ཁ་སང་བཀའ་ཟུར་རྒྱ་རི་བློ་གྲོས་རྒྱལ་མཚན་ལགས་ཀྱིས་གསར་འགོད་བསྒྲགས་ཤིག་སྤེལ་ཏེ། ཁོང་ཉིད་བཀའ་ཁྲིའི་འོས་མིར་བཞུགས་རྒྱུ་མིན་ཞེས་དང་ཁོང་གིས་ད་ལྟའི་བཀའ་ཁྲི་ཟམ་གདོང་རིན་པོ་ཆེ་བསྐྱར་དུ་བཀའ་ཁྲིར་བཞུགས་རྒྱུར་ཐུགས་རེ་གནང་གི་ཡོད་ཀྱང་། ད་ལྟའི་སྤྱི་འཐུས་གྲོས་ཚོགས་ལ་བཅའ་ཁྲིམས་བསྐྱར་བཅོས་ཀྱི་ལམ་ནས་ཁོང་འོས་གཞིར་ཞུགས་ཐུབ་པའི་ཆ་རྐྱེན་བསྐྲུན་རྒྱུའི་འདུན་པ་མེད་པ་གསལ་པོ་རེད་ཅེས་ཡོངས་བསྒྲགས་གནང་འདུག
ཁ་སང་ཕྱི་ཚེས་ ༣༠ ཉིན་བཀའ་ཟུར་རྒྱ་རི་བློ་གྲོས་རྒྱལ་མཚན་ལགས་ཀྱིས་རྒྱལ་སྤྱིའི་བོད་དོན་ལས་འགུལ་ཁང་གི་དྲ་རྒྱའི་སྟེང་གསར་འགོད་གསལ་བསྒྲགས་ཤིག་སྤེལ་ཏེ། ཁོང་ཉིད་བཀའ་ཁྲིའི་འོས་མིར་བཞུགས་རྒྱུ་མིན་པ་ཡོངས་བསྒྲགས་གནང་འདུག་ལ། ཁོང་གི་གསལ་བསྒྲགས་དེའི་ནང་གསལ་དོན། ད་མཚམས་འོས་བསྡུ་ལས་ཁང་ནས་བཀའ་བློན་ཁྲི་པའི་འོས་བསྡུའི་ལས་རིམ་གསལ་བསྒྲགས་དངོས་སུ་གནང་སྟབས། རང་ཉིད་བཀའ་བློན་ཁྲི་པའི་འོས་གཞིར་མི་ཞུགས་རྒྱུའི་ཐག་གཅོད་ཡོངས་གྲགས་བྱེད་རྒྱུ་ཡིན། ངའི་ལས་རོགས་དང་། བློ་ཉེ་ཚོ། དེ་བཞིན་བཀའ་བློན་ཁྲི་པའི་འོས་བསྡུའི་ལས་རིམ་ལ་དོ་སྣང་ཞིབ་ཚགས་བྱེད་མཁན་ཚོས་ཕྲན་རང་ཐོག་མ་ནས་འོས་གཞིར་ཞུགས་རྒྱུའི་བསམ་བློ་མེད་པ་དེ་ཤེས་ཀྱི་ཡོད། གུས་པར་བཀའ་ཁྲིའི་འོས་གཞིར་ཞུགས་རྒྱུའི་གཞེན་བསྐུལ་གནང་མཁན་ཚོར་ཐུགས་རྗེ་ཆེ་ཞུ་རྒྱུ་དང་། ཁྱད་པར་བོད་ནས་ཆེས་བཀུར་འོས་སྐྱ་སེར་མི་སྣའི་ཁོངས་ནས་བརྡ་ལན་དེ་རིགས་འབྱོར་བ་ནི་ཆེ་མཐོང་བླ་མེད་དུ་སྣང་། ང་རང་རྒྱུན་དུ་མང་གཙོའི་ལམ་ལུགས་གོང་འཕེལ་གཏོང་རྒྱུར་རྒྱབ་སྐྱོར་བྱེད་མཁན་ཞིག་ཡིན་ཞིང་། ལམ་ལུགས་འདི་ནི་བོད་མི་མང་གི་མངོན་འདོད་གསལ་སྟོན་བྱེད་རྒྱུའི་བརྒྱུད་ལམ་གལ་ཆེ་ཤོས་དང་། བོད་མིའི་ཆིག་བསྒྲིལ་གྱི་ནུས་པ་ཡུན་གནས་ཐུབ་པའི་ལམ་ལུགས་ཡང་དག་པ་ཞིག་ཡིན་པའི་ཡིད་ཆེས་བརྟན་པོ་ཡོད། མང་གཙོའི་ལམ་ལུགས་དང་སྒྲིག་འཛུགས་རྣམས་བོད་མི་རིགས་ཀྱི་ཁྲིམས་མཐུན་ཐོབ་ཐང་མངོན་འགྱུར་ཡོང་ཆེད་ཀྱི་ཐབས་ལམ་ཡིན་པ་ངོས་འཛིན་པའི་ཐོག་ནས་ང་ཚོས་མང་གཙོའི་ལྟ་གྲུབ་དང་ལག་ལེན་འཐུས་སྒོ་ཚང་དུ་བཏང་བར་སྒོ་ཀུན་ནས་འབད་བརྩོན་བསྐྱེད་དགོས། ཞེས་ཁོང་བཀའ་ཁྲིའི་འོས་མིར་བཞུགས་རྒྱུ་མིན་པའི་སྐོར་གསལ་བོར་གསུངས་འདུག་པ་མ་ཟད། ཁོང་གིས་རྒྱུན་ཏུ་མང་གཙོའི་ལམ་ལུགས་གོང་འཕེལ་གཏོང་རྒྱུར་རྒྱབ་སྐྱོར་གནང་གི་ཡོད་ཅིང་། ལམ་ལུགས་འདི་ཉིད་འཐུས་སྒོ་ཇེ་ཚང་དུ་གཏོང་རྒྱུར་སྒོ་ཀུན་ནས་འབད་བརྩོན་བྱ་དགོས་པའི་བསྐུལ་མ་ཡང་གནང་ཡོད།
ཁོང་གི་བསལ་བསྒྲགས་དེའི་ནང་མུ་མཐུད་དེ་གསལ་དོན། གོང་འཁོད་རྒྱུ་མཚན་གཞི་བཟུང་ངས་ཟམ་གདོང་རིན་པོ་ཆེ་མཆོག་ནས་ཡང་བསྐྱར་ལས་ཡུན་ཞིག་གནང་ཐུབ་རེ་བྱས་པ་ཡིན་ཞིང་། བོད་ཕྱི་ནང་གཉིས་སུ་འཁོད་པའི་བོད་རིགས་དོ་ཁུར་ཅན་དང་འབྱུང་འགྱུར་བོད་མིའི་འཐབ་རྩོད་ཀྱི་གནས་བབ་དང་ཁ་ཕྱོགས་ཇི་ཆགས་ལ་ཐུགས་འཚབ་གནང་མཁན་མང་པོས་ཀྱང་བསམ་ཚུལ་བཏོན་ཡོད། འོན་ཀྱང་ཟམ་གདོང་རིན་པོ་ཆེ་མཆོག་ཡང་བསྐྱར་གནང་བཞེད་མེད་པ་ཤེས་ཀྱི་ཡོད་ལ། དེ་མཚུངས་ད་ལྟའི་གྲོས་ཚོགས་ལ་བཅའ་ཁྲིམས་བསྐྱར་བཅོས་ཀྱི་ལམ་ནས་ཁོང་འོས་གཞིར་ཞུགས་ཐུབ་པའི་ཆ་རྐྱེན་བསྐྲུན་རྒྱུའི་འདུན་པ་མེད་པའང་གསལ་པོ་རེད། ༧གོང་ས་༧སྐྱབས་མགོན་ཆེན་པོས་བཀའ་བློན་ཁྲི་པ་མི་མང་གིས་ཐད་ཀར་འོས་འདེམས་བྱེད་རྒྱུའི་འགན་དབང་གསོལ་རས་བསྩལ་བའི་ལམ་ལུགས་གསར་གཏོད་གནང་བ་བརྒྱུད་ཟམ་གདོང་རིན་པོ་ཆེ་མཆོག་བཀའ་ཁྲིར་འོས་འདེམས་བྱེད་རྒྱུའི་གོ་སྐབས་བྱུང་བ་སྐལ་བ་བཟང་པོ་ཡིན། འདས་པའི་ལོ་བཅུའི་རིང་ཟམ་གདོང་རིན་པོ་ཆེའི་དབུ་ཁྲིད་ལམ་སྟོན་དང་ཐུགས་སྤོབས་མཁྱེན་ཡོན་གྱི་དབང་གིས་བཀའ་བློན་ཁྲི་པའི་ལས་གནས་ཀྱི་མཚན་མཐོང་དང་འགན་ཁུར་གཟི་བརྗིད་ཅན་དུ་གྱུར་ཡོད། ཅེས་ཁོང་གིས་ད་ལྟའི་བཀའ་བློན་ཁྲི་པ་ཟམ་གདོང་རིན་པོ་ཆེ་ཁོང་བསྐྱར་དུ་བཀའ་ཁྲིར་བཞུགས་རྒྱུར་ཐུགས་འདུན་གནང་ཡོད་ནའང་། བཀའ་བློན་ཁྲི་པ་ཁོང་ཉིད་བསྐྱར་དུ་བཞུགས་མིན་ཤེས་ཀྱི་མེད་ཐོག ད་ལྟའི་གྲོས་ཚོགས་ལ་བཅའ་ཁྲིམས་བསྐྱར་བཅོས་ཀྱི་ལམ་ནས་ཁོང་འོས་གཞིར་ཞུགས་ཐུབ་པའི་ཆ་རྐྱེན་བསྐྲུན་རྒྱུའི་འདུན་པ་མེད་པའང་གསལ་པོ་རེད་ཅེས་གསུངས་འདུག
ཡང་གསལ་བསྒྲགས་དེའི་གསལ་དོན། བོད་རྒྱ་ཆེའི་མང་ཚོགས་ཀྱིས་༧གོང་ས་མཆོག་གི་དགོངས་བཞེས་ལམ་སྟོན་ལ་མཐའ་གཅིག་ཏུ་ཡིད་ཆེས་ཞུ་གི་ཡོད་པ་རྩོད་མེད་རེད། དེ་ཡང་རྨོངས་ཞེན་ནམ་དད་པའི་རྗེས་འབྲང་མ་ཡིན་པར་བོད་མིའི་ཕུགས་རྒྱང་རིང་པོའི་ཁེ་ཕན་༧གོང་ས་མཆོག་གི་དགོངས་བཞེས་འདི་ཉིད་ཡིན་པ་ཤེས་པའི་སྒོ་ནས་རིགས་པའི་རྗེས་སུ་འབྲང་སྟེ་ཞུ་གིན་ཡོད། དེ་མཚུངས་བོད་མི་ཚོས་རང་གི་ཕ་མེས་ནས་བརྒྱུད་པའི་ནང་དོན་རིག་པའི་སྲོལ་རྒྱུན་ནི་བོད་མི་རིགས་ཀྱི་བླ་ན་མེད་པའི་ཁྱད་ནོར་དང་། བོད་མིའི་སྟོབས་ཤུགས་དང་ཆིག་བསྒྲིལ་གྱི་ནུས་པའི་འབྱུང་ཁུངས་ཡིན་པ་ངོ་འཕྲོད་པའི་སྒོ་ནས་དེར་དགའ་ཞེན་དང་སྤོབས་པ་བྱེད་ཀྱི་ཡོད། འདས་པའི་མི་ལོ་བཅུ་ཕྲག་ལྔ་ལྷག་རིང་ཆེས་ཡ་ང་ཞིང་བཟོད་དཀའ་བའི་ཛ་དྲག་གནས་བབ་འོག་ཏུའང་བོད་མིའི་སྙིང་སྟོབས་ཞུམ་མེད་ངང་གནས་ཐུབ་པ་མ་ཟད། རྒྱལ་སྤྱིའི་ཐོག་ཀྱང་བོད་མིའི་འཐབ་རྩོད་ཀྱིས་གོ་གནས་དམིགས་བསལ་ཅན་ཞིག་བཟུང་ཐུབ་པའང་བོད་མིའི་ཁྱད་ནོར་དེ་དག་ལ་བརྟེན་ནས་བྱུང་བ་ཡིན་པས། ང་ཚོས་འོས་འདེམས་བྱ་རྒྱུའི་མགོ་ཁྲིད་ཚོའང་གོང་གསལ་བོད་མི་རིགས་ཀྱི་ཐུན་མིན་ཁྱད་ཆོས་དེ་དག་ལ་རྒྱུས་མངའ་དང་། དགའ་མོས་བརྩི་བཀུར་ཡོད་མཁན་ཞིག་དགོས་པ་མ་ཟད། དེ་དག་མཚོན་ཐུབ་ངེས་ཤིག་དགོས་པར་སྣང་བ་བཅས་ཕྲན་བཀའ་ཟུར་རྒྱ་རི་བློ་གྲོས་རྒྱལ་མཚན་གྱིས་ཕྱི་ལོ་ ༢༠༡༠ ཟླ་ ༦ ཚེས་ ༣༠ ལ།། ཞེས་གསལ་ཡོད།
འདི་ལྟར་ཁོང་གིས་མཇུག་མཐའི་ཐུགས་རེ་ནི་ཕྱི་ལོ་ ༢༠༡༡ ལོར་ང་ཚོས་འོས་འདེམས་བྱ་རྒྱུའི་མགོ་ཁྲིད་ཚོའང་བོད་མི་རིགས་ཀྱི་ཐུན་མིན་ཁྱད་ཆོས་དེ་དག་ལ་རྒྱུས་མངའ་དང་། དགའ་མོས་བརྩི་བཀུར་ཡོད་མཁན་ཞིག་དགོས་པ་མ་ཟད། དེ་དག་མཚོན་ཐུབ་མཁན་ཞིག་དགོས་པ་ཞེས་དེ་ཡིན་འདུག
གསར་འགོད་པ། ཨ་རིག་འགྱུར་མེད།
ཡག་པོ་རེད། ཐུགས་རྗེ་ཆེ།
བོད་མི་མང་ལ་སྤྱི་སེམས་དང་ཡིད་ཆེད་ཡོད་མཁན་འདྲི་ཚོ་མཀའ་ཁྲི་ལ་མི་ཞུགས་གང་ཡིན་ནམ།
རྒྱ་རི་བློ་གྲོས་ཀྱིས་སློང་བའི་བསམ་ཚུལ།
བོད་མིའི་སེམས་གཏིང་དུ་ཡོད་པའི་འབྱུང་འགྱུར་གྱི་བཀའ་ཁྲི་ནི་ཁྱེད་ཉིད་གཅིག་ཏུ་ངེས། ཁྱེད་ནི་ཏཱ་ལའི་བླ་མའི་ཕྱག་འོག་ནས་རླབས་ཆེན་གྱི་མི་སྣ་ཞིག་ཏུ་གྱུར་ཏེ། གངས་ལྗོངས་ཀྱི་ལོ་རྒྱུས་ནང་གཟི་འོད་འབར་བའི་མཛད་རྗེས་ཀྱི་ལེའུ་དུ་མར་བསྐྲུན་ཡོད། དངོས་གནས་ཏཱ་ལའི་བླ་མས་ལོ་མང་རིང་ཁྱེད་ཉིད་དམིགས་བསལ་སྐུ་ཚབ་ཏུ་བཀོད་བཞག་བྱེད་པ་འདི་གཅིག་གིས་ཀྱང་ཁྱེད་ཀྱི་ཤེས་འཇོན་དང་ལྷག་བསམ་སཉིང་སྟོབས་བཟང་པོ་བཅས་གསལ་པོར་མཚོན་ཡོད། ཕྱི་ལོ་ ༡༩༩༧ ངས་བོད་དུ་ཕྱིན་སྐབས་རྒྱ་གཞུང་གིས་ཟམ་གདོང་བླ་མ་དང་ཁྱེད་ལ་འཛིན་པའི་སྲིད་ཇུས་གསལ་པོར་ཤེས་ཏེ། ངའི་ཡིད་ཆེས་དང་དགའ་ཞེན་སྔ་ལས་ལྷག་པར་གྱུར། འོན་ཀྱང་ཁྱེད་ཀྱིས་བཀའ་ཁྲི་གནང་འདོད་མེད་པའི་གསལ་བསྒྲགས་ཐུང་ཐུང་ཞིག་གིས་སྐྱེ་བོ་བརྒྱ་ཕྲག་མང་པོ་ལ་གླེང་གཞི་དང་བསམ་ཕྱོགས་གསར་པ་ཞིག་བསྐྲུན་པས། བདག་ཀྱང་བསམ་བཞིས་ཞིག་བྱེད་འདོད་སྐྱེས། དཔྱད་གཞི་དང་པོ་ ༧གོང་ས་མཆོག་གི་དམིགས་བསལ་སྐུ་ཚབ་དང་བཀའ་ཁྲིའི་ལས་འགན་གཉིས་གལ་གང་ཆེ་མིན་གྱི་སྐོར་ཡིན། དེ་ནི་ཅི་ཙམ་བསམ་གྱང་འདམ་མ་ཤེས་ཏེ་ལུས་འོན་ཀྱང་སྐུ་སྲོག་གི་ཉེས་ཁ་ལ་མ་གཟིགས་པ་བོད་རྒྱའི་ཞི་བའི་གྲོས་མོར་ཕེབས་པའི་བློ་སྟོབས་ལ་དབང་མེད་དུ་ཡིད་སྨོན་སྐྱེས། དཔྱད་གཞི་གཉིས་པ་གཞུང་གི་ལས་བྱེ་མིན་ན་བོད་དོན་སྒྲུབ་ཐུབ་མིན་གྱི་སྐོར་ཡིན། དེ་ལ་བསམ་སྐབས་པཎ་ཆེན་རིན་པོ་ཆེ་དང་ཆོས་རྗེ་དམ་པ་འཇིགས་མེད་ཕུན་ཚོགས་གཉིས་ཀྱི་མཛད་པ་དང་བཀའ་དྲིན་ཡིད་ལ་འཁོར་ནས་མིག་ཟུང་མཆི་མས་ཁེང་། དངོས་གནས་ང་ཚོའི་ཆོས་སྡེ་ཁག་གི་མཁན་པོ་དང་དགེ་བཤེས་མཚན་ཉིད་པ་མང་པོས་འདོད་ཆུང་ཆོག་ཤེས་ངང་ཆོས་དང་རིག་གཞུང་འཛིན་སྐྱོང་སྤེལ་གསུམ་གནང་བའི་མཛད་བཟང་ལམ་ནས། རང་ལ་ཤེས་འཇོན་དང་ལྷག་བསམ་ཡོད་ན་བོད་ལ་ཕན་པའི་བྱ་བ་ནི་ཇ་ཁང་ནང་དུའང་སྒྲུབ་ཆོག་པའི་ངེས་ཤེས་རྙེད། དཔྱད་གཞི་གསུམ་པ་དེ་མ་འོང་པའི་བཀའ་ཁྲི་སུས་འོས་པ་དེ་ཡིན། རང་གི་ཡིད་ལ་བབ་པའི་མི་ཁ་ཤས་མཐོང་ཡང་རང་ཉིད་ཀྱིས་གདམ་པ་ལས་མི་མང་གི་བསམ་ཕྱོགས་བསྒྱར་་བའི་གསལ་བསྒྲགས་དེ་མི་འདོད་པས་མཚན་མི་བརྗོད། ཕྱོགས་གཞན་ཞིག་ནས་བསམ་ན་རང་གི་བཀའ་ཁྲི་གདམ་པའི་མི་དེ་མི་མང་གིས་རྒྱབ་སྐྱོབ་ཐོབ་པའི་ཡིད་ཆེས་ཡོད་དགོས། དེ་ཚོགས་སྡེ་ཁག་དང་མི་སྒེར་པ་ཁ་ཤས་ཤིག་གི་མིང་བྲིས་ཏེ་གསལ་བསྒྲགས་དགོས་པའི་རྒྱུ་མཚན་ནི། རང་ཉིད་ཀྱིས་གདམ་པའི་མི་དེ་ལ་མི་མང་གིས་རྒྱབ་སྐྱོབ་ཐོབ་པའི་ཡིད་ཆེས་མེད་པ་དང་། མི་དེ་སྤྱི་ཚོགས་ནང་རླབས་ཆེན་གྱི་མཛད་རྗེས་དང་སྙན་གྲགས་མེད་པ་གསལ་པོར་མཚོན་པར་མཐོང་། བོད་རྒྱལ་བར་གྱུར་ཅིག།
འབྲུག་དཀར་ནས་རེ་བབཞིན།
ངས་ཁྱོད་འདྲ་བོ་ཞིག་བཀའ་ཁྲིའི་འོས་གཞི་ལ་མི་ཡོང་བའི་སྨོན་ལམ་འདེབས་བཞིན་ཡོད། དམིགས་བསལ་སྐུ་ཚབ་ནས་ཀྱང་དགོངས་པ་ཞུ་རོགས་ཞེས་རེ་སྐུལ་ཞུ། རང་དོན་ནི་བསྒྲུབས་ཚར་ཡོད་ངེས། སྤྱི་དོན་སྒྲུབ་རྒྱུའི་ནུས་པ་དང་དང་བ་གཉིས་ཀ་མེད་པར་གསལ་བས། ད་མི་འཇོན་ཐང་ཅན་སྒེར་སེམས་ཆུང་བ་ཞིག་ལ་སྤྲད་ན་ཡག་ས་རེད།
ཨེ་མ་དཀོན་མཆོག་མཁྱེན། ཁྱེད་ཀྱི་དེ་འདྲ་རྫུན་བཤད་ན་དཀོན་མཆོག་གི་གཟིགས་ཀྱི་ཡོད་པ་དང་ང་ཚོ་ནང་པ་ཞིག་ཡིན་དུས་ཚེ་ཕྱི་མ་མཁས་ལེན་གྱི་ཡོད་ཀྱི་རེད་བསམ་གྱི་འདུག།
བོད་ནང་གི་མི་དང་མཉམ་དུ་འབྲེལ་བ་ཤུགས་ཆེན་ཡོད་མདོག་བྱེད་ནས་ཆབ་སྲིད་ནང་བདེ་སྤྱོད་གཏོང་ན་རུང་ངམ།
ཉག་རོང་གཏམ་རྒན་མ་ལགས་ ཁྱེད་མ་ཡིན་ཡིན་མདོག་གིས་སྐད་ཆ་ཆོ་མེད་དེ་མ་བཤད་ན་བཟང་གི་རེད་མ་གཏོག ཁྱོད་རང་གི་གནས་ཚུལ་ག་འདྲ་ཡིན་པ་ངས་ཧ་གོ་སོང་། ཁྱེད་ད་རང་སྡོད་མ་ཚུགས་ན་ཁྱེད་ཀྱི་གནས་ཚུལ་རྣམས་དྲ་རྒྱ་ཐོག་ཕབས་ངེས་ཡིན་ད།
དགོད་བྲོ་ལ་དྲང་བདེན་མ་བྱུང་བའི་གནས་ཚུལ་ཞིག་གླེང་ན་ལོ་འདིའི་གྲོས་ཚོགས་འཚོགས་དུས་དང་པོའི་སྐབས་བཀའ་ཁྲི་བསྟུད་མར་ཐེངས་གཉིས་ལས་ལྷག་ཡོང་ཆོག་མིན་ཐད་གླེང་སློང་དང་གྲོས་ཆོད་འཇོག་དུས་གྲོས་ཆོད་འཁྱེར་ཡོང་མཁན་གྱིས་བཀའ་ཁྲི་དང་བཀའ་བློན་བསྟུན་མར་ཐེངས་གཉིས་ལྷག་ཡོང་ཆོག་མིན་ཞེས་ཟེར་དུས་བཀའ་ཁྲི་དང་བཀའ་བློན་ལ་དབྱེ་བ་མེད་པར་མཉམ་འཁྱེར་བྱས་ཡོད་པ་དང་། གྲོས་འཚོགས་ནང་དུའང་དེ་གཉིས་ལ་དབྱེ་བ་མེད་པར་གཉིས་ཆ་བསྟུད་མར་ཐེངས་གཉིས་ལས་ཡོང་མི་ཆོག་པར་ཐག་བཅད་ཡོད།
འོན་ཀྱང་། སྤྱི་འཐུས་ཁོ་རང་ཚོ་ལོ་ནའི་ལྕོག་ཚད་ཀྱིས་སྤྱི་འཐུས་ལ་ཡོང་ཆོག་པར་ངེས་འཛིན་བྱས་པ་ཡིན་གདའ། དེའི་ཐད་གླེང་སློང་ཙམ་ཡང་མི་བྱེད་པ་མ་ཟད་དོགས་པ་ཡོད་པའི་རྣམ་འགྱུར་ཙམ་ཡང་ཐོན་མེད། ལྷག་པར་ཏུ་མི་ཚེ་སྤྱི་འཐུས་བྱས་ཏེ་བསྐྱལ་ཡོད་མཁན་རྣམས་ཀྱིས་ཀྱང་རང་རང་གི་ཉམས་མྱོང་སྟེང་ནས་ལས་དོན་འཐུས་ཤོར་དུ་སོང་ཡོད་པའི་གནས་ཚུལ་གྱི་ཟུར་ཕྲ་མོ་ཙམ་ཡང་མི་གླེང་བར་བོད་མི་མང་གི་ཕྱི་རབས་རྣམས་གླེན་པ། རྨོངས་པ། ལྐུགས་པ་སོགས་སུ་ཐག་བཅད་འདུག་པའོ།
དོན་དངོས་སམ་རང་གི་བསམ་པའི་འཆར་སྒོ་ཙམ་གླེང་ན་འདི་ལྟ་སྟེ། གལ་སྲིད་བཀའ་བློན་དང་བཀའ་ཁྲི་བསྟུན་མར་ཐེངས་གཉིས་ལས་ཡོང་མི་ཆོག་ན་སྤྱི་འཐུས་བསྟུན་མར་ཐེངས་གཉིས་ལས་ལྷག་ཡོང་ཆོག་པའི་རྒྱུ་མཚན་ཅི་ཡང་མི་འདུག ལྷག་པར་ཏུ་བཀའ་བློན་བསྟུན་མར་ཐེངས་གཉིས་བྱས་ཟིན་པ་རྣམས་བཀའ་བློན་ཁྲི་བར་ལངས་མ་ཆོག་པའི་རྒྱུ་མཚན་ཅི་ཡིན་ནམ། ཁོ་བོས་ནི་འདི་ལ་རྒྱུ་མཚན་ཞིག་ཡོད་པར་མི་བསམ་སྟེ་ན་གཞོན་འཇོན་ཐང་ཡོད་པ་ཞིག་བསྟུན་མར་ཐེངས་གཉིས་ལ་བཀའ་བློན་གྱི་ཉམས་མྱོང་བསགས་ཏེ་ཚད་དང་ལྡན་པའི་འཛིན་སྐྱོང་བ་ཆགས་དུས་སྤྱི་བྱིངས་ཀྱི་ཐོབ་ཐང་བཀའ་ཁྲིའི་འོས་དམིགས་སུ་ཡོང་མི་ཆོག་པ་ཡིན་ན་དེ་ཡང་སྤྱི་དམངས་ཀྱི་ཐོབ་ཐང་འདྲ་མཉམ་མ་ཡོང་བའི་ཆ་ཞིག་རེད་འདུག་གོ་བསམ།
སྤྱི་འཐུས་འུར་ལ་དགའ་བ་རྣམས་ཀྱིས་འདི་ཉིད་ལ་རྣམ་པར་དཔྱད་དགོས་པ་དོན་ཆེན་པོ་འདུག་སྟེ། ལྷག་པར་ཏུ་བསྟུན་མར་ཐེངས་གསུམ་ནས་བཞི་ལ་སྤྱི་འཐུས་ཀྱི་རྐུབ་སྟེགས་སྟེང་ནས་བབ་མེད་པ་དག་གིས་དཔྱད་དགོས་པར་སྣང་ངོ་ཞེས་རང་གི་བསམ་ཚུལ་ཙམ་བརྗོད་པའོ།
རྒྱ་རི་བློ་གྲོས་ཀྱིས་དེ་ལྟར་བཤད་པ་ལ་ཧ་གང་ཡང་ལེ་གི་མི་འདུག ཁོ་རང་གིས་ད་བར་བཙན་བྱོལ་སྤྱི་ཚོགས་ཁྲོད་འོས་དམིགས་བཏོན་མཁན་ལ་སྒུག་ཀྱང་འོས་མཚམས་འདོན་མཁན་མ་རག་ནས་དེ་ལྟར་བཤད་དགོས་ཐུག་པ་རེད། མདོ་སྨད་ཀྱིས་མི་ ༡༣ བཏོན་པ་དེ་མང་དྲག་པ་རེད། ད་དུང་རྒྱ་རི་སྒྲོལ་མ་རྗེས་སུ་ཡོང་གི་རེད། མོ་རང་ལ་ཡང་འོས་དམིགས་བཏོན་མཁན་ཨེ་རྙེད་བྱས་ནས་མཐའ་མ་མངའ་རིས་སྤྱི་མཐུན་ཚོགས་པས་ཨ་ཅར་ཡ་ཡེ་ཤེས་ཕུན་ཚོགས་ཀྱིས་གཅིག་བཏོན་ཡོད་མདོག་ཁག་པོ་རེད། མོ་རང་གིས་གནས་ཚང་གཡར་གླ། དེ་མིན་དབུས་གཙང་གིས་ནི་བཏོན་མི་འདུག ད་རྒྱ་རི་ཚང་གིས་སྒྲོལ་མ་ལ་ཤུགས་རྒྱག་མདོག་ཁ་པོ་རེད། དེ་མིན་རི་པན་སོགས་ལ་སྤྱི་འཐུས་ས་མིག་ཅིག་རག་ན་པདྨ་རྒྱལ་པོ་ཡོང་རྒྱུ་རེད། ད་དུང་ཇུན་ངན་མང་པོ་ཡོད་རེད། བཤད་ན་ཁ་ན་སྤྱད་རེད།
ཐུགས་རྗེ་ཆེ། ངས་ཁྱོད་འདྲ་བོ་ཞིག་བཀའ་ཁྲིའི་འོས་གཞི་ལ་མི་ཡོང་བའི་སྨོན་ལམ་འདེབས་བཞིན་ཡོད། དམིགས་བསལ་སྐུ་ཚབ་ནས་ཀྱང་དགོངས་པ་ཞུ་རོགས་ཞེས་རེ་སྐུལ་ཞུ། རང་དོན་ནི་བསྒྲུབས་ཚར་ཡོད་ངེས། སྤྱི་དོན་སྒྲུབ་རྒྱུའི་ནུས་པ་དང་དང་བ་གཉིས་ཀ་མེད་པར་གསལ་བས། ད་མི་འཇོན་ཐང་ཅན་སྒེར་སེམས་ཆུང་བ་ཞིག་ལ་སྤྲད་ན་ཡག་ས་རེད།
ཁ་བྲོ་ཆབ་སྲིད་ཀྱི་བཟློས་གར་ཞིག་མིན་ན་ཐུགས་རྗེ་ཆེ། ཡིན་ནའང་སྔོན་མ་ཟམ་གདོང་རིན་པོ་ཆེས་ཀྱང་དེ་ལྟར་གསུང་མྱོང་ཆབ་སྲིད་པ་དེ་ཚོས་
བཟློས་གར་རེ་འཁྲབ་དུས་མི་མང་མགོ་འཐོམས་སུ་བཅུག་གི་ཡོད། ད་དུང་དམིགས་གསལ་སྐུ་ཚབ་ཀྱི་ཐུགས་འགན་དེ་ཡང་རེ་ཞིག་དགོངས་ཞུ་
གནང་ན་ཡག་པོ་འདུག
དོན་ཕན་ཅི་ཡང་མེད་པའི་མིང་སྟོང་དེ་འཁྱེར་ན་གང་སར་རྒྱུག་ན་རྒྱ་རིའི་ཚང་གི་ཚ་བོ་ཚ་མོ་རྣམས་ཀྱི་མདུན་ལམ་ལ་ཏོག་ཙམ་ཕན་པ་ལས་བོད་མི་རིགས་ཀྱི་ལས་དོན་ལ་ཕན་ཐོག་མེད་ཀི
ཐུགས་རྗེ་ཆེ། མུ་མཐུད་མགོ་སྐོར་དང་རྫུན་བཤད་ནས་བཞུགས་མི་འདོད་པ་ཡག་བྱུང། མ་གཞི་ཁྱེད་ལ་བོད་འབྲེལ་གྱི་མིང་ཆེན་པོ་ཞིག་དང་ལས་ཀ་དང་ལས་འགན་ཉུང་ཉུང་ཞིག་མཁོ་བ་ལོས་ཤེས། ཁྱེད་ལ་གཞུང་འབྲེལ་མིང་ཆེན་པོ་དེ་དང་སྒེར་གྱི་ཚོང་ལས་རྒྱ་ཆེན་པོ་དེ་གཉིས་གཅིག་ཕན་གཅིག་གྲོགས་རེད།
རྙིང་པས་གསར་ཚབ་མི་ཡོང་བར་མང་པོས་གླེངཡང་། སྐྱེ་བོ་རྙིང་པ་ནི་རྙིང་པར་མོས་ཤིང་རྙིང་པར་གུས་ཏེ་ཁོང་ཚོས་རྙིང་པ་ལས་གསར་པའི་ཁྱད་ཆོས་དང་རིན་ཐང་ལ་རྒྱུས་ལོན་མི་བྱེད་པས་སོ། ། དེ་ནི་རང་བཞིན་ཞིག་ལས་སྐྱེ་བོ་སྒེར་བ་རེ་ཟུང་ཀྱི་ཆོས་ཉིད་ཅིག་ནི་གཏན་ནས་མིན། མི་བུ་རྙིང་པ་ནི་ན་ལོས་བགྲེས་པར་གོ་ལ། བགྲེས་པས་བབ་ལྕི་བའི་ལས་ཀ་ཐེག་དཀའ་བ་ནི་འདུས་ཤིང་བྱས་པའི་མཚན་ཉིད་ཀྱིས་ལྷུག་པར་བསྐྲུན་པའི་རང་བཞིན་ཞིག་ལས་གཞན་ཅི། དེས་ན་ཐབས་ཟད་འུ་ཐུག ཤ་ཟད་རུས་ཐུག་ལས། བགྲེས་པོ་ཚོར་ལས་ཀ་སྐོས་མི་རུང་ངོ། །མི་རྗེ་ཟམ་གདོང་བླ་མ་ཡང་དེ་མཚུངས་ཀྱི་བགྲེས་པོར་སོང་བས་ད་ནི་ང་ཚོས་ཁོང་ལ་ལས་ཀ་བྱེད་དུ་འཇུག་ཐུབ་བམ། རྙིང་ཞེན་གྱིས་གསར་པ་སྒྲིབ་ན་དེའི་ངན་འབྲས་ནི་ད་གཟོད་རྙིང་དྲི་རབ་ཏུ་ཐུལ་བའི་ཕག་ཤ་ལྡོག་ལྡོག་ཅིག་ལས་གཞན་ཅི་ཡང་མེད། མ་གཞི་ང་ཚོ་སྲིན་པོའི་རིགས་ནི་ཤ་རྙིང་དང་མར་རྙིང་། བྲོ་རྙིིང་དང་འབྲས་རྙིང་། མི་རྒན་དང་རྟ་རྒན། ཁྱི་རྒན་དང་མཛོ་རྒན་ལ་རང་བཞིན་གྱིས་མོས་པ་ཆེ་བས་རྙིང་པ་རེ་རེ་ཡང་འདོར་བར་ལས་སླ་བོ་ཞིག་ལ་ཡོད། གྲལ་འགྲིགས་པའི་མི་རབས་གསར་པའི་རི་དཔུང་ན། ངེས་དོན་གྱིས་མཛངས་པའིབོད་པ་ཚང་གི་སྲས་པོ་དང་སྲས་མོ་འདི་ཚོར་ད་ནི་ངོ་མ་གངས་ཅན་སྐྱིད་གཤོང་གི་རྐུབ་སྟེགས་ཐོག་ན་ཧུར་གྱིས་འགྱིངས་པའི་མི་ཡུལ་ལས་འདས་པའི་ལྷའི་ཡུལ་གྱི་སྐུ་དྲག་ཚོའི་གདན་ཐོག་ཏུ་བཞུགས་རན་འདུག སྐུ་དྲག་ཁོང་ཚོའི་རྟོགས་པ་དང་མཁྱེན་དཔྱོད་ནི་འགྲོ་བ་མི་ལས་ཤིན་ཏུ་འདས་ཏེ་སྲིད་རྩེ་པ་དག་དང་མཉམ་པས་བསམ་གཏན་གྱི་ཏིང་འཛིན་ངོར་སྣང་བའི་རིགས་མཐུན་གྱི་ལྷ་ཚོགས་ལས། ཁོང་ཚོ་དང་ལེ་དབར་ཁྲི་སྟོང་གིས་རབ་ཏུ་ཆོད་པའི་ང་ཚོ་སྟེ། མི་ཡུལ་དུ་འཕྱན་པའི་ལས་ངན། དགོན་མེད་ཉམས་ཐག རྐང་གཉིས་པ་ཚོ་ནི་ཁོང་ཚོའི་དགོན་སྐྱོབ་མཛད་པའི་ཡུལ་དུ་མ་གྱུར་པས། ད་ནི་ང་ཚོར་དགོས་པའི་སྐུ་ངོ་ནི། རྟོགས་དཔྱོད་ལྷ་དང་མི་མཉམ་པའི་སྐྱེ་བོ་ཕལ་བ་ཞིག་ཏུ་འདུག་གོ །ལྷ་དང་མཉམ་པའི་སྐུ་ངོ་ཚོའི་གམ་དུ་ང་ཚོ་བཅར་བ་ཡིན་ན་ཁོང་ཚོར་ང་ཚོའི་གྲིབ་དང་མི་གཙང་བ་འགོས་ཉེན་ཡོད་ལ། ལྷ་ཆེན་སངས་པ་དཀར་པོ་བསམ་གཏན་གྱི་ཆང་གིས་རབ་ཏུ་མྱོས་པ་ལྟ་བུ་ཁོང་ཚོའི་འགྱིངས་ཉམས་དེས་ཀྱང་ང་ཚོ་སྟེ་ཐ་མར་པ་ཚོ་ནི་ཧ་ཅང་སུན་བཙིར་བྱ་ངེས། དེས་ན་ང་ཚོ་ནི་འགྲོ་བ་མི་ཡིན་པའི་ཆ་ནས། རང་ཉིད་ལྷ་རུ་སྒོམ་པའི་སྐུ་ངོ་འདི་ཚོ། ཉམས་ཐག་བདུད་དུ་ལྟ་བའི་སྐུ་ངོ་འདི་ཚོ། སྤྱི་དོན་ཡ་བར་འདོར་བའི་སྐུ་ངོ་འདི་ཚོ། སྤྱི་རྒྱུ་སྒེར་བདག་བྱེད་པའི་སྐུ་ངོ་འདི་ཚོ། རང་དོན་ཁོག་ཏུ་བཅུག་པའི་སྐུ་ངོ་འདི་ཚོ། གཞན་རྒྱུ་ལྐོག་ནས་བཟའ་བའི་སྐུ་ངོ་འདི་ཚོ། ཤེས་འཇོན་ལྷག་བསམ་མེད་པའི་སྐུ་ངོ་འདི་ཚོ། བཤད་ཚད་དོན་དུ་མི་ཁྱོལ་སྐུ་ངོ་འདི་ཚོ། ཆོལ་ཁ་འཐེན་ཁྱེར་ཆེ་བའི་སྐུ་ངོ་འདི་ཚོ། ཆོས་ལུགས་ཕྱོགས་རིས་མང་བའི་སྐུ་ངོ་འདི་ཚོ། འདིའི་རིགས་ཀྱི་སྐུ་ངོ་ཚོ་ནི་ངས་བཤད་པའི་ལྷ་ནི་རྟོགས་དཔྱོད་ཅན་གྱི་སྐུ་ངོ་རེད་འདུག་པས། རང་ཉིད་མི་རུ་ཤེས་པའི་སྐུ་ངོ། ཉམས་ཐག་དོན་གྱིས་སྐྱོང་བའི་སྐུ་ངོ། སྤྱི་སེམས་ཁོག་ན་ཡོད་པའི་སྐུ་ངོ། ཤེས་འཇོན་ལྷག་བསམ་ཅན་གྱི་སྐུ་ངོ། ནང་ཁུལ་ཉེ་རིང་མེད་པའི་སྐུ་ངོ། ཕུག་བསམ་བརྟན་པོ་ཡོད་པའི་སྐུ་ངོ། མདོར་ན་འགྲོ་བ་མི་ཡིན་པའི་སྐུ་ངོ་ཚོས་ཁོང་ཚོའི་རུས་རྐང་བཅོག་རན་འདུག་གོ །ཡོང་རྒྱུའི་བཀའ་ཁྲི་ཡི་སྐུ་ངོར་འགྲོ་བ་མི་ཞིག་འདེབས་ཐུབ་པའི་རེ་བ་ཆེ། མཚམས་འདིར་གསལ་བཤད་དགོས་ལ་ཞིག་ལ། ང་རང་གསར་པར་མོས་ཀྱང་རྙིང་པ་ཡིན་ཚད་མདོར་ཀྱང་བྱེད་དགོས་པའི་ལྟ་ཚུལ་ནི་ང་ལ་གཏན་ནས་མེད།
༼ང་ཚོས་འོས་འདེམས་བྱ་རྒྱུའི་མགོ་ཁྲིད་ཚོའང་གོང་གསལ་བོད་མི་རིགས་ཀྱི་ཐུན་མིན་ཁྱད་ཆོས་དེ་དག་ལ་རྒྱུས་མངའ་དང་། དགའ་མོས་བརྩི་བཀུར་ཡོད་མཁན་ཞིག་དགོས་པ་མ་ཟད། དེ་དག་མཚོན་ཐུབ་ངེས་ཤིག་དགོས་པར་སྣང་བ་བཅས་ཕྲན་བཀའ་ཟུར་རྒྱ་རི་བློ་གྲོས་རྒྱལ་མཚན་གྱིས་ཕྱི་ལོ་ ༢༠༡༠ ཟླ་ ༦ ཚེས་ ༣༠ ལ།། ཞེས་གསལ་ཡོད།༽
གསུངས་འདི་རིན་ཐང་ལྡན་པ་ཞིག་རེད
ཚང་མའི་ཐུགས་བསམ་བཞེས་རོགས
ད་རེས་ཡིན་ན། རིན་པོ་ཆེ་ནོར་སོང་བར་འདོད། སྔར་ཟམ་གདོང་རིན་པོ་ཆེ་གྲོས་ཚོགས་ཚོགས་གཙོ་ནས་ངལ་གསོ་རྒྱག་སྐབས། བཙན་བྱོལ་མི་མང་ལ་དགོངས་དག་ཅིག་ཞུ་མྱོང་ཡོད་ཅིང་། ད་རེས་དམིགས་བསལ་སྐུ་ཚབ་ལགས་ཀྱིས་ཀྱང་བཀའ་ཁྲིའི་འོས་མིར་ཞུགས་ཀྱི་མིན་ཞེས་པ་གཉིས་ལ་ཕྱི་ནང་གཉིས་ཀྱི་ཆ་ནས་འདྲ་མཚུངས་རེད་ལ། དམིགས་བྱའང་གཅིག་པ་རེད། ཡིན་ནའི། བོད་ནང་དུ་གྲོས་མོལ་ལེགས་འགྲུབ་མ་བྱུང་བར་དོགས་པ་དང་ཡིད་མ་རངས་པ་གནང་བཞིན་པའི་སྐབས་འདིར་དམིགས་བསལ་རྒྱ་རི་དང་བཀའ་ཁྲི་ཟམ་གདོང་ལ་དེ་ལྟར་རེ་བ་རྒྱག་མི་སྲིད་པ་ཞིག་རེད། དཔེར་མཚོན་ཙམ་བཀོད་ན། བོད་རྒྱའི་འབྲེལ་མོལ་ཐེངས་བཞི་པ་བར་དུ༼རང་བཙན༽དང་༼རང་སྐྱོང༽གི་དབྱེ་བ་རྒྱ་མིར་གོ་བརྡ་འཕྲོད་མེད་པ་རྒྱ་ཡིག་གསར་ལམ་ཁག་ཏུ་ཡོངས་གྲགས་ཡིན་པ་དང་། ཡང་རྩོམ་ཡིག་ལ་ལར་བསྟན་དོན་ལྟར་ན། འཐབ་ཕྱོགས་གཅིག་གྱུར་ཁང་གིས་གོ་སྒྲིག་གནང་བའི་བོད་མི་སྐད་བསྒྱུར་བ་ཁག་ཅིག་དམིགས་བསལ་སྐུ་ཚབ་ལགས་ཀྱིས་དགོས་ཡ་མི་འདུག་ལབ་པར་ལྟ་ཚུལ་གཅིག་བྱུང་འདུག་ཅིང་། དེ་ནི་སྐུ་ཚབ་ཚོགས་པས་བོད་ཀྱི་གནས་སྟངས་ངོ་མ་མཁྱེན་གྱི་མེད་པའི་གཡོལ་ཐབས་ལ་ངོས་འཛིན་བྱས་འདུག་པས། གསལ་བསྒྲགས་འདིའི་ཕུགས་རེ་ག་རེ་ཡིན་མིན་བརྟག་བྱར་ལྷག་མེད་དམ།
ཨ་ཁ་བཀའ་ཁྲི་དང་དམིགས་བསལ་སྐུ་ཚབ་གཉིས་ཀྱི་གོ་ས་བརྗེ་རྒྱུའི་ངའི་རྨི་ལམ་དེ་གྲུབ་མ་སོང་།
བོད་ནང་དུའང་ཟམ་གདོང་རིན་པོ་ཆེ་དང་རྒྱ་རི་བློ་གྲོས་རྒྱལ་མཚན་ཚང་གཉིས་ཀྱི་མཚན་སྙན་ཁྱབ་ཡོད། རྗེས་སུ་ཡི་རང་དང་རེ་བ་ཡང་བྱེད་ཀྱིན་ཡོད། གཞིས་ལུས་མི་དམངས་གལ་ཆེ་ན་ཁོང་ཚོའི་བསམ་ཚུལ་ངོ་མའང་བསྡུ་ལེན་རེ་བྱེད་རྒྱུ་གལ་ཆེན་དོན་ཆེན་རེད། ཁོང་རྣམ་པ་བཀའ་ཁྲིར་མི་བཞུགས་ཟེར་ཡང་རྒྱ་ཆེའི་མི་དམངས་ཀྱིས་བདམས་ཚར་ན་མི་བཞུགས་གསུང་ཤེས་ཀྱི་མ་རེད། དེ་དམངས་གཙོའི་ཐག་གཅོད་ཅིག་དང་མི་དམངས་ཀྱི་རེ་བ་ཞིག་ཡིན་པས་ཐུགས་འགན་ངེས་པར་བཞེས་དགོས་རེད།
བཀའ་ཁྲི་ཐེངས་གསུམ་ལ་བཞུགས་ཆོག་པའི་ཁྲིམས་སྲོལ་ཞིག་བཅས་ན་ལེགས། དེ་གང་ཟག་བྱེ་བྲག་པའི་ཆེད་དུ་མ་རེད། མི་དམངས་ཀྱི་དགོས་མཁོའི་ཆེད་རེད། སྐུ་ཞབས་བློ་བཟང་སེང་གེ་ལྟ་བུར་མཚོན་ན་ཡང་སྦྱོང་བརྡར་དང་ནུས་པ་འདོན་ཁོམ་གཉིས་ཀ་ཡོད་པ་རེད། མ་འོངས་པའི་བཀའ་ཁྲི་སུ་ཡིན་ཡང་ཡག་པོ་མེད་ན་སྐབས་རེ་རེ་ནས་བརྗེ་ཆོག་གི་རེད་ལ། དུས་ཡུན་མ་ལོན་གོང་ནས་ཕྱིར་འཐེན་ཡང་ཆོག་པ་འདི་དམངས་གཙོའི་ཁྱད་ཆོས་རེད།