སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} བརྒྱ་དང་དྲུག

བློ་བཟང་ཁོ་རང་ནི་ལ་དྭགས་སུ་ཟླ་ངོ་གསུམ་དང་ཉིན་ཉི་ཤུ་ཏག་ཏག་བསྡད་པ་དང་། དེ་ཡི་རང་དུ་སྔར་འདྲིས་གཤིབ་བྱེད་མྱོང་མེད་པའི་ཉི་མ་ལྷ་སྒྲོན་ལྟ་བུའི་ཁ་ཁོག་མེད་པར་སྙིང་གཏམ་གླེང་འཕོད་མཁན་དང་། འཇིག་རྟེན་གྱི་འདོད་བརྩེ་ལ་རོལ་མྱོང་བྱེད་རྒྱུར་དུས་ཚོད་དམ་འཛིན་བྱེད་མཁན་གྱི་འཇམ་དབྱངས་འཚོ་མོ། མ་འོངས་པའི་མདུན་མ་གཅིག་དུ་གླེང་སའི་བདེ་འཚོ། ད་དུང་བུད་མེད་གཞན་དག ཁོར་ཡུག་དེ་ནས་རང་ཡུལ་གངས་ཅན་ལྗོངས་ཀྱི་བྱིས་དུས་ཀྱི་འཚོ་བ་མང་བོ་ཞིག་དབང་མེད་དུ་སྣང་ངོར་བསླེང་དེ་འོང་བ་སོགས་བཞག་ནས་འགྲོ་ལ་རན་པའི་ཆེས་མཐའ་མཇུག་གི་མཚན་མོའི་ཐུགས་སྤྲོ་དེ་ཡི་སྟེང་དུ་ཕོ་མོ་དབྱེ་བ་མེད་པར་ལས་མི་ཡོངས་དང་འཁྲབ་མི་ཡོངས་འཛོམས་ཡོད་པ་རེད། དམིགས་བསལ་གྱིས་ཉི་མ་ལྷ་སྒྲོན་གྱིས་བོད་ལྭ་སྙིང་རྗེ་བོ་ཞིག་གོན་ཡོད་པ་དང་བློ་བཟང་གི་སར་ཡོང་ནས། དོ་ནུབ་འུ་གཉིས་ཀྱིས་ཞབས་བྲོ་ཞིག་འཁྲབ་ན་འགྲིག་གི་རེད་དམ།

བློ་བཟང་གིས། ངས་དངོས་ནས་ཞབས་བྲོ་ཡག་པོ་ཞིག་འཁྲབ་ཤེས་ཀྱི་མེད། ཡིན་ཡང་། ཚོད་ལྟ་བྱེད་ཆོག་ཟེར་ཞོར་རང་གི་འཁྲིས་ཀྱི་བདེ་འཚོ་ལ་ཡང་ཞབས་བྲོ་འཁྲབ་རྒྱུར་སྐུལ་མ་བྱས་པ་རེད། ཞབས་བྲོའི་མཚན་མོ། སྤི་རེག་གི་མཚན་མོ། ཆེས་མཐའ་མཇུག་གི་མཚན་མོ། ཕན་ཚུན་ལ་སྙིང་གཏམ་གླེང་སའི་དུས་ཚོད་ཐུང་ཐུང་། ཡིན་ཡང་། བློ་བཟང་གིས་དེར་ནུབ་སྤི་རེག་མང་ཙམ་འཐུང་བ་ལས། སྐད་ཆ་ཧ་ཅང་ཉུང་ཉུང་ཆགས་ཡོད་པ་རེད།

ཉི་མ་ལྷ་སྒྲོན་གྱིས། རུམ་ནས་ཁ་བཏགས་དཀར་གཙང་ཞིག་བླངས་དེ། སང་ཞོགས་སྔ་བོ་ནས་ཁྱེད་ཚོ་ལོག་འགྲོ་མཁན་ཡིན་དུས། ང་ཚོ་ཐུག་གི་མ་རེད། དེ་ཡིན་དུས་ངས་དོ་ནུབ་ཁྱེད་རང་ལ་བདེ་མོ་ཟེར་དགོས་པ་དང་། རྗེས་ཕྱོགས་མཇལ་ཐུབ་པར་སྨོན་འདུན་དང་ཁྱེད་རང་གི་མི་ཚེ་ལ་ལམ་འགྲོ་དང་ལམ་བར་དུ་བདེ་ཐང་ཡོང་བ་བཅས་མཚོན་བྱེད་དུ་ཁ་བཏགས་འདི་ལེན་རོགས་ཞུ།

བློ་བཟང་གིས། རང་དབང་མེད་པར་རང་གི་ལག་པ་དེ་ཁོ་མོའི་འགྲམ་པར་སྤྱར་ཞོར་དུ། ཁྱེད་རང་གིས་ང་ལ་ཁ་གཡང་བོས་པ་དངོས་ནས་ཐུགས་རྗེ་ཆེ། ང་རང་གང་དུ་སོང་ཡང་ཁྱེད་རང་གི་སྐད་ཆ་དེ་དག་གི་ཁྲོད་ཀྱི་ང་ལ་བཞག་པའི་མྱོང་ཚོར་དེ་དག་བརྗེད་མི་སྲིད། ངས་རེ་བ་ལ་ཁྱེད་རང་གི་མི་ཚེ་ཡང་དེ་མཚུངས་ཡིན། གལ་སྲིད། མ་ཤི་ཚེ་རིང་བྱུང་ན་ཐུག་སྲིད་པ་ཡིན།

ཉི་མ་ལྷ་སྒྲོན་གྱིས། དེ་འདྲ་མ་བཤད། ང་ཚོ་མགྱོགས་པོ་ཐུག་གི་རེད བདེ་འཚོ་ཁྱེད་གཉིས་ཀྱི་བཟའ་ཚང་གི་སྐད་ཆ་བཤད་ཡོད་པ་མིན་ནམ། ཁོ་མོ་དངོས་ནས་བུད་མེད་ཡ་རབས་ཤིག་དང་ཁྲེལ་གཞུང་ལྡན་པ། ལས་ལ་བརྩོན་པའི་བུད་མེད་ཅིག་ཡིན་པ་དེ་ཁྱེད་རང་གི་བརྗེད་མི་ཉན། ཁྱེད་རང་ཕྱིར་ལ་དྭགས་སུ་སླེབས་པ་ཡིན་ན་ང་ཚོ་དུས་རྒྱུན་དུ་ཐུག་གི་རེད།

སྐབས་དེ་འདྲ་ཞིག་ལ་ཉི་མ་ལྷ་སྒྲོན་གྱིས་ཕ་གཡར་དང་ཁོང་ཚོས་གཞིས་གྲོང་ནས་ཡིན་པའི་ཕོ་གསར་ཁ་ཤས་ཤིག་བཅས་ཉི་མ་ལྷ་སྒྲོན་གྱི་སར་སླེབས་ནས། ད་ང་ཚོ་ཕྱིར་འགྲོ་རན་འདུག་ཟེར་ཞོར་དུ། ཁོང་ཚོས་ཚང་མས་བློ་བཟང་ལ་ཁ་གཡང་ཞིག་བོས་པ་དང་བསྒྲགས་ནས་ཉི་མ་ལྷ་སྒྲོན་ཁྲིད་དེ་མུན་ནག་ཁྲོད་དུ་མདའ་འཕངས་པ་ལྟར་སོང་བ་རེད།

བློ་བཟང་གིས། ག་ལེར་བདེ་འཚོ་དང་ཁོ་མོའི་གྲོགས་མོ་ཁ་ཤས་ཀྱི་ཞབས་བྲོ་འཁྲབ་བཞིན་ཡོད་པའི་གམ་དུ་སོང་ནས་ཐ་མག་ཞིག་འཐེན་ཞོར་དུ་ཁོང་ཚོས་མེ་སྤུངས་ཀྱི་འགྲམ་དུ་འཁྲབ་བཞིན་པའི་སྐོར་བྲོ་ལ་བལྟས་དེ་བསྡད་པ་རེད།

ཟླ་ངོ་གསུམ་དང་ཉིན་ཉི་ཤུ་རྩ་གཅིག་གི་རྗེས་ཀྱི་ཉིན་མོ་ཁོང་ཚོ་སླར་ཡང་ལ་དྭགས་ཀྱི་གནམ་ཐང་ནས་ལྡི་ལུ་ཕྱོགས་སུ་འགྲོ་བའི་གནམ་གྲུའི་ནང་དུ་བསྡད་དེ་མཁའ་དབྱིངས་སུ་འཕུར་མགོ་བཙུགས་པའི་སྐབས་སུ། བློ་བཟང་གིས་ཟླ་ངོ་ཁ་ཤས་ཀྱི་རིང་དུ་འདྲིས་གཤིབ་དུ་སོང་བའི་ཁོར་ཡུག་དེ་དང་ཁོར་ཡུག་དེར་གནས་པའི་སྙིང་ཉེ་བའི་གྲོགས་པོ་གྲོགས་མོ་དག་ལ་བདེ་མོ་བྱོས། ང་ཚོ་སླར་ཡང་ཐུག་འཕྲད་ཡོང་སྲིད་ཅེས་སེམས་ཁོང་ནས་དེ་ལྟར་བཤད་པ་རེད།