སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} བརྒྱ་དང་བཅུ་གཅིག

གྲོགས་པོས། དེས་ན་ཁྱེད་རང་གིས་བུད་མེད་ཉི་མ་ལྷ་སྒྲོན་ལ་ཡང་ལུས་འབྲེལ་བཞག་མེད་པ་བདེན་པ་ཡིན་པ་བྱོས། འོན་ཀྱང་། བདེ་འཚོས་ཁྱེད་གཉིས་ཀྱིས་མི་ཚེ་ཡི་སྐད་ཆ་ཞིག་བཤད་འདུག་པ་ཡིན་དུས། ཁྱེད་གཉིས་ལ་ཁ་བསྐྱལ་བ་དང་སྙིང་གཏམ་བཤད་པ་ལས་ཕར་ནང་དུ་ལུས་འབྲེལ་མ་བྱུང་བ་དེ་ནི་དངོས་ནས་ཡིད་ཆེས་ཁག་པོ་ཞིག་རེད། འོན་ཀྱང་། ཁྱེད་རང་གིས་ཁོ་མོ་ཁ་ཆེ་ཕོ་གསར་ཞིག་གི་ལག་དུ་ཤོར་བར་དོགས་ནས་དེ་ལྟར་བྱས་པ་ཡིན་ཟེར། དེ་ཡང་དངོས་ནས་བཤད་ཁག་པོ་རེད། ཁོ་མོ་དངོས་ནས་ཁ་ཆེ་ཕོ་གསར་དེ་ལ་དགའ་ཡོད་ན་ཆོས་ལུགས་ཀྱི་ལྟ་ཚུལ་ཞིག་གིས་དབང་དུ་སོང་བ་ཡིན་སྲིད་པ་རེད།

བློ་བཟང་གིས། དངོས་ནས་དེ་ལྟར་བཤད་པ་ཡིན་ན་དེ་བདེན་པ་རེད། ལ་དྭགས་སུ་བོད་པ་དང་ལ་དྭགས་ཡུལ་མི་སུ་ཡིན་ན་ཡང་ཁ་ཆེ་ལ་ལྟ་ཚུལ་ཡག་པོ་མི་འདུག་པ་མ་ཟད། ཁ་ཆེ་དང་ནང་བ་ཡིན་ཟེར་མཁན་གྱི་ཡུལ་མི་དག་གིས་བར་དུ་འཁྲིགས་པ་ཡང་རེ་ཟུང་ཤོར་བའི་སྐད་ཆ་འདུག དེ་འདྲ་ལ་ཁག་བཞག་ཡོད་ན་ཐང་། འོན་ཀྱང་། ཁོ་མོ་ནི་དེ་འདྲ་ཞིག་རེད་མི་འདུག ཆོས་ལུགས་ཀྱི་ལྟ་ཚུལ་དེ་འདྲ་ཤུགས་ཆེན་པོ་མི་འདུག རེད་དེ། ང་རང་ཁོ་མོས་རེ་སྐུལ་ལྟར་དགོང་མོ་ཞིག་འཁྲབ་ཚན་ཚར་ནས་ཁོང་ཚང་ལ་སོང་ནས་ཁོ་མོའི་ཨ་ཅེ་དང་ཐུག་འཕྲད་བྱས་པ་ཡིན།

ཁོ་མོས་ཨ་ཅེ་དེས་ང་རང་ལ་ཆོས་ལུགས་ཀྱི་སྐོར་དྲིས་སོང་། ཁྱེད་རང་གི་ཆོས་ལུགས་གང་ཞིག་བྱེད་ཀྱི་ཡོད། དགེ་ལུགས་དང་རྙིང་མ། ཀ་རྒྱུད་པ། ས་སྐྱ་བ། ཡང་ན་བོན་པོ་གང་ཡིན། ང་ཚོའི་ཁྱིམ་ཚང་འདི་ནི་ཕ་མ་ཚོའི་རིང་ནས་བཟུང་དེ་བོན་པོ་རེད། དེ་ཡིན་དུས། ཁྱེད་རང་ལ་དེ་ཡི་སྐོར་ལ་ལྟ་ཚུལ་འདྲ་ཡོད་ན་ཐང་། ང་ཚོ་བོན་པོ་ཡིན་དུས་སྲུང་མ་ཡང་འདྲ་ནི་མ་རེད། ཁྱེད་རང་གི་ནང་མིས་ཆོས་ལུགས་གང་ལ་དད་མོས་བྱེད་ཀྱི་རེད་ཟེར་ནས་དྲིས་སོང་། དེ་དུས་ངའི་ང་ཚོ་ཚང་མ་བོད་པ་ཡིན་པ་རེད། བོད་པ་ཚོའི་མི་ཐོག་གོང་མ་དང་བོད་ལ་དར་སྔ་ཤོས་དེ་ནི་བོན་ཆོས་ཡིན་པ་རེད། དེ་ཡི་རྗེས་སུ་ཆོས་ལུགས་གཞན་དག་ཚོ་དར་བ་རེད། ང་རང་སྒེར་ལ་ཆོས་ལུགས་བར་ལ་ལྟ་ཚུལ་གང་ཡང་མེད།

ང་ཚོས་གཙོ་བོ་ཤེས་དགོས་པ་ཞིག་ནི། ང་ཚོ་ཚང་མ་བོད་པ་ཡིན་པ་དེ་དང་བོད་པ་ཚོས་རང་རང་གི་ནང་མི་ནས་བརྒྱུད་དེ་ཆོས་ལུགས་གང་ལ་དད་མོས་བྱེད་པ་དེ་ནི་རང་དབང་ཡིན་ལ། དེ་ཡི་སྐོར་ལ་ཕན་ཚུན་ལ་བརྩི་བཀུར་ཡང་བྱེད་དགོས་པ་ལ་ཕྱོགས་རུས་བྱེད་མི་འོས་པ་དང་། དེ་དག་བྱེད་མཁན་གྱི་རིགས་ལ་ང་རང་གཏན་ནས་དགའ་བོ་མེད། ལྷག་པར་དུ་ངེད་གཉིས་ཀྱི་ཁྱིམ་རྒྱུད་ཀྱི་དད་པ་བྱེད་ཡུལ་མི་གཅིག་པ་དེ་ནི་གནད་དོན་ཞིག་གཏན་ནས་མ་རེད་ཅེས་འགྲེལ་བཤད་མང་བོ་ཞིག་བརྒྱབ་པ་པ་ཡིན་ཟེར་ནས་བློ་བཟང་གིས་ཁོས་གྲོགས་པོ་དེ་ལ་བཤད།

གྲོགས་པོ་པོས། དམྱལ་བ་བོ། བདེ་འཚོ་ཟེར་བའི་མི་ཚང་དེ་ནི་བོན་པོའི་ཁྱིམ་ཚང་ཞིག་རེད་དམ། དེ་ཡིན་དུས་ཁོང་ཚོས་སྐོར་བ་བྱེད་དུས་ཀྱང་གཡོན་སྐོར་བྱེད་ཀྱི་ཡོད་པ་རེད། ཁྱེད་རང་གི་ནང་མི་ཚང་མ་དགེ་ལུགས་པ་ཡིན་དུས། རྗེས་མ་ཞིག་ལ་ཕ་མ་ཚོས་ཁྱེད་རང་ལ་ངོ་རྒོལ་བྱེད་རྒྱུ་ལས་གཏན་ནས་མི་སྲིད། ཁྱེད་རང་གི་ཤེས་གསལ་རེད། ང་ཚོས་ས་ནས་བོན་པོ་ཟེར་དུས་ལྟ་སྟངས་ཡག་པོ་མེད་པ་རེད།

བློ་བཟང་གིས། དེ་འདྲའི་དུས་ཚོད་དེ་ནི་དངོས་ནས་རྫོགས་ཚར་བ་རེད། ང་ཚོའི་མི་ཐོག་འདི་ལ་དེ་ཡི་ནད་ཚ་སངས་ན་རེད། ལྷག་པར་དུ་བོན་པོ་ནི་བོད་ལ་དར་བའི་ཆོས་ཐོག་མ་ཡིན་པ་དེ་ནི་ཁྱེད་རང་གིས་ཀྱང་ཤེས་གསལ་རེད། ད་ངེད་གཉིས་ཀྱི་དེ་ཡི་སྐོར་མང་བོ་མི་གླེང་། ང་རང་སྒེར་ངོས་ནས་བཤད་པ་ཡིན་ན། ཆོས་ལུགས་དང་ཆོལ་ཁའི་འཐེན་འཁྱེར་བྱེད་མཁན་དེ་དག་ལ་གཏན་ནས་དགའ་བོ་མེད།

གྲོགས་པོ་དེས། དེ་ན་ཁྱེད་རང་ལ་ཆོལ་ཁའི་ཞེན་ཁོག་མེད་དམ། དེ་ཡིད་ཆེས་བྱེད་ཁག་པོ་ཞིག་བཤད་སོང་། དེ་ནི་ཕལ་ཆེར་ཁྱེད་རང་གི་ཁ་སྟོང་ནང་གི་ཚིག་སྟོང་ཡིན་ཁོ་ཐག་རེད།

བློ་བཟང་གིས། ཁྱེད་རང་གི་ག་རེ་བསམ་མིན་དེ་ནི་གཙོ་བོ་མིན། ངའི་མི་ཚེ་ནང་དུ་ཆོལ་ཁ་ཆོས་ལུགས་ཀྱི་ཕྱོགས་ཞེན་དངོས་ནས་བྱེད་མྱོང་མེད་ལ། ཕྱིས་སུ་ཀྱང་བྱེད་མི་སྲིད། དེ་འདྲའི་རིགས་ལ་ཡང་གཏན་ནས་རྒྱབ་སྐྱོར་མེད། ཡིན་ཡང་། ངའི་ཕྱོགས་རུས་དང་ཕྱོགས་ཞེན་དུས་ནམ་ནོར་མི་སྲིད། རང་ཉིད་གང་གི་ཁུངས་སུ་སྐྱེ་བ་དེར་ཕྱོགས་ཞེན་ཡོད་ཀྱང་། ང་ལ་གཏན་ནས་ཕྱོགས་རུས་མེད། ངས་དུས་རྒྱུན་དུ་རང་ཉིད་བོད་ཅིག་ཡིན་པར་འདོད་ཀྱི་ཡོད་ལ། བོད་པ་ཡིན་ཚད་ལ་ངས་ས་མཚམས་ཤིག་གཏན་ནས་བྱེད་མི་འདོད།

གྲོགས་པོ་དེས། ཡ་་་ ད་ཁྱེད་རང་གིས་ག་རེ་བཤད་ན་འགྲིག་གི་རེད། བཤད་བདེ་བོ་ཡོད་པ་རེད། ལྷག་པར་དུ་ཁྱེད་ཚོའི་གྲངས་འདི་ལ་ཁ་བདེ་བོ་ཡོད་པ་རེད། གང་ལྟར། ཁྱེད་རང་གིས་དངོས་ནས་ལ་དྭགས་སུ་གློག་བརྙན་འཁྲབ་ནས་འཇོན་ཐང་བཞག་ཡོད་མེད་མི་ཤེས་ཀྱང་དགའ་རོགས་སྒྲིག་ནས་འཇོན་འདུག ད་དུང་། འདི་ཁུལ་ན་ཁྱེད་རང་ལ་རྙོག་དྲ་བཟོ་བའི་མཚམས་སྐྱིད་ཀྱིས་ཁྱེད་རང་གི་ངོ་ཤེས་མིན་མང་བོ་ཞིག་ལ་ཁོ་མོ་ལ་བློ་བཟང་གི་བྱིས་པ་ཆགས་ཡོད་ཚུལ་བསྒྲགས་ནས་སྐད་གྲགས་བཞག་སོང་། ད་ཁྱེད་རང་གིས་དགའ་རོགས་འདྲ་སྒྲིག་རྩིས་ཡོད་དམ།

བློ་བཟང་གིས། རེད་རེད། ཁྱེད་རང་གིས་དེ་ལྟར་བཤད་ན་བཤད་སྟངས་ཤིག་ཡིན་ངེས་རེད། ཡིན་ཡང་། གནས་སྐབས་རིང་དུ་དངོས་ནས་དགའ་རོགས་ཟེར་བའི་བུད་མེད་འདྲ་གཏན་ནས་འཚོལ་འདོད་མེད། སྐྱིད་པོ་གཏོང་ས་རེ་རེག་ན་འདོད་ཆགས་མགོ་ཆག་ཡིན་ནི་རེད།