སྐུ་འབུམ་དགོན་པས་རྒྱ་ནག་འཐབ་ཕྱོགས་གཅིག་གྱུར་ཁང་གི་བཀའ་མངགས་ལྟར་པེ་ཅིན་གྱིས་ངོས་འཛིན་བྱས་པའི་པཎ་ཆེན་ལ་སྣེ་ལེན་ཞུ་རྒྱུ་ཁས་ལེན་དང་། དེ་དང་དུས་མཚུངས་སུ་༧གོང་ས་མཆོག་གིས་ངོས་འཛིན་གནང་བའི་པཎ་ཆེན་སྐུ་གོང་མའི་ཡང་སྤྲུལ་དགེ་འདུན་ཆོས་ཀྱི་ཉི་མ་མཆོག་གློད་གྲོལ་བཏང་སྟེ་ཕྱིར་བོད་མི་དམངས་ལ་སྤྲོད་རྒྱུར་རེ་སྐུལ་ཞུས་ཡོད་པ་རེད།
ཕྱི་ཟླ་ ༥ ཚེས་ ༡༠ ཉིན་བོད་དོན་དཔྱད་གླེང་ TIBET FORUM(http://tibetalk.com) ཞེས་པའི་རྒྱ་ཡིག་དྲ་ཚིགས་སུ་གནས་ཚུལ་སྤེལ་དོན། ཕྱི་ཚེས་ ༨ ཉིན་སྐུ་འབུམ་དགོན་གྱི་དགོན་པ་དོ་དམ་ལྷན་ཁང་དུ་རྫོང་འཐབ་ཕྱོགས་གཅིག་གྱུར་ཁང་གིས་བཀའ་མངགས་བཏང་སྟེ། རྒྱ་ནག་གིས་ངོས་འཛིན་གཏན་འབེབས་བྱས་པའི་པཎ་ཆེན་སྤྲུལ་སྐུ་དེ་ཕྱི་ཚེས་ ༡༢ ཉིན་པེ་ཅིན་ནས་ཡུལ་ཤུལ་གནོད་ཐེབས་ས་ཁུལ་དུ་ཕེབས་རྒྱུ་ཡིན་པ་དང་། ཕྱི་ཚེས་ ༡༤ ཉིན་སྐུ་འབུམ་དགོན་པར་ཕེབས་རྒྱུ་ཡིན་པས། དགོན་པའི་གྲྭ་བཙུན་རྣམས་ཀྱིས་དབུས་སྲིད་གཞུང་གི་མགྲོན་པོ་གལ་ཆེན་དེར་སྣེ་ལེན་ཡག་པོ་གནང་སྟེ་མགོ་མཇུག་བར་གསུམ་དུ་གནད་དོན་མི་འབྱུང་བར་ཁག་ཐེག་བྱ་དགོས་པ་བརྗོད་ཡོད་འདུག སྐུ་འབུམ་དགོན་པའི་གྲྭ་བཙུན་རྣམས་ཀྱིས་རྒྱ་ནག་དབུས་སྲིད་གཞུང་ལ་པེ་ཅིན་གྱིས་གཏན་འབེབས་བྱས་པའི་པཎ་ཆེན་ལ་སྣེ་ལེན་བྱ་རྒྱུ་ཁས་ལེན་བྱས་བ་དང་སྦྲགས། སྐུ་འབུམ་གྱི་དགོན་པའི་དོ་དམ་ལྷན་ཁང་གི་འཐུས་མི་ཡོངས་མཉམ་འབྲེལ་ཐོག་”ཁྱེད་ཅག་གིས་ཁོང་ཉིད་ངེད་བོད་མི་དམངས་ལ་ཕྱིར་སྤྲོད་ཡོང་བར་ཐུགས་རྗེ་གཟིགས” ཞེས་རྒྱ་ནག་སྲིད་གཞུང་གིས་ལོ་ ༡༦ ལ་བཙོན་འཇུག་བཀག་བསྐྱལ་བྱས་པའི་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གློད་གྲོལ་ཡོང་བར་རེ་ཞུ་ཕུལ་ཡོད་འདུག
འདི་བཞིན་གསར་འགྱུར་ཐོས་སྐབས་དུས་ནམ་ཡང་སེམས་ཤུགས་མི་ཆགས་སྙམ།
དངོས་གནས་དགའ་འོས་པ་ཞིག་རེད། དོན་དག་འགྲུབ་མིན་ལ་མ་ལྟོས་པར་འདི་ལྟར་གླེང་ཐུབ་པ་དེ་མི་རིགས་ཤིག་གི་བློ་སྟོབས་རེད། འདི་ནས་ཐུགས་རྗེ་ཆེ་ཞེས་ཞུ་རྒྱུ་ཡིན།
དགའ་འོས་པ་ཞིག་ལ་བོད་མི་ཚོས་ཚུར་ཁ་ནས་བཟུང་ན་ཕར་སྣ་ནས་འཇུ་དགོས་པ་དེ་ཤེས་འདུག