ་སྙད་སྐམ་པོ་ཞིག་སྟོན་རྒྱུ་མེད། ད་དུང་དེ་དག་གི་ཕ་མ་ཚོའི་ཕྲུ་གུ་ནར་སོན་སྐབས་ཨ་རི་སོགས་རྒྱལ་ཁབ་གཞན་ཞིག་གི་མི་འབོར་གྱིས་ཁ་སྣོན་བྱེད་རྒྱུ་ལས་འོས་མེད་པས་དུས་དེར་ང་ཚོ་ལ་ཐོབ་པ་ཁོང་བོད་པ་རེད་ཞེས་པ་ཙམ་མ་ཡིན་ནམ། ་ཧ་ཧ་ངའི་འདི་ལྟར་གླེན་བཤད་ཅིག་བྱས་ན་འདོད

ཅི་ཡིན་རུང་།ཁམས་སྐད་ཐོག་ནས་མཚོ་སྔོན་རྙན་འཕྲིན་ཁང་གི་ལས་བྱེད་པ་ནང་བཞིན་གྱི་སྒྲ་དག་ལ་གསལ་བ་ཡིག་སྐད་ཐོག་ནས་སྒྲོག་ཐུབ་ན་གོ་མཁན་མང་པོ་རེད་མ་གཏོག་ཨ་རི་རླུང་འཕྲིན་ཁང་གི་ཁམས་སྐད་ཉན་དུས་སེམས་པ་འདྲ་སྐྱོ་ཡོང་གི།དེ་སོང་ཙང་དེ་ལས་ཨ་མདོའི་སྐད་དེ་ཉན་ན་སེམས་པ་སྐྱིད་པོ་འདྲ་ཞིག་འདུག།ལྷག་པར་དུ་ལྕགས་མོ་མཚོའི་སྐད་དེ།
བཤད་སྲོལ་ལ་སྡེ་དགེ་སྐད་དེ་ཁམས་སྐད་གཙང་མ་རེད་ཟེར།རྒྱ་ཚང་གི་ཁམས་སྐད་གློག་རྙན་རྣམས་ཡང་སྡེ་དགེ་སྐད་མ་རེད་དམ།

བོད་མདོ་དབུས་ཁམས་གསུམ་ལ་རང་རང་སོ་སོའི་སྐད་གཤེས་དང་བརྗོད་ཚུལ་ཐུན་མོང་མ་ཡིན་པ་རེ་ཡོད་དེ་ནི་ས་དེའི་ཁྱད་ཆོས་ཞིག་རེད། དེར་མ་ཟད་ཁམས་དང་ཨ་མདོའི་ཕྱོགས་ཀྱི་ཆས་གོས་ཡང་རང་རང་སོ་སོའི་སྲོལ་རྒྱུན་དང་མཐུན་པར་གྱོན་ན་དེ་ལ་གོ་རྒྱུ་ཡོད། དེས་ན་ཨ་སྐད་དང་ཁམས་སྐད་སོགས་དབུས་སྐད་བརྒྱུར་དགོས་དོན་ཅི་ཡོད། བོད་ཀྱི་ཁ་དཔེར།
ས་གང་ཡིན་སྐད་ཀྱིས་ཤེས། །
ལུང་པའི་ཕུ་ཐག་ཆུ་ཡི་དཔོག །
ཞེས་པ་ནང་བཞིན་རེད། གཅིག་འགྱུར་དགོས་པ་དེ་བོད་ཡིག་འབྲི་སྐབས་སུམ་རྟགས་དག་གཅིག་གི་ཐོག་ནས་གཅིག་འགྱུར་ཞིག་བྱུང་དགོས། །

བོད་པ་རང་གི་ལག་རྩེ་ནས་བྱུང་བའི་ཐུགས་པ་

ཁམས་སྐད་དང་ཁམས་སྐད་ཟེར་བའི་སྐད་གཅིག་ཁོ་ན་མེད་བཞིན་དུ་ཁམས་སྐད་བརྙན་འཕྲིན་ཡིན་ན་ཅིག་ཟེར་བ་འདིར་དགོད་ཤོར་རོགས་ཅིག་རེད།
དཔེར་ན། ཏྲེ་ཧོར་ཁམས་པའི་སྐད་ལ་ཆ་འཇོག་ན་ཏྲེ་ཧོར་ཁམས་པའི་སྤྱི་སྐད་གཅིག་རྩ་བ་ནས་མེད། ཏྲེ་ཧོར་ཁམས་པའི་ནང་ཁུལ་གྱི་སྐད་རིགས་རག་ཙམ་གླེང་ན། 1རྟའུ་ལོག་སྐད། 2་བྲག་འགོ་བའི་སྐད། 3་ལྕོག་རི་བའི་སྐད། 4་དཀར་མཛེས་བའི་སྐད། 5་དར་རྒྱས་བའི་སྐད། 6་རྫ་པའི་སྐད། སྐད་རིགས་དྲུག་པོ་འདི་ཏྲེ་ཧོར་ཁམས་པའི་ཁྱབ་ཆེ་བའི་ཕལ་སྐད་རྣམས་རེད།
མ་ཟད་ཕལ་སྐད་ཁག་དྲུག་པོ་འདི་ལས་གཞན་པ་ཕལ་སྐད་རིགས་མི་འདྲ་བ་མང་པོ་ཏྲེ་ཧོར་ཁམས་པའི་ལུང་པ་ནང་དུ་བེད་སྤྱོད་བྱེད་བཞིན་ཡོད།

བོད་ཁ་བ་རི་པའི་སྤྱི་སྐད་འདིར་ཡུན་རིང་གནས་མ་ཐུབ་ན་་་་་་་བོད་མི་རིགས་འདི་ཡང་ཁག་པོ་རེད་སྙམ།
མཁས་དབང་དགེ་ཆོས་ཀྱིས་གསུངས་པར་རྣམས་དྲན་གསོལ་རེ་ཡོང་བ།

བཀྲ་ཤིས་བདེ་ལེགས་ཡོད་
བོད་རིགས་སྤུན་ཟླ་ཡོངས་ཀྱི་ལེགས་སྐྱེས་ཕོན་ཆེན་དུ་འགྱུར་བར་སྨོན་

ཨ་རིག་དགེ་མཐོང་ཡི་གསུང་པ་དེ་དངོས་ནས་རེ་ད་ཡིན་ན་བོད་ཆོལ་ཁ་གསུམ་གྱིས་སོ་སོའི་བྱུང་ན་ཆོས་དང་ཡུལ་ལུང་སོགས་བརྙན་འཕྲིན་དང་རླུང་འཕྲིན་བརྒྱུད་ནས་བདག་གཅེས་བྱས་ཏེ་༧གོང་ས་མཆོག་གིས་ཐུགས་རེལ་ལྟར་ཇི་སྲིད་བོད་ཀྱི་བདེན་དོན་ལ་ཆོག་ཏུ་གྱུར་བ་ཞིག་རེད་་་་་་་་་་ས་ཕྱོགས་གང་དུ་ཡོད་པའི་བོད་པ་སྤྱི་དང་བྱེད་བྲག་ཁམས་རིགས་སྤུན་ཟླ་ཡོངས་ལ་དགའ་འོས་པའི་གནས་ཚུལ་ཡིན་་་་་་་་་་སྙིང་ཐག་པ་ནས་རྗེས་སུ་ཡི་རང་ཡོད

ཁམས་སྐད་བརྙན་འཕྲིན་རྒྱུད་ནས་བོད་རིགས་ཡོངས་ཀྱིས་ཁམས་སྐད་ཉན་བཤད་ཐུབ་པའི་རེ་བ་ཡོད། ངས་རེ་བ་འདི་འདྲ་ཞིག་བྱེད་པའི་རྒྱུ་མཚན་ནི། རྒྱུད་ལམ་སྣ་ཚོགས་ནས་ཆོལ་ཁ་གསུམ་གྱི་སྐད་ཁྱབ་རྒྱ་ཆེ་རུ་གཏོང་ན་ད་བཟོད་སྐད་ཡིག་གཅིག་གྱུར་ཡོང་ཐུབ་པའི་རེ་བ་ཡོད་པ་མ་གཏོགས། གཞན་བོད་རིགས་ཡོངས་ལ་སྐད་གཅིག་གྱུར་ཞིག་ཡོང་བའི་དུས་མི་སྲིད་དོ།

ལེགས་འདུག་ས་གནས་སོ་སོར་ལ་འདི་འདྲ་ཡོད་ན་ཤིན་ཏུ་ལེགས་

དཱ་སྐྱིད་པོ་ཁྱོན་ནས་མི་འདུག

གནས་སྐབས་ཁམས་པ་མི་མང་ལ་རྒྱ་ནག་གི་གནས་ཚུལ་གོ་བར་ཕན་རྒྱུ་རེད།

དེ་ཙམ་རེད།

ཁམས་སྐད་བརྙན་འཕྲིན་གསར་འཛུགས་བྱུང་བ་ལ་སྙིང་ཐག་པ་ནས་བཀྲ་ཤིས་བདེ་ལེགས་གྲངས་མེད་ཞུ་རྒྱུ་ཡིན། དེ་ཡང་ལྷ་རབས་བྱུང་ན་ཁམས་སྐད་བརྙན་འཕྲིན་དེས་ཤུགས་རྐྱེན་ལ་བརྟན་ནས་ཁམས་ཁུལ་བོད་རིགས་མི་མང་ནས་བོད་ཀྱི་ཆོས་དང་རིགས་གཞུང་བདག་གཅེས་བྱས་ཏེ་ཇི་སྲིད་བོད་ཀྱི་བདེན་མ་གསལ་བར་གནས་ཐུབ་པ་སྨོན།

འདི་ནི་ཧ་ཅང་དགའ་འོས་པའི་དོན་དག་ཅིག་རེད། ད་ཡིན་ན་བོད་ཆོལ་ཁ་གསུམ་གྱིས་བརྙན་འཕྲིན་དང་རླུང་འཕྲིན་བརྒྱུད་ནས་ཕ་སྐད་གཙང་མ་རེ་བཤད་རྒྱུའི་གོ་སྐབས་གནང་བྱུང་བ་རེད། མཚོ་སྔོན་ནང་བཞིན་རང་གི་སྐད་ཡིག་ལ་བདག་རྒྱག་ཐུབ་ན་བསམ་གི