སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} བརྒྱ་དང་བདུན།

་་་་་་་་་དངོས་སྒྲུང་འདི་བདག་ལ་རྒྱུས་མངའ་ཡོད་མཁན་གྱི་གྲྭ་བ་ཞིག་གི་ལོ་རྒྱུས་ཡིན།

གནམ་གྲུ་ག་ལེར་ལྡི་ལུའི་ཚ་སྨུག་གི་གྲོང་དུ་འབབ་པ་དང་བློ་བཟང་ཁོ་རང་གི་གྲོགས་པོ་ཚོ་དང་ལྷན་དུ་གནམ་ཐང་གི་ཕྱི་ལོག་སུ་བུད་མ་ཐག ཁོང་ཚོ་ལ་བསུ་རུ་ཡོང་བས་རྒྱ་གར་བ་ཞིག་གིས་ཁྱེད་ཅག་བདེ་ལེགས་ངང་ཕྱིར་འབྱོར་བ་ངས་ལས་ཁུངས་ཀྱི་ཚབ་བྱས་དེ་ཁྱེད་ཅག་ལ་དྲན་རྟེན་གྱི་གོན་པ་འདི་སྤྲོད་དུ་ཡོང་བ་ཡིན། རྗེས་ཕྱོགས་ཁྱེད་ཅག་ལ་གློག་བརྙན་ཕབ་བསྐྲུན་བྱས་ཚར་ན་མགྲོན་ཤོག་སྐུར་ངེས་ཡིན། དེ་དུས་ཕེབས་རོགས་གནོང་། གཅིག་བྱས་ན་ལོ་ངོ་གཅིག་གི་རྗེས་ཡིན་སྲིད་ལ། ལོ་གཉིས་ཡིན་ཡང་སྲིད།

ཁོང་ཚོས་རྒྱ་གར་ཕོ་གསར་དེས་སྤྲད་པའི་གོན་པ་དེ་དག་ཁུར་ནས་གླ་བྱེད་རྐང་གསུམ་སྤག་སྤག་ཞིག་གླས་དེ་རང་རང་གང་དུ་འགྲོ་དགོས་པའི་ས་ལ་ཁ་ཁར་བ་རེད། བློ་བཟང་ཁོ་རང་གི་གྲོགས་པོ་རྡོར་རྗེ་སྐྱབས་དང་མིག་དམར་གཉིས་ཀར་འགྲོག་ནས་བོད་ཀྱི་གཞིས་ཆགས་མ་ཅང་ཀྲེ་ལར་འགྲོ་རྒྱུ་བྱས། ཡིན་ཡང་། ལམ་བར་དུ་མིག་དམར་གྱིས་ཁོ་རང་གྲོགས་པོ་ཞིག་གི་མགྲོན་འབོད་བྱས་ཡོད་སྟབས། འདི་ནས་བདེ་མོ་འཇོག་རན་སོང་། རྗེས་སུ་རྡ་ས་ནས་ཐུག་ཡོང་ཟེར་ནས་སོང་བ་རེད།

ཁོ་གཉིས་མ་ཅང་ཀྲེ་ལར་འབྱོར་མ་ཐག བློ་བཟང་གིས་རྡོར་རྗེ་སྐྱབས་ལ། ཁྱེད་རང་དོ་ནུབ་འདི་ནས་འདུག་འདོད་ཡོད་ན་ངེད་གཉིས་ཀྱིས་མགྲོན་ཁང་ཞིག་གླས་ཆོག་གི་རེད། དེ་མིན་ཁྱེད་རང་དོ་ནུབ་རྡ་སར་འགྲོ་རྒྱུ་ཡིན་ན་ནི། ང་རང་འདི་ནས་ངོ་ཤེས་ཤིག་ཁྱིམ་དུ་སོང་བ་ཡིན་ན་འགྲིག་གི་ཡོད།

རྡོར་རྗེ་སྐྱབས་ཀྱིས། རེད། དོ་ནུབ་གཅིག་བུར་བསྡད་ན་འགྲིག་གི་འདུག་ཟེར་ནས་ཁོ་གཉིས་ཀྱི་མགྲོན་ཁང་ཞིག་གླས་ཀྱང་། རྡོར་རྗེ་སྐྱབས་ཀྱིས་རྡ་སར་རང་གི་རྒན་མོ་ཁ་པར་ཞིག་བརྒྱབ་དུས། ཁོ་བོའི་རྒན་མོ་ཅུང་ཙམ་ན་ཡི་འདུག་ཟེར་བ་གོ་མ་ཐག བསམ་བློ་ལ་འགྱུར་བ་བཏང་ནས་དེར་ནུབ་ལམ་དུ་ཆས་ཤུལ་དུ་བློ་བཟང་གིས་ལྷ་ས་མགྲོན་ཁང་ནང་དུ་ཁེར་འདུག་བྱས་པ་རེད།

ཕྱིར་ཉིན་བློ་བཟང་རྡ་སར་རང་གི་གྲོགས་པོ་རྙིང་བ་དེ་ཡི་ནང་དུ་མ་སོང་བའི་ལམ་བར་དུ་གྲོགས་པོ་ཞིག་ལ་སྔོན་ཆད་སྒོར་མོ་འགའ་གཡར་ཡོད་པ་དེ་སྤྲོད་དུ་སོང་ནས། མི་རིང་བར་ཁོ་བོ་སླར་ཡང་གྲོགས་པོ་དེ་ཡི་ཟ་ཁང་ནང་དུ་ལས་ཀ་བྱེད་དུ་ཡོང་ཆོག་ཞེས་བཤད་དེ་གྲོགས་པོ་རྙིང་བ་དེ་ཡི་ནང་དུ་གློག་ཀླད་ནང་དུ་ཉིན་ཐོ་ཞིག་འབྲི་བཞིན་སྐབས་སུ། སྒོ་ཐག་ཐག་ཐག་བརྡུང་བས་སྒྲ་ཞིག་ཐོས་པ་རེད།

བློ་བཟང་གིས་འདྲུད་ལྷན་གོན་ནས་སྒོ་རུ་ཕྱེ་རུ་སོང་། སྒོ་ཕྱེ་དུས་སུ་སྒོ་དྲུང་དུ་ཡོད་པ་དེ་ནི་བུ་མོ་མཚམས་སྐྱིད་ཡིན་པ་མཐོང་མ་ཐག ཁྱེད་རང་འདིར་ཅི་བྱེད་དུ་ཡོང་བ་ཡིན།

མཚམས་སྐྱིད་ཀྱིས། ང་རང་ཁྱེད་རང་ལ་ཐུག་འཕྲད་བྱེད་དུ་ཡོང་ན་འགྲིག་གི་མ་རེད་དམ། ཁྱེད་རང་ལ་དགའ་བ་དེ་ཡང་ནོར་བ་རེད་དམ།

བློ་བཟང་གིས་མཚམས་སྐྱིད་ཀྱིས་གཅིག་འཕྲོ་གཅིག་ལ་མཐུད་དེ་བཤད་པའི་སྐད་ཆ་དེར་ལན་ཁ་གཏད་དུ། ཁྱེད་རང་འདིར་ཡོང་བ་ལ་ངས་དགའ་བསུ་མེད། འུ་གཉིས་བར་ན་བཤད་རྒྱུ་གང་ཡང་མེད་ཅེས་བཤད་ཚར་བ་རེད། ད་ང་རང་ལ་སུན་པོ་མ་བཟོ་རོགས།

མཚམས་སྐྱིད་ཀྱིས། ཁྱེད་རང་དངོས་ནས་མི་མ་རེད། ང་རང་འདི་ལྟར་གཡུགས་ནས། དེ་རིང་ངས་ཐག་གཅོད་ཅིག་མ་བྱུང་བར་དུ་ང་འདི་ནས་མི་འགྲོ་ཟེར་ཞོར་དུ་ནང་དུ་ཡོང་བ་རེད།

དེ་དུས་བློ་བཟང་གིས། དེས་ན་ཁྱེད་རང་གིས་དངོས་ནས་ང་རང་འདུག་གི་འཇུག་རྩིས་མེད་པ་འདྲ། དེ་ཡིན་ན་འགྲིག་གི  ཁྱེད་རང་ལ་དགོས་པ་དེ་ནི་བརྩེ་དུང་མ་རེད། ངའི་སྲོག་རེད་འདུག འདི་ངའི་ནང་མ་རེད། ཁྱེད་རང་ལ་དངོས་ནས་དེ་འདྲ་སེམས་ནས་བཟོད་དཀའ་བའི་ན་ཟུག་ཞིག་ཡོད་ན་འགྲོ  ངེད་གཉིས་ཕྱི་ལ་འགྲོ 

བློ་བཟང་གིས་དེ་མ་ཐག རང་གི་ལྷམ་མགོ་གོན་ནས་སྒོ་ཕྱི་བུད་དེ་སྐེས་འཛེགས་ལས་མར་འབབ་རྩིས་བྱེད་པའི་སྐབས་ཏག་ཏག་དེར། མཚམས་སྐྱིད་ཀྱིས་ལྟག་རྒྱབ་ནས་བློ་བཟང་ལ་འཐམ་ནས། ཁྱེད་རང་གིས་དེ་འདྲ་མ་བྱེད། སྔོན་མ་ང་དངོས་ནས་ནོར་འདུག ང་རང་ལ་གོ་སྐབས་ཐེངས་ཤིག་སྤྲོད་རོགས།

བློ་བཟང་གིས་ཁོ་མོ་འཕུད་རྒྱག་ཞིག་བྱེད་བཞིན། ལྟོས་དང་། དེ་རིང་ཡང་ཁྱེད་རང་ཚུར་བཙལ་ནས་ཡོང་བ་རེད། ང་ལ་འཐམ་མཁན་དེ་ཡང་ཁྱེད་རང་རེད། ཡང་། རྗེས་མ་ཡང་ཁྱེད་རང་གིས་ངས་ཅིག་ཅིག་བྱོས་སོང་། ཉིག་ཉིག་བཟོས་སོང་མ་ཟེར། དངོས་ནས་ཁྱེད་རང་ལ་ག་རེ་དགོས་ན་དེ་ཤོད། ངས་དེ་རིང་འདི་ནས་གསལ་བོ་བཟོ་འདོད་འདུག

མཚམས་སྐྱིད་ཀྱིས།  སྔོན་ཆད་གཏན་ནས་མཐོང་མྱོང་མེད་པའི་བློ་བཟང་གི་རྣམ་འགྱུར་དེ་མཐོང་ནས། ད་ཁྱེད་རང་ཁོང་ཁྲོ་སྐྱེ་དགོས་དོན་མེད། ང་རྗེས་ཕྱོགས་ཁྱེད་རང་འཚོལ་དུ་མི་ཡོང་། ད་ངས་ཤེས་སོང་། ང་རང་ཁྱེད་ལ་དགའ་བ་དེ་ཡང་ནོར་འཁྲུལ་ཆགས་པ་རེད་འདུག ཁྱེད་རང་ཕྱིར་ནང་དུ་སོང་། ང་རང་ཁྱེད་རང་ལ་སུན་པོ་བཟོ་རུ་མི་ཡོང་།

བློ་བཟང་གིས་ཕྱིར་བལྟས་ཙམ་ཡང་མ་བྱས་པར་གྲོགས་པོ་དེ་ཡི་ནང་དུ་ཤར་སེ་བཏང་བ་དང་། ནང་དུ་སླེབས་རྗེས། དངོས་ནས་སྙིང་རེ་རྗེ། ཡིན་ཡང་། ངས་ཁོ་མོ་ལ་སྙིང་རེ་རྗེ་ན་ཡང་། ཁོ་མོས་རང་ཉིད་ལ་བསམ་ཤེས་བྱེད་རྒྱུ་ཕར་ཕྱོགས། ད་དུང་ཧམ་པ་རྐྱང་རྐྱང་རེད་འདུག་དྲན་ཞོར་དུ་སླར་ཡང་གློག་ཀླད་ནང་དུ་ཉིན་ཐོའི་ཁ་སྐོང་བྲིས་པ་རེད།

མུ་འགོད།