མཐར་ཕྱིན་སློབ་མ་སྐོར་ཞིག་གི་རེ་འདུན།

ཉེ་ཆར་ཕྱི་ཚེས་ ༣ ཉིན་གྱི་ཕྱི་དྲོ་ལས་ཁུངས་གྲོལ་ཏེ་ཁྱིམ་དུ་ལོག་སྐབས། གངས་སྐྱིད་སྤོ་ལོ་རྩེད་ཐང་གི་འོག་ཏུ་རྒྱབ་ལ་ལྕགས་སྒམ་འཁུར་ཅིང་ལག་ཏུ་དཔེ་ཁུག་བཟུང་བ་དང་། འགའ་རེ་ཡི་ལག་ཏུ་ཉལ་ཆས་དང་བཅའ་དངོས་ཙག་ཙིག་འཁྱེར་ཡོད་པ་འགའ་རྐང་པ་བརྒྱབ་སྟེ་ཡོང་གིན་ཡོད་པར་ཐུག་སོང་། ཞིབ་ཏུ་བལྟས་སྐབས་ཁོང་ཚོ་ཤེས་རབ་དགའ་ཚལ་སློབ་གླིང་གི་སློབ་མ་ཡིན་པ་ངོ་ཤེས་ཤིང་། དེ་མ་ཐག་ཉིན་དེའི་སྔ་དྲོར་སློབ་གྲྭ་དེར་མཐར་ཕྱིན་ལག་འཁྱེར་སྤྲོད་པའི་མཛད་སྒོ་དྲ་རྒྱས་པོ་ཞིག་ཚོགས་ཡོད་པ་དང་། མཛད་སྒོའི་སྟེང་གནད་ཡོད་མི་སྣ་འགས་གསུང་བཤད་རིང་ཐག་ཆོད་རེ་གནང་བའང་གཞི་ནས་དྲན་བྱུང་། ཡང་སྙིང་ཁོང་ཅག་ནི་ཤེས་རབ་དགའ་ཚལ་སློབ་གླིང་གི་སྐབས་ ༡༨ པའི་མཐར་ཕྱིན་སློབ་མ་སྐོར་ཞིག་རེད། ངས་སློབ་མ་འདི་དག་ཐད་བསམ་བློ་གཏོང་བཞིན་ནང་དུ་ཡོང་བ་ཡིན། ཁོང་ཅག་དོ་ནུབ་གང་ནས་འདུག་རྒྱུ་ཡིན་ནམ། སང་ཉིན་གང་དུ་འགྲོ་རྒྱུ་རེད་དམ། མུ་མཐུད་སློབ་སྦྱོང་གི་གོ་སྐབས་རག་གམ། མ་འོངས་པར་ཅི་ཞིག་བྱ་རྩིས་ཡོད་དམ། དགོང་མོ་དེར་ང་གཉིད་དུ་ཡུར་རག་བར་དྲི་རྟགས་མང་པོ་ཞིག་གིས་ངའི་མིག་གི་མཐོང་ལམ་ཡང་ཡང་སྒྲིབ་ཅིང་། སྙིང་ཉེ་བའི་སློབ་གྲོགས་དེ་དག་མིག་ལམ་ནས་མ་ཡལ། མཐར་སློབ་མ་དེ་དག་ལ་བཅར་འདྲི་ཞིག་བྱས་ཏེ་ཁོང་ཅག་གི་རྒྱབ་མདུན་གཉིས་ལ་རྒྱུས་ལོན་ཞིག་བྱ་རྒྱུར་སེམས་ཐག་བཅད་པ་ཡིན།

ཕྱི་ཉིན་ཞོགས་པ་མལ་ལས་ལངས་མ་ཐག་ཁ་པར་བརྒྱུད་སློབ་མ་དེ་དག་བཙལ་ཏེ། ཁོང་ཅག་གི་ཚབ་བྱས་ཏེ་སློབ་ཕྲུག་ཅིག་ལ་བཅར་འདྲི་བྱ་ཆོག་པའི་རེ་འདུན་བཏོན་པ་ཡིན། ཕྱི་ཚེས་ ༡༤ ཉིན་ཤེས་རབ་དགའ་ཚལ་སློབ་གླིང་གི་མཐར་ཕྱིན་སློབ་མ་བཀྲ་ཤིས་རྒྱ་མཚོ་ཞུ་བ་ཞིག་ང་འཚོལ་དུ་སླེབས་སོང་། ཐོག་མར་ངེད་གཉིས་སྤྱི་ཡོངས་ནས་གླེང་མོལ་བྱས་སྐབས། ཁོས་ང་ལ་ལོ་རྒྱུས་འདི་ལྟར་ངོ་སྤྲོད་གནང་བྱུང་། ངའི་མིང་ལ་བཀྲ་ཤིས་རྒྱ་མཚོ་ཟེར་ཞིང་ཕ་ཡུལ་མགོ་ལོག་ནས་ཡིན། ཕྱི་ལོ་ ༡༩༩༢ ནས་སློབ་གྲྭ་ཆུང་འབྲིང་ལ་སོང་ཞིང་། ༢༠༠༤ ལོར་མགོ་ལོག་ཁུལ་དགེ་ཐོན་སློབ་གྲྭ་ནས་མཐར་ཕྱིན་རྗེས་ནང་མིའི་རེ་འདུན་ལྟར། ཡང་བསྐྱར་སློབ་གྲྭ་ཆེན་མོ་ཞིག་ལ་ཡིག་ཚད་བཏང་སྟེ་འཕྲོད་འདུག འོན་ཀྱང་སྔོན་མ་ནས་རྒྱ་གར་ལ་འགྲོ་རྒྱུའི་འདུན་པ་ཡོད་སྟབས། ༢༠༠༥ ལོར་རྒྱ་གར་ལ་ཡོང་སྟེ་ཤེས་རབ་དགའ་ཚལ་གླིང་ལ་ཞུགས་ཤིང་། ཉེ་ཆར་ཕྱི་ཟླ་ ༥ ཚེས་ ༣ ཉིན་ལོ་ལྔའི་སློབ་ཡུན་རྫོགས་སོང་། ཕྱི་ལོ་ ༡༩༩༢ ནས་ ༢༠༡༠ བར་ལོ་བཅོ་བརྒྱད་རིང་གི་སློབ་སྦྱོང་ཁྲོད་བོད་ཡིག་བློས་གཏོང་མ་ཐུབ། སློབ་འབྲིང་སྐབས་ནས་རྩོམ་ཐུང་ངུ་རེ་བྲིས་ཏེ། ༢༠༠༠ ལོ་ནས་༼ གངས་རྒྱན་ན་ཆུང་ཚགས་པར ༽ སྟེང་རྩོམ་རེ་ཟུང་སྤེལ་ཞིང་། ཉིས་སྟོང་བཞི་ལོར་ང་ཚོ་སློབ་གྲོགས་ལྔ་མཉམ་རུབ་ཀྱིས་༼ གངས་གྲོང་གི་རླུང་བུ ༽ ཞེས་པའི་དེབ་ཆུང་ཞིག་བཏོན་པ་ཡིན། སྐབས་དེར་སློབ་གྲྭའི་དགེ་རྒན་དང་འབྲེལ་ཡོད་ལས་བྱེད་ཚོས། མགོ་ལོག་དགེ་ཐོན་སློབ་གྲྭའི་ལོ་འཁོར་ ༤༠ གི་ལོ་རྒྱུས་ཐོག་སློབ་ཕྲུག་སྒེར་ངོས་ནས་དེབ་བཏོན་པ་ཐོག་མ་རེད་ཟེར། ཞེས་འདས་པའི་སློབ་སྦྱོང་གི་བརྒྱུད་རིམ་སྤོབས་པའི་ཐོག་ནས་བཤད་དེ་མཇུག་ཏུ་སླེབས་སྐབས་སྐད་གདངས་ཇེ་དམའ་རུ་ཕྱིན་སོང་།

སྐབས་དེར་ངས་ཁོང་གི་སློབ་སྦྱོང་བརྒྱུད་རིམ་ལ་ཡི་རངས་དང་བཅས་རྒྱ་གར་ལ་ཡོང་བའི་དམིགས་ཡུལ་དྲིས་སྐབས། སྤྱིར་ང་ཚོའི་ཕ་ཡུལ་དུ་རྒྱ་གར་ལ་འགྲོ་མཁན་ཉུང་ཉུང་རེད། བོད་གཞུང་ཟེར་བ་དང་གཞུང་འབྲེལ་མིན་པའི་ཚོགས་པ་ཟེར་བ། སློབ་གྲྭ་དང་དགོན་པ་འདི་འདྲ་ཞིག་ཡོད་རྒྱུ་རེད་དྲན་མ་སོང་། སློབ་ཆུང་སྐབས་ནས་གསོག་སྒར་དང་སྦིར་སློབ་གྲྭ་སོགས་གོ་མྱོང་། ༧རྒྱལ་བ་རིན་པོ་ཆེ་ལ་ཐེངས་གཅིག་མཇལ་རྗེས་དབྱིན་ཡིག་ཡག་པོ་ཞིག་སྦྱང་དགོས་བསམ་ཡོད། སྐབས་དེར་ཧམ་པ་ཟེར་ན་འདྲ། སེམས་ཤུགས་ཟེར་ན་འདྲ། བོད་ཡིག་རྒྱ་ཡིག་གང་འཚམ་ཤེས་ཀྱི་ཡོད། རྒྱ་གར་ནས་དབྱིན་ཡིག་སྦྱང་ཏེ་སྐད་གསུམ་སྨྲ་བ་ཞིག་ཆགས་ན། ད་གཟོད་བོད་པར་རླབས་ཆེན་གྱི་ལས་ཀ་ཞིག་བྱ་ཐུབ་གི་རེད་དྲན་ཡོད། དེ་ང་གཅིག་པུ་མ་རེད། སློབ་གྲོགས་ཚོར་ཁ་བརྡ་བྱས་སྐབས་མང་ཆེ་བའི་དམིགས་ཡུལ་གཅིག་མཚུངས་རེད། ད་ལྟ་ཕྱིར་འདང་བརྒྱབ་ན། ང་རྒྱ་གར་ལ་ཡོང་བར་ཁེ་གྱོང་གཉིས་ཀ་འདུག མ་འོངས་པར་བོད་སྤྱི་ལ་ཕན་པའི་ལས་ཀ་རེ་བྱ་ཨེ་ཐུབ་སྙམ་ཡོད། ཅེས་བརྗོད་སོང་།

ཁོང་གིས་མུ་མཐུད་དུ་ཤེས་རབ་དགའ་ཚལ་གླིང་གི་སློབ་སྦྱོང་སྐོར་ནས་གླེང་དོན། ང་སློབ་གྲྭ་འདིར་བསྡད་པའི་རིང་སློབ་གྲྭའི་ཕྱི་ཚུལ་ཡར་རྒྱས་ཆེན་པོ་ཕྱིན་སོང་། སློབ་མ་རྒན་པ་ཚོས་བཤད་ན། སློབ་མའི་སློབ་སྦྱོང་ཇེ་སྡུག་ཏུ་ཕྱིན་སོང་ཟེར། འོན་ཀྱང་། སེམས་ཤུགས་དང་བོད་ཡིག་གི་ཆུ་ཚད། བསམ་བློ་སོགས་གང་ཐད་ནས་སློབ་གྲྭ་གཞན་དང་བསྡུར་ཐབས་མི་འདུག ང་ལ་ཚོར་བ་ཟབ་ཤོས་ཤིག་ལ། སློབ་གྲྭ་གཞན་དག་གི་སློབ་མ་ཚོས་ཡིག་ཚད་དང་ལག་འཁྱེར་གྱི་ཆེད་དུ་སློབ་སྦྱོང་བྱེད་ཀྱིན་ཡོད་པ་དང་། ཤེས་རབ་དགའ་ཚལ་གླིང་གི་སློབ་མ་ཚོས་ཆེ་ས་ནས་བོད་མི་རིགས་དང་། ཆུང་ས་ནས་རང་ཉིད་ལ་ཡོན་ཏན་ཞིག་འགོས་ན་སྙམ་པའི་ཀུན་སློང་འདུག འོན་ཀྱང་ད་ཆར་བོད་ཡིག་ལ་དོ་སྣང་ཆུང་དུ་འགྲོ་བཞིན་ཡོད་པའི་མཐོང་ཚུལ་བྱུང་སོང་། སྤྱིའི་ཆ་ནས་ད་ལྟ་ང་ཚོའི་སློབ་གྲྭ་ཡག་པོ་ཆགས་ཡོད། དེ་སློབ་གྲྭའི་འགན་འཛིན་བུ་དྲུག་དང་སློབ་སྤྱི་ཚེ་སྒྲུབ་རྡོ་རྗེ་གཉིས་ཀྱི་བཀའ་དྲིན་རེད། ཁོང་གཉིས་སློབ་གྲྭའི་འགྲོ་སྟངས་རྦད་དེ་འགྱུར་བ་བཏང་སོང་། སྔོན་མ་རྙོག་དྲ་མང་པོ་བྱུང་བ་རེད། སྐབས་དེའི་མགོ་ཁྲིད་ཚོར་ལྷག་བསམ་མེད་སོང་བ་མ་རེད་དེ། སློབ་གྲྭའི་དབུ་འཛིན་དམག་མིའི་ནང་ནས་ཡོང་སྟབས། སློབ་གྲྭར་དམག་མིའི་འགྲོ་སྟངས་ལག་བསྟར་བྱས་པ་རེད། ཡུལ་དང་དུས། སློབ་ཕྲུག་ཚོའི་ཁམས་དང་མོས་པར་མི་བསྟུན་པར་བཙན་ཚུགས་དང་སྒྲིག་གཞི་ཁོ་ན་གཙོར་འདོན་བྱས་པ་རེད། སློབ་མ་ཚོ་ལོ་ཆེན་པོ་ཡིན་སྟབས་སེམས་གསོད་ཀྱིན་འདུག ངས་བརྟག་པར་འདི་ལྟར་བཤད་ཀྱི་ཡོད། སེམས་མ་བསད་པ་ཡིན་ན། སློབ་སྦྱོང་མེད་ཀྱང་ཡར་ལངས་ཐུབ་གི་རེད། སེམས་ཤི་སོང་བ་ཡིན་ན་སློབ་སྦྱོང་ཡོད་ཀྱང་ཡར་ལངས་རྒྱུའི་ནུས་པ་མེད། སྔར་སློབ་སྦྱོང་ཡག་པོ་ཡོད་ཀྱང་སེམས་ཞུམ་ཞིང་རེ་ཐག་ཆད་ཡོད། ད་ལྟ་སློབ་སྦྱོང་ཇེ་ཞན་དུ་ཕྱིན་ཡོད་ཀྱང་སེམས་ཀྱི་གཟེངས་མཐོ་ཞིང་། མ་འོངས་པའི་འཚོ་བར་རེ་བ་ཆེན་པོ་ཡོད། འོན་ཀྱང་། བོད་ཡིག་གི་དགེ་རྒན་གྱི་ཚད་གཞི་འདང་མ་འདང་དང་། བོད་གཞུང་གི་ལྟ་རྟོགས་སོགས་ཀྱི་ཐད་དཀའ་ངལ་ཕྲན་བུ་ཡོད་ཀྱང་། དཀའ་ངལ་དེ་སློབ་གྲྭ་གཞན་དག་ལའང་ཡོད་ས་རེད། ཅེས་ཚོར་ཤུགས་སྐྱེན་པོས་བརྗོད་བྱུང་།

ཡང་ངས་ཁོང་ལ་མ་འོངས་པར་འཆར་གཞི་དང་དམིགས་ཡུལ་གང་འདྲ་ཡོད་སྐོར་དྲིས་སྐབས། ཁོང་ཅུང་དོག་མ་བདེ་བའམ་མ་རངས་བ་གང་ཡིན་མི་ཤེས་པའི་རྣམ་འགྱུར་ཞིག་གི་ཐོག་ནས་བརྗོད་རྒྱུར། ཁ་སང་ང་ཚོ་སློབ་མཐར་ཕྱིན་སྐབས། ཤེས་རིག་བཀའ་བློན་མཆོག་གིས་ཀྱང་ “ཤེས་རབ་དགའ་ཚལ་གླིང་ནས་སློབ་མཐར་ཕྱིན་ཡང་། ཤེས་བྱ་ཡོངས་རྫོགས་ལས་མཐར་ཕྱིན་པ་མ་རེད” ཟེར། སྐད་ཆ་དེ་ང་ཚོར་མཚོན་ན་དྲི་བ་ཆེན་པོ་ཞིག་རེད། ཤེས་རབ་དགའ་ཚལ་གླིང་ཐོན་པའི་སློབ་མ་ཚོར་མུ་མཐུད་མཐོ་སློབ་ཏུ་བསྐྱོད་རྒྱུར་ལམ་ཁ་ཡོད་དམ། རྒྱ་གར་གྱི་མཐོ་སློབ་ཅིག་ཏུ་འཛུལ་ན། རྒྱབ་ལྗོངས་སུ་རྟེན་ས་ཁེན་ས་དང་མཐུན་རྐྱེན་སྦྱོར་མཁན་ཡོད་དམ། གལ་ཏེ་རང་སྦྱོང་བྱ་རྒྱུ་ཡིན་ན་ཁ་ལ་ཟ་རྒྱུ་དང་རྒྱབ་ལ་གྱོན་རྒྱུ། སྡོད་ས་སོགས་སུས་ཁག་ཐེག་བྱེད། ལས་ཀ་ཞིག་འཚོལ་ཀྱང་གཞུང་སྒེར་གང་རུང་གི་ས་མིག་སྟེང་། བོད་ནས་ཡོང་མཁན་མང་ཆེ་བར་ལག་འཁྱེར་སོགས་ཀྱི་ཆ་རྐྱེན་མི་ཚང་། སྤྱིར་སློབ་གྲྭ་ཞིག་ནས་ཐོན་ལ་ཉེ་སྐབས་སློབ་མ་ཚོར་སྤྲོ་སྣང་ཆེ་མོད། ཤེས་རབ་དགའ་ཚལ་གླིང་ནས་འཛིན་གྲྭ་མཐོ་རུ་འགྲོ་སྐབས། སློབ་མ་མང་པོ་ཞིག་ལ་སེམས་ཁྲལ་ཡོང་གི་ཡོད། ད་ཐེངས་མཐར་ཕྱིན་སློབ་མ་ ༢༤ ཙམ་འདུག་ཀྱང་། འདི་དག་ཤེས་རབ་དགའ་ཚལ་གླིང་གི་སྒོ་ཆེན་ཕྱིར་འབུད་སྐབས། ང་མ་འོངས་པར་སློབ་གྲྭ་དེར་འགྲོ་རྒྱུ་ཡིན། ངས་ལས་ཀ་འདི་བྱ་རྒྱུ་ཟེར་ནས་དམིགས་ཡུལ་ཡོད་མཁན་ཕལ་ཆེར་གཅིག་ཀྱང་ཡོད་རྒྱུ་མ་རེད། གནས་སྐབས་ངོ་ཤེས་སུ་ཞིག་ལ་གནས་ཚང་གཡར་རྒྱུ་ཡིན། དེ་སེམས་ཁྲལ་ཆེ་ཤོས་རེད། དེའི་རྗེས་ངྷ་སའི་ཟ་ཁང་ཕྱི་རྒྱལ་ཡོང་ས་ཞིག་ཏུ་ལས་ཀ་ཨེ་རག་ལ་བསམ་བློ་གཏོང་དགོས། མུ་མཐུད་སློབ་སྦྱོང་གི་གོ་སྐབས་མ་རག་སྟབས། དབྱིན་ཇི་བ་ཡོང་སའི་ཟ་ཁང་ཞིག་ཏུ་ལས་ཀ་བྱས་ཏེ་དབྱིན་སྐད་ཕྲན་བུ་ཡར་རྒྱས་གཏོང་རྒྱུར་རེ་བ་རྒྱག་གིན་ཡོད། ཅེས་བརྗོད་བྱུང་།

མཇུག་མཐར་ཁོང་གིས་མཐར་ཕྱིན་སློབ་གྲོགས་ཡོངས་ཀྱི་ཚབ་བྱས་ཏེ་རེ་འདུན་བརྗོད་རྒྱུར། ང་ལ་རེ་བ་ཞིག་ཞུ་རྒྱུ་ཡོད། བཙན་བྱོལ་བོད་གཞུང་གིས་ཤེས་རབ་དགའ་ཚལ་གླིང་གི་སློབ་ཕྲུག་ཚོ་ཕྱིར་བོད་དུ་ལོག་རྒྱུའི་སྲིད་བྱུས་ཤིག་བཟུང་ཡོད་པ་རེད། སྤྱིར་བོད་པའི་རྩ་དོན་ལ་ཕན་པ་ཞིག་ཡིན་ན་སྲིད་བྱུས་དེ་འགྲིག་འདུག འོན་ཀྱང་བོད་དུ་ལོག་མཁན་ཉུང་ཉུང་རེད། བོད་དུ་ལོག་མཁན་ཚོར་རྒྱ་གཞུང་གི་གནོན་བཙིར་འོག་ལས་ཀ་རག་གི་མེད། ལྷག་པར་དུ་ ༢༠༠༨ ལོའི་ཚུན་ལ་བོད་དུ་ལོག་མཁན་ཚོ་རྒྱའི་བཙོན་ནང་ལ་འགྲོ་བཞིན་འདུག ཉེ་ཆར་ང་ཚོའི་སློབ་སྤྱི་མཆོག་གིས་ད་བར་སློབ་གྲྭ་འདིར་སློབ་མ་དྲུག་སྟོང་ ༦༣༤༧ ཙམ་འབྱོར་ཡོད་ཀྱང་། མཐར་ཕྱིན་སློབ་མ་ ༦༠༠ ལྷག་ལས་མེད་གསུངས་སོང་། དེ་དག་གི་ཁྲོད་དུ་བོད་གཞུང་གི་ལས་ཀ་རག་ཡོད་མཁན་ ༦ ཀྱང་ཡོད་པ་མ་རེད། འདི་བོད་ནང་ནས་ཐོས་ན་གང་འདྲ་དྲན་གི་རེད། སློབ་མ་འདི་དག་ལ་ཤེས་ཚད་མེད་སོང་བ་རེད་དམ། དཔེར་ན། ཐེངས་འདིར་ང་ཚོ་སློབ་མ་ ༢༤ མཉམ་དུ་མཐར་ཕྱིན་པ་རེད། དེའི་ཁྲོད་བོད་ནས་སློབ་གྲྭ་ཆེན་མོ་ཐོན་པ་ ༢ དང་། འཛིན་གྲྭ་བཅུ་གཉིས་ཐོན་པ་ ༥ ཙམ་འདུག ཤེས་རབ་དགའ་ཚལ་གླིང་ནས་ལོ་ ༥ ལ་དབྱིན་ཡིག་སྦྱང་པ་རེད། ད་ལྟ་སློབ་གྲོགས་ཕལ་ཆེ་བ་སྐད་གསུམ་སྨྲ་བ་ཆགས་ཡོད། འོན་ཀྱང་། ཉི་མ་དེ་རིང་ནས་བཟུང་འདི་དག་གི་འཚོ་བ་ལ་ངེས་གཏན་མེད་པ་དང་། ཕུགས་བསམ་ལ་རེ་འབྲས་ཆུང་བ་ཆགས་ཡོད། འདི་དག་གི་མ་འོངས་པར་ཐུགས་བསམ་ཞིག་བཞེས་རོགས་ཟེར་ནས་སྐྱབས་འཇུག་ཞུ་རྒྱུ་ཡིན། ཞེས་བཀྲ་ཤིས་རྒྱ་མཚོ་ལགས་ཀྱིས་དགའ་སྐྱོ་གཉིས་ལྡན་ཐོག་བརྗོད་སོང་།

༼ གསར་འགོད་པ་དོན་འགྲུབ་བཀྲ་ཤིས། ༽