བོད་ནང་གི་རྩོམ་པ་བོ་གཉན་དང་བུད་ངྷ་གཉིས་ཟླ་སྔོན་མའི་ནང་འཇུས་འདུག་ཀྱང་། ད་ལྟའི་ཆར་ས་གནས་གང་དུ་བཀག་ཉར་དང་ཁོང་གཉིས་ཀྱི་ད་ལྟའི་གནས་སྟངས་སོགས་གང་ཡང་ཤེས་རྟོགས་བྱུང་མི་འདུག ཁོང་གཉིས་འཛིན་བཟུང་བྱེད་དོན་ ༢༠༠༨ ལོའི་ཤར་དུང་རིའི་སྟེང་རྩོམ་ཡིག་སྤེལ་བར་འབྲེལ་བ་ཡོད་པར་དོགས་གཞི་བྱེད་ཀྱིན་ཡོད་ཟེར།
ཁ་སང་སྟེ་ཟླ་འདིའི་ཕྱི་ཚེས་ ༡༣ ཉིན་ཨེ་ཤ་ཡ་རང་དབང་རླུང་འཕྲིན་ཁང་ལ་བོད་ནས་ཁུངས་ལྡན་གནས་ཚུལ་འབྱོར་བ་ལྟར་ན། ཟླ་སྔོན་མའི་ཕྱི་ཚེས་ ༢༡ ཉིན་རྒྱ་ནག་གིས་བོད་ནང་གི་རྩོམ་པ་པོ་གྲགས་ཅན་གཉན་དང་བུད་ངྷ་གཉིས་འཛིན་བཟུང་བྱས་ཡོད་ནའང་། ད་ལྟ་གང་དུ་འཛིན་བཟུང་བཀག་ཉར་བྱས་ཡོད་མེད་གསལ་པོ་ཤེས་རྟོགས་མེད་པ་དང་། འཛིན་བཟུང་བྱེད་དོན་ནི་ ༢༠༠༨ ལོའི་བོད་མིའི་ཞི་བའི་ངོ་རྒོལ་ཡར་ལངས་སྐོར་ཤར་དུང་རི་དུས་དེབ་ཐོག་རྩོམ་ཡིག་བྲིས་བ་དེའི་སྐོར་ཡིན་པར་དོགས་གཞི་བྱེད་བཞིན་ཡོད་འདུག
གཉན་གྱི་དངོས་མིང་ལ་འཇང་རྩེ་དོན་ཁོ་ཟེར་བ་དང་རྔ་བ་ཁུལ་ཁྱུང་མཆུ་རྫོང་ས་གནས་ལོ་རྒྱུས་ཞིབ་འཇུག་ལས་ཁུངས་ཀྱི་ལས་བྱེད་རེད། ཁོང་ནི་དེང་སྐབས་བོད་ནང་གི་རྩོམ་རིག་སྒྱུ་རྩལ་གྱི་སྤྱི་ཚོགས་ཁྲོད་ཤུགས་རྐྱེན་ཡོད་པའི་སྙན་ངག་པ་དང་འབོལ་རྩོམ་འབྲི་མཁན་འབྲི་མཁན་ཞིག་ཡིན་ལ། ཁོང་གི་སྙན་རྩོམ་དེབ་༼རོ་ལངས་༽ཞེས་པ་ ༢༠༠༢ ལོར་ཀན་སུ་མི་རིགས་དཔེ་སྐྲུན་ཁང་གིས་པར་སྐྲུན་བྱས་ཡོད། དེ་བཞིན་ཁོང་གི་བརྩམས་ཆོས་ལ་སྦྲང་ཆར་དུས་དེབ་སོགས་སུ་བྱ་དགའ་མཐོ་ཤོས་ཐེངས་མང་རག་མྱོང་ཡོད་འདུག
བུད་ངྷ་ལགས་ནི་རྔ་བ་རྫོང་བར་མ་ཞང་བོད་སྨན་ཁང་གི་སྨན་པ་ཞིག་ཡིན་པ་དང་། ནམ་རྒྱུན་ཁོང་ནི་འབོལ་རྩོམ་སོགས་བརྩམས་ཆོས་མང་པོ་སྤེལ་མཁན་ཞིག་རེད། ནུབ་བྱང་མི་རིགས་སློབ་གྲྭ་ཆེན་མོའི་སློབ་མ་ཚོས་རྩོམ་སྒྲིག་བྱས་པའི་ ༢༠༠༨ ལོའི་ཤར་དུང་རི་དུས་དེབ་ནང་། ༢༠༠༨ ལོའི་བོད་ཆོལ་ཁ་གསུམ་གྱི་ཞི་བའི་ངོ་རྒོལ་སྐོར་ལ་རྩོམ་ཡིག་མང་པོ་ཞིག་སྤེལ་ཡོད་པའི་ནང་། ཁོང་གིས་ང་ཚོའི་ལུས་ཐོག་ན་འགྲོ་བ་མིའི་ཐོབ་ཐང་ག་འདྲ་ཞིག་ཡོད་ཅེས་པ་དང་། ཕྱིར་རྟོག་དང་བསམ་གཞིག་ཅེས་པ་སྤེལ་ཡོད།
དེ་བཞིན་ནུབ་བྱང་མི་རིགས་སློབ་གྲྭ་ཆེན་མོའི་སློབ་མ་དང་ཤར་དུང་རིའི་རྩོམ་སྒྲིག་པ། གཞོན་སྐྱེས་རྩོམ་པ་པོ་ཐེའུ་རང་ལགས་ད་ལོའི་ཕྱི་ཟླ་ ༤ བར་རྒྱ་ནག་གཞུང་གིས་འཛིན་བཟུང་བྱས་པ་ནས་ད་བར་ཁོང་གི་གནས་ཚུལ་གང་ཡང་ཤེས་རྟོགས་མེད་པར་ལྷག་ཡོད་ལ། ད་ལོའི་ཕྱི་ཟླ་ ༥ ནང་རྔ་བ་ཁུལ་མི་རིགས་མཐོ་རིམ་སློབ་འབྲིང་གི་དགེ་རྒན་ལྔ་འཛིན་བཟུང་བྱས་པའི་སྐོར་ལའང་ད་ལྟའི་བར་གནས་ཚུལ་གོ་ཐོས་ཅི་ཡང་བྱུང་མེད།
ཁོང་ཚོ་ནི་ཕ་ཡུལ་མཛོད་དགེ་ནས་ཡིན་པའི་ཆོས་འཕེལ་དང་ཀིརྟི་སྐྱབས། ཐེ་བོ་ནས་ཡིན་པའི་བསོད་ནམས། མཚོ་སྔོན་ནས་ཡིན་པའི་རྡོ་ལ། རྔ་བ་རྫོང་ནས་ཡིན་པའི་གཏམ་མེ་བཅས་ཡིན། ཁོང་ཚོ་འཛིན་བཟུང་བྱེད་དོན་གཙོ་བོ་སློབ་གྲྭའི་ནང་སློབ་མ་ཚོས་སྒེར་ངོས་ནས་པར་སྐྲུན་བྱེད་བཞིན་པའི་གནམ་ལྕགས་ཞེས་པའི་ཚགས་པར་ཞིག་ཡོད་པར། དགེ་རྒན་དེ་ཚོས་དཔལ་འབྱོར་སོགས་ཀྱི་རྒྱབ་སྐྱོར་བྱས་ཚུལ་དང་ཚགས་པར་དེར་ཆབ་སྲིད་དང་འབྲེལ་བའི་ནང་དོན་བསྲེས་ཡོད་ཚུལ་བརྗོད་བཞིན་ཡོད་འདུག་ཟེར།
གསར་འགོད་པ། ཨ་རིག་འགྱུར་མེད།
ད་ཡིན་ན་ཡང་རླབས་ཆེན་གྱི་སྐྱེས་བུ་གཉིས་མུན་ནག་དུ་ཁྲིད་སོང་བ་རེད། ཤུལ་དུ་འུ་ཚོས་འཇོན་པ་ནི་དྲ་ལམ་ནས་སྡུག་སྐད་རེ་རྒྱག་རྒྱུ་འདི་རེད།
བོད་ནང་ནས་རྩོམ་པ་བོ་དང་གྲགས་ཅན་མི་སྣ་རེ་འཇུས་སོང་དུས་ངའི་སེམས་སུ་ང་ཚོ་ཕྱི་ལོག་ཏུ་གྱར་ཏེ་གྱི་ནར་གནས་པ་འདིས་ཁོང་ཚོ་ལ་ཕོག་ཐུག་བཏང་ཨེ་འགྲོ་དང་། ང་ཚོ་ཡང་ཁོང་ཚོ་འཇུ་དགོས་པའི་རྐྱེན་རྩ་དང་ཉེས་ཅན་པར་གྱུར་ཨེ་འདུག་བསམ་ནས་དོགས་པ་ཡང་དང་ཡང་དུ་བསུ་བཞིན་ཡོད།
རྩོམ་པ་བོ་འཇུ་བཟུང་གི་ལམ་ལུགས་ནི་གསར་བ་ཞིག་མིན་པར་ཚང་མའི་ཤེས་དགོས ། དེ་ཧ་ལས་རྒྱུ་ཅིའང་མེད ། རང་དབང་ལ་ཚད་བཀག་ཡོད་ས་ནས་འཇུ་བཟུང་ལ་རྫོགས་མཐའ་མེད །
བོད་གཞིས་ཀྱི་ཤེས་ཡོན་པ་ཚོ་ལ་གདུང་སེམས་ཞུ
ཀྱེ་་་གྲོགས་པོ་ཚོ་དཔའ་རྩལ་དང་སྙིང་སྟོབས་རྣམ་དཔོད་དང་སྤྱང་གྲུང་ལ་རྒྱ་དང་ཞེན་ཁོག་ཡོད་ན་་་་་་་་་་ལངས་རིན་མི་འདུག་གམ། གཟིགས་དང་ད་ལོ་གཅིག་པུར་ང་ཚོའི་ཤེས་ཡོན་པ་ག་ཚོད་འཛིན་བཟུང་བྱས་སོང་དེ་དག་ཅི་ཞིག་གི་ཆེད་དུ་འཛིན་གྱིས་ཡོད་མེད་ང་ཚོ་ཚང་མས་ཤེས་གསལ་ལྟར་རེད། སོང་ཙམ།
ང་ཚོ་ནང་ཁུལ་ལ་མ་གཏོག་དཔའ་རྩལ་དང་སྙིང་སྟོབས་རྣམ་དཔོད་དང་སྤྱང་གྲུང་ལ་རྒྱ་དང་ཞེན་ཁོག་མེད་པ་ཡིན་ནམ་་་་དེ་ནི་གཏན་ནས་ཡིན་ཚོད་མེད་་་་་་་།
རྩོམ་པ་པོ་ནི་མི་རིགས་ཀྱི་མགྲིན་ཚབ་པ་དང༌། བསམ་བློའི་འཆར་འགོད་པ། རྒྱལ་ཁབ་ཀྱི་བཟོ་བཀོད་པ་སོགས་ཡིན། ཡིན་ནའང༌། བོད་ནང་གི་མི་རིགས་འདིའི་མགྲིན་ཚབ་པ་སྟེ། བོད་ཀྱི་རྩོམ་པ་པོ་ཚོར་མི་རིགས་འདིའི་སྐྱིད་སྡུག་སྨྲར་འདོད་ཀྱི་སྤོབས་པ་ཡོད་ཀྱང་རང་དབང་མེད་པ་མ་ཟད་གཅིག་གཅིག་གཉིས་གཉིས་བྱས་ནས་ཁྲིད་འགྲོ་གི་འདུག
ད་ནི་ཕྱི་སྡོད་བོད་ཀྱི་རྩོམ་པ་པོ་མཐུན་ཚོགས་ཀྱིས་སྣེ་ཁྲིད་འོག་རང་དབང་གི་རྩོམ་པ་པོ་དང་དེ་མིན་མི་མང་སོགས་ནས་ཀྱང་ཁོང་ཚོའི་ཆེད་དུ་རྒྱལ་སྤྱི་ལ་འབོད་སྐུལ་ཞུ་དགོས་ན་འདྲ། རྒྱ་ནག་ལ་ངོ་རྒོལ་བྱེད་དགོས་ན་འདྲ། གང་ལྟར་གྲགས་མེད་ངང་མ་སྡད་ན་སྙམ།
ང་ཚོའི་མི་རིགས་ཀྱི་བླ་སྲོག་ལྟ་བུ། ཤེས་ཡོན་གྱི་སྡེ་ཚོགས་དང་། གྲགས་ཅན་གྱི་གླུ་པ། ཁོར་ཡུག་སྲུང་སྐྱོབ་པ་སོགས་འདི་ལྟར་ཉིན་མ་རེ་རེར། བཙོན་དུ་བསྡད་ན། དོན་དམ་ང་ཚོར་ཕན་གྱི་ཡོད་དམ། ཡང་ན་གནོད་ཀྱི་ཡོད།
འདི་ལྟར་གྱུར་ན་ང་ཚོའི་ཕ་ས་འདི་སུས་སྐྱོང་གིན་རེད། ཡང་ན་ཁོ་པ་ཚོས་ང་ཚོར་ནུས་པ་མེད་པ་མ་ཤེས་པར། འདི་ཕྱོགས་སུ་ད་དུང་རེ་བ་ཞིག་བྱེད་ཀྱི་ཡོད་དམ། དེ་མིན་ཁོ་པ་ཚོས་བཙན་བྱོལ་བོད་མི་ལྟ་ཅི། རྒྱལ་སྤྱིས་ཀྱང་བོད་འདི་སྐྱོབ་ཐབས་མེད་པ་ཤེས་དུས། འུ་ཐུག་ཐབས་ཟད་ཀྱི་འཐབ་རྩོད་གནང་གི་ཡོད་དམ།
ངོ་མ་ཕངས་པོ་རེད། ཁོ་པ་ཚོའི་རིགས་རྣམས་ད་ལྟ་ངེས་པར་དུ་རང་སར་འཚོ་གནས་དགོས་ཀྱི་ཡོད། བཙོན་དུ་ཚུད་ཟིན་པའི་ཉིན་དེ་ནས་ཕལ་ཆེར་ཚར་བ་རེད། ང་ཚོས་ཁ་སངས་ནས་ཁོ་པ་ཚོར་ཡག་ཉེས་ཇི་ལྟར་ཡང་སྤྱི་ཚོགས་དེའི་ནང་། གསོན་པོར་ཞུགས་རོགས། ཇི་ཙམ་མང་བ་བཙོན་དུ་བཞུགས་པ་དེ་ཙམ་གྱི་ང་ཚོའི་ཕམ་ཁ་ཡིན་པ་དེ་གསལ་བཤད་བྱེད་དགོས།
བོད་གཞིས་ཀྱི་ཤེས་ཡོན་པ་ཚོས་རང་སྲོག་ལ་མི་འཛེམས་པར་བོད་སྤྱི་བའི་ལས་དབང་ལ་འདི་ལྟར་གཏོང་ཕོད་ཆེ་བ་འདི་དངོས་ལོ་ངོ་སྟོང་གི་ཡར་སྔོན་གྱི་བཙན་པོས་གསུམ་གཉིས་ས་ལ་དབང་བསྒྱུར་སྐབས་ཀྱི་སྙིང་སྟོབས་དེ་ད་ལྟ་དངོས་སུ་སད་འདུག་པ་ནི་དངོས་གནས་དགའ་འོས་པ་ཞིག་རེད་མོད། འོན་ཀྱང་ཁོང་ཚོའི་ད་ལྟའི་གནས་བབས་འདི་བསམ་ན་དངོས་གནས་སེམས་འཁུར་ཇེ་ཆེ་ནས་ཇེ་རེད།
ངོ་མ་གནས་ཚུལ་འདི་འདྲ་གོ་ཐེངས་རེར་ཡང་།
མི་ཀོང་ན་མཆི་མ་འཁོར་ཡོང་ཞིང་།
སེམས་གཏིང་ནས་ཟུག་གཟེར་ལངས་ནི་ཟིག་རེད།
ཁོང་གཉིས་བཟུང་བ་ལ་ཁ་དང་ཁོག་ནས་ཕངས་སེམས་ཤིག་སྐྱེས་སོང་། ལྷག་པར་དུ་གཉན་ལགས་ནི་བོད་ནང་དུ་ཤུགས་རྐྱེན་ཆེས་ཆེ་བའི་གཞོན་སྐྱེས་སྙན་ངག་པ་ཞིག་ཡིན། ད་ལྟ་ལ་ཐུག་གི་བར་གྱི་ཁོང་གི་རྩོམ་ཡིག་དག་གི་རིན་ཐང་ནི་རང་རེའི་གངས་ཅན་པའི་གཙུག་ལག་གི་རྒྱ་མཚོ་ན་འོད་འཚེར་བའི་མུ་ཏིག་དེ་དག་གོ་ཞེས་བརྗོད་སྤོབས།
ལོ་ཤས་ཀྱི་རྗེས་ནས་བོད་ནང་གི་རྩོམ་པ་པོ་དང་སྒྱུ་རྩལ་བའི་ཁ་གྲངས་བརྩི་དུས། མང་ཆེ་བ་བཙོན་ཁང་དུ་ཡོད་ངེས། བཙོན་དུ་མེད་པའི་རྩོམ་པ་པོའི་གྲངས་འབོར་ཉུང་ལ། བརྩམས་ཆོས་ཀྱང་ཇེ་ཉུང་ལ་འགྲོ་གི་རེད། ལྷག་དོན་བོད་མི་རིགས་ཀྱི་སྐྱིད་སྡུག་དང་འབྲེལ་བའི་དེབ་དང་གཞས་ཀྱི་འོད་སྡེར་སོགས་མཐོང་དཀོན་པོ་ཆགས་རྒྱུ་རེད།
བཙོན་ནས་ཕྱིར་ཡོང་བའི་རྩོམ་པ་པོ་རྣམས་དབང་བོ་སྐྱོན་ཅན་ཡིན། གཞས་པ་དང་གཞས་མ་ཚོ་ཡང་དབང་བོ་སྐྱོན་ཅན་ཡིན།
མུ་མཐུད་ནས་འདི་ལྟར་ཕྱིན་ཚེ། སྙན་ངག་གི་རྦ་རླབས་དེའི་མགོ་ཡལ་འགྲོ་གི་རེད། གླུ་གཞས་ཀྱི་སྒྲ་དབྱངས་འདིའི་རྒྱུན་ཆད་འགྲོ་གི་རེད། དེབ་ཕྲེང་གི་བང་རིམ་དེ་ཡང་བཤིག་འགྲོ་གི་རེད།
ཁུ་སིམ་མེར་ཉལ་སྡོད་མཁན་ཚོར། རྒྱ་ནག་གཞུང་གིས་མགོ་ལ་བྱིལ་བྱིལ་བྱེད་བཞིན་གཏན་དུ་གཉིད་ཁུག་འཇུག་གི་རེད། ཞིང་འབྲོག་མང་ཚོགས་ཀྱང་གཉིས་ཁུག་འགྲོ་གི་རེད། གཉིད་རིང་པོ་ཞིག་དང་མཉམ་དུ་ན་ཚ་དང་ཟུག་གཟེར་མེད་པའི་སྒོ་ནས་རྩ་མེད་ལ་གཏོང་གི་རེད།
ངོ་མ་བོད་པ་ཚང་ལ་ཡོད་ན་མེད་ན་ཚོ་རེ་རེ་བཞིན་འཇུས་སོང་དུས་འུ་ཅག་གིས་ད་དུང་ཆོལ་ཁའི་ཕྱོགས་ཞེན་ལ་བྲེལ་ནས་འུར་ཟང་ཟིང་དུ་ལུས་ཡོད། ཇི་འདྲའི་ཡིད་ཕང་པ་ལ་ཨང་། ཁོང་ཚོའི་བདེན་དོན་གྱི་འབོད་སྒྲ་གཏན་ནས་གཏན་དུ་ནུབ་པ་མེད་པར་སྨོན།