སྒྱུ་རྩལ་བརྩམས་ཆོས་འབྱུང་མི་ཐུབ་པའི་རྒྱུ་མཚན། གཉན་པོ།

སྒྱུ་རྩལ་བརྩམས་ཆོས་འབྱུང་མི་ཐུབ་པའི་རྒྱུ་མཚན།

                        སེམས་ལ་འགན་འཁྲི་མེད་པས་ན། སྒྱུ་རྩལ་ཞེས་པ་སྦྲུམ་དུ་མེད།   ཝང་ཁེ་ལཱའི།

                                  གཉན་པོ།

 མི་རིགས་ཤིག་ལ་མཚོན་ཏེ་བཤད་ན། ཆོས་ལུགས་དང་ཆབ་སྲིད་དགོས་པ་ནང་བཞིན་རྩོམ་རིག་དང་སློབ་གསོ།  དཔལ་འབྱོར་དང་ཚོང་ལས།  བརྡ་འཕྲིན་དང་ཚན་རྩལ།  སྙན་ངག་དང་སྒྱུ་རྩལ།  ལུས་རྩལ་དང་རྩེད་མོའི་རིགས་སོགས་ཀྱང་དགོས་ངེས་ཡིན་ལ།   འདི་དག་གིས་གཅིག་ཚབ་གཅིག་གིས་བྱེད་ཐབས་གཏན་ནས་མེད། དེ་བས་དེང་གི་སྐབས་སུ་ང་ཚོར་ནང་བའི་ཆོས་ལུགས་འདི་ཅི་འདྲ་དར་ཡོད་རུང་།   ཆབ་སྲིད་ཀྱི་འགག་རྩར་ཅི་འདྲར་འཕྲད་ཡོད་རུང་། སྙན་ངག་གཙོས་པའི་རྩོམ་རིག་སྒྱུ་རྩལ་གྱིས་མིའི་རིགས་ལ་ཞབས་འདེགས་སྒྲུབ་སྟངས་ནི་དེ་ལས་གཞན་ཞིག་ཡིན་འདུག་པས།   བར་འདི་ནས་དབྱེ་འབྱེད་གསལ་བོ་མ་བགྱིས་པར་མུན་ནག་མདའ་འཕེན་བྱེད་རྐྱང་གཏན་ནས་མིན། 

སྔོན་དུས་བོད་པ་རྣམས་ཀྱིས་སྙན་ངག་གཙོས་པའི་རྩོམ་རིག་གང་ཇི་སྙད་ཅིག་ནི་ཆོས་ལུགས་དྲིལ་བསྒྲགས་བྱེད་པ་དང་མཆོད་གསོལ་བསྟོད་ཚོགས་ཀྱི་ངོ་བོ་འབའ་ཞིག་ཏུ་བསྒྱུར་སོང་བས།    རྩོམ་རིག་ཁྲོད་ཀྱི་སྒྱུ་རྩལ་ཞེས་པའི་ཟབ་མོའི་ཆོས་དེ་ནི་མཐོང་དུ་མེད་ཚོད་རེད།    དེང་གི་སྐབས་སུ་ཡང་ང་ཚོར་ཆགས་འཇིག་སྣ་དགུ་བྱུང་ཟིན་པ་དང་།   རང་གི་ནམ་མཁར་སྔོན་མོར་མིག་གིས་ལྟ་དབང་བྲལ་བའི་སྐབས་འདི་ཤེད་དུ།    བོད་མི་ཕྱི་སྡོད་པ་ཚོས་ཀྱང་རྩོམ་རིག་ཅེས་པ་འདི་སྦྱངས་ཤིང་།   བརྩམས་ཆོས་ཞེས་པ་དེ་སྤེལ་གྱིན་ཡོད་པའི་ཁུལ་དུ་རེད་མོད།   ང་ཚོས་ཡི་གེ་ལ་བསྟེན་ནས་སྐད་ཆའི་བརྡ་ཙམ་སྤྲོད་ཀྱིན་ཡོད་པ་ལས།   རྩོམ་རིག་གི་རིན་ཐང་ཞེས་པ་དང་། རྩོམ་རིག་གི་སྒྱུ་རྩལ་ཞེས་པ་ཅི་ཡིན་ངོ་འཕྲོད་ཀྱིན་མེད་པ་འདྲ།   རྒྱུ་མཚན་ནི་རྩོམ་འབྲི་བ་བོ་དག་གིས་ཀྱང་།     སྒྱུ་རྩལ་གྱི་ཚད་གཞི་ལྡན་པའི་བརྩམས་ཆོས་ཤིག་དང་རྩོམ་ཡིག་ངོ་མ་ཞིག་འབྲི་བར་འབད་ཀྱིན་མེད་པས་སོ།      ད་དུང་དཔྱད་བརྗོད་པ་འདྲ་བོ་ཚོའི་སྐོར་ནས་བཤད་ན་ཡང་གནས་ཚུལ་ཤོད་མཁན་ཡོད་པ་ལས་གནས་ལུགས་བཤད་མཁན་མི་འདུག་ཅིང་། ཐ་ན་སྐད་ཆ་དྲང་མོར་སྨྲ་ཐུབ་ཕོད་མཁན་ཞིག་ཀྱང་དཀོན་ཚོད་ཡིན་ས་རེད།   ཡུལ་འདིར་བསམ་བློ་བ་འབྱུང་དུ་དཀའ་ཞིང་། སྒྱུ་རྩལ་བརྩམས་ཆོས་སྤེལ་མཁན་ཞིག་ཀྱང་བཙལ་ན་མི་རྙེད་པའི་རྒྱུ་རྐྱེན་ཉག་གཅིག་ནི།    ང་ཚོ་ཡོད་ཚད་ཀྱི་རྗེས་སུ་རྒྱུགས་གྲབས་ཡོད་པ་དང་།    ང་ཚོས་ཅི་ཞིག་ཡིན་རུང་ལག་ཆར་སྤྱོད་འདོད་པ་དེ་ཡིས་ཉེས་སོ།    

སྤྱིར་རྩོམ་རིག་ནི་ཆོས་ལུགས་དྲིལ་བསྒྲགས་བགྱི་བར་སྤྱད་ཀྱང་ཆོག་ལ། ཆབ་སྲིད་ཀྱི་དམིགས་ཡུལ་སྒྲུབ་བྱེད་དུ་བྱས་ཀྱང་རུང་མོད།   དེ་ལྟར་བྱས་ཚེ་རྩོམ་རིག་རང་གི་དམིགས་ཡུལ་དང་འགན་འཁྲི་ལ་རྒྱབ་འགལ་བྱས་ཡོད། དེ་བས་ད་བར་ང་ཚོས་བྲིས་བྲིས་བརྩམས་བརྩམས་མང་བོ་ཞིག་གིས་རྩོམ་རིག་དང་རྩོམ་རིག་གི་དམིགས་ཡུལ་ལ་འགན་མ་འཁུར་བར་མ་ཟད།      བརྩམས་ཆོས་ཀྱི་སྒྱུ་རྩལ་ལ་དེ་བས་ཀྱང་འགན་མ་བླངས་པས།   ང་ཚོར་ད་དུང་ཡང་བརྩམས་ཆོས་ངོ་མ་ཞིག་དང་སྒྱུ་རྩལ་དྭངས་མ་ཞིག་འབྱུང་དུ་མེད་པ་འདི་རེད། ལར་ནས་རྩོམ་རིག་ནི་མིའི་རིགས་ཀྱི་རྨོངས་བ་སེལ་བྱེད་ཅིག་ཡིན་འོས་མོད། ང་ཚོའི་རྩོམ་འབྲི་བ་ཚོས་དེ་ནི་སྤྱི་ཚོགས་རྨོངས་བྱེད་དུ་མི་བཀོལ་བའི་ངེས་པ་འང་ཁྱོན་ ནས་མི་འདུག (དཔེར་ན་སྤྱི་འཐུས་དང་བཀའ་འཁྲི་འོས་འདེམས་བྱེད་རན་པའི་སྐབས་སུ་རྩོམ་ཡིག་མང་དུ་འགྲོ་བཞིན་པ་དེར་ང་ཤིན་ཏུ་སྐྲག་གི་ཡོད།  )

གཞན་ང་ཚོས་རྩོམ་ཡིག་ལ་ཚད་གཞི་འཇོག་གིན་མེད་པ་དེས།   ང་ཚོའི་བརྩམས་ཆོས་ཚད་ལྡན་འབྱུང་བར་བར་ཆད་བྱས་ཡོད།   ང་ཚོའི་རྩོམ་འབྲི་བ་མང་བོ་ཞིག་གིས་སྐད་ཆ་ཡི་གེར་བཀོད་ཚེ་རྩོམ་ཡིག་རེད་སྙམ་པ་དང་།   བརྩམས་ཆོས་ཚད་ལྡན་ཞིག་ལ་ཡང་འདི་ལས་རིན་ཐང་ལྷག་ཅིག་འཇོག་གིན་མེད་ཚོད་རེད།    དེ་བས་མང་བོ་ཞིག་གིས་རྩོམ་རིག་གི་བླ་སྲོག་ལ་ངོ་ལོག་བྱེད་ཞོར་རྩོམ་ཡིག་འབྲི་གྱིན་ཡོད་ལ།   སྙན་ངག་གི་སྒྱུ་རྩལ་ལ་སྣང་ཆུང་བྱས་ཏེ་སྙན་ངག་འབྲི་བར་འཇུག་གིན་ཡོད།   ལམ་ག་དེ་འདྲའི་སྟེང་ནས་ང་ཚོས་རྩོམ་ཡིག་ཚད་ལྡན་ཞིག་དང་སྒྱུ་རྩལ་ངོ་མ་ཞིག་སྐྲུན་ཐུབ་བམ།    སྒྱུ་རྩལ་གྱི་བརྩམས་ཆོས་ཚད་ལྡན་ཞིག་འབྱུང་བར་བདེན་པ་དང་།   ཡིད་ཆེས། གནས་ལུགས་དང་། བརྩེ་བ་སོགས་ཀྱིས་གྲུབ་དགོས་པར་འདོད་ལ།     ད་དུང་གཡོ་སླད་མེད་པའི་སྒོ་ནས་རང་གི་སྤྱི་ཚོགས་ཀྱི་སྣང་ཚུལ་གསལ་བོར་མཚོན་དགོས།   བར་འདི་ན་རྫུན་བཤད་ས་དང་།    མགོ་བདེ་འཁྲབ་ས།    ཕྱོགས་སུ་ལྷུང་ས་དང་།    བསླུ་བྲིད་གཏོང་ས་སོགས་གང་ཡང་མེད་པས་སྒྱུ་རྩལ་གྱི་བཅུད་ལྡན་པའི་བརྩམས་ཆོས་ནི་སྐྱོན་གྱིས་མ་གོས་པ་ཞིག་ཡིན།   འདི་འདྲ་ནི་རང་ཉིད་ཀྱི་ཆེད་དུ་རྩོམ་ཡིག་འབྲི་མཁན་ཚོའི་ཁ་དང་སེམས་ནས་ཡོང་ཐུབ་མེད་ལ།    འདི་ལྟ་བུ་ནི་རྐུབ་སྟེགས་ཀྱི་ཆེད་དུ་གཉིད་ཡོང་གིན་མེད་པ་ཚོའི་ངག་ནས་འབུད་ཐུབ་མེད།     

ང་ཚོར་སྒྱུ་རྩལ་བརྩམས་ཆོས་འབྱུང་མི་ཐུབ་པའི་རྒྱུ་མཚན་གཞན་ཞིག་ནི།   ང་ཚོས་སྒྱུ་རྩལ་ལ་རོལ་མྱོང་བྱེད་ཐུབ་ཀྱིན་མེད་པས་ཡིན། ལྷག་པར་དུ་དེང་རབས་སྙན་ངག་ལྟ་བུ་དཔེར་བཀོད་དེ་གླེང་ན།   སྙན་ངག་གང་དེའི་རྒྱབ་ལྗོངས་དང་། མཚོན་སྟངས།   དཔེའི་འགོད་ཐབས་སོགས་ལ་རྒྱུས་མངའ་མེད་པ་འམ། སྦྱང་གོམས་སྔོན་དུ་མ་སོང་བར། སྙན་ངག་དེ་དག་ཅི་གང་མ་ཡིན་ཚུལ་དང་དེ་ལ་འགྲེལ་རྒྱག་ཏུ་མེད་ཚུལ་སྨྲ་ནས་ཡོང་གིན་འདུག   དེ་ལ་འདི་འདྲ་བཤད་པར་འདོད་དེ།   སྙན་ངག་གི་སྒྱུ་རྩལ་ཞེས་པར་བསམ་པ་རྣལ་མས་རོལ་མྱོང་བྱེད་དགོས་པ་ལས།   ཡིད་སེམས་སུ་ཆུ་བཞུར་བཞུར་བྱས་ནས་མི་འོང་ཞིང་། སྙན་ངག་རོལ་མྱོང་གི་ཁམས་དེ་དག་ཀྱང་ཚོར་བའི་རྨི་ལམ་ཞིག་ཡིན་པ་ལས་གཞུང་ལུགས་ལྟར་བཤད་ས་མི་འགྲོ།   འོན་ཀྱང་།   འུ་ཚོའི་ཉེ་འཁོར་འདི་རུ་ཁོག་ལ་རྩ་བརྫངས་ཏེ་སྒམ་མདོག་སྟོན་མཁན་དང་།    དོན་དག་མ་ཤེས་གོང་དུ་ཐག་གཅོད་བྱེད་མཁན་ཤིན་ཏུ་མང་བས།    མ་མཐོང་སྔོན་ནས་རྟོགས་ཡོད་ཅེས་བསྙད་པར་འདོད་མཁན་ཡོད་ན་ཐང་མོད།   ད་ནི་མི་དེ་དག་གིས་ཀྱང་རང་ངོ་རང་གིས་ཤེས་བར་བྱོས་ཤིག་ཅེས་ཀྱང་ཞོར་དུ་གསལ་འདེབས་པ་ལེགས་སོ། །