སྐུ་འཚོ་བཞུགས་ཡོད་མེད་ལ་བློ་འཚབ་ཡོད།

རྒྱ་ནག་གཞུང་གིས་པཎ་ཆེན་སྐུ་ཕྲེང་བཅུ་གཅིག་པའི་ཡང་སྲིད་འཚོ་བཞུགས་ཡོད་མེད་གསལ་བོ་བཟོ་དགོས་ལ། འཚོ་བཞུགས་གནང་ཡོད་ཚེ་རྒྱལ་སྤྱིའི་རང་དབང་ཅན་གྱི་ཚོགས་པ་དང་མཇལ་འཕྲད་ཀྱི་རང་དབང་སྤྲོད་དགོས་ཞེས་པཎ་ཆེན་ཨེར་ཏི་ནི་ཞབས་ཞུ་ལས་དོན་ལྟེ་གནས་ཁང་གིས་རྒྱ་ནག་གཞུང་ལ་འབོད་སྐུལ་གནང་ཡོད།

ཕྱི་ཚེས་ ༢༥ ཉིན་པཎ་ཆེན་ཨེར་ཏི་ནི་ཞབས་ཞུ་ལས་དོན་ལྟེ་གནས་ཁང་གི་གོ་སྒྲིག་འོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་དགུང་གྲངས་ ༢༡ ལ་ཕེབས་སྐུའི་འཁྲུངས་སྐར་སྲུང་གཙི་གནང་ཡོད། པཎ་ཆེན་ཨེར་ཏི་ནི་ཞབས་ཞུ་ལས་དོན་ལྟེ་གནས་ཁང་གི་འགན་འཛིན་དགའ་སྤག་བློ་བཟང་རྡོ་རྗེ་ལགས་ཀྱིས། རྒྱ་གཞུང་གིས་པན་ཆེན་སྐུ་ཕྲེང་བཅུ་གཅིག་པ་མཆོག་འཁོར་དང་བཅས་པ་བཙན་ཁྲིད་བྱས་རྗེས་བོད་གཞུང་དང་རྒྱལ་སྤྱིའི་ནང་གི་གཞུང་དང་གཞུང་འབྲེལ་བ་མ་ཡིན་པའི་ཚོགས་པ་ཁག་གིས་ཁོང་ཉིད་གློད་གྲོལ་ཆེད་རྒྱ་གཞུང་ལ་དགོས་འདུན་ཐེངས་མང་བཏོན་ཡང་། ཁ་གསལ་གྱི་འགྲེལ་བརྗོད་གནང་མེད་པར་མ་ཟད། བོད་རང་སྐྱོང་ལྗོངས་ཀྱི་འགོ་གཙོ་གཞོན་པ་པདྨ་འཕྲིན་ལས་ཟེར་བས།ཏཱ་ལའི་བླ་མས་ངོས་འཛིན་བྱས་པའི་དགེ་འདུན་ཆོས་ཀྱི་ཉི་མ་མི་ཕལ་བ་ཞིག་ཡིན་པ་དང་། ཁོང་དང་ཁོང་གི་ཕ་མས་རང་ཉིད་ལ་དོ་ཕོག་མི་ཡོང་ཆེད་མི་གཞན་དང་ཐུག་འཕྲད་གནང་རྒྱུ་འདོད་པ་མེད་ཚུལ་ཡང་དང་བསྐྱར་ཟློས་བྱས་ཤིང་། རྒྱ་མིའི་འགོ་ཁྲིད་རྣམས་ཀྱི་ཁ་བརྒྱ་ཚིག་གཅིག་གི་ཤོད་ཚུལ་ཞིག་ཏུ་གྱུར་ཡོད་སྟབས། བོད་མི་དང་འཛམ་གླིང་མི་དམངས་གི་དོགས་གནད་བསངས་ཐུབ་མེད་ལ།ང་ཚོས་ཁོང་སྐུ་འཚོ་བཞུགས་ཡོད་མེད་ཐད་བློ་འཚབ་ཆེན་པོ་སྐྱེ་བཞིན་ཡོད་ཅེས་དང་། དེ་བཞིན་ཐེངས་འདིའི་འཁྲུངས་སྐར་དང་འབྲེལ། དང་པོ། པཎ་ཆེན་སྐུ་ཕྲེང་བཅུ་གཅིག་པའི་ཡང་སྲིད་འཚོ་བཞུགས་ཡོད་མེད་གསལ་བོ་བཟོ་དགོས་པ་དང་། གཉིས་པ། འཚོ་བཞུགས་གནང་ཡོད་ཚེ་རྒྱལ་སྤྱིའི་རང་དབང་ཅན་གྱི་ཚོགས་པ་དང་མཇལ་འཕྲད་ཀྱི་རང་དབང་སྤྲོད་དགོས་པར་མ་ཟད། གདན་ས་བཀྲ་ཤིས་ལྷུན་པོའི་གསེར་ཁྲི་མངའ་གསོལ་དང་གོང་མའི་རྣམ་ཐར་བདག་སྐྱོང་གི་མཐུན་རྐྱེན་བསྐྲུན་དགོས་པ། གསུམ་པ། བྱ་བྲལ་རིན་པོ་ཆེ་གཙོས་པའི་བོད་ཀྱི་ཆབ་སྲིད་བཙོན་པ་རྣམས་གློད་གྲོལ་གཏོང་དགོས། བཞི་པ། བོད་མི་ཞི་རྒོལ་བ་དམར་གསོད་དང་མནར་གཅོད་མཚམས་འཇོག་བྱ་དགོས། ལྔ་པ། ༧གོང་ས་མཆོག་ལ་གཞི་མེད་སྙོན་འཛུགས་འཕྲད་དུ་མཚམས་འཇོག་བྱ་དགོས།དྲུག་པ། ༧གོང་ས་མཆོག་དང་རང་གཞུང་གིས་རྒྱ་གཞུང་ལ་གནང་བའི་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་དེ་པཎ་ཆེན་སྐུ་ཕྲེང་བཅུ་བའི་དགོངས་གཞི་ཡང་ཡིན་སྟབས། ཁས་ལེན་གྱི་བརྡ་ལན་གསལ་པོ་སྤྲོད་དགོས་པའི་འབོད་སྐུལ་ཡང་གནང་སོང།

ཡང་བོད་མི་མང་སྤྱི་འཐུས་ཚོགས་གཅོ་སྤེན་པ་ཚེ་རིང་མཆོག་གིས། ཡང་ཁོང་གིས་གོ་སྐབས་འདི་དང་བསྟུན་ནས་གསུངས་དོན། ཁམས་སྐྱེ་རྒུ་མདོའི་ས་ཡོམ་གྱི་འཇིགས་པ་བྱུང་ཡང་། བཙན་བྱོལ་བོད་གཞུང་གི་ངོས་ནས་དམིགས་བསལ་གསར་འགོད་གསལ་བསྒྲགས་གང་ཡང་གནང་མེད་ཀྱང་། ཡུལ་ཤུལ་ཁུལ་དུ་ས་ཡོམ་བརྒྱབ་མ་ཐག་༧གོང་ས་མཆོག་དང་འཛིན་སྐྱོང་བཀའ་ཤག བོད་མི་མང་སྤྱི་འཐུས་ལྷན་ཚོགས་བཅས་ཀྱིས་བསྔོ་བ་སྨོན་ལམ་དང་དེ་བཞིན་ཐུགས་གསོའི་འཚམས་འཕྲིན་བཏང་ཡོད། རྩ་བས་ས་ཡོམ་གྱི་གོད་ཆག་བྱུང་བ་དེས་ཡུལ་ཤུལ་ཁུལ་ཏུ་གནས་སྡོད་བྱས་པའི་བོད་རིགས་ཚོའི་འགན་ཆགས་ཀྱི་མེད་པར་ང་ཚོ་བོད་མི་ཚང་མའི་འགན་ཆགས་ཀྱི་ཡོད་པ་རེད། ལྷག་པར་དུ་བོད་ནང་གི་ཆོལ་གསུམ་སྤུན་ཟླ་ཡོངས་ཀྱིས་འཕྱར་གྲུ་མཉམ་འདེགས་དང་མཐུན་སྒྲིལ་གྱི་རྣམ་འགྱུར་ཤུགས་ཆེར་བསྟན་པ་དེར་བཙན་བྱོལ་བོད་གཞུང་གི་ངོས་ནས་བཀའ་དྲིན་རྗེས་དྲན་ཞུས་པ་ཡིན་ལ། བཙན་བྱོལ་བོད་མི་ཚོར་མཚོན་ནའང་གོད་ཆག་བྱུང་བ་དེ་ལ་མི་རྒྱུ་གཉིས་ཐོག་ནས་མཐུན་རྐྱེན་སྦྱར་དགོས་པ་དང་། དེ་བཞིན་ ༤༌༡༤ ཡུལ་ཤུལ་ས་ཡོམ་གདུང་སེལ་ཚོགས་ཆུང་བརྒྱུད་རོགས་སྐྱོར་གནང་དགོས་པའི་འབོད་སྐུལ་དང་འབྲེལ། བོད་གཞུང་གི་ངོས་ནས་༧གོང་ས་མཆོག་ཐེངས་འདིའི་གོ་སྐབས་བརྒྱུད་བོད་ནང་ཕེབས་ཐུབ་རྒྱུར་འབད་བརྩོན་བྱེད་བཞིན་ཡོད་པར་མ་ཟད། བླ་ཆེན་ཁག་ཅིག་དང་སྐྱེ་རྒུ་མདོ་རང་ནས་ཡིན་པའི་བླ་ཆེན་ཁག་ཀྱང་བོད་དུ་ཕེབས་རྒྱུར་འབད་བརྩོན་གནང་གི་ཡོད་ཅེས་གསུང་བྱུང་།

མཐའ་མར་སྐུ་མགྲོན་གཙོ་བོད་གཞུང་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས་པཎ་ཆེན་སྐུ་ཕྲེང་རིམ་བྱོན་གྱི་མཛད་པ་འཕྲིན་ལས་དང་ལྷག་པར་དུ་པཎ་ཆེན་སྐུ་ཕྲེང་བཅུ་བའི་བོད་ཆོལ་གསུམ་གྱི་ས་ཁུལ་ཡོངས་སུ་སྐད་ཡིག་དང་རིག་གཞུང་ཐད་ཀྱི་བླ་མེད་ཀྱི་མཛད་འཕྲིན་ངོ་སྤྲོད་དང་། ཁོང་གིས་རྒྱ་ནག་གཞུང་ལ་ཕུལ་བའི་ཡིག་འབྲུ་ཁྲི་བདུན་གྱི་སྙན་ཞུ་དང་འབྲེལ་གསུངས་དོན། སྤྱིར་ང་ཚོས་དེ་རིང་གི་ཉིན་མོ་འདི་དགའ་དགའ་སྐྱིད་སྐྱིད་ཀྱིས་རོལ་དགོས་པ་ཞིག་ཡིན་ཡང་། ང་ཚོའི་པཎ་ཆེན་ཆུང་སྲིད་རིན་པོ་ཆེ་ཁོང་ད་ལྟའི་ཆར་ཡང་མཐོང་རྒྱུ་མེད་པ་ཞིག་དང་གར་ཡོད་ཅི་བྱུང་གི་གནས་ཚུལ་གཅིག་ཀྱང་གོ་རྒྱུ་མེད་པའི་གནས་སུ་ལྷག་ཡོད་སྟབས། ང་ཚོས་སྤྱིར་བཏང་གི་རྣམ་པའི་ཐོག་ནས་ཁོང་གི་སྐུའི་འཁྲུངས་སྐར་སྲུང་གཙི་བྱེད་ཀྱིན་ཡོད་པ་རེད། འདི་དག་ཡོད་ཚད་ང་ཚོའི་གཞོན་སྐྱེས་ཚོས་ཁོང་གི་སྐུ་ཚེ་སྔོན་མས་བོད་གངས་ཅན་གྱི་རིག་གཞུང་དང་ཆབ་སྲིད། དཔལ་འབྱོར་བཅས་ལ་ཕྱག་ལས་གང་འདྲ་གནང་ཡོད་མེད་དོ་སྣང་དང་། འདིའི་ཐད་རང་ནུས་ཡོད་ཚད་ཀྱིས་ཕྱག་ལས་གནང་དགོས་པའི་དུས་ལ་བབ་ཡོད་པ་རེད། ང་ཚོས་མཛད་སྒོ་ཞིག་དང་དེབ་ཞིག་པར་བསྐྲུན་བྱས་ཏེ་འདི་ལྟར་བག་ཡངས་ཀྱིས་བསྡད་པ་ཡིན་ན། ཆུང་སྲིད་རིན་པོ་ཆེ་གློད་གྲོལ་ཡོང་ཐུབ་པ་ཞིག་མ་རེད་ལ། ཧ་ཅང་ཁག་པོ་རེད། དེར་བརྟེན། གཞུང་དང་གཞུང་འབྲེལ་མིན་པའི་ཚོགས་པ་ཁག་དང་བོད་མི་ཚོ་མི་རེ་ངོ་རེ་ནས་དངོས་ཤུགས་རྒྱུད་གསུམ་ནས་སྔར་ལས་ལྷག་པའི་འབད་པ་བྱ་དགོས་ཀྱི་འདུག་ལ། ཐ་ན་སྔོན་མའི་ལོ་དྲུག་སྐབས་ཀྱི་སྐུ་པར་ཙམ་མིན་པར་སྐུ་པར་གསར་བ་ཞིག་རྙེད་པའི་ཆེད་དང་ཧུར་ཐག་བྱས་པ་ཡིན་ན། རྒྱལ་པཎ་རྣམ་གཉིས་ཕོ་བྲང་པོ་ཏ་ལར་ཞབས་སོར་འཁོད་ཐུབ་པའི་རེ་བ་ཡོད་པ་ཞིག་རེད་ཅེས་གསུངས་བྱུང།

ཐེངས་འདིའི་པཎ་ཆེན་ཆུང་སྲིད་རིན་པོ་ཆེ་དགུང་ ༢༡ ལ་ཕེབས་པའི་སྐུ་འཁྲུངས་སྐར་གྱི་མཛད་སྒོ་དང་སྟབས་བསྟུན་གྱིས། པཎ་ཆེན་ཨེར་ཏེ་ནི་ཞབས་ཞུ་ལས་དོན་ལྟེ་གནས་ཁང་གིས་རྣམ་རྒྱལ་གྲྭ་ཚང་གི་འདུས་ཚོགས་དབུ་བཞུགས་ཐོག་རྒྱལ་བ་ཡབ་སྲས་རྣམ་གཉིས་ཀྱི་སྐུ་ཚེ་བརྟན་པའི་གསོལ་འདེབས་དང་། སྐྱེ་རྒུ་མདོའི་ས་ཡོམ་ཁྲོད་འདས་གྲོངས་སུ་ཕྱིན་པ་རྣམས་ལ་གསོལ་འདེབས་སྨོན་ལམ་གནང་ཡོད་པར་མ་ཟད། པཎ་ཆེན་ཆུང་རིན་པོ་ཆེ་མྱུར་ཏུ་གློད་གྲོལ་ཆེད་རྒྱབ་སྐྱོར་མཚན་རྟགས་བསྡུ་རུབ་ཀྱི་ལས་འགུལ་ཞིག་སྤེལ་ཡོད་ལ། ངྷ་སྟེང་བོད་ཁྱིམ་གྱི་སློབ་མ་༡༠༠ མ་ཟིན་ཙམ་གྱིས་ཀྱང་ཆུང་སྲིད་རིན་པོ་ཆེའི་འཁྲུངས་སྐར་དང་མཉམ་དུ་སྐྱེས་སྐར་སྲུང་གཙི་བྱས་ཡོད།

པཎ་ཆེན་ཆུང་སྲིད་མཆོག་དགུང་ལོ་ ༢༡ ལ་ཕེབས་པའི་མཛད་སྒོའི་སྟེང་སྐུ་མགྲོན་དུ་ཆེས་མཐོའི་ཁྲིམས་ཞིབ་པ་རྣམ་པ་དང་། བོད་མི་མང་སྤྱི་འཐུས་ཚོགས་གཙོས་སྤྱི་འཐུས་རྒྱུན་ལས་རྣམ་པ། བཙན་བྱོལ་བོད་གཞུང་ཆོས་རིག་བཀའ་བློན། གཞུང་འབྲེལ་མ་ཡིན་པའི་ཚོགས་པ་ཁག་གི་ཚོགས་གཙོ་དང་མི་མང་བཅས་འདུ་འཛོམས་གནང་ཡོད།