བོད་གཞུང་དང་སྤྱི་སྒེར་སྒྲིག་འཛུཌ་ཡོངས་ཀྱིས་གཟབ་དགོས་པ་ཞིག ཁང་གསར།

༅༅།། བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་བཞི་པ། གཞུང་གི་རྩ་དོན་ཞེས་པའི་ནང་། “མཉམ་སྦྲེལ་རྒྱལ་ཚོགས་ཀྱི་ཡོངས་ཁྱབ་གསལ་བསྒྲགས་འགྲོ་བ་མིའི་ཐོབ་ཐང་དང་། དཔལ་འབྱོར་དང་། སྤྱི་ཚོགས། རིག་གཞུང་གི་ཐོབ་ཐང་། ཡུལ་མི་དང་སྲིད་དོན་གྱི་ཐོབ་ཐང་བཅས་ལ་བརྩི་སྲུང་བྱེད་པ་དང་། འཛམ་གླིང་ཡུལ་ལུང་གཞན་ཁག་ནས་ཀྱང་བརྩི་སྲུང་ཡོང་ཐབས་“གནང་རྒྱུ་ཡིན་ཞེས་གསལ་ཡོད། ཡང་དོན་ཚན་དྲུག་པའི་ནང་། བཙན་བྱོལ་བོད་གཞུང་གི་ཁྲིམས་ལུགས་དང་བཀའ་རྩ། སྒྲིག་གཞི་སོགས་རྒྱལ་སྤྱིའི་ཁྲིམས་ལུགས་དང་།   ལྷག་དོན་གནས་ཡུལ་རྒྱལ་ཁབ་ཀྱི་ཡུལ་ཁྲིམས་དང་མི་འགལ་བ་བྱ་རྒྱུ་ཡིན་ལུགས་འཁོད་ཡོད། རྩ་དོན་འདི་བཙན་བྱོལ་བོད་མིའི་སྤྱི་ཚོགས་ཀྱི་གཞུང་དང་སྤྱི་པ། སྒེར་བཅས་ཀྱི་སྒྲིག་འཛུགས་ཡོངས་ལ་ཁྱབ་དགོས་པ་ཞིག་རེད།

         ཉེ་དུས་ལོ་གཞོན་སློབ་ཕྲུག་ནང་ཁུལ་དུ་ཚུལ་མིན་འཁྲིག་སྤྱོད་ཀྱི་གནས་ཚུལ་ཐོན་པར་བརྟེན། མ་སུ་རི་བོད་ཁྱིམ་གྱིས་འབྲེལ་ཐོགས་སློབ་ཕྲུག་ཡོངས་དང་ཕ་ཚབ་མ་ཚབ་བཅས་སློབ་གྲྭ་ནས་ཕྱིར་འབུད་བྱས་པར་མ་ཟད། གནས་ཚུལ་འདིར་ལེ་ཐོགས་ཅན་གྱི་བོད་ནས་སླེབས་པའི་སློབ་ཕྲུག་དེ་རྣམས་བཙན་དབང་གི་ཐོག་ནས་བོད་ཀྱི་ས་མཚམས་བར་ཕྱིར་འབུད་བྱེད་བཞིན་ཡོད། ཚིག་གཞན་གྱིས་བཤད་ན། རྒྱ་ནག་གི་ལག་པར་སྤྲོད་བཞིན་ཡོད།

          འདིར་ཐོག་མར་གསལ་པོ་ཞུ་འདོད་པ་གཅིག་ནི། གནས་ཚུལ་འདི་ཇི་ལྟར་བྱུང་བ་དང་ཚབས་ཆེ་ཆུང་ཇི་ཙམ་ཡིན་མིན་ཁོ་བོས་ཞིབ་ཕྲ་ཤེས་རྟོགས་མེད། ངའི་ཤེས་རྟོགས་ཚང་མ་གསར་ལམ་དུ་ཁྱབ་པའི་གནས་ཚུལ་ལ་བརྟེན་པ་ཡིན། དེར་བརྟེན་གནས་ཚུལ་འདིའི་འབྱུང་རྩ་སློབ་གྲྭའི་སྒྲིག་འཛུགས་ཀྱིས་སློབ་ཕྲུག་ལ་ལྟ་སྐྱོང་དོ་ནན་གནང་མ་ཐུབ་པས་བྱུང་བ་ཡིན་དང་། ཡང་ན་སློབ་ཕྲུག་གི་ཀུན་སྤྱོད་འཚུབ་ཐལ་ཆེ་བས་ཡིན་བཤད་ཐུབ་ཀྱི་མེད། གང་ལྟར་སློབ་གྲྭའི་སྒྲིག་ལམ་དང་འགལ་ཚེ། སྒྲིག་གཞི་གཞི་བཟུང་ཉེས་ཆད་གཅོད་དགོས་པ་དེ་ངས་ཁས་ལེན་བྱེད་ཀྱི་ཡོད། འོན་ཀྱང་ཉེས་ཆད་གང་འདྲ་ཞིག་ཡིན་ཡང་བཙན་བྱོལ་བོད་མིའི་བཅའ་ཁྲིམས་ཀྱི་དགོངས་དོན་ལྟར་རྒྱལ་སྤྱིའི་ཁྲིམས་ལུགས་དང་མ་འགལ་བ་ཞིག་ངེས་པར་དགོས་པ་ཡིན།

        ད་རེས་ལོ་ན་ཆུང་བའི་སློབ་ཕྲུག་དེ་དག་ཕྱིར་འབུད་ཀྱིས་རྩ་ཆེའི་སློབ་སྦྱོང་གི་གོ་སྐབས་དང་མདུན་ལམ་མེད་པར་བཟོས་པ་ཙམ་མ་ཟད། རང་དབང་ལུང་པར་སྐྱབས་བཅོལ་བྱེད་པའི་ཐོབ་ཐང་བཙན་འཕྲོག་གིས་རྒྱ་ནག་གི་དབང་སྒྱུར་འོག་ཏུ་གཏོང་བ་ནི། རྒྱལ་སྤྱིའི་ཁྲིམས་ལུགས་དང་འགལ་ཚབས་ཆེ་བའི་ལས་ཀ་ཐབས་རྡུག་ཅིག་ཡིན་པ་དེ་གསལ་པོ་རེད།

          དེ་ཡང་འགྲོ་བ་མིའི་ཐོབ་ཐང་སྐོར་གྱི་ཡོངས་ཁྱབ་གསལ་བསྒྲགས་ཀྱི་དོན་ཚན་༡༤ ནང་། སྐྱེ་བོ་རེ་རེར་རང་ཉིད་གནོད་འཚེ་ལས་གཡོལ་ཆེད་རྒྱལ་ཁབ་གཞན་དག་གི་མངའ་ཁོངས་སུ་སྐྱབས་བཅོལ་གྱི་འཚོ་བར་ལོངས་སུ་སྤྱོད་པའི་ཐོབ་ཐང་ཡོད། ཅེས་གསལ་པོ་འཁོད་ཡོད།

          ཡང་རྒྱལ་སྤྱིའི་བྱིས་པའི་ཐོབ་ཐང་གི་ཁྲིམས་ཡིག་གི་དོན་ཚན་ ༢༢ ནང་སྐྱབས་བཅོལ་ཕྲུ་གུ་ཚོར། འགྲོ་བ་མིའི་ཐོབ་ཐང་དང་བྱིས་པའི་ཐོབ་ཐང་། དེ་བཞིན་རྒྱལ་སྤྱིའི་ཁྲིམས་ལུགས་ཁག་གཞི་བཟུང་མི་ཆོས་རིང་ལུགས་ཀྱི་སྲུང་སྐྱོབས་འོས་འཚམས་བྱེད་དགོས་པ་གསལ་ཡོད། བྱིས་པའི་ཐོབ་ཐང་གི་ཁྲིམས་ཡིག་གི་དོན་ཚན་གཞན་དག་གི་ནང་དུ། བྱིས་པ་བདག་སྐྱོང་བྱེད་མཁན་གྱིས། བྱིས་པའི་ལུས་སེམས་གཉིས་ཀར་གནོད་འཚེ་མི་ཕོག་པའི་འགན་སྲུང་དང་འཚར་ལོངས་ལ་མི་གནོད་པའི་བདེ་འཇགས་ཀྱི་ཁོར་ཡུག་བསྐྲུན་དགོས་པ་སོགས་གསལ་ཡོད།

          དེར་བརྟེན། ༸གོང་ས་མཆོག་མཇལ་ཆེད་དང་སློབ་སྦྱོང་གི་གོ་སྐབས་ཐོབ་ཆེད། ལྷག་པར་དུ་རང་དབང་གི་འཚོ་བར་རོལ་ཆེད་གཞན་དབང་འོག་ནས་ཡོང་བའི་རང་རིགས་བོད་ཕྲུག་གི་འགྲོ་བ་མིའི་ཐོབ་ཐང་འཕྲོག་པ་འདི་ནི། བཙན་བྱོལ་བོད་མིའི་བཅའ་ཁྲིམས་དང་རྒྱལ་སྤྱིའི་ཁྲིམས་ལུགས་ཁག་དང་འགལ་འདས་ཆེན་པོ་རེད།

          གཞན་ཡང་། དེ་སྔོན་བཙན་བྱོལ་བོད་གཞུང་གིས་བོད་ནས་སྐྱབས་བཅོལ་དུ་ཡོང་མཁན་མང་པོ་ཞིག་རང་ས་རང་སྲུང་བྱེད་པར་ལོག་དགོས་ཞེས། བོད་མི་མང་པོ་ཞིག་བཙན་ཤེད་ཀྱི་བྱ་ཐབས་སྣ་ཚོགས་ཀྱི་ཐོག་ནས་བོད་ལ་སློག་པ་དེ་ཡང་གོང་གསལ་མི་སུ་ཡིན་རུང་། སྐྱབས་བཅོལ་གྱི་འཚོ་བར་རོལ་ཆོག་པའི་ཐོབ་ཐང་དང་འགལ་བ་ཞིག་ཡིན་པས། གནས་ཚུལ་འདི་རིགས་བྱུང་ཟིན་པར་ལེགས་བཅོས་དང་སླད་མི་འབྱུང་བའི་ཆེད་སྤྱི་སྒེར་ཚང་མས་གཟབ་དགོས་སོ།། །།