དགེ་ཆོས་ཀྱིས་འདོད་པའི་རྙིང་ཞེན་དེ་གང་ཡིན་ནམ།

ནགས་ཤོད་རིག་རལ།

   རྙིང་ཞེན་འདི་བོད་རིགས་ཤེས་ལྡན་པ་རྣམས་ཀྱིས་ཡང་ཡང་བསམ་མནོ་གཏོང་ས་ཞིག་ཡིན་མོད། རྙིང་ཞེན་ཟེར་བ་འདི་གང་ཞིག་ལ་ངོས་འཛིན་དགོས་པའི་ཐད་ལ་ལྟ་ཚུལ་མི་འདྲ་བ་ཡོད་པ་ནི་མངོན་སུམ་རེད།

  ཕྱི་ཚུལ་ཙམ་ནས་བལྟས་ན། བོད་པའི་ཤེས་ལྡན་པའི་ཁྲོད་དུ་རྒྱ་ཡིག་དང་བོད་ཡིག་གཉིས་ལ་སྦྱངས་གོམས་ཡོད་པ་དང་།  བོད་དང་རྒྱ་ནག་ཙམ་ལས་ཕྱི་རོལ་གྱི་འཇིག་རྟེན་དུ་འཚོ་བ་སྐྱེལ་མྱོང་མེད་པ། ལྷག་པར་དུ་རྒྱའི་རིག་གནས་དང་མར་ལེ་རིང་ལུགས་ཀྱི་བསམ་མནོའི་ཤུགས་རྐྱེན་ཕོག་པ་དེ་དག་གིས་རང་ཅག་གི་མི་རིགས་འདི་ལ་རྙིང་ཞེན་ཆེན་པོའི་གཡམ་ནད་ཅིག་འབུར་ཚུགས་སུ་ཡོད་པར་ཁས་ལེན་པས་མ་ཚད། རྙིང་ཞེན་དེ་ཡང་གདོད་མའི་རིག་གནས་ནས་དམ་པའི་ལྷ་ཆོས་བར་དང་། ཐ་ན་སྦྲ་ནག་ནས་རྩམ་པ་བར་དུ་ཡིན་ཚོད་གདའ།  ཡང་བོད་པའི་ཤེས་ལྡན་པའི་ཁྲོད་ནས་བོད་ཡིག་ཁོ་ནར་བྱང་ཆུབ་པའི་གཞིས་ལུས་མང་པོ་ཞིག་དང་།  ཡིག་རིགས་གསུམ་བཞི་ཙམ་ཤེས་མཁན།  རྐྱེན་མང་པོའི་དབང་གིས་ཡུན་རིང་གངས་ཅན་གྱི་ཕྱི་རོལ་དུ་འཚོ་བ།  རང་ཉིད་ཀྱི་སྐྱེ་ས་ཕ་ཁུངས་ལ་དུང་ཞེན་ཆེན་པོ་ཡོད་པ་དེ་དག་གིས་བོད་པ་ལ་ཡོད་པའི་ཐུན་མོང་མ་ཡིན་པའི་རིག་གཞུང་འདི་དག་གསར་རྙིང་གང་ཡིན་མ་བལྟོས་པར་དགའ་ཞེན་ཞིག་སླེབས་ཀྱི་ཡོད་པ་དང་། རྒྱུ་མཚན་ནི་རིག་གཞུང་དེ་དག་ནི་རང་གི་རྩ་བ་འཚོལ་ས་ཞིག་དང་།  རང་གི་ཁྱད་ཆོས་འདོན་བྱེད་ཞིག  དེ་བཞིན་མི་རིགས་ཀྱི་ཚེ་སྲོག་ཡང་ཡུན་རིང་གནས་ཐུབ་པའི་སྨན་མཆོག་ཅིག་ལ་བལྟ་བཞིན་ཡོད་པ་རེད།

  རྙིང་པ་ཐམས་ཅད་ལྷ་ཡི་སྲོལ་ཏུ་སྒྲོག ། གསར་པ་ཐམས་ཅད་ཐན་ལྟས་ཉིད་དུ་སྒོམ་ཟེར་བ་ནི་དགེ་ཆོས་ཀྱི་སྐད་ཆ་རྣོ་ངར་ཅན་ཞིག་རེད་ལ།  གསར་གཏོད་ཀྱི་སྙིང་སྟོབས་མེད་ན། སྐྱེ་བ་སྔ་ཕྱི་ཟེར་བ་ཡང་མེད་ལ། ལས་རྒྱུ་འབྲས་ཟེར་བ་ཡང་སྐྱག་རྫུན་རེད་ཟེར་བ་ནི་དོན་གྲུབ་རྒྱལ་གྱི་སྐད་ཆ་དེ་ལས་རྣོ་ངར་ཆེ་བ་ཞིག་རེད།  སྐད་ཆ་འདི་དག་གིས་ཤེས་ཡོན་ཅན་མང་པོ་ཞིག་གི་སྙིང་ཁ་ན་རྨ་བཟོ་མྱོང་ཡོད་ལ། ཤེས་ཡོན་ཅན་མང་པོ་ཞིག་གི་ཁྲག་རྒྱུན་ལང་ལོང་དུ་གཡོ་མྱོང་ཡོད།  ཕྱིས་སུ་རྙིང་ཞེན་ལ་དགག་རྒྱག་གི་དར་ཆ་སྒྲེང་མཁན་ཚང་མས་དགེ་ཆོས་ཀྱི་སྐད་ཆ་འདི་ཁ་རུ་འཁྱེར་ཡོང་བ་དང་། རྙིང་ཞེན་གྱི་རྫབ་དོང་རིང་པོ་དེའི་ནང་དུ་རྙིང་པ་ཐམས་ཅད་འཕེན་པ་དང་ལྷན་དུ་སངས་རྒྱས་ཆོས་ལུགས་འདི་ཡང་འཕེན་རྐྱང་བྱེད་པ་རེད།  ཡིན་ན་ཡང་དགེ་ཆོས་ཀྱི་ཡུན་ཐུང་བའི་མི་ཚེ་ལ་བལྟས་ན། ཁོང་རང་བརྩོན་པ་ཆེར་སྐྱེད་བྱེད་ས་ནི་དམ་ཆོས་འདི་རེད་འདུག་ལ། སངས་རྒྱས་ཆོས་ལ་དགའ་ཞེན་དང་འགན་འཁུར་གྱི་བསམ་པ་ཤུགས་ཆེན་པོ་ཞིག་ཡོད་པ་ནི་རྒྱ་གར་གྱི་གནས་ཆེན་ཁག་ལ་བགྲོད་པའི་ལམ་ཡིག་ལས། “ཅིས་ཀྱང་ནང་པ་སངས་རྒྱས་པ་རྣམས་ཀྱིས་རང་བསྟན་མི་ཉམས་གོང་འཕེལ་གྱི་ཆེད་དུ་ལུས་སྲོག་ལོངས་སྤྱོད་ལ་མ་བལྟོས་པའི་འབད་པ་རྩལ་འདོན་དགོས་པ་འདི་ཡིན་ལ།” ཅེས་གསུངས་པ་འདི་ཁོ་ན་ལས་རྟོགས་ཐུབ་ལ།  ད་དུང་ཁོང་ཉིད་བོད་ཀྱི་གྲུབ་མཐའ་ཁག་ལས་རྙིང་མའི་ཆོས་ལ་ཞེན་ཁོག་ཆེ་ཚུལ་དེ་ལ་བལྟས་ན་ཡང་ཁོང་གིས་འདོད་པའི་རྙིང་ཞེན་ཟེར་བ་དེ་དང་སངས་རྒྱས་ཆོས་ལུགས་བར་ལ་ནི་འབྲེལ་བ་ཏིལ་འབྲུ་ཙམ་ཡང་ཡོང་དོན་མི་འདུག  །  བསམ་མནོ་ཞིབ་ཀྱིས་བཏང་ན་ཡང་དགེ་ཆོས་ལྟ་བུ་མཁས་པའི་དབང་པོ་ཞིག་གིས་སངས་རྒྱས་ཆོས་ལུགས་ལ་དད་པ་བྱེད་པ་འདི་ཡང་རྙིང་ཞེན་དུ་འདོད་པར་བསམ་པ་ནི་བྱིས་བློ་ཚ་ཐག་ཆོད་འདུག  གང་ལགས་ཟེར་ན་དམ་པའི་ཆོས་འདི་ནི་འཛམ་གླིང་ཆོས་ལུགས་ཆེན་པོ་གསུམ་གྱི་ཡ་གྱལ་ཡིན་པ་དང་། རྒྱལ་ཁབ་དང་མི་རིགས་མང་པོ་ཞིག་གིས་ཀྱང་དད་མོས་བྱེད་ཀྱི་ཡོད་པ་མ་ཚད། ལྟ་གྲུབ་གང་ཞིག་གི་ཐོག་ནས་བཤད་ཀྱང་འགྲོ་བའི་གཙུག་རྒྱན་ལྟ་བུར་གྱུར་ཡོད་པས་ན་རང་རེ་ལ་ཡོད་པའི་ཆོས་འདི་ནི་བོད་མི་རིགས་ནམ་འཚོའི་བར་དུ་མི་རིགས་འདི་ཉིད་ཀྱི་རྒྱན་དང་གཟི་བརྗིད་ཡིན་ངེས་རེད།  ཡིན་ཀྱང་མཁས་པ་རྣམས་ཀྱིས་འགྱུར་བ་གཏོང་དགོས་པ་གང་དང་མི་དགོས་པ་གང་གི་ཐད་ལ་མཛུབ་མོ་དམར་འཛུགས་མེད་པར་རྙིང་ཞེན་ཟེར་བ་དང་། གསར་གཏོད་ཟེར་བ། བག་ཆགས་ཟེར་བའི་སྡོམ་ཚིག་ལྕི་མོ་རེ་གཡུགས་ཡོང་དུས་མཁས་བླུན་མི་གཅིག་ཀུན་རེ་ཞིག་ཀུ་ཅོ་ལྡིར་རེར་འགྲོ་བ་ལས། དུས་ཀྱི་བགྲོད་པའི་ཁྲོད་དུ་རྙིང་ཞེན་འདེད་རྒྱུ་ཡང་བྱིས་པས་འཇའ་ཚོན་འཛིན་པའི་དཔེ་རུ་ཡིན་ཚོད་གདའ།

   འོ་ན་རྙིང་ཞེན་ཟེར་བ་འདི་རིག་གནས་རྙིང་པ་ཡོད་ཚད་ལ་ཞེན་པ་ཟེར་བ་ཞིག་ལ་གོ་དགོས་སམ།  དེ་ལྟར་ན་དེ་རིང་གོང་གི་རིག་གནས་ཐམས་ཅད་རྙིང་པར་སོང་བས་གསར་རྙིང་གི་ཚད་དེ་གང་ནས་འཛིན་དགོས། མར་ཨེན་ལྟ་བ་དེ་ཚོ་ཡང་ལོ་བརྒྱ་ལ་ཉེ་བས་རྙིང་པ་འབུ་མ་བརྒྱབ་ཙམ་ཡིན་ངེས་རེད།  སྤྱིར་མི་རིགས་ཕལ་ཆེ་བ་རང་གི་རིག་གཞུང་རྙིང་པ་དང་། ལྷག་པར་དུ་མི་རིགས་སོ་སོས་དད་མོས་བྱེད་སའི་ཆོས་ལུགས་ལ་ནི་དད་པ་ཡོད་པ་གཅིག་པ་རེད།  ཡིན་ནའང་དམར་ཤོག་སྲིད་དབང་གིས་དབང་སྒྱུར་བྱེད་བཞིན་པའི་མི་རིགས་དང་རྒྱལ་ཁབ་ཁག་ཅིག་ནི་གནས་ཚུལ་ཁག་ཁག་རེད།  ཁོང་ཚོ་ལ་དམར་པོའི་ལྟ་གྲུབ་ཅིག་ཡོད་པའི་དབང་གིས་ཆོས་དང་རིག་གཞུང་ཟེར་བ་དགོས་པ་མེད་ལ། རང་དོན་འགྲུབ་ན་ཡོད་ཚད་གཏོར་ཀྱང་ཆོག་ལ་ཐབས་གང་ཞིག་སྤྱད་ཀྱང་ཆོག་གི་རེད།  བརྒྱ་ལ་མར་ལེའི་ལྟ་བ་འདི་བཟུང་ནས་བོད་ཀྱི་རིག་གནས་རྙིང་པ་ཐམས་ཅད་ཆུ་ལ་བསྐྱུར་ཀྱང་། འཛམ་གླིང་གི་འཕེལ་འགྲོས་ནི་དམངས་གཙོའི་ལམ་ཆེན་ཞིག་ཡིན་པས་སྒེར་གཅོད་ཀྱི་རིག་པའི་གཞུང་ལུགས་ལྟར་གྱུར་པའི་ལྟ་བ་འདི་ཚོ་ཚེ་རིང་པོ་གནས་ག་ལ་ཐུབ།

  འོ་ན་ཁོང་གིས་འདོད་པའི་རྙིང་ཞེན་དེ་གང་ཡིན་ནམ།  གསར་གཏོད་ཀྱི་སྙིང་སྟོབས་མེད་པའི་ལེ་ལོའི་འདུ་ཤེས་འཛིན་སྟངས་ཤིག་ལ་ཟེར་གྱི་ཡོད་དམ། ཡང་ན་གང་ཡོད་པ་དེ་ཙམ་ལ་ཤི་འཐམ་རོ་འཐམ་བྱེད་པ་ལས་རིག་གནས་གསར་པ་ནང་དུ་མི་འདྲེན་པའི་བག་འཁུམས་ཀྱི་རྣམ་འགྱུར་ཞིག་ལ་ཟེར་གྱི་ཡོད་པ་རེད།

   རྙིང་ཞེན་ཟེར་བ་ཡང་སྙིང་ཅི་ཞིག་ཡིན་ནམ།  འགྱུར་བ་མེད་པའི་འཚོ་བ་སྐྱེལ་སྟངས་དང་ཕྱག་འཚལ་སྟངས། སྐོར་བ་འགྲོ་སྟངས། ལྷ་སྐུ་བཞེངས་སྟངས་སོགས་ལ་ཟེར་གྱི་ཡོད་པ་ཡིན་ནམ།  དེ་དག་ཁྲོད་ནས་གནད་དོན་འགའ་ཤས་ལ་གཏན་གཏན་བསམ་མནོ་གཏོང་རྒྱུ་འདུག གལ་སྲིད་ང་ཚོས་དགོན་པའི་ནང་དུ་སྐུ་འདྲ་དང་མཆོད་རྟེན་སོགས་ལ་གསེར་དངུལ་རིན་ཆེན་གྱི་རྒྱན་ཆ་སྤྲོས་སྲོལ་དེ་དག་གང་སྟབས་བདེ་བདེ་ཞིག་དང་། དགོན་པའི་ནང་དུ་སློབ་གཉེར་བྱེད་མཁན་གྱི་དགེ་སློང་དེ་དག་གི་འཚོ་བའི་ཆ་རྐྱེན་དང་སློབ་གཉེར་ཁོར་ཡུག སློབ་གཉེར་སྒྲིག་ཆས་བཅས་ཡག་ཏུ་གཏོང་གང་ཐུབ་ཞིག་བྱས་ན་འགྱུར་བ་གང་ཞིག་འགྲོ་སྲིད་དམ།  གལ་སྟེ་འདམ་དང་ཤིང་། རག་དང་ལི་ཡི་སྐུ་ཞིག་གིས་གསེར་དངུལ་གྱི་སྐུ་ཞིག་གི་ཚབ་བྱེད་ཐུབ་ཀྱི་ཡོད་ན། འགྲོ་སོང་ལྷག་མ་དེ་དག་དགེ་འདུན་པ་ཚོའི་སློབ་པ་དོན་གཉེར་དང་བུ་ཕྲུག་ཚོའི་སློབ་ཡོན་ལ་སྤྱད་ཚེ་བོད་མི་རིགས་འདིའི་སྟོབས་ཤུགས་ཆེ་རུ་འགྲོ་སྲིད་དམ།   གཞན་ཡང་བོད་པའི་ནང་དུ་ལྷ་སྐུ་ལ་གཟི་དང་བྱུ་རུའི་རྒྱན་ཞལ་འདེབས་སུ་འབུལ་རྒྱུ་ཡོད་བཞིན་དུ་ཕྲུ་གུའི་སློབ་གསོ་ལ་འགན་ཅི་ཡང་མི་འཁུར་མཁན་ཡོད།  བོད་པའི་ཕ་མ་དེ་དག་རང་དོན་དུ་ཚེ་འདི་ཙམ་མ་ཚད་སྐྱེ་བ་ཕྱི་མའི་ལམ་བུ་བཤངས་དགོས་པས་ན། ཕྲུ་གུ་ཁ་སྐམ་པོར་བཞག་ནས་རྒྱུ་ཡོད་པ་དེ་དག་ཡང་རང་གི་ཚེ་ཕྱི་མའི་དགེ་རྩ་གསོག་པར་ཕངས་མེད་དུ་སྤྱོད་པ་རེད། སྐབས་རེ་ཕ་མ་དེ་དག་དེ་འདྲའི་སྒེར་སེམས་ཆེ་བ་ལ་བསམ་རྒྱུ་ཞིག་ཀྱང་འདུག རྒྱ་མིའི་ཕ་མ་རྣམས་ནི་རྒྱུ་ནོར་ཕལ་ཆེ་བ་ཕྲུ་གུའི་སློབ་གསོ་དང་མདུན་ལམ་ལ་སྤྱོད་པ་རེད། བོད་པའི་གོམས་སྲོལ་འདི་དག་གིས་མི་རིགས་ཀྱི་འཕེལ་རྒྱས་ལ་བཀག་རྒྱ་ཐེབས་ཡོད་པ་འདི་ནི་ཆོས་ཀྱིས་ལན་པ་མ་ཡིན་པར་ཆོས་བྱེད་སྟངས་ཀྱིས་ཕུངས་པ་རེད་བསམས། བཅོམ་ལྡན་འདས་སྐུ་འཚོ་བཞུགས་རིང་དུ་རྒྱལ་སྲིད་ལོངས་སྤྱོད་རྩྭ་བཞིན་དོར་ཕོད་དུས། ཁོང་གི་རྗེས་འཇུག་པ་རྣམས་ཀྱིས་སླར་ཡང་ཁོང་གི་སྐུ་ལ་གསེར་དངུལ་རིན་ཆེན་འདོགས་པ་ནི་འདྲ་ཆགས་པོ་མེད་པ་ལྟ་བུ་ཞིག་རེད།   སྤྱིར་ནང་ཆོས་ནི་འཛམ་གླིང་ཡུལ་གྲུ་གང་སར་ཡོད་པས་ལུང་དང་རྟོགས་པའི་ཟབ་ཚད་ཀྱིས་བསྟན་པ་འཕེལ་འགྲིབ་ཀྱི་ཚད་འཇལ་དགོས་པ་ལས་གསེར་དངུལ་རིན་ཆེན་གྱིས་ནི་ག་ལ་ཡིན།

 ཁ་ཅིག་ལ་དོགས་པ་འདི་འདྲ་ཡང་ཡོང་སྲིད། གོམས་གཤིས་དེ་དག་བོད་མི་རྣམས་ཀྱི་འཚོ་བ་དང་འོ་ཆུ་བཞིན་དུ་འདྲེས་པས་ལམ་དུ་འགྲོ་དཀའ་བསམས་མོད། ལོ་ངོ་སྟོང་ཕྲག་གི་གོམས་སྲོལ་སེམས་ཅན་གྱི་པགས་རྒྱན་སྤྲོས་པ་འདི་དག་༸སྐྱབས་མགོན་རིན་པོ་ཆེའི་བཀའ་མོལ་གཅིག་གིས་འགྱུར་བ་གཏོང་ཐུབ་ཀྱི་འདུག་པས། བརྒྱ་ལ་ང་ཚོའི་བོད་པའི་དགེ་འདུན་པ་རྣམས་དང་ཤེས་ཡོན་པ་རྣམས་ཀྱི་ཁྲོད་དུ་བསམ་མནོ་འདི་འདྲ་ཞིག་གཅིག་གྱུར་བྱུང་བ་ཡིན་ན་མང་ཚོགས་རྣམས་ཀྱི་བློ་ཁ་འགུག་རྒྱུ་ནི་དཀའ་ཚེགས་གང་ཡང་ཡོང་མི་སྲིད།

  ང་རང་ཚོས་ལོ་རྒྱུས་ལ་ཕྱི་མིག་བལྟས་པ་ཡིན་ན། བོད་པ་རྣམས་ཀྱིས་ལོ་ངོ་སྟོང་ཕྲག་རིང་དུ་བསགས་བཞག་པའི་གསེར་དངུལ་རིན་ཆེན་དེ་དག་དུས་འགྱུར་ཞིག་གི་ནང་དུ་རྒྱ་ནག་ལ་དབོར་ཕྱིན་པ་རེད།  ད་ལྟ་སྔར་བཞིན་འགྱུར་བ་ཅི་ཡང་མེད་པར་སྔོན་མའི་ལམ་དུ་གོམ་པ་སྤོས་ནས་བསྡད་ན་ཅུང་ཟད་བླུན་པ་མ་ཡིན་ནམ།  ལར་སངས་རྒྱས་དངོས་ཀྱིས་གཟིགས་ན་ཡང་།  གྲྭ་པ་གོས་ངན་ངོན་དང་སློབ་པ་ཨ་ལ་སྦ་ལ་འགའ་ཞིག་གིས་གསེར་དངུལ་གྱིས་བརྒྱན་པའི་དགོན་པ་དང་ལྷ་སྐུ་འགའ་སྲུང་ནས་བསྡད་ན་མཉེས་པ་ཡོད་དམ། ཡང་ན་དགེ་འདུན་ཆས་བཟང་ལ་སློབ་གཉེར་བཟང་བ་འགའ་ཞིག་གིས་སྟོན་པ་དང་བསྟན་པའི་ཁྱད་ཆོས་ཡོད་པའི་དགོན་པ་ཞིག་གཉེར་ནས་བསྡད་པ་མཐོང་ན་མཉེས་པ་ཡོད་རྟོགས་སླ་བ་ཡིན།  སེམས་ཅན་བདེ་ན་སངས་རྒྱས་བདེ་བ་བཞིན་སངས་རྒྱས་ཀྱི་བདེ་བའི་གཞི་སེམས་ཅན་ལ་བཞག་ཡོད་པས་ཇི་ཙམ་གྱིས་བོད་མིའི་སློབ་གསོའི་ཁ་སྟབས་བཟང་བ་དེ་ཙམ་གྱིས་བོད་མིའི་རྣམ་དཔྱོད་འཕེལ་སྲིད་པས་དེ་ལས་དགའ་བ་ཞིག་ག་ལ་ཡོད།  ལར་སངས་རྒྱས་ཀྱི་སྐུ་བཞེངས་པ་ཡང་སྟོན་པ་རྗེས་དྲན་དང་། སྟོན་པ་ལ་མིག་དཔེ། དེ་བཞིན་སྟོན་པའི་བཀའ་སློབ་དྲན་ཆེད་དུ་ཡིན་པས། ང་ཚོ་ཤེས་ཡོན་ཅན་རྣམས་ཀྱིས་གསེར་གྱི་ཚིགས་ཁེབས་མཛུབ་མོར་བཏགས་ན་ཛོར་པོ་མཐོང་བཞིན་དུ་ས་ཐོབ་ཀྱི་སྐྱེས་བུ་དང་འཁོར་བ་ལས་འདས་པའི་ལྷ་དེ་དག་ལ་འཇིག་རྟེན་ཐ་མལ་བས་དགའ་པོ་བྱེད་སའི་གསེར་དངུལ་རིན་ཆེན་གཡོགས་པ་ཡང་ཅུང་ཟད་ཐལ་མ་དྲག་ནམ། རང་རེ་ལ་ཡང་དད་པ་ཅན་གྱིས་ཁྱི་སོ་ལ་ཕྱག་བྱས་པའི་བསོད་ནམས་ཀྱིས་སངས་རྒྱས་ཚུལ་སྟོན་པའི་གཏམ་རྒྱུད་འདི་དག་གིས་སྒེར་སེམས་ཆེན་པོས་སངས་རྒྱས་ཀྱི་སྐུ་གསེར་གྱིས་གཡོགས་ཀྱང་འབྲས་བུ་ངན་སོང་ལས་མེད་པ་ཞིག་སྟོན་གྱི་ཡོད་པ་མིན་ནམ།  གཞན་ཡང་སྟོན་པའི་སྐུ་བཞེངས་པའི་རྒྱུ་མཚན་ནི་གོང་དུ་བཤད་པ་ལྟར་ཡིན་པས།  ང་ཚོས་མདོ་དབུས་ཁམས་གསུམ་གྱི་ས་ཆ་མང་པོར་རང་བྱུང་ཁམས་ཀྱི་ཁྲོད་དུ་མཆོད་རྟེན་བཞེངས་པ་བཞིན་རྡོ་ཆེན་ལ་སོགས་པས་སྟོན་པའི་སྐུ་བཞེངས་ན་གཡས་གཡོན་ན་ཡོད་པའི་འགྲོ་བ་ཡོངས་ཀྱིས་ལོངས་སུ་སྤྱོད་ཐུབ་པ་ཡིན་ལ། སྟོན་པའི་སྐུ་ཡིན་ན་དགོན་པ་དང་ཁྱིམ་ཕུག་ཁོ་ན་རུ་བསྲུང་ནས་སྡོད་དགོས་པའི་ཕྱིར་བཤོལ་འདི་ཡང་མི་དགོས་པ་རེད།

    ད་འོ་ན་དགེ་ཆོས་ཀྱིས་འདོད་པའི་རྙིང་ཞེན་ཟེར་བ་དེ་གང་ཡིན་ནམ། འགྱུར་བ་གཏོང་མི་འདོད་ལ་ཡོད་པ་དེ་དག་ལ་ཤི་འཐམ་རོ་འཐམ་བྱེད་སྡོད་པའི་ཞེན་ཁོག་དེ་ལ་ཟེར་བ་ཡིན་ནམ།  དོན་འགྲུབ་རྒྱལ་གྱིས་འབོད་པའི་གསར་གཏོད་ཟེར་བ་དེ་གང་ཡིན་ནམ།  རང་ལ་ཡོད་པའི་རིག་གཞུང་འདི་དག་ལ་འགྱུར་བ་གཏོང་ཕོད་པ་དང་། དུས་དང་འཚམས་པའི་རིག་གནས་གསར་པ་ནང་འདྲེན་དང་མེད་པ་གསར་གཏོད་བྱེད་དགོས་པ་ཞིག་ལ་ཟེར་བ་ཡིན་ནམ། ད་དུང་ཞོགས་དུང་གིས་སྤྲུགས་འདོད་པའི་བག་ཆགས་ཟེར་བ་དེ་ཅི་ཡིན་ནམ།  བོད་མི་རྣམས་ཀྱི་སེམས་རྒྱུད་ན་འཇགས་པའི་བག་འཁུམས་ཀྱི་སྡར་གཤིས་ཤིག་ལ་ཟེར་བ་ཡིན་ནམ། 

   ང་ཚོ་ལ་འདི་དང་འདི་ལྟ་བུ་ཆོས་དང་རིག་གནས་ཀྱི་བཅུད་མ་ཤོར་བའི་སྒོ་ནས་འགྱུར་བ་ཞིག་གཏོང་ཐུབ་ན་དགེ་མཚན་རླབས་པོ་ཆེ་ཐོན་སྲིད་པའི་ཆ་མང་པོ་ཞིག་ནི་ཡོད་ངེས་རེད་འདུག  གལ་སྲིད་དུས་དང་སྤྱི་ཚོགས། གང་ཟག འཛམ་གླིང་གི་འཕེལ་འགྲོས་དང་འཚམས་པར་ང་ཚོ་ལ་ཡོད་པའི་རིག་གཞུང་དག་ལ་ཡང་སྙིགས་དོར་བཅུད་ལེན་གྱི་འགྱུར་བ་བཟང་པོ་ཞིག་གཏོང་ཐུབ་ན་དགེ་ཆོས་ཀྱིས་མི་འདོད་པའི་རྙིང་ཞེན་འགོག་ཐུབ་ལ། དོན་གྲུབ་རྒྱལ་གྱིས་འདོད་པའི་གསར་གཏོད་ཡང་འདྲེན་ཐུབ་པ་མ་ཚད། ཞོགས་དུང་གིས་སྤྲུགས་འདོད་པའི་བག་ཆགས་ངན་པ་འགའ་ཡང་སེལ་ཐུབ་ངེས་རེད།