ང་གད་སྙིགས་ལས་སྒུམ་མཁན་གཏོང་ལེན་རེད།

ཟླ་ ༧ ཕྱི་ཚེས་ ༢ རེས་གཟའ་པ་སངས།

རླབས་ཆེ་བའི་བྱ་བཞག་ནི་མི་ཚང་མས་བསྒྲུབ་འདོད་པ་ཞིག་ཡིན་རུང་། བསྒྲུབ་སླ་བ་ཞིག་མིན། མ་མཐར་ཡང་དཀའ་སྡུག་ཇི་འདྲ་ཆེ་རུང་དེ་ལ་དུས་ནམ་ཡང་མགོ་བོ་མི་སྒུར་བ་དང་བཟོད་བསྲན་ཐུབ་པའི་སྙིང་སྟོབས་བརྟན་པོ་ཞིག་དགོས། དེ་ལྟར་མིན་ན་མི་ཚང་མས་རླབས་ཆེ་ལ་ལོ་རྒྱུས་ཀྱི་དོན་སྙིང་ལྡན་པའི་བྱ་བཞག་སྐྲུན་མི་ཐུབ་པའི་རྒྱུ་མཚན་ཅི།

༧གོང་ས་མཆོག་གི་སྐུའི་འཁྲུངས་སྐར་ལ་སླེབས་རྒྱུར་ཉིན་བཞི་ལས་མེད་པའི་སྐབས་འདིར། གཏོང་ལེན་ཚོགས་པས་ཐུགས་རྗེ་ཆེ་ཞུའི་ཉིན་མོ་ཐེངས་ལྔ་པ་དེ་སྲུང་གཙི་བྱས། ཞོགས་པའི་ཆུ་ཚོད་ ༡༡ ཙམ་ལ་ཀ་ཅཱ་རིའི་ Zila Prishad ཚོགས་ཁང་དུ་གཏོང་ལེན་ཚོགས་པའི་གོ་སྒྲིག་འོག ཐུགས་རྗེ་ཆེ་ཞུའི་ཉིན་མོའི་མཛད་སྒོ་བསྡུས་པ་དང་། མཛད་སྒོའི་ཐོག་གཏོང་ལེན་ཚོགས་པས་བདག་སྐྱོང་གནང་བཞིན་པའི་རྒྱ་གར་ཡུལ་མིའི་བྱིས་པ་དག་དང་། ཁོང་ཚོའི་ཕ་མ་ཉེ་འབྲེལ། གཏོང་ལེན་ཚོགས་པའི་དགེ་རྒན་ལས་བྱེད་དང་སྦྱིན་བདག་སོགས་བསྡོམས་པས་མི་ ༣༠༠ ལྷག་འདུ་འཛོམས་བྱུང་།

དེ་རིང་གི་མཛད་སྒོ་ནི་དམིགས་བསལ་གྱི་སྐུ་མགྲོན་མེད་པ་དང་། མཁས་དབང་དང་གོ་ཐོབ་ཅན་གྱི་གསུང་བཤད་ལྟ་བུའི་རིགས་གང་ཡང་མེད་པར་སྤྱིར་བཏང་བའི་མཛད་སྒོ་ཞིག་ཡིན་ནའང་། མཛད་སྒོའི་ཐོག་ཞུགས་པའི་མི་རྣམས་དགའ་སྤྲོས་ཁེངས་པ་དང་འཛུམ་མདངས་ཀྱིས་བརྒྱན་འདུག དེ་ནི་གཏོང་ལེན་ཚོགས་པས་བདག་སྐྱོང་གནང་བཞིན་པའི་ལོ་ལྔ་དྲུག་གོང་གི་ཡུལ་མིའི་བྱིས་པ་དབུང་ཕོངས་དང་ཉམ་ཐག་རྣམས། དེ་རིང་གྱོན་གོས་གང་ལེགས་སྤྲས་ཏེ་གར་སྟེགས་སྟེང་བུད་ནས། རང་ཉིད་ལ་གཏོང་ལེན་ཚོགས་པས་ད་བར་བདག་སྐྱོང་གནང་བར་སྤྲོ་སེམས་འཁོལ་བའི་ངང་ཐུགས་རྗེ་ཆེ་ཞུ་བ་དང་། ཤིས་ཚིག་སྣ་ཚོགས་འབུལ་བ། དགའ་སྤྲོ་དང་ཐུགས་རྗེ་ཆེ་མཚོན་པའི་གླུ་གཞས་གཟིགས་འབུལ་དང་ཞབས་བྲོ་རྒྱག་པ་སོགས་ཡིད་དུ་འོང་ལ་མཛེས་སྡུག་ལྡན་པའི་བྱེད་སྒོ་སྣ་ཚོགས་སྤེལ་བས་རེད།

ལྷག་པར་དུ་མཛད་སྒོའི་སྟེང་ཞུགས་པའི་མི་མང་རྣམས་ཀྱིས་ད་ལྟ་འཛིན་རིམ་དགུ་བར་སླེབས་པའི་སློབ་མ་བྷི་ཁ་ཀུའུ་མར་གྱིས། རང་གི་འདས་ཟིན་པའི་ལོ་རྒྱུས་རྒྱབ་ལྗོངས་ཐུང་ངུ་ཞིག་བརྙན་འཕྲིན་བརྒྱུད་མི་མང་ལ་སྤྱན་འབུལ་བྱེད་སྐབས། མི་མང་བོ་སེམས་སྐྱོ་ནས་མིག་ཆུ་གཏོང་བ་དང་། ཡང་ཁོ་རང་ཉིད་ཀྱི་ལས་དབང་དང་འདྲ་བའི་དབུལ་ཕོངས་ཀྱི་འཚོ་བ་རོལ་མྱོང་བའི་བྱིས་པ་ཚོས། ཁོའི་སྐབས་རེར་དགོད་བྲོ་བའི་འདས་ཟིན་པའི་བྱིས་དུས་ཀྱི་བྱ་སྤྱོད་སྣ་ཚོགས་ལ་ཕྱིར་མིག་ལྟ་གིན་ལྟ་གིན། གད་མོ་བགད།

མི་རྣམས་ཀྱིས་སྐྱོ་བའི་མིག་ཆུ་གཏོང་དོན་ནི་བྷི་ཁ་ཀུའུ་མར་གྱི་འདས་ཟིན་པའི་ལོ་རྒྱུས་ཀློང་དུ། ཅང་མེད་དབུལ་ཕོངས་ཀྱི་འཚོ་བ་རོལ་ཏེ་འདམ་རྫབ་དང་སྲང་ལམ་ཉུལ་ཏེ་གད་སྙིགས་སྒུམ་པ་དང་། ལྟོ་གོས་སློང་བ། ཟ་མ་ངན་ངོན་ལ་རོལ་བ་དང་གྱོན་གོས་ཧྲལ་ཧྲུལ་གྱོན་པ་སོགས་ཀྱི་སྣང་ཚུལ་རྣམས་མཐོང་བས་ཡིན་ལ། ཁོང་དང་འདྲ་བའི་གྲོང་གསེབ་ཧྲིལ་བོ་ཞིག་གི་ངན་ངོན་གྱི་འཚོ་བ་དང་དབུལ་ཕོངས། ཉམ་ཐག་པའི་གནས་སྟངས་སོགས་བརྙན་འཕྲིན་བརྒྱུད་ནས་མཐོང་སྟབས་ཡིན།

གཏོང་ལེན་ཚོགས་པའི་འགན་འཛིན་འཇམ་དབྱངས་ལགས་ཀྱིས་ཉིན་འདིའི་མཛད་སྒོའི་སྐོར་འདི་གའི་གསར་འགོད་པར་འགྲེལ་དོན། དེ་རིང་གི་ཉིན་འདི་ནི་ད་ལྟའི་བར་ང་ཚོས་བདག་སྐྱོང་བྱེད་བཞིན་པའི་བྱིས་པ་འདི་ཚོར་དངོས་ཤུགས་བརྒྱུད་གསུམ་ནས་རྒྱབ་སྐྱོར་གནང་མཁན་ཚོར་ཐུགས་རྗེ་ཆེ་ཞུའི་ཉིན་མོ་ཡིན་ལ། ༧གོང་ས་མཆོག་གི་སྐུའི་འཁྲུངས་སྐར་ཉིན་མོར་ཁོང་མུ་མཐུད་དེ་སྐུ་ཚེ་ཡུན་རིང་བསྟན་པ་དང་། མཛད་འཕྲིན་རྒྱས་ཆེད་དུ་ཡིན། ཞེས་དང་ཁོང་གིས་ད་བར་བྱིས་པ་བདག་མེད་འདི་ཚོར་བདག་སྐྱོང་གནང་དོན། ང་ཚོ་བཙན་བྱོལ་དུ་འབྱོར་ནས་མི་ལོ་ ༥༠ ལྷག་འགོར་རིང་། རྒྱ་གར་གཞུང་མང་གཉིས་ཀྱིས་ང་ཚོར་ཕྱོགས་གང་ཐད་ནས་མཐུན་འགྱུར་རོགས་རམ་གནང་བར། ཐུགས་རྗེ་ལེགས་འབུལ་མཚོན་ཆེད་ཙམ་ཡིན་ཞེས་གསུངས།

ད་ལྟ་འཛིན་རིམ་དགུ་བར་སླེབས་པའི་སློབ་ཕྲུག་བུ་མོ་ ནི་ཤ་ས་ཡན་ གྱིས་གསར་འགོད་པར་བརྗོད་དོན། སྔོན་ཆད་ང་ནི་དབུལ་ཕོངས་ཀྱི་ཁྱིམ་ཚང་ཞིག་ཏུ་སྐྱེས་པ་ཡིན་ལ། ནམ་རྒྱུན་ལྟོ་བསླངས་ནས་འཚོ་བ་སྐྱེལ་གྱིན་ཡོད། སྐབས་དེ་དུས་བོད་མིའི་དུས་སྟོན་སོགས་སུ་ཐེག་ཆེན་ཆོས་གླིང་གཙུག་ལག་ཁང་དང་མེག་གྷན་སོགས་སུ་ཕྱིན་ནས་ལྟོ་སློང་གིན་ཡོད། དེའི་རྗེས་ང་གཏོང་ལེན་ཚོགས་པས་བདག་སྐྱོང་གནང་སྟབས། ང་ལ་དེ་རིང་གི་ཉིན་མོ་འདི་བྱུང་བ་དང་། གཏོང་ལེན་ཚོགས་པ་ནི་ང་དང་ངའི་ཕ་མ། ང་ཚོའི་སྤྱི་ཚོགས་ལ་ཕན་ཐོགས་ཆེན་པོ་ཡིན། ཞེས་དང་། ཁོ་མོའི་མི་ཚེའི་དམིགས་འདུན་སྐོར་དྲིས་པར། ང་གཞུག་ཕྱོགས་སྨན་པ་བྱ་རྒྱུ་ཡིན། ད་ལྟ་ང་རང་ཉིད་ཚད་ལྡན་གྱི་སྨན་པ་ཞིག་བྱ་ཐུབ་རྒྱུའི་གདེང་ཚོད་ཡོད་པར་མ་ཟད། ངས་གཞུག་ཕྱོགས་དངོས་སུ་སྨན་པ་བྱས་ཏེ་སྤྱི་ཚོགས་ལ་མིག་དཔེ་སྟོན་འདོད་ཡོད་ཅེས་བརྗོད།

ཡང་འཛིན་རིམ་དགུ་པ་ཡིན་པའི་བུ་བྷི་པཁ་ཀུའུ་མར་གྱིས་བརྗོད་དོན། གཏོང་ལེན་ཚོགས་པས་ང་གད་སྙིགས་ལས་བསྒུམས་ཏེ་ལྷ་ཡུལ་ལྟ་བུར་བསྐྱལ་སོང་། ང་ནི་སྔོན་ཆད་ལྟོ་གོས་བསླངས་ནས་འཚོ་བ་སྐྱེལ་མཁན་གྱི་དབུལ་ཕོངས་ཁྱིམ་ཚང་གི་བུ་ཡིན་མོད། ང་ལ་བདག་སྐྱོང་དང་སློབ་སྦྱོང་སྤྲད་སོང་། ཞེས་དང་ཁོས་རང་གི་མི་ཚེའི་དམིགས་འདུན་སྐོར་བརྗོད་དོན། ངའི་ཕ་མར་ཆ་བཞག་ནའང་མི་གཞན་པ་ལྟར་རླངས་འཁོར་སོགས་ལ་བསྡད་དེ་འགྲོ་འདོད་ཡོད་པ་རེད། དེར་བརྟེན་ངས་སློབ་སྦྱོང་བཟང་བོ་བྱས་ཏེ་རང་གི་དམིགས་འདུན་འགྲུབ་ཐུབ་པ་བྱ་རྒྱུ་ཡིན། ང་མ་འོངས་པར་གློག་ཀླད་ཆེད་མཁས་པ་ཞིག་བྱ་འདོད་པར་མ་ཟད། འཛམ་གླིང་སྟེང་གློག་ཀླད་སྟེང་སྔར་མེད་ཀྱི་མཉེན་ཆས་གསར་པ་ཞིག་བཟོས་ཏེ་ལེགས་སྐྱེས་སུ་འབུལ་རྒྱུ་ཡིན། ཞེས་དང་། ངས་ཀྱང་རྗེས་ཕྱོགས་གཏོང་ལེན་ཚོགས་པ་ལྟར་མི་གཞན་ལ་ཕན་ཐོགས་པར་བྱ་རྒྱུ་ཡིན་ཟེར།

གཏོང་ལེན་ཚོགས་པ་ནི་ཕྱི་ལོ་ ༢༠༠༤ ལོར་རྒྱ་གར་གྱི་དབུང་ཕོངས་བྱིས་པ་རྣམས་ལ་བདག་སྐྱོང་དང་སློབ་སྦྱོང་སྤྲོད་ཆེད་དུ་བཙུགས་པའི་ཚོགས་པ་ཞིག་ཡིན་ལ། ད་ལྟའི་ཆར་དགེ་ལས་བསྡོམས་པས་མི་ ༢༠ ལྷག་ཡོད་པ་དང་། ཤེས་ཡོན་དང་འཕྲོད་བསྟེན། ཁོར་ཡུག་བཅས་སྡེ་ཚན་གསུམ་ཡོད། ཤེས་ཡོན་སྡེ་ཚན་དུ་ཕྲུ་གུ་ ༤༠ ལྷག་དང་འཕྲོད་བསྟེན་སྡེ་ཚན་དུ་ཕྲུ་གུ་ ༡༥༠ ལྷག་བཅས་ཁྱོན་ཕྲུ་གུ་ ༢༠༠ ལྷག་ལ་བདག་སྐྱོང་བྱེད་ཀྱིན་ཡོད། ཕྲུ་གུ་དེ་དག་གི་ཕལ་ཆེ་བ་ཀ་ཅཱ་རིའི་ Charan གྲོང་གསེབ་ནས་སྐྱེས་ཤིང་འཚར་ལོངས་བྱུང་བ་ཡིན།

གཏོང་ལེན་ཚོགས་པས་རྒྱ་གར་ཡུལ་མིའི་བྱིས་པ་དབུལ་ཕོངས་ ༤༠ ལྷག་ལ་བདག་སྐྱོང་དང་སློབ་གྲྭར་བཏང་སྟེ། དང་ཐོག་ཕྲུ་གུ་ཚོར་རྩེད་རིགས་དང་གཞས། རི་མོ་འབྲི་བ། དབྱིན་ཧིན་གྱི་རྨང་གཞིའི་ཤེས་བྱ་ནས་མགོ་བཙུགས་ཏེ་སློབ་ཁྲིད་ཀྱི་མགོ་བརྩམས་ཤིང་སློབ་ཁྲིད་བྱས་པ་དང་། ད་ལྟ་ཁག་ཅིག་འཛིན་རིམ་དགུ་བར་སླེབས་ཡོད་ལ། གཏོང་ལེན་ཚོགས་པའི་འཕྲོད་བསྟེན་འགན་འཛིན་དང་ངྷ་ས་ས་གནས་བོད་ཀྱི་གཞོན་ནུ་ཚོགས་པའི་ཚོགས་གཙོ་བསོད་ནམས་ལགས་ཀྱིས། དང་ཐོག་ང་ཚོས་བདག་སྐྱོང་བྱེད་བཞིན་པའི་ཕྲུ་གུ་ཚོ་ས་གནས་ཀྱི་སློབ་གྲྭར་མ་ཚུད་པར་དཀའ་ངལ་བྱུང་ནའང་། ང་ཚོས་ཨུ་ཚུགས་མཐར་སྐྱེལ་དང་རྒྱུ་མཚན་གནས་ལུགས་བཤད་པས་ཁོང་ཚོ་སློབ་གྲྭར་འགྲིམ་པའི་གོ་སྐབས་བྱུང་། ང་ཚོས་བདག་སྐྱོང་བྱེད་བཞིན་པའི་བྱིས་པ་ཚོ་ནི་ནམ་རྒྱུན་ནས་རྣམ་རིག་རྒོད་པོ་ཅན་དང་ཧུར་བརྩོན་ལྡན་པས། གལ་སྲིད་འཛིན་གྲྭ་གཅིག་གི་ནང་དུ་ང་ཚོའི་བྱིས་པ་ལྔ་ཡོད་པའི་དབང་དུ་བཏང་ན། ཡིག་རྒྱུགས་སྐབས་ཀྱི་ཨང་དང་པོ་དང་གཉིས་པ། གསུམ་པ་སོགས་ནམ་རྒྱུན་ང་ཚོའི་བྱིས་པ་ཚོས་ལེན་གྱིན་ཡོད་པས། སློབ་གྲྭའི་སློབ་སྤྱི་ཡང་ཧང་སང་འདུག་ཅེས་བརྗོད།

འདི་ལྟར་གཏོང་ལེན་ཚོགས་པའི་དྲིན་གྱིས་ས་གནས་ཡུལ་མིའི་དབུལ་ཕོངས་ཀྱི་བྱིས་པ་དག་ལ་མཚོན་ན། མི་ཚེའི་མདུན་ལམ་རྙེད་ཅིང་། གཞུག་ཕྱོགས་ཀྱི་བྱ་བའི་ཐད་དུ་ཁ་ཕྱོགས་ཡོད་པ། དེ་རིང་གི་འཚོ་བར་དྲོད་སྐྱིད་ལྡན་པ་བཅས་བྱུང་འདུག དེ་ནི་བཙན་བྱོལ་བོད་མིས་མི་ལོ་ ༥༠ ལྷག་རིང་རྒྱ་གར་ས་ཐོག་ཏུ་སྐྱབས་བཅོལ་གྱི་འཚོ་བ་རོལ་བའི་བཀའ་དྲིན་དང་ཐུགས་རྗེ་ཆེ་ཞུའི་ལས་དོན་ངོ་མ་ཞིག་ཀྱང་རེད།

གསར་འགོད་པ། ཨ་རིག་འགྱུར་མེད།