དེང་སྐབས་རྒྱ་ནག་གིས་བོད་དང་ཞིན་ཅང་གཉིས་ལ་ལྟ་སྟངས་མ་འདྲ་བ་ཞིག་གིས་སྟེང་ནས་ལྟ་དགོས་ཟེར་ལ། ས་ཁུལ་འདི་གཉིས་ནི་ཁ་བྲལ་བ་དང་རྒྱལ་ཁབ་ཀྱི་བདེ་འཇགས་ལ་གནོད་པ་བཟོ་མཁན་ཆེས་མང་ས་གཉིས་ཡིན་སྟབས། ནམ་རྒྱུན་རྡུང་རྡེག་ཚ་ནན་དང་ཆབ་སྲིད་སློབ་གསོའི་ལས་དོན་ཧུར་ཐག་གིས་བསྒྲུབ་པའི་ལྟ་སྟངས་བཟུང་ཡོད་ཀྱང་། ད་ལྟ་དེ་ལྟ་བུའི་ལྟ་སྟངས་དེར་བཤད་སྟངས་མ་འདྲ་ཞིག་གིས་འགྲེལ་རྒྱག་གིན་ཡོད།
རྒྱ་ནག་རྒྱལ་ཡོངས་སྲིད་གྲོས་ཀྱི་མགོ་གཙོ་ཅ་ཆིན་ལེན་གྱིས་རྒྱ་ནག་རྦད་དེ་གཅིག་གྱུར་ཡོང་ཆེད་དཔལ་འབྱོར་དང་སྤྱི་ཚོགས་འཛུགས་སྐྲུན་གྱི་བྱ་བར་ཞུགས་ཏེ། ཞིན་ཅང་དང་བོད་ལྗོངས་སུ་མ་དངུལ་བཏང་ནས་དར་རྒྱས་གོང་འཕེལ་ཡོང་བ་བྱེད་པ་དང་། འཕེལ་རྒྱས་ཀྱི་ཁ་ཕྱོགས་དང་འཛུགས་སྐྲུན་གྱི་རྨང་གཞི་བཏིང་ནས། གྲངས་ཉུང་མི་རིགས་ས་ཁུལ་གྱི་བཅོས་བསྒྱུར་སྒོ་དབྱེ་བསྟུད་མར་འཕེལ་རྒྱས་ཡོང་བའི་ཕྱོགས་ལ་ཐབས་དང་ཤེས་རབ་གང་ཡོད་བཏོན་པའི་ཁར། ཞིན་ཅང་དང་བོད་ལྗོངས་གཉིས་མཆོང་སྐྱོད་ལྟར་འཕེལ་རྒྱས་འགྲོ་བར་སྐུལ་འདེད་ཧུར་ཐག་བྱེད་མཁན་ཞིག་ཏུ་འགྱུར་དགོས་ཞེས་ཟེར།
དེ་རིང་སྔ་དྲོར་ཤིན་ཧཱ་དྲ་བས་སྤེལ་བའི་གནས་ཚུལ་ལྟར་ན། ཟླ་ ༥ ཚེས་ ༧ ཉིན། རྒྱ་ནག་གི་ཆབ་སྲིད་ཚན་པའི་རྒྱུན་ལས་དང་རྒྱལ་ཡོངས་སྲིད་གྲོས་ཀྱི་མགོ་གཙོ་ཅ་ཆིང་ལིན་གྱིས་པེ་ཅིང་དུ་འཚོགས་པའི་རྒྱལ་ཕྱིར་བཅའ་སྡོད་བྱས་པའི་འཛམ་གླིང་གི་ཀྲུང་གོ་བའི་ཚོགས་པའི་མཛའ་བརྩེ་མཉམ་འབྲེལ་ཚོགས་འདུ་སྐབས་ལྔ་བའི་འཐུས་ཚབ་པ་རྣམས་ལ་མཇལ་འཕྲད་བྱས་འདུག
ཚེས་ ༧ ཉིན་གྱི་ཕྱི་དྲོར། ཅ་ཆིང་ལིན་གྱིས་རྒྱལ་ཕྱིར་བཅའ་སྡོད་བྱས་པའི་འཛམ་གླིང་གི་ཀྲུང་གོ་བའི་ཚོགས་པའི་མཛའ་བརྩེ་མཉམ་འབྲེལ་ཚོགས་འདུ་སྐབས་ལྔ་བའི་འཐུས་ཚབ་པ་རྣམས་ལ་མཇལ་འཕྲད་སྐབས། མཚོ་སྔོན་ཡུལ་ཤུལ་དུ་བྱུང་བའི་ས་ཡོམ་གྱི་གནོད་འགོག་རྒུད་སྐྱོབ་བྱ་བར་ཐུགས་ཁུར་དང་རྒྱབ་སྐྱོར་གནང་བའི་རྒྱ་ཆེ་བའི་རྒྱལ་ཕྱིའི་ཀྲུང་གོ་བ་རྣམས་ལ་སྙིང་ཐག་པ་ནས་ཐུགས་རྗེ་ཆེ་ཞེས་དང་། མི་རིགས་མཐུན་སྒྲིལ་དང་མངའ་ཁོངས་བདག་དབང་ཆ་ཚང་ལ་སྲུང་སྐྱོང་བྱས་ཏེ། ཀྲུང་གོ་ཉིད་རྦད་དེ་གཅིག་གྱུར་ཡོང་བ་དང་། ཀྲུང་ཧྭ་མི་རིགས་བསྐྱར་དུ་དར་བའི་རླབས་ཆེན་བྱ་བཞག་མངོན་འགྱུར་བྱེད་པ་ནི། རྒྱལ་ཕྱིའི་ཀྲུང་ཧྭའི་བུ་ཕྲུག་རྣམས་ཀྱི་ཐུན་མོང་གི་བསམ་འདུན་ཉག་ཅིག་ཡིན་ཞིང་། དེ་ལྟ་བུའི་བསམ་འདུན་མངོན་འགྱུར་བྱེད་དགོས་ན། རྒྱལ་ཕྱིའི་ཀྲུང་ཧྭའི་བུ་ཕྲུག་རྣམས་ཀྱིས་མཉམ་གཅིག་ཏུ་ཧུར་བརྩོན་བྱེད་དགོས། ཞེས་དང་། ཡང་ཁོང་གིས་རྒྱ་ཆེའི་རྒྱལ་ཕྱིའི་ཀྲུང་གོ་བ་རྣམས་ལ་རེ་བ་གསུམ་བཏོན་འདུག
གཅིག ཞིན་ཅང་དང་བོད་ལྗོངས་ཀྱི་དཔལ་འབྱོར་དང་སྤྱི་ཚོགས་འཛུགས་སྐྲུན་གྱི་བྱ་བར་ཞུགས་ཏེ། ཞིན་ཅང་དང་བོད་ལྗོངས་སུ་མ་དངུལ་བཏང་ནས་དར་རྒྱས་གོང་འཕེལ་ཡོང་བ་བྱེད་པ་དང་། འཕེལ་རྒྱས་ཀྱི་ཁ་ཕྱོགས་དང་འཛུགས་སྐྲུན་གྱི་རྨང་གཞི་བཏིང་ནས། གྲངས་ཉུང་མི་རིགས་ས་ཁུལ་གྱི་བཅོས་བསྒྱུར་སྒོ་དབྱེ་དང་སྟུད་མར་འཕེལ་རྒྱས་ཡོང་བའི་ཕྱོགས་ལ་ཐབས་དང་ཤེས་རབ་གང་ཡོད་བཏོན་པའི་ཁར། ཞིན་ཅང་དང་བོད་ལྗོངས་གཉིས་མཆོང་སྐྱོད་ལྟར་འཕེལ་རྒྱས་འགྲོ་བར་སྐུལ་འདེད་ཧུར་ཐག་བྱེད་མཁན་ཞིག་ཏུ་འགྱུར་དགོས།
གཉིས། རྒྱལ་ཕྱིར་སྡོད་པའི་ཡུ་གུར་རིགས་དང་། བོད་རིགས་སོགས་མི་རིགས་གྲངས་ཉུང་གི་སྤུན་ཟླ་རྣམས་ཀྱི་འབྲེལ་འདྲིས་ལ་ཤུགས་སྣོན་རྒྱག་པ་སྟེ། རྡོག་རྩ་གཅིག་སྒྲིལ་གྱིས་རྒྱལ་ཕྱིར་སྡོད་པའི་རང་རྒྱལ་གྱི་མི་རིགས་གྲངས་ཉུང་གི་མི་རྣམས་ཀྱི་སེམས་པ་མེས་རྒྱལ་ལ་ཕྱོགས་པར་བརྩོན་ལེན་བྱེད་པ་དང་། མི་རིགས་མཐུན་སྒྲིལ་བརྟན་བརླིང་ཡོང་བར་རྒྱབ་སྐྱོར་མཁན་ཞིག་ཏུ་འགྱུར་བར་ཧུར་ཐག་བྱེད་དགོས།
གསུམ། ཞིན་ཅང་དང་བོད་ལྗོངས་ཀྱི་བཅོས་བསྒྱུར་སྒོ་འབྱེད་རིང་གི་གྲུབ་འབྲས་དྲིལ་སྒྲོག་ཆེན་པོ་བྱེད་པ་དང་། ཀྲུང་གོའི་མི་རིགས་དང་། ཆོས་ལུགས་ལས་དོན་གྱི་བྱེད་ཕྱོགས་སྲིད་ཇུས་དྲིལ་སྒྲོག་བྱེད་པ་དང་། རང་རྒྱལ་གྱི་ཚན་རྩལ་འཕེལ་རྒྱས་དང་། འཆམ་མཐུན་འཕེལ་རྒྱས། ཞི་བདེ་འཕེལ་རྒྱས་ཀྱི་འདུ་ཤེས་དྲིལ་སྒྲོག་བཅས་བྱས་ཏེ། ཀྲུང་གོ་དང་འཛམ་གླིང་བར་འབྲེལ་འདྲིས་པའི་སྤྲོ་སེམས་ཅན་ཞིག་བྱེད་པར་ཧུར་བརྩོན་བྱེད་དགོས། བཅས་བརྗོད་འདུག
འཛམ་གླིང་གི་རྒྱལ་ཕྱིའི་ཀྲུང་གོ་བའི་ཚོགས་པའི་མཛའ་བརྩེ་མཉམ་འབྲེལ་ཚོགས་འདུ་སྐབས་ལྔ་བ་ནི་རྒྱལ་སྲིད་སྤྱི་ཁྱབ་ཁང་གི་རྒྱལ་ཕྱིའི་ཀྲུང་གོ་བའི་ལས་དོན་གཞུང་སྒྲུབ་ཁང་དང་། ཀྲུང་གོའི་རྒྱལ་ཕྱིའི་འབྲེལ་འདྲིས་མཐུན་ཚོགས་བཅས་ཀྱིས་མཉམ་དུ་བསྒྲུབས་པ་དང་། འཛམ་གླིང་གི་ས་གནས་ཁག་གི་ཀྲུང་གོ་བའི་ཚོགས་པའི་འགན་ཁུར་བ་དང་། ཞང་ཀང་དང་ཨའོ་མོན། ཐེ་ཝན་བཅས་ཀྱི་རྒྱལ་ཕྱིའི་ཀྲུང་གོ་བའི་ཚོགས་པའི་འགན་ཁུར་བ་སོགས་ཁྱོན་སྡོམ་མི་ ༦༠༠ ཐེངས་འདིའི་མཛའ་བརྩེ་མཉམ་འབྲེལ་ཚོགས་འདུར་ཞུགས་ཡོད་འདུག
གང་ལྟར་ཡང་། དེང་སྐབས་རྒྱ་ནག་གི་དཔོན་རིགས་མཐོ་དམར་བར་མ་སུས་གཏམ་བཤད་བྱས་ཀྱང་ཁ་ནས་བོད་དང་ཞིན་ཅང་གཉིས་འབོར་གི་མེད་ལ། བོད་ནི་ ༢༠༠༨ ལོའི་ཞི་རྒོལ་ཆེན་མོའི་རྗེས་ནས་བཟུང་བོད་རྒྱ་ནག་གི་དཔོན་རིགས་ཚོའི་ཁ་སྣེ་ལྕེ་སྣེར་ཤུགས་ཆེར་སླེབས་པ་དང་། ཞིང་ཅང་ལོ་སྔོན་མ་བཟུང་སླེབས་ཡོད། མངའ་ཁུལ་འདི་གཉིས་ཀྱི་གང་ཡིན་ཡང་རྒྱ་ནག་གིས་ལས་སླ་བོར་གློད་འདོད་མེད་ལ། མུ་མཐུད་དེ་རང་གི་རྒྱལ་ཁབ་ཀྱི་མངའ་འབངས་ལས་ལོགས་སུ་མི་འབུད་པའི་འབད་བརྩོན་བྱེད་ཀྱིན་ཡོད། དེར་བརྟེན་རྒྱལ་ཁབ་ཀྱི་ཁ་བྲལ་སུས་བྱེད་ན་དེ་ལ་རྡུང་རྡེག་ཚ་ནན་གཏོང་དགོས་ལ། སུ་ཉམ་ཆུང་ལ་བསྡད་ན་དེར་འཛུགས་སྐྲུན་དང་འཕེལ་རྒྱས་གཏོང་དགོས་ཟེར། ད་ལྟ་རྒྱ་ནག་གཞུང་རང་གིས་འཛུགས་སྐྲུན་དང་འཕེལ་རྒྱས་བྱས་པའི་སྟེང་རྒྱལ་ཕྱིའི་ཀྲུང་གོ་བའི་བུ་ཕྲུག་རྣམས་ཀྱིས་ཀྱང་མངའ་ཁུལ་འདི་གཉིས་ལ་རོགས་རམ་བྱེད་དགོས་ཞེས་བརྗོད་ཀྱིན་འདུག
གང་ལྟར་ཡང་མི་རིགས་འདི་གཉིས་རྨོངས་གཉིད་ལས་སད་ཟིན་པ་རེད། ལྷག་པར་དུ་དུས་རབས་ཀྱི་བདག་པོ་རུ་གྱུར་པའི་མི་རབས་གསར་པ་དག་ཡོངས་སུ་སད་ཟིན་པས། དུས་རབས་གོང་མའི་བྱེད་ཐབས་དེས་ཏན་ནས་འཇོམས་མི་ནུས་པར་གྱུར། ད་ཆ་བྱེད་ཐབས་གསར་པ་ཞིག་ལག་བསྟར་བྱ་བར་འགོ་བརྩམས་མོད། ཤིན་ཏུ་དཀའ་བའི་གནས་ཡིན་ཏེ། ལོ་རྒྱུད་དང་ས་བབ། སྐད་ཡིག་དང་མི་རིགས། གང་གི་ཆ་ནས་ཀྱང་སོ་སོ་རང་ཉིད་ལ་རང་ཉིད་ངོས་འཛིན་པའི་རྟོག་པ་ཡོངས་སུ་སད་ཟིན་པའི་ཕྱིར་རོ།།
རྒྱྱ་ནང་ཞིན་བོད་གཉིས་ཀྱི་རྙོག་དྲ་མེད་པ་བཟོ་དགོས་ན་མི་རིགས་དེ་གཉིས་ཀྱི་སེམས་ལ་ཞི་བདེ་བསྐྲུན་ཐབས་བྱ་དགོས་པ་ལས་དམག་གིས་དྲག་རྡུང་བྱེད་ཞོར་དུ་དཔལ་འབྱོར་གྱི་ཡར་རྒྱས་ཇི་ཙམ་གཏང་རུང་ཞི་བདེ་དང་མིག་དཔེ་ལྟ་ས་ཞིག་ཡོང་རེ་ནི་ཉིན་མོའི་རྨི་ལམ་རང་རེད།
ཆབ་སྲིད་ཀྱི་དགོས་དབང་མེད་དུ་མི་རོང་བ་ཞིག་ལ་ངོས་འཛིན་བྱས་ན་ཆོག
རྒྱ་ནག་གི་རྩ་བའི་ཆབ་སྲིད་བེད་སྤྱོད་བྱེད་ཕྱོགས་རེད།དུས་ནམ་ཡིན་ཡང་བོད་མི་རིགས་འདི་དཔལ་འབྱོར་ཀྱི་དབང་དུ་སོང་ན་ཉེན་ཁ་ཞིག་ཆགས་སྲིད།ཡིན་ནའང་རྒྱ་ནག་གི་བཤད་ཕྱོགས་དང་སྟབས་བསྟུན་དགོས་རེད།གང་ཡིན་ཞེ་ན་མི་རིགས་ཡོང་རྫོགས་ཀྱི་མིག་ལམ་ནས་མཐོང་བདེ་བ་དང་རྒྱབ་སྐྱོར་བྱེད་འོས་པ་ཞིག་བྱེད་རྒྱུ་གལ་ཆེ་པོ་རེད་བསམ།རྒྱལ་སྤྱིའི་སྤྱི་ཚོགས་ནང་འོས་འཚམས་ཞིག་བྱེད་དགོས།
རྒྱ་ནག་རྒྱལ་ཡོངས་སྲིད་གྲོས་ཀྱི་མགོ་གཙོ་ཅ་ཆིན་ལེན་གྱིས་ཁ་གསལ་པོ་མ་བཤད་པ་མ་ཏོག་བོད་ཡར་རྒྱས་དང་རྫུགས་སྐྲུན་བྱ་རྒྱུར་ཁ་ཡར་ཏེ་རྒྱ་མི་བོད་དུ་གནས་སྤོས་བྱ་རྒྱུའི་ཐབས་འཇུས་ཤིག་རེད།
ལྟ་སྟངས་ གསར་པ་ལ་ ལས་འགུལ་ གསར་པ་ སྤེལ་ཐབས་ བྱེད་དགོས།
འདི་ཡག་པོ་འདུག གཞི་ཆགས་འདི་ཚོ་དངུལ་ལ་དགའ་ཞེན་ཆེ་བའི་གསར་འགྱུར་འདི་བཞིན་གོ་ན་འགྲོ་ཀྱང་རེད་ཨ་རོགས།
དེང་སང་གི་རྒྱ་ནག་ལྟབུའི་རྒྱལ་ཁབ་གཅིག་ཏུ་ཉེ་ལམ་ཅ་ཆིན་ལེན་གྱིས་བསྒྲགས་པའི་སྐད་ཆ་དེ་ཚོ་ཧ་ཅང་གི་གུ་ཡངས་པོ་རེད། བོད་པས་གོ་སྐབས་མང་པོ་ཞིག་འདི་འདྲའི་ཤོར་བ་རེད། སྤར་སྐེ་ཆེ་དྲག་ན་ཡང་སྐྱོན་ཡོད་རེད་དཱ། དེ་རིང་གི་སྐད་ཆའི་ནང་བལྟས་ན་ཧ་ལམ། སྤུན་ཟླ་རྣམས་ཀྱི་འབྲེལ་འདྲིས་ལ་ཤུགས་སྣོན་རྒྱག་པ་སྟེ། ཞེས་པ་སོགས་ལས་བོད་ནང་དུ་མགྱོགས་པོ་འགྲོ་འདོད་ཡོད་མཁན་ཚོར་ལག་ཁྱེར་སྤྲོད་རྒྱུའི་རེ་བ་འདུག་སྙམ། རྒྱ་ནག་གི་དབང་འཛིན་པའི་སྐད་ལ་ཆ་འཇོག་བྱེད་རྒྱུ་ཡོད་མ་རེད། ཟེར་ནས་གཡུག་རྐྱང་བྱེད་ན་ཉེན་ཁ་རེད་བསམ་གྱི་འདུག ཡང་གཡུག་གི་ཡིན་ན་སུས་གཡུག་ན་འགྲིག་གི་རེད་ལ། སུས་བདག་པོ་རྒྱབ་ནའང་འགྲིག་གི་རེད།
རྒྱ་ནག་ལ་ཆབ་སྲིད་ཀྱིས་དབང་ཤུགས་ཆེན་པོ་གཉིས་འཛམ་གླིང་སྟེང་ལ་བེད་སྤྱོད་ཡོད ། དཔལ་འབྱོར་དང་དམག་དོན་གཉིས།
བོད་དང་ཤིན་ཅང་གཉིས་ལ་འཛུགས་བསྐྲུན་བྱེད་དགོས་པ་དང། དྲིལ་བསྒྲགས་ཤུགས་ཆེན་པོ་བྱེད་དགོས་ཞེས་སྐད་ངན་ཤོར་དགོས་པ་དེ་རྒྱ་གཞུང་རང་གིས་བཟོས་པ་ཞིག་ཡིན་པ་ཤེས་ན་ཡག་པོ་རེད། དཔལ་འབྱོར་འགྲོ་སོང་དེ་ཙམ་གཏོང་མི་དགོས་པར་དོན་ངོ་མའི་བདེ་སྐྱིད་དེ་བསྐྲུན་ཐབས་བྱས་ཚེ་བོད་དང་ཤིན་ཅང་ལ་དོགས་ཟོན་དང་དངངས་སྐྲག་བྱེད་དགོས་དོན་ཅི། ཨ། ཅཱ་ཆིང་ལིང་ལྟས་ངན་མགོ
རྒྱ་ནག་གི་ཕྱོགས་གཅིག་ནས་ཁ་བྲལ་ཐབས་མེད་པའི་གཅེན་གཅུང་ལྟ་བུ་ཞིག་དང་། ཕྱོགས་གཞན་ཞིག་ནས་རྡུང་འདེགས་ཚ་ནན་གྱི་སྐད་ཆ་ཞིག་ཤོད་བཞིན་པ་རྟག་ཏུ་ཐོས་དེ་ནི་ཞི་དྲགས་སྤེལ་མའི་ཐབས་ཤེས་ཞིག་ཡིན་པ་དངོས་གསལ་དོད་པོ་རེད།
འོན་ཀྱང་ང་ཚོའི་ལམ་ཕྱོགས་ནི་བདེན་པ་དང་འཚེ་མེད་ཞི་བ་ཁོ་ན་ཡིན་པས་དེ་གཉིས་ནི་ཚ་གྲངས་ལྟབུ་འགལ་བ་ཁོ་ན་ཏེ་གཞི་གཅིག་ཏུ་མཉམ་གནས་མི་སྲིད་པ་ཞིག་ཡིན་ཀྱང་ཚ་གྲངས་མཉམ་བསྲེལ་གྱི་དྲོ་མིན་གྲངས་མིན་གྱི་དུས་དེ་ག་ཚོད་བར་དུ་རེ་རྒུག་བྱ་དགོས་སམ། དེ་འདྲའི་དུས་ཞིག་ཤར་ཐུབ་མིན་སུ་ཡི་མངོན་དཔོག་ཐུབ་བམ། ང་ཚོས་གྲ་སྒྲིགས་དང་བློས་གཏོང་ལ་ཚད་གཞི་ངེས་ཅན་ཡོད་པའི་གོ་བརྡ་ཞིག་རྒྱ་དམར་སྤྲོད་དགོས་པའི་དུས་སྐབས་དེ་མངོན་དུ་གྱུར་བཞིན་ཡོད་པའི་འཚོར་ཤུགས་ཤིག་རྟག་ཏུ་དྲན།
ཕྲན་གྱིས་འདིའི་ཐད་ལ་ལྟ་ཚུལ་ཞིག་བརྗོད་ན་འདོད ། རྒྱ་ཁབ་ཆེ་ཆུང་སུ་ཡིན་ན་སྐད་ཆ་བཟང་ཕྱོགས་དང་ངན་ཕྱོགས་གང་གིས་ཐད་ནས་བཤད་ན་ཆབ་སྲིད་ལ་མ་འདྲིས་པ་ཞིག་ཡོད་མི་སྲིད ། རྒྱུ་མཚན་ནི་རྒྱལ་ཁབ་གྲུབ་སྟེངས་དེ་ཆབ་སྲིད་ཀྱི་ངོས་ནས་གྲུབ་ཡོད་པས་རྒྱ་ནག་གི་ཆ་སྐད་འདིའང་ཆབ་སྲིད་ཀྱིས་དཀྱིལ་ནས་བློ་དོགས་ཤིག་དང་ཐེ་ཚོམ་གྱིས་བཤད་ཀྱིན་ཡོད། ཞིན་ཅང་དང་བོད་ལ་བཟུང་བའི་སྲིད་བྱུས་ཉི་མ་རེ་རེ་བཞིན་འཕྱོ་འགྱུར་འགྲོ་བཞིན་ཡོད། དེའང་བསམ་བློའི་ཆབ་སྲིད། དཔལ་འབྱོར་ཆབ་སྲིད་ཀྱིས་ཞིན་བོད་གཉིས་རྩ་བའི་སེམས་གཏིང་ནས་འགུགས་པའི་ཐབས་ཤེས་བྱེད་པའི་སྲིད་བྱུས་རེད ། ཐབས་ཤེས་སམ་སྲིད་བྱུས་འདིས་རྒྱ་ནག་གིས་རེ་འདུན་བཅང་བཞིན་པའི་ཁ་ཐོག་ཏུའང་འགྲོ་བཞིན་ཡོད། ཡིན་ནའང་། རྩ་བའི་མི་རིགས་དང་མིའི་རིན་ཐང་ཐད་ནས་བཤད་ན་དཔལ་འཔྱོར་དང་མི་རིགས་གཉིས་བརྗེ་མི་སྲིད་པ་རེད ། མི་རིགས་དང་མིའི་ཐོབ་ཐང་གི་གཞིར་རྩེའི་ཁེ་དབང་གླེང་མཁན་དེ་ཚོ་ཞིང་འབྲོག་ཁུལ་གྱི་དཔུལ་ཕོངས་རྐྱང་རྐྱང་མིན་པར་ཤེས་ཡོན་དང་དཔལ་འཔྱོར་གྱིས་ཕྱུག་པའི་མི་སྣ་གལ་ཆེན་གྱི་རིགས་རེད། དག་གིས་མི་རིགས་ཀྱི་ལས་དབང་བསྔོགས་འདོན་བྱེད་སྟེངས་དེས་མི་དང་མིའི་སེམས་རྩ་ནས་འགུལ་སྐྱོམ་ཐེབས་ཀྱི་ཡོད ། དེ་བས་ནས་རྒྱ་ནག་གི་སྐད་ཆ་འདི་ཕྱོགས་མང་པོའི་ཐད་ནས་བསམ་བློས་འཐེན་རེས་བྱེད་དགོས། མཐའ་གཅིག་ཏུ་དགག་རྒྱག་བྱས་ན་གོ་སྐབས་ཟེར་བ་དེ་སྐབས་དང་དུས་ལ་ཁེལ་ཡོད་སྟབས་གོ་སྐབས་ཤོར་མི་སྲིད་པ་མིན ། ཞིན་བོད་གཉིས་ཀྱི་མི་རིགས་ཀི་ལྟ་བ་འདིས་ད་ལྟའི་རྒྱ་ནག་དམར་ཕྱོགས་རྐུབ་སྟེགས་བརྟན་རླིང་ཡོང་ཐུབ་ཀི་མེད། ་རྐྱེན་གྱིས་དྲག་རྡུང་གི་འཚབས་ལ་དཔལ་འཔྱོར་གྱི་གུ་ཡངས་སུ་གཏོངས་ཐབས་བྱེད་བཞིན་པ་འདི་རྒྱ་ནག་གི་ཆབ་སྲིད་ཀྱི་གཞིར་རྩ་རེད །
རྒྱ་དམར་གྱི་དཔོན་རིགས་འདི་དག་གིས་སྐད་ཆ་བཤད་གཏང་ལ་ལྟས་ན།
དཔལ་འབྱོར་ཡ་རྒྱས་ལ་ཁ་རྟགས་ནས་ཆབ་སྲིད་ཀྱི་ལས་འགུལ་གང་ཞིག་སྒྲུབ་རྩིས་ཡོད་ན། ཡིན་ཡང་ང་ཚོའི་ཕྱོགས་ནས་གོ་སྐབས་འདི་དམ་འཛིན་བྱེད་ནས་རང་ཕྱོགས་ཀྱི་ནུས་པ་ཇེ་མཐོ་རུ་གཏང་རྒྱུ་གལ་ཆེ་བ་མ་ཚད་རྒྱ་ཕྱོགས་ཀྱིས་རྒྱལ་སྤྱིའི་སྤྱི་ཚོགས་མགོ་སྐོར་གཏང་ཀྱི་ཡོད་མེད་མིག་གི་ཡག་པོ་མཐོང་ཐུབ་པར་བྱེད་གལ་ཆེ།
དེང་སོང་ནི་བཀའ་ཁྲི་འདི་རྒྱ་སྤྱིའི་གནས་ཚུལ་ལ་དོ་སྣང་ཤུགས་ཆེ་རུ་འགྲོ་གྱིན་འདུག ཡིན་ན་ཡང་ད་དུས་ཚོད་ཡོལ་ཟིན་པར་རྟེན་ནུས་པ་ཐོན་ཁག་པོ་རེད།
རྒྱ་ནག་གི་ཁ་ལ་ལྟ་ཉན་རྒྱུ་ཅང་མེད། གཙོ་བོ་གན་ཚང་གི་ལག་ཅིག་ཅིག་བཙོག