གཡུ་དྲུག་དཀར། ཤེས་རབ་དགའ་ཚལ་གླིང༌།
སློབ་གྲྭ་ཞིག་ལ་མཚོན་ན་ཉི་མ་རེ་རེའི་འཛིན་ཁང་གི་སློབ་ཁྲིད་དང་མཉམ་དུ་ལོ་རེ་རེའམ། ཡང་ན་སློབ་སྐབས་རེ་རེར་ཤེས་ཡོན་གྱི་བྱ་འགུལ་གཞན་དང་གཞན་ཡང་མི་ཉུང་བ་ཞིགསྤེལ་དགོས་ཤིང༌། ཤེས་ཡོན་བྱ་འགུལ་ཅི་འདྲ་ཞིག་ཡིན་རུང་སློབ་མའི་ཤེས་ཡོན་གྱི་དགོས་མཁོ་ཞིག་དང༌། སློབ་མ་ཚོའི་སེམས་ཁམས་དང་འཚམ་པ་ཞིག་ཡིན་དགོས་པ་ནི་སློབ་གྲྭའི་ཤེས་ཡོན་བྱ་འགུལ་གྱི་སྤྱི་འགྲོས་རེད།
དེ་བས། རང་སློབ་གྲྭ་ལ་མཚོན་ནའང་ལོ་རེ་རེ་དང་སློབ་སྐབས་རེ་རེར་འཛིན་གྲྭ་ནང་ཁུལ་དང་ཁང་ཚན་ནང་ཁུལ་དབར་འགྲན་བསྡུར་གྱི་མིང་བཏགས་འོག་ཤེས་ཡོན་བྱ་འགུལ་གང་མང་སྤེལ་གྱིན་ཡོད་ལ། ཐེངས་འདིར་སྤྱི་ཟླ་༧པའི་ཚེས་༡༦དགོང་མོ།རིག་རྩལ་བྱ་འགུལ་ཆེན་མོ་ཞེས་པའི་བྱ་འགུལ་སྤེལ། བྱ་འགུལ་འདི་ལ་རིགས་དགར་བའི་དབང་དུ་བཏང་ན་རི་མོ་འབྲི་བ་དང༌། གཏམ་བཤད་སྤེལ་བ། སྙན་ངག་གྱེར་བ། གླུ་གཞས་ལེན་པ། མཚར་གཏམ་ཤོད་པ། རྫིག་ཉམས་སྟོན་པ། མཛེས་ཉམས་ངོམ་པ་བཅས་བདུན་ཚན་གཅིག་ཏུ་གྲུབ་ཅིང༌། རེབ་འདིའི་བྱ་འགུལ་ནི་ཁང་ཚན་དབར་ལ་སྤེལ་བས། བྱ་འགུལ་འདིར་སྤྱི་ཡོངས་ནས་སྒྲིག་གཞི་འགྲན་བསྡུར་དང་རྣམ་པ་རྩེད་མོ། ནང་དོན་ཤེས་ཡོན་གྱི་ཆ་དང་ལྡན་པ་ཞིག་ཡིན་ལ། འདི་འདྲའི་ཁྱད་ཆོས་གསུམ་ལྡན་གྱི་བྱ་འགུལ་ཞིག་སྤེལ་སྐབས་སློབ་གྲྭའི་དགེ་སློབ་གཉིས་ཀྱིས་བློ་རིག་པ་བསྒྲིམས་ཏེ་རང་རང་སོ་སོའི་ངོས་ཐད་ནས་ཚ་ཚ་འུར་འུར་བྱེད་དགོས་པ་ཞིག་ཅིས་ཀྱང་རེད་མོད། ཐེངས་འདིར་ཡང་བྱ་འགུལ་འགོ་མ་བརྩམ་གོང་ནས་དགེ་སློབ་གཉིས་ལས་ཀྱང་ཚ་ཚ་འུར་འུར་གྱིས་འདུར་རྒྱུག་བྱེད་ཀྱིན་པ་ནི་ཐག་རིང་མེག་ཀི་ལོ་ཌི་གྷན་ཇི་དང་ཐག་ཉེ་ནོར་གླིང་བཅས་ནས་འུར་ལངས་ཞོགས་ལངས་ཀྱིས་ཡོང་བའི་སྐྱ་སེར་ཕོ་མོ་དེ་དག་རེད། ཁོང་ཚོ་སླེབས་མཚམས་ཀྱི་རྣམ་རིག་ལ་བརྟག་ན་ཁོང་ཚོས་དོ་ནུབ་གཞས་གཏོང་གི་རེད་ཟེར་བ་ཙམ་མ་གཏོགས། དོ་ནུབ་ཀྱི་བྱ་འགུལ་གྱི་སྒྲིག་གཞི་དང་ནང་དོན། རྣམ་པ་བཅས་ཤེས་མེད་པ་མ་ཟད། ཐ་ན་དོ་ནུབ་ཀྱི་བྱ་འགུལ་ལ་ཁག་ག་ཚོད་ཅིག་ཡོད་མེད་ཀྱང་རྒྱུས་ལོན་མི་འདུག་ལ། ཁོང་ཚོ་སློབ་གྲྭའི་སྒོ་རའི་ནང་འབྱོར་མ་ཐག་ནས་གཞས་གཏོང་གི་རེད་དམ་ཞེས་འདྲི་རྩད་བྱེད་སྟངས་ལ་བསམ་ན། ཁོང་ཚོར་གཞས་གཏོང་གི་རེད་ཅེས་པའི་སྐད་ཆ་ཚིག་གཅིག་གིས་འུར་ལངས་ནས་ཞོགས་ལངས་ནས་ཡོང་བ་རྟོགས་ཐུབ།
གློ་བུར་དུ་འུར་ལངས་ཞོགས་ལངས་ཀྱིས་སློབ་གྲྭ་ཞིག་གི་ཤེས་ཡོན་བྱ་འགུལ་ལ་ལྟད་མོར་སླེབས་པའི་ཁོང་ཚོར་འགྲོ་ས་འདུག་ས་དམིགས་བསལ་བ་རེ་མེད་པས། སྐྱ་སེར་ཕོ་མོ་དབྱེར་མེད་ཀྱིས་སློབ་གྲྭའི་ཚོགས་ཁང་ཕྱི་ལོག་གི་སྒོ་དང་སྒེའུ་ཁུང་འགྲམ་ལ་འཚང་ཁ་རྒྱག་པ་རེད། སྤྱིར་སློབ་གྲྭ་ཞིག་ལ་མཚོན་ན་བྱ་འགུལ་སྤེལ་ཡུལ་ཚོགས་ཁང་གི་སྒོ་སྒེའུ་ཁུང་གི་ཕྱི་རོལ་ནས་མི་ཚོགས་མང་པོ་ཡར་ལངས་ཏེ་སོ་བ་ལྟ་བུར་འདུག་པ་ནི་རྣམ་པ་ཡག་པོ་ཞིག་གཏན་ནས་མ་རེད་དེ། ཁོང་ཚོ་ཐག་རིང་ནས་འུར་ལངས་ཞོགས་ལངས་ཀྱིས་དཀའ་ཚགས་ཆེན་པོ་ཁྱད་དུ་ཟད་ནས་འདིར་སླེབས་པས། ད་ནི་སློབ་གྲྭའི་སྒྲིག་གཞིའི་ཐད་ཀྱི་སྐད་ཆ་རེ་བཤད་རྒྱུ་ཡང་དཀའ་བའི་གནས་སུ་མཆིས།
སློབ་གྲྭའི་ཚོགས་ཁང་གི་ཕྱི་ན་ལྟད་མོ་བ་འཚང་ཁ་རྒོད་ཅིང་ནང་ན་སློབ་མ་ཚོ་འཚང་ཁ་ཆེ་བས་ཚོགས་ཁང་གི་ཕྱི་ནང་གཉིས་ཀ་འུར་འུར་ཟིང་ཟིང་དུ་གྱུར་མཚམས་རེར་དགེ་གྲོགས་ཤིག་གིས་བརྗོད་པ་ལྟར་ཡོངས་གླིང་ཚོགས་ཁང་ནང་མི་མང་ལ་གློག་བརྙན་སྟོན་པའི་སྐབས་ཀྱི་རྣམ་པ་དེའང་ཡིད་ལ་འཆར་ཞིང༌། ཁོང་ཚོས་བརྙན་ལེན་འཕྲུལ་ཆས་དང་པར་ཆས། ཁ་པར་སོགས་འདྲ་མིན་སྣ་ཚོགས་ཐོགས་ཏེ་བསམ་གཟས་ནས་སློབ་མའི་འཚོ་བ་ལ་འགྲན་སློང་བ་ལྟ་བུ་བྱེད་པ་དང༌། ཚོགས་ཁང་གི་སྒོ་སྒེའུ་ཁུང་གི་ཕྱི་རོལ་ནས་མངོན་སུམ་འཛེམ་མེད་ཀྱིས་ཐ་མ་འཐེན་པའི་དུ་དྲི་སྣ་ལམ་དུ་མཆེད་ཡོང་དུས་དང༌། ཀི་སྒྲ་དང་ཨག་སྒྲ་སྣ་ཚོགས་ཀྱིས་ཐོས་འཛིན་གྱི་སྒོ་གླེགས་རྡུང་དུས། སློབ་གྲྭ་ཞིག་གི་ཚོགས་ཁང་ལས་ལྡོག་ནས་མི་མང་གློག་བརྙན་ཁང་ཞིག་ཏུ་སྡོད་པའི་མྱོང་བ་སྟེར་ལ། སློབ་གྲྭ་ཞིག་གི་ཤེས་ཡོན་བྱ་འགུལ་གྱི་རྣམ་པ་དེའང་རྨང་ནས་བརླག་འགྲོ།
ལྷག་པར་དུ་འུར་ལངས་ཞོགས་ལངས་ཀྱིས་སླེབས་པའི་ཁོང་ཚོའི་ཁྲོད་ཀྱི་སྐྱ་སེར་ཕོ་མོ་རེ་འགའ་རང་སློབ་གྲྭའི་སློབ་མ་ཁ་ཤས་ཀྱི་ངོ་ཤེས་ལྟ་བུར་སོང༌། སློབ་མ་དེ་དག་གིས་ཁ་ཡ་མི་བྱེད་ཐུ་མེད་དུ་གྱུར་ཏེ་སློབ་མ་དེ་དག་གིས་ཁོང་ཚོའི་ཁ་ངོ་ལ་བལྟས་ཏེ་སློབ་གྲྭའི་འགྲོ་སྟངས་འདུག་སྟངས་དང་མི་མཚམས་པའི་བྱ་སྤྱོད་སྤེལ་དགོས་པར་ཐུག་གིན་ཡོད་པས། སྐད་ཆ་སྡུག་ས་ནས་བཤད་ན། མི་འདི་དག་གིས་སློབ་མར་དཔེ་ངན་པ་སྟོན་པ་དང་གོམས་གཤིས་ངན་པ་འཇགས་སུ་འཇུག་ལ། སློབ་གྲྭར་སློབ་མའི་ཤེས་ཡོན་གྱི་དགོས་མཁོ་དང་བསྟུན་པའི་འགྲོ་སྟངས་ཙག་ཙིག་ཅིག་ཡོད་པའང་རྡོག་པས་བརྫིས་ནས་སླད་མར་གནོད་ཆེན་པོ་བསྐྱལ་ངེས།
སྤྱིར་སྲིད་པ་བོད་ཀྱི་ཁ་དཔེར་མི་གོ་བ་ཅན་ལ་ཚིག་གཅིག། རྟ་གོམ་པ་ཅན་ལ་ལྕགས་གཅིག་ཟེར་བ་རེད་དེ། མི་འདི་ཚོ་འུར་ལངས་ཞོགས་ལངས་ཀྱིས་འདུར་རྒྱུག་བྱེད་སྟངས་ལ་བལྟས་ན་གོ་བ་ཅན་གྱི་མི་མིན་པ་ཐག་གིས་ཆོད། ཁོང་ཚོར་ཕར་སྐད་ཆ་ཚིག་གཅིག་བཤད་ན་ཚུར་གཉིས་རེག་ངེས་པའམ། ཕར་སྐད་ཆ་ཡག་པོ་གཅིག་བཤད་ཀྱང་ཚུར་སྡུག་པོ་གཉིས་རེག་དོགས་ཆེ་སྟེ། འུར་ལངས་ཞོགས་ལངས་ཀྱི་བང་ལ་ཞོན་པའི་མིས་དེ་ཙམ་རང་གི་རྒྱལ་ཁ་ཆེན་པོ་རུ་སྙམ་པས་སོ།།
མི་ཞིག་གི་འཇིག་རྟེན་དང་མི་ཚེའི་ལྟ་ཚུལ་ནི་ཐོག་མར་རྒྱུན་ཤེས་ཀྱིས་ཡར་སློང་དགོས་པ་ནི་བཤད་མ་དགོས་ལ། སྤྱི་ཚོགས་ཀྱི་རྒྱུན་ཤེས་འདི་ལྟ་བུ་ཞིག་གི་གོ་རྟོགས་ཀྱང་མ་སེལ་པས་ན། ཁོང་ཚོར་རྩེད་སྤྲོ་དང་རྩེད་འཇོ་ཟེར་བ་ཅི་ཞིག་ཡིན་མིན་གྱི་ལྟ་ཚུལ་ཡང་ཆགས་ཐུབ་ཡོད་རྒྱུ་མ་རེད། དེ་འདྲ་དེ་ཡང་མ་བྱུང་བའི་དབང་གིས་ཁོང་ཚོ་འུར་ལངས་ཞོགས་ལངས་ཀྱིས་རྒྱུག་གིན་པ་མ་གཏོགས། དགའ་དགའ་སྐྱིད་སྐྱིད་བྱེད་ས་གང་ཡིན་མིན་ཡང་མི་ཤེས་པའི་གནད་དོན་འདི་འབྱུང་བཞིན་པ་རེད། གནད་དོན་འདི་ྋགོང་ས་མཆོག་གི་གསུང་ཆོས་ར་བའི་ནང་ནའང་འབྱུང་བཞིན་ཡོད།དེ་བས། ཁོང་ཚོ་སློབ་གྲྭ་ཞིག་གི་ཤེས་ཡོན་བྱ་འགུལ་གྱི་སྡིངས་ཆའི་སྟེང་ལ་འཚང་ཁ་བརྒྱབས་ཡོང་ཞིང༌། མཚན་ཚོགས་དང་སྤྲོ་ཚོགས་ཀྱི་འདུ་ཤེས་འཆང་སྟེ་འུར་རྒྱག་པ་རེད། དོན་ངོ་མར་སློབ་གྲྭ་ཞིག་གི་ཤེས་ཡོན་བྱ་འགུལ་གྱི་སྡིངས་ཆའི་སྟེང་དུ་རྩེད་དགའི་རྣམ་པ་ཅུང་མངོན་དུ་ཆུག་ཀྱང་དེ་ནི་སྤྱི་ཚོགས་ཀྱི་རྩེད་འཇོའི་རྣམ་པ་དང་ཀུན་ནས་ཐ་དད་རེད་ལ། འདི་ལྟ་བུའི་རྒྱུན་ཤེས་ཀྱི་ལྡེ་མིག་འཆང་སྟེ་ཁོར་ཡུག་གམ་སྤྱི་ཚོགས་བྱེ་བྲག་པའི་རྣམ་པ་དང་ངོ་བོ་ལོགས་སུ་དགར་དགོས་པ་རེད་དེ། ཁོང་ཚོ་འུར་ལངས་ཞོགས་ལངས་རྒྱག་སྟངས་ཀྱིས་གཞི་རིམ་གྱི་རྒྱུན་ཤེས་འདི་ཙམ་ཡང་རྒྱུད་ན་མེད་པ་གསལ་བོར་བསྟན་པ་རེད། སྐབས་འདི་ནས་ང་ཚོས་ནང་པ་ལ་འཇུག་པའི་སྒོ་སྐྱབས་འགྲོ་རེད་ཟེར་བ་བཞིན། སྤྱི་ཚོགས་ལ་འཇུག་པའི་སྒོ་ནི་རྒྱུན་ཤེས་རེད་ཅེས་སྨྲ་བ་དེའོ།།
འཚམས་ཞུ། གནས་སྐབས་རིང་བདེ་མོ་བྱོས། ཆུ་ཚོད་ཀྱི་དབང་གིས་ཉིད་ཀྱི་རྩོམ་ཡིག་ལྟ་ཐུབ་མ་སོང་། དགོངས་དག་ཞུ
ཐོག་མར་སློབ་གྲོགས་གཡུ་དྲུག་དཀར་ལགས་ལ་མཚམས་འདྲི་བཀྲིས་བདེ་ལེགས་ཞུ།ད་དུང་མུ་མཐུད་དུ་མཚམས་མི་འཇོག་པར་དེ་དང་དེ་ལྟ་བུའི་རིགས་ལ་ཁབ་གཙགས་དང་འབོགས་གཙགས་རེ་བྱེད་རྒྱུ་མི་བརྗེད་པར་དྲ་ཐོག་ཏུ་སྤེལ་དང་དུས་རྒྱུན་བལྟ་རུ་ཡོང་ནི་ཁོ་དག་ཡིན།ཨོ་རེད་ཡ་དངོས་གནས་ཡག་པོ་་བྲིས་འདུག
ལྷ་ཀླུ་དང་ཆོལ་ཁ་ལས་གང་ལའང་བརྩེ་ཞེན་མེད་པའི་འུ་ཚང་གི་རྒས་ཀོག་ཚོ་དང་། གླུ་དང་རྩེ་མོ་ལས་གང་ལའང་དོ་སྣང་མེད་པའི་འུ་ཚང་གི་གཞོན་སྐྱེས་ཚོར་བཀའ་ཀྱོན་ཚ་བོ་འདི་འབབ་ནས་འདུག་གི
བདེན་པ་རེད། སློབ་གྲྭ་ལ་ངེས་པར་དུ་དགོས་པ་ཤེས་ཡོན་གྱི་བྱ་འགུལ་རེད། དེ་ལ་གླུ་ལས་གང་ལའང་ཉན་མི་ཤེས་པ་དང་བྲོ་ལས་གང་ལའང་ལྟ་མི་ཤེས་པའི་བླུན་རྨོངས་ལྟད་མོ་བའི་ཁྱུ་ཚོགས་དེ་ཚོ་དགོས་དོན་མེད། དེ་དག་ལ་མིའི་འགྲོ་སྟངས་དང་བསམ་ཤེས་ཀྱི་རིག་པ་མེད་པའི་ཆ་ནས། སློབ་གྲྭའི་ར་བ་ནས་ཚུལ་མེད་བྱ་སྤྱོད་དུད་ཆང་འཐེན་པ་དང་འཆལ་གཏམ་སྨྲ་བ། འུར་རྒྱག་པ་སོགས་ཏན་ཏན་བྱས་ཡོད་ངེས། དེའི་ཕྱིར་དེ་ཚོ་ངེས་པར་འགོག་དགོས་པའི་རིགས་ཡིན། དེ་ལས་ཐག་ཉེ་རིང་གི་ཤེས་ཡོན་མི་སྣ་རེ་ཆེད་དུ་འབོད་པ་དང་ཡང་ན་དྭངས་བླངས་ཀྱིས་ཕེབས་ཏེ་བསམ་ཚུལ་འདོན་པ་དང་དཔྱད་ཞིབ་བྱེད་པ་སོགས་ངེས་པར་གལ་ཆེན་རེད།