བླ་སྤྲུལ་ཚོགས་པ་བསམ་ཚུལ་བརྗེ་རེས་སུ་ཕྱོགས་སྐྱོད།

ད་ལྟ་བོད་ལྗོངས་སུ་རིགས་མི་འདྲ་བའི་ཆོས་གྲྭ་ ༡༧༠༠ ལྷག་ཡོད་ཅིང་། མིང་ཐོ་བཀོད་ཟིན་པའི་གྲྭ་པ་ཕལ་ཆེར་ཁྲི་ ༤་༧ ཡོད། རྒྱ་ཆེའི་མི་སེར་རྣམས་ཆོས་ལུགས་ཀྱི་ཆོ་ག་སྣ་ཚོགས་ལ་ཞུགས་པ་དང་། དད་མོས་བྱེད་པར་རང་དབང་ཡོད། ས་གནས་ཁག་གི་དད་ལྡན་མང་ཚོགས་ལྷ་སའི་གཙུག་ལག་ཁང་དུ་མཇལ་སྐོར་དུ་སྐྱོད་མཁན་ཡང་ཧ་ཅང་མང་། དོན་དངོས་དེ་དག་གིས་བོད་ས་གནས་ཀྱི་མི་སེར་རྣམས་ཀྱི་ཆོས་ལུགས་དད་མོས་རང་དབང་ཡིན་པ་གསལ་བོར་བསྟན་ཡོད་ཟེར།

དེ་རིང་ཀྲུང་གོའི་བོད་ལྗོངས་དྲ་བས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༡༣ ཉིན་ཉི་ཧོང་ནང་འཚམས་འདྲིར་བསྐྱོད་པའི་བོད་ལྗོངས་ཀྱི་བོད་རིག་པའི་མཁས་པ་དང་སྤྲུལ་སྐུའི་འཐུས་ཚབ་ཚོགས་པ་ཁ་སང་སྟེ། ཕྱི་ཚེས་ ༡༩ ཉིན་ལྷོ་ཀོ་རི་ཡར་འབྱོར་ཡོད་འདུག

ཐེངས་འདིར་ཉི་ཧོང་དང་ལྷོ་ཀོ་རི་ཡའི་ནང་འཚམས་འདྲིར་བསྐྱོད་པའི་བོད་ལྗོངས་ཀྱི་བོད་རིག་པའི་མཁས་པ་དང་སྤྲུལ་སྐུའི་འཐུས་ཚབ་ཚོགས་པའི་ནང་། ཀྲུང་དབྱང་མི་རིགས་སློབ་གྲྭ་ཆེན་མོའི་སློབ་གཙོ་གཞོན་པ་ཤེས་རབ་ཉི་མ་ལགས་ཚོགས་གཙོ་ཡིན་ཞིང་། འཐུས་ཚབ་ཚོགས་པའི་ནང་སྤྲུལ་སྐུ་བློ་བཟང་བྱམས་པ་ལགས་དང་། ཀྲུང་དབྱང་མི་རིགས་སློབ་གྲྭ་ཆེན་མོའི་དགེ་རྒན་ཆེན་མོ་བ་སུའུ་ཧྥ་ཞང་སོགས་ཚུད་ཡོད།

གོང་གསལ་དྲ་རྒྱས་གནས་ཚུལ་སྤེལ་དོན། ཕྱི་ཚེས་ ༡༩ ཉིན་ལྷོ་ཀོ་རི་ཡར་འཚམས་འདྲིར་འབྱོར་བའི་བོད་རིག་པའི་མཁས་པ་དང་བླ་སྤྲུལ་སྐུ་ཚབ་ཚོགས་པས། ལྷོ་ཀོ་རི་ཡའི་རྒྱལ་ས་ Seoul ནས་ལྷོ་ཀོ་རི་ཡའི་ནང་བསྟན་གྲུབ་མཐའ་གཙོ་བོ་སྟེ་ཚའོ་ཞི་ཙོང་སྤྱི་ཁྱབ་ཁང་གི་མགོ་གཙོ་ཚི་ཁྲེང་ལ་མཇལ་འཕྲད་གནང་བ་མ་ཟད། རྒྱལ་ཕྱིར་བཅའ་སྡོད་བྱས་པའི་ཀྲུང་གོ་བ་དང་ཐོས་བསམ་གཉེར་མཁན་གྱི་སློབ་མའི་འཐུས་ཚབ་པ་རྣམས་ལ་བཞུགས་མོལ་ཡང་གནང་བ་དང་། བོད་ལྗོངས་ཀྱི་ད་ལྟའི་གནས་ཚུལ་དང་བོད་བརྒྱུད་ནང་བསྟན་གྱི་བྱུང་འཕེལ་ལོ་རྒྱུས་ཐད་ནས་བསམ་ཚུལ་བརྗེ་རེས་མཛད་པ་རེད་ཟེར།

ཉིན་དེའི་སྔ་དྲོར་མཇལ་འཕྲད་སྐབས། འཐུས་ཚབ་ཚོགས་པའི་ཚོགས་གཙོས་ད་ལྟ་བོད་ལྗོངས་སུ་རིགས་མི་འདྲ་བའི་ཆོས་གྲྭ་ ༡༧༠༠ ལྷག་ཡོད་ཅིང་། མིང་ཐོ་བཀོད་ཟིན་པའི་གྲྭ་པ་ཕལ་ཆེར་ཁྲི་ ༤་༧ ཡོད། རྒྱ་ཆེའི་མི་སེར་རྣམས་ཆོས་ལུགས་ཀྱི་ཆོ་ག་སྣ་ཚོགས་ལ་ཞུགས་པ་དང་། དད་མོས་བྱེད་པར་རང་དབང་ཡོད། ས་གནས་ཁག་གི་དད་ལྡན་མང་ཚོགས་ལྷ་སའི་གཙུག་ལག་ཁང་དུ་མཇལ་སྐོར་དུ་སྐྱོད་མཁན་ཡང་ཧ་ཅང་མང་། དོན་དངོས་དེ་དག་གིས་བོད་ས་གནས་ཀྱི་མི་སེར་རྣམས་ཀྱི་ཆོས་ལུགས་དད་མོས་རང་དབང་ཡིན་པ་གསལ་བོར་བསྟན་ཡོད་ཅེས་དང་།

ཡང་ཁོང་གིས་བོད་ལྗོངས་ནི་ཧ་ཅང་ལྟ་ན་སྡུག་ཅིང་ཡིད་དབང་འཕྲོག་པའི་གནས་མཆོག་ཅིག་ཡིན་ཞིང་། ད་ལྟ་གནས་དེར་གནམ་ས་བླ་འོག་བསྒྱུར་བ་ལྟ་བུའི་འཕོ་འགྱུར་བྱུང་ཡོད། བོད་ལྗོངས་སུ་བསྐྱོད་འདོད་ཚེ། གནམ་གྲུ་དང་མེ་འཁོར། རླངས་འཁོར་སོགས་གང་རུང་དུ་བསྡད་དེ་བོད་ལྗོངས་སུ་ཕེབས་ཆོག་པ་ཡིན། ལྷོ་ཀོ་རི་ཡའི་ནང་བསྟན་ཆོས་ལུགས་པ་རྣམས་དངོས་སུ་བོད་ལྗོངས་སུ་གཟིགས་ཕེབས་གནང་རྒྱུ་ནི་བདག་གི་རེ་བ་ཉག་ཅིག་ཡིན། ཞེས་བརྗོད་འདུག

ལྷོ་ཀོ་རི་ཡའི་ནང་བསྟན་གྲུབ་མཐའ་གཙོ་བོ་ཚའོ་ཞི་ཙོང་ཚོགས་གཙོས་ཀྱང་། ཀྲུང་གོའི་བོད་རིག་པའི་མཁས་པ་དང་བླ་སྤྲུལ་སྐུ་ཚབ་ཚོགས་པ་ལྷོ་ཀོ་རི་ཡར་འབྱོར་བར་དགའ་ཚོར་བྱུང་བ་དང་། ཕྱིས་སུ་གོ་སྐབས་བྱུང་ན་བོད་ལྗོངས་སུ་འཚམས་འདྲིར་བསྐྱོད་ཐུབ་པའི་རེ་བ་བཅངས་ཡོད། ཅེས་དང་། ཕྱོགས་གཉི་གའི་བོད་བརྒྱུད་ནང་བསྟན་དང་ཚའོ་ཞི་ཙོང་གྲུབ་མཐའི་འབྱུང་ཁུངས་གཅིག་ཡིན་པས། ཀྲུང་གོ་དང་ལྷོ་ཀོ་རི་ཡའི་རྒྱ ལ་ཁབ་གཉིས་ཀྱི་བསྟན་འཛིན་གྱི་སྐྱེས་བུ་རྣམས་ཀྱིས་མུ་མཐུད་དུ་བསམ་ཚུལ་བརྗེ་རེས་དང་མཉམ་ལས་བྱེད་པར་སྔར་ལས་ལྷག་པར་ཤུགས་སྣོན་རྒྱག་དགོས་པར་འདོད། ཅེས་བཤད་འདུག

ཐེངས་འདིར་ལྷོ་ཀོ་རི་ཡར་འཚམས་འདྲི་བྱེད་སྐབས། སྐུ་ཚབ་ཚོགས་པས་ལྷོ་ཀོ་རི་ཡའི་གྲོས་ཚོགས་འཐུས་མིར་མཇལ་འཕྲད་གནང་རྒྱུ་མ་ཟད། ཧྥུའུ་ཧྲན་རི་བོར་ཕྱིན་ནས་ཡུལ་དེའི་ནང་བསྟན་ལས་རིགས་དང་སྲིད་འཛིན་ལས་རིགས་ཁག་གི་མི་སྣར་བཞུགས་མོལ་གནང་རྒྱུ་ཡིན་འདུག

ཟླ་འདིའི་ཕྱི་ཚེས་ ༡༣ ཉིན་འཐུས་ཚབ་ཚོགས་པ་ཉི་ཧོང་ལ་འབྱོར་རྗེས་ཐོག་མར་ཏུང་ཅིང་གི་ཀྲུང་གོ་བའི་སྤྱི་ཁྱབ་ཚོགས་པའི་ཚོགས་གཙོ་ལིའོ་ཡ་ཡན་ལ་མཇལ་འཕྲད་གནང་ཡོད་ལ། ཤེས་རབ་ཉི་མས་མཇལ་འཕྲད་གནང་སྐབས། འཐུས་ཚབ་ཚོགས་པ་འདི་ནི་དུས་ཡུན་རིང་བོར་བོད་རིག་པར་ཞིབ་འཇུག་གནང་བཞིན་པའི་ཆེད་མཁས་པ་དང་སྤྲུལ་སྐུས་གྲུབ་ཡོད་ཅིང་། ཐེངས་འདིར་ཉི་ཧོང་ལ་ཡོང་དོན་ཉི་ཧོང་གི་ལས་རིགས་ཁག་སོ་སོ་དང་བསམ་བློ་བརྗེ་རེས་དང་ཕན་ཚུན་འབྲེལ་འདྲིས་བྱ་རྒྱུ་དང་། བོད་ལྗོངས་འཕེལ་རྒྱས་ཀྱི་གནས་ཚུལ་རྣལ་མ་ཞིག་ངོ་སྤྲོད་གནང་ཆེད་ཡིན་ཞེས་བཤད་འདུག

ཏུང་ཅིང་གི་ཀྲུང་གོ་བའི་སྤྱི་ཁྱབ་ཚོགས་པའི་ཚོགས་གཙོ་ལིའོ་ཡ་ཡན་གྱིས་ཀྱང་ཕྱིར་འཁོར་ནས། དེང་སྐབས་རྒྱལ་སྤྱིའི་སྟེང་ལས་རིགས་ཁག་སོ་སོས་བོད་ལྗོངས་ལ་ཐུགས་ཁུར་ཆེན་པོ་གནང་བཞིན་ཡོད་ནའང་། ཁོང་ཚོའི་བོད་ལྗོངས་ཐད་ཀྱི་ལྟ་བར་ཕྱོགས་རིས་ཆེ་བས། འཐུས་ཚབ་ཚོགས་པས་ཐེངས་འདིའི་འབྲེལ་འདྲིས་བརྒྱུད་ཕྱི་རྒྱལ་བ་སྔར་ལས་མང་པོ་ཞིག་ལ་བོད་ལྗོངས་ཀྱི་འཕེལ་རྒྱས་གནས་ཚུལ་ཤེས་སུ་འཇུག་རྒྱུའི་རེ་བ་ཞུ་རྒྱུ་ཡིན་ཞེས་བརྗོད་འདུག

གསར་འགོད་པ། ཨ་རིག་འགྱུར་མེད།

གསལ་བཤད།

གོང་གསལ་པར་དེ་ནི་ཀྲུང་གོའི་བོད་ལྗོངས་དྲ་བའི་པར་ཡིན་ལ། དེའི་སྟེང་གི་མི་རྣམས་ནི་འཐུས་ཚབ་ཚོགས་པའི་སྤྲུལ་སྐུ་བློ་བཟང་བྱམས་པ་དང་ཤེས་རབ་ཉི་མ། སུའུ་ཧྥ་ཞང་བཅས་ཡིན།