བཀའ་ཁྲིའི་འོས་གཞི་རེ་ཟུང་གི་ཆབ་སྲིད་ཀྱི་དམིགས་རྒྱང་ཐུང་དྲགས་འདུག།།
རྨ་ཆུའི་དོན་གོ།
དེང་སྐབས་བོད་ཀྱི་དུས་བབ་སོགས་བརྒྱུད་ལམ་མང་པོ་ཞིག་གི་ཐོག་ཏུ་སེམས་ཤུགས་དང་དོ་སྣང་ཅན་གྱི་རྩོམ་པ་པོ་དང་ཤེས་ལྡན་མི་སྣ་མང་པོ་ཞིག་གིས་ཐུགས་ཁུར་གནང་སྟེ། ལོ་རྗེས་མའི་བཀའ་བློན་ཁྲི་བ་དང་། བོད་མི་མང་སྤྱི་འཐུས་ཀྱི་འོས་འདེམས་སྐོར་ལ་གནས་ཚུལ་མང་པོ་སྤེལ་བཞིན་ཡོད་པ་འདི་ཁྱེད་ཅག་རང་དབང་ཅན་གྱི་མང་གཙོའི་སྤྱི་ཚོགས་ནང་གི་ཤེས་ལྡན་མི་སྣ་རེ་ཡིན་པའི་འོས་འགན་འཕྲག་ཏུ་བླངས་པ་རེད་ལ། ཁྱེད་རྣམས་ ཀྱིས་བརྒྱུད་ལམ་ཁག་གི་ནང་དགོངས་ཚུལ་མང་པོ་སྤེལ་བ་ལ་བརྟེན་ནས་དེང་སང་མི་མང་གི་ནང་ལ་ཡང་འདིའི་སྐོར་ལ་གླེང་མོལ་ཤུགས་ཆེན་པོ་བྱེད་འགོ་ཚུགས་ཡོད། དེ་བཞིན་སྔར་དང་མི་འདྲ་བར་བཀའ་བློན་ཁྲི་བའི་འོས་གཞིར་དང་བླངས་ཀྱིས་ལང་མཁན་རེ་ཟུང་ཐོན་ཡོང་གི་ཡོད་པ་འདི་ཚོ་ལ་བལྟས་ན་བཙན་བྱོལ་བོད་གཞུང་གི་མང་གཙོའི་ལམ་ལུགས་ཡར་རྒྱས་སུ་འགྲོ་བཞིན་ཡོད་པ་གསལ་བོ་རེད།
ཡིན་ནའང་བཀའ་ཁྲིར་དང་བླངས་ཀྱིས་ལང་མཁན་ད་ལྟའི་སྤྱི་འཐུས་ཚོགས་གཙོ་སྤེན་པ་ཚེ་རིང་དང་། ཚོགས་གཞོན་རྒྱ་རི་སྒྲོལ་མ། བཀྲས་མཐོང་བསྟན་འཛིན་རྣམ་རྒྱལ། ཁོང་གསུམ་གྱིས་མ་འོངས་པའི་ལས་འཆར་ཐད་བཀའ་མོལ་གནང་པ་ལ་བལྟས་ན་ཁོང་རྣམས་ལ་བོད་མི་རིགས་ཀྱི་ངོ་བོ་དང་། བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་དང་སྲུང་སྐྱོབ་ཐད་ཆབ་སྲིད་ཀྱི་དམིགས་རྒྱང་ཐུང་དྲགས་པའི་སྐྱོན་དང་། རིག་གཞུང་ཉམས་ཆག་གི་རྒྱུ་རྐྱེན་ངོས་མ་ཟིན་པའི་སྐྱོན་ཡོད་པ་མཐོང་གི་འདུག སྤྱི་འཐུས་ཚོགས་གཙོ་སྤེན་པ་ཚེ་རིང་ལགས་ཀྱིས་བཀའ་ཁྲིའི་ལས་འཆར་ཁག་བཅུ་དྲུག་བཏོན་པའི་ནང་དུ་བོད་མི་བལ་གོས་འཚོང་མཁན་སོགས་སྐྱོ་བོའི་རིགས་ལུགས་མཐུན་ཐོག་ཕྱི་རྒྱལ་ཁག་ཏུ་གཏོང་ཐབས་བྱ་རྒྱུ་ཞེས་དང་། ཚོགས་གཞོན་རྒྱ་རི་སྒྲོལ་མ་ལགས་ཀྱིས་བོད་ཀྱི་དུས་བབ་གསར་འགོད་པར་བཀའ་ལན་གནང་དོན། གཞིས་ཆགས་སྲ་བརྟན་ཐད་མང་པོ་ཞིག་གིས་སེམས་འཚབ་བྱེད་ཀྱི་ཡོད་ཀྱང་ང་རང་གིས་འདིའི་ཐད་དཀའ་ངལ་ཆེན་པོ་མཐོང་གི་མེད། སྔར་དང་བསྡུར་ན་འགྱུར་བ་ཕྱིན་ཡོད་ཀྱང་དེ་དག་དུས་ལ་བབ་པའི་འགྱུར་བ་རེད། རྒྱ་བལ་འབྲུག་གསུམ་ཕུད་པའི་ཕྱི་རྒྱལ་ཁག་ཏུ་ཡོད་པའི་བོད་རིགས་རྣམས་ཀྱིས་བོད་ཀྱི་བསྟན་པ་ཆབ་སྲིད་ཀྱི་ཆེད་དུ་བྱས་རྗེས་རླབས་ཆེན་བཞག་ཡོད། བོད་གཞུང་གིས་དེའི་ཐོག་ལ་ཐབས་བྱུས་གནང་དགོས་པ་རེད་ཅེས་དང་། བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ་ལགས་ཀྱིས་ཀྱང་བཅར་འདྲི་ཞིག་གི་ལན་དུ། ངས་བོད་མི་རྣམས་ཕྱི་རྒྱལ་དུ་འབྱོར་བ་དེ་རིག་གཞུང་ཉམས་ཆག་འགྲོ་རྐྱེན་ཞིག་ཏུ་མཐོང་གི་མེད་ཚུལ་གསུངས་འདུག ཁོང་རྣམ་པའི་སྐད་ཆ་འདི་ཚོ་བོད་མི་བརྒྱ་ཆ་དགུ་བཅུ་གོ་ལྔའི་མངོན་འདོད་དང་མཐུན་པའི་ཆབ་སྲིད་པའི་མགོ་བདེ་དྲན་འཕྲུལ་གྱི་སྐད་ཆ་ཡིན་སྲིད་ལ། གལ་སྲིད་དོན་དངོས་ཐོག་ཁོང་རྣམ་པ་སུས་ཀྱང་སྲིད་ཇུས་འདི་འདྲ་ཞིག་ལག་བསྟར་བྱས་པ་ཡིན་ན། དེ་ནི་བོད་མི་རིགས་ཀྱི་བླ་སྲོག་དང་འབྲེལ་བའི་རིག་གཞུང་གོམས་གཤིས་དང་བཅས་པ་མེས་འཚིག་བཞིན་པའི་སྒང་ལ་སྣུམ་བླུགས་པ་ལྟ་བུ་ཞིག་ཆགས་རྒྱུ་ཡིན་པ་སྨོས་མེད་རེད།
བོད་མི་ཤེས་ཡོན་ཅན་མང་པོས་དགོངས་ཚུལ་བཞིན་ཕྱི་རྒྱལ་ཁག་ཏུ་ཡོད་པའི་བོད་རིགས་རྣམས་ཀྱིས་བོད་ནང་དང་། རྒྱ་བལ་འབྲུག་གསུམ་དུ་ཡོད་པའི་བོད་མི་སྐྱབས་བཅོལ་བ་རྣམས་ཀྱི་དཔལ་འབྱོར་ཐད་རོགས་རམ་བྱེད་བཞིན་ཡོད་པ་དང་། བོད་དོན་ཁྱབ་བསྒྲགས་ཆེད་ལས་འགུལ་མང་པོ་སྤེལ་གྱི་ཡོད་པ་སོགས་ནི་དངོས་ཡོད་གནས་ཚུལ་རེད། དེ་ལ་རྗེས་སུ་ཡི་རང་ཡོད། བོད་ནང་དང་། བཙན་བྱོལ་བོད་མིའི་སྤྱི་ཚོགས་ནང་འཚར་ལོངས་བྱུང་ཞིང་བོད་ཀྱི་ཆོས་དང་རིག་གཞུང་གི་བག་ཆག་དང་དེ་ལ་རྒྱུས་མངའ་ཡོད་པའི་མི་ཞིག་ལ་མཚོན་ན་ཕྱི་རྒྱལ་ཁག་ཏུ་ཕྱིན་ཡང་རྒྱལ་ཞེན་ལ་རྒྱ་དང་། བོད་དོན་འཐབ་རྩོད་ཀྱི་སེམས་ཤུགས་ཆེ་རུ་མ་སོང་ཡང་ཆུང་དུ་འགྲོ་གི་མེད་པ་བདེན་པ་རེད། ཡིན་ན་ཡང་ང་ཚོས་འཕྲལ་སེལ་གྱི་དགོས་པ་དེ་འདྲ་ཞིག་གི་ཆེད་དུ་ཁ་འཐོར་དུ་ཕྱིན་པ་ཡིན་ན། ནམ་ཞིག་རྒྱ་དམར་གྱི་དམིགས་ཡུལ་བཞིན་ང་ཚོ་རང་ངོ་རང་གིས་མི་ཤེས་པའི་མི་རིགས་ར་མ་ལུག་ཅིག་ཆགས་རྒྱུ་ཡིན་པ་ད་ལྟ་ནས་ཚོད་དཔག་བྱེད་ཐུབ་པ་ཞིག་རེད་ལ། སྐབས་དེར་ང་ཚོ་འགྱེལ་ས་ནས་ཡར་ལང་མི་ཐུབ་པ་སྨོས་མ་དགོས་པ་ཞིག་རེད། རྒྱུ་མཚན་ནི་ལོ་རྒྱུས་དང་ལྟ་གྲུབ་གང་ལ་བལྟས་ཀྱང་ཁ་འཐོར་དུ་ཕྱིན་པའི་མི་རིགས་ཤིག་གིས་སོ་སོའི་སྐད་ཡིག་དང་རིག་གཞུང་ལ་བདག་པོ་བརྒྱག་ཐུབ་ཐབས་མེད་པ་གསལ་པོ་རེད་ལ། སྐད་ཡིག་དང་རིག་གཞུང་ཉམས་པའི་མི་རིགས་ཤིག་དུས་ཡུན་རིང་པོར་སྐྱབས་བཅོལ་བའི་ངོ་བོར་གནས་ཐབས་མེད་པར་གནས་ཡུལ་རྒྱལ་ཁབ་གང་ཡིན་པ་དེའི་ནང་དུ་ཆུ་ཐིགས་བྱེ་མའི་ནང་སིམ་པ་བཞིན་འཐིམ་འགྲོ་རྒྱུ་ཡིན་པ་དེ་ཡང་གསལ་པོ་རེད། དེས་ན་༧གོང་ས་མཆོག་གིས་རེ་བ་བཟང་ས་དང་གྲ་སྒྲིག་སྡུག་ས་ནས་བྱེད་དགོས་གསུངས་པ་བཞིན་མི་རབས་ནས་མི་རབས་བར་བོད་དོན་བདེན་མཐའ་མ་གསལ་ཡང་བཙན་བྱོལ་བོད་མི་རྣམས་ཀྱིས་སོ་སོའི་རིགས་རུས་སྲུང་སྐྱོབ་དང་། སྐད་ཡིག་སྲུང་སྐྱོབ། ཆོས་དང་རིག་གཞུང་སྲུང་སྐྱོབ། ཆོལ་གསུམ་སྤུན་ཟླ་ཆིག་སྒྲིལ་གྱི་འདུ་ཤེས་སྲུང་སྐྱོབ། ཡ་རབས་བཟང་སྤྱོད་ཀྱི་གོམས་གཤིས་སྲུང་སྐྱོབ་བཅས་བྱས་ཏེ་བོད་མི་རིགས་འདི་ཡུན་རིང་གནས་ཐབས་བྱེད་རྒྱུ་ནི་བཙན་བྱོལ་བོད་གཞུང་གི་རྩ་དོན་གཙོ་བོར་འཛིན་དགོས། གོང་ས་མཆོག་གིས་གྲ་སྒྲིག་སྡུག་ས་ནས་བྱེད་དགོས་གསུངས་པའི་དགོངས་དོན་ཡང་དེ་རང་ཡིན།
བཙན་བྱོལ་བོད་གཞུང་གིས་གོང་གསལ་གྱི་སྲུང་སྐྱོབ་ལྔ་དོན་དངོས་ཐོག་ལག་ལེན་དུ་བསྟར་ཐུབ་པའི་སྲིད་ཇུས་བརྟན་པོ་ཞིག་འཛིན་ཐུབ་པ་ཡིན་ན། དེ་ནི་གཞིས་ལུས་རྒྱ་ཆེའི་མི་མང་གི་སེམས་ཤུགས་ཀྱི་རྩ་བ་ལྟ་བུ་ཞིག་ཆགས་ངེས་ཡིན་པས། རྒྱ་གཞུང་གིས་འཇམ་རྩུབ་ཀྱི་སྲིད་བྱུས་ག་འདྲ་ཞིག་ལག་བསྟར་བྱས་ཀྱང་གཞིས་ལུས་རྒྱ་ཆེའི་མི་མང་གི་སེམས་ཤུགས་ལ་འགྱུར་བ་འགྲོ་མི་སྲིད་པ་ང་ཚོར་འདས་པའི་ལོ་རྒྱུས་ཀྱིས་ར་སྤྲོད་བྱས་ཡོད་ལ། ང་ཚོའི་བདེན་པའི་འཐབ་རྩོད་ཀྱི་སྟོབས་ཤུགས་ཀྱི་འབྱུང་ཁུངས་ངོ་མའང་དེ་རང་ཡིན། ང་ཚོས་རྩ་དོན་གཙོ་བོ་དེ་སྣང་མེད་དུ་བཞག་སྟེ་འཕྲལ་སེལ་དཔལ་འབྱོར་འདུ་འགོད་ལ་གཡེང་ནས་རང་མགོ་གར་ཐོན་གྱིས་ཁ་འཐོར་དུ་ཕྱིན་པ་ཡིན་ན། ནམ་ཞིག་གཞིས་ལུས་རྒྱ་ཆེའི་མི་མང་གིས་ཀྱང་ང་ཚོར་རེ་བ་དང་ངོས་འཛིན་ག་འདྲ་ཞིག་བྱས་ཡོང་བཤད་ཚོད་ཐིག་ཁག་པོ་རེད། དེ་འདྲའི་མི་རིགས་སྲུང་སྐྱོབ་ཀྱི་སྲིད་ཇུས་ལག་བསྟར་དང་ལམ་ལྷོང་ཡོང་བའི་ཐབས་ལམ་གཅིག་རང་ཡོད་པ་དེ་ནི་བཙན་བྱོལ་བོད་མི་རྣམས་གོང་བུ་གཅིག་གྱུར་དུ་གནས་ཏེ་བོད་ཀྱི་རིག་གཞུང་བེད་སྤྱོད་བྱེད་སའི་ཁོར་ཡུག་གུ་ཡངས་པོ་ཞིག་བསྐྲུན་ཐབས་བྱེད་རྒྱུ་དེ་ཡིན། བཙན་བྱོལ་སྤྱི་ཚོགས་འདི་ཁ་མ་འཐོར་པར་གོང་བུ་གཅིག་གྱུར་ཏུ་གནས་ཐུབ་པ་ཡིན་ན། དེའི་ཤུགས་ཀྱིས་བོད་མི་རིགས་རིག་གཞུང་དང་བཅས་པ་སྲུང་སྐྱོབ་རང་བཞིན་གྱིས་ཡོང་གི་ཡོད། དེར་བརྟེན་འབྱུང་འགྱུར་གྱི་བཀའ་བློན་ཁྲི་བ་དང་། བོད་མི་མང་སྤྱི་འཐུས་རྣམས་ཀྱི་ལས་འགན་གཙོ་བོ་ནི་ཁ་འཐོར་དུ་འགྲོ་བཞིན་པའི་བཙན་བྱོལ་སྤྱི་ཚོགས་འདི་སྲ་བརྟན་དང་། གོང་བུ་གཅིག་གྱུར་བཟོ་རྒྱུ་དེ་ཡིན། ད་ལྟའི་བཙན་བྱོལ་སྤྱི་ཚོགས་ཀྱི་གནས་སྟངས་ལ་མཚོན་ན་གཞིས་ཆགས་ཁག་ཏུ་རྒན་རྒོན་ལས་མེད་རྣམས་མ་གཏོགས་གཞོན་སྐྱེས་ཧ་ཅང་ཉུང་ཉུང་ཡིན་ལ། ད་ལྟ་ལྷག་ཡོད་པ་རྣམས་ཀྱིས་ཀྱང་། བརྒྱ་ཆའི་དགུ་བཅུ་ལྷག་ནི་ཕྱི་རྒྱལ་ག་གེ་མོ་ཞིག་ཏུ་འགྲོ་རྒྱུའི་གོ་སྐབས་ལ་སྒུག་ནས་བསྡད་ཡོད་མཁན་ཤ་སྟག་ཡིན།
སློབ་གྲྭ་ཁག་ལ་མཚོན་ན། སློབ་ཕྲུག་གི་གྲངས་འབོར་ཉུང་དྲགས་ནས་སློབ་གྲྭ་སྒོ་བརྒྱག་ལ་ཉེ་བའི་སྐབས་ཡིན། དེ་བཞིན་གདན་ས་ཁག་གིས་གཙོས་དགོན་སྡེ་རྣམས་སུ་བོད་རིགས་ཀྱི་གྲྭ་རྒྱུན་འཆད་བཞིན་ཡོད། ༧གོང་ས་མཆོག་གིས་གཙོས་མཁས་དབང་དང་། མི་སྣ་རྒན་གྲས་མང་པོ་ཞིག་གིས་བོད་ཀྱི་སྐད་ཡིག་དང་རིག་གཞུང་ཉམས་ཆག་ཕྱིན་འདུག་ཅེས་གསུང་སྐད་བཀྱོན་དགོས་བྱུང་དང་འབྱུང་བཞིན་ཡོད། དེ་དག་ཚང་མའི་འབྱུང་རྐྱེན་གཙོ་བོ་ནི་ང་ཚོའི་སྤྱི་ཚོགས་འདི་དཔལ་འབོར་འདུ་འགོད་ཀྱི་ཆེད་དུ་རང་མགོ་གར་ཐོན་གྱིས་ཁ་འཐོར་དུ་འགྲོ་བཞིན་པ་འདི་ཁོ་ན་ལ་ཐུག་ཡོད་སྙམ། དེང་སང་བོད་ཕྱི་ནང་གཉིས་ཀའི་སློབ་མ་རྣམས་ལ་འཕྲད་བཞིན་པའི་དཀའ་ངལ་ཆེ་ཤོས་ཤིག་ཡོད་པ་དེ་ནི་སློབ་གྲྭའི་ར་སྐོར་གྱི་ཕྱི་རོལ་དུ་བོད་ཡིག་བེད་སྤྱོད་གཏོང་སའི་ཁོར་ཡུག་མེད་པ་དེ་རེད། བོད་ནང་ལ་མཚོན་ན། རྒྱ་གཞུང་གི་འཆར་གཞི་ལྡན་པའི་སྲིད་བྱུས་ལ་ཐུག་ཡོད་ལ། བཙན་བྱོལ་སྤྱི་ཚོགས་ལ་མཚོན་ན་སྤྱི་ཚོགས་གོང་བུ་གཅིག་གྱུར་ཏུ་གནས་མ་ཐུབ་པར་ཁ་འཐོར་དུ་ཕྱིན་པ་ལ་ཐུག་ཡོད། ཕྱོགས་གཞན་ཞིག་ནས་བཤད་ན་བོད་མི་རིགས་ལ་ལ་ཞེན་དང་ལྷག་བསམ་འགྲན་ཟླ་བྲལ་ཞིང་བྱས་རྗེས་ཅན་གྱི་ཆབ་སྲིད་བཙོན་ཟུར་རྣམས་ལོ་རེ་བཞིན་བོད་པའི་སྤྱི་ཚོགས་དང་ཁ་བྲལ་ནས་གཞུང་འབྲེལ་ཐོག་ཕྱི་རྒྱལ་ལ་གཏོང་བཞིན་ཡོད། ཁོང་རྣམ་པའི་ལ་ཞེན་དང་སེམས་ཤུགས་ལ་འགྱུར་བ་མེད་ན་ཡང་སྤྱི་ཚོགས་ཀྱི་གནས་སྟངས་དང་། ཁོར་ཡུག་གི་གནས་སྟངས་སོགས་རྒྱུ་རྐྱེན་མང་པོ་ཞིག་ལ་བརྟེན་ནས་མང་པོ་ཞིག་བོད་དོན་འཐབ་རྩོད་ཐོག་ནུས་མེད་དུ་འགྱུར་བཞིན་ཡོད། དེ་ལས་ཀྱང་སེམས་འཚབ་བྱེད་དགོས་པ་ཞིག་ནི། ང་ཚོ་བོད་པའི་མ་འོངས་པའི་སོན་རྩ་སྟེ་ཁོང་རྣམས་ཀྱི་བུ་ཕྲུག་རྣམས་ཀྱིས་གཙོས་བོད་པའི་ཕྲུ་གུ་མང་པོ་ཞིག་བོད་པའི་ཆོས་དང་རིག་གཞུང་གོམས་གཤིས་སོགས་ཕར་ཞོག ཐ་ན་བོད་སྐད་དང་བོད་ཡིག་ཙམ་ཡང་མེད་པའི་ཕྱི་རྒྱལ་ཁག་ཏུ་འཚར་ལོངས་འབྱོང་བཞིན་ཡོད་པ་འདི་ཡིན། འགྲོ་བ་མིའི་རིགས་ཀྱི་གོམས་གཤིས་དང་བསམ་བློའི་འཁྱེར་སོ་མཛེས་དཔྱོད་ཀྱི་ལྟ་བ་སོགས་ནི་འཚར་ལོངས་བྱུང་སའི་ཁོར་ཡུག་ལ་རག་ལས་ཀྱི་ཡོད་པ་དེ་དེང་རབས་ཚན་རིག་པས་གཏན་ལ་ཕབས་པའི་ཆོས་ཉིད་ཅིག་རེད། དེས་ན་ང་ཚོས་འཇིག་རྟེན་དཀར་ངོགས་སུ་སྐྱེས་བ་ནས་བཟུང་བོད་པའི་སྤྱི་ཚོགས་དང་ཁ་བྲལ་བའི་བོད་ཕྲུག་དེ་དག་གི་རྒྱུད་ལ་བོད་ཞེན་ལ་རྒྱ་དང་། རིགས་རུས་སྲུང་སྐྱོབ། ཆོས་དང་རིག་གཞུང་གི་བག་ཆགས་དང་། བདེན་དོན་འཐབ་རྩོད་ཀྱི་སེམས་ཤུགས་དང་སྙིང་སྟོབས་སོགས་ཇི་ལྟར་བསྐྲུན་ཐུབ།
འདི་ལྟར་བསམ་བློ་བཏང་པ་ཡིན་ན་ངས་ཚིག་ཉོག་འདི་ཚོ་ལས་བསླ་པོར་མཚམས་འཇོག་མི་ཐུབ་པ་ཞིག་རེད། མདོ་དོན་ངས་བཤད་འདོད་པ་ནི་འབྱུང་འགྱུར་གྱི་བཀའ་བློན་ཁྲི་བ་དེ་བཙན་བྱོལ་སྤྱི་ཚོགས་འདི་དཔལ་འབྱོར་འདུ་འགོད་ཀྱི་ཆེད་དུ་ཁ་འཐོར་དུ་གཏོང་མཁན་ཞིག་མིན་པར། འཐོར་བཞིན་པའི་སྤྱི་ཚོགས་འདི་གོང་བུ་གཅིག་གྱུར་བཟོ་མཁན་ཞིག་གདམ་རྒྱུ་ཧ་ཅང་གི་གལ་ཆེན་པོ་དང་། ངེད་ཅག་ཁ་བ་རུ་བའི་ཚེ་སྲོག་དང་འབྲེལ་བ་ཡོད་པ་ཞིག་རེད་ཅེས་པ་འདི་ཡིན། བཙན་བྱོལ་བོད་གཞུང་གི་འདས་བའི་བཀའ་བློན་རིམ་བྱོན་གྱི་མཛད་རྗེས་ལ་ཕྱི་མིག་ཅིག་བལྟས་པ་ཡིན་ན། ད་ལྟའི་བཀའ་བློན་ལས་ཐོག་པ་མཁས་དབང་ཟམ་གདོང་རིན་པོ་ཆེ་མཆོག་ནི་བསྔགས་བརྗོད་བྱེད་འོས་པ་ཞིག་རེད། ཁོང་གིས་བཀའ་བློན་སྔོན་མ་རྣམས་ཀྱི་བློ་ཡུལ་དུ་མ་འཁོར་བའི་གསར་གཏོད་ཀྱི་རང་བཞིན་ལྡན་པའི་ཕྱག་ལས་ཁ་ཤས་གནང་ཡོད་པ་ནི་ཤེས་ཡོན་སྲིད་ཇུས་གསར་བཟོ་གནང་བ་དང་། ཞིང་ལས་སྲོལ་རྒྱུན་སོ་ནམ་ཅན་དུ་བསྒྱུར་བ། གཞུང་རྒྱུ་སྒེར་སྤྱོད་ལ་དམ་འཛིན་གནང་པ་སོགས་ཡིན། དེ་དག་ནི་ད་ལྟའི་བཙན་བྱོལ་བོད་མིའི་མངོན་འདོད་དང་མཐུན་མིན་ལ་མ་ལྟོས་པར་བོད་མི་རིགས་རིག་གཞུང་དང་བཅས་པའི་མ་འོངས་པར་ཕན་ཐོག་ཡོད་པའི་དམིགས་རྒྱང་རིང་པའི་སྲིད་ཇུས་ཤ་སྟག་ཡིན། དེ་དག་ལག་ལེན་ཚུལ་བཞིན་ཡོང་གི་མེད་པ་ནི་བཙན་བྱོལ་སྤྱི་ཚོགས་ཀྱི་ནོར་འཁྲུལ་ཆེན་པོ་ཞིག་ཡིན། དོན་དངོས་ཐོག་ཕན་ཐོག་བྱུང་ཡོད་མེད་ལ་མ་ལྟོས་པར་ཁོང་ནི་ཁ་འཐོར་གྱི་གནས་སྟངས་ལ་ཐུགས་འཚབ་གནང་མཁན་ཞིག་ཀྱང་ཡིན། ཁོང་གི་དམིགས་རྒྱང་རིང་པའི་སྲིད་ཇུས་ཀྱི་འགོ་ཁུངས་བཙལ་བ་ཡིན་ན་དེ་ནི་ཁོང་གནའ་རབས་དང་། དེང་རབས་ཀྱི་གཞུང་ལུགས་དང་ལྟ་གྲུབ་ལ་མཁྱེན་རྒྱ་ཡངས་པོ་ཡོད་པ་ལ་ཐུག་ཡོད་སྙམ། དེས་ང་ཚོ་ལ་ག་རེ་ར་སྤྲོད་བྱས་ཡོད་ཟེར་ན་འབྱུང་འགྱུར་གྱི་བཀའ་བློན་ཁྲི་བ་དེ་ཡང་ལོ་ལྔའི་རིང་ལ་མི་མང་གི་འཕྲལ་སེལ་གྱི་མངོན་འདོད་བསྒྲུབ་ཐུབ་མཁན་ཙམ་མ་ཡིན་པར། གནའ་དེང་གི་གཞུང་ལུགས་དང་ལྟ་གྲུབ་ལ་མཁྱེན་རྒྱ་ཡངས་ཤིང་བོད་གཞིས་བྱེས་གཉིས་ཀྱི་མ་འོངས་བའི་ཆེད་དུ་ཕུགས་རྒྱང་རིང་པོའི་ཆབ་སྲིད་ཀྱི་དགོངས་པ་བཞེས་ཐུབ་མཁན་ཞིག་གདམ་རྒྱུ་གལ་ཆེན་པོ་ཡིན་པ་བསྟན་ཡོད།
རྩོམ་ཡིག་ལེགས་པོ་ཞིག་བྲིས་འདུག་ལ་བསམ་བློ་སྤྱིའི་ཁ་ཕྱོགས་ལ་རྒྱབ་སྐྱོར་དང་མོས་མཐུན་ཡོད། ཡིན་ཡང་། ང་ཚོས་གླེང་དགོས་པ་དང་ཤེས་དགོས་པ་གཙོ་བོ་ཞིག་ནི་རྒྱ་གར་ནང་སྡོད་སྐྱབས་བཅོལ་པའི་ཁྲིམས་ཐོག་གི་ལུགས་མཐུན་འཚོ་གནས་བྱེད་ཐབས་ཀྱི་ཐོབ་ཐང་སྐོར་ཡིན། གནད་དོན་འདི་སློབ་ཕྲུག་དང་གྲ་བ་ཚོར་འགྲེལ་བཤད་ཞིབ་ཀྱིས་བྱེད་དགོས་སྲིད་ཀྱང་། རང་ཉིད་དང་ནང་མིའི་འཚོ་གོས་གནས་མལ་གཉེར་མཁན་ཚོས་ཧ་ལམ་རང་ཉིད་ཀྱི་མྱོང་བའི་ཐོག་ནས་གསལ་བོ་ཤེས་ཀྱི་ཡོད་པ་རེད། ལོ་གཅིག་གི་མགྲོན་པོའམ་ཕྱི་རྒྱལ་པའི་མིང་ཐོག་ནས་ལོ་གཅིག་རིང་སྡོད་ཆོག་པའི་ཆོག་མཆན་ཡོད་མཁན་ཤ་སྟག་ཡིན་པ་དང་། ལོ་གཅིག་དེའི་ནང་ལོགས་སུ་ས་ཆ་ཉོ་བ་དང་ཁང་པ་བརྒྱག་པ་སོགས་ཀྱི་ཐོབ་ཐང་མེད་པ་རེད། མ་ཟད་ཕྱི་རྒྱལ་གཞན་པའི་ཡུལ་བསྐོར་བ་དང་སློབ་གཉེར་བ་སོགས་དང་ཁྱོན་ནས་མི་འདྲ་བ་ཞིག་ལ་ཁྲིམས་ཐོག་གི་ཉེན་སྲུང་དང་བདེ་འཇགས་ཀྱི་ལམ་ཁ་དེ་ང་ཚོར་མེད་པ་རེད།
མདོར་ནས་བཤད་ན་རྒྱ་གར་ནང་བོད་མི་མཉམ་གནས་ཀྱིས་ཆོས་རིག་གོམས་གཤིས་སོགས་འཛིན་སྐྱོང་བྱེད་ཐུབ་པ་ལ་ངེས་པར་དུ་ཁྲིམས་ཐོག་གི་ཐོབ་ཐང་ཡིག་ཆ་ད་ལྟའི་R C ཡི་གནས་སྟངས་དེ་ལས་ཡག་ཏུ་འོང་ཐབས་ལ་འབད་དགོས་པ་མ་གཏོགས།
སེམས་ཤུགས་དང་ལྷག་བསམ། ཤེས་རྒྱ་དང་ཕུགས་འདུན་སོགས་ཅི་ཙམ་ཡོད་པའི་བཀའ་ཁྲི་ཞིག་ཡོང་ཡང་དེས་བོད་མི་ཕྱི་རྒྱལ་དུ་འགྲོ་བའི་ལམ་ཁ་དེ་འགོག་ཐུབ་པ་ཞིག་མ་རེད་འདོད།
དོན་གོ་ལགས། ཁ་སང་ཁྱེད་རང་གི་བསམ་ཚུལ་འདི་ལ་ལན་ཞིག་འབྲི་ཁུལ་བྱས་པ་ཡིན་ཏེ་ལམ་བར་ནས་བརླག་འདུག དེ་རིང་མང་པོ་འབྲི་ཡ་མེད། ཁྱེད་རང་གི་བསམ་ཚུལ་གཙོ་བོ་བྱེས་གྱར་བོད་པ་ཚང་མ་རྒྱ་གར་ནང་ལོག་ནས་བསྡད་ན་ཡག་པོ་འདུག གོམས་གཤིས་དང་རིག་གཞུང་སོགས་གཉར་ཡ་ལ་ཕན་ཐོག་ཆེན་པོ་འདུག དེ་མིན་བཀའ་ཁྲི་གསར་བ་བཞེངས་མཁན་གསུམ་གྱིས་བོད་པ་ཕྱི་རྒྱལ་ལ་གཏོང་རྒྱུར་ཐབས་ཤེས་བྱེད་ཀྱི་ཡིན་ཟེར་བ་དེ་ཆབ་སྲིད་ཀྱི་ཕུགས་རྒྱང་རིང་བོ་མ་མཐོང་བའམ་འོས་ཤོག་ཐོབ་ཐུབ་ཀྱི་བསླུ་བྲིད་རང་བཞིན་གྱི་གཏམ་བཤད་རེད་ཟེར་བ་དེ་རེད། ངས་བཀའ་ཁྲི་བཞེངས་མཁན་ཚོས་དེ་འདྲ་གསུངས་པ་དེ་དངོས་ཡོད་གནས་ཚུལ་ཡིན་པ་དང་དེའི་སྒང་ལ་ཐབས་ཤེས་བྱས་ནས་བོད་པ་ཕྱི་རྒྱལ་ཁག་ལ་གཏོང་ཐབས་བྱ་རྒྱུ་དེ་གལ་ཆེན་རེད་བསམ། རྒྱ་གར་ནས་བོད་པ་ཚང་མ་བསྡད་པ་ཡིན་ན་ཡང་རིག་གཞུང་གོམས་གཤིས་ཉམས་ཆགས་སུ་འགྲོ་བཞིན་པ་མིག་མཐོང་ལག་ཟིན་རེད། གཞིས་ཆགས་ཁག་ཁ་ཤས་ཀྱི་བོད་པ་དེ་ཚོས་བོད་སྐད་མི་བཤད་པ་དང་བོད་ཀྱི་རིག་གཞུང་སོགས་ལ་དོ་སྣང་མེད་པ་གསལ་བོ་རེད། འདི་འདྲ་བྱས་ནས་ལོ་མང་འགོར་ན་ཕྱི་རྒྱལ་གྱི་བོད་པ་དང་རྒྱ་གར་གྱི་བོད་པ་གཉིས་ཀྱི་མཇུག་འབྲས་གཅིག་པ་རེད་བསམ། དེ་ནས་ང་ཚོས་ཤེས་དགོས་པ་ཞིག་ལ་ང་ཚོའི་བཙན་བྱོལ་སྤྱི་ཚོགས་ནང་ནས་གང་དགའ་གང་དྲག་དང་ཤེས་འཇོན་གཉིས་ལྡན་གྱི་སྐྱེ་བུ་མང་ཆེ་ཤོས་ཕྱི་རྒྱལ་ལ་ཐར་ཐབས་བྱེད་ཀྱི་ཡོད་པ་རེད། དེས་ང་ཚོ་ལ་བཙན་བྱོལ་བོད་མིའི་གནས་སྟངས་གསལ་བོ་ཞིག་འགྲེལ་བཤད་རྒྱག་གི་ཡོད་པ་རེད། ང་ཚོས་སྐྱེས་བུ་ཕྱི་རྒྱལ་ལ་སོང་བ་དེ་ཚོར་རིགས་ཞེན་མེད་པ་དང་རང་དོན་མ་གཏོགས་མི་ཤེས་མཁན་ཟེར་ནས་ཇི་ལྟར་སྡིག་ཀྱང་། ཕྱི་རྒྱལ་ལ་སོང་བའི་སྐྱེས་བུ་དེ་ཚོ་ལ་དཀའ་ངལ་མེད་རེད། དཀའ་ངལ་ཡོད་པ་དེ་ང་ཚོ་བཙན་བྱོལ་ལམ་རྒྱ་གར་ན་ཡོད་པ་དེ་ཚོ་རེད། དེ་ཙང་ང་ཚོའི་བཀའ་བློན་ཁྲི་བར་སུ་བསྡད་པ་ཡིན་ན་དེས་དཀའ་ངལ་འདི་སེལ་དགོས་པ་རེད། མ་མཐའ་ཡང་གནད་དོན་འདིའི་སྒང་ལ་ལས་ཀ་བྱེད་དགོས་པ་རེད། མི་མང་གི་མངོན་འདོད་འགྲུབ་པའི་ལས་ཀ་ཞིག་བྱེད་ན་བོད་མི་དེ་ཚོ་ཕྱི་རྒྱལ་ལ་གཏོང་ཐབས་བྱ་རྒྱུ་དེ་རེད། དེ་ཙང་ངས་བཀའ་ཁྲིའི་འོས་གཞིར་བླངས་པའི་སྐྱེས་བུ་དེ་ཚོའི་ཆབ་སྲིད་ཀྱི་དམིགས་རྒྱང་ཐུང་ཐུང་མ་རེད་བསམ། དངོས་ཡོད་གནས་ཚུལ་གཞི་ལ་བཞག་པ་རེད་བསམ།
བསམ་ཚུལ་མི་མཐུན་པ་མ་གཏོགས་དགའ་ཉེ་ཆགས་སྡང་མེད།
ཡག་པོ་འདུག
སྤྱི་བཏང་ནས་ང་ཚོ་ཚང་མས་ཤེས་གསལ་ལ། བཀའ་ཁྲིའི་འགྲེན་རྩོད་ཅན་འདི་འདྲའི་ཐད། བཀའ་ཁྲི་ལངས་འདོད་ཡོད་མཁན་ཚོས་སོ་སོ་ཞབས་སྟེར་དེའི་སྟེང་ལངས་རྒྱུ་བྱུང་པར་ཐབས་བརྒྱ་ཇུས་སྟོང་གིས་མི་དམངས་ལ་གང་ཁོར་གྱི་སྐད་ཆ་བཤད་རྒྱུ་རེད། མ་གཞི་ནས་༢༠༡༡་གི་བཀའ་ཁྲི་སུ་ཡོང་ནའང་བོད་ཀྱི་ཆབ་སྲིད་དང་གནས་སྟངས་ལ་འཕོ་འགྱུར་དེ་ཙམ་ཡོང་མི་ཐུབ་པ་ནི་གསལ་པོ་རེད།
ཐུགས་རྗེ་ཆེ་ཨོའུ་ཙམ་བྲིས་གནང་འདུག་་་ཡིན་ལ་བོད་ཀྱི་མཁས་དབང་དང་ཤེས་མྱོང་ཡོད་མཁན་ནམ་རྒྱུན་གཞུང་མང་དང་བོད་མིའི་ལས་དབང་དགོངས་ཚུལ་གསུངས་མཁན་མང་པོ་ཞིག་སོ་སོ་སྐུ་སྒེར་ལ་ཕྱི་བསྐྱོད་གོ་སྐབས་རེག་སྐབས།་བོད་མི་མང་དང་རྒྱལ་བ་རིན་པོ་ཆེ་དང་ཁོང་གི་དོན་གཅོད་ཁང་གང་ལའང་བསམ་བཏང་མེད་པའི་གནང་སྟངས་དེ་རིགས་བསམ་ན།་་་རྩོམ་ཡིག་འདི་རིགས་འབྲི་མཁན་རྣམས་ཁོང་ཚོ་གཅིག་ཡིན་པའི་སྣང་བ་ཞིག་ཤར་ཡོང་གི།
དཔེར་་ན།་ཉེ་ཆར་ཁཱ་ཊར་ཚོགས་འདུར་སོང་བའི་བོད་ཀྱི་ཚོགས་ཞུགས་མཁས་པ་ཚོ་ལས་མི་གཉིས་དང་ཕྱེད་ཀ་ཕྱིར་ཡོང་མེད་པ་རྣམ་པ་ཚོས་མཁྱེན་ཡོད་ཤག་
ཨ་ཨ་དུས་བབ་ཚང་ལ་རིག་འདོན་རྒྱུ་འདི་དངོས་གནས་རྒྱ་གཞུང་གི་དྲ་གནས་སུ་ཞུགས་པ་ལས་ཀྱང་ཁག་པོ་འདུག ཡང་ན་རིག་པ་རིག་རྒྱུ་མི་འདུག་བོར་འགྲོ་ཡང་མིན་ན་
རྩོམ་དོན་སྙིང་ལྡན་པ་དང་ང་ཚོས་ཚང་མས་གནད་དོན་འདིའི་ཐད་མུ་མཐུད་བསམ་བློ་གཏོང་རྒྱུ་དང་ཉམས་ཞིབ་བྱེད་དགོས་པར་སྙམ་། ཡིན་ན་རྩོམ་འདི་རིགས་དོན་དངོས་མི་ཅི་ཙམ་གྱིས་ལྟ་ཀློག་དང་དོ་སྣང་དང་སེམས་ཁུར་བྱེད་མིན་ཐེ་ཚོམ་གྱི་གནས་སུ་ལྷུང་།
རྨ་ཆུའི་དོན་ཁོ་ལ་དགའ་བསུ་ཞིག་མི་ཞུ་ཐབས་མེད་ཆགས་སོང་།
ཨ་མའི་བུ།
རྒྱུ་མཚན་ལྡན་པའི་གནས་ལུགས་རེ་བརྗོད་ན་ངོ་མ་ཡིད་སེམས་གཏིང་ནས་ལྷོད་ལ་འབད་རྒྱུ་ཞིག་འདུག་ ད་དུང་དེ་འདྲ་རེ་གསུངས་ཀྱིན་འདུག་གམ།
རྨ་ཆུའི་དོན་ཁོ་འཚམས་འདྲི་དང་། བསམ་ཚུལ་ཡག་པོ་རེད་ལ་གནད་དམ་མཚང་ཐོག་ཏུའང་ཁེལ་འདུག འོན་ཀྱང་བཀའན་ཁྲི་གསར་བ་སུ་ལངས་ན་བོདཀྱི་སྐད་ཡིག་གི་འཁོར་ཡུག་ལེགས་པོ་ཞིག་བསྐྲུན་ཐུབ། ཡང་ན་བོད་སྐད་ཡིག་གི་འཁོར་ཡུག་བཟང་བོ་ཇི་ལྟར་བྱས་ན་བསྐྲུན་ཐུབ། འདིའི་ཕྱོགས་ལ་བཀའ་ཁྲི་དང་བཀའ་འབངས་སུ་ཡིན་ལ་མ་ལྟོས་པར་བསམ་གཞིག་ནན་མོ་བྱེད་རྒྱུ་དང་ཐབས་ལམ་རེ་སྟོན་ཐུབ་ན་ཧ་ཅང་བཟང་སྙམ། ང་ལ་ནི་ཁ་ཡོད་ལག་ཡོད་ཀྱི་ལག་ལེན་བྱེད་ཐུབ་ས་རེད་སྣམ་པའི་ཐབས་ལམ་ཅི་ཡང་མི་འདུག རྣམ་པ་ཚོས་འདིའི་ཐད་ལ་དགོངས་འཆཅར་གནང་རོགས་ཞུ།
རྨ་ཆུའི་དོན་གོ་ལགས་ཀྱི་བསམ་ཚུལ་དེ་ཡག་པོ་འདུག།
འདི་ནི་ཕྱོགས་ལྷུང་མེད་པའི་བསམ་ཚུལ་ཞིག་རེད། ད་ལྟའི་བཀའ་ཁྲི་ལས་ཐོག་གི་ཕྱགས་ལས་གནང་བ་འདི་བཞིན་སྔོན་གྱི་བཀའ་ཁྲི་རྣམས་ཀྱི་བློ་ཡུལ་ལ་མེད་པ་བདེན་པ་རེད།
དེ་ནས་ད་ལྟའི་ཚོགས་གཙོ་དང་ཚོགས་བཞོན། གཞན་བཀྲས་མཐོང་གསུམ་ལ་བོ་ད་མིའི་
བདེ་སྡུག་དང་འབྲེལ་བའི་ལས་ཀ་བྱེད་ས་དང་བསམ་ཚུལ་བཤད་སའི་གོ་སྐབས་ཡུན་རིང་
ཐུབ་ཡོད་ཀྱང་། བསམ་ཚུལ་གསར་པ་དང་ཐབས་ལམ་གསར་པ་སྣེ་གཅིག་མེད་ནས་ལས་ཡུན་ཚར་རེད་།
ད་ནི་གོ་སྐབས་ཕུལ་ཡང་ ས་མིག་སྟོང་པ་མིན་ཙམ་ལས་གཞན་མི་འཇོན་པ་ཕྱི་གསལ་ནང་གསལ་རེད།
ད་ཡོད་ཀྱི་བཀའ་ཁྲིའི་འོད་གཞིའི་ནང་ནས། ཆ་རྐྱེན་ཡག་ཤོས་ དང་རེ་བ་ཆེ་ཤོས་ དེ་ བློ་བཟང་སེང་གེ་རེད།།
རྨ་ཆུའི་དོན་གོ་ལགས་ཀྱི་བསམ་ཚུལ་དེ་ཡག་པོ་འདུག།
འདི་ནི་ཕྱོགས་ལྷུང་མེད་པའི་བསམ་ཚུལ་ཞིག་རེད། ད་ལྟའི་བཀའ་ཁྲི་ལས་ཐོག་གི་ཕྱགས་ལས་གནང་བ་འདི་བཞིན་སྔོན་གྱི་བཀའ་ཁྲི་རྣམས་ཀྱི་བློ་ཡུལ་ལ་མེད་པ་བདེན་པ་རེད།
དེ་ནས་ད་ལྟའི་ཚོགས་གཙོ་དང་ཚོགས་བཞོན། གཞན་བཀྲས་མཐོང་གསུམ་ལ་བོ་ད་མིའི་
བདེ་སྡུག་དང་འབྲེལ་བའི་ལས་ཀ་བྱེད་ས་དང་བསམ་ཚུལ་བཤད་སའི་གོ་སྐབས་ཡུན་རིང་
ཐུབ་ཡོད་ཀྱང་། ས་མིག་སྟོང་པ་མིན་ཙམ་ལས་གཞན་མི་འཇོན་པ་ཕྱི་གསལ་ནང་གསལ་རེད།
དོན་གོ་ལགས་ཁྱེད་ཀྱིས་༼བཀའ་ཁྲིར་དང་བླངས་ཀྱིས་ལང་མཁན་ད་ལྟའི་སྤྱི་འཐུས་ཚོགས་གཙོ་སྤེན་པ་ཚེ་རིང་དང་། ཚོགས་གཞོན་རྒྱ་རི་སྒྲོལ་མ། བཀྲས་མཐོང་བསྟན་འཛིན་རྣམ་རྒྱལ། ཁོང་གསུམ་གྱིས་མ་འོངས་པའི་ལས་འཆར་ཐད་བཀའ་མོལ་གནང་པ་ལ་བལྟས་ན་ཁོང་རྣམས་ལ་བོད་མི་རིགས་ཀྱི་ངོ་བོ་དང་། བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་དང་སྲུང་སྐྱོབ་ཐད་ཆབ་སྲིད་ཀྱི་དམིགས་རྒྱང་ཐུང་དྲགས་པའི་སྐྱོན་དང་།༽དང་བླངས་པ་ཁོང་ཚོ་ལ་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་བྱེད་རྒྱུར་ཆབ་སྲིད་དམིགས་ཡུལ་ཐུང་དྲགས་ན་དང་བླངས་པ་བློ་བཟང་སེང་གེ་ལ་དེ་ལས་ལྷག་པའི་ཆབ་སྲིད་ཀྱི་དམིགས་ཡུལ་གང་འདུགགམ་གམ་གམ་གམ་གམ་གམ་གམ་གམ་གམ་གམ།ཧ་ཧ་ཧ་ཧཧ་ཧ་ཧ།
གུས་པས་ལྟས་ན་ཁོང་ཚོ་བཞིའི་ནང་ནས་ད་ལྟའི་དུས་བབས་ཀྱི་བཀའ་ཁྲི་ལེགས་ཤོས་དགུང་ལོའི་བབ་དང་ཉམས་མྱོང་གང་ཐད་ནས་ཚོགས་གཙོ་སྤེན་པ་ཚེ་རིང་ལེགས་ཤོས་སུ་མཐོང།
གནས་ལུགས་དང་མཐུན་པའི་དཔྱད་བརྗོད་ཅིག་སྤེལ་འདུག ཁོང་དག་གིས་སྐྱབས་བཅོལ་བོད་མི་རྣམས་ཕྱི་རྒྱལ་ཟེར་དུས་ཁོག་ན་འབུ་འགུལ་གྱིན་པའིརྣམ་པ་མཐོང་ནས་མགོ་སྐོར་གཏོང་གི་ཡོད་པ་རེད། དེ་ཟེར་དུས་ང་རང་ཕྱི་རྒྱལ་དུ་གཏང་མི་ཡོང་ངམ་སྙམ་ནས་འོས་ལྡུག་པར་སྙམ་པ་རེད། དེ་ནི་མིག་རྒྱང་ཐུང་བར་བརྗོད་ཆོག གནས་སྐབས་ཀྱི་ཁེ་ཕན་འཚོལ་བ་གཅིག་བུ་རེད།
དོན་ཁོ་ལ་རྒྱབ་སྐྱོར་བྱེད་ངེས།
བོད་མི་འདུས་སྡེ་བྱས་པའི་ས་གནས་ཁག་ཏུའང་བོད་སྐད་གཙང་མ་ཞིག་ཤོད་མི་ཐུབ་པའི་དཀའ་ངལ་འཕྲལ་མུས་རེད། བོད་ནང་དུའང་དེ་ལྟར་ཡིན་མོད། ད་ལྟའི་ཆར་བོད་ཀྱི་ན་གཞོན་ཤེས་ཡོན་ཅན་དང་ལ་རྒྱ་ཅན་མང་པོ་ཞིག་གིས་བོད་སྐད་གཙང་མ་བཤད་རྒྱུའི་ལས་འགུལ་སྣ་ཚོགས་སྤེལ་བཞིན་པ་དེས་མངོན་གསལ་གྱི་ཕན་ཐོག་ཡོང་བཞིན་པ་ལྟར་ཕྱི་སྡོད་བོད་མི་ཚོས་དེར་མིག་དཔེ་བལྟ་དགོས་པ་ཞིག་ཡིན་མོད། སྤྱི་ཚོགས་དང་ཁོར་ཡུག་ལ་ཁག་དཀྲི་བར་དགའ་བའི་གནས་འདིའི་ན་གཞོན་ཚོས་རང་ཉིད་སྤྱི་ཚོགས་ཀྱི་གྲུབ་ཆ་ཞིག་ཡིན་པ་དང་གྲུབ་ཆ་རེ་རེས་སྤྱི་ཚོགས་ཀྱི་ངོ་བོ་བསྐྲུན་བཞིན་པ། སྤྱི་ཚོགས་ཀྱི་ངོ་བོ་དེས་ཁོར་ཡུག་བསྐྲུན་བཞིན་པ་མི་ཤེས་པར་མཐོང་རྒྱ་དང་ཐོས་རྒྱ་ཆེ་མདོག་གིས་ར་མ་ལུག་གི་བྱ་སྤྱོད་ལ་དང་དོད་བྱེད་པ་འདི་འགོག་ཐབས་དཀའ་འོ།
རྒྱབ་སྐྱོར་བརྒྱ་ཆའི་སྟོང་ཡོད། ཕྱི་རྒྱལ་ན་ཡོད་མཁན་ཚོས་གནས་སྐབས་རིང་བོད་དང་རྒྱ་གར་ན་ཡོད་མཁན་ཚོར་དངུལ་འགའ་རེ་ཕན་ཐོགས་པ་བདེན་མོད། ཁོ་ཚོའི་ནང་གི་བརྒྱ་ཆ་བརྒྱད་ཅུའི་བུ་ཕྲུག་གི་བོད་སྐད་མི་ཤེས། བོད་ཀྱི་ཡུལ་སྲོལ་གོམས་བཤེས་མི་ཤེས། དེའི་ཕྱིར་ཕ་མ་དང་བུ་ཕྲུག་བར་ན་འགལ་བ་རིམ་བཞིན་སླེབས་གིན་འདུག བུ་ཕྲུག་གི་བོད་ཀྱི་སྐད་ཡིག་ཤེས་དགོས་པ་དེ་གཙོ་བོ་བོད་མི་རིགས་ཀྱི་ཆེད་མ་རེད། གཙོ་བོ་ཕ་མ་དང་རང་གི་བུ་ཕྲུག་བར་གི་འབྲེལ་བ་འམ་བརྩེ་བའི་ཆེད་རེད། ཕ་མའི་ཕྱི་སྐད་མི་ཤེས་པ་དང་བུ་ཕྲུག་གི་བོད་སྐད་མི་ཤེས་མཁན་ཚོའི་བར་གི་འབྲེལ་བ་འམ་བརྩེ་བ་ཉུང་ཉུང་རེད། ཕ་མ་དང་བུ་ཕྲུག་གི་བོད་སྐད་ཤེས་ན་ཁོ་ཚོའི་བར་གི་བརྩེ་བ་སྟེང་ཟབ་མོ་རེད། འདི་ངའི་ཉམས་མྱོང་ཡིན།