མི་མང་གི་འགན་དང་བཀའ་ཁྲི། བྱམས་པ་དབང་ཆེན

ཤར་ཨེ་ཤི་ཡ་ཡི་སྟོབས་ཆེན་རྒྱལ་ཁབ་རྒྱ་དཀར་ནག་གཉིས་ཀྱི་བར་ཏུ་གནས་པའི་གངས་ཅན་བོད་ཀྱི་རྒྱལ་ཁབ་དེ་ཉིད་རྒྱ་དམར་པོས་བཙན་བཟུང་བྱས་ནས་ད་བར་མི་ལོ་ལྔ་བཅུ་ལྷག་ཕྱིན་ཏེ། ད་བར་རྒྱ་དམར་གྱི་བཙན་འོག་ཏུ་བཟོད་དཀའ་བའི་སྡུག་བསྔལ་སྣ་ཚོགས་དངོས་སུ་མྱངས་དང་མྱོང་བཞིན་པའི་བོད་ཕྱི་ནང་གཉིས་སུ་ཡོད་པའི་རྒྱལ་ཞེན་སྙིང་སྟོབས་ཅན་གྱི་རྒན་རབས་མི་ཐོག་གཅིག་རྫོགས་ལ་ཉེར་བའི་དུས་སུ་སླེབས་ཀྱང༌། ད་དུང་བོད་རྒྱལ་ཁབ་ཀྱི་རང་དབང་སླར་གསོ་ཐུབ་མིན་ནི་འཆི་གསོན་ཐག་མ་ཆད་པའི་བ་རྒན་ནད་པ་བཞིན་གནས་ཡོད། འབྱུང་འགྱུར་མི་ལོ་ལྔ་འམ་བཅུའི་ནང་ཚུན་རང་དབང་སླར་གསོ་མ་ཐུབ་པ་ཡིན་ན་བོད་ཏུ་ཡོད་པའི་བོད་མི་རྣམས་འཛམ་གླིང་གི་མི་འབོར་ཆེ་ཤོས་ཀྱི་རྒྱ་ནག་མི་རིགས་ནང་ཐིམ་ཉེན་དང༌། རྒྱ་གར་དང་ཕྱི་གླིང་ནང་ཡོད་པའི་བོད་མི་རྣམས་གནས་ཚང་གི་རྒྱལ་ཁབ་དེ་དང་དེའི་མི་རིགས་ནང་དུ་ཐིམ་སྟེ་བོད་ཅེས་པའི་མིང་ཙམ་ཡང་ལྷག་མེད་དུ་འགྱུར་མི་སྲིད་པ་མིན་པས། གཞིས་བྱེས་བོད་རིགས་ཡོངས་རྫོགས་ཀྱིས་སྔར་ལྷག་རྡོག་རྩ་གཅིག་ཏུ་བསྒྲིལ་ཏེ་དམིགས་ཡུལ་གཅིག་སྒྲུབ་བྱེད་ཀྱི་ཐབས་ལམ་གཅིག་ཉིད་ཐོག་བོད་དོན་འཐབ་རྩོད་ཀྱི་ལས་འགུལ་སྤེལ་དགོས་པ་མཐོང༌། དེ་ཡང་འབྱུང་འགྱུར་གྱི་བཀའ་ཤག་གི་བཀའ་བློན་ཁྲི་བའི་འོས་གཞིའི་མི་འགྲོ་དེ་ཉིད་མ་ནོར་བ་ཞིག་བདམ་རྒྱུ་གལ་ཆེ་ལ་བརྟེན་དེའི་སྐོར་གནས་དོན་གལ་ཆེ་བ་འགའ་ཞིག་བརྗོད་ན། ཐོག་མར་མི་མང་གི་སེམས་ལ་ངེས་དགོས་པ་འགའ་ཤས་ཡོད་པ་ལས།

༡༽ བཀའ་བློན་ཁྲི་བའི་ལས་ཀའི་ངོ་བོ་དང་ལས་འགན་གལ་ཆེ་ཆུང་ཇི་ཙམ་ཡིན་མིན་ཤེས་དགོས་པ།

༢༽ བཀའ་བློན་ཁྲི་བའི་འོས་གཞིའི་མི་འགྲོ་དེ་ཉིད་སྐྱ་སེར་ཕོ་མོ་དང༌། ཆོལ་ཁ་དང་ཆོས་ལུགས་ལ་མ་རྟོན་པ་སློབ་སྦྱོང་དང༌། ཉམས་མྱོང༌། ལྷག་བསམ། དྲང་བདེན་ཡོད་མེད་ལ་རྟོན་དགོས་པ། ༣༽ མ་འོངས་བོད་ཀྱི་འཐབ་རྩོད་དེ་འཚེ་མེད་ཞི་བའམ་དབུ་མའི་ལམ་སོགས་གང་གི་ཐོག་འགྲོ་རྒྱུ་ཡིན་མིན་སེམས་ལ་ངེས་དགོས་པ།

༤༽ ད་ལྟའི་བཀའ་ཤག་གིས་འཆར་གཞི་བཀོད་དེ་བང་རིམ་སྒྲིག་བཞག་པའི་ལས་ཀ་རྣམས་མཇུག་མཐུད་དེ་འགྲོ་རྒྱུ་ཡིན་ནམ་དེ་ལས་གཞན་ཞིག་བྱ་རྒྱུ་ཡིན་མིན་སོགས་མི་མང་གི་ཁོངས་སུ་ཆུད་པ་ཞིག་དགོས། བཀའ་བློན་ཁྲི་བའི་འོས་འགྲོའི་མི་དེར་གཤམ་གསལ་ཁྱད་ཆོས་རྣམས་ཚང་བ་འདུག་མི་འདུག་བརྟགས་དགོས།

༡༽ ྋགོང་ས་མཆོག་ནས་བོད་གཞུང་གི་དབུ་འཁྲིད་གནང་བའི་རིང་བཀའ་བློན་ཁྲི་བ་དེར་ཤེས་ཡོན་ཅན་ཡིན་པ་ཙམ་གྱི་མི་ཆོག་པ་མི་དེའི་ལྟ་གྲུབ་དང་ད་ལྟའི་སྐྱབས་བཅོལ་བོད་གཞུང་གི་ཡང་དག་པའི་སྲིད་བྱུས་ཀྱི་ལངས་ཕྱོགས་དང་འགལ་བ་མེད་པ་ཞིག་དགོས།

༢༽ བོད་དོན་འཐབ་རྩོད་ཀྱི་ངོ་བོ་དང་ཐབས་ལམ་ལ་འགྱུར་བ་མེད་པ་དབུ་མའི་ལམ་དང་འཚེ་བ་མེད་པའི་ཐོག་གནས་དགོས།

༣༽ དེ་དག་དང་འབྲེལ་བའི་ཤེས་ཡོན་ཉམས་མྱོང་ལྟ་གྲུབ་དང་བཅས་པ་ཡོངས་རྫོགས་ཚང་དགོས་པ་བཅས་ཡིན། གལ་ཏེ་དེ་དག་མ་ཚང་པ་ཙམ་མ་ཟད། དབུ་མའི་ལམ་དང་འཚེ་མེད་ཞི་བའི་ཐབས་ལམ་ཐོག་ཕྱོགས་འགལ་བྱེད་མཁན་ལྟ་བུ་འབྱུང་མི་སྲིད་པ་མིན་པས་དེ་ལྟར་བྱུང་བ་ཡིན་ན་ད་ལྟའི་བཀའ་ཤག་ནས་མི་ལོ་བཅུའི་རིང་འཛེམས་ཟོན་མེད་པའི་སྒོ་ནས་ལེགས་བཅོས་དང་གསར་གཏོད་བྱས་པའི་ཡང་དག་པའི་ཁྲིམས་སྒྲིག་དང་ལམ་ལུགས། དེ་བཞིན་དཔལ་འབྱོར་དང་བཅས་པ་ཆ་ཚང་ཆུད་བཟོས་སུ་འགྲོ་རྒྱུ་མ་ཟད་བོད་ཅེས་པའི་མིང་ཙམ་ཡང་ལྷག་མེད་ཏུ་འགྱུར་ཉེན་ཆེ་བས་ཚང་མས་གཟབ་དགོས༌། དེང་རབས་ཀྱི་ལམ་ལུགས་ལྟར་བྱས་ན་ལས་ཀ་གང་འདྲ་ཞིག་ཡིན་ཡང་ཐོག་མའི་གཞི་འཛིན་ས་དེ་ཤེས་ཚད་དང༌། དེ་ནས་ལས་ཀའི་ངོ་བོ་དང་འབྲེལ་བའི་ཉམས་མྱོང་ཇི་ཙམ་ཡོད་མེད་བཅས་ལ་ངོས་འཛིན་བྱེད་སྲོལ་ཡོད་པ་བཞིན། ང་རང་ཚོ་ཡང་དེ་དག་ལས་མ་འདས་པ་ཞིག་གི་ཐོག་ནས་བཀའ་བློན་ཁྲི་བའི་འོས་འདེམས་གནང་ན་ལེགས་པ་ཡིན། དཔེར་ན་ཉེར་ཆར་གཏན་སློབ་ཁག་གི་རེག་ཊར་ས་མིག་གསལ་བསྒྲགས་ནང་རེག་ཊར་གྱི་དགོས་ངེས་ཆ་རྐྱེན་འདོན་སྐབས་ཉུང་མཐར་འཛིན་སྐྱོང་གི་ཉམས་མྱོང་ལོ་བདུན་ཡོད་པ་ཞེས་བཀོད་འདུག་པ་ལྟར་ན། བོད་རྒྱལ་ཁབ་ཀྱི་བཀའ་བློན་ཁྲི་བའི་ལས་འགན་འཛིན་པར་ཤེས་ཡོན་ཚད་ལྡན་ཐོག་འཛིན་སྐྱོང་གི་ཉམས་མྱོང་དེ་ལས་མ་མང་ཡང་མི་ཉུང་བ་ཞིག་ལྡན་དགོས་པ་ནི་སྨྲོས་མེད་རེད། དེང་གི་རྒྱལ་སྤྱིའི་ཆབ་སྲིད་ཀྱི་གནས་སྟངས་དང༌། ད་ལྟའི་རྒྱ་བོད་དབར་གྱི་འབྲེལ་བ། བོད་ཕྱི་ནང་གཉིས་ཀྱི་ཛ་དྲག་གི་གནས་སྟངས་བཅས་གང་ལ་བལྟས་ཀྱང་བོད་མི་ཡོངས་ནས་མ་འོངས་པའི་བཀའ་བློན་ཁྲི་བ་འདིའི་ཐོག་དམིགས་བསལ་ཡིད་གཟབ་ཅིག་བྱེད་དགོས་པའི་དུས་ལ་བབ་འདུག་སྙམ། ད་བར་བོད་ཅེས་པའི་མིང་དེ་འཛམ་གླིང་འདིའི་སྟེང་དུ་མཐོང་ཐོས་སུ་ཡོད་པ་འདི་དང༌། ཚོགས་སྐྱིད་ཁག་དང༌། དགོན་སྡེ་གྲྭ་ཚང་ཁག མཐའ་ན་ཁྱིམ་གཞིས་ཚུན་ཆད་མི་ལོ་ལྔ་བཅུ་ཙམ་གྱི་རིང་རང་དབང་ཐོག་བློ་བདེ་བག་ཡངས་ངང་སྡོད་རྒྱུ་བྱུང་བ་འདི་ནི་ྋགོང་ས་སྐྱབས་མགོན་ྋརྒྱལ་བ་རིན་པོ་ཆེ་ཁོང་ཉིད་ཀྱི་མཛད་འཕྲིན་ཁོ་ན་ལ་བརྟེན་ནས་བྱུང་བ་མ་གཏོགས་གཞན་སུ་གང་གིས་འཇོན་པོ་དང་རྒོད་པོ་བྱས་ནས་བྱུང་བ་མིན། མ་འོངས་པ་ཡང་བོད་ཅེས་པའི་མིང་དེ་འཚོ་གནས་དགོས་ཀྱི་ཡོད་ན་ྋགོང་ས་ྋརྒྱལ་བ་རིན་པོ་ཆེ་མཆོག་གི་བླ་ན་མེད་པའི་བཀའ་སློབ་ལམ་སྟོན་དང་དགོངས་གཞི་དགོས་པ་གང་ཡིན་ཆད་ལྷག་མེད་པ་གཅིག་ནས་གཉིས་བར་ཆ་ཚང་ཡིད་གཉིས་མེད་པར་ལག་བསྟར་བྱེད་ཐུབ་ན་ད་གཟོད་མགོ་ནག་བོད་ལ་སྐྱིད་པའི་ཉི་མ་ཞིག་འཆར་རྒྱུ་ཡིན་པ་སོམ་ཉི་དགོས་དོན་མ་མཆིས། མདོར་ན་གོང་དུ་གསལ་བར་ལྟར་ད་ལྟའི་བཀའ་ཤག་གིས་འཆར་གཞི་བཀོད་དེ་བང་རིམ་སྒྲིག་བཞག་པའི་ལས་དོན་རྣམས་ཀྱི་མཇུག་མཐུད་པའི་ཐོག ྋ་གོང་ས་སྐྱབས་མགོན་ཆེན་པོ་མཆོག་གི་ལམ་སྟོན་བཀའ་སློབ་རྣམས་མ་ནོར་མ་འཁྲུལ་བར་ཤེས་རྟོགས་ཐུབ་པ་ད་ལྟའི་བཀའ་བློན་ཁྲི་བ་མཁས་དབང་ཟམ་གདོང་རིན་པོ་ཆེ་ཁོང་ལྟ་བུ་ཞིག་བཀའ་བློན་དུ་བདམ་དགོས་པ་ནི་སྐྱབས་བཅོལ་བོད་མི་རྣམས་ལ་ཁུར་དུ་བབ་པའི་ལས་འགན་དེ་རེད། ཁོང་ལྟ་བུའི་མཁས་དབང་རང་དོན་བློས་གཏོང་ཐུབ་མཁན་གྱི་གང་ཟག་ཁྱད་པར་ཅན་ཞིག་ཤིན་ཏུ་དཀོན་པ་ལྟ་བུ་སྣང་ཡང་ྋགོང་ས་མཆོག་གི་དགོངས་གཞི་དང་བོད་གཞུང་གི་ད་ལྟའི་ཆབ་སྲིད་ལངས་ཕྱོགས་དབུ་མའི་ལམ་དང་འཚེ་བ་མེད་པའི་ཐོག་བོད་དོན་བདེན་མཐའ་སེལ་ཐབས་དང༌། ཤེས་ཡོན་སྲིད་བྱུས་ལག་བསྟར་གནང་རྒྱུ། སྐུ་ཚབ་འབྲེལ་མཐུད་གཏང་རྒྱུ༌། བཙན་བྱོལ་ནང་གི་གཞིས་ཆགས་སྲ་བརྟན་གྱི་ལས་གཞི་ཁག་ལག་བསྟར་གནང་རྒྱུ། གཞིས་བྱེས་བོད་མི་ཡོངས་ཀྱི་མངོན་འདོད་སྒྲུབ་རྒྱུར་ཡིད་གཉིས་ཐེ་ཚོམ་མེད་པའི་སྒོ་ནས་བསམ་ཕོད་པ། བཤད་ཕོད་པ། བྱེད་ཕོད་པའི་སྙིང་སྟོབས་ལྡན་པ། དྲང་བདེན་ལྷག་བསམ་གྱིས་རབ་ཏུ་ཕྱུག་པའི་གང་ཟག་ཤེས་མྱོང་ཅན་མི་ཉུང་བ་ཞིག་ཡོད་པ་ལས། མི་མང་གི་མཁྱེན་རྟོགས་སླད་དེ་དག་གི་ལོ་རྒྱུས་སྙིང་བསྡུས་རེ་ངོ་སྤྲོད་ཞུ་ན།

ཀ༽ སྐུ་ངོ་བཀྲིས་དབང་འདུས་ལགས་ཀྱི་ལོ་རྒྱུས་སྙིང་བསྡུས།
ཁོང་གི་གཞི་རྩའི་སློབ་སྦྱོང་བོད་དུ་གནང་ཞིང༌། བཙན་བྱོལ་དུ་འབྱོར་ནས་མ་སུ་རི་བོད་གཞུང་གཏན་སློབ་ནང་སློབ་སྦྱོང་གནང་པ་དང༌། དེ་རྗེས་མཐོ་རིམ་ཤེས་ཡོན་ཝིན་བྷརྒ་ཨེ་ལེན་ནས་ཐོན། སློབ་ཐོན་རྗེས་བོད་གཞུང་གི་སྲི་ཞུའི་ལས་བྱེད་དུ་ཞུགས་ཏེ་ནང་སྲིད་དང་ཤེས་རིག་ལས་ཁུངས་སུ་ཕྱག་ལས་གནང༌། ༡༩༦༨ ལོར་ཨིན་ལེན་དུ་ཆེས་མཐོའི་སློབ་སྦྱོང་དོན་དུ་ཕེབས་ཏེ་ ༡༩༧༣ ལོར་བྷི་རི་སེ་ཊེལ་མཐོ་སློབ་ནས་སློབ་ཐོན་བྱུང་ ༡༩༧༤ ལོར་སླར་ཡང་བོད་གཞུང་གི་ཞབས་ཞུའི་ཆེད་ཕྱིར་ལོག་གནང་སྟེ་གཞུང་ཞབས་སུ་ཞུགས་ཤིང་བཀའ་བློན་དུ་བསྐོ་གཞག་དང༌། དེ་རྗེས་ལྡི་ལི་དོན་ཁང་གི་དོན་གཅོད་ལོ་མང་གནང༌། དེ་ནས་ཕྱི་དྲིལ་བཀའ་བློན་དང༌། ནང་སྲིད་ཤེས་རིག་དང་ཆོས་དོན་བཀའ་བློན་གནང་ཡོད། བཀའ་ཤག་སྐབས་བཅུ་གཅིག་པ་བར་བཀའ་ཤག་སྐབས་འགའ་བཀའ་བློན་གནང༌། དེ་ནས་སླར་ཡང་ལྡི་ལིར་བོད་གཞུང་སྐུ་ཚབ་དོན་གཅོད་དུ་བསྐོ་གཞག་དང༌། དེ་རྗེས་ཨ་རི་སྐུ་ཚབ་དོན་གཅོད་དུ་བཏང་པ་གནང་བ་དང༌། ད་ལྟ་བྷ་ར་ཛིལ་དུ་སྐུ་ཚབ་དོན་གཅོད་གནང་བཞིན་པ་བཅས་མདོར་ན་སྐུ་ཚེ་ཧྲིལ་པོ་ད་ལྟའི་བར་ལྷག་བསམ་གཡོ་བ་མེད་པའི་སྒོ་ནས་གཞུང་གི་ཞབས་ཞུ་སྒྲུབ་བཞིན་པ་བཅས་སོ།

ཁ༽ སྐུ་ངོ་ཐུབ་བསྟན་ལུང་རིག་ལགས་ཀྱི་ལོ་རྒྱུས་སྙིང་བསྡུས།
ཨ་མདོ་རེབ་གོང་ཡབ་བསྟན་འཛིན་སྐལ་བཟང་དང༌། ཡུམ་སྐལ་བཟང་སྐྱིད་གཉིས་ཀྱི་རིགས་ཀྱི་མྱུ་གུར་ ༡༩༥༧ ལོར་སྐྱེས། ༡༩༥༩ ལོར་བོད་དུ་དུས་འགྱུར་མི་ཟད་པ་བྱུང་སྐབས་བཙན་བྱོལ་དུ་འབྱོར་ཏེ་ ༡༩༦༣ ལོར་ྋགོང་ས་མཆོག་དང་བཙན་བྱོལ་བོད་གཞུང་གི་ཐུགས་རྗེ་བཀྲིན་ལས་ཌལ་ཧོར་གཏན་སློབ་ཏུ་གཞི་རིམ་བར་མའི་བར་སློབ་སྦྱོང་བྱས༌། ༡༩༧༢ ལོར་ཝར་ཎ་མཐོ་སློབ་ཏུ་འཛུལ་ཞུགས་ཀྱིས་ཨ་ཙཱརྱ་བར་སློབ་སྦྱོང་བྱས་ཤིང༌། ༡༩༨༡ ལོར་སློབ་མཐར་ཕྱིན་ཏེ་རྡ་ས་་བོད་ཁྱིམ་སློབ་གྲྭར་དགེ་རྒན་གྱི་ལས་འགན་ཞབས་ཞུ་སྒྲུབ་བཞིན་པར། ༡༩༨༥ ལོར་བོད་གཞུང་ཤེས་རིག་ལས་ཁུངས་ཀྱི་སློབ་ཡོན་འོག་ཝར་ཎ་མཐོ་སློབ་ཏུ་སླར་ཡང་ལོ་གཅིག་གི་དགེ་རྒན་འོས་སྦྱོང་དང༌། དེ་རྗེས་ཤེས་རིག་ལས་ཁུངས་ནས་རྡ་ས་བོད་ཁྱིམ་གྱི་དགེ་རྒན་དུ་རང་འཇགས་བཏང་བ་གནང་སྟེ་ ༡༩༩༢ བར་དགེ་རྒན་གྱི་ཞབས་ཞུས་རྗེས། ༡༩༩༣ ལོར་སུ་ཇཱ་བོད་ཁྱིམ་སློབ་གྲྭའི་སློབ་སྤྱི་བཏང་ཞིང་རིམ་པས་སློབ་གྲྭའི་འགན་འཛིན་གཅིག་ལྕོགས་བསྐོ་གཞག་གནང༌། ༡༩༩༦ ལོར་ཟླ་ ༥ ཚེས་ ༨ འཁོད་པའི་ྋ་གོང་ས་སྐྱབས་མགོན་ཆེན་པོས་སྐབས་བཅུ་གཉིས་པའི་བོད་མི་མང་སྤྱི་འཐུས་སུ་ཐད་བསྐོའི་བཀའ་ཡིག་གནང་སྟེ་སྤྱི་འཐུས་སུ་ཞུགས་ཤིང༌། སྤྱི་འཐུས་རྣམ་པས་སྤྱི་མོས་ཀྱིས་ཚོགས་གཙོ་གཞོན་པར་འོས་འདེམས་ཀྱིས་ཚོགས་གཙོ་གཞོན་པར་བསྐོ་གཞག་བྱུང་སྟེ་སྤྱི་འཐུས་དུས་ཡུན་ལོ་ལྔའི་རིང་ཚོགས་གཙོ་གཞོན་པའི་འགན་གཞེས་ཐོག བཙན་བྱོལ་བོད་མིའི་འོས་བསྡུའི་སྒྲིག་གཞི་རྙིང་པ་བསྡུས་ཏེ་གསར་བཟོ་ཟིན་བྲིས་ཚོགས་ཆུང་དང་དེའི་ཚོགས་གཙོ་བསྐོ་གཞག་བཞིན་འོས་བསྡུའི་ཟིན་བྲིས་གཏན་འབེབས་ཀྱི་གྲོས་ཚོགས་སུ་ཕུལ། ཕྱི་ལོ་ ༢༠༠༠ ལོར་སྐབས་བཅུ་གཉིས་པའི་སྤྱི་འཐུས་ཀྱི་ལས་ཡུན་རྫོགས་རྗེས་སླར་ཡང་སྐབས་བཅུ་གསུམ་པའི་སྤྱི་འཐུས་ནང་མདོ་སྨད་ཆོལ་ཁའི་སྤྱི་འཐུས་སུ་འདེམས་ཐོན་དང༌། སྤྱི་འཐུས་རྣམས་པས་སྤྱི་འཐུས་ཀྱི་ཚོགས་གཙོར་མང་མོས་ཀྱིས་བདམས་ཤིང་སྤྱི་འཐུས་ཚོགས་གཙོ་ཡིན་མུས་སུ་རྒྱ་ཆེའི་མང་ཚོགས་ནས་བདམས་ཐོན་བྱུང་བའི་བཀའ་བློན་ཁྲི་བས་གྲོས་ཚོགས་སུ་བཀའ་བློན་གྱི་མི་འགྲོར་མིང་འདོན་ལོ་རྒྱུས་བཏང་བར་གྲོས་ཚོགས་ནས་སྤྱི་མོས་བྱུང་སྟེ་བཀའ་བློན་དུ་བསྐོ་གཞག་དང༌། བཀའ་ཤག་ཏུ་ཆོས་རིག་ལས་ཁུངས་དང༌། ཤེས་རིག་ལས་ཁུངས་གཉིས་ཀྱི་བཀའ་བློན་གྱི་འགན་སྤྲད། དེ་ནས་རིམ་པས་ཤེས་རིག་རང་འཇགས་དང༌། དེའི་ཐོག་འཕྲོད་བསྟེན་ལས་ཁུངས་ཀྱི་བཀའ་བློན་གྱི་ལས་འགན་བསྐུར། བཀའ་ཤག་སྐབས་གཉིས་པའི་ལས་ཡུན་རྫོགས་རྗེས་སླར་ཡང་སྐབས་བཅུ་གསུམ་པའི་བཀའ་ཤག་གིས་བཀའ་བློན་ཁྲི་པས་གྲོས་ཚོགས་ཚོགས་དུས་བཅུ་བཞི་པའི་ཐོག་བཀའ་བློན་མི་འགྲོར་མིང་ལོ་རྒྱུས་བཅས་བཏང་ཞིང༌། སྤྱི་མའཐུས་ལྷན་ཚོགས་སུ་མང་མོས་ཀྱིས་འདེམས་ཐོན་བྱུང་བས་བཀའ་བློན་དུ་བསྐོ་གཞག་དང༌། ཤེས་རིག་བཀའ་བློན་གྱི་ལས་འགན་བཀོད་སྒྲིག་བྱས་པ་བཅས་ད་ལྟ་བཀའ་བློན་གྱི་འགན་བྱེད་མུས་ཡིན་པ་བཅས་སོ། ༡༽ བཀའ་བློན་རིང་ཤེས་རིག་ཚོགས་ཆེན་ཐེངས་ ༣ པའི་རྗེས་ལོ་ ༡༥ རིང་ཚོགས་ཆེན་ཚོགས་མ་ཐུབ་པ་ཛ་དྲག་ཏུ་བརྩིས་ཏེ་ ༢༠༠༢ ལོར་བོད་སློབ་ཁག་གི་སློབ་སྤྱི་དང་འགན་འཛིན་དགེ་རྒན་བཅས་པ་ ༤༠༠ ཙམ་འདུས་པའི་ཚོགས་ཆེན་བཞི་པ་བསྡུ་བསྐོང་བྱས་ཤིང་སྐབས་དེར། རེ་བསྐུལ་གྱི་བསམ་ཤོག་འབྲི་བ་པོ་བདག་ཀྱང་པ་ཀུལ་བོད་ཁྱིམ་སློབ་གྲྭའི་ཆོས་དགེའི་མིང་ཐོག་ཚོགས་ཞུགས་ཞུས། ༢༽ ཚོགས་ཆེན་ཐོག་གཙོ་བོ་དེང་སྐབས་ན་གཞོན་ཚོའི་ཤེས་ཚད་ཇེ་ཞེན་དུ་འགྲོ་བཞིན་པ་ལྷག་པར་བོད་ཀྱི་སྐད་ཡིག་ཉམས་ཤིང་ཡོད་པའི་ཐོག་བགྲོ་གླེང་ཤུགས་ཆེ་དང༌། དེའི་རྒྱུ་རྐྱེན་གང་ལ་ཐུག་པ་ཞིབ་པར་ ༣༽ ༡༩༩༡ ལོར་སྐབས་ ༡༡ པའི་བོད་མི་མང་སྤྱི་ལྷན་ཚོགས་ཀྱིས་བཙན་བྱོལ་བོད་མིའི་བཅའ་ཁྲིམས་རིན་པོ་ཆེ་གཏན་ལ་ཕབ་པའི་སྐབས་སུ་གཞུང་གི་རྩ་བའི་བྱེད་སྒོ་ལམ་སྟོན་དང༌། ༼ཤེས་ཡོན་སློབ་སྟོན་ཡར་རྒྱས་གཏིང་ཐབས་སུ་དོན་དམ་བོད་ཀྱི་གཞི་རྩའི་དགོས་མཁོ་དང་འཚམས་པའི་ཤེས་རིག་སྲིད་བྱུས་ཡང་དག་ཅིག་བཟོ་རྒྱུ་༽ ཞེས་གསལ་ཡོད་ཀྱང༌། ལག་ལེན་དུ་མ་འཁེལ་བར་གནས་པ་ཤེས་རིག་ཚོགས་ཆེན་བཞི་པའི་ཐོག་དགོས་གལ་ཡོད་མེད་ཀྱི་ཞིབ་ཅིང་ཕྲ་བའི་བགྲོ་གླེང་མཐིལ་ཕྱིན་གནང་བ་བརྒྱུད་ངེས་པར་དགོས་པའི་སྤྱི་མོས་ཐོག་གྲོས་ཆེད་བཞག་པ་ནས་བཀའ་ཤག་གི་ལམ་སྟོན་འོག་སྲིད་བྱུས་གཏན་འབེབས་དང༌། ད་ཆ་བོད་སློབ་སམ་བྷོ་ཊའི་ཁྱབ་ཁོངས་ཡོངས་སུ་ལག་བསྟར་ཐུབ་པ། ལྷག་པར་དུ་སྲིད་བྱུས་དགོངས་དོན་ཇི་བཞིན་ལག་བསྟར་ཆེད་མེས་དབོན་དཔེ་སྟོན་གཙུག་སློབ་ཁང་བྱ་བ་གསར་དུ་སྒོ་ཕྱེ་བ། དེ་ཡང་དེང་གི་ཆར་སྤྱི་ཚོགས་ཕ་མ་བཅས་པའི་བསྔགས་བརྗོད་བྱེད་བཞིན་པའི་གནས་སྟངས་སུ་ཡོད། ༤༽ སྲིད་བྱུས་དེའི་ལག་བསྟར་ཇི་བཞིན་ཡོང་ཆེད་དེའི་དགོངས་དོན་གྱི་དགེ་རྒན་འོས་སྦྱོང་དང༌། དེ་ཡང་སློབ་གྲྭ་ཡོངས་རྫོགས་༼གཞུངདང༌། སྤྱི། སྒེར།༽ ཀྱི་དགེ་རྒན་རྣམས་ལ་ཤེས་ཡོན་སྲིད་བྱུས་ཀྱི་ནང་དོན་གོ་རྟོགས་སྤེལ་བའི་ཟབ་སྦྱོང་མ་ཆད་པ་ཕུལ་ཟིན། མདོར་ན་སྐུ་ངོ་ཐུབ་བསྟན་ལུང་རིག་ལགས་ནི་ཌལ་ཧོར་གཏན་སློབ་ནས་ཝ་ཎ་མཐོ་སློབ་དང༌། དེ་ནས་སྤྱི་འཐུས་ཚོགས་གཙོ་ཚོགས་གཞོན་ནས་ད་ལྟ་ཤེས་རིག་བཀའ་བློན་གནང་བཞིན་པ་འདིའི་བར་བཀའ་བློན་ཁྲི་བ་མཁས་དབང་ཟམ་གདོངས་རིན་པོ་ཆེ་མཆོག་དང་ལོ་མང་རིང་མཉམ་ལས་་བྱས་པའི་ཉམས་མྱོང་དང་དགེ་སློབ་ཀྱི་འབྲེལ་བ་དམ་ཟབ་ཡོད་པ་བཅས་སོ།

ག༽ སྐུ་ངོ་བློ་བཟང་སྙན་གྲགས་ལགས་ཀྱི་ལོ་རྒྱུས་སྙིང་བསྡུས།
ཁོང་ནི་སྤྱི་ལོ་༡༩༦༥ ལོར་ཀ་ལིམ་པོང་དུ་འཁྲུངས། གཞི་རིམ་སློབ་སྦྱོང་ཧར་བཌ་སྤུར་སློབ་གྲྭ་ནས་ཐོན་ཏེ། ཅན་རྡི་གར་པཎ་ཇབ་མཐོ་སློབ་ཁང་དུ་མཐོ་རིམ་གྱི་སློབ་སྦྱོང་སྲིད་དོན་དང་དཔལ་འབྱོར་རིགས་པའི་ཐོག་གནང་ ༡༩༩༩ ནས་ ༡༩༩༥ བར་བོད་ཀྱི་དབུས་གཞོན་ནུ་ལྷན་ཚོགས་ཀྱི་དྲུག་ཆེ་དང་གཞན་ལས་འགན་ཡང་གནང༌། ༡༩༦༦ ལོར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་བསྟིང་གནས་ཁང་གི་འགན་འཛིན་དང༌། བོད་རྒྱལ་ཡོངས་མང་གཙོ་ཚོགས་པའི་ཚོགས་གཞོན་པའི་འགན་འཁུར་བླང༌། བོད་མི་མང་སྤྱི་འཐུས་སྐབས་བཅུ་གཉིས་པར་མདོ་སྟོད་ཆོལ་ཁའི་སྤྱི་འཐུས་སུ་འདེམས་ཐོན་བྱུང་བ་དང༌། དེ་རྗེས་བཀའ་ཤག་སྐབས་བཅུ་གཉིས་པའི་བཀའ་བློན་ཁྲི་པ་མཆོག་ནས་བཀའ་བློན་གྱི་མི་མགྲོར་གྲོས་ཚོགས་སུ་མིང་དང་ལོ་རྒྱུས་བཏང་བས་གྲོས་ཚོགས་ནས་སྤྱི་མོས་བྱུང་སྟེ་བཀའ་བློན་དུ་བསྐོ་གཞག་བྱུང་ཞིང༌། བཀའ་ཤག་ནས་འཕྲོད་བསྟོན་བཀའ་བློན་དུ་ལས་འགན་བཀོད་སྒྲིག་དང༌། རིམ་པས་ཕྱི་དྲིལ་དང་འཕྲོད་བསྟེན་གཅིག་ལྕོགས་ཀྱི་བཀའ་བློན་དུ་བསྐོ་གཞག་གནང་བ་དང༌། ད་ལྟ་ཨ་རི་བོད་ཀྱི་དོན་གཅོད་སྐུ་ཚབ་ཀྱི་ལས་འགན་ཞུ་བཞིན་པ་བཅས་དང༌། ༡ དཔལ་འབྱོར་བཀའ་བློན་གནང་བའི་རིང་གཞུང་གི་དཔལ་འབྱོར་སྡེ་ཚན་ཁག་གྱོང་གུད་དུ་འགྲོ་བཞིན་ཡོད་པ་སྒེར་བདག་ཅན་བསྒྱུར་རྒྱུའི་བཀའ་ཤག་གི་དགོངས་པ་ཇི་བཞིན་བསྒྱུར་ཏེ་གཞུང་གི་བང་མཛོད་ལ་ཉེན་ཁ་མེད་པའི་གནས་སྟངས་དུ་གྱུར། ༢ མང་ཚོགས་ཀྱི་དངུལ་ཕོན་ཆེ་གཞུང་གི་ཉར་ཡོད་པ་ཁྲིམས་མཐུན་མིན་པ་མ་ཟད། མ་འོངས་པར་མང་ཚོགས་ཀྱི་དངུལ་བཅོལ་ཕྱིར་སློག་མི་ཐུབ་པའི་གནས་སྟངས་གྱུར་ཉེན་ཡོད་པ་དེའི་གནས་ལས་གྲོལ་བར་བྱས་ཡོད་པ་བཅས་སོ༑ ཁོང་རྣམ་པ་གསུམ་ནི་ྋགོང་ས་མཆོག་གི་ལམ་སྟོན་བཀའ་སློབ་སྤྱི་དང་ཁྱད་པར་འཚེ་མེད་ཞི་བའི་སྒོ་ནས་དབུ་མའི་ལམ་གྱི་ཐོག་བོད་དོན་འཐབ་རྩོད་བྱེད་རྒྱུར་ཆོད་སེམས་དང་ཉམས་མྱོང་ཆེན་པོ་ཡོད་པ་རྒྱ་ཆེན་མང་ཚོགས་ནས་མ་མཁྱེན་པ་མི་སྲིད་ཀྱང༌། གལ་པོ་ཆེ་ལ་ནན་ཏན་དམ་པའི་ཆོས་ལ་རྒྱབ་རྩ་ཞེས་པའི་དཔེ་ལྟར་མི་མང་གི་མཁྱེན་རྟོགས་ཆེད་ནན་ཏན་གྱི་ཚུལ་དུ་ཁོང་གསུམ་གྱི་ལོ་རྒྱུས་སྙིང་བསྡུས་རེ་བརྗོད་པ་ཡིན་པས་རྒྱ་ཆེ་ལྷག་བསམ་གྱི་རབ་ཏུ་ཕྱུག་པ་བོད་མི་མང་ཚོགས་ཀྱི་ཐུགས་ལ་བབས་པར་འདུག་ན་མ་འོངས་པའི་བཀའ་བློན་ཁྲི་པའི་ལས་འགན་དེ་ཁོང་རྣམ་པ་གསུམ་ལས་གང་རུང་ཞིག་ལ་འབུལ་རྒྱུ་ནི་བན་རྒན་བདག་གི་རེ་བ་ཙམ་མ་ཟད་རེ་བསྐུལ་གསོལ་འདེབས་ཀྱང་ཞུ་རྒྱུ་ཡིན།

སྤྱི་ལོ་༢༠༡༠ ། ༧ ། ༢ ཉིན་གྲུབ་བའི་གནས་མཆོག་ཌལ་ཧོར་གནས་སྡོད་འབྲས་ཏྲེ་གུས་ཆུང་བྱམས་པ་དབང་ཆེན་ནས་ལྷག་བསམ་ཆེན་པོས་བྲིས།

འཛམ་གླིང་ཞི་བདེ་རྒྱས་གྱུར་ཅིག །