ནང་མི་ལྔ་ཅན་གྱི་རླངས་འཁོར་ཆུང་བ་ཞིག་མེག་གྷན་ནས་གངས་སྐྱིད་དུ་ཡོང་བའི་ལམ་བར་ནས་རིལ་ཏེ་ཁ་ལོ་བགོར་འདུག་ཀྱང་། མི་ལ་རྨས་སྐྱོན་སོགས་གང་ཡང་བྱུང་མི་འདུག
དེ་རིང་སྔ་དྲོའི་ཆུ་ཚོད་ ༡༡ དང་ཕྱེད་ཀ་ཙམ་ནས་ངྷ་སར་ཆར་བ་འབབ་མགོ་ཚུགས་ཡོད་ལ། ཉིན་རྒྱབ་ཆུ་ཚོད་ ༡ ཡོལ་ཙམ་དེར་ལྡི་ལི་ནས་ངྷ་སར་ལྟ་སྐོར་དུ་ཡོང་བའི་རླངས་འཁོར་ཆུང་བ་ཞིག མེག་གྷན་ནས་གངས་སྐྱིད་དུ་ཡོང་བའི་ལམ་བར་གྱི་རྗོ་གྷེ་བྷ་རིའི་གཤམ་གྱི་དཀྱོག་ཆེན་པོ་ཡོད་སའི་གཞུང་ལམ་སྟེང་། དཀྱོག་འཁོར་ཚོད་འཛིན་མ་ཐུབ་པར་རིལ་ཏེ་ལམ་ཟུར་གྱི་རྡོ་རྩིག་དང་བཙོག་ཆུ་འདྲེན་སྣོད་ཀྱི་རྡོ་ཁང་གཉིས་ཀྱི་བར་དུ་ལྷུང་འདུག
རླངས་འཁོར་དེའི་ནང་དུ་ཁྱོན་བུད་མེད་གསུམ་དང་སྐྱེས་པ་གཉིས་བཅས་ནང་མི་ལྔ་ཡོད་ལ། ཁོང་ཚོ་ལྡི་ལི་ནས་ངྷ་སར་ལྟ་སྐོར་དུ་ཡོང་བའི་པན་རྗེབ་མི་རིགས་ཡིན་མོད། རླངས་འཁོར་ཁ་ལོ་བས་ང་ཚོའི་ནང་མི་སུ་གཅིག་ལའང་ཚབས་ཆེའི་རྨས་སྐྱོན་སོགས་གང་ཡང་བྱུང་མ་སོང་། མི་ཚང་མ་ད་ལྟ་བདེ་འཚམ་ཡིན་ཞེས་བརྗོད།
རླངས་འཁོར་ཁ་ལོ་བས་ད་དུང་ང་ཚོ་གཞུང་ལམ་སྟེང་ནས་མར་ཡོང་དུས་རླངས་འཁོར་རྒྱུགས་ཤུགས་ཅུང་མགྱོགས་པ་དང་ཆར་བ་བབས་ཏེ་གཞུང་ལམ་སྟེང་ནས་རིལ་ཆོག་ཆོག་འདུག་སྟབས། དཀྱོག་འཁོར་ཚོད་འཛིན་མ་ཐུབ་པར་རིལ་སོང་ཟེར།
གསར་འགོད་པ་ས་དེར་ཐོན་དུས་ཆུ་ཚོད་ ༡ དང་སྐར་མ་ ༤༥ རེད་ལ། རླངས་འཁོར་ནང་གི་བུད་མེད་གསུམ་ས་དེར་བསྡད་མི་འདུག་ཀྱང་། རླངས་འཁོར་ཁ་ལོ་བ་དང་ཁོའི་རོགས་པ་གཉིས་ཀྱིས་ཡར་མར་ཁ་པར་བཏང་སྟེ། རླངས་འཁོར་ཕྱིར་ཇི་ལྟར་ལེན་ཐུབ་མིན་ཐད་ཐབས་འཚོལ་བྱེད་ཀྱིན་པའི་སྒང་རེད།
རྗོ་གྷེ་བྷ་རིའི་གཤམ་གྱི་དཀྱོག་འཁོར་དེ་རུ་འདི་ལོའི་ལོ་སྟོད་དུ་སྔ་གཞུག་ཏུ་སོག་པོའི་མི་ཞིག་དང་ཕྱི་གླིང་བའི་མི་ཞིག་གི་འཕྲུལ་རྟ་གཉིས་རིལ་མྱོང་བ་དང་། ཕྱི་གླིང་བའི་མི་དེར་ཚབས་ཆེའི་རྨས་སྐྱོན་ཕོག་སྟེ་རྒྱ་གར་ཡུལ་མི་དང་བོད་མི་འགས་དུས་ལྟར་སྨན་ཁང་དུ་བསྐྱལ་ཡོད། དེར་བརྟེན་དཀྱོག་འཁོར་དེ་ནི་ཕྱི་ཕྱོགས་ནས་ཡོང་ཞིང་ཀྱག་ཀྱོག་ཆེ་བའི་མེག་གྷན་དང་གངས་སྐྱིད་བར་གྱི་ལམ་ལ་རྒྱུས་མངའ་མེད་མཁན་ཚོར་ཉེན་ཁ་ཧ་ཅང་ཆེ་བའི་དཀྱོག་ཅིག་ཡིན་འདུག
གསར་འགོད་པ། ཨ་རིག་འགྱུར་མེད།
ས་གནས་དབུས་གཞུང་གང་རུང་གིས་རྡ་སའི་གཞུང་ལམ་ཡར་རྒྱས་དགོས་རྟགས་ཞིག་བསྟན་པ་མིན་ནམ།
རླངས་འཁོར་ཞིག་གྲིལ་འདུག ཁ་ལོ་བགོར་འདུག ཚིག་འདི་ཚོའི་གོ་བ་ག་རེ་རེད། ཧ་གོ་མ་སོང་།
བོད་ཀྱི་བང་ཆེན་གྱིས་གནས་ཚུལ་སྤེལ་བ་ལྟར་ན། མེག་ལོར་ལམ་གཡས་གཡོན་དུ་ཁྲོན་སྟོན་མཁན་ཚང་མ་སྟོན་མི་ཆོག་པ་བཟོ་རྒྱུ་ཡིན་ཞེས་རྒྱ་གར་གཞུང་གིས་ཐག་བཅད་ཡོད་པ་འདྲ། གང་ཡིན་ཟེར་ན་རླངས་འཁོར་དང་མི། དུད་འགྲོ་སོགས་ཚང་མ་མཉམ་དུ་འགྲོ་དགོས་དུས་འཚང་ཀ་ཆེན་པོ་འདུག་ཅེས་ཡུལ་སྐོར་བ་འགའ་རེས་བཤད་པ་དང། དེ་བཞིན་རྒྱ་གར་ཚགས་ཤོག་ནང་དུ་བཀོད་ཡོད་པ་འདྲ།
དེ་རིང་གི་རླངས་འཁོར་རིལ་བ་དེ་ཁྲོམ་སྟོན་མཁན་ཡོད་པའི་རྐྱེན་གྱིས་རེད་མི་འདུག་གཱ ང་ཚོ་སྐྱབས་བཅོལ་བ་རེད་མ་གཏོགས། རྒྱ་གར་ཡུལ་མི་ཡིན་ན། མེག་ལོར་སྲང་ལམ་ནང་དུ་རླངས་འཁོར་རྩ་བ་ནས་འགྲོ་མི་ཆོག་པ་ཞིག་བཟོ་དགོས་ཞེས་སྐད་འབོད་རྒྱག་དགོས་ཀྱི་འདུག དེ་མ་གཏོགས་ཁྲོམ་སྟོན་མཁན་བསྐྲད་པ་ཙམ་གྱིས་འཚང་ཁ་མེད་པ་ཆགས་ཨེ་ཡོང་ན།
གང་ལྟར་གནད་དོན་འདི་ཚོར་བསམ་བློ་ངེས་པར་དུ་གཏོང་དགོས་ཀྱི་འདུག
རྡ་སའི་གཡས་གཡོན་གྱི་གཞུང་ལམ་རྣམས་འགུག་ཆ་རྣོ་བ་དང་རྒྱན་ཐུར་རི་ལམ་ཡིན་པ་མ་ཟད་གླ་ཆེད་རླངས་འཁོར་གཏང་མཁན་དག་གཏོང་ཤུགས་ཧ་ཅང་ཆེ་བས་ཉེན་ཁའི་གནས་རང་རེད། དེ་ན་རང་རིགས་སྤུན་ཟླ་དག་ལ་ཞུ་རྒྱུར་རྡ་སར་གླ་ཆེད་རླབས་འཁོར་ནང་འགྲོ་དགོས་དུས་ཁ་ཆེམས་ཞག་ནས་ཕེབས་རོགས།
རླངས་འཁོར་སྐཽར་དུས་གཟབ་གཟབ་བྱེད་དགོས་རེད་ཡ། པན་ཇབ་བུ་མོ་གསུམ་པོ་བདེ་འཚམས་ཡིན་ན་བློ་བདེ་སོང་།
༄ ། ། སྟབས་ཡག མི་ལ་གནོན་སྐྱོན་མ་བྱུང་བ་ལེགས། ལམ་འགྲམ་དུ་གཉེན་ཁ་ཡོད་དོགས་རིགས་ལ་ཡིག་གེ་བསླང་ན་ཤིནད་ཏུ་འོས་ཤིང་། དེ་ནི་མེགྷན་གྱི་བོད་རིགས་ཚོས་ལས་བཟང་རེ་བསྒྲུབས་ཏེ་བོད་རིགས་དང་ཡུལ་མིའི་དབར་འབྲེལ་ལམ་ལེགས་སུ་གཏོང་བའི་ཐབས་ཤིག་ཀྱང་རེད་སྙམ།