དེང་སྐབས་བཙན་བྱོལ་སྤྱི་ཚོགས་ཁྲོད་སླར་ཡང་བྲེལ་འཚུབ་གྱི་རླུང་ནག་ཅིག་གཡུག་བཞིན་པ་ནི་ཉིས་སྟོང་བཅུ་གཅིག་ལོའི་བོད་རྒྱལ་ཡོངས་སྐབས་གསུམ་པའི་བཀའ་བློན་ཁྲི་བ་དང་། སྐབས་བཅོ་ལྔ་པའི་སྤྱི་འཐུས་གཉིས་ཀྱི་འོས་བསྡུའི་སྐོར་ཡིན་ལ། བརྒྱུད་རིམ་དེ་དག་གི་ཁྲོད་ཚོགས་པ་དང་མི་སྒེར་རེ་ཟུང་གིས་རང་རང་གི་ཕྱོགས་གཏོགས་སུ་གྱུར་བའི་སྤྱི་འཐུས་དང་བཀའ་ཁྲིའི་འོས་མི་ཁག་དམིགས་འཛུགས་བྱས་ཏེ། རྡ་སའི་སྲང་ལམ་གྱི་རྩིག་ངོས་གཡས་གཡོན་ཁག་ཏུ་སྦྱར་ཏེ་འོས་བསྡུ་དེ་ཉིད་གལ་ཆེ་ཚུལ་གྱི་རྒྱུ་མཚན་རེ་བགྲངས་བཞིན་གནམ་ས་འགུལ་བ་ལྟ་བུའི་སེམས་ཚོར་བཅོས་མ་གཉིས་གཞི་གཅིག་ཏུ་བསྡུས་ཏེ། མང་ཚོགས་ཀྱི་མདུན་སར་འཁྲབ་སྟོན་འདྲ་མིན་བྱེད་ཀྱིན་ཡོད།
ཚོགས་པ་དང་མི་སྒེར་རེ་ཟུང་གིས་བོང་བུས་གཟིག་ལྤགས་གྱོན་ཏེ་གཟིག་ལ་བརྫུས་པའི་བྱེད་སྟངས་དེས་བཙན་བྱོལ་སྤྱི་ཚོགས་ཁྲོད་ཤན་ཤུགས་གང་འཚམ་ཞིག་ཐེབས་བཞིན་ཡོད། དེ་དག་གི་དཔེ་མཚོན་གསལ་ཤོས་ཤིག་ནི་ཉེ་སྔོན་ཆོལ་ཁ་ཁག་གིས་ཚོད་ལྟའི་འོས་བསྡུ་སྐབས་མི་མང་གིས་ཚོགས་པ་ཁག་གིས་གཏན་ཁེལ་བྱས་པ་དེ་དག་ངེས་པར་ཏུ་བླུག་དགོས་པའི་ཚོར་འདུའི་འོག མི་གང་མང་ཞིག་གིས་འོས་བླུགས་བྱས་རྗེས་འབྲེལ་ཡོད་ཁག་དང་གླེང་མོལ་བྱེད་སྐབས་རྟོགས་ལ། ལྷག་དོན་སྐབས་གསུམ་པའི་བཀའ་བློན་ཁྲི་བའི་འོས་མི་དེ་ཡང་བཀྲིས་མཐོང་བསྟན་འཛིན་རྣམ་རྒྱལ་དང་བློ་བཟང་སེང་གེ་གཉིས་ལ་མཐའ་གཅིག་ཏུ་འོས་བླུགས་དགོས་པ་ཞིག་མང་ཚོགས་ནང་དུ་ཁྱབ་བཞིན་ཡོད། ད་དུང་བོད་མི་དཀྱུས་མ་ཚོས་དངོས་གཞིའི་འོས་བླུགས་སྐབས་སུ་དང་སུ་ལ་བླུགས་དགོས་པའི་འདྲི་བ་དང་གཞན་ལ་མིང་འབྲི་རུ་བཅུག་པ་སོགས་རང་ཉིད་ཀྱི་ཐོབ་ཐང་མི་གཞན་ལ་སྤྲད་དེ། འགན་ཅི་ཡང་མི་འཁུར་བ་དང་ལག་ལེན་ལ་ཡང་ཅི་ཡང་མི་འདེབས་པར་མང་གཙོའི་རང་དབང་བཀོལ་སྤྱོད་བྱེད་པར་རློམ་བཞིན་ཡོད་།
དེ་ལས་ཀྱང་གལ་ཆེ་བ་ཞིག་ནི་ཕྱིས་སུ་བདམས་ཟིན་པའི་སྤྱི་འཐུས་དང་། ཡང་ན་བཀའ་ཁྲི་སུ་ཡིས་བོད་སྤྱི་བའི་རྩ་དོན་བསྒྲུབ་ཀྱི་ཡོད་མེད་ཀྱི་སྟངས་འཛིན་ལ་འགན་འཁུར་མེད་པ་མ་ཟད། ཅི་མི་སྙམ་པར་མང་གཙོའི་ཁྱད་ནོར་ལ་བཀོལ་སྤྱོད་བྱེད་བཞིན་པའི་མི་བུ་དག་ལ་ཁྱད་གསོད་ཀྱི་རྙོག་གླེང་བྱེད་བཞིད་པ་དེ་རེད། དེ་དག་གི་དཔེ་མཚོན་ཞིག་སྔོན་ཆད་བོད་མི་མང་སྤྱི་འཐུས་ལྷན་ཚོགས་ནང་སྤྱི་དོན་ཁ་འཁྱེར་དང་། རང་དོན་ཁོག་བཅུག་གྱི་ལས་རིམ་དངོས་སུ་བསྟར་བར་བོད་མི་མང་གིས་བརྙན་འཕྲིན་ལས་གསལ་རྟོགས་བྱུང་ཡོད་ཀྱང་། མང་གཙོའི་ཁྱད་ཆོས་གལ་ཆེ་ཤོས་ཏེ་རང་ཉིད་ཀྱིས་བདམས་པའི་འཐུས་མིས་ལས་དོན་ཚུལ་བཞིན་མ་བྱས་ཚེ་སླར་ཡང་གནས་དབྱུང་གཏོང་བའི་ཐོབ་ཐང་རང་ཉིད་ལ་ཡོད་ཀྱང་། འགན་ལེན་གྱིས་ད་བར་ངོ་རྒོལ་གྱི་ལས་འགུལ་མཐའ་ཆོད་པ་ཞིག་བྱེད་མཁན་ཅི་ཡང་བྱུང་མེད།
ད་དུང་ང་ཚོའི་སྤྱི་ཚོགས་ཁྲོད་ལག་ལེན་གྱི་རང་བཞིན་ནི་ནམ་མཁའི་མཐའ་ལྟར་རིང་ཡང་། བཙན་བྱོལ་སྤྱི་ཚོགས་ཀྱི་མགོ་སྐུ་ངོ་ནས་མཇུག་མ་བྱན་ཚུན་ཆད་ནས་བོད་མི་རིགས་ཀྱི་སྐད་དང་ཡི་གེ་སྲུང་སྐྱོབས་དགོས་ཚུལ་གྱི་ཁ་གཡང་རྒྱུན་ཏུ་སྒྲོག་བཞིན་ཡོད་ལ། དངོས་ཡོད་ལག་ལེན་གྱི་ཆ་ནས་བཙན་བྱོལ་བོད་གཞུང་གི་ཤེས་རིག་ལྷན་ཁང་ཕུད། ལྷན་ཁང་ཁག་གི་བར་ལ་གཏོང་བཞིན་པའི་ཡིག་འབྲེལ་དེ་དག་དབྱིན་ཡིག་ཁོ་ན་བཀོལ་སྤྱོད་བྱེད་བཞིན་ཡོད་པར་བརྗོད། ད་དུང་གོ་ཐོས་ལྟར་ན་ལྷན་ཁང་ཁག་གི་མི་ལོ་ལྔ་བཅུའི་བརྒྱུད་རིམ་གྱི་ལོ་རྒྱུས་ཕྱོགས་བསྒྲིགས་བྱེད་པའི་ལས་རིམ་ཞིག་བསྟར་བཞིན་ཡོད་ལ། ལྷན་ཁང་འགའ་ཤས་ལ་བོད་ཡིག་གི་ཤེས་ཚད་མེད་པས་ལོ་རྒྱུས་ཕྱོགས་བསྒྲིགས་བྱེད་མཁན་མ་འདང་བའི་དཀའ་ངལ་འཕྲད་བཞིན་ཡོད།
གཞན་ཡང་བོད་མི་རིགས་ཀྱི་ཤེས་རིག་དང་གང་ཅིའི་ཆ་ནས་བརྒྱུད་འཛིན་ཏུ་གྱུར་བའི་སློབ་གྲྭ་ཁག་གི་ཤེས་རིག་གི་གནས་སྟངས་སྐྱོ་བོ་ཞིག་ཡིན་པ་ནི་ཟུར་བལྟས་ལེབ་མཐོང་ཡིན་ཞིང་། འདིའི་ཐད་༧གོང་ས་མཆོག་གིས་ཀྱང་བཀའ་སློབ་ཟབ་མོ་ཞིག་གནངས་དགོས་བྱུང་ཡོད། འོན་ཀྱང་སློབ་གྲྭའི་དབུ་འཛིན་ཞིག་གིས་བོད་ཡིག་ལ་བེད་སྤྱོད་མེད་པས་ད་དུང་དབྱིན་ཡིག་སྦྱོང་དགོས་ཞེས་བགྲོ་གླེང་ཞིག་གི་ཉིན་བརྗོད་ཡོད། དེ་ལྟར་ན་ད་དུང་བཙན་བྱོལ་སྤྱི་ཚོགས་ཀྱི་གནས་སྟངས་ཧ་ཅང་སྐྱོ་བོ་ཡིན་སྟབས་སྐབས་རྗེས་མའམ་འབྱུང་འགྱུར་གྱི་སྤྱི་འཐུས་དང་བཀའ་ཁྲི་གཉིས་དམིགས་བསལ་འགན་དབང་དང་ལག་ལེན་གཉིས་གཞི་གཅིག་ཏུ་བསྒྲིལ་ཏེ་ལས་རིམ་གསར་གཏོད་བྱེད་ཕྱོགས་ལ་ནུས་པ་འདོན་ཐུབ་ངེས་གཅིག་དགོས།
མདོར་ན་མ་འོངས་པའི་བོད་མི་རིགས་ཀྱི་བཀའ་ཁྲི་དང་སྤྱི་འཐུས་གཉིས་ཚད་ལྡན་ཞིག་ཡོང་ཐུབ་མིན་གྱི་གཞི་རྩ་ནི་བོད་མི་མང་གིས་ལག་ལེན་དང་འགན་འཁུར་གྱིས་རང་ཉིད་ལ་དབང་བའི་མང་གཙོའི་ཁེ་ཕན་ཇི་ལྟར་བཀོལ་སྤྱོད་གཏོང་ཐུབ་མིན་ལ་རག་ལས་པ་ཞིག་རེད།
༼ཆོལ་ཁ་ཁག་གིས་ཚོད་ལྟའི་འོས་བསྡུ་སྐབས་མི་མང་གིས་ཚོགས་པ་ཁག་གིས་གཏན་ཁེལ་བྱས་པ་དེ་དག་ངེས་པར་ཏུ་བླུག་དགོས་༽པའི་བཙན་བཀའ་བཏང་ཡོད་པ་དངོས་གནས་ཡིན་ན། ང་ཚོའི་ཡང་དག་པའི་མང་གཙོ། འཚེ་བ་མེད་པའི་མང་གཙོ། དྲང་བདེན་གྱི་མང་གཙོ་ཞེས་ཁྱད་ཆོས་ལྡན་པའི་མང་གཙོ་ཡིན་ཞེས་པའི་མང་གཙོ་དེ་གུང་ཁྲན་ཏང་གི་མང་གཙོ་དང་ཁྱད་པར་ཅི་འདུག་གམ
ཤེས་ཡོན་པ་དང་བསམ་བློ་བ་ཉུང་བའི་སྤྱི་ཚོགས་ཀྱི་དམངས་གཙོ་ལ་ཉེན་ཁ་ཆེ་བ་དངོས་ཡོད་གནས་ཚུལ་ཡིན་ལ། ཆབ་སྲིད་ཀྱི་ཁ་གཡང་སྒྲོག་མཁན་ཚོའི་རྒྱབ་ལྗོངས་ཤེས་རྒྱུ་ཧ་ཅང་གལ་ཆེན་ཡིན་པས། ངོ་མ་ཁྱབ་བསྒྲགས་གཅིག་པོ་ལ་ལྟ་མི་ཉན་ཡ་མི་མང་། མི་རེ་ལ་འདོད་པ་རེ་ཡོད་ལ་དེ་རེ་ལ་རྒྱུ་མཚན་རེ་ཡོད་མོད། ཚང་མ་ཡང་དག་དང་བདེན་པ་ཞིག་ག་ལ་ཡིན། དེས་ན་སྤྱི་ལ་སུ་ཕན་གསལ་བོ་ཤེས་དཀའ་བས་རང་ལ་ཕན་ངེས་ཀྱི་མི་ཞིག་ལ་འོས་བླུག་རྒྱུ་ཐོབ་ཐང་ཡིན་ནི་རེད། དེ་ལྟར་འོས་འཕོངས་དང་ཐ་མ་མང་པོ་ལ་ཕན་པའི་མི་ཞིག་ཐོབ་ཡོང་ནི་རེ།
ཉིད་ཀྱིས་ཐུགས་ཉམས་བཞག་ཡོད་ན། ང་ཚོས་འགན་ཁུར་ནས་དམངས་གཙོ་ལོངས་སུ་སྤྱོད་བཞིན་ཡོད། ངས་དཔེ་མཚོན་ཞིག་ཀྱང་དྲངས་ན་ཆོག ང་ཚོ་ལ་རྒྱལ་ཁབ་ཀྱི་ཆགས་འཇུག་དང་། རིག་གཞུང་གི་ཆགས་འཇུག ཆབ་སྲིད་ཀྱི་ཆགས་འཇུག ནང་སྲིད་ཀྱི་ཆགས་འཇུག མདོར་ན་རྐྱེན་ངན་ཅི་བྱང་ཡང་། ༸གོང་ས་མཆོག་ལ་གསོལ་འདེབས་དང་། སྐུ་རིམ་སྒྲུབ་ནས་གཞལ་ལ་རེ་བའི་དམངས་གཙོ་ལོངས་སུ་སྤྱོད་བཞིན་ཡོད། དེ་བཞིན་དུ་མ་འོངས་པའི་བཀའ་སྤྱི་གཉིས་ཀྱང་གསོལ་འདེབས་དང་སྐུ་རིམ་གྱི་ཡག་པོ་ཡོང་བའི་ཡིད་ཆེས་ཀྱིས། སྔོན་འགྲོའི་དེབ་སྐྱེལ་མི་བྱེད་པའི་དམངས་གཙོ་ལོངས་སུ་སྤྱོད་བཞིན་ཡོད། ད་དུང་དེ་ལ་སྙིང་བོ་མེད་པའི་ངེས་ཤེས་རྙེད་ཡོད་མདོག་གིས་སྣང་མེད་ཀྱི་དམངས་གཙོ་ལོངས་སུ་སྤྱོད་བཞིན་ཡོད། མི་རིགས་རིག་གཞུང་དང་འབྲེལ་བའི་ལས་དོན་གང་ལ་ཡང་གསོལ་བ་སྨོན་ལམ་ཙམ་གྱིས་འགན་ཁུར་བའི་དམངས་གཙོ་ལོངས་སུ་སྤྱོད་བཞིན་ཡོད། རང་མགོ་གང་ཐོན་གྱི་འགན་ཁུར་བའི་དམངས་གཙོ་ལོངས་སུ་སྤྱོད་བཞིན་ཡོད།
གདོང་རིའི་ཆོས་འཛིན་ལགས།
ཁྱོད་ཀྱིས་བཤད་པ་མཐའ་དག་དངོས་ཡོད་གནས་ཚུལ་ཡིན།ལོ་ཟླ་ག་ཚོད་ཟད་ཀྱང་རུང་།
ངས་བཙན་བྱོལ་སློབ་གྲྭ་ཁག་ག་ི་གནས་སྟངས་དེ་ལ་འགྱུར་བ་ཡང་དག་ཅིག་འོང་པའི་རེ་བ་ནམ་ཡང་རྒྱག་གི་མེད།་གང་ཡིན་ཞེ་ན་༧གོས་ས་མཆོག་གི་སྡུག་སྐྱད་ག་ཚོད་བཏོན་རུང་།་ཤེས་ཡོན་སྒང་ལ་ལས་དོན་སྒྲུབ་མཁན་ཚོས་ཁ་ཞེ་གཉེས་་མེད་ཀྱི་ལག་ལེན་གནད་དུ་ཁེལ་བ་ཞིག་ཁྱོན་ནས་བསྟར་གྱིན་མེད།
འདིའི་སྐོར་བདག་གིས་སྔར་ནས་ཀྱང་གང་མངས་ཞིག་བཤད་མྱོང་ལ། དངོས་གནས་བཤད་ན། བོད་མི་དམངས་ལ་འོས་ཤིང་འཚམས་པའི་ཆབ་སྲིད་ལམ་ལུགས་དེ་ནི། སྤྱི་མཐུན་རྒྱལ་ཁབ་ཀྱི་ལམ་ལུགས་ཡག་པོ་ཞིག་གི་ཐོག་ནས། བཙན་གཤོལ་བོད་གཞུང་སྲ་བརྟན་དུ་གཏོང་རྒྱུ་དེ་རེད་འདུག དེ་མིན་དམངས་གཙོའི་ལམ་ཁར་འགྲོ་དགོས་ན། མ་མཐའ་ཡང་སྤྱི་དམང་བརྒྱ་ཆའི་ལྔ་བཅུ་ཡན་ལ་ཤེས་ཡོན་ལྡན་དགོས། གལ་སྲིད་དེ་མ་ལྡན་ན། རྒྱལ་ཁབ་དེ་བླུན་པོས་དབང་བསྒྱུར་འོག་ནས་བརྒལ་མི་ཐུབ། མ་ཟད་སྲ་བརྟན་དང་དབང་ཤུགས་མེད་པའི་སྲིད་གཞུང་དེ། འཐོར་བྱེད་ཀྱི་ཆ་སྐྱེན་ཐུན་མོང་མ་ཡིན་པ་དེ་དམངས་གཙོ་ལམ་ལུགས་ཡིན་པ་ཤེས་དགོས། དཔེར་ན་རྒྱ་གར་གཞུང་གི་ཆབ་སྲིད་འགྲོ་ལུགས་ཀྱང་ཁ་ནས་དམངས་གཙོ་ལབ་ཀྱང་། གནད་དོན་གལ་ཆེན་ཐོག་ལ་བབས་སྐབས་མཁས་དབང་རྣམས་ཀྱིས་ཐག་བཅད་ཀྱིན་ཡོད།
བསམ་ཚུལ་སྦྱངས་བཤད་བྱ་སྐབས་མི་གཞི་ལ་དམའ་འབེབས་གཏོང་མཁན་དག་ནི་ཤིན་ཏུ་མ་རུང་ངོ་།། གདོང་རི་བས་བཤད་པའི་ཆ་ལ་ངར་བཤད་ཏོག་ཙམ་འདྲེས་ཡོད་པར་མཐོང་། གང་ལྟར་འདི་ལྟ་བུའི་བསམ་ཚུལ་ནི་ང་ཚོར་ངེས་པར་མཁོ་ཡོདྲ
གྲོགས་པོ་ལགས།
གཞུང་ཞིག་གིས་ཁྱོད་མི་བུ་སྒེར་ཞིག་ལ་གང་བྱེད་ཐུབ་མིན་གཙོ་དོན་མིན། ཁྱོད་ཀྱིས་རང་ཉིད་ཀྱི་གཞུང་ལ་གང་བྱེད་ཐུབ་མིན་དེ་གཙོ་བོའི་ནང་གི་སྙིང་པོ་ཡིན། དེས་ན་ཁྱོད་ཀྱིས་ཡོད་ཚད་ལ་འཁང་ར་དང་མཐོང་ཚད་ལ་སྣང་ཆུང་རྩིས་མེད་བྱེད་པའི་སྤྱོད་ཚུལ་འདི་རིགས་ངན་འབྱམས་སུ་མི་གཏོང་བར་འཚལ།
སྙིང་གཏམ་དམར་རྗེན་དུ་བཤད་འདུག
གདོང་རུའི་བུ་རང་རེད
རང་ཉིད་ལ་དབང་བའི་མང་གཙོའི་ཁེ་ཕན་ཇི་ལྟར་བཀོལ་སྤྱོད་གཏོང་མིན་ཐད་གོངས་ཚུལ་ཞིག་གསུངས་ན་གང་འདྲ་འདུག
ཆོས་འཛིན
དེང་སང་དུས་བབ་དྲ་ཐོག་གི་ཁ་ཚ་བོ་ལག་མྱུར་བོས་རིག་པ་འདོན་མཁན་ཚོ་ཧ་ཅང་ཉུང་དུ་སོང་བ་དང་མཐའ་ན་མེད་པའི་གནས་སྟངས་ལ་ལྷུང་བ་འདི་རྒྱུ་མཚན་ཅི་ཞིག་ཡིན་ནམ?ཉེ་སྔོན་དངོས་མིང་མེད་ན་འགོག་སྡོམ་བྱེད་རྒྱུའི་ཉེན་བརྡ་བཏང་བ་འདིས་ཤུགས་རྐྱེན་ཡིན་ནམ?ཡང་ན་བསམ་འཆར་ཐད་ཀར་དུ་འདོན་མི་ཐུབ་པའི་དེ་རིང་གི་གནས་བབ་འདི་ལན་པ་ཡིན་ནམ?གང་ལྟར་ཡང་།ཁ་ཚ་བོ་དང་ལག་མྱུར་བོ་ཤེས་པ་གསལ་བོ་ཅན་དག་ནི་དྲ་ཚིགས་འདིའི་ཐུན་མིན་གྱི་རྒྱན་དུ་གྱུར་བས།ཁོ་ཚོའི་རང་དབང་གི་སྨྲ་བརྗོད་དང་།ལྷན་མེད་ཀྱི་ཚོར་ཤེས་དག་ལ་ལྕགས་སྒྲོག་ཅིག་རྒྱག་དགོས་པའི་རྒྱུ་མཚན་ཡོད་དམ?དྲ་ཚིགས་སོ་སོར་ཐུན་མིན་གྱི་ཁྱད་རྟགས་ཤིག་ཡོད་དགོས་པ་སྐུ་ཉིད་ཀྱི་དགོས་ཚུལ་མིན་ནམ?ཕྱོགས་ཁ་ཤས་ནས་དྲ་ཚིགས་འདི་དང་ཚགས་ཤོག་དེ་མདུན་སྐྱོད་བྱེད་ཀྱིན་ཡོད་ནའང་།གཞུང་དང་སྒྲིག་འཛུགས་ཀྱི་ཕྱོགས་སུ་དཀྱོགས་སོང་ན།མི་བུ་སྒེར་གྱི་ཐོབ་ཐང་དང་ལྷན་སྐྱེས་གསོ་སྐྱོང་བྱེད་པར་འཐུས་ཤོར་ལ་འགྲོ་སྲིད་པ་མིན་ནམ?དེའི་ཕྱིར།ཐོབ་ཤོར་གྱི་ཆོས་ཉིད་ཅིག་ལ་གདམ་ཀ་བྱ་དགོས་པ་མིན་ནམ?
གདོང་རིའི་ཆོས་འཛིན་ལགས།
ཉིད་ཀྱི་རྩོམ་ཡིག་ཆ་ཚང་བཀླགས་པ་བརྒྱུད། ཉིད་རང་ཁྱི་སྤྲང་དང་རི་བོང་ཅལ་བྲོགས་ལྟར་གཞན་གྱི་ཟེར་ཚད་ལ་ཉན་པ་ལས་རང་ཉིད་ཀྱིས་དངོས་སུ་བརྟག་དཔྱད་གནང་མཁན་ཞིག་མིན་པ་དངོས་སུ་ཤེས་རྟོགས་བྱུང། དེ་ཡང་ཉིད་ཀྱི་རྩོམ་ཡིག་ནང་
” དངོས་ཡོད་ལག་ལེན་གྱི་ཆ་ནས་བཙན་བྱོལ་བོད་གཞུང་གི་ཤེས་རིག་ལྷན་ཁང་ཕུད། ལྷན་ཁང་ཁག་གི་བར་ལ་གཏོང་བཞིན་པའི་ཡིག་འབྲེལ་དེ་དག་དབྱིན་ཡིག་ཁོ་ན་བཀོལ་སྤྱོད་བྱེད་བཞིན་ཡོད་པར་བརྗོད།” དེ་ལྟར་འཁོད་འདུག ཤེས་རིག་ལས་ཁུངས་ལས་གཞན་པའི་བློན་ཆེན་ལས་ཁུངས་ཁག་དྲུག་དང་། རང་དབང་ཅན་སྡེ་ཚན་གསུམ། བཀའ་དྲུང་དང་ཚོགས་དྲུང་ལས་ཁུངས་སོགས་ཀྱིས་བོད་ཡིག་ལམ་ནས་ཡིག་འབྲེལ་གནང་གི་མེད་པ་རེད་དམ། ཨ་ཙེ་བརྟག་དཔྱད་གནང་ནས་བཀའ་མོལ་གསུང་ན་མི་ལེགས་སམ།
སྐུ་ཉིད་ཀྱི་དངོས་པ་དོན་གྱི་ཟིན་བྲིས་ཞིག་སྤེལ་པར་ཐུགས་རྗེ་ཆེ།
བཙན་བྱོལ་བ་ཚོའི་ཁྲོད་དུ་སྒྱུད་ལུག་པ་དང་ཧོལ་རྒྱུགས་བྱེད་མཁན་མང་པ་ལས་དངོས་པ་དོན་གྱི་རང་དབང་ཞིག་གམ་མི་རིགས་ཀྱི་ཆེད་དུ་བཙན་བྱོལ་ཁྲོད་འཐབ་རྩོད་ཀྱི་མི་བུ་ཞིག་གི་བསམ་བློ་དང་སྙིང་སྟོབས་ཡོད་མཁན་ཁག་ཅིག་ལས་མེད་པ་གཞི་ལུས་བོད་མི་ཚོས་ཤེས་ཡོད། དོན་ངོ་མར་བཤད་ན་བཙན་བྱོལ་བོད་སྤྱི་ཚོགས་ལ་ང་རང་སྟེང་ནས་རེ་བ་བཅིངས་མེད། ང་འདྲ་བའི་མི་གང་མང་མང་ཞིག་བོད་ནང་དུ་ཡོད་རྒྱུ་རེད་བསམ་པས། བཙན་བྱོལ་བ་ཚོས་རང་མགོ་རང་གི་གཡོག་ནས་ཉི་བ་འདའ་བར་བྱེད་ཀྱིན་པའི་ད་ལྟའི་འཚོ་བ་རོལ་སྟངས་དེ་དོར་ན་ལེགས་པར་འདོད།
སྒྱུ་རྩལ་བ་སྨན་བླ་སྐྱབས་ཀྱིས་རྐུ་མ་ཞིག་ཉལ་ལས་བསྡད་དང་ལག་ལ་ཅིག་ཡོང་ནས་ཟེར་བ་བཞིན། བཙན་བྱོལ་བའམ་འཐབ་རྩོད་ཀྱི་མི་རིགས་ཅིག་གིས་ཁ་སྡང་ནས་བསྡད་ན་ཐོབ་རྒྱུ་ཅི་ཡང་མེད་པ་གསལ་བོ་རེད།
ད་ལྟའི་བར་དུ་བོད་དོན་ཐད་བྱ་བ་ཅི་ཡང་སྒྲུབ་ནུས་ཀྱིན་མེད་པ་དེའང་དགྱ་ནག་ཁོ་ནའི་རྒྱུ་རྐྱེན་ཅིག་ག་ལ་ཡིན། ང་ཚོ་བོད་མི་ཚོར་ཡང་འཐབ་རྩོད་ཀྱི་སྙིང་སྟོབས་དང་ཤེས་རབ བློ་གྲོས་ཀྱི་འདང་གིན་མེད་པས་སོ།
ཆོས་འཛིན་ལགས། རྗེས་མ་རྩོམ་འབྲི་དུས་སྤྲོ་ལངས་ནས་འབྲི་མི་ཉན་ཡ། དེ་ལས་ཚིག་འཇམ་པ་བརྗོད་དོན་གནད་ལ་འཁེལ་བ། གང་བརྗོད་ཁུངས་དག་ཡིན་དགོས།
འགྲིགས།
རྩོམ་པ་པོ་རྐང་གསུམ་པ་ལགས།གང་ཉིད་ཀྱིས་ཕྲན་ལ་འདི་ལྟར་རྒྱབ་སྐྱོར་དང་མཚམས་འདྲིའི་ཤིས་ཚིག་བརྗོད་པ་འདི་སྙིང་ཁུངས་ནས་ཐུགས་རྗེ་ཆེ།ང་ཚོ་འདི་ལྟར་དུས་བབ་གྱི་གསེར་ཟམ་བརྒྱུད་ཏེ་ཕན་ཚུན་གྱི་བསམ་ཚུལ་རྒྱུས་ལོན་ལ་བྲེལ།
སྐད་ཆ་བཤད་སྟངས་དེ་འདྲའི་སྣང་བར་འགྲོ་བོ་ཞིག་མ་རེད། གང་ལགས་ཞེ་ན་སྤྱི་ཚོགས་ཁྲོད་ཤེས་ལྡན་པ་ཅི་ཡོད་ཤེས་དཀའ་བས་འདི་ལྟར་གསལ་བསྒྲགས་བྱ་ཅི་ཐུབ་བྱ་དགོས་པ་དེ་ཧ་ཅང་གི་གལ་ཞིག་ཏུ་མཐོང་བ་མ་ཟད་་་་རང་རང་ས་ནས་ངས་འཇོན་་་་ངས་ནུས་ཞེས་འགྲན་རྩོད་ཀྱི་རྣམ་པས་འོས་ལངས་བྱས་ཚེ་ང་ཚོའི་སྤྱི་ཚོགས་ཅི་ཙམ་ཆུང་ཡང་ཡར་རྒྱས་ལ་འགྲོ་རྒྱུ་ཡོད་པས་འདི་ལ་ཁ་བཏང་ན་དེ་ཙམ་དགའ་བོ་མེད་པས་ཡིན།
དེ་རིང་གང་ནས་ཐོན་མིན་མི་ཤེས་པའི་རྩོམ་པ་པོ་ཞིག་གིས་དོན་ལྡན་གྱི་རྩོམ་ཡིག་ཅིག་ཁུར་ནས་དུས་བབ་ཚང་གི་དྲ་ཐོག་ལ་ཡོང་ཐུབ་པ་ནི་ཧ་ཅང་དགའ་འོས་བའི་འགྲོ་སྟངས་ཤིག་རེད། རྩོམ་པ་པོ་གདོང་རུའི་ཆོས་འཛིན་ལགས་གུས་པ་རྐང་གསུམ་དུས་བབ་ཚང་གི་དྲ་འབུ་བྱས་ནས་ལོ་མང་འགྲོ་བཞིན་ཡོད། དེའི་ཕྱིར་རྩོམ་པ་པོ་གདོང་རུའི་ཆོས་འཛིན་ཞེས་པ་ཞིག་དེ་རིང་མི་མཐོང་མྱོང་མེད། ཡིན་ནའང་དྲ་འབུ་ཞིག་གིས་མཐོང་དང་མ་མཐོང་ལ་དེ་ཙམ་གྱིས་དགེ་མཚན་མེད། དེ་རིང་དུས་བབ་ཚང་ལ་སྐུ་ཉིད་ཀྱིས་གོམ་པ་དང་པོ་སྤོ་འགོ་རྩོམ་པ་ནས་ཁྱོད་ཀྱིས་རང་གི་རྒྱུན་ལྡན་གྱི་ངོས་ཟིན་དང་ཤེས་རྟོགས་དོན་དངོས་མཐོང་བ་རྣམས་དུས་བབ་ཚང་ལ་ཁུར་ནས་ཡོང་ཐུབ་པ་ནི་ཁྱེད་ལ་རྟེན་འབྲེལ་ཞུ་འོས་པ་ཞིག་རེད་བསམ་ནས་ཉིན་གོང་གི་ཁ་ལག་ཟ་བཞིན་ཁྱོད་ཀྱི་རྩོམ་ཡིག་འདི་བཀླགས་ཚར་བ་ཡིན། དུས་བབ་ཚང་གི་མགྲོན་པོ་ཐོག་མ་ལ་བཀྲ་ཤིས་བདེ་ལགས།