འཛམ་གླིང་ལོ་རྒྱུས་ཀྱི་བྱུང་རིམ་ལས་ང་ཚོས་མཐོང་ནུས་ཤིང་རྟོགས་ཐུབ་པ་ནི་དུས་དང་སྤྱི་ཚོགས་ཀྱི་དགོས་མཁོ། མང་ཚོགས་ཀྱི་མངོན་འདོན་བཅས་ལ་བསྟུན་པའི་འཕོ་འགུྱར་ཡིན། འཕོ་འགྱུར་ནི་རིག་གནས་ཀྱི་ལྟ་གྲུབ།འཚོ་གནས་ཀྱི་ངོ་བོ། འཛུགས་སྐྲུན་ཐད་ཀྱི་རྣམ་པ་སོགས་མིའི་རིགས་ཀྱི་སྤྱི་ཚོགས་ཀྱི་ཕྱོགས་ཀུན་ནས་འགྲོ་བཞིན་པའི་འགྱུར་གྲོས་ཤིག་ཡིན། འཕོ་འགྱུར་གྱི་རྣམ་པར་མགྱོགས་ལྷོད་དང་མངོན་གསལ་ཡོད་མེད་ཀྱི་ཁྱད་པར་ལས། དེའི་འགུལ་བསྐྱོད་རང་བཞིན་གྱི་འགྱུར་གྲོས་མེད་པའི་མིའི་སྤྱི་ཚོགས་ཤིག་མ་མཆིས་མོད།བསམ་བློའི་ངོས་དང་རིག་གནས་ཀྱི་ངོས། འཚོ་ཐབས་ཀྱི་ངོས། འཛུགས་སྐྲུན་གྱི་ངོས། སྲིད་དོན་གྱི་ངོས་བཅས་ལ་མངོན་ཐོན་དང་རྗེས་ལུས་རང་བཞིན་གྱི་རྣམ་པའི་ཧེ་བག་ནི་གཙོ་བོ། ངོས་དེ་དག་སོ་སོར་དུས་དང་འཚམ་པའི་འཕོ་འགྱུར་ལ་མྱུར་ཚད་དང་གསོན་ཤུགས་ཐད་ནས་ཁྱད་པར་ཕྱིན་པས་ཡིན།
ད་ལྟའི་ང་ཚོ་བཙན་བྱོལ་སྤྱི་ཚོགས་འདིའི་འཕོ་འགྱུར་ལ་བལྟས་ན་བློ་ཡིད་ལ་ཤོང་དཀའ་བའི་མྱུར་ཚད་ཅིག་མངོན་མུས་སུ་འཁུ། མྱུར་ཚད་འགྱོགས་ཤིང་འགྱུར་ལྡོག་ཆེ་བའི་བཙན་བྱོལ་སྤྱི་ཚོགས་ཀྱི་འཕོ་འགྱུར་རང་བཞིན་གྱི་རྣམ་པ་འདི་བཟང་ཕྱོགས་ཀྱི་འགྱུར་གྲོས་ཤིག་གམ་ཡང་ན་དེ་ལས་ལྡོག་པའི་ལམ་ནོར་ཞིག་ལ་མིག་ལྡན་གཡང་མཆོང་བྱེད་ཀྱིན་འདུགདེའི་ཐད་འགན་འཁྲི་ཅན་གྱི་མི་སྣ་ཡིན་མིན་ལ་མ་ལྟོས་པར་མི་སྒེར་སོ་སོའི་ངོས་ནས་བསམ་དཔྱོད་ཀྱིས་ངེས་བ་རྙེད་དགོས།
མངོན་ཐོན་དུ་འབོད་པའི་སྤྱི་ཚོགས་རིགས་ཀྱི་འཕོ་འགྱུར་ནི་གཙང་བོ་ལྟར་བཞུར་ལ། དེའི་འགོ་ཁུངས་ཀྱི་ཆུ་རྒྱུན་སྟོབས་ཀྱིས་འབབ་པ་ལ་ཕྱོགས་ཀྱི་ཆུ་ཕྲན་དུ་མ་རིམ་གྱིས་འབྲེལ་ཏེ། མཐར་རྒྱ་མཚོ་ཆེ་མོར་འབབ་པའི་ཆུ་བོ་ཆེན་པོ་ལྟར་སྣང།འོན་ཏེ། ང་ཚོའི་སྤྱི་ཚོགས་ཀྱི་འཕོ་འགྱུར་ནི་སྤྲེའུ་ལྗོན་ཤིང་གཅིག་ནས་གཞན་དུ་འཕོ་བ་ལྟ་བུའི་འགྱུར་གྲོས་ཤིག་ཏུ་སྣང་། སྤྲེའུ་ལྗོན་ཤིང་གཅིག་གི་སྟིང་དུ་ཡོད་སྐབས་ལྗོན་ཤིང་དེར་འཐམ་འཁྱུད་བྱེད་ཅིང་དེའི་སྟེང་གི་ཤིང་འབྲས་ལོངས་སུ་སྤྱོད་པ་མ་ཟད་དེའི་རོ་བཅུད་ལ་འཚུམ་པར་བྱ། ལྗོན་ཤིང་གཞན་ཞིག་ཏུ་གནས་སྤོ་ཚེ་སྔར་གྱི་སྡོད་གནས་དེ་འབྲེལ་མེད་ཀྱི་ཁོར་ཡུག་གཞན་ཞིག་ཏུ་འགྱུར་ཟིན་ཞིང་། ལྗོན་ཤིང་གཉིས་པ་དེར་འཐམ་འཁྱུད་ཀྱིས་ཤིང་འབྲས་རིགས་མི་འདྲ་བ་ཞིག་ཟས་སུ་སྤྱོད་པ་ལྟར། ང་ཚོའི་སྤྱི་ཚོགས་ཀྱི་འཕོ་འགྱུར་ནི་ངོས་གཅིག་ནས་གཞན་ཞིག་ཏུ་འགྲོ་པའི་རྣམ་པ་མངོན་གསལ་ཡིན་པ་མ་ཟད་མྱུར་ཚད་ཀྱང་ཧ་ཅང་མགྱོགས། དཔེར་ན། ཉེས་དུས་བཙན་བྱོལ་བོད་མིའི་ཤེས་ཡོན་སྲིད་ཇུས་གསར་བ་ཞེས་པའི་གླེང་གཞི་ཆེན་པོ་ཞིག་གིས་ང་ཚོའི་ཁོར་ཡུག་ལ་གླེང་སྟེགས་ཆེན་པོ་ཞིག་བསྐྲུན་པ་རེད། གཞུང་འཛིན་མི་སྣ་དང་། ཚོགས་སྡེ་མི་སྣ། གྲྭ་བཙུན་རིགས། དགེ་རྒན་གྱི་སྡེ་དང་སློབ་གྲྭ་བ། ཕྱོགས་ཡོངས་ནས་གླེང་གཞི་འདིའི་ཐད་ལ་སྐད་ཆ་བཤད་མཁན། རྩོམ་ཡིག་སྤེལ་མཁན།ལྟ་ཚུལ་དར་སྤེལ་གཏོང་མི། སྲིད་ཇུས་འདེངས་མཁན། ཞིབ་འཇུག་བྱེད་མཁན་སོགས་ཁོར་ཡུག་གི་མཁའ་དབུགས་ཡོད་ཚད་ཤེས་ཡོན་སྲིད་ཇུས་གསར་པའི་གླེང་གཞི་དེར་དྲངས་པ་རེད། དེ་མུར་བཙན་བྱོལ་སྤྱི་ཚོགས་ལ་རིགས་གཅིག་རྐང་འཛིན་པ་དགོས་པའི་གསུང་འཕྲིན་ཞིག་སླེབས་པ་དང་སྦྲགས་ཚ་ཚ་འུར་འུར་གྱིས་གླེང་གཞི་གསར་པ་འདིའི་སྟེང་དུ་འཕོ་འགྱུར་ཕྱིན་ཏེ། ཤེས་ཡོན་སྲིད་ཇུས་གསར་པའི་གླེང་གཞི་དེ་རིམ་བཞིན་ཁ་ཐག་ཇེ་རིང་ནས་ཁ་ལྕེ་གཉིས་ཀྱི་བར་དང་། ཤོག་སྨྱུག་གཉིས་ཀྱི་འགྲན་རྩོད་ལས་ཡལ་ལ་ཉེ། ད་ལྟ་འགོ་བཀའ་སྤྱི་ནས་འོག་མང་ཚོགས་བར་གྱི་གླེང་སློང་གི་རླུང་འཚུབ་ཤུགས་དྲགས་ཅན་དེ་ཉིས་སྟོང་བཅུ་གཅིག་ལོའི་བཀའ་ཁྲི་དང་སྤྱི་འཐུས་འོས་བསྡུ་དེར་འཕོ་འགྱུར་གྱིས་ཇ་ནག་ཧུབ་གང་འཐུང་བར་ཡང་གླེང་གཞི་འདིའི་བྲོ་བ་སླེབས་ཡོད་པའི་སྣང་ཚུལ་སྟེར།
དེ་བཞིན་ང་ཚོའི་ཤེས་ཡོན་ཅན་ཏུ་རློམ་པའི་མི་སྣ་མི་ཉུང་བ་ཞིག་ཁ་སང་གི་ལོ་རྒྱུས་སྐོར་ལ་སྐད་ཆ་བཤད་ཡོང་སྐབས་ཁོང་ཚོ་ལོ་རྒྱུས་སྨྲ་བ་དང་། དེ་རང་གི་ཆབ་སྲིད་ཀྱི་གླེང་སྟེགས་སྟེང་དུ་ཆབ་སྲིད་པ་ཞིག་ཏུ་མངོན་ཞིང་། སང་ཉིན་ཅི་ཞིག་ཏུ་འགྱུར་མིན་ཐད་ཚོད་དཔག་བྱ་དཀའ་པའི་ཁོང་ཚོའི་མི་གཞི་དང་ལངས་ཕྱོགས་འདིས་ཀྱང་དངོས་ཐོག་བདེན་གྲུབ་ཀྱི་ཁོར་ཡུག་འདིའི་གནད་དོན་འགར་གསལ་བཤད་བྱ་ཐུབ།
ང་ཚོའི་སྤྱི་ཚོགས་ཀྱི་འཕོ་འགྱུར་འདི་དང་ཤེས་ཡོན་ཅན་ཚོའི་རང་གཤིས་འདི་དག་ལས་ངས་ཁོར་ཡུག་འདིའི་གོམ་སྟབས་ནི་སྐྱ་ཆད་སྔོ་ཐང་གི་གཤིས་ཀ་ཡིན་པར་བརྗོད། ནུབ་ཕྱོགས་པའི་རིག་པ་སྨྲ་བ་ཞིག་ལ་མཚོན་ན་འབུ་སྲིན་ཆུང་ཆུང་ཞིག་གི་སྟེང་དུ་རང་ཉིད་ཀྱི་མི་ཚེ་ཧྲིལ་བོ་གཏོང་ནུས་པའི་བློ་སྟོབས་ལ་ང་ཚོས་སློབ་སྦྱོང་མི་བྱེད་པའི་དབང་གིས་ད་ལྟའི་སྐྱ་ཆད་སྔོ་ཐང་གི་གོམ་སྟབས་འདི་ང་ཚོའི་ཐོག་ཏུ་བབས་པ་རེད་ཅེས་བཤད་ནའང་མ་འགྲིག་པ་མེད།
གོང་དུ། དྲ་གྲོགས་ལྗང་གཞོན་ལགས་ཀྱི་སྐྱ་ཆད་སྔོ་ཐང་ནི་འགྱུར་ལྡོག་ཆེའི་དཔྱིད་དུས་ཀྱི་གནམ་གཤིས་ལ་གོ་དགོས། སྐབས་རེར་ཉི་མ་འཆར་ཀྱང་ལན་རེར་སྤྲིན་ནག་འཁོར། ཆར་རླུང་ནམ་གཡུག་ལ་ངེས་བརྟན་མེད་ཞིག་ལ་ངོས་འཛིན་བྱས་འདུག་ལ་ང་ཚོའི་ཡུལ་ཕྱོགས་ནས་བཤད་སྲོལ་ལྟར་ན།
སྐྱ་ཆད་སྔོ་སྡུག་ཟེར་བ་དེ་དཔྱིད་དུས་རྩ་སྐྱ་བོ་རྫོགས་ནས་རྩ་སྔོན་ནོར་ཕྱུག་བཟའ་རྒྱུ་མི་རེག་པའི་སྐབས་ལ་ཟེར་བ་རེད་ལ་རྩོམ་ཡིག་གི་ནང་དོན་དཔེ་དེ་ལ་མཐུན་པར་སེམས།
སྐྱ་ཆད་སྔོ་ཐང་ནི་འགྱུར་ལྡོག་ཆེའི་དཔྱིད་དུས་ཀྱི་གནམ་གཤིས་ལ་གོ་དགོས། སྐབས་རེར་ཉི་མ་འཆར་ཀྱང་ལན་རེར་སྤྲིན་ནག་འཁོར། ཆར་རླུང་ནམ་གཡུག་ལ་ངེས་བརྟན་མེད།
གྲོགས་པོ་ལགས། སྐྱ་ཆད་སྔོ་ཐང་ཞེས་པ་དེ་ཅུང་ཙམ་ཏག་ཏག་བསྡད་མི་འདུག སྐྱ་ཆད་སྔོ་སྡུག་ཅེས་ལབ་དགོས་ཀྱི་རེད། སོས་ཀ་དུད་འགྲོ་སེམས་ཅན་རྣམས་ལ་རྩྭ་རྙིང་པ་རྣམས་རྫོགས་པས་སྐྱ་ཆད་ཅེས་པ་དང་། རྩྭ་གསར་པ་ཡང་མ་སྐྱེས་པས་སྔོ་སྡུག་པའི་སྒང་ལ་སྐྱ་ཆད་སྔོ་སྡུག་གི་དུས་ཞེས་ལབ་ཀྱི་ཡོད་མ་རེད་དམ།
སློབ་གྲོགས་ལགས། བཀྲ་ཤིས་བདེ་ལེགས་ཡོད་ད།
གྲོགས་མཆེད་བཟང་པོ། འདི་ལྟར་ལམ་ལ་ཆས་རོགས། རྣོ་དཔལ་ལྡན་པའི་རྩོམ་ཡིག་འདི་ཡག་པོར་འཁྱོངས་འདུག
ཡག་པོ་འདུག
བཙན་བྱོལ་ཙམ་མ་ཟད་བོད་རྒྱལ་ཁབ་འདི་ཕྱོགས་གང་ས་ནས་ཡར་རྒྱས་གཏོང་བར་སུ་ལའང་འགན་ཡོད་མོད།དེ་རུ་བསམ་ཤེས་བྱས་ཏེ་སྤྱི་ཚོགས་ཀྱི་སྐྱོན་ཆ་ཐེར་འདོན་བྱས་ཚེ་སྤྱི་དོན་ལ་ཕན་པའི་ཡ་ལན་ཞིག་མེད་པར་མི་གཞིའི་སྟེང་སྐྱོན་འཛུགས་བྱེད་མཁན་ནི་རྩོམ་པ་པོར་རྫུས་པའི་མི་བུ་དག་རེད།དེས་ན་ང་ཚོས་སྤྱི་ཚོགས་འདི་ཡར་རྒྱས་འགྲོ་བར་དུས་ཚོད་མང་པོ་འགོར་ས་རེད།
དྲ་གྲོགས་ཁྱོད་ཀྱིས་བཤད་པ་འདི་བདེ་པ་རེད་རྒྱབ་སྐྱོར་ཡོད་ལགས།
འཛམ་གླིང་འདིའི་སྒང་གི་ཆེས་ཡར་ཐོན་ཆེ་བའི་ཨ་རིའི་རྒྱལ་ཁབ་དང་དབྱིན་ཇི། ཧྥ་རན་སི། ཉི་ཧོང་སོགས་ཀྱི་རྒྱལ་ཁབ་གང་ལ་བལྟས་ཀྱང་སོ་སོའི་སྲིད་ཇུས་ཀྱི་འཁོར་ཕྱོགས་དང་མི་རིགས་ཀྱི་རེ་འདུན་བར་མི་མཐུན་པ་དང་དེ་དང་འབྲེལ་བའི་རྙོག་ཟིང་། ཕན་ཚུན་སྐྱོན་བརྗོད་སོགས་ཉིན་རྟག་ཡོད་མུས་རེད། དེས་ན་སྤྱིར་ངུ་ཚོའི་སྐྱབས་བཅོལ་སྲིད་གཞུང་གི་མ་འགྲིག་མ་འཐུས་པའི་སྲིད་ཇུས་རྣམས་ཐེར་འདོན་དང་། དེ་དང་འབྲེལ་ཡོད་ཀྱི་རྩོམ་ཡིག་སྤེལ་རྒྱུ་གལ་ཆེ་བ་སྨྲོས་མེད་རེད། ཡིན་ན་ཡང་དེ་བས་ཀྱང་གལ་ཆེ་བ་ནི་ད་ལྟའི་ཆར་སོ་སོ་སྒེར་ངོས་ནས་མི་གཞི་ཡག་པོ་ཞིག་དང་། རང་གི་མི་རིགས་དང་རིག་གཞུང་ལ་ཤ་ཚ་རྣམ་དག་ཡོད་མཁན་གྱི་མི་གཞི་ཞིག་ཡོང་ཐབས་དང་དེ་ལྟར་དགོས་པ་ནི་ཀུན་གྱི་དོན་པོ་དེ་རེད་སྙམ།
ཡག་པོ་འདུག
བདེན་བདེན་ཞུ་བ་མ་གཏོགས་བསམ་འཆར་མེད།