བོད་ལྗོངས་བོད་ལུགས་གསོ་རིག་སློབ་ཆེན་གྱི་མཐར་ཕྱིན་སློབ་མ་ཚོས་ད་ལོའི་ལས་ཞུགས་ས་མིག་བཀོད་སྒྲིག་བྱས་པ་དྲང་སྙོམས་མ་བྱུང་བའི་ཐད་བོད་རང་སྐྱོང་ལྗོངས་སྲིད་གཞུང་གི་སྒོ་ཁར་ཞི་བའི་ངོ་རྒོལ་བྱས་འདུག
ཟླ་འདིའི་ཕྱི་ཚེས་ ༢ ཉིན་བོད་ལྗོངས་བོད་ལུགས་གསོ་རིག་སློབ་ཆེན་གྱི་མཐར་ཕྱིན་སློབ་མ་ ༡༠༠ ལྷག་གིས་འབོད་ཚིག་འཕྲེད་དར་ཕྱར་བ་དང་། ལག་ཏུ་རྒྱ་ནག་གི་རྒྱལ་དར་ཆུང་ངུ་རེ་བཟུང་སྟེ། ལས་ཞུགས་ས་མིག་བཀོད་སྒྲིག་དྲང་སྙོམས་མ་བྱུང་བའི་ཐད་མཉམ་རུབ་ཀྱིས་བོད་རང་སྐྱོང་ལྗོངས་ས་གནས་སྲིད་གཞུང་གི་སྒོ་ཆེན་ཁར་ཞི་བའི་ངོ་རྒོལ་བྱས་འདུག་མོད། རྒྱ་ནག་གི་ཉེན་རྟོག་མི་སྣས་གནས་ཚུལ་དེ་སྤྱི་ཚོགས་སྟེང་རྒྱ་ཁྱབ་དུ་མི་འགྲོ་བའི་ཆེད་དུ། འཕྲལ་མར་སློབ་མ་ཚོའི་ལག་གི་འཕྲེད་དར་འཕྲོགས་ཤིང་། སློབ་མ་ཚོ་ས་གནས་སྲིད་གཞུང་གི་ཞུ་གཏུགས་ལས་སྒྲུབ་ཁང་དུ་ཁྲིད་ཡོད་པ་རེད།ཟླ་སྔོན་མའི་ཚེས་ ༣༡ ཉིན། བོད་རང་སྐྱོང་ལྗོངས་ཀྱི་རིམ་པ་གཉིས་པའི་གཞུང་ཞབས་ལས་ཞུགས་རྒྱུགས་ལེན་ཐོ་འགོད་ཀྱི་གསལ་བསྒྲགས་སྤེལ་ཏེ། ཟླ་འདིའི་ཚེས་ ༥ ནས་ ༨ ཉིན་བར་རྒྱུགས་ཞུགས་མིང་ཐོ་འགོད་པ་དང་། ཚེས་ ༡༨ ཉིན་འབྲི་རྒྱུགས་ལེན་དགོས་པ་སྤྱི་བསྒྲགས་བྱས་ཡོད། ཐེངས་འདིར་ཁྱོན་བསྡོམས་ལས་ཞུགས་ས་མིག་ ༢༧༠༤ ཡོད་པའི་ཁྲོད་སྤྱི་ཚོགས་འཕྲོད་བསྟེན་ལས་རིགས་ཐད་ས་མིག་ ༥༦ མ་གཏོགས་སྤྲད་མེད་པ་རེད།
དེ་ནི་ཕྱི་ལོ་ ༢༠༠༩ ལོའི་ས་མིག་ ༡༠༠༠ དང་བསྡུར་ན་ལྡབ་ ༢༠ ཙམ་ཇེ་ཉུང་དུ་ཕྱིན་ཡོད་པར་བརྟེན། ཕྱི་ཚེས་ ༡ ཉིན་བོད་ལུགས་གསོ་རིག་མཐར་ཕྱིན་སློབ་མ་ཁག་ཅིག་མཉམ་རུབ་ཐོག་སློབ་གྲྭའི་འགོ་ཁྲིད་རིམ་པ་དང་། འབྲེལ་ཡོད་རྩ་འཛུགས་སྡེ་ཁག རང་སྐྱོང་ལྗོངས་འཕྲོད་བསྟེན་ལས་ཁུངས་བཅས་སུ་གནས་ཚུལ་དེའི་སྐོར་ཞུ་གཏུགས་བྱས་མོད། དོན་དམ་ལག་ལེན་གྱི་བསྒྱུར་བཅོས་གང་ཡང་མ་བྱུང་བར་བརྟེན། ཕྱི་ཚེས་ ༢ ཉིན་བོད་ལྗོངས་བོད་ལུགས་གསོ་རིག་སློབ་ཆེན་གྱི་སློབ་མ་ ༡༠༠ ལྷག་གིས་ངོ་རྒོལ་གྱི་ལས་འགུལ་འདི་སྤེལ་ཡོད།
སློབ་གྲྭ་འདིར་ད་ལོར་མཐར་ཕྱིན་སློབ་མ་ ༢༥༦ ཡོད་པ་དང་། འཕྲོད་བསྟེན་ལས་རིགས་ཀྱི་ས་མིག་ ༥༦ ཡོངས་རྫོགས་སློབ་གྲྭ་འདི་གའི་མཐར་ཕྱིན་སློབ་མ་ཁོ་ནར་ཐོབ་པའི་དབང་དུ་བཏང་ནའང་། ད་དུང་མཐར་ཕྱིན་སློབ་མའི་བརྒྱ་ཆ་ ༨༣ ལས་མེད་དུ་འདུག་དགོས་ཆགས་ཡོད།གཞན་ཡང་། སློབ་གྲྭ་འདིའི་བསླབ་གཞི་དག་ནི་བོད་ལུགས་གསོ་རིག་གི་སྐོར་ཡིན་ལ། ལས་ཞུགས་རྒྱུགས་གཞི་ནི་ཆེད་ལས་བསླབ་གཞི་དང་འབྲེལ་མེད་དུ་གྱུར་ཞིང་རྒྱ་ཡིག་ཁོ་ན་ཡིན་པར་མ་ཟད། རྒྱུགས་ཞུགས་སྔོན་འགྲོའི་གཞི་རྩའི་ཆ་རྐྱེན་ལྔ་བཏོན་ཡོད་པའི་དང་པོ་ནི་ཁ་བྲལ་བར་ངོ་རྒོལ་དང་། ཏཱ་ལའི་བླ་མར་མཚང་འབྱིན་དགག་རྒྱག་བྱས་ཏེ་བསམ་པའི་འཁྱེར་སོ་དང་། ཆབ་སྲིད་ལྟ་བ། ལས་དོན་སྒྲུབ་སྟངས་ཡོད་ཚད་དམར་ཤོག་པའི་ལམ་ཕྱོགས་དང་སྲིད་ཇུས་ལྟར་མཐའ་གཅིག་ཏུ་རྒྱུན་འཁྱོངས་བྱེད་དགོས་པ་དེ་རེད། དེར་བརྟེན། བོད་རིགས་སློབ་ཆེན་མཐར་ཕྱིན་སློབ་མ་དག་ལས་ཞུགས་བྱ་རྒྱུར་རྒྱ་གཞུང་གིས་མངོན་ལྐོག་གཉིས་ནས་དཀའ་ངལ་འཕར་མ་ཞིག་སྤྲད་ཡོད།
ད་ལོའི་ལོ་སྟོད་ལ་བོད་རང་སྐྱོང་ལྗོངས་སྲིད་གཞུང་གིས་སྤྱི་བསྒྲགས་བྱས་པའི་རིམ་པ་དང་པོའི་ལས་ཞུགས་རྒྱུགས་ལེན་བརྒྱུད་གཞུང་ཞབས་ལས་བྱེད་མི་གྲངས་ ༥༠ བསྡུས་ཡོད་པའི་ཁྲོད་མིང་ལ་མཁའ་འགྲོ་ཟེར་བའི་བོད་རིགས་གཅིག་མ་གཏོགས་ཚུད་མེད།
ཕྱི་ལོ་ ༢༠༠༩ ལོའི་རྩིས་ཐོ་ལྟར་ན་བོད་ལྗོངས་བོད་ལུགས་གསོ་རིག་སློབ་ཆེན་ལ་ཁྱོན་བསྡོམས་སློབ་མ་ ༡༥༡༡ ཡོད་པ་དང་། བོད་ལུགས་གསོ་རིག་ཆེད་སྦྱོང་བྱ་མཁན་གྱི་སློབ་ཆེན་པ་རྣམས་གཙོས། བོད་ཀྱི་སྐད་ཡིག་རིག་གནས་ཆེད་སྦྱོང་བྱེད་མཁན་གྱི་བོད་རིགས་སློབ་ཆེན་པ་ཡོངས་ཀྱི་ལས་ཞུགས་ས་མིག་ནི་ལོ་རེ་ནས་ལོ་རེར་ཇེ་འཁེགས་སུ་འགྲོ་བཞིན་ཡོད་པ་རེད།གཞན་ཡང་། ཕྱི་ཟླ་ ༧ པའི་ཚེས་ ༢༥ ཉིན། པེ་ཅིན་རྒྱ་ལུགས་གསོ་རིག་སློབ་ཆེན་དང་། ཅང་ཞི་རྒྱ་ལུགས་གསོ་རིག་སློབ་གླིང་གཉིས་ནས། བོད་ལྗོངས་བོད་ལུགས་གསོ་རིག་སློབ་ཆེན་དུ་ཕྱི་ལོ་ ༢༠༡༠ ལོའི་བོད་ལྗོངས་ཁ་གཏད་རོགས་སྐྱོར་ལ་མིང་རྟགས་འགོད་པའི་ཚོགས་འདུ་ཞིག་བསྡུས་པ་དང་། ཕྱི་ཟླ་ ༨ ཚེས་ ༡༦ ཉིན་པེ་ཅིན་དང་ཅང་ཞི་ནས་ཡོང་བའི་བོད་སྐྱོར་ལས་བྱེད་མི་སྣ་ཡཱན་ཡུང་ཧུང་དང་། ལིས་ཧྥིན། ཁྲེ་ཧྲོ་ཧྭ། ཝན་ཡཱང་བཞི་ནི་བོད་ལྗོངས་བོད་ལུགས་གསོ་རིག་སློབ་ཆེན་གྱི་ཞིབ་འཇུག་སློབ་མའི་སྡེ་ཚན་གྱི་འགོ་གཙོ་གཞོན་པ་དང་། བོད་ལུགས་གསོ་རིག་སྡེ་ཁག་གི་འགོ་གཙོ་གཞོན་པ། བ་གྲྭའི་སློབ་གསོ་ལས་དོན་ཁང་གི་འགོ་གཙོ་གཞོན་བཅས་སུ་ཐད་ཀར་སྐོ་འཇོག་བྱས་ཡོད་འདུག
གསར་འགོད་པ། ཚེ་རིང་རྒྱལ།
དྲང་བདེན་མིན་ལས་དོན་ལ་ངོ་རྒོལ་བྱས་པར་ཧ་ཅང་གི་གཟི་བརྗིད་ཡིན་མོད། ཁོ་རང་ཚོའི་ཚེ་སྲོག་ལ་གནོད་སྐྱོན་འབྱུང་ན་ཐང་མོ། རྒྱ་འདི་བ་ཚང་ལ་བློ་གཏོད་མེད་ཡ
ཨ་རོགས། ཁོ་ཧྥེ་ད་ཁ་ཡག་གི་ལོག་མིན་འགྲོ། ཧ་ཧ་ཧ་་།
ཉེན་རྟོག་པ་ནི་ཆེད་སྤྱོད་བརྡ་ཆད་ཅིག་རེད། དབྱིན་སྐད་དུ་པི་ལེ་སི་ཡི་དོན་རེད། ངས་འདིར་ཉེན་རྟོག་མི་སྣ་ཞེས་འགོད་དོན་ནི་ཉེན་རྟོག་གི་ལས་དོན་སྒྲུབ་མཁན་གྱི་མི་སྣ་སྤྱི་བམ་པ་ཞིག་སྟོན་གོ་ཅན་པོ་ཡིན། ལྭ་སེར་བོ་དང་སྔོན་པོ་གྱོན་མཁན་ཧ་ནི་བོ། ༼དེའི་ཁོག་ལ་མང་ང་ཞིག་བསྡུས་ཡོད་ཅན་པོ་ཡིན་ཡ། ཧ་ཧ་ཧ་་་༽
ལྷ་སྲས་ལགས། ཆོས་སྲུང་ཡང་ང་ཚོ་དང་བོད་ཀྱི་བདག་པོ་ཡང་ང་ཚོ་རེད། དེ་བས་ལས་འགུལ་རྩོམ་དགོས་པ་ལས་ཆོས་སྲུང་ལ་ལས་བཅོལ་བྱས་ན་གང་ན་འགྲིགས་ང་ཚོའི་ཤུགས་ལ་བསྟན་ནས་བྱུང་དགོས་ནི་རེད་མ་གཏོགས་ང་ཚོ་སྐྱིད་ཉལ་རྒྱབ་ནས་ཆོས་སྲུང་གིས་ཡང་དམིགས་བསལ་ཅིག་བྱ་ནི་མ་རེད་
ངོ་རྒོལ་བྱས་པ་འགྲིག་བསྡད་འདུག ང་བོད་ནང་གི་བོད་མི་ཚོས་ཀྱང་རྒྱ་ནག་གི་རྩ་ཁྲིམས་འོག་ནས་འདི་ཐོབ་ཐང་རེ་རྩད་འོང་ན་འགྲིག་འདུག འོན་ཀྱང་ཡང་རྒྱ་རྒན་འདི་ཚང་གིས་ཆབ་སྲིད་ཀྱི་གནད་དོན་འདུག་ལབ་ནས་བཙོན་འཇུག་མི་བྱེད་པར་སྨོན།
གཞན་གནས་ཚུལ་ཡག་པོ་བཀོད་འདུག ཐུགས་རྗེ་ཆེ་ཞུ། འོན་ཀྱང་ཚེ་རིང་ལགས་ལ་བསམ་ཚུལ་ཞིག་བཀོད་ཆོག་པ་ཞུ། ༼ཉེན་རྟོག་པས་༽གནས་ཚུལ་ལ་ཞིབ་བཤེར་བྱས་རྗེས་སོགས་ཟེར་བ་ལས། ༼ཉེན་རྟོག་མི་སྣས༽ཞེས་ཚིག་ལྷག་དང་མིང་མི་མཛེས་པར་བྱས་པས་ཅི་ཕན། འདི་ཁྱོད་ལ་བཏོན་པའི་བསམ་ཚུལ་རང་ཡིན་དཱ། ཧེ་ཧེ་ཧེ། ཁོ་ཧྥེ་འཐུང་གི་ཤོག་དང་ངས་སྦྱིན་བདག་བྱེད་ཡ།
ང་ཡི་སྤུན་ཟླའི་ལས་དབང་འདི་འདྲའི་སྐྱོ་བ་ལ། ད་ཆོས་སྲུང་ཡོད་ན་དེ་དག་ལ་གྲོགས་ཤིག་གནང་རོགས།
ཆེད་ལས་བསླབ་གཞི་དང་འབྲེལ་མེད་དུ་གྱུར་བའི་ལས་ཞུགས་རྒྱུགས་གཞི་བཟོས་་བ་དང། རྒྱུགས་གཞིའི་སྔོན་འགྲོའི་ཆ་རྐྱེན་དུ་དམར་ཤོག་ལ་དགའ་བའི་བསམ་པའི་འཁྱེར་སོ་དང། ཆབ་སྲིད་ལྟ་བ། ལས་དོན་བསྒྲབ་སྟངས་བཏོན་པ་ནི་བོད་ཀྱི་ཐུན་མིན་རིག་གཞུང་དང་མི་རིགས་བཅས་པར་སྣང་ཆུང་ཁྱད་གསོད་དང། མཐོང་ཆུང་ཁྱད་བསོད་ཀྱིས་རྩ་མེད་བཟོ་རྒྱུའི་ངན་བྱུས་ཉག་གཅིག་ལས་མ་འདས་སོ།
འདི་ནི་དགྱ་ནག་གིས་བོད་ཀྱི་ཐོག་འཛིན་བཞིན་ཡོད་པའི་སྲིད་ཇུས་རྙིང་བ་ཞིག་རེད། དེའི་ཕྱིར་ཁོང་ཚང་གིས་ང་ཚོ་ལ་འདི་ལྟར་ལས་ཀ་བྱེད་བཞིན་ང་ཚོ་རྩ་མེད་བཟོ་བཞིན་ཡོད་པ་རེད།
དེང་སྐབས་བོད་ལ་ཡོད་པའི་སློབ་མ་ཚོ་སློབ་སྦྱོང་ཡོད་ན་ཡང་ཏ་དགོ་དང་དཔེ་ཤག་མེད་ན་ལས་ཁ་རག་ཁག་པོ་ཡོད་པ་རེད་