མདོ་སྟོད་ཆུ་བཞི་སྒང་དྲུག་གི་ཚོགས་ཆེན།

མདོ་སྟོད་མི་མང་གི་ངོས་ནས་ལྷག་བསམ་རྣམ་དག་གིས་སྤྱི་དོན་སྒྲུབ་མཁན་ཞིག་དང་། ཤེས་འཇོན་ལྡན་པའི་བཀའ་ཁྲི་དང་སྤྱི་འཐུས་ཡོང་རྒྱུར་བགྲོ་གླེང་དང་གྲོས་བསྡུར་གནང་གི་ཡིན་ཟེར།

ཕྱི་ཚེས་ ༢༥ དང་རེས་གཟའ་ཉི་མའི་ཉིན་མདོ་སྟོད་ཆུ་བཞི་སྒང་དྲུག་གི་འགན་འཛིན་ལྷན་ཚོགས་ཀྱི་ཚོགས་འདུ་ཐེངས་ ༣༨ དེ་ངྷ་ས་མེག་གྷན་ཡོངས་གླིང་སློབ་གྲྭའི་ཉེ་ཁུལ་དུ་འཚོགས་ཡོད། དེར་མདོ་སྟོད་ཆུ་བཞི་སྒང་དྲུག་གི་ས་གནས་ཁག་ ༡༧ ཙམ་གྱི་སྐུ་ཚབ་འཐུས་མི་རྣམས་ཚོགས་ཞུགས་གནང་ཡོད་ཅིང་། ཚོགས་འདུའི་སྐུ་མགྲོན་གཙོ་བོར་ལི་ཐང་ཨ་འབྲུག་ཚང་གི་ལྕམ་སྐུ་ཆོས་སྐྱིད་ལགས་ཕེབས་ཡོད་འདུག

ཉིན་དེར་སྐུ་མགྲོན་གཙོ་བོ་ལྕམ་སྐུ་ཆོས་སྐྱིད་ལགས་ཀྱིས་གསུང་བཤད་གནང་དོན། ད་ལྟའི་ཆར་གལ་ཆེ་ཤོས་བཀའ་བློན་ཁྲི་པ་དང་བོད་མི་མང་སྤྱི་འཐུས་གདམ་རྒྱུར་དུས་ཡུན་རིང་བོ་མེད། དེའི་སྐབས་ཚང་མས་ཐུགས་སྣང་ཆེན་པོ་གནང་རྒྱུ་དང་། དངོས་གནས་དྲང་གནས་སྤྱི་འཐུས་སྤུས་དག་པོ་སླེབས་རྒྱུར་གྲ་སྒྲིག་གནང་དགོས་ཀྱི་འདུག་ཅེས་གསུངས།

ཁོང་གིས་ད་དུང་། འདིའི་སྔོན་ང་ཚོའི་སྤྱི་འཐུས་དེ་ཚོས་གང་འདྲ་གནང་མིན་བཙན་བྱོལ་ཙམ་མ་ཟད་བོད་ནང་ལོགས་སུའང་ཁྱབ་བསྡད་ཡོད། སྤྱིར་བཏང་ང་ལ་དེ་རིང་ཞུ་འདོད་མེད་ནའང་། རང་ཉིད་མདོ་སྟོད་མི་མང་ཞིག་ཡིན་པའི་ཆ་ནས་ཞུས་ན། སྐབས་དེར་༧གོང་ས་མཆོག་ཕྱི་རྒྱལ་ཡུལ་གྲུ་ཁག་ཏུ་ཕེབས་ནས་མཛད་འཕྲིན་ཧ་ལས་པ་བསྐྱངས་གནང་མཛད་སྐབས། གྲོས་ཚོགས་ཀྱི་ཚོགས་འདུའི་སྟེང་ཁོང་ལ་དབུ་འོག་དཔུང་གདེགས་གནང་སྟེ་ཁོང་ཚུར་ཕེབས་དུས་དངོས་གནས་དྲང་གནས་ཐུགས་དགྱེས་དགོས་པ་ཞིག་བྱེད་དགོས་ནའང་། སྐབས་དེར་སྤྱི་འཐུས་ཀརྨ་ཆོས་འཕེལ་ལགས་ཀྱིས་དབུ་ཁྲིད་པའི་མདོ་སྟོད་སྤྱི་འཐུས་ཚང་མ་མར་ཐོན་གནང་སོང་། རང་ཉིད་མདོ་སྟོད་ཡིན་པའི་ཆ་ནས་དཔེ་མི་སྲིད་པའི་བློ་ཕམ་བྱུང་།

༧གོང་ས་མཆོག་གི་མཛད་འཕྲིན་དེ་ཙམ་ཞིག་རྒྱས་བཞིན་པ་དང་བོད་ནང་དུ་ཛ་དྲག་གི་གནས་སྟངས་དེ་ལྟ་བུ་ཞིག་ཏུ་ཐུག་ཡོད་སྟབས། ནམ་རྒྱུན་གྲོས་ཚོགས་ནང་བོད་མི་མང་ཟེར་ནས་ཁ་རུ་འཁྱེར་གྱིན་ཡོད་ནའང་། དོན་ཐོག་ཏུ་བབ་དུས་གང་འདྲ་གནང་མིན་ཚང་མས་མཁྱེན་གསལ་ལྟར་རེད། ཧ་ཅང་གི་བློ་ཕམ་བྱུང་ཞེས་གསུངས་ཡོད།

མཇུག་ཏུ་ཁོང་གིས། སྐབས་རྗེས་མའི་བཀའ་སྤྱི་གཉིས་གདམ་སྐབས་མི་མང་ཚང་མས་གཟབ་གཟབ་གནང་དགོས་པའི་འབོད་སྐུལ་ཡང་གནང་ཡོད།

དེ་བཞིན་ཉིན་དེར་ནང་གསེས་དོན་ཚན་ལྔ་ཅན་གྱི་ཚོགས་འདུ་ངོ་སྤྲོད་ཀྱི་ཡིག་ཆ་ཞིག་གི་ནང་གསེས་དོན་ཚན་གཉིས་པའི་ནང་བཀོད་དོན། འདི་ལོ་ནི་སྐབས་ ༡༥ པའི་བོད་མི་མང་སྤྱི་འཐུས་དང་སྐབས་ ༡༤ པའི་བཀའ་བློན་ཁྲི་པ་འོས་བསྡུ་ཞུ་རྒྱུའི་འགག་རྩའི་དུས་མཚམས་སུ་སླེབས་ཡོད། བོད་འབངས་རྣམས་ལ་འཛམ་གླིང་ཐོག་གི་རྒྱལ་ཁབ་སྲིད་གཞུང་སུ་ལའང་སྔར་བྱུང་མྱོང་མེད་པའི་དམངས་གཙོའི་ཐོབ་ཐང་ཡོད་པ་འདི་ནི། ༧གོང་ས་མཆོག་གི་ཐུགས་རྗེ་ཁོ་ན་ལས་བྱུང་བ་དང་། དེའང་སྔ་དེང་གི་འཛམ་གླིང་སྤྱི་སྲོལ་དང་འཚམས་པའི་ཁྲིམས་ལུགས་དང་བཅའ་ཁྲིམས་ཐོག་ནས་དམངས་གཙོའི་མཚན་ཉིད་ཡོངས་སུ་ཚང་བ་ཞིག་གཏན་འབེབས་ཟིན་ཡོད།

སྲིད་བྱུས་གཏན་འབེབས་ཟིན་པའི་རྗེས་སུ་རག་ལས་སའི་རྒྱུ་རྐྱེན་གཙོ་བོ་ཁྲིམས་བཟོ་ལྷན་ཚོགས་ཀྱི་སྤྱི་འཐུས་རྣམ་པ་དང་བཙན་བྱོལ་བོད་གཞུང་གི་མཛད་གཙོ་རྣམ་པར་ཐུག་ཡོད། རང་ཅག་བོད་མི་བཙན་བྱོལ་བ་རྣམས་ལ་མཚོན་ན། འཛམ་གླིང་འདིའི་ཐོག་གི་རྒྱལ་ཁབ་དང་སྲིད་གཞུང་སུ་ལའང་མེད་པའི་མང་གཙོའི་ཁེ་དབང་འཕྲོག་རྩོད་མ་དགོས་པར་༧གོང་ས་མཆོག་གིས་གསོལ་སྩལ་གནང་ཡོད།

དེ་ཡང་འགན་དབང་གཉིས་ཀ་མི་མང་ལ་ཡོད་པ་ཡིན་སྟབས་འོས་ཤོག་དེ་མི་སུ་འདྲ་ཞིག་ལ་ལྡུག་མིན་གྱི་ཐོབ་ཐང་དང་དབང་ཆ་ལོ་ན་སོན་པའི་བོད་མི་ཚང་མར་ཡོད་ལ། འོས་ཤོག་ལྡུག་སའི་གང་ཟག་དེས་སྤྱི་དོན་ལྷག་བསམ་རྣམ་དག་བྱེད་མཁན་ཞིག་ཡིན་པར་འོས་ཤོག་ཕུལ་མཁན་གྱི་གང་ཟག་སོ་སོས་འགན་ལེན་ཐུབ་པ་ཞིག་དང་། འོས་ཤོག་འབུལ་སའི་གང་ཟག་དེས་འོས་ཆོས་དང་ལྡན་པའི་སྤྱི་དོན་ཐད་ལྷག་བསམ་རྣམ་དག་གནང་གི་ཡོད་མེད་ལ་བལྟ་ཞིབ་དང་། བསམ་འཆར་འབུལ་རྒྱུའི་འགན་དབང་གཉིས་ཀ་མི་མང་གིས་ལོངས་སུ་སྤྱོད་ཆོག་པ་ཞིག་ཡིན།

འོན་ཀྱང་། རང་ཅག་བཙན་བྱོལ་བོད་མི་རྣམས་ཀྱིས་མགོན་པོ་མཆོག་གིས་བསྩལ་བའི་དམངས་གཙོའི་ཐོབ་ཐང་གི་འགན་དབང་ཇི་བཞིན་ལག་བསྟར་མ་ཐུབ་པའི་དབང་གིས། ད་བར་སྤྱི་འཐུས་ཚད་ལྡན་འོས་འདེམས་ཞུ་མ་ཐུབ་པར་བརྟེན། སྐབས་སོ་སོའི་སྤྱི་འཐུས་གྲོས་ཚོགས་ཀྱི་ཚོགས་ཐེངས་མང་ཆེ་བའི་ནང་དུ། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་རྩིས་མེད། ཡང་ན་འགྲེལ་བཤད་གཞན་ཞིག་བརྒྱབ་སྟེ་རང་དོན་ཕྱོགས་ལྷུང་དང་འགན་མིན་ཞེན་འཛིན། ཐ་ན་དཔུང་སྒྲིག་གིས་མི་གཞན་ལ་འཇིགས་སྐུལ་དང་གནོན་ཤུགས་སྤྲད་དེ། གཞན་གྱི་དྲང་ཚུགས་དང་ལྷག་བསམ་བཅས་ལ་རྡུང་རྡེག་ཚབས་ཆེན་བཏང་ཡོད། ཅེས་སོགས་གསལ་ཡོད།

དེར་བརྟེན་ཐེངས་འདིའི་ཚོགས་ཆེན་སྟེང་མདོ་སྟོད་མི་མང་གི་ངོས་ནས་ལྷག་བསམ་རྣམ་དག་གིས་སྤྱི་དོན་སྒྲུབ་མཁན་ཞིག་དང་། ཤེས་འཇོན་ལྡན་པའི་སྤྱི་འཐུས་ཤིག་ཡོང་རྒྱུར་བགྲོ་གླེང་དང་གྲོས་བསྡུར་གནང་རྒྱུ་ཡིན་འདུག་ལ། ཐེངས་འདིའི་མདོ་སྟོད་ཆུ་བཞི་སྒང་དྲུག་གི་འགན་འཛིན་ལྷན་ཚོགས་སྐབས་ ༣༨ པའི་ཚོགས་འདུ་འདི་ཉིད་ཕྱི་ཚེས་ ༢༥ ནས་ ༢༧ བར་ཉིན་གསུམ་རིང་འཚོགས་གཏན་འཁེལ་ཡོད་འདུག