སྨན་རིའི་ཁྲི་འཛིན་གྱི་ཐུགས་སྨོན།

༧གཡུང་དྲུང་བོན་གྱི་གདན་ས་སྨན་རིའི་གླིང་གིས་སྐྱེ་རྒུ་མདོའི་ས་ཡོམ་གྱི་གོད་ཆག་ཐད་ཐུགས་སྨོན་གནང་ཡོད་པ་རེད།

བོན་སྒོ་རྩོམ་སྒྲིག་པ་ཁྲི་གཡུང་དྲུང་གིས་འདི་གར་གནས་ཚུལ་བཏང་དོན། སྤྱི་མཐུན་གྱི་ལས་དབང་ཞིག་གིས་ཕྱི་ཟླ་ ༤ པའི་ཚེས་ ༡༤ ཉིན་གྱི་སྔ་དྲོར་བོད་བྱང་ཕྱོགས་ཀྱི་ཡུལ་ཤུལ་སྒ་སྐྱེ་རྒུ་མདོར་ས་འགུལ་ཤུགས་ཆེན་བྱུང་སྟེ། མི་གྲངས་ ༧༦༠ ལྷག་འདས་གྲོངས་སུ་གྱུར་བ་དང་། བརྒྱད་སྟོང་ལྷག་ལ་རྨས་སྐྱོན་ཚབས་ཆེན་བྱུང་ཡོད་པ་དང་། ཡུལ་མི་སྟོང་ཕྲག་དུ་མའི་བཞུགས་ཁང་དང་དཔལ་འབྱོར་འཚོ་བ་སོགས་ལ་གནོད་སྐྱོན་བསམ་ཡུལ་ལས་འདས་པ་བཅས་ཆེས་ཛ་དྲག་པའི་གནས་ཚུལ་སོགས་འཛམ་གླིང་གི་དྲ་ལམ་དང་གློག་སྐད་སོགས་བརྒྱུད་ནས་ཐོས་འཕྲལ། ཚེས་ ༡༦ ཉིན་འདི་ག་གཡུང་དྲུང་བོན་གྱི་གདན་ཆེན་མོ་༧དཔལ་ལྡན་སྨན་རིའི་གླིང་གི་༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་དབུ་བཞུགས་ཐོག དགེ་འདུན་འདུས་པ་རྒྱ་མཚོ་ནས་ཐུགས་ཤིན་ཏུ་སྐྱོ་གདུང་དང་བཅས་འདས་གྲོངས་སུ་ཕྱིན་པ་རྣམས་ཀྱི་ཆེད་དུ་༼བདེ་གཤེགས་སྨོན་ལམ་མཐའ་ཡས་༽ཆོ་གའི་དཀྱིལ་འཁོར་གྱི་ཞལ་ཕྱེ་སྟེ་བསྔོ་སྨོན་མ་ཏྲི་སོགས་དང༌། ཤུལ་ལུས་ནང་མི་ལྟོས་བཅས་ཡུལ་སྡེ་མི་མང་ཡོངས་ལ་གདུང་སེམས་མཉམ་བསྐྱེད་ཞུས་དང་ཞུ་བཞིན་ཡོད་འདུག