ང་ནི་སྲིད་སྟེགས་ལ་མི་མོས་པའི་གྲྭ་རྐྱང་ཞིག་ཡིན་ལ། ཆེན་པོའི་ངོ་འཛིན་ལ་མི་དགའ་བའི་གཤིས་ཀྱོང་ཞིག་ཀྱང་ཡིན། ཡིན་ནའང་། ང་ལ་ང་ཡི་གཤིས་ཀ་ཡོད་ལ། ང་ལ་ང་ཡི་རྣམ་དཔྱོད་ཡོད། ང་རྒྱ་གར་དུ་བསླེབས་ནས་མི་ལོ་བཅུ་གཅིག་འགོར་སོང་མོད། ཡར་ཡོང་སྐབས་བལ་ཡུལ་སྣེ་ལེན་ཁང་སོགས་བརྒྱུད་ནས་ཐོ་འགོད་ཀྱི་རིམ་པ་དེ་མ་གཏོགས་རང་གཞུང་གི་ལས་ཁུངས་ཁག་ཏུ་སོང་མྱོང་མེད་ལ། འགྲོ་དོན་ཡང་མི་འདུག རྒྱུ་མཚན་ནི། ང་ལའང་ང་ཡི་འགན་འཁྲི་ཞིག་ཡོད་ལ། ང་ལའང་ང་ཡི་འདུག་སྟེགས་ཤིག་ཡོད།
ངས་འདི་ནས་དེ་རིང་གླེང་འདོད་པ་ནི་ཁ་སང་ང་ལ་ཚོར་བ་གསར་བ་ཞིག་དང་ཡིད་ཆད་ཐོལ་བ་ཞིག་བྱིན་སོང་བས་དེ་རིང་ངེས་པར་དུ་དེ་ཡིག་ཐོག་ཏུ་འགོད་རྒྱུ་ཡིན། ཁ་སང་ངའི་གྲོགས་པོ་ཞིག་དང་ངེད་གཉིས་སྦེལ་ཀོབ་གཞིས་གྲོང་དང་པོའི་རང་བདེན་ཚོགས་ཆུང་དུ་བཙན་བྱོལ་བོད་མིའི་དཔྱ་ཁྲལ་ལག་དེབ་སྦྱོང་དུ་སོང་བ་ཡིན། ངེད་གཉིས་ལས་ཁུངས་ཀྱི་ར་སྐོར་ནང་བསླེབས་དུས་སེར་སྐྱ་སྐོར་ཞིག་ཀྱང་བསླེབས་ནས་ལས་ཁུངས་ཀྱི་སྒོ་འགྲམ་ན་བསྒུགས་འདུག ལས་ཁུངས་ཀྱི་ཁོར་ཡུག་དང་། ལས་ཁུངས་ཀྱི་རྫ་ཁང་རྙིང་བ་ཞིག་རལ་དུ་གྱུར་བར་བལྟས་ན་བཙན་བྱོལ་གྱི་དགོན་པ་ཁག་དང་གཞིས་གྲོང་ཁག་གི་མི་སྒེར་གྱི་ཐོག་རྩེག་རྒྱས་སྤྲོས་ཅན་གྱི་གཞལ་མེད་ཁང་ས་ནས་གནམ་དུ་གཟེངས་པ་དག་དང་གཏན་ནས་མི་འདྲ་བར་ས་འོག་ཏུ་ཐུར་ལ་འཐིམ་གྱིན་པའི་ཡོད་པ་ལྟ ་བུའི་ཚོར་སྣང་ཞིག་བྱུང་། སྐབས་དེར་ཞོགས་པའི་ཆུ་ཚོད་ 9: 15 རེད། ད་དུང་ལས་ཁུངས་ཀྱི་སྒོ་ཕྱེ་མི་འདུག་ལ། ཆར་བ་ཟམ་ཟིམ་ཞིག་འབབ་ཀྱིན་འདུག་པས་ང་ཚོ་ལས་ཁུངས་ཀྱི་སྒོ་འགྲམ་དུ་འཚང་ཁ་ཤིག་ཤིག་ངང་བསྡད་ཡོད། ང་ཚོའི་རྗེས་ནས་ཀྱང་སེར་སྐྱ་ཁ་ཤས་བསླེབས་སོང་བས་ད་ནི་ཕལ་ཆེར་མི་གྲངས་སུམ་ཅུ་ཙམ་ཡོད་ཚོད་རེད། མི་ཞིག་གིས་སྡིགས་མོའི་ཚུལ་དུ་འདི་ཚོར་ཡང་རྒྱ་གར་གྱི་ཤན་ཞུགས་ཡོད་པ་རེད། ཆུ་ཚོད་དགུ་ལབ་ན་ཆུ་ཚོད་དགུ་དང་ཕྱེད་ཀ་ནས་མ་གཏོགས་ཡོང་གི་མ་རེད་ཟེར། རྒྱ་གར་གྱི་ཤན་ཞུགས་པ་ཡིན་མིན་མི་ཤེས་མོད། ངོ་མ་ཆུ་ཚོད་དགུ་དང་ཕྱེད་ཀ་ཡས་མས་ཤིག་ལ་གསར་བུ་གཟུགས་སྟོབས་ཆེ་བ། གདོང་མདོག་ནག་པ། རང་གཤིས་རྩུབ་པ། ཁོག་དཀར་ཞིག་ལོས་ཡིན་སྙམ་པ་ཞིག་ག་ལེར་ཡོང་ནས་སྒོ་ཕྱེ་བ་དང་ལྷན་ལས་ཀ་འགོ་བཙུགས་སོང་། ང་ཚོ་ཡང་ཕལ་ཆེར་དེ་གར་ཐོན་པའི་རིམ་པ་ལྟར་བང་བསྒྲིགས་པ་ཡིན་ལ། དེའི་རྗེས་ནས་ཡང་བསྐྱར་བགྲེས་སོང་ཅུང་ཟད་བལྟས་ཉམས་ཅན་ཞིག་དང་། རང་གི་ན་ཚོད་ལ་ཕངས་སེམས་ཀྱིས་ཉམ་ཐག་པར་གྱུར་བ་ལོས་ཡིན་སྙམ་པའི་རྒས་འཁོགས་གཉིས་བཅས་རིམ་གྱིས་བསླེབས་ཏེ་རང་རང་གི་འདུག་སྟེགས་སྟེང་བསྡད་སོང་། གསར་བུ་དེས་མིའི་གདོང་ལ་མི་ལྟ་བར་ངོ་གདོང་གནག་ནས་རེ་རེ་བཞིན་ཞིབ་གཤེར་བྱེད་ཀྱིན་སྒོར་མོ་ལེན་པ་དང་། ལག་དེབ་སྦྱོང་བ། རྩིས་རྒྱག་པ་ཟུར་ནས་ཞལ་འདེབས་སློང་བ་སོགས་ལས་ཀ་ལྗིད་ཏིག་ཏིག་གིས་ལས་ཀྱིན་འདུག ལས་ཀ་ཧ་ཅང་གོ་རིམ་ལྡན་ལ་རིག་པ་གསལ་བ། ལག་པ་མྱུར་བ་ཞིག་ཀྱང་རེད། སྐད་སྦོམ་ཞིང་འགྲགས་ལ་ཚིག་རྩུབ་ཀྱི་རྣམ་པ་ཞིག་ཡོད་ཀྱང་ཚིག་རྩུབ་རེད་ཟེར་ནའང་མི་འགྲིག་པས་སྐད་ཆ་དེའི་ཕུགས་ཀྱི་ཀུན་སློང་དེ་ཕལ་ཆེར་དཀར་བོ་ཞིག་ལོས་ཡིན་སྙམ་པའི་ཚོར་སྣང་བྱིན་ཐལ། ཨ་མ་ཞིག་གིས་དཔྱ་ཁྲལ་གྱི་སྒོར་མོ་ཕུལ་སོང་། སྐབས་དེར་འགྲགས་ཆ་ཅན་གྱི་སྐད་དེས་ཞལ་འདེབས་ཡོད་ན་གསུངས་རོགས་གནོངས། མེད། སྒོར་གཉིས་ཀྱང་མེད་དམ། སྐད་མགོ་ཅུང་མཐོ། མེད། སྐད་མགོ་ཧ་ཅང་དམའ། མི་རྣམས་ཅུང་དོག་མི་བདེ་བ་འདྲ་ཞིག་ཆགས་སོང་། སིལ་མ་ཡོད་དམ། མེད། སིལ་མ་སློག་རྒྱུ་མི་འདུག སྒོར་གཉིས་ཞལ་འདེབས་བྱས་ན། རེད། རེད། འོ་ཡ་དང་པོ་ཞལ་འདེབས་ཡོད་ལབ་ན་བློ་བདེ་བོ་ཡོང་། ངོ་གདོང་ཧ་ཅང་གནག་ན་ཡང་དེའི་ཕུགས་ན་འཛུམ་མདངས་ཤིག་རང་ཤུགས་ཀྱིས་ལྷང་ལ་བུད་འདུག་པའི་ཚོར་སྣང་ཞིག་བྱུང་། རྐུབ་རྟེགས་སྲུང་བའི་རྒས་འཁོགས་གསུམ་གྱིས་ལས་ཀ་ཅི་ཡང་འཇོན་གྱིན་མི་འདུག་ལ་ལག་པ་ཡང་འདར་གྱིན་འདུག་པས། འདི་ཚོ་ཡང་ལོ་གཞོན་དུས་གསར་བུ་འདི་དང་འདྲ་བར་མི་མང་གི་དབུས་སུ་རང་གི་ཡོན་ཏན་ངོམ་ཆོག་ཆོག་ལོས་ཡིན་སྙམ་སོང་ལ།
རྫོགས་ཆེན་དཔལ་སྤྲུལ་རིན་པོ་ཆེས། རྒས་པ་རྡོ་རྗེ་བྲག་ལ་ཡོད། ། གྲ་རྒས་དམར་ཡག་སྟག་ལ་ཡོད། །བཟང་ངན་ཕ་གཅིག་སྤུན་ལ་ཡོད། །གཞོན་ནུ་་ཤ་རྒྱས་ཁྲག་རྒྱས་དུས། །ཁྱོད་ལས་ཡག་ཅིག་ང་ཡང་ཡིན། །ཁ་མིག་དབང་པོ་གསལ་བའི་དུས། །ཁྱོད་ལས་མཁས་ཤིག་ང་ཡང་ཡིན། །རང་ཡུལ་ཕ་ཁྱིམ་ཡོད་པའི་དུས། །ཁྱོད་ལས་དྲག་ཅིག་ང་ཡང་ཡིན། །ཞེས་པའི་གསུང་འདི་ཡང་ཡིད་ལ་ཤར་སོང་།
དཔེ་མཚོན་འདི་རང་གཞུང་གི་ལས་ཁུངས་གཞན་དག་ལའང་བཀབ་ནས་འདང་ཞིག་བརྒྱབ་ན། བོན་རྒྱ་བསྟན་འཛིན་རབ་རྒྱས་ཀྱིས་མི་རབས་གསར་བའི་སྙིང་སྟོབས་ཀྱི་བསྒྲགས་གཏམ་དང་། ན་གཞོན་གྱི་གནམ་འོག་སོགས་བྲིས་ནས་གནམ་ལ་མཆོང་ཞིང་ས་ལ་སོ་འདེབས་པའི་ཀི་རྒྱངས་དག་ལ་བལྟས་ན་རང་གཞུང་གི་ལས་ཁུངས་མང་ཆེ་བའི་རྐུབ་སྟེགས་ད་དུང་འདི་ལྟ་བུའི་རྒས་འཁོགས་ཚེ་ཕྱི་མར་སང་འགྲོ་དག་གིས་བསྲུངས་ཡོད་པ་མིན་ནམ་སྙམ་པའི་ཚོར་སྣང་ཞིག་བྱིན་སོ ང་།
དངོས་གནས་ཕ་མ་ལས་བཀའ་དྲིན་ཆེ་བ་སུ་ཞིག་ཡོད་མོད། ཁོང་ཚོ་ཡང་ལོ་ན་ཚོད་ཀྱིས་མགོ་ལག་བཀུག་ཡོང་དུས་རང་གིས་ཚེ་གང་ལ་བསགས་པའི་རྒྱུ་ནོར་ལོངས་སྤྱོད་ཁང་ཁྱིམ་ས་ཞིང་དང་བཅས་པ་བུ་དང་བུ་མོར་ཚོར་རྩིས་སྤྲོད་བྱས་ནས་ཚེ་མཇུག་གི་ལམ་བྲོ་ལ་འབད་ནས་མི་ཚེ་དོན་ལྡན་བྱེད་པ་མ་ཡིན་ནམ། རང་གཞུང་གི་མི་རབས་རྒན་པ་ཚོར་མཚོན་ནའང་ང་ཚོའི་ཕ་མ་དང་གཅིག་པ་རེད། བཀའ་དྲིན་གཞལ་ཐབས་མེད། དེ་དག་ལ་མི་འབབ་པའི་ལས་ཀ་ཞིག་ང་ཚོས་ལས་ག་ལ་ཉན། འོན་ཀྱང་ཆོས་ཉིད་དང་། གནས་ལུགས་ཞེས་པའི་ཡིག་འབྲུ་འདི་དག་གི་གོ་དོན་ལ་ང་ཚོས་བསྐྱར་བཅོས་ཇི་ལྟར་བྱེད། འདི་ནི་དངོས་པོའི་གཤིས་ལ་གྲུབ་པའི་གཏན་ཚིགས་ཤིག་རེད། འདི་ཚོ་ཟླ་ཕོག་ཙམ་ལ་ཞེ་ཆགས་པ་ཡིན་ནམ། ཉི་མ་སྐྱེལ་མ་ཐུབ་ཡིན། ཡང་ན་གནས་ལུགས་མི་བརྩི་བ་ཡིན། ངོ་མ་ང་ལ་ཡང་ཚོར་སྣང་ཁྱད་མཚར་བ་ཡོང་གི་འདུག
དངོས་པོ་གང་དང་གང་ལ་གོམས་ཆ་ཆེ་སོང་ན་དེ་གཏོང་མི་ཕོད་པ་ཡིན་རྒྱུ་རེད། ན་ནིང་གསར་དུ་ཐོན་པའི་གློག་བརྙན། ཁ་སང་གི་གཏམ་རྒྱུད་ཀྱི་ནང་དུ་ཡང་། དོན་ངོ་མར་གནའ་གཏམ་དང་ཁ་འབྲལ་མི་ཐུབ་པ་ནི་བྱིས་པ་ཚོ་མ་ཡིན་པར་ཨ་མྱེ་ཉི་མ་རང་ཉིད་རེད། ཅེས་བོད་ཀྱི་སྒྱུ་རྩལ་བ་ཆེན་མོ་སྨན་བླ་སྐྱབས་ཀྱིས་བཤད་ཡོད་པ་དེ་ཡང་འདི་དང་གཅིག་མཚུངས་ལྟ་བུའི་ཚོར་སྣང་བྱུང་། ང་ཕ་ཡུལ་ན་ཡོད་དུས་གྲོང་ཁྱེར་སོགས་སུ་འགྲོ་རྒྱུར་ཤིན་ཏུ་དགའ། རྫོང་དང་། ཁུལ་ཐོག་སོགས་སུ་སོང་ན་ལས་འཆར་ངལ་གསོ་བྱས་ཟིན་པའི་རྒས་འཁོགས་ཚོ་ཚོང་ཁང་དང་། ཟ་ཁང་སོགས་ཀྱི་གྱང་རྩ་དང་ཉི་འཆམ་དག་ན་ཉི་མ་མ་འཁྱོལ་བར་ཁ་བརྡ་སྣ་ཚོགས་བྱེད་པ་དང་། ཤོ་རྒྱག་པ། རྒྱན་འདྲ་མིན་གྱི་རྩེད་མོ་བྱེད་པ་སོགས་མང་པོ་མཐོང་རྒྱུ་འདུག་ལ། ལས་ཀ་མེད་དུས་ཁོམ་སོང་ནས་ག་བྱེད་འདི་བྱེད་མི་འདུག་ཟེར་མཁན་ཡང་ཡོད། ཁོ་ཚོ་ངལ་གསོ་བྱས་ཚར་ན་ཡང་ཟླ་ཕོགས་ཡོད་པས་དཀའ་ངལ་མེད་ན་ཡང་ཁ་ཤས་ཀྱིས་ཚོང་ཙག་ཙིག་རྒྱག་པ་སོགས་ཀྱི་ཉི་མ་གཏོང་ཐབས་བྱེད་ཀྱིན་འདུག་ལ། ཡར་འབྲོག་ཕྱོགས་ལ་སོང་ན་དེ་ཚོ་དམྱལ་བར་སྐྱེ་ན་སྐྱེ་རབ་འཆི་ཁ་རྒས་ཁ་མ་ཎི་མན་རྡོག་རེ་བཏོན་ནས་ཡུལ་ནས་འདུག་མི་ཐུབ། སེམས་ཅན་གྱི་མིག་སྟོན་བྱས་ནས་ཟེར་གྱིན་འདུག ད་ཡང་ཉོག་ཐལ་བྲིས་ཀྱིན་བྲིས་ཀྱིན་ཚར་རྒྱུ་མེད་ཀི། གང་ལྟར་ཚོར་སྣང་ཙམ་ཡིན། ད་འབྲི་མཚམས་འཇོག་གི་ཡིན།
རྩོམ་སྒྲིག་པའི་གསལ་བཤད། རྩོམ་པ་པོའི་རེ་འདོད་བཞིན་འདིར་སྨྱུག་མིང་བཀོད་ཡོད།
འདི་ལ་སུ་དང་གང་། ཡང་ན་མང་ཉུང་གི་རྒྱབ་སྐྱོར་ཐོབ་རྒྱུ་དེ་གལ་ཆེན་པོ་མ་རེད་སྙམ། གནས་ཚུལ་བདེན་པ་ཡིན་མིན་དེ་རེད། གཞུང་ཞབས་འདེམ་ལྷན་ཁོངས་ཡོད་པའི་སྲི་ཞུ་ལས་བྱེད་ཡིན་ནའང་འདྲ། ཟུར་སྐྱོང་སྡེ་ཚན་ཁག་ཡིན་ནའང་འདྲ། ཡིག་རྒྱུགས་ལམ་ནས་སམ་ཆོད་གན་གང་ཡིན་རུང་ཡར་འཛུལ་ཞུགས་བྱེད་དུས་རང་ལོ་ལ་ཚད་ཡོད་ཅིང་། ཞབས་ལོ་༣༠ཟིན་མིན་ཅི་ལྟར་ཡང་རང་ལོ་ ༦༠ ལོན་པ་དང་རྒལ་ཡོལ་གཏོང་གི་ཡོད་པ་རེད། དེ་ཡིན་དུས་ལས་བྱེད་རྒན་གྲས་མང་པོ་ཞིག་གིས་ས་མིག་བཀག་འདུག་སྙམ་པའི་འདུ་ཤེས་དེ་ནོར་འཁྲུལ་རེད། འདི་རང་གཞུང་ཙམ་མ་ཟད་རྒྱལ་སྤྱིའི་འགྲོ་སྟངས་ཤིག་ཀྱང་རེད། སྤྱི་འཐུས་ལྟ་བུ་མི་དམངས་ཀྱིས་འོས་འདེམས་བྱས་པའི་འཐུས་མི་ཡིན་ན་གནས་ཚུལ་ཁ་ཁ་རེད། ད་ཐེངས་ཞུ་རྒྱུ་དེ་ཙམ་ཡིན། ཞུ་ནོར་ཐེབས་ཡོད་ན་དགོངས་དག་ཞུ་རྒྱུ་ཡིན།
བློ་གྲོས་རྒྱལ་བོས་ཤེས་ཡོད་ན་བཟང་གི།༼གཞུང་གི་ཁྲིམས་སྒྲིག་ལ་རྒྱུས་མེད་པའི་རྟགས་རེད། ༽མུ་མཐུད་གང་ཤེས་པ་དེ་བཤད་རོགས།
ཁྲི་གཡང་དྲུང་ལགས་ཀྱིས་དགོངས་ཚུལ་གསུངས་པར་དགའ་བོ་བྱུང་། འོན་ཀྱང་ཞིབ་འཇུག་བྱེད་རོགས། ངའི་སྐད་ཆ་བདེན་པ་མིན་ན་རྒྱབ་སྐྱོར་བྱས་ཀྱང་ཕན་པ་མེད།
མདུང་རྩེ་ལགས་ཀྱིས་རྒྱབ་སྐྱོར་གནང་བར་དགའ། འོན་ཀྱང་དྲ་གྲོགས་འགས་དེ་འདྲ་རང་རེད་མི་འདུག་ཟེར་གྱི་འདུག་པས་རང་གཞུང་གི་ལུས་ཁུངས་ཁག་ཏུ་ཞིབ་འཇུག་གནང་ཐུབ་ན་ཡག་པོ་ཡོད་ས་རེད།
ལྷ་མོ་དོན་གྲུབ་བདེན་པ་རེད། སྙན་ངག་པའི་སེམས་ཁམས་མ་འགྲིག་པ་འདྲ། ཞིབ་འཇུག་བྱེད་རོགས།
ཉི་ཟླའི་མགྲོན་བདག་གིས་ཀྱང་རྒྱབ་སྐྱོར་གནང་འདུག་ལགས་སོ། །
གླག་སྨྱོན་གྱིས་རྒྱབ་སྐྱོར་གནང་འདུག ལགས་སོ། །
ཞག་སྒྲོན་ལགས། རྒས་འཁོགས་དེ་ཚོ་སྙིང་རྗེ་དགོས་པ་ཞིག་རེད།
ཁུངས་དང་ལུང་། རྒྱུ་མཚན་མེད་པར་བཤད་རྒྱ་དང་འབྲི་རྒྱུར་དགའ་མཁན་མང་པོ་ཡོད་པ་དངོས་ཡོད་ནའང་། སྐུ་ཉིད་རྒྱ་གར་དུ་ཕེབས་ནས་མི་ལོ་བཅུ་གཅིག་ཙམ་འགྲོ་གིན་ཡོད་ན་ད་ནི་ཅུང་འཐོམས་སངས་རན་མིན་འགྲོ་བསམ། ཁྱེད་ཀྱིས་”དཔེ་མཚོན་འདི་རང་གཞུང་གི་ལས་ཁུངས་གཞན་དག་ལའང་བཀབ་ནས་འདང་ཞིག་བརྒྱབ་ན། བོན་རྒྱ་བསྟན་འཛིན་རབ་རྒྱས་ཀྱིས་མི་རབས་གསར་བའི་སྙིང་སྟོབས་ཀྱི་བསྒྲགས་གཏམ་དང་། ན་གཞོན་གྱི་གནམ་འོག་སོགས་བྲིས་ནས་གནམ་ལ་མཆོང་ཞིང་ས་ལ་སོ་འདེབས་པའི་ཀི་རྒྱངས་དག་ལ་བལྟས་ན་རང་གཞུང་གི་ལས་ཁུངས་མང་ཆེ་བའི་རྐུབ་སྟེགས་ད་དུང་འདི་ལྟ་བུའི་རྒས་འཁོགས་ཚེ་ཕྱི་མར་སང་འགྲོ་དག་གིས་བསྲུངས་ཡོད་པ་མིན་ནམ་སྙམ་པའི་ཚོར་སྣང་ཞིག་བྱིན་སོང་།”ཞེས་བཤད་པ་ནི་རང་གཞུང་གི་ཁྲིམས་སྒྲིག་ལ་རྒྱུས་མེད་པའི་རྟགས་རེད། གཞུང་གི་སྲི་ཞུ་བ་མཐོ་དམའ་གང་ཞིག་ཡིན་ཡང་རང་ལོ་ ༦༠ ཟིན་མཚམས་རྒལ་ཡོལ་དུ་འགྲོ་དགོས་པ་རེད། རྐུབ་སྟེགས་ལ་འཐམ་ནས་བསྡད་ས་ཞིག་ཡོད་པ་མ་རེད། ཁྱེད་རང་འགྲོ་སའི་རང་བདེན་ཚོགས་ཆུང་གི་མི་སྣ་དེ་དག་ལས་བྱེད་མ་རེད། ཁོང་ཚོ་ནི་ས་གནས་མི་དམངས་ཀྱིས་འོས་འདེམས་བྱས་པའི་ཚོགས་མི་རེད། ཁོང་ཚོ་ལ་ཉིན་དོད་ཙམ་ལས་གླ་ཆ་ཡོད་མེད་རྒྱུས་ཡོད་རྣམས་ལ་ཞིབ་ཏུ་དྲིས། ཕལ་ཆེར་ཁྱེད་ནས་ཆུ་ཚོད་ཕྱེད་ཙམ་ལ་སྒུག་དགོས་བྱུང་བ་དེས་སྤོ་ལངས་པ་མིན་འགྲོ་ཨ་ལ་ཀུ་རེ་ཡིན།
ང་ཡང་ཁྱོད་ཀྱི་དགོངས་ཚུལ་མོས་པ་ཡོད།
བཀའ་དྲིན་ཆེ།
བདེན་པའི་ཚིག་ལ་རྒྱབ་སྐྱོར་ལོས་ཡོད། ཁྱེད་ཀྱིས་སྐད་ཆ་འདི་ལ་གོ་ཤེས་ན་གོ་རྒྱུ་འདུག ཉམས་སུ་ལེན་ཤེས་ན་ལེན་རྒྱུ་མང་པོ་འདུག གཞོན་སོ་དཀར་དབང་ཡར་ལ་དར་དུས་ཅི་ཡང་མ་འཇོན་ན་རྒས་ཤི་སྐྲ་དཀར་པོ་མགོ་ཐོག་ཏུ་བབ་དུས་མི་འཇོན་པ་རང་གིས་ཀྱང་ཤེས་ལ་གཞན་གྱིས་དཔོག་ཐུབ། ཡིན་ནའང་གཏམ་དང་སྙན་གྲགས་ཙམ་ལ་མགོ་བོ་ཡོངས་སུ་འཁོར་ནས་ཨུ་ཚུགས་ཀྱིས་རྒན་ཡོལ་དུ་མི་སྡོད་རྐུབ་སྟེགས་ཤིག་རེག་ཆཻད་དུ་ཐབས་ཇུས་སྟོང་གིས་ཡོང་མཁན་ཞིག་ཡོད་ན་དེ་ནི་སྤྱི་ཚོགས་ཁེ་དབང་སྒེར་བདག་བྱས་པ་དང་གཉིས་སུ་མེད། མི་རབས་གསར་པ་ཞེས་པའི་ཚིག་འབྲུ་འདི་ལ་བཤད་པ་ལྟར་གྱི་རིན་ཐང་ལྡན་ཡོད་མེད་ཚོད་བགམ་ཞིག་བྱེད་དགོས་པར་མཐོང་།
དེ་ནི་དུས་ལ་བབ་པ་ཞིག་ཡིན། རྒན་རབས་པ་རྣམས་ཀྱིས་མི་ཚེ་གོང་པོར་མི་རིགས་ཀྱི་ཞབས་འདེབས་ཞུས་པའི་བཀའ་དྲིན་ནི་ནམ་ཡང་བརྗེད་མི་སྲིད།
ད་ནི་མི་རབས་གསར་པའི་དཔུང་སྡེ་ཞིག་དཔའ་སྐད་སྒྲོག་བཞིན། ལག་རྡང་བགྲེང་གིན་ཐོན་བྱུང་། ན་གཞོན་གྱི་རུ་ཁག་ཅིག་ཀི་སྒྲ་འདོན་བཞིན་ལ་རྒྱའི་སྙིང་ཁམས་རྒྱས་ཤིང་། ཤེས་ཡོན་གྱི་ལུས་སྟོབས་རྒྱས་པའི་དཔུང་ཚོགས་ཤིག་ཐོན་བྱུང་།
རྒན་རབས་པ་ལགས། ཅིས་ཀྱང་ཁོང་ཅག་ལ་གོ་སྐབས་ཐཻངས་གཅིག་སྤྲོད་དང་།
ལས་ཁུངས་ཆེ་ཆུང་ཁག་ཚང་མའི་ནང་ལ་ལས་བྱེད་ཅི་ཙམ་ཡོད་པ་དང། དེ་དག་གི་ནང་ན་རྒན་གཞོན་གྱི་མང་ཉུང་ཅི་ཙམ་ཡོད་མེད། རྒན་གཞོན་བར་གྱི་བྱ་བའི་གྲུབ་འབྲས་ལ་ཁྱད་པར་ག་རེ་ཡོད་མིན་བཅས་ལ་ཞིབ་འཇུག་བྱས་ནས་ད་གཟོད་དགེ་སྐྱོན་ཟེར་བ་ཞིག་གླེང་འོས་པ་ལས། དེ་རིང་གཅིག་མཐོང་བ་དང་སང་ཉིན་གཅིག་མཐོང་བ་དེ་ཙམ་དཔེ་མཚོན་དུ་བཀོད་ནས་གནད་དོན་གླེང་བ་འདི་དག་ནི་ཚན་རིག་དང་མཐུན་པའི་སྐད་ཆ་མ་རེད།
རྫོགས་ཆེན་དཔལ་སྤྲུལ་རིན་པོ་ཆེས། རྒས་པ་རྡོ་རྗེ་བྲག་ལ་ཡོད། ། གྲ་རྒས་དམར་ཡག་སྟག་ལ་ཡོད། །བཟང་ངན་ཕ་གཅིག་སྤུན་ལ་ཡོད། །གཞོན་ནུ་་ཤ་རྒྱས་ཁྲག་རྒྱས་དུས། །ཁྱོད་ལས་ཡག་ཅིག་ང་ཡང་ཡིན། །ཁ་མིག་དབང་པོ་གསལ་བའི་དུས། །ཁྱོད་ལས་མཁས་ཤིག་ང་ཡང་ཡིན། །རང་ཡུལ་ཕ་ཁྱིམ་ཡོད་པའི་དུས། །ཁྱོད་ལས་དྲག་ཅིག་ང་ཡང་ཡིན། །ཞེས་གཉའ་འབྲོང་ཐུ་བུའི་ཟུར་དུ་བཀོད་པ་རྒྱུ་མཚན་ཅན་ཞིག་དྲང་འདུག་ཡ།ཁོས་བསམ་ཚུལ་བདེན་དང་བདེན་དྲང་བདེན་གྱི་གནས་ཚུལ་དེ་འདྲ་བཀོད་ན་སྤྱི་ཚོགས་ཡར་རྒྱས་ལ་འགྲོ་བའི་ཆ་རྐྱེན་ཡག་ཤོས་ཞིག་རེད།
རེད་རེད་དངོས་གནས་བདེན་པ་བདེན་ཀྱང་རེད།
ངོ་མ་བདེན་པ་བྲིས་འདུག་་་་་་་་་ཡ། ཕོ་གསར་དེ་ལ་རོགས་པ་མི་ཁ་ཤས་ཡོད་པ་དེ་དག་གི་ནང་དུ་བོད་ཡིག་འབྲི་མི་ཤེས་བ་ཕལ་ཆེར་ཡོད་པ་འདྲ་ཡང་ན་ལུས་ཟུངས་ཟད་ནས་འབྲི་མ་ཐུབ་གང་ཡིན་མི་ཤེས་མོད་ཡིག་གེ་འབྲི་ས་ཞིག་ནས་མི་ཚོགས་མང་པོ་སྒུག་ཡོད་ན་ཡང་ཕོ་གསར་དེ་རང་བསྡད་འདུག