རྒྱལ་སྤྱིའི་བོད་རིག་པའི་ཞིབ་འཇུག་ཚོགས་ཆེན་ཐེངས་བཅུ་གཉིས་པ་དང་ཕྱི་བསྐྱོད་མཐོང་མཆན།(Visa)

རིག་འབྱུང་དོན་གྲུབ་བཀྲ་ཤིས་།

ད་ལོའི་སྤྱི་ཟླ་བརྒྱད་པའི་ཚེས་༡༥ནས་༢༠བར་དུ། བོད་རིག་པའི་ཚོགས་ཆེན་ཐེངས་བཅུ་གཉིས་པ་དེ་ཁ་ཎ་སྒྲར་(Canada)རྟེན་གཞི་བྱས་བའི་( University of British Columbia ) གཙུག་ལག་སློབ་ཁང་དུ་འཚོགས་གཏན་འཁེལ་ཡོད་ཅིང་། ཐེངས་འདིའི་གཙོ་སྐྱོང་བ་ནི་བོད་རིགས་ལོ་རྒྱུས་ཆེད་མཁས་ཚེ་རིང་ཤཱཀྱ་ལགས་ཡིན། རྒྱལ་སྤྱིའི་བོད་རིགས་པའི་ཞིབ་འཇུག་ཚོགས་ཆེན་འདི་ལོ་གསུམ་གྱི་བར་ནས་ཐེངས་ རེ་འཚོགས་བཞིན་ཡོད། ཐོག་མའི་ཆར་སྙན་ཞུ་འབུལ་མཁན་ཆིག་སྟོང་ལྷག་བྱུང་བའི་ཁོངས་ནས་ལྔ་བརྒྱ་ལྷག་གི་ དཔྱད་རྩོམ་འདེམས་ཡོད། ཕྱི་རྒྱལ་བ་བོད་རིགས་པའི་ཆེད་མཁས་དང་ཉམས་ཞིབ་པ་རྣམས་ཕར་ཕུད་། ཐེངས་འདིའི་ཚོགས་ཆེན་ལ་བཅར་མཁན་ཕལ་ཆེ་བ་བོད་རིགས་ཡིན། འོན་ཀྱང་། བོད་རིགས་ཚོགས་བཅར་བ་ཚོའི་གྲངས་འབོར་དེས་ཚོགས་བཅར་བ་སྤྱིའི་གྲངས་འབོར་གྱི་ གསུམ་ཆ་གཅིག་ཟིན་ཙམ་རེད། ད་ཐེངས་བོད་རིགས་ཚོགས་བཅར་བ་ཚོར་ཐེངས་སྔོན་མ་དག་དང་མ་འདྲ་བའི་དཀའ་ངལ་ཞིག་ འཕྲད་བཞིན་ཡོད། དེ་ནི་ཕྱི་བསྐྱོད་ལག་འཁྱེར་(Passport)དང་ཕྱི་བསྐྱོད་མཐོང་མཆན་(Visa)གཉིས་ཀྱི་སྐོར་ནས་ཡིན། གནད་དོན་འདིའི་ཐད། གཙོ་སྐྱོང་བ་ཚེ་རིང་ཤཱཀྱ་ལགས་ཀྱིས་གསུངས་ན། བོད་ ནས་འཚོགས་འདུར་བཅར་མཁན་ཚོར་ཕྱི་བསྐྱོད་ལག་འཁྱེར་མ་རག་པའི་དཀའ་ངལ་དང་རྒྱ་བལ་ གཉིས་ནས་ཡོང་མཁན་ཚོར་ཕྱི་བསྐྱོད་མཐོང་མཆན་མ་རག་པའི་དཀའ་ངལ་འཕྲད་བཞིན་འདུག་ ཟེར།
རྒྱ་གར་ནས་ཡོང་མཁན་ཚོའི་ ཁྲོད་ནས་འགའ་ཤས་ཀྱིས་མཐོང་མཆན་ཞུས་འདུག་རུང་མཐོང་མཆན་རག་ཡོད་མཁན་ད་སྔ་གཅིག་ ཀྱང་བྱུང་མི་འདུག རྒྱ་བལ་གཉིས་ནས་ཡོང་མཁན་ཚོར་ཕྱི་བསྐྱོད་མཐོང་མཆན་མ་རག་པའི་དཀའ་ངལ་གཙོ་བོའི་ ཐད། ཚེ་རིང་ཤཱཀྱ་ལགས་ཀྱིས་གསུངས་དོན། དེ་ནི་འདས་པའི་ལོ་ངོ་བཅུ་ཕྲག་འགའི་རིང་ལ་སྐྱབས་བཅོལ་བོད་རིགས་ཁྲི་ལ་ཉེ་བ་ཁ་ ཎ་སྒྲར་འབྱོར་ནས་ཕྱིར་ལོག་མ་བྱས་པར་གཏན་སྡོད་བྱས་པ་དང་འབྲེལ་བ་ཡོད་རེད་ཟེར། གཙོ་བོ་འདས་པའི་ལོ་རྒྱུས་ཡག་པོ་མེད་པའི་རྐྱེན་གྱིས་རེད། འདས་པའི་ལོ་རྒྱུས་ཡག་པོ་མེད་པའི་རྒྱུ་མཚན་ལ་བརྟེན། ཕྱིས་སུ་ཡོང་མཁན་ཚོར་དཀའ་ངལ་མང་དུ་འཕྲད་ཀྱི་ཡོད་པ་རེད་ཟེར། ཐ་ན། ཐེངས་འདིའི་ཚོགས་བཅར་བོད་རིགས་མཁས་པ་ཚོར་ཡང་ཕྱི་བསྐྱོད་མཐོང་མཆན་མ་རག་པའི་ དཀའ་ངལ་འདི་འཕྲད་ཀྱིན་ཡོད་པ་རེད་ཟེར། ཚེ་རིང་ཤཱཀྱ་ལགས་ནས་རྒྱ་བལ་གཉིས་ནས་ཚོགས་འདུར་བཅར་མཁན་གྱི་བོད་རིགས་ཆེད་མཁས་ཚོའི་ཆེད་དུ། རྒྱ་གར་རྒྱལ་ས་རྡི་ལིར་རྟེན་གཞི་བྱས་པའི་ཁ་ཎ་སྒྲའི་གཞུང་ཚབ་ཁང་ལ་རེ་སྐུལ་ ཡི་གེ་ཞིག་ཀྱང་བཏང་འདུག ཡི་གེ་དེའི་ཁོངས་སུ་ཁོང་ནས་གཙོ་བོ་ཐེངས་འདིའི་ཞིབ་འཇུག་ཚོགས་ཆེན་དེ་ཚགས་ ཚུད་དང་གྲུབ་འབྲས་ལྡན་པ་ཞིག་ཡོང་བའི་སླད་དུ། རྒྱ་བལ་སོགས་ནས་ཡོང་མཁན་ཚོར་ཕྱི་བསྐྱོད་མཐོང་མཆན་སྤྲོད་རོགས་གནང་ཞེས་ནན་ སྐུལ་ཞུས་འདུག ད་དུང་།
ཚེ་རིང་ཤཱཀྱ་ལགས་ནས། རྒྱ་བལ་གཉིས་ནས་ཕེབས་མཁན་གྱི་བོད་རིགས་ཆེད་མཁས་ཚོར་མཐོང་མཆན་ཞུ་དུས། ཐུགས་སྣང་དང་ཉན་འཇོག་བྱེད་དགོས་བའི་གནད་དོན་འགའ་འཕྲིན་ཡིག་གི་ལམ་ནས་བསྐུར་ ཡོད། གནད་དོན་དེ་དག་གི་སྙིང་དོན་ནི། རང་སོ་སོར་ལས་ཁུངས་དང་གཏན་འཇགས་ཡོད་པས་ཕྱིར་ལོག་བྱ་རྒྱུའི་འགན་ལེན་ཡི་གེ་ ཡོད་པ། སོ་སོའི་ཁྱིམ་ཚང་དང་ནང་མིའི་ཁ་གྲངས། གནས་ཚུལ་བཅས་གསལ་བོར་བཀོད་ནས་ཕྱིར་ལོག་བྱ་རྒྱུའི་རྒྱུ་མཚན་འགོད་པ། ཚོགས་འདུའི་དུས་ཚོད་མ་གཏོགས་དུས་ཚོད་ལྷག་མ་འཐོབ་ཐབས་ཀྱི་རེ་སྐུལ་མི་ཞུ་བ། ཚོགས་འདུ་མཇུག་སྒྲིལ་རྗེས་ཕྱིར་ལོག་རྒྱུའི་རྣམ་འགྱུར་གསལ་བོར་འགོད་པ། ཁ་ཎ་སྒྲའི་གཞུང་ཚབ་ནས་མཐོང་མཆན་མ་སྤྲད་ན། མི་སྒེར་དང་ཚོགས་པ་གཞན་བརྒྱུད་ནས་མཐོང་མཆན་རག་ཐབས་མི་བྱེད་པ་བཅས་བཀོད་ཡོད། ཚེ་རིང་ཤཱཀྱ་ལགས་ནས་ད་རུང་གསུངས་དོན། ཚོགས་བཅར་བ་རྣམས་ལ་མ་འོངས་པར་དཀའ་ངལ་མ་འཕྲད་པའི་སླད་དུ། ཕྱི་བསྐྱོད་ཀྱི་ལོ་རྒྱུས་ཡག་པོ་དགོས་རྒྱུ་ཧ་ཅང་གལ་ཆེ་རེད་ཟེར། གང་ལྟར། ད་ལྟ་ཐེངས་འདིའི་རྒྱལ་སྤྱིའི་བོད་རིགས་པའི་ཞིབ་འཇུག་ཚོགས་ཆེན་འདིར་རྒྱ་བལ་ གཉིས་དང་བོད་ནས་ཚོགས་བཅར་བ་ཇི་ཙམ་སླེབས་ཐུབ་མིན་བཤད་དཀའ་བའི་གནས་སུ་ལྷུང་ ནས་ཡོད།