དྲི་བ་ཐུང་ཐུང་དྲིས། བསམ་ཚུལ་ཉུང་ཉུང་ཤོད།

༢༩༽ མདོ་ལྷ་ཁམས་པ་ནས།
སྤྱི་ལོ་ ༢༠༡༠ ཟླ་ ༥ ཚེས་ ༣༡ གི་ཆུ་ཚོད་ ༡༨ སྐར་མ་ ༣༠
དྲི་བ་ཉུང་ཉུང་དང་། བསམ་ཚུལ་ཐུང་ཙམ་ཤོད་རོགས་གནང་ཟེར་ནས་ཨ་རི་རླུང་འཕྲིན་ཁང་གི་ཀུན་གླེང་ལས་རིམ་གཙོ་སྐྱོང་བས་མི་མང་ལ་འབོལ་བསྐུལ་ཞུས་དང་ཞུ་བཞིན་པ་ག་དུས་ཡིན་ན་ཡང་གོ་རྒྱུ་འདུག
ཡིན་ན་ཡང་། ད་རེས་མི་མང་གིས་ཁ་ཕར་ལོག་ནས་དྲི་བ་ཐུང་ཐུང་གི་འབོད་བསྐུལ་འདི་ཞུས་བ་ཞིག་རེད།
དེ་གལ་ཆེན་པོ་རེད། དེ་ཧ་ཅང་གལ་ཆེན་པོ་རེད། དྲི་བ་ཐུང་ཙམ་དྲིས་ནས་དྲི་ལན་རིང་ཙམ་འདེབས་རྒྱུ་ཡོད་ཞིག་བཟོ་དགོས་གི་རེད། དེ་ནི་ཧ་ཅང་གལ་ཆེན་པོ་རེད། དེར་གསར་འགོད་པ་ཡོངས་ཀྱིས་དོ་སྣང་བྱེད་དགོས་པའི་གནད་དོན་ཞིག་རེད། ཡིན་ན་ཡང་།
ཨ་རིའི་རླུང་འཕྲིན་ཁང་གི་ཀུན་གླེང་ལས་རིམ་འདི་ནི་བོད་ཀྱི་ཆོས་སྲིད་རིག་གནས་དང་བཅས་པའི་གལ་གནད་ཆེ་བའི་རྩ་དོན་བགྲོ་གླེང་བྱེད་སའི་མཛོད་ཁང་ལྟ་བུ་ཞིག་ཏུ་སོང་བས། ལས་རིམ་འདིར་དོ་སྣང་ཡོད་པའི་རྒྱ་ཆེའི་བོད་མི་མང་བོ་ཞིག་ལ་ཕན་པ་ཆེན་པོ་ཡོད་པ་ཞིག་ཡིན།
ཁྱེད་ཅག་གིས་ཁོང་ཚོར་ལེགས་བཅོས་ཉེས་འགོག་གི་འབོད་པ་དང་བསྐུལ་མ་བྱེད་འོས་ན་ཡང་། མ་རུང་གུས་མེད་ཀྱི་ཚིག་མཚོན་གང་དྲན་དྲན་དུ་འདེབས་མི་རུང་ཡ། མཁྱེན་ལྡན་དྲ་གྲོགས་རྣམ་པ།

༣༡༽ བོད་ཀྱི་བུ་ནས།
སྤྱི་ལོ་ ༢༠༡༠ ཟླ་ ༥ ཚེས་ ༣༡ གི་ཆུ་ཚོད་ ༡༩ སྐར་མ་ ༠༢
གསར་འགོད་པས་དྲི་བ་མ་དྲིས་གོང་དཔྱད་གླེང་བྱེད་རྒྱུའི་གནས་དོན་སྒང་འགྲེལ་བཤད་གང་མཚམས་རྒྱག་དགོས་རྒྱུའང་གལ་ཆེན་པོ་རེད།

ཀུན་གླེང་ལྟ་བུར་མཚོན་ན། བཙལ་བྱོལ་ནང་གི་བོད་པ་ཙམ་ཟད། བོད་ནང་ནའང་ཉན་མཁན་མང་པོ་ཡོད་པས། ཕྱི་ལོགས་ཀྱི་བོད་པ་ཚོས་བགྲོ་གླེང་གི་བརྗོད་གཞི་གང་མཚམས་ངེས་ཀྱིན་ཡོད་ནའང་། བོད་ནང་གི་བོད་མི་ཚོར་བགྲོ་གླེང་དངོས་གཞིའི་སྔོན་དུ་འགྲེལ་བརྗོད་དམ་ངོ་སྤྲོད་ཅིག་ཏན་ཏན་དགོས་གི་ཡོད་ཙང་། ཀུན་གླེང་དང་ཨེ་ཤི་ཡ་རང་དབང་རླུང་འཕྲིན་ཁང་གཉིས་ཀྱི་གསར་འགོད་པས་སྐབས་སུ་སྐབས་སུ་དྲི་བ་དངོས་ཀྱི་སྒང་མ་སླེབས་སྔོན་འགྲེལ་བརྗོད་གང་མང་བྱེད་ཀྱིན་པའང་ངོམ་སོ་བྱེད་པ་དང་མཁས་ཉམས་སྟོན་པ་མི་ཡིན་པར། བོད་ནང་གི་གསར་འགྱུར་ཉན་མཁན་རྣམས་ལ་བསམས་ཤིང་དམིགས་པ་ཡིན་པ་མ་རེད་དམ།
༣༤༽ རིག་འབྱུང་དོན་གྲུབ་བཀྲ་ཤིས་ནས།
སྤྱི་ལོ་ ༢༠༡༠ ཟླ་ ༥ ཚེས་ ༣༡ གི་ཆུ་ཚོད་ ༡༩ སྐར་མ་ ༣༥
བོད་ཀྱི་བུ་ཡི་བསམ་ཚུལ་ལ་ལན་འདི་ཡིན།
དང་པོ།
གལ་སྲིད་བཅར་འདྲིའི་བརྗོད་གཞི་དེ་བོད་ནང་གི་རྒྱ་ཆེའི་མི་མང་ལ་དམིགས་ཀྱི་ཡོད་ན། གསར་འགོད་པས་བོད་ནང་གི་མི་མང་ལ་དམིགས་ནས་དྲི་བ་གཏོང་དགོས་རེད།
གསར་འགོད་པས་བོད་ནང་གི་མི་མང་ལ་དམིགས་པའི་དྲི་བ་གྲ་སྒྲིག་བྱེད་དགོས་རེད། དེ་གཉིས་ཐུབ་ན། གང་ལ་དམིགས་པ་དེས་གོ་ཐུབ་རྒྱུའི་རེ་བ་ཡོད་རེད།
དྲི་ལན་གནང་མཁན་གྱིས་ལན་ཁ་གསལ་སྐྱོན་གི་མེད་ན། དམིགས་སའི་གནད་དོན་རང་གི་སྒང་ལ་དྲི་བ་བཏང་ཆོག་གི་རེད། དྲི་ལན་བར་གཅོད་བྱས་ནས་བསྐྱར་དུ་དྲི་བ་བཏང་ཆོག་གི་རེད། གང་ལྟར། དྲི་བ་གཏོང་མཁན་གྱི་བསམ་ཚུལ་གལ་ཆེན་པོ་མ་རེད། དྲི་ལན་གནང་མཁན་གྱི་བསམ་ཚུལ་གལ་ཆེན་པོ་རེད། འདི་གཉིས་མ་ནོར་བ་བྱེད་དགོས།

གཉིས།
གལ་སྲིད་འདྲི་བྱའི་གནད་དོན་དེ་བོད་ནང་གི་མི་མང་གིས་མཁྱེན་གི་མེད་ན། དེ་ལ་འགྲེལ་བརྗོད་དྲི་བ་གཏོང་མཁན་གྱིས་བྱེད་དགོས་མ་རེད། དྲི་ལན་གནང་མཁན་ལ་བྱེད་འཇུག་དགོས་རེད། དཔེར་ན། བོད་རྒྱ་འབྲེལ་མོལ་ཟེར་བ་འདི་བོད་ནང་གི་ཉན་མཁན་རྣམས་ལ་གསར་བ་ཡིན་ན། དྲི་བ་གཏོང་མཁན་གསར་འགོད་པས། དྲི་ལན་གནང་མཁན་ལ། བོད་རྒྱ་འབྲེལ་མོལ་ལབ་ན་ག་རེ་རེད་ཞེས་དྲི་བའི་ངོ་བོར་བཟོས་ནས་བཏང་ཆོག་གི་རེད། དེའི་འགྲེལ་བཤད་དེ་དྲི་ལན་གནང་མཁན་གྱི་རྩ་ནས་ཡོང་གི་རེད།

གསུམ་།
དྲི་བ་གཏོང་མཁན་གསར་འགོད་པའི་ལས་འགན་གཙོ་བོ་དེ་དྲི་བ་གྲ་སྒྲིག་བྱེད་རྒྱུ་དེ་རེད། ཉན་མཁན་རྣམ་པའི་སླད་དུ་དྲི་བ་བཟོ་རྒྱུ་དེ་རེད།
སྐད་ཆ་རིང་པོ་བཤད་པ་དང་སྒེར་གྱི་བསམ་ཚུལ་བཤད་སྟངས་དེ་དྲི་བ་གཏོང་མཁན་གྱི་ལས་ཀ་མ་རེད།

༡༣༽ རང་བཙན་ལྡེའུ་ནས།
སྤྱི་ལོ་ ༢༠༡༠ ཟླ་ ༥ ཚེས་ ༣༡ གི་ཆུ་ཚོད་ ༣ སྐར་མ་ ༡༦
རིག་འབྱུང་ལགས་ཀྱི་བསམ་ཆར་དེ་དངོས་ནས་བདེན་པ་རེད་ བརྒྱ་ཆ་བརྒྱ་མོས་མཐུན་ཡོད་ འོན་ཀྱང་བསམ་ཆར་དེ་ཆུའི་ནང་དྲི་མ་བཏང་བ་བཞིན་ སྤུ་ལུག་ སྤུ་ལུག་ ཟེར་ནས་ཡལ་འགྲོ་རྒྱུ་ལས་ ལེགས་སྤེལ་ཉེས་འགོག་ཡོང་ཆེད་དོ་ཁུར་དང་ལེན་བྱས་ཨེ་ཡོང་བསམ་ ༼ གསན་ཁན་རྣམས་ནས་ང་ཚོའི་ལས་རིམ་ཁག་ལ་དགོངས་ཆར་ཡོད་ན་ཐད་ཀར་ཁ་པར་འམ་ཡང་ན་ང་ཚོའི་ཁ་སྤྱངས་ཐོག་དགོངས་ཚུལ་ལྷུག་པོ་གནང་རོགས་ ༽ཞེས་་སྤྱིར་བཏང་འདྲ་ཆགས་ཆགས་སམ་ འགྲོ་ལུགས་ལྟར་ཟེར་ཙམ་ཞིག་ལས་ དངོས་འབྲེལ་སྐྱོན་ཆའི་བསམ་ཆར་བཏོན་ན་ངོས་ལེན་བྱེད་ཀྱི་མིན་འདུག་ དཔེ་ན་ ལོ་ངོ་འགའ་ཤས་གོང་ བཙན་བྱོལ་བོད་གཞུང་གི་བཀལ་བློན་ མཁས་དབང་གཟམ་གདོང་རིན་པོ་ཆེ་མཆོག་ནས་ གཏམ་གླེང་ཞལ་པར་གྱི་ ཁྱེད་རང་ཚོའི་སྙིང་གཏམ་ཇི་ཡོད་གསུངས་གསལ་གྱི་ལས་རིམ་ཟེར་བ་དེར་ ལེགས་བཅོས་ཆེད་དགོངས་ཚུལ་གསུངས་གསལ་༼སྙིང་གཏམ་ ཞེས་པ་མི་སྨྱོན་པ་ཡིན་ན་མ་གཏོགས་གཞན་ལ་བཤོད་ཡ་མ་རེད༽
དེས་ན་ སྙིང་གཏམ་ཇི་ཡོད་གསུངས་གསལ་ ཟེར་བ་དེ་ཅུང་འགྲིགས་མིན་བསྐོར་གསུངས་མྱོང་ཡོད་ཀྱང་ ཨེ་ཤི་ཡ་རང་དབང་རླུང་འཕྲིན་ཁང་ནས་མཁས་དབང་དཔལ་ལྡན་བཀའ་བློན་མཆོག་གི་དགོངས་ཚུལ་ཡན་ལ་བདག་མེད་ཡ་མེད་བཞག་སྟེ་ད་བར་ལེགས་ཆའི་འགྱུར་བ་གང་ཡང་བཏང་ཡོདམ་རེད་
དེ་བཞིན་ཀུན་གླེང་ལས་རིང་གཙོ་སྐྱོངས་བ་ལགས་ནས་ཁ་པར་གཏོན་མཁན་མི་རེ་ངོ་རེར་ ཁྱེད་རང་ཚོས་དྲི་བ་ཡོད་ན་རེད་ བསམ་ཚུལ་ཡོན་ན་རེད་ ཐུང་གཙམ་གསལ་པོ་ཞིག་གསུངས་རོགས་གནང་ ཟེར་ཞིང་ འགའ་རེས་དེ་གསལ་པོ་མ་གོ་དུས་སླར་ཡང་བསྐྱར་ཟློས་དྱེད་དགོས་པ་སོགས་ལས་རིམ་གྱི་དུས་ཡུན་ཐུང་བའི་ཁར་དུས་ཡུན་སྐར་ཆ་མང་པོ་འཕྲོ་བརླག་འགྲོ་བཞིན་སྟབས་ ལས་རིམ་གཙོ་སྐྱོངས་ལགས་རང་ཉིད་ཀྱི་དྲི་བ་དེ་དག་ བསྐྱར་ཟློས་མེད་པ་ ཐུང་ཙམ་ གསལ་པོ་ དོན་དང་མཐུན་པ་ཞིག་བྱུང་ན་ དུས་ཡུན་བེད་སྤྱོད་བཏང་འཛིན་ལའང་ཕན་ལ་ རླུང་འཕྲིན་ཉན་ཁན་རྣམས་ནས་ཀྱང་ གཙོ་སྐྱོང་བ་གཅིག་གི་བཀའ་ཆོས་བལྟ་བུའི་དྲི་བ་རིང་པོར་ཉན་པའི་ཚབ་ལ་དྲི་བ་དྲི་སའི་སྐུ་མགྲོན་རྒྱ་ཆེ་མང་ཚོགས་ཀྱི་བསམ་ཚུལ་གང་མང་ཤེས་རྟོགས་ཐུབ་པར་དེ་ཕན་ཐོག་་ཆེ་གི་ཡ་་།

༢༢༽ ལོ་ལོན་ནས།
སྤྱི་ལོ་ ༢༠༡༠ ཟླ་ ༥ ཚེས་ ༣༡ གི་ཆུ་ཚོད་ ༡༣ སྐར་མ་ ༥༣
ཕྱི་བསྡོད་བོད་ཀྱི་གསར་ལམ་ཁག་ལ་ཉན་ཐེང་རེར་རིགས་འབྱུང་ལེགས་ཀྱི་དགོང་ཚུལ་དེ་སེམས་ལ་ཐེང་རེར་འཁོར་། ཡིན་ན་ཡང་། གཞི་ནས་མེད་པ་ལས་ཡོད་པ་དང་། ཡོད་པ་དེ་ཡར་རྒྱས་སུ་འགྲོ་བས་རེ་བ་ཞིག་གིས་བསམ་ཚུལ་དེར་ཕྱིར་མ་བཏོན་པར་བསྒུགས། དེ་རིང་འདིར་སྐུ་ཞབས་རིགས་འབྱུང་ལེགས་ཀྱིས་གནད་དོན་དེ་རྗེན་པར་བཏོན་པར་མ་ཚད་དྲ་གྲོགས་རྣམས་ཀྱིས་ཀྱང་དེར་དགོང་ཚུལ་འཐུགས་པོ་ཞིག་གནང་ཡོད་པས་ངས་ཀྱང་ཁ་སྣོན་ཞིག་རྒྱག།

བསམ་ཚུལ་དང་པོ།
ཕྱི་བསྡོད་བོད་ཀྱི་གསར་འགོད་པ་ཞིག་ཡིན་ན། ངེས་བར་དུ་བོད་ཆོ་ག་གསུམ་ཀྱིས་སྐད་དེ་ཚུར་བཤད་མི་ཐུབས་ན་ཡང་། ཕར་བཤད་པ་དེ་ཚོ་ཆ་ཚང་གོ་ཐུབ་པ་ཞིག་ངེས་བར་དུ་དགོས། དེ་ལྟར་མི་འཇོན་ན་། ཁ་པར་ལས་དགོང་ཚུལ་གསུང་སྐབས་ཁ་པར་གཏོང་མཁན་དེས་དྲི་བ་དེ་ཆོ་གསུམ་སྐད་གང་གི་ཐོག་ནས་དྲི་རྒྱུ་ཡིན་པ་དང་། དེ་གོ་མཁན་ཞིག་གི་ཉན་རྒྱུ་ལས་། ཐེང་མང་པོར་ཨམ་སྐད་ཐོགས་ནས་དྲིས་བས་དྲི་བ་མང་པོར་དབུ་སྐད་ཐོགས་གསར་འགོད་པས་བཤད་སྐབས་ནང་དོན་གོ་ལྡོག་བྱས་བ་ཐེང་མང་བྱུང་། དེ་ཡག་པོ་མི་འདུག།

བསམ་ཚུལ་གཉིས་པ།
གསར་འགྱུར་བཤད་སྐབས་དང་དྲི་བ་འདོན་སྐབས་བོད་སྐད་བོད་གཙང་་མ་ཞིག་གི་ཐོག་འདུག་དགོས་པ་ལས་། སྐད་རིགས་གཞན་པས་འབྲེལ་བཤད་རྒྱབ་པ་དེ་ཡག་པོ་མི་འདུག།

བསམ་ཚུལ་གསུམ་པ།
ཕྱི་བསྡོད་བོད་ཀྱི་གསར་ལམ་ཁག་དེ་བོད་རྒྱ་ཆེ་མི་མང་གི་གོ་རྟོགས་དང་། གནས་ཚུལ་ཤེས་རྟོག་ཡོང་རྒྱར་དམིག་ནས་བཙུག་པ་ཞིག་ཡིན་པས་། གསར་ལམ་ཁག་གི་བརྗོད་གཞི་གཙོ་བོ་དེ་བོད་དོན་དང་འབྲེལ་བ་ཡོད་པ་ཞིག་ཡིན་རྒྱུ་ལས་། ཝ་ཤིང་གྲོང་གིས་གནམ་གཤེས་གནས་ཚུལ་སོགས་བོད་དོན་དང་འབྲེལ་བ་མེད་པ་ཁག་བཤད་ནས། དུས་ཚོད་ཉུང་ཉུང་ཞིག་ལས་མེད་པ་དེ་ཡང་ཆུད་ཟོས་སུ་བཏང་ན་། དེ་ཡག་པོ་མི་འདུག།

བསམ་ཚུལ་བཞི་བ་།
བོད་ཀྱི་གསར་འགོད་པར་བཏོན་པས་་བསམ་ཚུལ་འདི་དག་ལ་བཟང་ཕྱོགས་གི་གོ་བ་ཞིག་བླང་ནས་མཐུན་ཕྱོགས་ནས་འགྱུར་ཞིག་མགོ་བརྩོམས་རྒྱུ་ལས་། མི་བུ་རེ་ཟུང་བ་ཞིགས་ཕན་ཚུན་མ་དགའ་བ་དང་ཕྲགས་དོག་གིས་གཏམ་དུ་གོ་བ་མི་ལེན་པར་རེ་བ་དྭངས་མོ་ཞིག་བཅང་ཡོད་། ལོ་འགའི་སྔོན་དེར་ཨ་རིས་གྲོས་ཚོགས་ལས་ང་ཚོ་བོད་ཀྱི་གསར་ཁང་དེ་དག་གིས་སྔོན་འགྲོའི་མ་དངུལ་དེ་ཉུང་རུ་གཏོང་རྒྱུ་ཡིན་པས་གནས་ཚུལ་ཞིག་ཐོས་ནས་ང་རང་ཉིད་ཀྱི་ས་གནས་འདིར་ཡོད་བྱང་ཀ་ལི་ཕོ་ཉའི་ནང་གི་བོད་རིགས་རྣམས་ཀྱིས་སར་ནས་མཚན་རྟགས་འདུ་འགོད་ཀྱིས་ལྕམ་རྣམས་སྲས་ཕོ་ལྷ་སྲས་དང་། འདས་བོ་སྐུ་ཞབས་ཁྲོམ་ལམ་འགྲོད་ཚང་སོགས་ཀྱི་ལས་ཁུང་སུ་བཏང་ནས་ “གསར་ཁང་གི་སྔོན་འགྲོའི་འཆར་དངུལ་ཉུང་རུ་མ་གཏོང་རོགས་། གསར་ཁང་འདི་ནི་བོད་ཕྱི་ནང་གཉིས་ཀྱི་འགྲིན་པ་ལྟ་བུ་ཞིག་ཆགས་ཡོད་”ཞེས་འབོད་སྐུལ་བྱས་། འགྲིན་པ་དེ་ཕྲ་རུ་སོང་བ་འམ་། ཡང་ན་འགག་ན་ཡག་པོ་མི་འདུག།

༢༣༽ གཞོན་ནུ་ཟླ་མེད་ནས།
སྤྱི་ལོ་ ༢༠༡༠ ཟླ་ ༥ ཚེས་ ༣༡ གི་ཆུ་ཚོད་ ༡༥ སྐར་མ་ ༤༠
རིགས་འབྱུང་གི་བསམ་ཚུལ་དེ་གསར་ཁང་འགན་འཛིན་པས་ཤེས་དགོས་ངེས་ཞིག་རེད། གོང་དུ་ཅིག་གི་བཤད་པ་བཞིན་དུ་སྔོན་མ་གསར་འགོད་པ་སོགས་བོད་དོན་སྐོར་གྱི་གསར་ལམ་ཨ་རིའི་གཞུང་གིས་ཉུང་འཕྲིལ་བྱེད་པའི་རྒྱུ་རྐྱེན་ཡང་འདི་འདྲ་ལོས་ཡིན། འོན་ཀྱང་ང་ཚོ་ས་གནས་སོ་སོར་ཡོད་པའི་བོད་རིགས་སྤྱི་མཐུན་དང་དེ་འབྲེལ་ཨ་རིའི་སྒེར་གྱི་ཚོགས་པ་མང་པོས་སྙན་ཞུ་ཕུལ་བ་ལ་རྟེན་ནས་རྒྱུན་འཁྱོངས་ཐུབ་པ་བྱུང་བ་རེད། དེ་ནི་བོད་སྤྱི་བ་ལ་མཚོན་ན་དགའ་འོས་པ་ཞིག་རེད། འོན་ཀྱང་གསར་འགོད་པ་རེ་ཟུང་གིས་ག་དུས་ཡིན་ན་ཡང་རང་གི་བསམ་ཚུལ་བཤད་བསྡད་ནས་གནས་ཚུལ་ངོ་མ་དེ་འཚོལ་བའི་ཐབས་ཤེས་མི་བྱེད། ངས་ཤེས་པ་ཞིག་ལ་ཕྱོགས་བསྐྱོད་གསར་འགོད་པ་དེ་ཚོ་སླེབས་ན། ས་གནས་དེ་གར་རྒྱུས་ཡོད་པ་ཚོར་སྐད་ཆ་མི་འདྲི་བར་ས་གནས་དེར་རང་གི་ངོ་ཤེས་ཚོར་ཐུག་ཕྲད་ཀྱི་དུས་ཚོད་རྫོགས་རྗེས། གསར་འགྱུར་བཤད་སྐབས། རང་གིས་བཅོས་ནས་ཅིག་བཤད་ཀྱི་རེད། སྐོར་ལོག་རྐྱང་རྐྱབ་བཤད་བསྡད་ཀྱི་རེད།
ཡང་བསམ་བློ་གཞན་ཞིག་བཏང་ན་མི་ཚང་མ་འཚོ་བའི་ཆེད་དུ་རེད། རང་ཉིད་འཚོ་དགོས་ན་རང་ཉིད་ཀྱིས་མི་ཤེས་ན་ཡང་ཤེས་མདོགས་མང་པོ་སྟོན་དགོས་པ་རེད། དེའི་རྐྱེན་གྱིས་གནས་ཚུལ་ནང་ལ་བསམ་ཚུལ་དཀྲུགས་པ་ལོས་ཡིན་སྙམ། དཔེར་ན་གསར་འགོད་པ་བསྡུ་བའི་བརྡ་ཐོ་ནང་དུ་ཡང་གནས་ཚུལ་ཡོང་རྫོགས་མཁྱེན་རྟོགས་ཐུབ་མཁན་དགོས་ཟེར་ཡོད་པ་རེད། ཤེས་ཡོན་གྱི་ཆ་རྐྱེན་ཡོད་པ་རེད། བསམ་ཚུལ་ཅུང་ཟད་མ་བཤད་དུས་མི་ཤེས་པ་ལྟ་བུར་གོ་ནས་ལས་གནས་ནས་གཏན་ཕུད་བྱེད་རྒྱུའི་ཉེན་ཁ་ཡང་ཡོད་ཀྱི་རེད། དེ་འེ་རེད་ལགས། རིགས་འབྱུང་། གསར་འགོད་པའི་སྒྲིགས་གཞི་བཟོས་པ་དེ་ཡག་པོ་ཞིག་འདུག གོང་གི་འདི་དག་སྟངས་འཛིན་བྱེད་མཁན་གྱིས་ཤེས་དགོས་པ་རེད་དེ། སྟངས་འཛིན་བྱེད་མཁན་དེ་བོང་བུ་ལྟ་བུ་ཞིག་ཡིན་ལས་ཆེ། ཡང་བསྐྱར་ཨ་རི་གཞུང་ནས་དུས་ཚོད་ཉུང་འཕྲིལ་མི་བྱེད་པའི་སྨོན་ལམ་འདེབས་ཡ།

ད་དུང་ཨེ་ཤེ་ཡ་རང་དབང་རླུང་འཕྲིན་ཁང་གི་ ཁམས་སྐད་སྡེ་ཚན་གྱི་གསར་འགོད་པ་ སྨར་ཁམས་བློ་བཟང་ཆོས་འཕེལ་ལྟ་བུ་ཡིན་ན་ བོད་ཡིག་ དག་སུམ་རྟགས་རྩ་བ་ཉིད་ནས་བེད་སྤྱོད་བཏང་གི་མེད་

དེ་སྔ་ཡང་དངོས་ཤུགས་རྒྱུད་གསུམ་ནས་བསམ་འཆར་མང་པོ་བྱུང་སོང་། ག་ཚོད་བཤད་ཀྱང་སྟོང་པ་རེད། ཁོ་ཚོས་སྔར་བཞིན་བཤད་ཀྱིན་ང་ཚོས་ད་བཞིན་ཉན་རྒྱུ་ལས་ཐབས་ཞན་མེད་དོ།

དངོས་གནས་བཤད་ན། གནས་ཚུལ་འདིའི་རིགས་ལ་ང་ཚོས་བགྲོ་གླེང་བྱེད་པ་ལས་གསར་འགོད་པ་ཚོ་ཡོང་ནས་བགྲོ་གླེང་དང་བསམ་ཚུལ་བཤད་དགོས་རེད།
གསར་འགོད་པ་ནང་ཁུལ་ལ་བསམ་ཚུལ་བརྗེ་རེས་དང་ལེགས་ཆ་ལེན་རེས་བྱེད་དགོས་རེད། འོན་ཀྱང་། དེ་འདྲའི་བསམ་བློ་འཁོར་གི་ཡོད་མེད་མི་ཤེས།

གུས་པའི་བསམ་ཚུལ་ཞིག་ཞུ་རྒྱུ་ལ་ཨ་རིའི་རླུང་འཕྲིན་དང་ཨེ་ཤེ་ཡ་རླུང་འཕྲིན་དེ་བཞིན་ནོཝེ་རླུང་འཕྲིན་སོགས་མང་པོ་འདུག་ཀྱང་བོད་སྤྱི་པའི་དོན་ནི་འགྲུབ་གི་མི་འདུག ང་ཡི་མཐོང་སྣང་ལ་ཆོས་ལུགས་གཅིག་དང་ཆོལ་ཁ་གཅིག་གི་མི་ལ་གོ་སྐབས་ཡོད་པ་འདྲ་པོ་བྱུང་། དེ་བཞིན་དྲི་བ་གཏོང་མཁན་ཡག་པོ་གང་ཟག་ལ་མི་ལྟ་བ་ཚིག་རྡོག་རྡོག་གསུང་ཐུབ་མཁན་རྡོ་རྗེ་ཚེ་བརྟན་ལྟ་བུ་ཡིན་ཚེ་དྲི་བ་འགོད་ས་དེ་མི་བཅོས་མ་ཞིག་ཡིན་པ་འདྲ་པོ་འདུག ཡང་དྲི་བ་འགོད་མཁན་དེ་སྐྱོ་བོ་ཞིག་ཁེབས་དུས་ལ་དྲི་བ་འགོད་ས་དེ་མི་ཆེན་དང་བླ་ཆེན་སོགས་ཡིན་པ་འདྲ་པོ་འདུག དེ་ནི་བོད་རླུང་རྟ་ཆགས་པའི་རང་རྟགས་ཡིན་སྲིད། ལས་བྱེད་འཕོ་འགྱུར་ནི་མི་གཏོང་། དགོང་པ་ནི་མི་ཞུ། ས་མིག་སྟོང་པ་ནི་མེད། ད་བྱ་ཐབས་ཟད།།

བཟོད་པ་ལྷ་རྩེར་ཞུ་རྒྱུར།
དང་པོ།
ངེད་ཀྱིས་འདི་རུ། དྲི་བ་གཏོང་མཁན་དེས་བསམ་ཚུལ་ཉུང་ཉུང་བཤད། དྲི་བ་ཐུང་ཐུང་དྲིས་ན་དགེ་ཕན་ཆེ་བ་ཡོད་རེད་ཟེར་གི་ཡོད།
དྲི་བ་གཏོང་མཁན་དེས་དྲི་བ་བཏང་ན། དྲི་ལན་གནང་མཁན་དེས་ལན་རྒྱག་གི་རེད། མི་མང་གི་རྨོངས་པ་དེ་ཡང་དྲི་ལན་གནང་མཁན་གྱི་ཕྱོགས་ནས་སེལ་རྒྱུའི་རེ་བ་བསྟེན་དགོས་རེད་དྲན།
གཉིས་།
ན་ཚ་འདི་གསར་འགོད་པ་གཅིག་པ་མ་ཡིན་པར་མི་མང་ལ་ཡང་ཡོད་ན། གསར་འགོད་པ་ཚོས་ན་ཚ་འདི་ཉུང་དུ་གཏོང་དགོས་རེད་མ་གཏོགས། མང་དུ་བཏང་ན་དེ་མི་མང་གི་ན་ཚ་དེའི་ཁ་སྣོན་ལྟ་བུ་ཆགས་འགྲོ་གི་རེད། ན་ཚ་ཁ་སྣོན་བྱས་ན་ན་ཚ་སྡུག་ཏུ་འགྲོ་གི་རེད།
གསུམ་།
གོང་གི་དྲི་བ་གཏོང་མཁན་གྱིས་དྲི་བ་དེ་ཚོར་དཔྱད་ཞིབ་བྱས་ན། དྲི་བ་གཏོང་མཁན་གྱིས། སྒེར་གྱི་བསམ་ཚུལ་བཤད་རྒྱུ་གཙོ་འདོན་བྱས་འདུག་མ་གཏོགས་དྲི་བ་གཏོང་རྒྱུ་གཙོར་འདོན་བྱས་མི་འདུག སྒེར་གྱི་བསམ་ཚུལ་གཙོ་བོ་དང་དྲི་བ་ཕལ་བར་བཞག་འདུག དེར་བརྟེན། བསམ་ཚུལ་འདི་བྲིས་བ་ཡིན། དེ་ཙམ་ཡིན།

རིག་བྱུང་དོན་བཀྲ་ལགས། ཐོག་མར་ངས་ཁྱེད་ལ་མཚམས་འདྲི་ཞུ་བ་དང་སྦྲགས་སྐུ་ཉིད་ཀྱི་གསུངས་པའི་གནད་དོན་དེ་དང་དེ་འབྲེལ་སྐོར་ལ་མདོ་ཙམ་བརྗོད་པར་འདོད། ཉེ་ཆར་ཀུན་གླེང་ལེ་ཚན་གྱི་བཅར་དྲིའི་གཙོ་སྐྱོང་བ་རྣམ་རྒྱལ་ལགས་ཀྱི་བཀའ་བློན་ཁྲི་བ་ལགས་སུ་བཅར་དྲི་བྱེད་སྟངས་དེས་ང་ལའང་ཉོབ་སྣང་གི་ཚོར་བ་ཞིག་སྤྲད་སོང་ལ་ཁོང་གི་དྲི་བ་ཕལ་མོ་ཆེ་ནི་ནམ་ཀུན་གྱི་སྐད་རྙིང་པ་རྐྱང་རེད། དེ་ནི་གནད་དོན་གཅིག་ཡིན། ཕྱོགས་གཞན་ཞིག་ནས་ཀུན་གླེང་བཅར་དྲིའི་ལེ་ཚན་གཙོ་སྐྱོང་བ་པ་སངས་དབྱངས་སྐྱིད་ལགས་དང་། པདྨ་རྡོ་རྗེ་ལགས། བྱང་ཆུབ་སྒྲོལ་མ་ལགས་སོགས་ལའང་བསམ་འཆར་ཡོད། རྩ་བའི་ཆ་ནས་གསར་འགོད་པ་ཞིག་ཡིན་ན་སྨྱུག་རྩལ་དགོས་པ་ཙམ་དུ་མ་ཟད་སྤྱི་ཚོགས་ཀྱི་ཉམས་མྱོང་སོགས་དགོས་པ་མ་ཟད་ལྷག་པར་དུ་བཅར་དྲིའི་ལེ་ཚན་གཙོ་སྐྱོང་བ་ཞིག་གིས་ངོས་ནས་བརྗོད་ན་ཐོས་རྒྱ་ཆེན་པོ་དང་རིག་པ་རྐྱེན་པོའང་དགོས་རྒྱུ་དེ་ཧ་ཅང་གི་གལ་གནད་ཅན་ཞིག་རེད། འོན་ཀྱང་གོང་ཞུས་གཙོ་སྐྱོང་བ་རྣམས་ལ་ཆ་རྐྱེན་་དེ་རིགས་མེད་པ་མ་ཟད་གནད་ལ་འཁེལ་བའི་དྲི་བའང་ཡག་པོ་ཞིག་གཏོང་ཤེས་ཀྱི་མི་འདུག རྒྱུ་མཚན་དེའི་དབང་གིས་བརྙན་འཔྲིན་ལེ་ཚན་དེར་གཟིགས་མཁན་མི་ཉུང་བ་ཞིག་གིས་གོང་ཞུས་གཙོ་སྐྱོང་བ་དེ་དག་གི་ལེ་ཚན་གཙོ་སྐྱོང་བྱེད་པ་མཐོང་སྐབས་ལམ་སེང་་་་ད་ཡང་དེ་རིང་གི་ལེ་ཚན་ལ་ཆོ་ཡོད་པ་མ་རེད་་་ཅེས་ཉོབ་སྣང་གི་རྣམ་འགྱུར་དང་འགྲོགས་ཏེ་བརྗོད་ཀྱི་ཡོད། གོང་ཞུས་ལེ་ཚན་གཙོ་སྐྱོང་བ་རྣམས་ལ་ཡི་མི་ཚིམས་པའི་བསམ་ཚུལ་འདོན་མཁན་ང་གཅིག་པོ་མ་རེད། དེས་ན་ཁོ་བོའི་བསམ་ཚུལ་ལ་པ་སངས་དབྱངས་སྐྱིད་ལགས་དང་པདྨ་རྡོ་རྗེ་ལགས་གཉིས་ཀྱི་ཚབ་ཏུ་འཔྲིན་ལས་ཆོས་སྒྲོལ་ལགས་བསྐོ་བཞག་བྱས་ན་ཕན་འབྲས་ཆེ་བ་ཡོད་པའི་ཚོར་སྣང་ཞིག་ཁོ་མོས་དཔྱད་གླེང་ལེ་ཚན་གཙོ་སྐྱོང་བྱེད་སྐབས་ང་ལ་རང་བཞིན་གྱི་སྤྲད་ཀྱི་འདུག དེ་ནི་ང་སྒེར་གྱི་བསམ་ཚུལ་ཡིན། གལ་ཏ་ཕྲན་གྱི་བསམ་ཚུལ་གྱིས་གཞན་ལ་ཕོག་ཐུག་ཕྱིན་ཡོད་ན་དགོངས་འགལ་མེད་པ་ཞུ། ཡོན་ཏན་གྱིས་།

ངས་བསམ་ཚུལ་དེ་གོང་གི་ལས་རིམ་དང་འབྲེལ་བ་གང་ཡང་མེད་པའི་བསམ་ཚུལ་ཞིག་འབྲི་འདོད་པས་དགོངས་འགལ་མེད་ཞུ།

བང་ཆེན་ཚང་གི་དྲྭ་རྒྱ་ཐོག་མང་གཙོ་ཚོགས་པས་སྟོན་པའི་བཀའ་བློན་འོས་དམིགས་གཉིས་ལ་འོས་བླུགས་སྒམ་ཞིག་བཞག་འདུག དེ་ནི་སྤྱི་པའི་གསང་གཅོད་དང་གཅིག་པ་གཅིག་ཀྱང་ཞིག་རེད་འདུག་དྲྭ་གྲོགས་རྣམས་ནས་ཉམ་ཞིབ་ཐེངས་ཞིག་གནང་དང༌། ངས་དེ་ག་འདྲ་ཞིག་ཡིན་ནམ་སྙམ་ནས་ཚོད་ལྟ་ཐེངས་ཁ་ཤས་བྱས་པ་ཡིན། འོན་ཀྱང་ཐེངས་མ་ག་ཚོད་འོས་བླུགས་ཀྱང་འོས་གྲངས་ཇེ་ཐོར་འགྲོ་བཞིན་འདུག། ཁྱོད་ནས་འདོད་མོས་ཡོད་པའི་འོས་དམིགས་དེར་ཁྱོད་ནས་ཉིན་རེ་འོས་རེ་བླུགས་དང་འོས་ཐོབ་རྒྱུ་རང་རེད་འདུག དངོས་ཡིན།

གནས་ཚུལ་དེ་ཙམ་གྱིས་ག་ལ་ཚད། བོད་ཀྱི་གསར་འགོད་པ་མང་པོའི་ཤེས་ཡོན་གྱི་ཆུ་ཚད་ཧ་ཅང་དམའ་བའི་སྟབས་ཀྱིས་སྐབས་བསྟུན་དགོས་ངེས་ཅན་དང་། ཁུངས་ལྡན་གྱི་གནས་ཚུལ་མང་པོ་ལ་གསར་འགོད་པ་ཁོ་ཚོ་ཡང་རྒྱུས་ལོན་གསལ་པོ་ཆགས་ཐུབ་ཀྱི་མི་འདུག དེར་བརྟེན་ཁོ་ཚོས་བསྒྲགས་འགོད་བྱས་པའི་གསར་འགྱུར་གྱི་གནས་ཚུལ་མང་པོའི་མགོ་མཇུག་མི་མཐུན་པ་དང་། གོ་རིམ་མི་མཐུན་པ། གསལ་ཆ་མི་ཆེ་བ། འབྲེལ་མི་ཆགས་པ། བསྐྱར་ཟློས་དང་ལད་ཟློས་མང་བ། ཡིག་ནོར་དང་འགོད་ནོར་ཤོར་ཐལ་ཆེ་བ། ཁུངས་ལྡན་དང་ཆ་འཇོག་འཕེར་བའི་དཔང་རྟགས་ཉུང་བ་སོགས་ཀྱི་ཞན་ཆ་རྒྱུན་ལྡན་དུ་ཡོང་གི་ཡོད། ཨེ་ཤེ་ཡ་རང་དབང་རླུང་འཕྲིན་ཁང་དང་། ཨ་རིའི་རླུང་འཕྲིན་ཁང་གཉིས་ལ་མཚོན་ན། རང་དབང་དང་ཆ་རྐྱེན་འཛོམས་པའི་ཁྱད་པར་འཕགས་ཆོས་ནི་གཞན་ལས་མང་ན་ཡང་། དེ་གའི་ལས་བྱེད་གསར་འགོད་པ་མི་ཉུང་བ་ཞིག་གི་རྒྱུ་སྤུས་དབང་གིས་བོད་འབྲེལ་གྱི་གལ་ཆེའི་ལས་དོན་མང་པོ་ཞིག་ཐད་དོན་སྨིན་གྱི་ཕན་དགེ་འདྲེན་ཐུབ་ཀྱི་མི་འདུག ལྷག་པར་དུ་ཨེ་ཤེ་ཡ་རང་དབང་རླུང་འཕྲིན་ཁང་གི་བོད་ཡིག་དྲ་རྒྱའི་ནང་གི་གསར་འགྱུར་འགོད་སྟངས་དང་ཡིག་ནོར་དེ་དག་ནི་ངོ་ཚ་གཞི་དང་སེམས་པ་སྐྱོ་གཞི་ཞིག་རེད། མ་གཞི་ནས་དེ་ནི་བོད་དོན་ཐད་ཤ་ཚ་བསམ་ཤེས་མེད་པའི་ང་ཕོད་འཇིགས་མེད་ཀྱིས་ཆེད་བསྐྲུན་གོ་སྐབས་གཞན་ཞིག་མིན་ནམ་བསམ་ཡོང་།

དྲྭ་གྲོགས་རིག་འབྱུ་དོན་གྲུབ་བཀྲ་ཤིས་ལགས་ཀྱི་དགོངས་ཚུལ་ལ་བསམ་ཚུལ་ཞིག་བྲི་འདོད། ང་ཚོའི་སྤྱི་ཚོགས་ནང་དྲི་བ་ཐུང་ཐུང་དང་། བསམ་ཚུལ་ཉུང་ཉུང་ཤོད་རྒྱུའི་གོམས་གཤིས་འཇགས་པར་ད་དུང་མི་ལོ་གང་མཚམས་འགོར་སྲིད། དེ་ནི་གསར་འགོད་པ་གཅིག་པུར་འཕོག་པའི་ནད་ཚ་ཞིག་ནི་ག་ལ་ཡིན། དེ་ལྟར་ངོས་འཛིན་གནང་བ་ཡིན་ན་ནོར་འཁྲུལ་ཆེན་པོ་རེད། དངོས་གནས་དེ་ནད་ཚ་ཞིག་རེད། ང་ཚོའི་སྤྱི་ཚོགས་ཡོངས་ལ་འཕོག་པའི་ནད་ཚ་ཞིག་རེད། གསར་འགོད་པས་གསར་འགྱུར་དང་དྲི་བ་དྲི་ལན་ཚང་མ་རྒྱ་ཆེའི་མི་མང་གི་ཆེད་དུ་ཡིན་ལའང་གཙོ་བོ་རྒྱ་ཆེའི་མི་མང་གི་གོ་ཤེས་བྱ་ཐུབ་པ་ཞིག་ཡོངས་བར་ངེས་པར་འབད་བརྩོན་བྱ་དགོས། ང་ཚོའི་སྤྱི་ཚོགས་ནང་རྒྱ་ཆེའི་མི་མང་དག་ནི་སྲིད་དོན་ལ་ཤིན་ཏུ་རྨོངས་པས་དྲི་བ་ཐུང་ཐུང་དང་བསམ་ཚུལ་ཉུང་ཉུང་ཞིག་གིས་མི་མང་གོ་མི་ཐུབ་ལགས་དྲི་བ་འདྲི་ཡུལ་དག་གི་ཡང་གོ་ཐུབ་མིན་ཤེས་དཀའ་བས་གསར་འགོད་པ་རྣམས་ཀྱི་དྲི་བ་དག་རང་བཞིན་གྱི་རིང་པོ་ཆགས་པ་ཞིག་ལས་རིང་པོ་བཏང་བ་མ་རེད་མཉམ།

ཨ་རིའི་རླུང་འཕྲིན་་ཁང་དང་ཨེ་ཤེ་ཡ་རང་དབང་རླུང་འཕྲིན་ཁང་གཉིས་ད་དུང་་སྐུ་དྲག་གི་ཁྱིམ་ཚང་ཁ་ཤས་ཀྱིས་ཉར་བསྡད་ན་གསར་འགོད་པ་ཡག་པོ་རྙེད་གི་མ་རེད།

དངོས་གནས་བདེན་པ་རེད། སྔོན་མ་ཞིག་ལ་ས་གནས་འདིར་སྤྱི་མཐུས་གཉིས་གསལ་བསྒྲགས་གལ་ཆེན་ཞིག་གནང་སར་ཕེབས་སོང་། དེ་དུས་འདི་ནས་བླ་རྒན་ཞིག་གི་དྲི་བ་དང་བསམ་ཚུལ་སྦྲག་མ་ཞིག་གིས་ཆུ་ཚོད་ཕྱེད་ཀ་ལྷག་བཀག་སོང་བས་ཞེ་དྲག་ཉོབ་སོང་། ཁྱེད་ཀྱིས་དེ་རིང་བཤད་དུས་ངས་ཏག་ཏག་དེ་དྲན་སོང་། མི་དེའི་རིགས་ནི། དྲི་བ་གཏོང་མ་ཤེས་པའི་བཟོ་འདྲ། ཤེས་ཚད་ངོམས་སོ་བྱེད་ཀྱིན་ཡོད་པའི་བཟོ་འདྲ་ཞིག་ཏན་ཏན་མཐོང་གི་འདུག ག་རེ་ཡིན་མི་ཤེས།