བདེ་འཚོ། ཉིན་འགའི་སྔོན་དུ་ཡང་ཁོ་མོ་སླེབས་ནས་སླར་ཡང་དོན་དག་དེ་འདྲ་ཞིག་ཁ་ཕྱེ་སོང་། ད་ངས་བསམ་བློ་གཏོང་བ་ཡིན་ན། འུ་གཉིས་ཀྱི་དགའ་རོགས་སྒྲིག་རྒྱུ་དེ་ཡི་ཕྱོགས་ལ་ཁྱེད་རང་གི་རེ་བ་མ་བཅིངས་ན་ཡག་པོ་འདུག གང་ཡིན་ཟེར་ན། ངའི་མི་ཚེ་འདི་ཕྱོགས་གང་ཞིག་ལ་འགྲོ་རྒྱུ་ཡིན་མིན་ཡང་མི་ཤེས་ཀི དེ་ཡིན་དུས་ཁྱེད་རང་གི་དུས་ཚོད་ཀྱང་དངོས་ནས་འཕྲོ་བརླག་རེད། ངའི་རེ་བ་ལ་ཁྱེད་རང་གི་ང་ལ་བསམ་ཤེས་བྱེད་ཐུབ་རྒྱུ་རེད་འདོད་ཀི
བདེ་འཚོས། བློ་བཟང་། ཁྱེད་རང་གིས་དེ་ལྟར་མ་ཟེར། ངས་ཁྱེད་རང་ལ་ལོ་ངོ་ག་ཚོད་སྒུག་དགོས་ཀྱང་སྒུག་ཐུབ་ཀྱི་ཡོད། ད་དངོས་ནས་ང་རང་ཁྱེད་དང་མ་འགྲིག་པ་ཡིན་ན། ངས་རང་གི་ཨ་ཅག་དང་ནུ་མོ་ལ་ངོ་སྟོན་སྲོལ་མེད། ཁོང་ཚོ་ལ་ཁྱེད་རང་འཚམ་སྤྱོར་བྱས་མེད་པ་ཡིན་ན་སྐྱོན་ཆེན་པོ་མེད། རེད་དེ། ད་ནི་ངས་ཁྱེད་རང་ལ་རེ་བ་བཅིངས་པ་དེ་ནི་དངོས་ནས་རེ་སྟོང་དུ་མི་འགྲོ་བར་ཤོག
བློ་བཟང་གིས། བདེ་འཚོ། དེ་འདྲ་ཞིག་མ་རེད། དངོས་ནས་ཁོང་ཁྲོ་མ་ཟ། ངས་ཁྱེད་རང་ལ་བསམ་བློ་བཏང་ནས་དེ་ལྟར་ཐག་་བཅད་པ་ཡིན། བུ་མོ་མཚམས་སྐྱིད་འདི་དངོས་ནས་ཁ་རོག་གེར་བསྡོད་འདོད་མེད་པ་འདྲ། དེ་ཡིན་དུས་ཁྱེད་རང་ལ་སྒུག་དུ་བཅུགས་དེ་སེམས་ལ་རྨ་ཁ་ཞིག་བཟོས་པ་རང་རེད། གལ་སྲིད། འུ་གཉིས་ལ་རེ་བ་འདྲ་ཡོད་ན་རྗེས་མ་ཐུག་གི་རེད།
བདེ་འཚོས། ད་དེ་རེད། ཕོ་གསར་ཚོ་དེ་འདྲ་ཡིན་དུས། ངས་སྔོན་ཆད་ཁྱེད་རང་ལ་ང་ཕོ་གསར་ཚོ་ལ་ཡིད་ཆེས་མེད་ཅེས་བཤད་དོན་ཡང་དེ་ཡིན། ད་རྗེས་སུ་ངས་ཁྱེད་རང་ལ་ཁ་པར་གཏོང་མི་ཡོང་། ངས་ཁྱེད་རང་ལ་གནོད་པ་བྱེད་ཀྱི་ཡོད་པ་འདྲ། ཁྱེད་རང་གིས་ང་རང་ཕ་མ་མེད་པའི་བུ་མོ་ཞིག་ཡིན་སྟབས། མིག་ནང་དུ་འཇོག་གི་ཡོད་པ་མ་རེད།
བློ་བཟང་གིས་དེ་འདྲ་མིན་པའི་གསལ་བཤད་ཅི་ཙམ་བྱས་ཀྱང་། བདེ་འཚོས་གཏན་ནས་མ་ཉན་པར་བློ་བཟང་ལ་ཁྱེད་རང་གི་རེ་བ་འགྲུབ་པར་ཤོག་ཟེར་ནས་ཁ་པར་མཚམས་བཞག་པ་རེད།
ཕྱིར་ཉིན་བློ་བཟང་གིས་ཉི་མ་ལྷ་སྒྲོན་ལ་ཁ་པར་བཏང་དུས། ཉི་མ་ལྷ་སྒྲོན་གྱིས་ཀྱང་། བློ་བཟང་ལ་ངས་ཁྱེད་རང་དེ་འདྲའི་ཕོ་གསར་ཞིག་ཡིན་པར་བསམ་བློ་འཁོར་མྱོང་མེད། དངོས་ནས་ཁྱེད་རང་གིས་བདེ་འཚོ་ལ་ཁྲེལ་མེད་བྱས་པ་དེ་ནི་ཁྱེད་རང་ཡག་པོ་མ་རེད། དངོས་ནས་ཕོ་གསར་སྡུག་ཆག་ཞིག་རེད། ང་དངོས་ནས་ཁྱེད་རང་ལ་ཡིད་ཆེས་ཤུགས་ཆེན་པོ་ཞིག་ཡོད་པ་དེ་ཡང་་་་
བློ་བཟང་གིས། ཉི་མ་ལྷ་སྒྲོན། ངས་ཁྱེད་རང་གིས་ང་ལ་བསམ་ཤེས་ཤིག་བྱེད་ཐུབ་ངེས་ཡིན་བསམ་ནས་ཁྱེད་རང་ལ་ཁ་པར་བཏང་ནས་སེམས་གསོ་ཞིག་བྱེད་རོགས་ཟེར་ནས་བཤད་འདོད་ཀྱང་། ཁྱེད་རང་གིས་ཀྱང་དེ་འདྲ་བསམ་དུས་ད་ནི་ང་རང་ནི་དངོས་ནས་མི་སྡུག་ཆག་ཞིག་ཡིན་པ་ཤེས་སོང་། ཁྱེད་དང་འུ་གཉིས་ཟླ་ངོ་དེ་དག་གི་རིང་དུ་ཕན་ཚུན་ལ་བསམ་ཚུལ་དང་མི་ཚེའི་མྱོང་བ་གླེང་བ་དེ་འདྲ་ད་སྔ་ངས་བུད་མེད་སུ་ལ་ཡང་གླེང་མྱོང་མེད་པ་དང་། དོན་དངོས་སུ་བདེ་འཚོ་དང་དགའ་རོགས་གློ་བུར་དུ་སྒྲིག་དགོས་དོན་ཁྱེད་རང་གི་སེམས་སུ་གསལ་ངེས་ཡིན།
ཉི་མ་ལྷ་སྒྲོན་གྱིས་སྐད་མགོ་ཇེ་དམའ་རུ་སོང་ནས། བློ་བཟང་གི་འགྲེལ་བཤད་ཚང་མ་ལ་ཉན་རྗེས་སུ། ཁྱེད་རང་བདེན་པ་རེད། ཁྱེད་རང་ལ་དངོས་ནས་ཁག་མི་འདུག ངས་འདི་ནས་བདེ་འཚོ་ལ་སེམས་གསོ་གང་ཐུབ་ཐུབ་ཅིག་བྱེད་ཆོག གལ་སྲིད། ཁྱེད་རང་ལ་དཀའ་ངལ་འདྲ་མ་འཕྲད་པ་ཡིན་ན། སླར་ཡང་། ང་ཚོ་ལ་འབྲེལ་བ་བྱེད་རོགས།
བློ་བཟང་གཏན་ནས་སེམས་འཁྲུགས་ནས་བསྡད་ཡོད་པའི་སྐབས་དེ་འདྲ་ཞིག་ལ། ཁོ་རང་གི་གྲོགས་པོ་ཞིག་གི་ནང་དུ་ཞག་བསྡོད་བྱེད་དུ་འགྲོ་བཞིན་ཡོད་པ་དང་། གྲོགས་པོ་དེ་ཡི་ནང་དུ་གྲོགས་པོ་དེ་ཡི་རྒན་མོའི་ཕ་ཡུལ་གཅིག་པའི་བུད་མེད་ཅིག་དུས་རྒྱུན་དུ་ཉལ་དུ་ཡོང་བཞིན་ཡོད་པ་རེད།
གོ་སྐབས་གང་ཡོད་ལ། གྲོགས་པོ་དེ་ཡི་རྒན་མོས་བློ་བཟང་ལ་ཁོ་རང་གི་ཕ་ཡུལ་གཅིག་པའི་བུ་མོ་དེ་ནི་དངོས་ནས་ཡག་པོ་ཡོད་རབས་དང་རྐྱང་རྐྱང་བཤད་ཀྱི་ཡོད་པ་དང་། བུ་མོ་དེ་ལ་ཡང་བློ་བཟང་ནི་དངོས་ནས་ཕོ་གསར་ཡ་རབས་དང་འཇོན་ཐང་ཅན་ཞིག་ཡིན་རབས་རྟག་དུ་གླེང་བཞིན་ཡོད་པ་རེད། ཁང་བ་ཆུང་ཆུང་ཞིག་གི་ནང་དུ་ཉལ་ཁྲི་གཉིས་དང་ཐང་དུ་ཉལ་ས་ཞིག་བཟོས་དེ་ཁོང་ཚོ་མི་བཞི་ཉལ་གྱི་ཡོད་པ་རེད། ཉལ་ཁྲི་གཅིག་གི་སྒང་དུ་དུས་རྒྱུན་ཁོང་བཟའ་མི་གཉིས་ཀ་ཉལ་གྱི་ཡོད་པ་དང་། བློ་བཟང་ཉལ་ཁྲི་གཞན་པ་དེ་ཡི་སྟེང་དུ་ཉལ་བཞིན་ཡོད་པ་རེད། བུ་མོ་དེ་རྒྱུན་དུ་ཐང་དུ་ཉལ་ས་བཟོས་ནས་ཉལ་བཞིན་ཡོད་པ་རེད།
ནམ་ཟླ་ཅུང་གྲང་བའི་མཚན་མོ་ཞིག་ལ། གྲོགས་པོས་རྒན་མོ་དེས། དོ་ནུབ་དངོས་ནས་ནམ་གཤིས་ཀྱང་གྲང་མོ་འདུག ཁྱེད་གཉིས་ལྷན་དུ་ཉལ་ཁྲིའི་སྒང་དུ་ཉལ་བ་ཡིན་ན། ང་ཚོ་ཉལ་ཆས་ཀྱང་དྲོན་པོ་ཆགས་ངེས་རེད་ལ། ཁྱེད་གཉིས་ལ་ཡང་མི་འཐད་རྒྱུ་ཅང་ཡོད་རྒྱུ་མ་རེད་ཅེས་བློ་བཟང་ལ་དྲིས་དུས། བློ་བཟང་གིས་ཁོ་མོ་མི་འགྲིག་རྒྱུ་འདྲ་མེད་ན། ང་ལ་འགྲིག་རྒྱུ་ཅང་མེད།
བུ་མོ་དེ་ཡང་ཁ་རོག་གེར་བློ་བཟང་གི་ཉལ་སའི་ཟུར་དུ་ཉལ་རྩིས་བྱས་དུས། ཁྱེད་གཉིས་ཀྱིས་གོན་པ་གཅིག་ཀྱང་མ་འཕུད་པར་ཉལ་ན་དངོས་ནས་ཉལ་ཁྲི་ཆུང་བའི་སྒང་ལ་བདེ་བོ་མི་ཡོང་ཁོ་ཐག་ཡིན། དེ་ལས་ཁོག་སྟོད་འཐིག་པོ་དེ་གཉིས་འཕུད་ན་དགའ་བ་མེད་འགྲོ
མུ་འགོད།
ཉིད་རང་རྒྱུན་དུ་ནས་བློ་བཟང་གི་གཏམ་རྒྱུད་ལ་སེམས་ཁུར་གནང་མཁན་ཞིག་ཡིན་པ་དགའ་ནས་ཡོད།
འོ་རེད་དེའི་རྗེས་ལ་ཅི་བྱུང་སོང་སྒུག་ནས་བསྡད་ཡོད།