ཉེ་ཆར་རྒྱ་གཞུང་གིས་བོད་ཀྱི་ཁོར་ཡུག་སྲུང་སྐྱོབ་པ་དང་ཚོང་པ་གྲགས་ཅན་ཀརྨ་བསམ་འགྲུབ་ལགས་སུ། ལོ་ ༡༥ བཙོན་འཇུག་ཁྲིམས་ཐག་བཅད་པར་བཙན་བྱོལ་བོད་གཞུང་གིས་སྐྱོན་བརྗོད་དང་། ཁོང་གཙོས་ཆབ་སྲིད་བཙོན་པ་རྣམས་འཕྲལ་དུ་གློད་གྲོལ་གཏོང་རྒྱུར་འབོད་སྐུལ་ཞུ་གིན་ཡོད་ཟེར།
དེ་རིང་བོད་གཞུང་ཕྱི་དྲིལ་དྲུང་ཆེ་ཐུབ་བསྟན་བསམ་འཕེལ་ལགས་ཀྱིས་འདི་གའི་གསར་འགོད་པར་གསུངས་དོན། ཟླ་འདིའི་ཕྱི་ཚེས་ ༢༤ ཉིན་རྒྱ་གཞུང་གིས་ཀརྨ་བསམ་འགྲུབ་ལགས་སུ་ལོ་ ༡༥ བཙོན་འཇུག་ཁྲིམས་ཐག་བཅད་པར་ང་ཚོའི་ཕྱོགས་ནས་བློ་ཕམ་ཆེན་པོ་ཡོད། ང་ཚོས་རྒྱ་ནག་ལ་སོ་སོའི་སྨྲ་བརྗོད་རང་དབང་བེད་སྤྱོད་བཏང་སྟེ། བོད་སྤྱིའི་དོན་དུ་སྐད་རྒྱག་པ་དང་ཐོབ་ཐང་དགོས་ཟེར་མཁན་གྱི་ཆབ་སྲིད་བཙོན་པ་ཚང་མ་གློད་དགོས་པ་རེད་ཅེས་འབོད་སྐུལ་ཞུ་གིན་ཡོད།
ཀརྨ་བསམ་འགྲུབ་ལྟ་བུར་མཚོན་ན་ཁོང་གི་སྤུན་མཆེད་གཉིས་རྒྱ་ནག་གི་བཙོན་འོག་ཏུ་ཡོད་སྟབས། ཁོང་གཉིས་གློད་གཏོང་དགོས་གསུངས་པ་རེད་ལ། ཁོང་ལ་བཅད་པའི་ཁྲིམས་ཆད་ནི་ལོ་ ༡༥ རིང་བཙོན་འོག་ཏུ་འདུག་རྒྱུ་དེ་རེད། དེ་བཞིན་ཁོང་ལ་བཀལ་བའི་ནག་ཉེས་ནི་ལོ་ ༡༢ སྔོན་གྱི་གནས་ཚུལ་རྙིང་པ་ཞིག་རེད་འདུག་ལ། དེ་ཡང་ཁོང་རང་ཉིད་ཀྱིས་ནག་ཉེས་བསགས་པ་དེ་འདྲ་གང་ཡང་མ་རེད། དེར་བརྟེན་ཁོང་ལ་ཁྲིམས་ཐོག་ནས་ནག་ཉེས་གང་ཡང་མེད་བཞིན་དུ་མི་ལོ་ ༡༥ བཙོན་འཇུག་ཁྲིམས་ཐག་བཅད་པར་བློ་ཕམ་ཆེན་པོ་བྱུང་།
ལྷག་པར་དུ་ཁོང་ལ་མཚོན་ན་ཁོར་ཡུག་སྲུང་སྐྱོབ་ཀྱི་སྐོར་ནས་རྒྱ་ནག་གཞུང་ངོས་ནས་བྱ་དགའ་རེག་མྱོང་བའི་མི་ཞིག་ཡིན་སྟབས། བོད་གཞུང་གི་ངོས་ནས་རྒྱ་ནག་ལ་ཁོང་གཙོས་པའི་ཆབ་སྲིད་ཀྱི་བཙོན་པ་རྣམས་གློད་གྲོལ་འཕྲལ་དུ་གློད་གྲོལ་གཏོང་དགོས་ཞེས་འབོད་སྐུལ་ཞུ་གིན་ཡོད་ཅེས་གསུངས།
འདི་གའི་གསར་འགོད་པས་ཁོང་ལ་བོད་གཞུང་གི་འབོད་སྐུལ་འདི་ཉིད་གསར་འགྱུར་བརྒྱུད་ལམ་ཁག་ལས་གཞན། རྒྱ་ནག་ལ་དངོས་སུ་ཡིག་འབྲེལ་དང་ཁ་པར་གྱི་ལམ་ནས་འབོད་སྐུལ་ཞུ་གིན་ཡོད་མེད་སྐོར་དྲིས་པར། ཁོང་གིས་ང་ཚོས་འབོད་སྐུལ་དེ་ཁྱེད་ཅག་ལྟ་བུའི་ཀརྨ་བསམ་འགྲུབ་སྐོར་ལ་བཅར་འདྲི་བྱེད་མཁན་གྱི་གསར་འགོད་པ་དང་། གསར་འགྱུར་བརྒྱུད་ལམ་བརྒྱུད་ནས་ཞུ་གིན་ཡོད་པ་ལས། རྒྱ་ནག་གཞུང་ལ་ཐད་ཀར་ཡིག་འབྲེལ་ཐོག་ནས་ཞུ་གི་མེད་ཅེས་གསུངས།
ཁོང་གིས་ཕྱི་ཚེས་ ༢༥ ཉིན་ཧྥ་རན་སིའི་གསར་ཁང་ཞིག་གི་བཅར་འདྲི་དང་ལེན་གནང་སྐབས་ཀྱང་། ཀརྨ་བསམ་འགྲུབ་ལགས་སུ་དྲང་བདེན་མིན་པའི་ཁྲིམས་ཐག་བཅད་པ་དང་། ཁོང་ལ་འདྲི་རྩད་སྐབས་གཅར་རྡུང་དྲགས་པོ་བྱས་པར་བློ་ཕམ་བྱུང་ཡོད་ཅེས་དང་། རྒྱ་ནག་གིས་ཆབ་སྲིད་བཙོན་པ་རྣམས་ལ་ཁྲིམས་ཞིབ་བྱེད་དུས་ངེས་པར་དུ་དྲང་བདེན་དང་ཕྱི་གསལ་ནང་གསལ་བྱེད་དགོས་ཞེས་འབོད་སྐུལ་ཞུས་ཡོད།
ཀརྨ་བསམ་འགྲུབ་ལགས་སུ་རྒྱ་གཞུང་གིས་དྲང་བདེན་མིན་པའི་ཁྲིམས་ཐག་བཅད་པར་ཨ་རིའི་ཕོ་བྲང་དཀར་བོའི་མགྲིན་ཚབ་པས་ཀྱང་། རྒྱ་གཞུང་གི་བྱེད་སྟངས་དེར་སྐྱོན་བརྗོད་དང་བློ་ཕམ་བྱུང་སྐོར་བརྗོད་ཡོད་འདུག
གསར་འགོད་པ། ཨ་རིག་འགྱུར་མེད།
བོད་གཞུང་ཟེར་ལོས་ཆོག འོན་ཀྱང་རྒྱལ་ཁབ་གཞན་གྱིས་ངོས་ལེན་མ་བྱས་པས་མིང་སྟོང་བ་འདྲ་བོ་ཞིག་རེད། གཞུང་ཞིག་གི་མིང་ཡོད་ན་མེད་ན་དོན་ལ་༸གོང་ས་མཆོག་དང་གཞིས་ལུས་མི་དམངས་ཀྱི་སྙིང་སྟོབས་དང་མཐུན་སྒྲིལ་ལ་ཐུག་ཡོད་པ་རེད། བྱེས་ཀྱི་བོད་གཞུང་དམངས་ཀྱིས་འདི་ལྟར་གཞིས་ལུས་མི་དམངས་ཀྱི་དཔའ་བོ་དཔའ་མོ་ཚོར་གདུང་སེམས་མཉམ་སྐྱེད་དང་རྒྱལ་སྤྱིར་གཏུགས་བཤེར་སོགས་བྱ་རྒྱུ་ཧ་ཅང་གལ་ཆེ།
བོད་གཞུང་དང་རྒྱ་གཞུང་ཞེས་གཞུང་གཉིས་ཡོད་ན་རང་བཞིན་གྱིས་གདོང་ཐུག་བརྒྱབ་ཡའི་གཞི་ཅིག་མིན་ནམ།
ཐེངས་འདིར་རྒྱ་གཞུང་གིས་བོད་ཀྱི་ཁོར་ཡུག་སྲུང་སྐྱོབས་པ་དང། ཚོང་པ་གྲགས་ཅན་ཀརྨ་བསམ་གྲུབ་མཆོག་ལ་ལོ་༡༢ཡར་སྔོན་ནས་ཁོང་གཙང་དག་བྱུང་ཚར་བའི་གྱོད་དོན་ཞིག་ཆེད་དུ་བསྐྱར་གླེང་གིས་བཙན་འགེལ་བྱེད་དགོས་བྱུང་བ་རེད།
རྒྱ་གཞུང་གིས་བྱེད་སྟངས་འདིས་བོད་ཀྱི་ཁོར་ཡུག་སྲུང་སྐྱོབས་པ་དང། ཚོང་པ་གྲགས་ཅན་ཀརྨ་བསམ་གྲུབ་མཆོག་ནི་རྒྱ་ནག་གཞུང་ཞེད་སྣང་དགོས་སའི་རླབས་ཆེན་གྱི་མི་སྣ་གལ་ཆེན་ཞིག་ཡིན་པར་གསལ་སྟོན་བྱས་ཡོད་ཅིང།
དེ་བཞིན་ཁོང་ནི་སྐྱོན་བཙལ་ཀྱང་མི་རྙེད་སའི་མི་དཀར་གཙང་ཞིག་ཡིན་པར་ཡང་བསྟན་ཡོད།
དངོས་གནས་བྱས་ན་རྒྱ་གཞུང་གིས་བྱེད་སྟངས་འདི་ནི་ཀྲུང་ཧ་མི་དམངས་སྤྱི་འཐུན་རྒྱལ་ཁབ་ཀྱི་རྩ་ཁྲིམས་དང་འགལ་ཡོད།
ཀྲུང་གོའི་རྩ་ཁྲིམས་ཀྱི་དོན་ཚན་༣༨་པར།
ཀྲུང་ཧ་མི་དམངས་སྤྱི་མཐུན་རྒྱལ་ཁབ་ཀྱི་སྤྱི་འབངས་ཀྱི་ངོ་སོ་དང་ལ་རྒྱལ་བཙན་གནོད་བྱས་མི་ཆོག བྱེད་ཐབས་གང་དང་གང་གི་ཐོག་ནས་སྤྱི་འབངས་ལ་བརྙས་བཅོས་དམའ་འབེབས་དང། སྙོན་འཛུགས་སྙན་འབུལ་དང། མ་ཉེས་ཁག་གཡོག་བྱེད་རིགས་བཀག་བསྡོམས་བྱ་རྒྱུ།
ཅེས་དང།
དོན་ཚན་༤༡པར།
རྒྱལ་ཁབ་གཞུང་གི་ལས་ཁུངས་དང། རྒྱལ་ཁབ་གཞུང་གི་ལས་བྱེད་པས་སྤྱི་འབངས་ཀྱི་ཁེ་དབང་ལ་བཙན་གནོད་བྱས་རྐྱེན་གྱིས་གྱོང་གུན་ཕོགས་ཚེ་དེར་བཅའ་ཁྲིམས་ཀྱིས་གཏན་འབེབས་ལྟར་གུན་གསབ་ཐོབ་ལེན་གྱི་ཁེ་དབང་ཡོད།
ཅེས་བཤད་ཡོད་པ་ལྟ་བུ་རེད།
གོང་གསལ་ཀྲུང་གོའི་རྩ་ཁྲིམས་ཀྱི་དོན་ཚན་འདི་དག་ཚང་མ་ད་ལྟ་རྒྱ་གཞུང་རང་ཉིད་ཀྱིས་གཏོར་བཤིགས་རྡོག་རོལ་གཏང་བཞིན་པ་འདི་རེད།
གལ་སྲིད་ལོ་༡༢ཡར་སྔོན་ཁོང་ལ་ཉེས་འཛུགས་དེ་འདྲ་ཞིག་བྱུང་མྱོང་མེད་ན་ཐེངས་འདིར་རྒྱ་གཞུང་གིས་ཇི་ལྟར་ཁོང་ལ་ཉེས་འཛུགས་བྱེད་རྒྱུ་རེད་དམ། དེར་ང་ཚོ་ཚང་མས་བསམ་བློ་ཞིག་ཐོངས་དང།
ངས་བལྟས་ན་ཉེན་རྟོག་པས་ཐོག་མར་ཁོང་འཛིན་བཟུང་བྱས་རྗེས་ཁོང་གི་ཁྱིམ་བསྔོགས་བཤེར་བྱེད་རྒྱུ་རེད། དེ་ནས་རྒྱ་གཞུང་གིས་ཁོང་གི་ཁྱིམ་ནས་མེ་མདའ་སོགས་ནག་ཚོང་རིགས་ཐོན་སོང། ཞེས་ཁོང་ལ་ཉེས་འཛུགས་བྱེད་ངེས་རེད།
དེ་ནི་ལི་ཐང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེར་ཉེས་འཛུགས་བྱེད་སྟངས་དེ་མ་རེད་དམ།
དངོས་གནས་བྱས་ན་འདི་ཚོ་ཚང་མ་རྒྱ་དམར་གཞུང་ཨུ་ཐུག་ཐབས་ཟད་ཀྱི་བྱེད་སྟངས་ཤ་སྟག་རེད།
དེ་བཞིན་ཉེ་སྔོན་རྒྱ་གཞུང་གིས་བོད་ཀྱི་བསམ་བློ་བ་གྲགས་ཆེན་ཞོགས་དུང་མཆོག་བཙོན་འཇུག་བྱས་པ་རེད།
དངོས་གནས་བྱས་ན་སྐབས་དེར་ཞོགས་དུང་ལ་སྐྱོན་ཆ་གང་ཞིག་ཡོད་དམ།
ཁོང་གིས་ཀྲུང་གོའི་རྩ་ཁྲིམས་ཀྱི་ཆ་རྐྱེན་གཞིར་བཟུང་དེབ་ཅིག་བརྩམས་པ་རེད།
ཀྲུང་གོའི་རྩ་ཁྲིམས་དོན་ཚན་༣༥བར།
ཀྲུང་ཧ་མི་དམངས་སྤྱི་མཐུན་རྒྱལ་ཁབ་ཀྱི་སྤྱི་འབངས་ལ་གཏམ་བརྗོད།་དཔེ་སྐྲུན། འདུ་ཚོགས། ཚོགས་འཛུགས། ཁྲོམ་སྐོར། རྔམས་སྟོན་བཅས་བྱེད་པའི་རང་དབང་ཡོད།
ཅེས་པའི་ཆ་རྐྱེན་དེ་རེད།
ཆ་རྐྱེན་དེ་གཞིར་བཟུང་ཁོང་གིས་གནམ་ས་སྒོ་འབྱེད་ཅེས་པའི་དེབ་དེ་བརྩམས་པ་རེད།
དངོས་གནས་བྱས་ན་ཞོགས་དུང་ནི་མི་ཧ་ཅང་གི་དྲང་བདེན་ཞིག་རེད།
ཁོང་གིས་རྒྱལ་ཁབ་ཀྱི་རྩ་ཁྲིམས་གཞིར་བཟུང་སྨྲ་བརྗོད་རང་དབང་བེད་སྤྱོད་ཀྱིས་རང་སེམས་ན་གང་ཡོད་གནད་དོན་ཁག་སྦེད་གསང་མེད་པར་ཡིག་ཐོག་ཏུ་ཕབ་ནས་ཕྱི་གསལ་ནང་གསལ་བྱས་པར་བརྟེན་རྒྱ་གཞུང་གིས་འཕྲལ་དུ་ཁོང་བཙོན་འཇུག་བྱས་པ་རེད།
ད་ནི་རྒྱ་གཞུང་རང་ཉིད་ཀྱིས་གཏན་འབེབ་བྱས་པའི་རྩ་ཁྲིམས་རང་ཉིད་ཀྱིས་གུས་བརྩི་མེད་པར་སྡིག་པ་མིག་བཙུམ་གྱིས་རྩིས་མེད་གཏང་དགོས་པའི་དུས་སུ་སླེབས་པ་རེད།
དེང་སྐབས་རྒྱ་གཞུང་གིས་མདོང་རྩེ་གཏད་ས་གཙོ་བོ་ནི་རང་གི་མི་རིགས་ལ་ཕུགས་བསམ་དཀར་བའི་རླབས་ཆེན་འཇོན་ཐང་ཅན་གྱི་མི་སྣ་དང། སྐད་གྲགས་ཅན་གྱི་བསམ་བློ་བ་དང། རྩོམ་པ་པོ། གཞས་པ་སོགས་ཤེས་ལྡན་མི་སྣ་སོགས་ཆགས་ཡོད། འཕྲོས་རྒྱལ་སྤྱི་དང། རྒྱལ་ནང་སོགས་དཔལ་འབྱོར་བསླུ་བྲིད་ཀྱིས་མགོ་སྐོར་བཏོང་བཞིན་པ་དེ་རེད།
ད་དུང་མུ་མཐུད་རྒྱ་གཞུང་གི་དྲང་བདེན་མེད་པའི་ལས་འགུལ་མང་རུ་འགྲོ་ངེས་ཡིན་ཞིང། རིམ་བཞིན་དམ་དྲག་ཤུགས་ཆེ་རུ་གཏང་ངེས་རེད།
དངོས་གནས་བྱས་ན་དེ་ནི་ཁོང་ཚོས་ཉེན་ཁའི་འགག་མཚམས་ཞིག་མཐོང་བའི་རྟགས་བསྟན་པ་རེད།
འོན་ཀྱང་རྒྱ་གཞུང་གིས་ཆེས་མ་རུང་བའི་བྱེད་སྟངས་དེ་ལ་བརྟེན་ཉིན་གཅིག་རྒྱལ་སྤྱིའི་ཞི་བདེའི་སྲུང་སྐྱོབས་དམག་དཔུང་བོད་སར་འབྱོར་མི་སྲིད་པ་གང་ལ་ཡིན། དེ་འབྱོར་ཐུབ་པའི་ལས་འགུལ་སྤེལ་རྒྱུ་དེ་ང་ཚོ་ཕྱི་ལ་ཡོད་པ་ཚོའི་ལས་འགན་ཡང་རེད།
གང་ལྟར་རྒྱ་གཞུང་གིས་ཇི་ལྟར་བྱས་མིན་ལ་མ་ལྟོས་པར་བོད་དོན་བདེན་མཐའ་གསལ་རྒྱུ་དེ་བོད་མི་རིགས་རང་གི་ལག་ཏུ་ཡོད་པ་ང་ཚོས་རྟག་ཏུ་ངོས་ཟིན་དགོས།
དེ་བཞིན་ང་ཚོས་ལས་འགུལ་གང་ཞིག་སྤེལ་ཡང་སྐབས་དང་འཚམས་པ་དུས་ཐོག་སྤེལ་ཐུབ་རྒྱུ་དེ་ནི་སྐད་ཅིག་ཀྱང་བཟུར་ཐབས་མེད་པའི་ང་ཚོའི་ལས་འགན་གལ་ཆེ་ཤོས་དེ་ཆགས་ཡོད་པ་རེད། །
གསར་འགོད་པ་ལགས། དེང་སང་”བོད་གཞུང་”ཞེས་པའི་ཐ་སྙད་འདི་ཟེར་ཆོག་གི་མ་རེད་ཅེས་གླེང་ཕྱོགས་ཤིག་ཡོང་གིན་འདུག་པའི་སྐོར་ལ་ཁ་གསལ་གསུང་རྒྱུ་ཅང་ཨེ་ཡོད་ན།