སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} བརྒྱ་དང་བཅུ།

བློ་བཟང་གིས། དངོས་ནས་དེ་འདྲ་ཞིག་ཡིན་ན་འགྲིག་གི ང་འགྲོ ཡིན་ཡང་། དེ་རིང་སོང་བ་ཡིན་ན་ངའི་རེ་བ་ལ་ཆེས་མཐའ་མཇུག་གི་ཐག་གཅོད་དེ་ཡིན་པར་ཤོག ཁྱེད་རང་གི་ཕུ་བོའི་གྲོགས་པོ་བཟའ་མི་དེ་གཉིས་མ་གཏོགས་སུ་སུ་ཡོད།

མཚམས་སྐྱིད་ཀྱིས། དེ་ཡི་སྒང་ལ་ཕ་ཡུལ་གཅིག་པའི་གྲྭ་བ་གཉིས་ཡོད། ཁོ་གཉིས་ཀྱིས་དེ་རིང་ང་ལ་བཟང་ངན་གང་བྱུང་ན་ཡང་བདེན་དབུང་དང་རྒྱབ་སྐྱོར་བྱེད་མི་རེད་ལ། ཁྱེད་རང་གིས་ཀྱང་གང་བཤད་རྒྱུ་ཡོད་ན་ཁོང་ཚོས་གོ་ས་ནས་གསལ་བོ་བཟོ་དགོས་ཀྱི་ཡོད། ཁྱེད་རང་གིས་དངོས་ནས་དྲང་གནས་ཀྱི་ང་རང་ལ་བསམ་བློ་ཞིག་བཏང་མ་སོང་། ང་རང་དངོས་ནས་དྲང་གནས་ཀྱི་ཁྱེད་རང་ལ་དགའ་ནས་རང་གི་ཕུ་བོ་གཡུགས། སློབ་གྲྭ་གཡུགས་པ་རེད།

བློ་བཟང་གིས། ད་འུ་གཉིས་ཀྱིས་མང་བོ་ཞིག་འདི་ནས་མི་གླེང་ནང་དུ་འགྲོ དེ་རུ་སོང་ནས་མི་ཚང་མ་ཡོད་ས་ནས་ཐག་གཅོད་བྱེད་ཆོག་གི་རེད། དེ་དུས་ཁྱེད་རང་ལ་ག་རེ་བཤད་རྒྱུ་ཡོད་ན་དེ་བཤད་ན་འགྲིག་གི་རེད། དེ་དུས་ངས་ལན་གསལ་བོ་བཏབ་ཆོག

མཚམས་སྐྱིད་ཀྱི་ཕུ་བོའི་གྲོགས་པོ་བཟའ་མི་གཉིས་ཀྱི་ནང་དུ་འབྱོར་དུས། དེ་རུ་སྔ་ས་ནས་སླེབས་ཚར་བའི་གྲྭ་བ་གཉིས་ཡོད་པ་དེ་ཡི་གཅིག་གིས་ཁོ་གཉིས་མཐོང་མ་ཐག མཚམས་སྐྱིད་མགྱོགས་པོ་ཤོག་དང་། ཁྱེད་རང་གི་ཕུ་བོ་ཟླ་བས་ཁྱེད་རང་ལ་ཁ་བརྡ་ཞིག་བྱེད་དགོས་ཀྱི་ཡོད་ཟེར་གྱི་འདུག

བློ་བཟང་མི་ཚང་དེ་ནས་ཁ་རོག་གེར་ཉལ་ཁྲི་ཞིག་གི་ཟུར་དུ་མཚམས་སྐྱིད་ཀྱིས་ཁ་པར་མཚམས་འཇོག་རྒྱུར་སྒུག་ནས་བསྡད་ཡོད་པའི་སྐབས་སུ། མཚམས་སྐྱིད་ཀྱིས། བློ་བཟང་འདི་ལ་ཤོག་དང་། ངས་ཕུ་བོས་ཁྱེད་རང་ལ་སྐད་ཆ་འགའ་བཤད་རྒྱ་ཡོད་ཟེར་གྱི་འདུག

ཟླ་བ་ཁྱེད་རང་བདེ་མོ།
བདེ་མོ་ཡིན།
ཁྱེད་རང་ལ་ག་རེ་བཤད་རྒྱུ་ཡོད།
ཁྱེད་རང་གིས་དངོས་ནས་ག་རེ་བསམ་གྱི་འདུག

ང་ལ་འདི་ཟེར་རྒྱུ་གང་མེད། ཡིན་ཡང་། ཁྱེད་རང་གི་ནུ་མོའི་ག་རེ་བསམ་གྱི་ཡོད་མེད་དེ་ང་ཚོས་འདི་ནས་སྐད་ཆ་བཤད་ནས་འདི་རུ་ཡོད་པའི་ཁྱེད་རང་གི་ཕ་ཡུལ་གཅིག་པའི་བཟའ་མི་གཉིས་དང་། གྲྭ་བ་གཉིས་ཀ་ཡོད་ས་ནས་དེ་རིང་ད་ཐག་གཅོད་བྱེད་ངེས་ཡིན། སང་ཉིན་ཁྱེད་རང་ཁོང་ཚོ་ལ་ཁ་པར་གཏོང་དང་། ཁྱེད་རང་ལ་ག་རེ་ཐག་གཅོད་བྱས་ཡོད་མེད་གསལ་བོ་གོ་ངེས་རེད། དེ་འདྲ་བྱས་ན་འགྲིག་གི་འདུག་གམ་ཟེར་ནས་ཁ་པར་བཞག་རྗེས་སུ་ཁོང་ཚོ་ཚང་མ་ཡོད་ས་རུ་ཕྱིན་པ་རེད།

བློ་བཟང་གིས། ད་ང་རང་གི་ག་རེ་བསམ་གྱི་ཡོད་མེད་དེ་ནི་དེ་རིང་གཙོ་བོ་མ་རེད། ཚང་མས་ཤེས་དགོས་པ་ཞིག་ལ། མཚམས་སྐྱིད་ཀྱིས་ག་རེ་བསམ་བཞིན་ཡོད་མེད་དེ་རེད། ང་ཚོས་ཁོ་མོས་ག་རེ་བསམ་གྱི་འདུག་དེ་སྐད་ཆ་དྲིས་རྗེས་སུ། ངས་ཁོ་མོ་ལ་ཐད་ཀར་ལན་འདེབས་བྱེད་ཆོག ཚང་མས་བློ་བཟང་གི་སྐད་ཆ་དེར་མོས་མཐུན་བྱས་དེ་མཚམས་སྐྱིད་ཕྱོགས་སུ་བལྟས་དེ་བསྡད་པ་རེད།

མཚམས་སྐྱིད་ཀྱིས། དང་བོ་དེ་ནི་ཁྱེད་རང་ཕྱིར་ང་རང་དང་ལྷན་དུ་སྒྲིག་དགོས་ཀྱི་ཡོད། དེ་གཏན་ནས་མི་ཡོང་ཟེར་ན། གཉིས་པ་དེ་ནི་ཁྱེད་རང་གིས་ང་ལ་སྟོང་རྒྱག་དགོས་ཀྱི་ཡོད།

བློ་བཟང་གིས་སྐད་ཆ་དེ་གོ་མ་ཐག རེད། ཚང་མས་གོ་བ་དེ་རེད། ངེད་གཉིས་གཏན་ནས་ཕྱིར་འགྲིག་གི་མ་རེད། ངས་ད་སྔ་ཕན་ཆུད་ལ་དགའ་རོགས་སྒྲིག་ནས་སྟོང་རྒྱབ་ཟེར་བ་ཞིག་གོ་མྱོང་མེད་ཀྱང་། ཁོ་མོ་ལ་དེ་འདྲའི་འདོད་པ་ཞིག་ཡོད་དུས་སུ། ངས་དེ་ལྟར་བྱེད་ཆོག ག་ཚོད་ཅིག་དགོས་མིན་དེ་བཤད་རོགས། ཡིན་ཡང་། ང་ནི་ཟ་ཁང་ཞིག་གི་ནང་དུ་ལས་ཀ་བྱེད་མཁན་ཞིག་ཡིན་དུས། སྒོར་མོ་མང་བོ་ཞིག་ཡོད་པ་མ་རེད། དེ་ཡིན་དུས། གལ་སྲིད། དེ་རིང་མཇལ་མི་ཐུབ་པ་ཞིག་ཡིན་ཡང་ངས་ལས་ཀ་བྱོས་དེ་མཇལ་ཆོག

དེ་དུས་ཕར་ཕྱོགས་ཀྱི་གྲྭ་བ་ཞིག་གིས་ཁྱེད་རང་གློག་བརྙན་འཁྲབ་དུ་སོང་ནས་སྒོར་མོ་འདྲ་རེག་མེད་པ་རེད་དམ་ཟེར་ནས་དྲིས་དུས་སུ། བློ་བཟང་གིས་ང་རང་ལ་སྒོར་མོ་རེག་ཡོད་པ་རེད། འོན་ཀྱང་། ང་རང་ཕར་མ་སོང་སྔོན་དེར་བྱ་བའི་དགོས་འཁོ་ཞིག་གི་ཆེད་དུ་ངས་རོགས་པ་ཞིག་ལ་ཧིན་སྒོར་སྟོང་ཕྲག་ཉེར་ལྔ་གཡར་ཡོད་པ་དང་བུ་ལོན་ཁ་ཤས་ཤིག་ཡོད་པ་དེ་སྤྲད་ཟིན་ཤུལ་དུ་ཞེ་དྲགས་ལྷག་མེད། ཡོད་ན་ངས་ཟ་ཁང་ནང་དུ་ལས་ཀ་བྱེད་དགོས་དོན་མི་འདུག་མོད། གང་ཡིན་ན་ཡིན། མཚམས་སྐྱིད་ཁྱེད་རང་ལ་ག་ཚོད་དགོས།

མཚམས་སྐྱིད་ཀྱིས། ང་རང་ལ་རྒྱ་གར་སྒོར་མོ་སྟོང་གཅིག་གཉིས་ཤིག་གི་ཡོང་གི་མ་རེད། ང་རང་ལ་མ་མཐའ་ལ་སྟོང་ཕྲག་བཅུ་དགོས་ཀྱི་ཡོད། དེ་ཡང་དེ་རིང་སང་ཉིན་གཉིས་ཀའི་བར་དུ་དགོས། དེ་མེད་ན་ང་རང་ཁྱེད་དང་ལྷན་དུ་འདུག་གི་ཡིན།

བློ་བཟང་གིས། ཚང་མས་གོ་བ་དེ་རེད། ང་རང་ལ་དེ་འདྲའི་སྒོར་མོ་མང་བོ་ཞིག་མེད་ཀྱང་ང་རང་སོང་ནས་ངའི་གྲོགས་པོ་སྒོར་མོ་མི་ཉུང་བ་ཞིག་སྔ་གཞུག་བྱེད་རོགས་ཟེར་ནས་བུ་ལོན་དུ་བླངས་དེ་ད་ལྟ་ཆུ་ཚོད་ཕྱེད་ཀའི་རྗེས་སུ་ཐོན་ཡོང། ངས་དེ་རིང་སྒོར་མོ་དེ་དག་སྤྲད་རྗེས་སུ། ཁྱེད་ཚོ་ཚང་མས་བདེན་དཔུང་ཡི་གེ་དང་ས་ཡིག་བརྒྱབ་དེ་རྗེས་ཕྱོགས་ཤི་གསོན་གང་ཞིག་བྱུང་ཡང་ངེད་གཉིས་བར་དུ་འབྲེལ་བ་མེད་པ་བྱེད་དགོས།

གྲྭ་བ་དེ་གཉིས་ཀྱིས་དེ་འདྲ་ཞིག་བྱས་ཡིན་ཚེ་འགན་ལོས་འཁུར་ཞེས་བཤད་ཀྱང་། བཟའ་མི་དེ་གཉིས་ཀྱིས་ཁོང་གཉིས་ཀྱི་འགན་མི་ཐུབ་རབས་བཤད་པ་རེད། གང་ལྟར། བློ་བཟང་རང་གི་གྲོགས་པོ་དེ་ཡི་གམ་དུ་སོང་ནས། ཧིན་སྒོར་གཅིག་ཁྲི་ཞིག་ཁུར་ནས་ཕྱིར་ཁོང་ཚོས་སར་ཡོང་དུས། གྲྭ་བ་དེ་གཉིས་ཀྱིས་བློ་བཟང་ལ་ཁྱེད་རང་གིས་དངོས་ནས་དྲང་མོ་བྱས་སོང་། དེ་ཡི་སྟེང་ལ་ཁྱེད་རང་ཡང་རང་གི་ལག་པ་གཉིས་ལ་བརྟེན་ནས་དཀའ་ལས་རྒྱག་མཁན་ཞིག་ཡིན་དུས། ཁྱེད་རང་སོང་ཤུལ་ནས་ངེད་གཉིས་ཀྱིས་ཁོ་མོ་ཁ་བརྡ་བྱས་དེ་ཧིན་སྒོར་ལྔ་སྟོང་མ་གཏོགས་མི་ལེན་རྒྱུ་བྱས་པ་ཡིན། འདི་ཁྱེད་རང་གི་ཕྱིར་ལེན་རོགས་ཟེར་ནས་སྒོར་མོ་བམ་ཆགས་དེ་གཏོར་ནས་ཕྱེད་ཀ་ཕྱིར་བློ་བཟང་ལ་སྤྲད་པ་རེད།

བློ་བཟང་གིས། སྐྱོན་ཡོད་པ་མ་རེད། འགྲིག་འགྲོ་ནི་རེད། མི་མ་ཤི་ན་སྒོར་མོ་རེད། ངས་ག་ལེར་སྒོར་མོ་འཚོལ་ཐུབ་ནི་རེད། ཁོ་མོའི་རེ་འདོད་རེད། མོ་ལ་སྤྲོད་ཤོག

གྲྭ་བ་དེ་གཉིས་ཀྱིས་བློ་བཟང་ལ་ཧིན་སྒོར་ལྔ་སྟོང་ཕྱིར་སྤྲད་པ་དང་ཡི་གེ་ཞིག་བདེན་དབུང་དུ་བྲིས་དེ་སྟེང་དུ་ས་ཡིག་བརྒྱབ་ནས་བློ་བཟང་ལ་སྤྲད་པ་དང་རྗེས་ཕྱོགས་གཏན་ནས་རྙོག་དྲ་གང་ཡང་མེད་པར་བྱས་པ་རེད། བློ་བཟང་གིས་ཡི་གེ་དང་སྒོར་མོ་ཁུར་ནས་འགྲོ་གྲབས་བྱེད་པའི་སྐབས་སུ། མཚམས་སྐྱིད་ཀྱིས་རྗེས་ཕྱོགས་ཁྱེད་རང་གི་ཉིན་ཐོའི་ཟིན་བྲིས་དང་དེབ་དང་ཚགས་པར་སོགས་ཀྱི་སྟེང་དུ་འུ་གཉིས་ཀྱི་སྐོར་གཏན་ནས་བྲིས་མི་ཆོག དེ་འདྲ་བྱུང་ཉིན་ང་སླར་ཡང་ཁྱེད་དང་འགྲིག་དགོས་ཀྱི་ཡོད།

བློ་བཟང་དགད་མོ་ཞིག་དགོད་ཞོར་དུ། དེ་ནི་ངའི་མི་ཚེ་ཡི་རང་དབང་རེད། གལ་སྲིད་ངའི་མི་ཚེ་ལོ་རྒྱུས་ཤིག་བྲིས་པ་འདྲ་ཡིན་ན། ངའི་མི་ཚེ་དང་འབྲེལ་བའི་སྐོར་འབྲི་བའི་རང་དབང་ང་ལ་ལོས་ཡོད་ཟེར་བཞིན་ཁྱིམ་ཚང་དེ་དང་ཁ་བྲལ་བ་རེད།