རྒྱ་གར་ལྷོ་ཕྱོགས་སེ་ར་དགོན་དུ་སློབ་གཉེར་གནང་བཞིན་པའི་གྲྭ་སེར་སྨད་བློ་དགའ་ལགས་བལ་ཡུལ་དུ་ཕེབས་ནས། ཉེ་ཆར་མ་སུ་རི་བོད་ཁྱིམ་སློབ་གྲྭ་ནས་ཕྱིར་འབུད་བྱས་པའི་སློབ་ཕྲུག་རྣམས་ཕྱིར་ངྷ་སར་ཁྲིད་ཡོང་འདུག་ལ། ཁོང་གིས་སློབ་ཕྲུག་དེ་ཚོ་ངྷ་སྟེང་བོད་ཁྱིམ་དུ་བསྐྱར་འཇུག་གནང་རྒྱུའི་རེ་སྐུལ་སྙན་ཞུ་ཞིག་ཕུལ་ཏེ། ད་ལྟའི་ཆར་ཉིན་ ༡༠ ལ་བསྒུག་ཀྱང་ཐག་གཅོད་ཅི་བྱུང་གི་ལན་གང་ཡང་རག་མ་སོང་ཟེར།
ཉེ་ཆར་མ་སུ་རི་བོད་ཁྱིམ་སློབ་གྲྭ་ནས་ཚུལ་མིན་གྱི་བྱ་སྤྱོད་སྤེལ་བའི་དབང་གིས་སློབ་ཕྲུག་བུ་དགུ་དང་བུ་མོ་གཅིག ཕ་ཚབ་མ་ཚབ་གཉིས་བཅས་སློབ་གྲྭ་ནས་ཕྱིར་འབུད་བཏང་ཡོད་པར་མ་ཟད། སྐབས་དེར་སློབ་ཕྲུག་དེ་ཚོ་བལ་ཡུལ་བར་དུ་བསྐྱལ་ཏེ་ཕྱིར་བོད་དུ་གཏོང་རྩིས་བྱས་ཡོད་ནའང་། མང་ཚོགས་ནང་དེའི་སྐོར་ལ་བསམ་ཚུལ་འདྲ་མིན་སྣ་ཚོགས་བཤད་པ་དང་། བོད་མི་མང་སྤྱི་འཐུས་ལྷན་ཚོགས་ཀྱིས་ཐད་ཀར་འཛིན་སྐྱོང་བཀའ་ཤག་ལ་ཛ་དྲག་གི་འབོད་སྐུལ་ཞུས་ཏེ། ཁོང་ཚོ་ཕྱིར་བོད་དུ་གཏོང་རྒྱུའི་སྲིད་བྱུས་དེ་འགྲིག་མེད་སྐོར་སྙན་གསན་ཞུས་པ་སོགས་ཀྱིས། བོད་གཞུང་བཀའ་ཤག་གིས་བསྐྱར་དུ་འདིའི་སྐོར་ལ་ཐུགས་བསམ་བཞེས་ཀྱི་ཡིན་གསུངས་ཡོད་ལ། ཉེ་ཆར་༧གོང་ས་མཆོག་གི་སྐུའི་འཁྲུངས་སྐར་གྱི་ཉིན་དེར་ལྷོ་ཕྱོགས་སེ་ར་དགོན་དུ་སློབ་གཉེར་གནང་བཞིན་པའི་གྲྭ་སེར་སྨད་བློ་དགའ་ལགས་ཀྱིས། ཕྱིར་འབུད་བྱས་པའི་སློབ་ཕྲུག་བུ་དགུ་ཕྱིར་ངྷ་སར་ཁྲིད་སླེབས་འདུག་ལ། ཁོང་གིས་ད་ལྟ་སློབ་ཕྲུག་དེ་ཚོ་ངྷ་སྟེང་བོད་ཁྱིམ་དུ་བསྐྱར་འཇུག་གནང་རྒྱུར་རེ་སྐུལ་སྙན་ཞུ་ཞིག་ཞིག་ཕུལ་ཏེ། དེའི་ལན་ལ་བསྒུག་བསྡད་ཡོད།
ཕྱི་ཚེས་ ༡༥ ཉིན་འདི་གའི་གསར་འགོད་པས་གྲྭ་སེར་སྨད་བློ་དགའ་ཁོང་ལ་ཐུག་འཕྲད་ཀྱིས་གནས་ཚུལ་འདིའི་སྐོར་ཤེས་རྟོགས་བྱུང་བ་ལྟར་ན། ཉེ་ཆར་མ་སུ་རི་བོད་ཁྱིམ་ནས་ཕྱིར་འབུད་བཏང་བའི་སློབ་ཕྲུག་དག་ནི་བོད་མདོ་དབུས་ཁམས་གསུམ་གྱི་ས་ཁུལ་ཁག་ཅིག་ནས་ཡོང་ཞིང་། དེ་དག་ལས་སློབ་ཕྲུག་གཅིག་མ་གཏོགས་གཞན་རྣམས་ཀྱི་ཕ་མ་ད་ལྟ་བོད་དུ་ཡོད་པ་དང་། ཁོང་ཚོའི་ཁྲོད་ཀྱི་ལོ་ན་ཆུང་ཤོས་རང་ལོ་ ༡༡ ཡིན་འདུག གྲྭ་སེར་སྨད་བློ་དགའ་ལགས་ཀྱིས་ཐེངས་འདིར་སྟབས་ལེགས་པ་ཞིག་ལ་སློབ་ཕྲུག་འདི་ཚོའི་ཁྲོད་ན་ང་རང་ཉིད་ཀྱི་ཕ་ཡུལ་གཅིག་པ་གཅིག་ཀྱང་མི་འདུག གལ་སྲིད་ངའི་ཕ་ཡུལ་གཅིག་པ་ཞིག་ཡོད་ན་མི་གཞན་གྱིས་ངས་རང་གི་ཕ་ཡུལ་གཅིག་པ་དེའི་ནང་དུ་ཡོད་སྟབས་ཕྱོགས་རིས་བྱེད་ཀྱིན་འདུག་ཟེར་སྲིད་ཅེས་ཟེར།
གསར་འགོད་པས་ཁོང་ལ་ཐེངས་འདིར་མ་སུ་རི་བོད་ཁྱིམ་ནས་ཕྱིར་འབུད་བྱས་པའི་སློབ་ཕྲུག་རྣམས་ཕྱིར་ཁྲིད་ཡོང་དགོས་པའི་དམིགས་འདུན་སྐོར་དྲིས་པར་ཁོང་གིས། གཙོ་བོ་ཐེངས་འདིར་མ་སུ་རི་བོད་ཁྱིམ་ནས་ཕྱིར་འབུད་བྱས་པའི་ཕྲུ་གུ་དེ་ཚོ་ཕྱིར་བོད་དུ་གཏོང་རྒྱུ་རེད་ཟེར་བའི་སྐད་ཆ་ཞིག་བྱུང་བ་དེ་རེད། གལ་སྲིད་དེ་ལྟར་ཕྱིན་ན་མ་འོངས་པར་བོད་གཞིས་བྱེས་གཉིས་བར་དུ་དཀའ་ངལ་དང་བོད་མི་མང་དང་གཞུང་བར་དུ་དཀའ་ངལ། གཞིས་སུ་ཡོད་པའི་ཕ་མ་དང་༧གོང་ས་མཆོག་གི་བར་དུ་དཀའ་ངལ། དེ་བཞིན་རྒྱ་ནག་གིས་གནས་ཚུལ་འདྲ་མིན་བཟོ་བདེ་བོ་ཡོང་བ་སོགས་ཀྱི་དོགས་པ་རྣམ་རྟོག་གི་དབང་གིས་རེད། དེ་དཀའ་ངལ་གཅིག་རེད། དཀའ་ངལ་གཞན་གཅིག་ནི་ང་ཚོ་བོད་པ་ཟེར་བ་དེ་སྤྱིར་བཏང་ནས་གྲངས་ཉུང་མི་རིགས་རེད། མ་འོངས་པའི་མི་རབས་རྒྱུད་འཛིན་བྱེད་མཁན་གྱི་གནད་འགག་ཡོད་ན་མེད་ན་ཕྲུ་གུ་ཆུང་ཆུང་དེ་ཚོ་རེད། ལྷག་པར་དུ་སློབ་གྲྭར་འགྲིམ་བཞིན་པའི་ཕྲུ་གུ་ཆུང་ཆུང་དེ་ཚོ་དེ་བས་ཀྱང་གལ་ཆེ་བ་ཡིན་སྟབས། ཕྲུ་གུ་རེ་རེ་བཞིན་འཕྲོ་བརླག་ཏུ་མི་འགྲོ་བ་དང་ཁོང་ཚོའི་མི་ཚེའི་མདུན་ལམ་དང་བོད་གཞུང་གི་དམིགས་འདུན་སོགས་ཡག་པོ་ཞིག་ཡོང་ཐུབ་རྒྱུའི་དམིགས་འདུན་བཟུང་བས་ཀྱང་ཡིན་ཟེར།
ཡང་ཁོང་ལ་ཐེངས་འདིར་ངྷ་སྟེང་བོད་ཁྱིམ་སློབ་གྲྭར་ཕུལ་བའི་སྙན་ཞུའི་ནང་དོན་ཅི་ཡིན་སྐོར་དྲིས་པར། ཁོང་གིས། ཉེ་ཆར་མ་སུ་རི་བོད་ཁྱིམ་སློབ་གྲྭ་ནས་སློབ་ཕྲུག་ཕྱིར་འབུད་བྱས་པ་དག་ལ། ང་རང་ཉིད་སྒེར་ངོས་ནས་སེམས་འཚབ་ཆེན་པོ་ཡོད་ལ། ང་དང་ང་ལྟ་བུའི་མི་མང་པོར་སེམས་འཚབ་ཡོད་པ་དེ་གསར་འགྱུར་བརྒྱུད་ལམ་ཁག་ཏུ་གསལ་བསྡད་པ་རེད། དེར་བརྟེན་སློབ་ཕྲུག་དེ་ཚོའི་མ་འོངས་པའི་མདུན་ལམ་ལ་བསམ་བློ་གཏོང་རྒྱུ་དང་། ལྷག་པར་དུ་བོད་ནང་དུ་ཡོད་པའི་ཕ་མ་རྣམས་ཀྱིས་རང་གི་ཤ་ཁྲག་ལས་ཆད་པའི་སློབ་ཕྲུག་དེ་ཚོ་བརྩེ་བ་ཚུན་ཆད་རྒྱང་རིང་དུ་བཏང་སྟེ། བཙན་བྱོལ་དུ་བསྐྱལ་ཡོང་དུས་དེ་ཚོར་སློབ་སྦྱོང་གི་གོ་སྐབས་ཤིག་མ་རག་ཚེ། ང་ཚོར་གང་ཡང་མེད་པ་ཞིག་ཆགས་ཀྱིན་འདུག་ལ། དེ་ལྟ་བུ་ཞིག་གཞུང་དང་སློབ་གྲྭ་ཁག་སུ་ཡིན་རུང་འདོད་པ་མེད་པས། ངས་སློབ་ཕྲུག་དེ་ཚོ་བལ་ཡུལ་ནས་ཕྱིར་ཁྲིད་ཡོང་དོན་ཁོང་ཚོ་བསྐྱར་དུ་སློབ་གྲྭར་འགྲིམ་པའི་གོ་སྐབས་ཤིག་རྙེད་ན་བསམ་པ་ཡིན། མ་སུ་རི་བོད་ཁྱིམ་ནས་མར་ཕུད་པ་ཡིན་སྟབས་ངྷ་སྟེང་བོད་ཁྱིམ་ནས་ཐུགས་བསམ་བཞེས་ཐུབ་ཀི་རེད་དམ་ཅེས་སྙན་ཞུའི་ནང་དོན་གཙོ་བོ་དེ་ལྟ་བུ་ཞིག་ཡིན། ཞེས་ཟེར།
ཡིན་ནའང་། ཁོང་གིས། ངས་སྙན་ཞུ་བརྒྱབ་སྟེ་ད་ལྟའི་བར་ཉིན་བཅུ་ཙམ་ཕྱིན་ནའང་ལན་གང་ཡང་མ་གནང་མོད། ཚོགས་འདུ་འཚོག་གི་ཡིན། ཐུགས་བསམ་བཞེས་གི་ཡིན་གསུངས་སོང་། དེ་ལ་བསྒུག་བསྡད་ཡོད་ཟེར།
ཡང་ཁོང་གིས་ཐེངས་འདིར་བལ་ཡུལ་ནས་སློབ་ཕྲུག་འདི་ཚོའི་སྐོར་འགན་ལེན་གནང་སྟངས་སྐོར་ནས་གསུངས་དོན། དང་ཐོག་ང་རང་བལ་ཡུལ་སྣེ་ལེན་ཁང་དུ་ཕྱིན་སྐབས་སློབ་ཕྲུག་ཚོ་ཁྲིད་ཆོག་ཆོག་མི་འདུག གང་ཡིན་ཟེར་ན་འགན་ལེན་བྱེད་མཁན་ཞིག་དགོས་པ་རེད། དེར་བརྟེན་ངས་བལ་ཡུལ་སྣེ་ལེན་ཁང་གི་འགན་འཛིན་མཉམ་དུ་སྐད་ཆ་མ་བཤད་པའི་སྔོན་དུ་སློབ་ཕྲུག་ཚོར་ཐུག་འཕྲད་ཀྱིས། ཁྱེད་ཚོ་དངོས་གནས་ཕ་ཡུལ་དུ་ལོག་འདོད་ཡོད་དམ། གལ་སྲིད་ལོག་འདོད་མེད་ན་ལོག་འདོད་མེད་ཅེས་ས་ཡིག་རྒྱག་དགོས་པ་དང་། གཉིས་ཐད་ནས་ཁྱེད་ཚོ་ཕ་ཡུལ་དུ་ལོག་འདོད་མེད་ཚེ་ང་རང་ཉིད་ཀྱིས་འགྲོ་སོང་བཏང་སྟེ་ཕྱིར་རྒྱ་གར་དུ་ཁྲིད་ཀྱི་ཡིན། ངས་ཁྱེད་ཚོ་དམིགས་འདུན་གཉིས་ཀྱི་ཐོག་ནས་ཁྲིད་ཀྱི་ཡིན། གཅིག མ་སུ་རི་མ་ཡིན་པའི་སློབ་གྲྭ་གཞན་དུ་འཛུལ་ཆོག་རྒྱུར་ཐབས་ཤེས་བྱ་རྒྱུ་ཡིན། གཉིས། གལ་སྲིད་དེ་ལྟར་མ་བྱུང་ན་ཁྱེད་ཚོ་གྲྭ་སའི་སློབ་གྲྭའི་ནང་འཇུག་ཐབས་བྱ་རྒྱུ་ཡིན། སྐབས་དེར་གྲྭ་ཆས་གྱོན་དགོས་འཁེལ་གི་རེད་ཅེས་བརྗོད་པར། ཁོང་ཚོས་ཁས་ལེན་བྱས་ཡོད། དེ་ལྟར་ངས་སློབ་ཕྲུག་དེ་ཚོ་བལ་ཡུལ་ནས་འགན་ལེན་བྱེད་སྐབས་རང་ཉིད་ཀྱི་ངོ་སྤྲོད་དང་ལག་ཁྱེར་ཆ་ཚང་ཕར་ཕུལ་བས་མ་ཚད། སློབ་ཕྲུག་ཚོས་ཁས་ལེན་བྱས་པའི་ཡིག་ཆ་ཡར་ཕུལ་བས། ཁོང་ཚོའི་ངོས་ནས་ཀྱང་ཞིབ་འཇུག་གནང་རྗེས་གཞི་ནས་ང་ལ་རྩིས་སྤྲོད་གནང་སོང་ཟེར།
དེ་ལྟར་ཁོང་ཐེངས་འདིར་བལ་ཡུལ་བར་དུ་ཕེབས་ཏེ་སློབ་ཕྲུག་ལྔ་ཁྲིད་སླེབས་པ་དང་། རྒྱ་གར་ནང་ལོག་ནས་སློབ་ཕྲུག་བཞི་ཁྲིད་ཡོང་བ་བཅས་བསྡོམས་པས་ཁོང་གིས་སློབ་ཕྲུག་དགུའི་འགྲོ་གྲོན་ཁོང་རང་ཉིད་ངོས་ནས་བཏང་བ་དང་། ད་ལྟ་ངྷ་ས་སྣེ་ལན་ཁང་གིས་སློབ་ཕྲུག་དེ་ཚོའི་འདུག་གནས་དང་ཁ་ལག་སོགས་གཏོང་གིན་ཡོད་འདུག ཡིན་ནའང་། སློབ་ཕྲུག་བུ་མོ་དེ་ད་ལྟ་ཕྱིར་བོད་དུ་ལོག་ཚར་འདུག དེའི་སྐོར་ལ་གྲྭ་སེར་སྨད་བློ་དགའ་ལགས་ཀྱིས་གསུངས་དོན། ཉེ་ཆར་མ་སུ་རི་ནས་སློབ་ཕྲུག་བཅུ་ཕུད་པའི་ནང་ནས། སློབ་ཕྲུག་བུ་མོ་དེ་བལ་ཡུལ་སྣེ་ལེན་ཁང་དུ་ཁོ་མོའི་ཨ་ཅག་ཡིན་ཟེར་མཁན་ཞིག་ཡོང་ནས་ཁྲིད་ཕྱིན་འདུག་པར་མ་ཟད། ཁོ་མོ་ད་ལྟ་བོད་དུ་ཕྱིར་ལོག་ཚར་འདུག་ཅེས་ཟེར།
མཇུག་ཏུ་གྲྭ་སེར་སྨད་བློ་དགའ་ལགས་ཀྱིས་གསུངས་དོན། ད་ལྟ་རིམ་པ་དང་པོའི་སྟེང་དུ་བསྐྱོད་ཀྱིན་ཡོད་ལ། རིམ་པ་དང་པོ་ལེགས་འགྲུབ་མ་བྱུང་ན་རིམ་པ་གཉིས་པའི་སྟེང་གོམ་པ་རྒྱག་གི་ཡིན། དེ་ནི་དགོན་པ་གྲྭ་ཚང་ཞིག་གི་སློབ་གྲྭར་འཇུག་ཐུབ་པ་བྱ་རྒྱུ་དེ་ཡིན་ཞེས་གསུངས།
གསར་འགོད་པ། ཨ་རིག་འགྱུར་མེད།
འདིའི་སྐོར་ལ་རང་ནས་བསམ་ཚུལ་ཞིག་སྔར་ནས་མདོན་འདོད་བྱུང་རུང་ད་ལྟ་བར་དུ་དུས་ཚོད་རག་མ་བྱུང་། བརྩན་བྱོལ་བའི་དགོན་བསྡེ་ཁག་དང་བསློབ་གྲྭ་ཁག་ནང་མདུལ་ཁྲིམ་དང་བསྒྲིག་བཞིར་བསྙད་ཏེ་མིའི་རང་དབང་ལ་བརྡོག་རོལ་བཏང་བ་ཉུང་ཉུང་བསྟན་ནས་མིན། དེས་ན་བློ་དགའ་ལགས་ནས་ཕྱག་ལས་མནང་བར་མཐའ་གཅིག་ཏུ་བརྒྱབ་བསྐྱོར་ཡོད།
སེར་སྨེད་སྐུ་ཞབས་བློ་དགའ་ལགས་གྱིས་ཕྱག་ལས་གནང་བ་དེ་ལ་%༡༠༠ རྒྱབ་སྐྱོར་ཡོད། ཐུགས་རྗེ་ཆེར།
ཕ྄ྱག་ལས་གནང་བ་ས྄ྟེ་ཡགས་པོ་འདུག་ཐུགས་ར྄ྗེས་ཆེ།
ཐོས་པ་དགའི་བཤད་པ་ལྟར་ན་སྔོན་མ་མ་སུ་རིའི་དགེ་སློབ་བར་འཕྲིག་སྤྱོད་རིག་བྱུང་ཡོད་ནའང་སྣང་མེད་དུ་བཞག་འདུག་ཅེས་བཤད་འདུག
དེ་ལྟར་ཡིན་ན་དགེ་རྒན་སུ་རེད་སློབ་ཕྲུག་སུ་རེད། དེའི་སྐབས་སློབ་སྤྱི་སུ་རེད་གནས་ཚུལ་ཁ་གསལ་གསུང་ན་ཡག་པོ་འདུག དེ་རྣམས་བཤད་ཡ་མེད་
ན་སྤྱི་ཚོགས་ནང་དཀྲུགས་ཤིང་རང་རེད། ངས་གོ་ཐོས་ལ་མ་སུ་རི་བོད་ཁྱིམ་ནས་མ་འོངས་བོད་ཀྱི་སོན་རྩ་ཉིས་སྟོང་ལྷག་གསོ་སྐྱོངས་བྱེད་ཀྱི་ཡོད་པ་
དང་དེ་བཞིན་སྒྲིག་འཛུགས་དང་མཐུན་སྐྱེན་གཞན་དང་མ་འདྲ་བ་ཡོད་པ་གོ་བྱུང་། ཐོས་པ་དགའི་གོ་བ་དང་ངའི་གོ་བ་གཉིས་འགྲོ་གླེང་མུ་མཐུད་བྱེད་ཆོག
སེར་སྨད་བློ་དགའ་ལ་དམིགས་ཡུལ་གཞན་མེད་ན་ལྷག་བསམ་འདུག་ད། འོན་ཀྱང་ཁྱེད་ཀྱི་ཐབས་ལམ་གཉིས་ཀར། ཡག་པོ་ཞིག་མ་རེད། དེ་ལས་ཐབས་ལམ་གཞན་ཞིག་འཚོལ་རོགས་གནང་དང་། དགའ་བསུ་དང་མོས་མཐུན་ཡོད།
ཅེས་པ་ལྟར། ང་ཡང་བྲག་ཚེ་དབང་ལྟར་དྲན།
སེར་སྨད་བློ་དགའ། མི་འདི་ཚོས་བཤད་པའི་བསམ་ཚུལ་དག་ལ་ལེགས་པར་ཉོན། དེའི་རྗེས་རང་གིས་ཐག་གཅོད་བཟང་བོ་བྱོས། ཁ་དཔེར་ཡང་། གྲོས་ཁ་མི་ལ་བྱོས། གྲོས་ཐག་རང་གིས་ཆོད། ཟེར་རོ། །
དེ་མིན་ཁྱེད་རང་སྐབས་འདི་ལྟ་བུ་ཞིག་ལ་མངོན་ཡོང་དུས་སྤྱི་འཐུས་ལ་རེ་བ་རྒྱག་གི་མི་འདུག་ཟེར་ས་མི་འགྲོ དེ་ནི་སྔོན་ཆད་ཁྱེད་ཀྱིས་འདི་དང་གན་བསྒྲུབ་གནང་སོང་ཟེར་བ་ཞིག་མེད་པས་མིན་འགྲོ གང་ལྟར་ཡང་རྒྱབ་སྐྱོར་ཡོད། ངས་ཁྱེད་རང་སྤྱི་འཐུས་ལ་གདམ་ཆོག
མི་མང་གི་ཁ་འད྄ྲེ་ཡིན་པ་དང་མི་མང་གི་ལག་གསེར་ཡིན་ཞེས་པས་དཔེ་ལ྄ྟར་
ཁ་མདའ་ཚིག་མདའ་འབེན་མཁན་མང་གི་ཡ྄ྭ་ གང་ལ྄྄྄྄྄ྟར་དམིགས་ཡུལ་གང་ཡོད་ཀ྄ྱང་ཕ྄ྲུ་གུ་དེ་ཚོགས་ལ་ཕན་ཐོག་བ྄ྱུང་སོང་ན་
འག྄ྲིག་འདུག། ཡང་ཅིག་བཤད་ན་དམིགས་ཡུལ་ཡོད་ན་དེ་ནི་བོད་མི་མང་ལ་ས྄ྲི་
ཞུ་ས྄ྒ྄྄ྲུབ་འདོད་པའི་ཀུན་ས྄ློང་ཞིག་འཆང་གི་མེད་འག྄ྲོ་
དེ་ལ྄ྟར་ཡིན་ན་དགའ་བསུ་ཞུ་དགོས་པ་མ་རེད་པས་???????
སངས་རྒྱས་ཀྱི་ཆོས་ལུགས་ལ་་་་སྔོན་ཆད་ཁྱེད་རང་གི་རིགས་རུས་་དང་བྱ་བཞག་་སྤྱོད་པ་མཐའ་ན་ཤན་པ་ཡིན་ཅིང་ཁྱད་པར་མེད གཙོ་བོ་རང་ཉིད་ཆོས་སྒོར་ཞུགས་པ་ནས་ཆོས་ཁྲིམས་སྲོང་རྒྱུ་གཙིག་སུ་འཛིན་དགོས་པ་དེ་རེད
་ད་དུས་དམངས་ཁྲོད་དུ ཡར་ལོག་བསྟན་པའི་སྲོག་ཤིང་ཟེར་སྲོལ་ཞིག་ཡོད
འོན་ཀྱང་ངའི་ཁོ་བ་ཚོ་གྲྭ་བ་བྱེད་དགོས་ཟེར་གིན་མེད་རབ་བྱུང་ན་སློབ་གྲྭ་དང་ཡང་ན་དམག་མི་གང་རུང་ལ་འགྲོ་ཐུབ་ན་ཡག་པོ་རེད
སེར་ས྄ྨད་བ྄ློ་དགའ་ལ་དམིགས་ཡུལ་གཞན་མེད་ན་ལ྄ྷག་བསམ་འདུག་ད། འོན་ཀྱང་ཁྱེད་ཀྱི་ཐབས་ལམ་གཉིས་ཀར། ཡག་པོ་ཞིག་མ་རེད། དེ་ལས་ཐབས་ལམ་གཞན་ཞིག་འཚོལ་རོགས་གནང་དང་།
དགའ་བསུ་དང་མོས་མཐུན་ཡོད།
སློབ་གྲའི་སྒྲིག་འཛུགས་གལ་གནད་ཆེ་བ་ལས་སྒྲིག་འགལ་གྱི་སློབ་ཕྲུག་དེ་ཚོ་གལ་གནད་ཆེ་བ་ཞིག་ག་ལ་ཡིན། ད་ཡིན་ན་བླ་རྒན་
བློ་དགའི་ཆབ་སྲིད་འཁྲབ་གི་འདུག མདོ་སྟོད་མི་མང་དང་ཡང་སྒོས་ང་ཚོ་ལི་ཐང་གི་མི་མང་ཚོའི་ངོ་རྒོལ་མཐའ་གཅིག་དུ་བྱེད་དགོས་
ཁོས་མ་འོང་བ་སྐབས་བཅོ་ལྔ་བའི་སྤྱི་འཐུས་ལ་རེ་བ་བྱེད་པའི་ཆབ་སྲིད་རང་རེད། མི་ངན་དེའི་རིག་ལ་གཟབ་ནན་བྱེད་དགོས།
དེ་ནི་བོད་གཞུང་སྤྱི་ཚོགས་ཀྱི་སྒྲུག་འཛུགས་གཏོར་གཤིག་གཏང་པ་དང་བཙན་བྱོལ་སྤྱི་ཚོགས་ནང་དཀྲུགས་ཤིང་གི་ས་བོན་འདེབས་པ་རེད།
ངས་རེ་བ་ལ་ངྷ་སྟེང་བོད་ཁྱིམ་དུ་བསྐྱར་འཇུག་མི་གནང་རྒྱུའི་རེ་སྐུལ་དང་དེ་བཞིན་དགོན་པ་གྲྭ་ཚང་ཞིག་གི་སློབ་གྲྭར་མི་འཇུག་རྒྱུའི་རེ་བ་ཡོད།
ཕལ་ཆེ་བ་ལོ་ཆེན་པོ་རེད་ཕྲུ་གུ་མ་རེད། མི་འདི་ཚོ་མུ་མཐུད་སློབ་གྲྭ་བཏང་ནས་ཕན་ཐོགས་མིན་བཤད་དཀའ། བོད་ནས་ཡོང་མཁན་ཚོས་ལོ་མང་པོ་གསང་གི་འདུག དེ་རྩིས་ན་འདི་ཚོ་ལོ་ཆུང་ཆུང་གཏན་ནས་མ་རེད།
དུས་ཚོད་ཡོད་ན་གནས་ཚུལ་འདིར་དཀར་ནག་གི་དབྱེ་བ་ཞིག་འབྱེད་དགོས་ཀྱི་འདུག ཡིན་ཡང་དུས་ཚོད་ཀྱིས་དབང་གིས་ཐུང་ཐུང་ཞིག་ལས་མི་འབྲི། བློ་དགའ་ཟེར་བས་གློ་བུར་དུ་ཕྲུ་གུ་དེ་དག་བལ་ཡུལ་ནས་ཁྲིད་ཡོང་བ་འགྲིག་ཡོད་མེད་བཤད་དཀའ། ཕྲུ་གུ་དེ་དག་གི་གནས་ཚུལ་དེ་བར་ལམ་བཀའ་ཤག་དང་གྲོས་ཚོགས་ཀྱིས་དངོས་ནས་འགན་ལེན་དགོས་པའི་གནས་ཚུལ་ཞིག་ཆགས་པ་རེད། སློབ་ཕྲུག་ཅིག་ལ་མཚོན་ན་སློབ་གྲྭ་དེ་བཤང་ཁང་ནང་བཞིན་འཁྲབ་ས་བྱེད་མི་རུང་ལ། དེའི་ཕྱིར་གནས་ཚུལ་འདི་རྦད་དེ་ཚབས་ཆུང་ཆུང་ཞིག་ཏུ་ངོས་འཛིན་བྱེད་ཀྱི་མེད། ཡིན་ཡང་ཕྲུ་གུ་རྣམས་བོད་ལ་གཏོང་རྒྱུ་ཐག་བཅད་པ་དེ་གཏན་ནས་འགྲིག་མི་འདུག་པས་གཞུང་གིས་ངེས་པར་ཐག་བཅོད་འདི་བསྐྱར་བཅོས་མ་བྱས་ཐབས་མེད་རེད། ཡིན་ཡང་གནས་ཚུལ་འདི་ཐག་གཅོད་རྒྱུར་ཉི་མ་ག་ཚོད་འགོར་མིན་བློ་དགའི་འདོད་པ་དང་བསྟུན་དགོས་པ་ཞིག་མ་རེད། འདི་བཀའ་ཤག་གིས་ཐག་གཅོད་གཅོད་བར་དུ་སྒྭག་དགོས་པ་ལས། ཉི་མ་འདི་འདྲ་ཞིག་གི་ནང་ལ་ཐག་གཅོད་ཡང་འདི་འདྲ་བྱེད་དགོས་ཤེས་བཀའ་ཤག་ལ་བཟོ་ལྟ་བཟོ་རྒྱུའི་ཐོབ་ཐང་དང་དབང་ཚད་བློ་དགའ་ལ་ཡོད་མ་རེད། ད་དུང་བློ་དགས་སློབ་གྲྭར་བཤང་བཙོང་ཁང་ནང་བཞིན་བྱ་སྤྱོད་སྤེལ་མཁན་གྱི་ཕྲུ་གུ་འདི་དག་བོད་ཁྱིམ་ལ་འཇུག་རྒྱུར་གནོད་ཤུགས་སྤྲོད་བཞིན་པ་འདི་ངོས་ལེན་ཐབས་མི་འདུག བོད་གཞུང་གིས་འདི་འདྲའི་གནས་ཚུལ་ཡོད་ཚད་མི་སྒེར་རེ་རེའི་འདོད་པ་ནང་བཞིན་ཐག་གཅོད་བྱེད་ཤེས་ཀི་མ་རེད། འདི་ཆུང་ནའང་རྒྱལ་ཁབ་ཅིག་གི་གཞུང་རེད། སློབ་སྦྱོང་དང་ཀུན་སྤྱོད་ཕུལ་བྱུང་ཅན་གྱི་སློབ་ཕྲུག་ཅིག་བོད་ཁྱིམ་ལ་འཇུག་དགོས་ཤེས་བོད་གཞུང་ལ་གནོན་ཤུགས་སྤྲད་པ་ཡིན་ན་དགའ་བསུ་ཡོད། དེ་མིན་མངོན་སུམ་སྒྲིག་འགལ་གྱི་སློབ་ཕྲུག་ཐ་ཤལ་རྣམས་ལ་ས་མིག་ཡག་ཤོས་སྤྲོད་དགོས་ཤེས་རྩོད་པ་བརྒྱབ་ནས་ངོས་ལེན་མེད། དེ་འདྲ་ཡིན་ན་སློབ་ཕྲུག་ཡག་པོ་ཚོ་སེམས་ཕམ་གི་རེད།
གྲྭ་བ་བྱེད་དགོས་ཟེར་བ་དེ་བས་ཀྱང་ཁྲིམས་འགལ་རེད། མི་གཞན་གྱི་དཀའ་སྡུག་གི་དུས་ཚོད་ལ་གོ་སྐབས་བཙལ་ནས་མི་དེའི་མི་ཚེ་ལ་འགྱུར་བ་གཏོང་རྩིས་བྱེད་བཞིན་ཆེས་ཁྲིམས་འགལ་རེད། སློབ་གྲྭའི་ནང་བཤང་ཁང་གི་བྱ་སྤྱོད་སྤེལ་མཁན་རྣམས་དགོན་པར་ཁྲིད་འདོད་པ་དེ་བས་ཡ་མཚན་རེད། དེའི་ཕྱིར་ཕྲུ་གུ་འདི་ཚོར་བོད་དུ་མ་བཏང་བའི་ཚུན་ཆད་ནས། གཞན་ཐག་གཅོད་འདི་འདྲ་བྱེད་དགོས་དང་དུས་ཚོད་འདི་འདྲ་ཞིག་གི་ནང་ཚུད་ལ་ཐག་གཅོད་དགོས་ཤེས་བོད་གཞུང་ལ་བཀའ་གཏོང་རྒྱུའི་དབང་ཚད་མི་སྒེར་སུ་གཅིག་ལ་ཡོད་པ་མ་རེད། འདི་བོད་གཞུང་ཁྲིམས་ལུགས་བཞིན་ཐག་གཅོད་དགོས་པ་ལས། བོད་གཞུང་གིས་གྲྭ་བ་ཞིག་གི་ཁ་ལ་ཉན་དགོས་ན་ཁག་པོ་རེད།