དྲན་བསྐུལ་ཞིག ཧོར་གཙང་འཇིགས་མེད།

སྔོན་ཆད་རྒྱ་གར་དུ་སྡོད་པའི་སྐྱབས་བཅོལ་བ་རྣམས་ཕྱི་རྒྱལ་ཁག་ཏུ་འགྲོ་དགོས་ན། ངེས་པར་དུ་འགྲོ་ཡུལ་ཕྱི་རྒྱལ་བ་ཞིག་གིས་ལམ་གྲོན་དང་སྡོད་གནས་སོགས་ཁག་ཐེག་བྱས་པའི་ཁྲིམས་མཐུན་གྱི་ཡིག་ཆ་ཚད་ལྡན་མེད་ན་ལག་དེབ་སེར་བོ་ (I.C) བཟོ་མི་ཐུབ། ལོ་ཚིགས་གསལ་བོར་མི་དྲན་ཡང་སྤྱི་ལོ་ ༢༠༠༠ ལོ་ཡས་མས་ཤིག་ལ་རྒྱ་གར་གཞུང་གིས་དེ་ལ་འགྱུར་བ་ཆེན་པོ་ཞིག་བཏང་སྟེ། རྒྱ་གར་དུ་གནས་སྡོད་ཆོག་པའི་སྐྱབས་བཅོལ་ལག་ཁྱེར་ཨར་སི་ (R.C) ཡོད་མཁན་སུས་ཀྱང་ལག་དེབ་སེར་བོ་བཟོ་ཆོག་པ་བྱུང༌།

གསལ་བརྡ་དེ་སྤྱི་ཚོགས་ཁྲོད་ཁྱབ་མ་ཐག བོད་མི་འདུས་སྡོད་བྱེད་པའི་ས་གནས་རང་བདེན་ཚོགས་ཆུང་ཁག་གི་སྒོ་མདུན་དུ་མཚན་མོའི་ཆུ་ཚོད་ ༡༡ ཡས་མས་ནས་མི་དམངས་བསྟར་ཕྲེང་དུ་བསྒྲིགས་ནས་ཡོད་ཅིང༌། ཀམ་པ་ལི། ཉལ་ཆས་སོགས་ཁྱེར་ཡོང་སྟེ་མཚན་གང་ལ་སྒུག་གིན་ཡོད་ལ། ལོ་དེ་ནི་བོད་མིའི་སྐྱབས་བཅོལ་ལོ་རྒྱུས་ནང་དང་བླང་དཔྱ་དངུལ་འབུལ་རྒྱུར་འཚངས་ཀ་ཆེ་ཤོས་དེ་བྱུང་ཡོད། སྐབས་དེར་སྐྱབས་བཅོལ་དུ་འབྱོར་བ་ནས་དང་བླང་དཔྱ་དངུལ་སྤྲོད་མྱོང་མེད་མཁན་མང་བོས་ཀྱང་ལག་དེབ་གསར་བཟོ་བྱས་ཏེ་དཔྱ་དངུལ་སྤྲད་ཡོད་ལ། ལོ་ངོ་དུ་མའི་རིང་འབུལ་ཆད་བྱུང་བ་ཁག་གིས་ཀྱང་ཕངས་སེམས་མེད་པར་ཆད་དངུལ་འཇལ་བ་སྟེ། ཆུང་མདང་སྐྱེས་བྱིས་པ་ཡན་ཆོད་ནས་ཆེ་ལོ་རྒན་བརྒྱད་ཅུར་སོན་པ་དག་ལའང་ལག་དེབ་བཟོས་ཏེ་དཔྱ་དངུལ་ཕུལ་ཡོད། དེར་བརྟེན་ལོ་དེར་དང་བླང་དཔྱ་དངུལ་ལ་འཕར་སྣོན་ཆེན་པོ་བྱུང༌། རྒྱུ་མཚན་ཅི་ཞིག་གི་ཆེད་དུ་བོད་མི་རྣམས་ཧོབ་སྟེ་གཉིད་སད་ནས་དང་བླང་དཔྱ་དངུལ་གཙང་འཇལ་བྱ་རྒྱུ་དྲན་པ་ཡིན་ནམ།

དེ་ནས་ལྡི་ལི་དོན་གཅོད་ཁང་གི་ཕྱི་ནང་ཀུན་ཏུ་བོད་མི་འཚངས་ཀ་ཤིན་ཏུ་ཆེ། ངྷ་རམ་ས་ལ་དང༌། གཞིས་ཆགས་ཁག རྒྱ་བལ་དུ་གནས་སྡོད་ཁ་འཐོར་བོད་མི། དགོན་སྡེ་ཁག་གི་དགེ་འདུན་པ་དང་བཙུན་མ། བླ་མ་སྤྲུལ་སྐུ་སོགས་མདོར་ན་བོད་མི་སྐྱ་སེར་གཉི་ག་ལྡི་ལི་དོན་གཅོད་ཁང་གི་སྒོ་ཁར་འདུས། ཁྱིམ་ཚང་རེ་རེ་བཞིན་ནང་མི་ཡོད་ཚད་ལ་ལག་དེབ་སེར་བོ་བཟོས། ལག་དེབ་བཟོ་ཆེད་འགེང་ཤོག་ཉོ་ལེན་བྱེད་མཁན་ཡང་དེ་མཚུངས་ཀྱིས་མང༌། ལ་ལས་རང་གི་ནང་མི་དང༌། ཁྱིམ་མཚེས་གྲོང་བ། དགའ་བོ་ཉེ་འབྲེལ་སོགས་ཀྱི་འགེང་ཤོག་བསྐངས་ཟིན་པ་ཉི་ཤུ་སུམ་ཅུ་མཉམ་ཁྱེར་ཀྱིས་ལྡི་ལི་དོན་གཅོད་ཁང་དུ་སླེབས་ཀྱིན་ཡོད་ལ། དོན་གཅོད་ཁང་དུ་ལག་དེབ་ཐོ་འགོད་ཀྱི་སྔ་གཞུག་བརྩད་དེ་ཁ་རྩོད་ཙག་ཙིག་ཀྱང་རྒྱུན་ཆད་མེད་པར་འབྱུང་གིན་ཡོད། དེ་ལྟར་ལོ་ངོ་གཅིག་གཉིས་རིང་ལ་བོད་མི་ཕལ་མོ་ཆེའི་ལས་ཀའི་གཙོ་གནད་དེ་ལག་དེབ་སེར་བོ་བཟོ་རྒྱུ་རང་གི་ཐོག་ལ་བཞག་སོང༌།

ཡང་ངྷ་རམ་ས་དང༌། ལྷོ་གཞིས་ཁག ལྡེ་ར་ལྡུན་སོགས་ཀྱི་ས་གནས་ཉེན་རྟོག་ལས་ཁུངས་སུ་སྐྱབས་བཅོལ་ལག་དེབ་བཟོ་མཁན་ཤིན་ཏུ་མང་ཞིང༌། དང་ཐོག་ཨར་སི་ཁྲིམས་མཐུན་གྱིས་བཟོ་ཐུབ་ན་ཧིན་སྒོར་༡༤ ཙམ་ཡིན་ཀྱང༌། བོད་མི་མང་བོས་རྔམ་ཧེབ་ཀྱིས་ལྟག་སྒོ་བརྒྱུད་དེ་ཨར་སིའི་བཟོས་གླ་ཧིན་སྒོར་ཆིག་སྟོང་ཉིས་སྟོང་ལ་སྤར། བོད་མི་རྣམས་ཨར་སི་བཟོ་རྒྱུར་ཅི་ཙམ་རྔམ་པ་དེ་ཙམ་གྱིས་ཨར་སིའི་རིན་གོང་ཉིན་འཕར་ཟླ་འཕར་བྱུང༌། སྐྱབས་བཅོལ་བོད་མི་དང་ས་གནས་ཉེན་རྟོག་པ་སྐོར་ཞིག་མཉམ་འབྲེལ་གྱིས་ཁྲིམས་མཐུན་མ་ཡིན་པའི་ཨར་སི་བཟོ་བཞིན་པ་རྒྱ་གར་གཞུངགིས་ཚོར་ཏེ་ས་གནས་མང་བོ་ཞིག་ཏུ་ཨར་སི་བཟོ་མི་ཐུབ་པར་གྱུར། དེའི་རྐྱེན་གྱིས་བོད་མི་སྐྱབས་བཅོལ་ལག་དེབ་བཟོ་མཁན་མང་བོ་ལྡེ་ར་ལྡུན་དང༌། དགོན་པ་ཁག་ཏུ་རྒྱུག དེ་ནས་ཀྱང་རིན་གོང་ཉིན་བཞིན་འཕར་སྟེ་མཐའ་མཇུག་ཧིན་སྒོར་ཆིག་ཁྲི་ནས་ཉིས་ཁྲིའི་བར་སྤར། གནས་ཚུལ་དེ་སྐབས་སྔ་ཕྱིར་གྲོས་ཚོགས་ནང་གི་གླེང་གཞི་གལ་ཆེན་ཞིག་ཡིན་ལ། གླེང་ནས་རྫོགས་རྒྱུ་མེད་པའི་གླེང་གཞི་ཞིག་ཀྱང་ཡིན།

ལག་དེབ་སེར་བོ་བཟོ་རྒྱུར་འཚངས་ཀ་བྱེད་བཞིན་པའི་ཁྲོད་དུ། སྤྱི་ཚོགས་ཐོག་གི་མི་སྐྱ་ཕོ་མོ་དང༌། གདན་ས་ནས་ཕེབས་པའི་དགེ་བཤེས། བླ་མ་སྤྲུལ་སྐུ་ཡང་ཡོད་པའི་ཚོང་བ་མང་བོས་ལག་ཁྱེར་སེར་བོ་ཚུར་ལེན་སྐབས་ལྡི་ལི་དོན་གཅོད་ཁང་མ་བརྒྱུད་པར་ལྟག་སྒོ་བརྒྱུད་པའི་མགྱོགས་ལམ་བཏོད། མགྱོགས་ལམ་དེ་བརྒྱུད་ནས་དོན་དག་འགྲུབ་མཁན་གང་འཚམ་ཡོང་གིན་ཡོད་ཀྱང༌། མི་དམངས་བྱིངས་ཀྱི་ལག་དེབ་དུས་ཐོག་ལ་རག་མི་ཐུབ་པའི་དཀའ་ངལ་འཕར་མ་བྱུང༌། དཀའ་ངལ་དེ་ད་ལྟའང་གཙང་སེལ་བྱུང་ཡོད་མེད་མི་ཤེས།

ལྷག་པར་དུ་སུད་སི་གཙོས་པའི་ནུབ་ཕྱོགས་བོད་མི་དག་གིས་མནའ་མ་དང་མག་པ་འཚོལ་རྒྱུ་ཇེ་མང་ལ་སོང༌། དངུལ་ལོར་ཛ་སྒྱུར་གྱི་དབང་གིས་ཧིན་སྒོར་ཆིག་ཁྲི་དང་ཉིས་ཁྲི་ལྟ་བུ་ཁོང་ཚོར་དངུལ་འབོར་ཆེན་པོ་མིན་སྟབས། དེབ་སེར་པོ་བདུན་ཕྲག་གཅིག་གམ་ཉིན་གྲངས་དུ་མའི་ནང་རག་ཆེད་ལྐོག་དངུལ་འབོར་ཆེན་བརྫངས། དེས་མི་དམངས་བྱིངས་ཀྱི་ལག་དེབ་རག་ཡུན་དེ་བས་ཀྱང་ཇེ་རིང་དུ་ཕྱིན། ལོ་ངོ་སྔ་ཕྱི་དེ་དག་ལ་ལག་དེབ་སྐོར་གྱི་སྒྲུང་གཏམ་དགོདབྲོ་ལ་ངུ་ཡང་བྲོ་བ་མང་བོ་བྱུང༌།

ཡང་དགོན་སྡེ་ཁག་གི་དགེ་འདུན་པ་རྣམས་ལ་མཐོང་མཆན་ཝེ་ཟ་རག་སྟབས་བདེ་བ་བྱུང་ནས། ཁྱིམ་པ་ཕོ་མོ་མང་བོས་མགོ་རིལ་བྱས། གྲྭ་ཆས་གྱོན་ཏེ་ཕྱི་རྒྱལ་ལ་འགྲོ་ཐབས་བྱས། གང་ལྟར་ཝེ་ཟ་ནག་འཚོང་གི་ལས་ཀ་བྱས་ཏེ་དེང་སང་ཨ་སྒོར་ས་ཡ་དུ་མའི་བདག་པོ་ཆགས་པའང་ཡོད་པར་གྲགས་ཤིང༌། ནག་ཚོང་ལ་ལམ་འགྲོ་མ་རྒྱུག་ནས་རང་རང་ཡིབས་ས་མ་རྙེད་པའི་དཀའ་ངལ་མྱོང་བཞིན་པའང་ཡོད་པར་བཤད། དེ་འདྲ་ཞིག་གི་ངང་ལ་ཨ་རིའི་ཝེ་ཟ་རག་ན་ཧིན་སྒོར་འབུམ་ཕྲག་བཅུ་གྲངས་དང༌། ཡུ་རོབ་ཀྱི་ཝེ་ཟ་རག་ན་ཧིན་སྒོར་དྲུག་འབུམ་བདུན་འབུམ་སྤྲོད་པ་ཡོངས་གྲགས་ཆགས།

དེའི་བར་རོལ་ཞིག་ལ་ཨ་རིའི་གཞུང་ངོས་ནས། སྔར་གྱི་བལ་ཡུལ་གློ་ཚེ་རོག་གི་དམག་ཁོངས་གཙོ་བྱས་པའི་བོད་མི་ཆིག་ཁྲི་ཨ་རིར་ལེན་རྒྱུ་ཡིན་པའི་སྦིར་གྲགས་ཆེན་པོ་བྱུང༌། བལ་གཞུང་གིས་ངོས་ལེན་མ་བྱས་ནས་ཨ་བལ་གཉིས་ཀྱིས་དཀའ་རྙོག་དེ་སེལ་མ་ཐུབ་པ་འདྲ། དེ་དང་འབྲེལ་ནས་རང་རེའི་སྤྱི་ཚོགས་ནང་གི་ཚོགས་སྡེ་དུ་མས་ཀྱང་བོད་མི་མང་བོ་ཨ་རིར་གཏོང་གིན་ཡོད་ལུགས་བསྒྲགས་ཏེ་ས་གནས་མང་བོར་ཐོ་འགོད་བྱས། ཐོ་འགོད་དེ་བོད་གཞུང་དང་འབྲེལ་བ་ཡོད་མེད་དང༌། ཨ་རིས་བལ་ཡུལ་ནས་མི་གྲངས་ཆིག་ཁྲི་ལེན་འཆར་དང་འབྲེལ་བ་ཡོད་མེད་སོགས་གླེང་གཞི་ཆེན་པོ་ཆགས། དེའི་སྐོར་སྐབས་དེའི་གྲོས་ཚོགས་སུའང་གླེང་སློང་གང་འཚམ་བྱུང༌།

དེ་ནས་བཙན་བྱོལ་བོད་གཞུང་གིས་ཐབས་ཤེས་གནང་སྟེ་ཆབ་སྲིད་བཙོན་ཟུར་བ་བརྒྱ་སྐོར་རེར་ཨོ་སི་ཀྲེ་ལིས་ཡར་གཏོང་མགོ་བརྩམས། དེས་རྐྱེན་བྱས་ཏེ་ཆབ་སྲིད་བཙོན་པའི་གྲངས་འབོར་ལྡབ་འགྱུར་གྱིས་ཇེ་མང་ལ་སོང༌། བཙོན་ཟུར་གྱི་འོས་ཆོས་བཤེར་སྐབས། བཙོན་ཟུར་ནང་ཕན་ཚུན་ལ་ཆབ་སྲིད་བཙོན་པ་དངོས་གནས་ཡིན་མིན་གྱི་རྫུན་རྐུབ་བརྡོལ་རེས་མང་བོ་བྱུང༌། དོན་དག་དེ་ཡང་སྤྱི་འཐུས་གྲོས་ཚོགས་སུ་སླེབས། བཀའ་ཁྲི་ཟམ་གདོང་རིན་པོ་ཆེས་གསུང་རྒྱུར། བདེ་སྲུང་ལས་ཁུངས་ཆུང་ཆུང་འདི་འདྲ་ཞིག་གིས་བོད་ནང་གི་ས་གནས་མི་འདྲ་བ་མང་བོ་ནས་ཡོང་བའི་ཆབ་སྲིད་བཙོན་ཟུར་ཡིན་གསུང་མཁན་རྣམས་ལས་དངོས་གནས་པ་སུ་ཡིན་དཔྱད་ཐབས་མི་འདུག ངའི་ཕ་ཡུལ་གྱི་མི་ཞིག་གིས་དེང་སང་ཁྱིམ་མཚེས་མར་བརྐུས་ནས་རྒྱ་གར་ལ་བྲོས་པ་དང༌། ཨ་མའི་མགོ་ལ་སྟ་རེས་གཞུས་ནས་རྒྱ་གར་ལ་བྲོས་པ་དག་ཀྱང་ཆབ་སྲིད་བཙོན་པ་ཆགས་འདུག་ཟེར་གྱིན་འདུག་མོད། རང་གཞུང་གི་ངོས་ནས་དེ་དག་ལ་དབྱེ་བ་དགར་ཐབས་མ་བྱུང༌། ཡང་རིགས་ཤིག་གིས་ང་ཚོ་བཙོན་ཁང་དུ་མ་སོང་ཡང་དུས་ཡུན་ཐུང་ངུའི་རིང་བཙོན་ཁང་དུ་འགྲོ་མཁན་ཚོ་ལས་བྱས་རྗེས་ང་ཚོར་ཆེ་བ་ཡོད་ཟེར་ནས་རྙོག་དྲ་བཤད་ཀྱིན་འདུག དེ་ལ་བརྟེན་ནས་བཀའ་ཤག་གིས་ཆབ་སྲིད་བཙོན་པ་དངོས་དང༌། དེ་དང་འབྲེལ་ཆགས་སོགས་སྡེ་ཚན་དྲུག་ཏུ་དབྱེ་སྟེ་དེ་དག་ཡོད་ཚད་ཆབ་སྲིད་བཙོན་པའི་མིང་ཐོག་ནས་ཕྱི་སྐྱོད་རྒྱན་ཤོག་གི་ཐོབ་ཐང་ཡོད་པ་བྱས་ཡོད་ཅེས་གྲོས་ཚོགས་ལ་གསལ་བཤད་གནང་སོང༌།

མདོར་བསྡུས་ནས་བཤད་ན་གོང་གི་ང་ཚོའི་སྤྱི་ཚོགས་ཁྲོད་ཀྱི་དངོས་བྱུང་གཏམ་རྒྱུད་དེ་དག་གིས་ཅི་ཞིག་མཚོན་གྱིན་ཡོད་དམ། རྣམ་དཔྱོད་ཅན་ཚང་མས་དངོས་བྱུང་གནས་ཚུལ་དེ་དག་བརྗེད་མེད་པའི་རེ་བ་ཡོད། ད་དུང་ང་ཚོའི་སྤྱི་ཚོགས་ཀྱི་ཕྱི་སྒྲོམ་རགས་པ་སོར་གནས་ལྟ་བུར་ཡོད་ཀྱང༌། དེས་མི་དམངས་ཀྱི་བསམ་བློའི་སྒྲོམ་གཞི་བརྟན་གནས་ཡིན་པ་མཚོན་མི་ཐུབ། སྤྱི་ལོ་ ༡༩༩༡ དང་ ༩༢ ཙམ་ནས་མགོ་བཙུགས་ཏེ། གཞིས་ཆགས་ཁག་གི་མི་དམངས་དང༌། སློབ་གྲྭའི་སློབ་མ། དགོན་སྡེའི་གྲྭ་བཙུན་སོགས་ཀྱི་བསམ་བློའི་སྒྲིག་འཛུགས་ལ་གཡོ་འགུལ་ཐེབས་མགོ་བརྩམས་ཡོད། གཞུང་འབྲེལ་གྱིས་ཨ་རིར་བོད་མི་ཆིག་སྟོང་མ་བཏང་བའི་ཡར་སྔོན། གཞིས་ཆགས་ཁག་གི་ཁྱིམ་ཚང་རྣམས་ལ་དབུལ་ཕྱུག་གི་ཁྱད་པར་ཆེན་པོ་མེད་ཅིང༌། དཔལ་འབྱོར་ཐད་འགྲན་བསྡུར་ཀྱང་དེ་ཙམ་མེད་མོད། ཨ་རིའི་ཆིག་སྟོང་སོང་ནས་ལོ་ངོ་གཉིས་གསུམ་གྱི་རྗེས་ནས། ནང་མི་གང་རུང་ཨ་རིར་ཡོད་པ་དག་གིས་གཞིས་གྲོང་དུ་ཁང་བ་གསར་རྒྱག་དང༌། ཕོ་གསར་མོ་གསར་ཚོས་ཨ་རི་དང་ཡུ་རོབ་ཀྱི་གྲགས་ཅན་ལྷམ་རིགས་གྱོན། རྒྱ་གར་གྱི་ཐོན་གསར་སྦག་སྦག་བཏང༌། གཞིས་ཆགས་ཀྱི་ས་ཞིང་ཐེམ་སྐལ་རྣམས་ཁྱིམ་ཚང་གཞན་པ་དང༌། རྒྱ་གར་ཡུལ་མི་སོགས་ལ་བག་མར་བཏང༌། གསེར་གྱི་རྒྱན་ཆ་དང༌། གློག་ཀླད་དཔེ་གསར་གྱི་རིགས། རྒྱ་གར་དུ་མི་རག་པའི་པར་ཆས་ཐོན་གསར་ཅན་ཁྱེར་བ་སོགས་དབྱར་དགུན་མཚན་གཅིག་ལ་བརྗེས་པ་ལྟ་བུའི་གློ་བུར་གྱི་འགྱུར་ལྡོག་དེས། ཡར་རྒྱས་མེད་པའི་མི་ཁྱིམ་ཁག་གི་སེམས་པ་ལ་རྡུང་རྡེག་ཕོག་ཡོད་ཅིང༌། ཕྱུག་པོ་འབྱོར་ལྡན་ཆགས་དགོས་ན་གཞིས་ཆགས་ཀྱི་ས་ཞིང་འདེབས་ལས་དང༌། ཚོང་ལས་ཙག་ཙིག་གིས་མི་ཡོང་ཞིང༌། ངེས་པར་ཨ་རི་དང་ཡུ་རོབ་ཏུ་འགྲོ་དགོས་པའི་འདུ་ཤེས་སྐྱེས་སུ་བཅུག

དེ་ནས་བཟུང་བོད་མི་རྣམས་ཀྱི་མངོན་འདོད་ཉག་ཅིག་ནི། ནུབ་བསྐྱོད་ཕྱུག་འགྱུར་བྱེད་རྒྱུ་དེ་རང་ཡིན་ལ། དེ་འགྲུབ་ཐབས་སུ་བུ་བུ་མོ་མང་བོ་སུད་སི་དང་ཨ་རི་སོགས་སུ་མནའ་མ་དང་མག་པར་སྟེར་ཅི་ཐུབ་དང༌། ཆེད་དུ་མངག་ནས་ཕྱི་རྒྱལ་བ་དག་ལ་ཆང་ས་རྒྱག་པ། གྲྭ་བཙུན་རྫུན་མ་འཁྲབ་པ། ཚོགས་འདུ་རྫུན་མར་འགྲོ་བ། བླ་སྤྲུལ་དང་སྐུ་ངོ་ཁག་ཅིག་གི་ཞབས་ཞུ་བ་དང་སྐད་སྒྱུར་བ་རྫུན་མ་འཁྲབ་པ་སོགས་མདོར་བསྡུས་ན། འཇིག་རྟེན་ཐོག་གི་གལ་ཆེན་དུ་རྩི་བའི་ལུས་ངག་ཡིད་གསུམ་པོ་བློས་བཏང་གིས་ཕྱི་རྒྱལ་དུ་འགྲོ་རྒྱུ་ཁོ་ན་དོན་གཉེར་བྱས། དེ་ནི་ལོ་རྒྱུས་ཀྱི་འཁོར་སྐྱོད་ཅིག་ཏུ་གྱུར། སུས་ཀྱང་འགོག་ཐབས་དང་ལྡོག་ཐབས་མེད་པའི་ཐག་གཅོད་རང་བཞིན་གྱི་བསམ་བློའིདཔུང་བསྐྱོད་ཅིག་ཏུ་གྱུར།

ནུབ་ཕྱོགས་སུ་འགྲོ་རྒྱུ་ལམ་ལྷོངས་མ་བྱུང་བ་ཁག་ཅིག་གིས། རང་སེམས་ཀྱི་སྡིགས་འཚིག་ཟོས་པ་བོད་གཞུང་དང་། ལྷག་པར་དུ་ལས་ཀྱི་སྣེ་མོ་བ་དག་ལ་འགེལ་བཞིན་པ་དང་བསྡོངས་ནས། ལག་དེབ་དང་མཐོང་མཚན་ཝེ་ཟ་ནག་ཚོང་རྒྱག་མཁན་དག་གིས་དཀྲོགས་གཏམ་བཟོས་ཏེ། བཀའ་བློན་ཁྲི་བ་ཟམ་གདོང་རིན་པོ་ཆེས་བཀའ་བཏང་སྟེ་བོད་མི་ཕྱི་རྒྱལ་དུ་འགྲོ་རྒྱུར་བཀག་འགོག་བྱེད་ཀྱིན་ཚུལ་སོགས་འུད་སྒྲོག་བྱས། ཁོ་བ་ཚོས་དཀྲོགས་གཏམ་ཅི་ཙམ་སྤེལ་བ་དེ་ཙམ་གྱིས་མི་རྣམས་སེམས་འཚབ་ལངས་ཏེ་ལག་དེབ་དང་ཝེ་ཟ་ཉོ་འཚོང་ཇེ་བཟང་དུ་སོང༌།

ཕྱོགས་གཞན་ཞིག་ནས་བཤད་ན། སྐབས་དེ་དག་ཏུ་ཨ་རི་དང་ནུབ་ཡུ་རོབ་ཏུ་གསར་སླེབས་བོད་མི་རྣམས་ལ་བོད་ནས་གསར་དུ་འབྱོར་བ་དང༌། རྒྱ་གར་དུ་གཏན་སྡོད་བྱེད་མཁན་རིགས་གཉིས་ཡོད་ཅིང༌། ཁོང་ཚོ་སུ་ཡིན་ཀྱང་དང་ཐོག་ཁོང་ཚོའི་སེམས་ངོ་ན་ཡོད་པ་ནི་ཤར་ཕྱོགས་ཀྱི་རིག་གཞུང་སྟེ། རང་ཉིད་ལས་ནང་མི་སྤུན་མཆེད་གཙོ་བའི་འདུ་ཤེས་འཛིན་སྟངས་ཀྱིས་བསྐུལ་ཏེ། རང་ཉིད་ཀྱི་བདེ་བ་ཁྱད་དུ་བསད་དེ་མི་གྲངས་ལྔ་དྲུག་གམ་དེ་ལས་མང་བ་ཁང་མིག་གཅིག་ཏུ་མཉམ་སྡོད་བྱས། ལས་ཀ་ལ་བཟང་ངན་ཡག་བཙོག་གི་དབྱེ་གསེས་མེད་པར་སྒྲུབ་རྐྱང་བྱས། ནངས་སྔ་ལངས་དང་དགོང་འཕྱི་ཉལ་གྱིས་དཀའ་ལས་ཆེན་པོ་བརྒྱབ་པའི་ཡོང་འབབ་ཕལ་མོ་ཆེ་རང་གི་ནང་མི་སྤུན་མཆེད་ཚོར་བཏང༌། ནང་མི་དག་གིས་དེ་ཉིད་གཞན་ལ་ངོམ་སྒྲོག་བྱས་པའི་རྐྱེན་གྱིས། བོད་མི་རྒན་གཞོན་ཚང་མ་སྔར་གྱི་རང་ཉིད་སྡོད་གནས་སུ་མུ་མཐུད་སྡོད་མི་ཤེས་པ་ལྟ་བུར་གྱུར།

དེའི་རླབས་རྒྱུན་རྒྱ་གར་དང་བལ་ཡུལ་ཙམ་མ་ཡིན་པར་བོད་ནང་ལའང་ཁྱབ་སྟེ། སྤྱི་ལོ་ ༢༠༠༠ ཡས་མས་ཀྱི་གསར་འབྱོར་བ་རྣམས་བལ་ཡུལ་སྣེ་ལེན་ཁང་དུ་འབྱོར་སྐབས་རྒྱ་གར་དུ་ཡོང་དོན་ཅི་ཡིན་དྲིས་ཚེ། ཨ་རིར་འགྲོ་རྒྱུ་ཡིན་ཟེར་མཁན་མང་ཤོས་ལྟ་བུར་གྱུར། གང་ལྟར་དེ་འདྲའི་ངང་བཙན་བྱོལ་བོད་མིའི་བསམ་བློའི་སྒྲིག་འཛུགས་ལ་དོན་གྱིས་གཡོ་འགུལ་ཆེན་པོ་ཐེབས་ཡོད། གནས་སྟངས་དངོས་གནས་པ་འདི་འདྲ་ཁས་ལེན་བྱེད་འདོད་མེད་མཁན་དག་ལ་གྲོས་མོལ་ཅི་ཡང་ཞུ་བཞིན་མེད། འདི་བརྒྱུད་ནས་བོད་མི་ཆིག་འབུམ་བཞི་ཁྲིའི་ནང་དྲང་ཕྱོགས་ཀྱི་བསམ་བློ་གཏོང་མཁན་བརྒྱ་ཙམ་བྱུང་བ་ཡིན་ན་བདག་གིས་དཀའ་བརྒྱབ་པ་ལ་གྲུབ་འབྲས་ཐོན་པ་ཡིན།

མཐའ་མཇུག་རྒྱ་གར་རང་བཙན་ཐོབ་པ་ནས་སྟོང་ལོ་གསར་བའི་ལོ་མགོ་བར། ཚན་རིག་པ་དང༌། སྨན་པ། ལག་རྩལ་བ། རྩོམ་པ་བོ། ཚོང་བ་སོགས་ཚུད་པའི་ཡུལ་མི་ཕྱི་རྒྱལ་དུ་འགྲོ་མཁན་རྣམས་རང་གི་རྒྱལ་ཁབ་ལ་ཤ་ཞེན་མེད་མཁན་དང༌། མི་རིགས་ལ་དུང་ཞེན་མེད་མཁན། རིག་གཞུང་ལ་ཤ་ཚ་མེད་མཁན་དུ་རྩིས་ཁར། ཁོང་རྣམས་རྒྱལ་ཁབ་གཞན་དུ་སྤོས་ཉིན་ནས་རྒྱ་གར་ཡུལ་མིའི་(Citizenship) རང་བཞིན་འདོར་དགོས་བྱུང་བ་དང༌། རང་གི་སྐྱེས་ཡུལ་ལ་མ་དངུལ་ (Invest) བཏང་སྟེ་ཚོང་ལས་རྒྱ་བསྐྱེད་ཀྱི་ལམ་ཁ་བཀག་པའི་དབང་གིས། སྤྱི་ལོ་ ༢༠༠༢ ལོར་ཕྱི་སྡོད་རྒྱ་གར་ཕྱུག་བདག་གསུམ་ལ་ཡུལ་མིའི་ཐོབ་ཐང་བསྐྱར་དུ་སྤྲད་ནས། ཁོང་གསུམ་གྱིས་ལོའུ་རྡི་ཡ་ན་དང༌། ཧ་རིས་ཡ་ན་སོགས་སུ་ཞིང་ལས་ཡར་རྒྱས་དང༌། སྨན་ཁང་གསར་རྒྱག་བྱས་པ་ལྟ་བུ་ལས་རང་མིས་རང་ཡུལ་དུ་འཛུགས་སྐྲུན་མ་དངུལ་གཏོང་ཐབས་མ་བྱུང་བའི་གྱོང་གུད་དང༌། རྒྱ་ནག་གཞུང་གིས་སྤྱི་ལོ་ ༡༩༧༩ ལོ་ནས་ཕྱི་སྡོད་རྒྱ་མི་ཡིན་ནོ་ཅོག་ལ་འབོད་བསྐུལ་གྱིས། ལོ་ངོ་བཅུ་གྲངས་ལ་ཕྱི་རྒྱལ་ནས་རྒྱ་ནག་ལ་མ་དངུལ་བཏང་བའི་བརྒྱ་ཆ་བརྒྱད་ཅུ་ལྷག་ཕྱི་སྡོད་རྒྱ་རིགས་ཡིན་ཅིང༌། དེས་རྒྱ་ནག་གི་དཔལ་འབྱོར་ཡར་རྒྱས་ལ་ཤིན་ཏུ་ཕན་པ་བྱུང་བའི་གནས་ཚུལ་གཉིས་གཤིབ་བསྡུར་སོགས་མདོ་དོན་བཙན་བྱོལ་བོད་གཞུང་གི་ངོས་ནས། ཆབ་འབངས་རྣམས་ཀྱིས་གཞིས་ཆགས་ཀྱི་ས་ཞིང་འདེབས་ལས་བསྐྱུར་ཏེ་ནུབ་ཕྱོགས་སུ་ལས་གླ་འཚོལ་རྒྱུ་བདམས་ཟིན་པའི་སེམས་ཁམས་ལ་རྒྱུས་ལོན་མ་གནང་བར། མུ་མཐུད་ནས་སྐྱེ་ལྡན་སོ་ནམ་ (Organic Product) ཐོན་ལས་ལ་གཅིག་ཏུ་འབད་དགོས་པའི་སྲིད་ཇུས་འཛིན་བཞིན་པ་དེ་གཅིག་བྱས་ན་ས་སྟོང་ལ་མདའ་འཕེན་པ་ལྟ་བུར་མི་འགྱུར་བའི་ངེས་པ་མེད།

གལ་སྲིད་མི་དམངས་མང་ཤོས་ཀྱི་བསམ་བློ་ནུབ་ཕྱོགས་སུ་འཁོར་ཡོད་ན། བཙན་བྱོལ་བོད་གཞུང་གིས་སྤྱན་ཟུང་བཙུམ་སྟེ་མུ་མཐུད་ཨུ་ཚུགས་གནང་རྒྱུ་དེ་ཐབས་ལམ་ཡག་ཤོས་དེ་མ་ཡིན་པར། དེ་ལུགས་ཀྱི་སྲིད་ཇུས་གསར་བ་ཞིག་གྲ་སྒྲིག་དགོས་པ་དེ་དུས་རབས་ཀྱིས་ཚུར་བཀལ་ཡོང་བའི་འགན་འཁྲི་ཞིག་ཡིན་ནམ་སྙམ།

༢༠༡༠།༥།༨ ཉིན་བྱང་ཨ་རིའི་གྲོང་ཁྱེར་ནོའུ་ཡོཀ་ནས།།