བཀའ་ཤག་སྐབས་བཅུ་གཉིས་པ་དང་བཅུ་གསུམ་པའི་ལས་རྒྱུན་རིང་ཆབ་སྲིད་དང་། འཛིན་སྐྱོང་། དཔལ་འབྱོར་སོགས་ཀྱི་ལས་དོན་གང་ཡང་མང་ཚོགས་ཀྱི་མངོན་འདོད་དང་མ་མཐུན་པ་དང་། གྲོས་ཚོགས་ཀྱི་ཁྲིམས་སྒྲིག་དང་འགལ་བ། མང་གཙོའི་ལྟ་གྲུབ་དང་བཟང་སྤྱོད་ལས་འདས་པ་གང་ཡང་བྱུང་མེད་ཅིང་། དེ་འདྲ་ཡོད་པའི་ཀླན་ཀ་བྱུང་ན་ཁྲིམས་དང་མང་ཚོགས་གང་གི་མདུན་སར་ཡང་དག་ཕུད་ཐུབ་ངེས་ཀྱི་གདེང་སྤོབས་ཡོད། ལྷག་བསམ་བཟང་པོས་སྒྲུབ་ཕྱོགས་ཀྱིས་སྐྱོན་འདོན་དང་དགོངས་དྭང་ལེན་གྱིས་ལག་བསྟར་ཐུབ་རིགས་ལག་བསྟར་དང་། དེ་མིན་འགྲེལ་བརྗོད་ཞུ་བཞིན་པ་ཡིན་ཞེས་བཀའ་ཁྲི་ཟམ་གདོང་རིན་པོ་ཆེ་མཆོག་གིས་གསུངས་ཡོད།
དེ་རིང་ཞོགས་པའི་ཆུ་ཚོད་ ༨ སྟེང་རྒྱ་གར་ལྷོ་ཕྱོགས་སེ་ར་ཐེག་ཆེན་གླིང་། སེར་བྱེས་ཆོས་རའི་ནང་དུ་བོད་གཞུང་དམངས་ཡོངས་ནས་བཙན་བྱོལ་བོད་མིའི་དམངས་གཙོ་དབུ་བརྙེས་ཏེ་མི་ལོ་ ༥༠ འཁོར་བའི་དུས་དྲན་སྲུང་གཙི་གཟབ་རྒྱས་བྱས་ཡོད། མཛད་སྒོའི་སྐུ་མགྲོན་གཙོ་བོར་༧གོང་ས་མཆོག་གིས་དབུས་པའི་དགའ་ལྡན་ཁྲི་རིན་པོ་ཆེ་དང་ཤར་བྱང་ཆོས་རྗེ་རྣམ་གཉིས། གྲྭ་ཚང་ཁག་གི་མཁན་ལས་ཟུར་རྣམ་པ་དང་གྲྭ་དམངས་འདུས་པ་རྒྱ་མཚོ། བཀའ་བློན་ཁྲི་པའི་གཙོས་པའི་བཀའ་བློན་རྣམ་པ་དང་། བོད་མི་མང་སྤྱི་འཐུས་ཚོགས་གཙོ་གཞོན་གཉིས་ཀྱིས་གཙོས་པའི་སྤྱི་འཐུས་རྣམ་པ། སྦེལ་ཀོབ་གཞིས་ཆགས་གསར་རྙིང་དང་མཐའ་ཁོར་གྱི་བོད་རིགས་མི་དམངས་བཅས་སྐྱ་སེར་ཉིས་ཁྲི་ཙམ་མཉམ་ཞུགས་གནང་ཞིང་། དམིགས་བསལ་སྐུ་མགྲོན་དུ་ཨི་ཊ་ལི་དང་ཁེ་ན་ཊ། ཨོ་སི་ཊི་ལེ་ཡ། ལྷོ་ཨ་ཧྥི་རི་ཀ ཌན་མག ཡུ་རོབ་གྲོས་ཚོགས་སོགས་རྒྱལ་ཁབ་ ༡༥ ཙམ་གྱི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་སྐུ་ཚབ་དང་། རྒྱ་གར་དང་བལ་ཡུལ་གྲོས་ཚོགས་འཐུས་མི། ཀར་ན་ཊ་ཁ་མངའ་སྡེ་བློན་ཆེན་སོགས་ལྷན་ཞུགས་ཐོག རྔམ་བརྗིད་དང་ཟིལ་ཤུགས་ཆེ་ཞིང་། ལོ་རྒྱུས་ཀྱི་དོན་སྙིང་ལྡན་པའི་དུས་དྲན་ཞིག་སྲུང་གཙིའི་ཐོག སྤྱི་ནོར་༧གོང་ས་མཆོག་གིས་མི་མང་ལ་དམངས་གཙོ་གསོལ་རས་སུ་བསྩལ་ཏེ། ལོ་ངོ་ ༥༠ འཁོར་བའི་བཀའ་དྲིན་རྗེས་དྲན་གསེར་གྱི་གཟེངས་རྟགས་ཤིག བོད་གཞིས་བྱེས་གཉིས་ཀྱི་ངོ་ཚབ་བོད་མི་མང་སྤྱི་འཐུས་ལྷན་ཚོགས་ཀྱིས་འབུལ་ལམ་ཞུས་ཡོད།
སྐབས་དེར་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གྲོས་ཚོགས་ཀྱི་གཏམ་བཤད་ཡིག་ཐོག་ནས་སྒྲོག་སྦྱོང་གནང་བའི་ནང་། ལོ་འཁོར་གཅིག་ནང་བཙན་བྱོལ་བོད་གཞུང་གི་རྒྱུན་གྲོན་དང་དམིགས་བསལ་ལ་ཧིན་སྒོར་འབུམ་ ༤༠༠༠ ཙམ་འགྲོ་སོང་བྱེད་ཐོག དམིགས་བཀར་ནང་སྤྱི་ཚོགས་བདེ་དོན་གྱི་འགྲོ་སོང་ཧིན་ སྒོར་འབུམ་ ༦༠༠༠ ནས་ ༧༠༠༠ བར་ལོ་ལྟར་འགྲོ་བཞིན་ཡོད་ཀྱང་། བོད་མི་རང་གིས་ཧིན་སྒོར་འབུམ་ ༨༠༠ ཙམ་ལས་བསྡུ་ཐུབ་ཀྱི་མེད་སྟབས། གཞུང་དམངས་ཡོངས་ནས་བསམ་གཞིག་གཏོང་རྒྱལ་གལ་ཆེ་སྐོར་དང་། ས་གནས་འཐུས་ཚོགས་དང་རང་བདེན་ཚོགས་ཆུང་། མཉམ་འབྲེལ། བརྒྱ་དཔོན། ཕྱི་རྒྱལ་བོད་རིགས་ཚོགས་པ་ཁག་བཅས་ཀྱིས་དམངས་གཙོའི་འཕེལ་རིམ་ལ་ནུས་པ་རླབས་ཆེན་འཐོན་གྱི་ཡོད་སྐོར། ཕྱི་ལོ་ ༢༠༠༥ ནས་ ༢༠༡༠ བར་ལས་བྱེད་གསར་པ་འཛུལ་མཁན་མི་གྲངས་ ༣༡༢ ནས་དགོངས་པ་ཞུ་མཁན་ ༡༤༤ ཙམ་བྱུང་སྟེ་དགོངས་པ་ཞུ་མཁན་སྤྱིའི་བརྒྱ་ཆ་ ༤༦་༡༥ ཆགས་ཡོད་སྐོར་སོགས་བཀོད་འདུག
དེ་རྗེས་བཀའ་ཁྲི་ཟམ་གདོང་རིན་པོ་ཆེ་མཆོག་གིས་བཀའ་ཤག་གི་གཏམ་བཤད་སྒྲོག་སྦྱོང་གནང་བའི་ནང་། མི་ལོ་སུམ་སྟོང་བརྒལ་བའི་སྔོན་རྒྱ་གར་དུ་དར་བའི “ཚོགས་ཀྱི་གཙོ་བ” ཞེས་པའི་ལམ་སྲོལ་ནུབ་ཕྱོགས་པས་མིག་དཔེ་བྱས་ཏེ། དེང་གི་དམངས་གཙོའི་ལམ་སྲོལ་དར་བ་ཡིན་སྐོར་བཀོད་འདུག་ལ། དེ་རིང་གི་གཏམ་བཤད་འདི་མང་གཙོ་དབུ་བརྙེས་ནས་ལོ་ལྔ་བཅུ་འཁོར་བའི་རྗེས་དྲན་དུ་མ་ཟད། ད་ལྟའི་བཀའ་ཤག་གི་མང་གཙོའི་དུས་དྲན་གྱི་གཏམ་བཤད་མཐའ་མ་དེའང་ཡིན། དེ་རིང་གི་འདུན་ས་འདིར་བཀའ་ཤག་གིས། ད་ལྟའི་གནས་སྐབས་སུ་བཙན་བྱོལ་བོད་མིའི་ཆབ་སྲིད་ཀྱི་རང་བཞིན་དང་། སྒྲོམ་གཞི་ཡང་དག་པའི་མང་གཙོའི་ལམ་སྲོལ་མཚན་ཉིད་དང་ཆ་ལག་ཚང་བ་ཞིག་གི་ནང་དུ་སླེབས་ཟིན་ཅིང་། མང་གཙོའི་ན་ཚོད་ཡོངས་སུ་སྨིན་པ་ལ་མངོན་དུ་ཕྱོགས་པ་ཡིན། ཞེས་ཚིག་ཐག་ཆོད་པོ་དང་། སྐད་གསང་མཐོན་པོས་འགན་ཁུར་ཡོད་པའི་ཐོག་ནས་བརྗོད་རྒྱུ་ལ་ཐེ་ཚོམ་གང་ཡང་མེད་ཅེས་ཞུ་རྒྱུ་ཡིན། འོན་ཀྱང་ད་དུང་ལེགས་བཅོས་དང་ཡར་རྒྱས་མུ་མཐུད་དགོས་པ་དང་། ཡོང་རྒྱུའང་ཡིན་པ་སྨོས་མ་དགོས། དཔལ་ལྡན་བོད་མི་མང་སྤྱི་འཐུས་ལྷན་ཚོགས་ནས་ཀྱང་ད་རེབ་མང་གཙོའི་དུས་དྲན་གྱི་མཛད་སྒོ་ཟབ་རྒྱས་གོ་སྒྲིག་གནང་སྟངས་ལ་གཞིགས་ན་ང་ཚོའི་བསྒྲགས་གཏམ་འདིར་མོས་མཐུན་གནང་བའི་ཡིད་ཆེས་ཡོད། ཅེས་བཀོད་འདུག
ཁོང་གིས་རྩོམ་པ་པོ་སྐོར་ཞིག་ལ་དམིགས་ཏེ་བསྟན་དོན། བར་སྐབས་རེ་ཟུང་གིས་ད་ལྟའི་ལམ་སྲོལ་འདི་མང་གཙོ་མིན་པ་དང་། མང་གཙོ་ངང་སྒུག་བྱེད་ཀྱི་ཡོད་ཚུལ་སོགས་རྣམ་རྟོག་གི་སྤྲོས་པ་ཇི་སྙེད་ཅིག་སྤེལ་འདུག་པ་དགག་གཞག་གི་དགོས་གལ་མ་མཐོང་ཡང་། རང་བཞིན་དྲང་བའི་གཞི་རིམ་མང་ཚོགས་མགོ་བོ་མི་རྨོངས་པ་དང་། མང་གཙོའི་མིང་ཙམ་ཡང་མི་ཤེས་པའི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་བྲན་གཡོག་ཏུ་བཀོལ་བའི་རྩོམ་པ་པོ་རྣམས་ཀྱིས་དབུལ་པོས་གསེར་རྙེད་ལྟ་བུས་ལུང་འདྲེན་ཡང་ཡང་བྱས་པ་རྣམས་སྣང་མེད་ཡན་པོར་མ་སོང་བའི་ཆེད་གནས་ཚུལ་རེ་ཟུང་བརྗོད་འདོད་བྱུང་། མང་གཙོའི་སྙིང་དོན་ནི་རང་དབང་དང་། འདྲ་མཉམ། ཁྲིམས་ཀྱི་དབང་སྒྱུར། ཆིག་བསྒྲིལ་བཅས་ཡིན་ཞིང་། བཙན་བྱོལ་བོད་མིའི་སྤྱི་ཚོགས་ནང་དེ་དག་ཅི་ཙམ་ཚད་མཐོར་ཡོད་པ་ནི་རྩོམ་པ་པོ་དེ་རྣམས་ཀྱི་བསམ་སྤྱོད་དང་སྨྲ་བརྗོད་ཀྱི་རང་དབང་ལས་དཔོག་ནུས། བཀའ་ཤག་སྐབས་བཅུ་གཉིས་པ་དང་བཅུ་གསུམ་པའི་ལས་རྒྱུན་རིང་ཆབ་སྲིད་དང་། འཛིན་སྐྱོང་། དཔལ་འབྱོར་སོགས་ཀྱི་ལས་དོན་གང་ཡང་མང་ཚོགས་ཀྱི་མངོན་འདོད་དང་མ་མཐུན་པ་དང་། གྲོས་ཚོགས་ཀྱི་ཁྲིམས་སྒྲིག་དང་འགལ་བ། མང་གཙོའི་ལྟ་གྲུབ་དང་བཟང་སྤྱོད་ལས་འདས་པ་གང་ཡང་བྱུང་མེད་ཅིང་། དེ་འདྲ་ཡོད་པའི་ཀླན་ཀ་བྱུང་ན་ཁྲིམས་དང་མང་ཚོགས་གང་གི་མདུན་སར་ཡང་དག་ཕུད་ཐུབ་ངེས་ཀྱི་གདེང་སྤོབས་ཡོད། ལྷག་བསམ་བཟང་པོས་སྒྲུབ་ཕྱོགས་ཀྱིས་སྐྱོན་འདོན་དང་དགོངས་དྭང་ལེན་གྱིས་ལག་བསྟར་ཐུབ་རིགས་ལག་བསྟར་དང་། དེ་མིན་འགྲེལ་བརྗོད་ཞུ་བཞིན་པ་ཡིན། ཞེས་གདེང་སྤོབས་དང་བཅས་བསྒྲགས་སོང་།
མུ་མཐུད་དུ་བསྟན་དོན། མང་ཚོགས་ཀྱིས་རང་དབང་གིས་བཏོན་པའི་མངོན་འདོད་ལ་བརྩི་བཀུར་མི་ཐུབ་ཅིང་། མང་ཚོགས་ཀྱི་བློ་སྣའང་ཁྲིད་མི་ཐུབ་པའི་སྐྱེ་བོ་ཞིག་གིས་མང་གཙོའི་འདྲེན་པ་བྱ་རྒྱུ་ཕར་ཞོག དོན་གཉེར་བ་ཞིག་ཀྱང་ཡོང་དཀའ། སྐབས་རེ་བཀའ་ཁྲིས་༧གོང་ས་མཆོག་གི་བཀའ་ལ་བསྟུན་རྐྱང་གིས་རང་གིས་མང་གཙོའི་འགན་དབང་སྤྱོད་ཀྱི་མེད་ཚུལ་དང་། ཡང་སྐབས་རེ་༧གོང་ས་མཆོག་དང་བཀའ་ཁྲིའི་བར་དབང་ཆའི་འཐབ་རྩོད་ཡོད་ཚུལ་ལྟ་བུ་གཏད་སོ་བྲལ་བའི་བཅོས་སྒྲུང་ཇི་སྙེད་བཤད་ཀྱི་འདུག་པ་དེ་དག་གཞི་མེད་ཡིན་པ་སུས་ཀྱང་རྟོགས་ཐུབ། དངོས་བྱུང་དང་དངོས་ཡོད་ཀྱི་གནས་ཚུལ་ཆ་ཚང་མ་ཤེས་པ་འམ། བདེན་པ་མིན་པའི་འཁྱོག་བཤད་ཁག་ལ་བརྟེན་ནས་བསམ་ཚུལ་བཟོས་པ་དང་། ཐག་གཅོད་བྱེད་པ་ནི་གཟུ་བོར་གནས་པ་དང་། ཤེས་མྱོང་ཡོད་པའི་བྱེད་སྟངས་ཤིག་མིན། ཞེས་བཀོད་འདུག
ཡང་གསར་ལམ་ཁག་ཅིག་ལ་དམིགས་དོན། བཙན་བྱོལ་སྤྱི་ཚོགས་ནང་གཏམ་བཤད་སྡིངས་ཆ་དང་གསར་འགྱུར་བརྒྱུད་ལམ་སོགས་ཀྱི་ནང་དངོས་གསལ་མེད་པའི་མི་དཀྱུས། ལེགས་ཉེས་འབྱེད་པའི་རྣམ་དཔྱོད་དང་ལྡན་ཞིང་། ཡིན་ལུགས་ཚུལ་མཐུན་གྱིས་རང་གི་འཚོ་བའི་འདུ་འགོད་དང་སྐབས་བབ་སྤྱི་སྒེར་གྱི་བྱ་བར་བརྩོན་པ་ལས། དོན་མེད་སྲིད་དོན་ཀྱི་འཁྲབ་སྟེགས་ཐོག་འཁྲུགས་ཆ་དོད་པོ་མི་གནང་མཁན་གྱི་སེར་སྐྱ་རྒན་གཞོན་བཙན་བྱོལ་བོད་མིའི་ཁྱོན་འབོར་གྱི་བརྒྱ་ཆ་བརྒྱད་ཅུ་བརྒལ་བ་ཞིག་ཡོད་པ་དེ་དག་ནི་ང་ཚོའི་ཡིད་ཆེས་བྱ་ཡུལ་དང་། བཙན་བྱོལ་བོད་མིའི་ནུས་ཤུགས་ཡིན། ཁོང་ཚོའི་བཀའ་དྲིན་ལ་བརྟེན་ཏེ། བོད་མིའི་གོང་བུའི་ནུས་པ་མ་ཉམས་ཤིང་། དམངས་གཙོའི་འཕེལ་རིམ་ཐོག་མདུན་སྐྱོད་གང་ལེགས་བྱུང་ཡོད་པ་དང་། འབྱུང་འགྱུར་ཡང་ཁོང་ཚོའི་དྲང་ཚུགས་དང་བརྟན་ལྷིང་ལ་བརྟེན་ཏེ། བོད་མིའི་ཆབ་སྲིད་ཀྱི་གཞུང་ལམ་སྲོང་པོར་གནས་པའི་ཡིད་ཆེས་ཡོད་ཅིང་། འབྱུང་འགྱུར་གྱི་འོས་བསྡུའི་ལས་རིམ་གྱི་ནང་དུའང་འོལ་ཚོད་དང་གཡམ་རྒྱུགས་མིན་པར་རང་དབང་གིས་ཐག་གཅོད་བརྟན་པོ་ཞིག་གནང་རྒྱུར་ཐེ་ཚོམ་མེད། ཅེས་སྒྲོག་འདོན་གནང་སོང་།
མཁས་དབང་ཟམ་གདོང་རིན་པོ་ཆེ་མཆོག་ནས་༸གོང་ས་མཆོག་གི་འཕྲལ་ཕུགས་རྒྱང་གསུམ་གྱི་དགོངས་གཞི་གཉིས་ཕན་དབུ་མའི་ལམ་དང་། བོད་མི་རིགས་ཀྱི་རྩ་དོན་ཐོག་ལྷག་བསམ་རྣམ་དག་གིས་ཕྱག་ལས་ཧུར་བརྩོན་གནང་བར་སྙིང་ནས་ཐུགས་རྗེ་ཆེ་ཞུ།
གོང་གི་སྤྱི་མཐུས་ཚོགས་གཙོ་མཆོག་གི་གསུངས་མོལ་དེར་ཞིགས་ན་ད་ལྟའི་བཙན་བྱོལ་གཞུང་འདིར་བྱུང་སོང་འདུམ་ཐབས་མེད་པའི་གནས་ཚུལ་ཞིག་ཡོད།
ལོ་འཁོར་གཅིག་ནང་བཙན་བྱོལ་བོད་གཞུང་གི་རྒྱུན་གྲོན་དང་དམིགས་བསལ་ལ་ཧིན་སྒོར་འབུམ་ ༤༠༠༠ ཙམ་འགྲོ་སོང་བྱེད་ཐོག དམིགས་བཀར་ནང་སྤྱི་ཚོགས་བདེ་དོན་གྱི་འགྲོ་སོང་ཧིན་ སྒོར་འབུམ་ ༦༠༠༠ ནས་ ༧༠༠༠ བར་ལོ་ལྟར་འགྲོ་བཞིན་ཡོད་ཀྱང་། བོད་མི་རང་གིས་ཧིན་སྒོར་འབུམ་ ༨༠༠ ཙམ་ལས་བསྡུ་ཐུབ་ཀྱི་མེད་སྟབས། གོང་གསལ་ལོ་གཅིག་འགྲོ་སོང་འབུམ་ ༡༠༠༠༠ འཁྲི་གཅིག་ཙམ་ཡིན་ལགས་
བོད་མི་རང་ནས་ཧིན་སྒོར་འབུམ་ ༨༠༠ ཙམ་ལས་ཡོང་གི་མེད་ན་དེ་བརྒྱ་ཆ་ལ་བསྐོར་ན་བརྒྱ་ཆ་ ༨ ཧ་ཅང་ཐབས་སྐྱོ་བོ་རེད།
སྤྱིར་གཞུང་གིས་མི་མང་ལ་ལམ་སྟོན་སྣེ་འཁྲིད་མཛད་ནས་མི་མང་བདེ་ཐབས་བདེ་སྐྱིད་བསྐྲུན་ཐབས་མཛད་དགོས་ལ་། མི་མང་ནས་ཀྱང་རང་མཁེལ་གྱི་གཞུང་ཁྲལ་སོགས་མ་སྐུལ་དྭངས་བླངས་ཐོག་རང་གི་གཞུང་དེ་གསོ་རྒྱུའི་འགན་འཁྲི་ཞིག་ཀྱང་ལེན་དགོས་སྙམས།
འོན་ཀྱང་ང་ཚོ་བོད་པ་རང་གི་རང་གིས་གཞུང་གསོ་ཐུབ་ཐབས་མེད་པ་ལྟ་བུ་ཆགས་ཡོད་པ་ཡིན་འོན་ཀྱང་ད་བར་དུ་རང་གཞུང་དགའ་ལྡན་ཕོ་བྲང་ཆེན་པོ་ཤི་མ་སོན་དུ་གནས་པ་ནི་སུ་ཡིས་བཀའ་དྲིན་ཡིན་ནམ།
གནད་དོན་གཞན་ཞིག་ནི། བཙན་བྱོལ་གྱི་བོད་མི་རྣམས་ཀྱི་སེམས་ལ་སྒྲོག་ལར་གྱི་སྨྱོ་ནད་ཚབ་ཆེན་ཞིག་ཕོགས་ཟིན་པས་གཞུང་ལས་རང་རྩལ་ཆེ་བ་འཛིན་པའི་བློ་ངན་འདིའི་ཕུང་བ་བྱས་སོང་། སྤྱིར་ན་རྒྱལ་ཁབ་ཞིག་ལ་མཚོན་ན་རྒྱལ་ཁབ་ཀྱི་ལས་བྱེད་ནི་རྒྱལ་ཁབ་དེའི་གཟུངས་གཞུག་དངོས་དེ་ཡིན།
དེའི་ནང་ནས་ཕྱེ་ཀ་མིན་ཙམ་གཞུང་གི་ལས་ཀ་དབྱུགས་ནས་གང་དུ་བསྐྱོད་དམ། བཙན་བྱོལ་གཞུང་དེ་ཉམས་མྱོངས་གསོག་སའི་སློབ་གྲྭ་ལྟར་བུ་ཞིག་ཆགས་འདུག་པས་བོད་མའི་རྣམས་ནས་དགོངས་པ་ཅུང་བཞེས་དགོས་ཚོད་འདའ།
ལྷོ་མཐའི་ཉི་ཟེར་བཀྲ་ཤིས་བདེ་ལེགས།
ཁྱོད་ཀྱི་གློག་ཀླད་ཀི་སྐྱོན་ཡིན་ཚོད་རེད་ང་ཚོ་ཚང་མའི་དབུ་ཅན་མཐོང་གིན་འདུག
དེའི་མི་ཚད་འདི་ཡང་འགྲིག་མེད་པ་འདྲ་༼ཞོག་པ༽ཞོགས་པ་ཞེས་འབྲི་རོགས་
དེ་མིན་༼མི་འདུག།།༽མི་འདུག་ཞེས་འབྲི་དགོས་པར་སྙམ། ཀ་ག་ཤ་རྐང་ཤད་རེ་རྩི།།
ཟེར་དགོས།
ལྷོ་མཐའི་ཉི་ཟེར་ལགས། ཁྱེད་དངོས་གནས་ལྷོ་མཐའ་ནས་བརྒལ་བའི་ཉི་མ་རང་རེད། ང་ཚོའི་གློག་ཀླད་ཚང་མའི་ནང་ཡིག་གཟུགས་དབུ་ཅན་རེད་འདུག །ཁྱེད་ཀྱི་གློག་ཀླད་དེ་ཆ་ལག་མ་ཚང་བ་ཞིག་ཡིན་པ་ཐག་ཆོད།
བཀའ་སྤྱི་གཉིས་ཀྱི་གསུང་བཤད་དང་མཉམ་དུ་༸གོང་ས་མཆོག་གི་བཀའ་སློབ་བཀོད་ན་དེ་བས་གཟི་བརྗིད་ཆེ།།
གཞུང་ཞབས་པ་ཡིན་མིན་ལ་མ་ལྟོས་པར་འདས་ཟིན་པའི་ལོ་ཟླ་དེའི་ནང་སོ་སོའི་མི་རིགས་དང་སོ་སོའི་རིག་གཞུང་། དེ་བཞིན་སོ་སོའི་རྒྱལ་ཁབ་སོགས་ཀྱི་ཆེད་དུ་ཕྱག་ལས་གནང་དང་གནང་བཞིན་པ་ཚང་མར་བསྔགས་བརྗོད་བཀའ་དྲིན་རྗེས་དྲན་ཞུ་རྒྱུ་ཡིན།
གསར་འགོད་པ་ལགས་ཞོག་པ་བདེ་ལེགས། བཀའ་ཤག་གི་གཏམ་བཤད་གལ་ཆེན་འདི་ཡིག་གཟུགས་དབུ་མེད་རེད་འདུག་ གསལ་པོ་མི་འདུག།། དབུ་ཅན་སྒང་ལ་སྤེལ་རོགས་གནང།།