སྲིད་བློན་ལ་བཀའ་དྲིན་ཞུས་པ།

དབྱིན་ཇིའི་སྲིད་བློན་གྱིས་བོད་དོན་ལ་རྒྱབ་སྐྱོར་གནང་རྒྱུ་ཡིན་ཞེས་གསུངས་བར་བོད་མི་མང་སྤྱི་འཐུས་ལྷན་ཚོགས་ཀྱིས་བཀའ་དྲིན་ཆེ་ཞུས་ཡོད་འདུག

བོད་གཞུང་དྲ་རྒྱའི་ཐོག་གནས་ཚུལ་སྤེལ་བ་ལྟར་ན། ཉེ་ཆར་འདེམས་ཐོན་བྱུང་བའི་དབྱིན་ཇིའི་སྲིད་བློན་གསར་པ་ཌེ་ཝི་ཌུ་ ཁེམ་རོན་ David Cameron མཆོག་གིས་བོད་ཀྱི་དཀའ་རྙོག་ཞི་བའི་ལམ་ནས་སེལ་རྒྱུར་ཁོང་གི་གཞུང་འཛིན་ཚོགས་པ་ནས་མུ་མཐུད་རྒྱབ་སྐྱོར་བྱ་རྒྱུར་ཡིན་ཚུལ་གསུངས་ཡོད་འདུག་ལ། ཁོང་གི་གཏམ་བཤད་སྤེལ་ནས་ཅུང་མ་འགོར་བར་བཙན་བྱོལ་བོད་གཞུང་གིས་བོད་ཕྱི་ནང་གི་བོད་རིགས་མང་ཚོགས་ཀྱི་ཚབ་བྱས་ཏེ་སྲིད་བློན་མཆོག་ལ་བཀའ་དྲིན་ཆེ་ཞུས་ཡོད་པ་རེད།

དབྱིན་ཇིའི་སྲིད་བློན་མཆོག་གི་གསུང་འཕྲིན་འདི་ནི་ཉིན་ཤས་གོང་ཁོང་སྲིད་བློན་ལ་ཕེབས་མ་ཐག བཙན་བྱོལ་བོད་གཞུང་གིས་ཁོང་ལ་བཀྲ་ཤིས་བདེ་ལེགས་ཞུས་པ་དེར་ཁོང་གིས་ཐུགས་རྗེ་ཆེ་ཞུས་པ་དང་མཉམ་དུ་བོད་དོན་སྐོར་ལ་ཐུགས་སྣང་ཡོད་སྐོར་ཞུས་པ་ཙམ་རེད།

དེ་ཡང་དབྱིན་ཇིའི་སྲིད་བློན་གྱིས་གཏམ་བཤད་ནང་བརྗོད་དོན། གཞུང་འཛིན་འདིའི་ངོས་ནས་རྒྱ་ནག་གིས་བོད་ཀྱི་དོན་དམ་རང་སྐྱོང་སྐོར་གྱི་ལག་ལེན་དང་ཡར་རྒྱས་ལ་སྐུལ་འདེད་གཏོང་རྒྱུ་དང་། ང་ཚོས་བོད་རྒྱ་ཕན་ཚུན་བར་དོན་དངོས་རང་བཞིན་གྱི་གྲོས་མོལ་ཞིག་བྱ་ཐུབ་པར་ཤུགས་སྣོན་རྒྱག་གི་ཡིན་ལ།  དེ་ནི་བོད་ནང་གི་གནད་དོན་ཞི་བའི་ལམ་ནས་ཐག་གཅོད་བྱེད་ཀྱི་ཐབས་ལམ་གཅིག་པུ་དེ་རེད་ཅེས་བརྗོད་ཡོད། གཞུང་འཛིན་འདིས་གཞི་རྩའི་གནད་དོན་དེ་༧ཏཱ་ལའི་བླ་མ་དང་རྒྱ་ནག་གི་དབུ་ཁྲིད་ཚོའི་བར་གྲོས་བསྡུར་བྱས་པ་ཁོ་ན་བརྒྱུད་ཐག་གཅོད་ཐུབ་པར་ཡིད་ཆེས་བྱེད་ཀྱིན་ཡོད། འགྲོ་བ་མིའི་ཐོབ་ཐང་ལ་བརྩི་བཀུར་དང་བོད་ལ་ཆེས་མཐོའི་རང་སྐྱོང་འཐོབ་རྒྱུ་དེ་ང་ཚོའི་འགྱུར་མེད་ཀྱི་འདོད་དོན་དེ་ཡིན་ཞེས་བརྗོད་ཡོད།

གསར་འགོད་པ། དཔལ་ལྡན་རྒྱ་མཚོ།