མགོ་ལོག་བོད་རིགས་རང་སྐྱོང་ཁུལ་རྟ་བོ་གྲོང་བརྡལ་དུ་ཆུ་ལོག་རྒྱུགས་ཏེ་ས་གནས་མི་མང་གི་ཁང་པར་གནོད་སྐྱོན་ཚབས་ཆེན་བཟོས་ཡོད་འདུག
ཞིན་ཧྭ་གསར་ཁང་གིས་གནས་ཚུལ་སྤེལ་བ་ལྟར་ན། ཕྱི་ཚེས་ ༡ ཉིན་གྱི་ཕྱི་དྲོ་མགོ་ལོག་བོད་རིགས་རང་སྐྱོང་ཁུལ་རྨ་ཆེན་རྫོང་རྟ་བོ་གྲོང་བརྡལ་དུ་དྲག་ཆར་བབས་ཏེ། མི་སྲོག་ཤོར་བའི་གནས་ཚུལ་མེད་ནའང་། དེར་ཡོད་མི་དམངས་ཀྱི་ཁང་པ་མང་པོ་ཆུས་བསྣུབས་ཡོད་པར་མ་ཟད། གྲོང་བརྡལ་གྱི་ཅ་དངོས་དང་ཁྱིམ་གྱི་ཅ་དངོས་སོགས་ཆུས་ཁུར་ཡོད་པའི་གནས་ཚུལ་འདུག་ལ། གཞུང་ལམ་ཡོངས་ཆུས་ཁེངས་ཏེ་འགྲིམ་འགྲུལ་ཡོངས་སུ་འགག་ཡོད་པ་རེད།
འདིའི་ཐད་འབྲེལ་ཡོད་མི་སྣ་ཞིག་གིས་བརྗོད་དོན་ལྟར་ན། ཐེངས་འདིའི་ཆུ་ལོག་གི་དོན་རྐྱེན་འདིའི་ནང་ཚུད་པའི་ཁང་པ་མང་ཆེ་བ་མགོ་ལོག་གི་འབྲོག་ཁུལ་ནས་རྟ་བོ་གྲོང་བརྡལ་དུ་གནས་སྤོར་བྱེད་མཁན་གྱི་མི་སེར་དཀྱུས་མིའི་ཁང་པ་ཡིན་ཚུལ་བརྗོད་ཡོད་ལ། ཁང་པ་མང་ཆེ་བ་ཆུས་བསྣུབས་ཡོད་པར་མ་ཟད། ལྷག་བསྡད་པ་དག་གི་གྱང་དང་རྩིག་པ་ཡོངས་ལ་སེར་ཁ་གས་ཡོད་པ་དང་། ད་ཆར་དམག་མི་དང་ལས་བྱེད་ཀྱིས་རོགས་སྐྱོར་བྱེད་ཀྱིན་ཡོད་ཀྱང་། ཉིན་ཤས་ཀྱི་རྗེས་སུ་ཡང་བསྐྱར་ཆུ་ལོག་རྒྱུགས་རྒྱུ་ཡིན་པའི་སྐོར་ས་གནས་གནམ་གཤིས་བརྟག་དཔྱད་ལས་ཁུངས་ཀྱིས་སྔོན་བརྡ་བཏང་ཡོད་འདུག
མགོ་ལོག་བོད་རིགས་རང་སྐྱོལ་ཁུལ་ནི་མཚོ་སྔོན་ཞིང་ཆེན་གྱི་ཤར་ལྷོ་གཉིས་ཀྱི་མཚམས་སུ་གནས་ཤིང་། རྒྱ་ཁྱོན་ལ་སྤྱི་ལེ་གྲུ་བཞི་མ་ཁྲི་ ༧༌༦ དང་ས་བབས་ཀྱི་མཐོ་ཚད་རྨིས་ ༤༢༠༠ ཡོད་པའི་གཙང་གསུམ་འབྱུང་ཡུལ་གྱི་ལྟེ་གནས་ཤིག་ཆགས་ཡོད་ལ། ཁུལ་དེར་བོད་ཀྱི་རྫོང་ཁག་རྨ་ཆེན་དང་རྨ་སྟོད། དགའ་བདེ། དར་ལག གཅིག་སྒྲིལ། པད་མ་བཅས་རྫོང་དྲུག་དང་རྟ་བོ་གྲོང་བརྡལ་བཅས་ཀྱིས་གྲུབ་ཡོད་ལ། ཐེངས་འདིར་ཆུ་ལོག་རྒྱུགས་སའི་རྟ་བོ་གྲོང་བརྡལ་དེར་བོད་རིགས་གཙོས་པའི་མི་གྲངས་སུམ་ཁྲི་ལྷག་འདུས་སྡོད་བྱས་ཡོད་འདུག
གསར་འགོད་པ། དོན་གོ།
ངས་གོ་ཐོས་ལྟར་ན། ཆུ་ཁོད་བྱུང་བ་བདེན་པ་རེད། ཁྱིམ་ཚང་གཉིས་ཀྱི་ཁང་བ་ཞིག་སོང་བ་དང་། རེ་འགའ་ཁང་པ་ལས་སྤོར་དགོས་བྱུང་འདུག སྤྱིར་བཏང་ཆུ་ཁོད་བྱུང་ས་རྟ་བོ་གྲོང་བརྡལ་གཅིག་བུ་མིན་པར་དེའི་ཉེ་འཁོར་གྱི་ཡུལ་ཚོ་དང་། སྡེ་བ་ཕལ་ཆེ་བར་བྱུང་འདུག དཔེར་ན། རྟ་བོ་དམེ་ཚང་དང་། ཙང་འགུ་ཆུ་བ་སོགས་སུ་བྱུང་འདུག འོན་ཀྱང་མི་སྲོག་ཤོར་བའི་གནས་ཚུལ་དང་རྒྱུ་དངོས་ཀྱི་གྱོང་གུད་ཚབས་ཆེན་བྱུང་རབས་ཐོས་རྒྱུ་མི་འདུག གཅིག་བྱས་ན་ཟོག་ལུག་རེ་གཉིས་ཆུས་ཁྱེར་ཡོད་སྲིད།
ལས་འབྲས་སྲུང་མཁན་ཡང་བོད་པ་རེད།
ལས་འབྲས་འཁཽར་ས་ཡང་བོད་པ་རེད།
དཀོན་མཆོག་ལ་ཡེ་ཤེས་སྤྱན་མེད་པ་ཡིན་ནམ།
བོད་པ་ཚང་ལ་ལྷ་འདྲེ་གདོན་དགེགས་ཁྲོས་ཡིན།
ཨ་ཁ་་་་་་་་་་་་
འདི་འདྲ་་་་་་་་་
ས་གནས་ཀྱི་མི་དམངས་ཚོར་སྡུག་སེམས་མཉམ་སྐྱེད་ཡིན།
སླར་ཡང་ཆུ་ལོག་ལྟ་ལོག་གྱེན་ལོག་གསུམ་མི་འབྱུང་བའི་སྨོན་འདུན་ཞུ།
ཨ་ཁ་ཁ། ད་གནམ་རྒན་མས་ཐུབ་ཚོད་བྱས་པ་མང་དྲགས་སོང་། ནང་བཅུམ་དམར་པོའི་ཁྲིམས་ཀྱིས་བཅུམ། ཕྱི་བཅུམ་འབྱུང་བཞིའི་གནོད་པས་བཅུམ། མགོ་ནང་བོད་པ་ཚང་གི་ལས་འདི་ཇི་འདྲའི་སྙིང་རྗེ་བ་ལ་ཨང་།