དེ་རིང་སྔ་དྲོར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གསར་འགོད་གསལ་བསྒྲགས་ཤིག་སྤེལ་བའི་ཐོག ཆབ་སྲིད་བཙོན་ཟུར་ལྷ་མོ་སྐྱབས་ལགས་ཀྱིས་ཉེ་ཆར་ཁོང་གི་བཙོན་གྲོགས་ཤིག་བརྒྱུད་ནས་ཤེས་རྟོགས་བྱུང་བའི་གནས་ཚུལ་ཁག་ཅིག་ངོ་སྤྲོད་གནང་ཡོད་ལ། སྐབས་དེར་སྤང་རི་སྣ་རིན་པོ་ཆེ་དང་རྩོམ་པ་པོ་སྒྲོལ་མ་སྐྱབས་གཉིས་ཀྱི་གཟུགས་པོ་བདེ་ཐང་མིན་པ་དང་ད་ལྟའི་གནས་སྟངས་ཛ་དྲག་རེད་ཟེར།
གསར་འགོད་གསལ་བསྒྲགས་སྐབས་ལྷ་མོ་སྐྱབས་ཀྱིས་གསུངས་དོན། ཉེ་ཆར་རང་ངའི་བཙོན་ཁང་གི་ཆབ་སྲིད་བཙོན་གྲོགས་ཤིག་ཕྱི་ལོགས་སུ་བསླེབས་ཡོད་པ་དང་འབྲེལ་བ་བྱུང་སྟེ་ཤེས་རྟོགས་བྱུང་བ་ལྟར་ན། སྤང་རི་སྣ་རིན་པོ་ཆེ་དང་རྩོམ་པ་པོ་སྒྲོལ་མ་སྐྱབས་གཉིས་ད་ལྟ་ཆུ་ཤུར་བཙོན་ཁང་དུ་བཅུག་འདུག་ལ། ཁོང་གཉིས་ཀྱི་གཟུགས་པོ་བདེ་ཐང་མིན་པ་དང་གནས་ཚུལ་ཛ་དྲག་རེད། འབྲེལ་ཡོད་མི་སྣ་དེས་རྩོམ་པ་པོ་སྒྲོལ་མ་སྐྱབས་ད་ལྟ་ཆུ་ཤུར་བཙོན་ཁང་གི་ཡན་ལག་དང་པོའི་ནང་དུ་འདུག་ཟེར་ལ། གལ་སྲིད་ཁོང་ཡན་ལག་དང་པོའི་ནང་དུ་ཡོད་པར་ཕྱིར་འདང་བརྒྱབ་ཚེ། ཕྱི་ལོ་ ༢༠༠༨ ལོའི་ཟླ་ ༣ ཚེས་ ༢༠ ཉིན་ཡན་ལག་གསུམ་པའི་ནང་ནས་ཕར་ཡན་ལག་དང་པོར་ཁྲིད་ཕྱིན་པ་རེད་ལ། ད་ལྟའི་བར་ཡན་ལག་དང་པོར་ལྷག་པ་ཚོད་དཔག་བྱེད་ཐུབ་ཀྱི་འདུག དེར་བརྟེན་བོད་ནས་བཤད་མཁན་གྱིས་སྒྲོལ་མ་སྐྱབས་ཀྱི་ད་ལྟའི་གཟུགས་པོའི་གནས་སྟངས་ཧ་ཅང་གི་སྐྱོ་བོ་ཡིན་པར་མ་ཟད། ཁོང་གཞུག་ཕྱོགས་མི་ཐང་པོ་ཞིག་བྱས་ཏེ་ཕྱིར་གློད་གྲོལ་འཐོབ་རྒྱུའི་རེ་བ་ཁག་པོ་རེད་གསུང་གི་འདུག་ལ། ང་རང་ཉིད་ཀྱི་ངོས་ནས་ཀྱང་ཧ་ཅང་གི་སེམས་འཚབ་བྱུང་ཞེས་གསུངས། ཡང་ཁོང་གིས་སྤང་རི་སྣ་རིན་པོ་ཆེའི་སྐོར་གསུངས་དོན། སྤང་རི་སྣ་རིན་པོ་ཆེ་ཁོང་ ༢༠༡༠ ལོའི་ཟླ་ ༣ བར་དུ་ཡན་ལག་ཁང་དང་པོའི་ནང་དུ་བཅུག་བསྡད་པ་རེད་ལ། ཕར་ཡན་ལག་དང་པོར་ཁྲིད་སྐབས་ ༢༠༠༨ ལོའི་ཟླ་ ༡༡ ནང་ཡིན། དེར་བརྟེན་ཁོང་ལོ་གཅིག་དང་ཟླ་བཞི་ཡས་མས་རིང་ཡན་ལག་དང་པོའི་ནང་དུ་བཅུག་ཡོད། ད་ལྟ་ཁོང་ཕྱིར་ཡན་ལག་ཁང་གསུམ་པའི་ཁང་མིག་ ༡༡ ནང་བསླེབས་ཡོད་ཀྱང་། ཟླ་གསུམ་རིང་ཕྱི་ལ་འགྲོ་མི་ཆོག་པའི་བཙན་བཀའ་བཏང་སྟེ་བཅུག་ཡོད་ཐོག ཁོང་གི་ད་ལྟའི་སྐུའི་གནས་བབ་ཀྱང་ཧ་ཅང་ཛ་དྲག་དང་བདེ་ཐང་མི་འདུག་ཅེས་ཟེར། དེ་ལྟར་ཁོང་ལ་བོད་ནས་འགྲེལ་བརྗོད་གནང་མཁན་གྱིས་སྤང་རི་སྣ་རིན་པོ་ཆེ་དང་རྩོམ་པ་པོ་སྒྲོལ་མ་སྐྱབས་གཉིས་ཀྱི་ད་ལྟའི་གནས་སྟངས་ཛ་དྲག་དང་སྐུ་གཟུགས་བདེ་ཐང་མིན་པའི་སྐོར་འགྲེལ་བརྗོད་གནང་ཡོད་འདུག
སྤྱིར་བཙོན་ཁང་གི་གཏན་འབེབས་ལྟར་ན། ཡན་ལག་ཁང་དང་པོའི་ནང་མང་ན་ཟླ་ ༣ ལྷག་ལ་བཀག་ཉར་བྱེད་ཆོག་གི་མེད་ཀྱང་། རྒྱ་ནག་གིས་ཆབ་སྲིད་བཙོན་པ་རྣམས་ལ་ཟླ་དང་ལོ་མཐུད་དེ་བཀག་ཉར་དང་། བཙོན་འཇུག་མནར་གཅོད་གཏོང་བཞིན་ཡོད་འདུག
ཡང་ཁོང་གིས་ད་ལྟ་ཆུ་ཤུར་བཙོན་ཁང་གི་ཡན་ལག་གསུམ་པའི་ཁང་མིག་ ༡༣ ནང་དུ་ ༢༠༠༨ ལོའི་བཙོན་མ་ཁ་ཤས་བསླེབས་འདུག དེའི་ནང་དུ་ཁམས་མཛོ་སྒང་གི་འཕྲིན་ལས་དངོས་གྲུབ་འབོད་པ་དང་ཁོའི་གྲོགས་པོ་ཞིག་ལ་ལོ་ལྔ་རེའི་བཙོན་འཇུག་ཁྲིམས་ཆད་དང་། འཕྲིན་ལས་དངོས་གྲུབ་ཀྱི་སྤུན་ཉེ་ཞིག་བཙོན་ཁང་གི་བཀག་ཉར་ཁང་ནང་རྐྱེན་ལམ་དུ་ཕྱིན་འདུག་ཀྱང་། ཞིབ་ཕྲའི་གནས་ཚུལ་ཤེས་རྟོགས་ཐུབ་ཀྱི་མི་འདུག གཞན་ཡང་སོག་རྫོང་གི་མི་གཅིག་དང་དིང་རི་ནས་ཡིན་པའི་ཐུབ་བསྟན་དངོས་གྲུབ་ཟེར་བ་ཞིག་འདུག་ལ། ཐུབ་བསྟན་དངོས་གྲུབ་མཉམ་དུ་མི་ ༡༠ ཙམ་འཇུས་པ་ལས་གསུམ་གློད་གྲོལ་བཏང་བ་དང་། ཐུབ་བསྟན་དངོས་གྲུབ་དང་གཞན་ཞིག་ལ་ལོ་ ༡༢ རེའི་ཁྲིམས་ཐག་བཅད་འདུག གཞན་རྣམས་ལའང་ཁྲིམས་ཐག་བཅད་འདུག་ཀྱང་། ལོ་ཚད་གསལ་བོ་ཤེས་རྟོགས་ཐུབ་མེད་ཅེས་གསུངས།
ཁོང་གིས་གསར་འགོད་གསལ་བསྒྲགས་འདི་བརྒྱུད་རྩོམ་པ་པོ་སྒྲོལ་མ་སྐྱབས་དང་སྤང་རི་སྣ་རིན་པོ་ཆེ་རྣམ་གཉིས་གཙོས་ཆབ་སྲིད་བཙོན་པ་རྣམས་མྱུར་དུ་གློད་གྲོལ་ཡོང་ཆེད་འགྲོ་བ་མིའི་ཐོབ་ཐང་ཚོགས་པ་ཁག་ལ་འབོད་སྐུལ་ཞུ་གི་ཡོད་ལ། ཁོང་རྣམ་གཉིས་ཀྱི་སྐུ་གཟུགས་བདེ་ཐང་མིན་པ་དང་། མུ་མཐུད་ཚད་ལས་བརྒལ་བའི་མནར་གཅོད་མྱོང་བཞིན་ཡོད་སྟབས་སེམས་འཚབ་ཆེན་པོ་ཡོད་སྐོར་གསུངས་ཡོད།
ཆབ་སྲིད་བཙོན་ཟུར་ལྷ་མོ་སྐྱབས་ལགས་ནི་ ༢༠༠༨ ལོའི་ཟླ་ ༥ ཚེས་ ༡༣ ཉིན་བོད་རང་སྐྱོང་ལྗོངས་རྒྱལ་ཁབ་བདེ་སྲུང་མི་སྣས་འཇུས་ཏེ་ལྷ་ས་འབྲིང་རིམ་མི་མང་ཁྲིམས་ཁང་གིས་ལོ་ ༣ ཧྲིལ་བོར་དུས་བཀག་བཙོན་འཇུག་དང་ལོ་གཉིས་ལ་ཆབ་སྲིད་ཀྱི་དབང་ཆ་འཕྲོག་སྟེ་ཆུ་ཤར་བཙོན་ཁང་དུ་བསྐྱལ། ཆུ་ཤུར་བཙོན་ཁང་དུ་བཙོན་ཁུལ་བཞི་ཡོད་པ་ལས་བཙོན་ཁུལ་དང་པོ་ནི་ཆབ་སྲིད་བཙོན་པ་རང་ལ་བསམ་བློ་བསྒྱུར་བཀོལ་གཏོང་ས་ཡིན་ལ། བཙོན་ཁུལ་དེར་ཡན་ལག་གསུམ་ཡོད་པ་ལས་ཡན་ལག་དང་པོར་ཁང་མིག་ ༡༧ ཡོད། ཁང་མིག་དེ་དག་ལ་སྒེའུ་ཁུང་སོགས་གང་ཡང་མེད་པར་ནག་ཁུང་ཡིན་པར་མ་ཟད། མཐོ་ཚད་དམའ་བ་དང་། དགུན་དུས་གྲང་ངར་ཆེ་ཞིང་དབྱར་དུས་བརླན་བཤེར་སོགས་རྒྱུན་མི་ཆད་པར་འབབ་པས་མཁའ་དབུགས་ཕྱི་རུ་གཏོང་ས་མེད་པ་སོགས་ཆབ་སྲིད་བཙོན་པ་མང་བོ་ཞིག་གི་གཟུགས་པོ་འཕྲོ་བརླག་ཏུ་གཏོང་གི་ཡོད་འདུག ལྷ་མོ་སྐྱབས་ཁོང་དེ་རུ་ཟླ་ ༦ རིང་བཀག་ཉར་བྱས་ཡོད་འདུག
བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་ནས་ཁང་གི་འགན་འཛིན་ལས་རོགས་འཇམ་དཔལ་སྨོན་ལམ་ལགས་ཀྱིས། ཆུ་ཤར་བཙོན་ཁང་ནི་བོད་ནང་གི་ཆབ་སྲིད་བཙོན་པ་མང་ཤོས་ཀྱི་བཙོན་ཁང་ཞིག་ཡིན་ལ། ལྷ་མོ་སྐྱབས་ཀྱིས་ཁོང་རང་ཉིད་བཙོན་ཁང་དེར་བཅུག་མྱོང་བའི་ཉམས་མྱོང་གི་སྟེང་ནས། སྤང་རི་སྣ་རིན་པོ་ཆེའི་སྐུའི་གནས་སྟངས་ཛ་དྲག་རེད་ཟེར་བ་དང་། ཁོང་ཡན་ལག་ཁང་དང་པོའི་ནང་དུ་བཅུག་ཟེར་དོན། ཉི་འོད་མིག་གིས་མི་མཐོང་བའི་དམ་དྲག་ཁང་ནང་བཅུག་པར་གོ་དགོས། རྒྱ་ནག་གི་ཁྲིམས་ཀྱི་འགྲོ་སྟངས་ལྟར་ན། དམ་དྲག་ཁང་ནང་ཟླ་གསུམ་ལས་བཅུག་མི་ཆོག་ཀྱང་སྤང་རི་སྣ་རིན་པོ་ཆེ་ལོ་གཅིག་ལྷག་ལ་བཅུག་པ་རེད། དེར་བརྟེན་ང་ཚོ་བོད་ཀྱི་འགྲོ་བ་མིའི་ཐོབ་དང་མང་གཙོ་འཕེལ་རྒྱས་ལྟེ་གནས་ཁང་གི་ངོས་ནས་སྤང་རི་སྣ་རིན་པོ་ཆེ་དང་རྩོམ་པ་པོ་སྒྲོལ་མ་སྐྱབས་གཉིས་གཙོས་བོད་ནང་གི་ཆབ་སྲིད་བཙོན་པ་རྣམས་ལ་བློ་འཚབ་ཆེན་པོ་བྱེད་ཀྱིན་པ་དང་། དེ་རིང་གི་གསར་འགོད་གསལ་བསྒྲགས་འདི་བརྒྱུད་ཁོང་ཚོའི་གནས་སྟངས་གང་མགྱོགས་སྒོས་ཇེ་ཡག་ཏུ་འགྲོ་བ་དང་། ཁོང་ཚོར་རང་དབང་འཐོབ་པའི་རེ་བ་བྱེད་ཀྱིན་ཡོད་ཟེར། ཡང་ཆབ་སྲིད་བཙོན་ཟུར་ལྷ་མོ་སྐྱབས་ལགས་ཀྱིས་གསར་འགོད་པས་བཅར་འདྲི་བྱས་པ་ལྟར། བཙོན་ཁང་གི་གནས་སྟངས་ཐུང་ངུ་ཞིག་འགྲེལ་དོན། ཆབ་སྲིད་བཙོན་པ་རྣམས་ཀྱིས་ནམ་རྒྱུན་ལྐོག་ནས་སྐད་ཆ་བཤད་པ་དང་། ཕན་ཚུན་ལ་འབྲེལ་འདྲིས་བྱེད་ཀྱིན་པ་ཤེས་རྟོགས་བྱུང་ཚེ་ལམ་སེང་ཉེན་རྟོག་པས་སྐད་བཏང་སྟེ་འདྲི་བརྩད་བྱེད་གི་རེད། ང་ཚོར་ཁང་མིག་རེར་ཉེས་དོན་ཉེས་བསགས་པ་ ༼ བཙོན་པ། ༽ གཉིས་རེར་ལྟ་རྟོག་བྱེད་དུ་བཅུག་ཡོད་ལ། ནང་དུ་ལྟ་ཉན་འཕྲུལ་ཆས་བཞག་ཡོད་སྟབས་བཙོན་མ་རྣམས་ཀྱིས་ཕན་ཚུན་ལ་སྐད་ཆ་ཉུང་ངུ་ཞིག་བཤད་ཀྱང་ལྐོག་ནས་སྐྲག་ཞོར་འདར་ཞོར་དུ་བཤད་ཀྱིན་ཡོད་པས་བཙོན་ཁང་གཅིག་གི་ནང་དུ་ཡོད་ཀྱང་ཕན་ཚུན་གྱི་གནས་སྟངས་ཤེས་ཀྱི་མེད་ཟེར། དེ་ནི་ཉེས་དོན་བཙོན་མ་དང་ཆབ་སྲིད་བཙོན་མའི་བར་ལ་ལྟ་རྟོག་བྱེད་སྟངས་ཀྱི་ཁྱད་པར་ཡིན་འདུག
གསར་འགོད་པ། ཨ་རིག་འགྱུར་མེད།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
སྤང་རི་སྣ་རིན་པོ་ཆེ་ཟེར་བ་དེང་སང་གི་མིང་རེད། སྔ་དུས་བུ་རམ་སྣ་དགོན་པ་དང་བུ་རམ་སྣ་རིན་པོ་ཆེ་ཟེར། དེ་ནི་སྔ་དུས་ཀྱི་ཐ་སྙད་མང་པོ་ཞིག་འགྲེལ་བཤད་ཡག་པོ་ཡོང་ཆེད་སྒྲ་འདྲ་པོ་དེ་འདྲར་འགྱུརབ་གཏོང་བཞིན་ཡོད་པའི་དཔེ་མཚོན་ཞིག་རེད།
གང་ལྟར་སྤང་རི་འཇིགས་མེད་བསྟན་འཛིན་ཉི་མ་ཟེར་བ་དེ་དཀར་མཛེས་ཀྱི་སྤང་རི་སྣ་རིན་པོ་ཆེ་ཡིན་རྒྱུ་མ་རེད་སྙམ། ཁོང་དཀར་མཛེས་ནས་འཛིན་བཟུང་བྱས་པས་རང་སྐྱོང་ལྗོངས་ནང་ག་རེ་བྱས་ནས་ཁྲིད་ཡོང་བ་རེད། དེང་སང་རྒྱ་ནག་གི་ལམ་ལུགས་ལྟར་ན། གལ་སྲིད་བོད་རང་སྐྱོང་ལྗོངས་ས་ཁུལ་དུ་ནག་ཉེས་བསགས་ཡོད་ན་ལས་སི་ཁྲོན་གྱི་མི་ཞིག་ལྷ་སའི་བཙོན་ཁང་དུ་གཏོང་སྲོལ་མེད་པ་རེད།
ངས་བལྟས་ན་སྔོན་མ་ལྷ་སར་རྒྱ་མཚོ་དྭ་ཕྲུག་སློབ་གྲྭའི་བདག་པོ་བང་རི་རིན་པོ་ཆེ་དང་སྤང་རི་སྣ་རིན་པོ་ཆེ་གཉིས་ནོར་བ་ཡིན་རྒྱུ་རེད་སྙམ།
གང་ལགས་ཤེ་ན་སྤང་རི་སྣ་རིན་པོ་ཆེ་ ༢༠༠༨ ལོར་དཀར་མཛེས་ནས་བཟུང་བ་དང་དེ་རྗེས་ཁྲིམས་ཐག་བཅད་རྗེས་སི་ཁྲོན་ཕྱོགས་སུ་ཁྲིད་སོང་བ་རེད་ལ་ཆུ་ཤུར་དུ་ཁྲིད་ཡོད་སྐོར་རྩ་བ་ནས་ཤེས་ཀྱི་མེད། བང་རི་རིན་པོ་ཆེ་སྔོན་མ་ནས་ཆུ་ཤུར་ཕྱོགས་སུ་ཡོད་རེད། གནས་ཚུལ་ཡོང་ཁུངས་ལ་བསྐྱར་འདྲི་གནང་ན་ཡག་པོ་ཡོད་པར་མཐོང་།
དྲི་བ་དྲིས་པ་བཟང་གི
ངས་ཀྱང་ཁ་སང་རིན་པོ་ཆེ་ཁོང་གི་མཚན་ལ་གནས་ཚུལ་ཡོང་ཁུངས་གཉིས་ཀྱི་སྟེང་ནས་གཤིབ་བསྡུར་བྱེད་དགོས་བྱུང་། དེ་སྔོན་སྤྱི་འཐུས་དགེ་བཤེས་འཇིགས་མེད་དབང་རྒྱལ་ལགས་ཀྱིས་མཁོ་སྤྲོད་གནང་བའི་གསར་གནས་ཤིག་ཏུ་སྤང་རི་སྣ་རིན་པོ་ཆེ་ཞེས་བྲིས་འདུག་ལ། ཁ་སང་གི་གསར་གནས་མཁོ་སྤྲོད་པས་སྤང་རི་རིན་པོ་ཆེ་ཞེས་བྲིས་འདུག
མཇུག་མཐར་ངས་དགེ་བཤེས་འཇིགས་མེད་དབང་རྒྱལ་གྱིས་མཁོ་སྤྲོད་གནང་བའི་གསར་གནས་ཀྱི་མཚན་དེར་གཞི་བཅོལ་བ་ཡིན། ཇི་ལྟར་བཤད་རུང་དགེ་བཤེས་ཁོང་རིན་པོ་ཆེ་ཁོང་ལ་རྒྱུས་མངའ་ཡོད་རྒྱུ་རེད་ལ། མཚན་ཡང་ཁོང་གིས་གསལ་བོ་ཤེས་ཀྱི་རེད་སྙམ་པས་ཡིན།
གལ་སྲིད་དེ་ཡང་ནོར་འདུག་པ་ཡིན་ཚེ་གསར་འགོད་པ་སྒེར་ངོས་ནས་འབྲེལ་ཡོད་ཡོངས་ལ་དགོངས་དག་ཞུ་བ་དང་མཉམ་དུ། སུས་མཚན་ངོ་མ་ཤེས་ན་འདིར་གསུངས་དང་ཚགས་ཤོག་ནང་འགོད་ནོར་ཐེབས་གི་མ་རེད། དེ་དོན་དགོངས་འཇགས་ཞུ།
གུས་བཅས། ཨ་རིག་གླེན་པས།
ཆུ་ཤུར་མ་ཡིན་པར་ཆུ་ཤུལ་ཟེར་བ་རེད་བསམ། དཔྱད་པར་ཚལ།
སྤང་རི་སྣ་རིན་པོ་ཆེ་ཟེར་བ་རེད་དམ་འབུངས་རི་རིན་པོ་ཆེ་ཟེར་བ་རེད། གསར་འགོད་པ་ཨ་རིག་འགྱུར་མེད་ལགས་ཀྱིས་ཞིབ་བལྟ་ཞིག་བྱེད་རོགས།
དྲན་པར་འོས་པའི་མི་བུ་ཁོ་ཚོལྕགས་སྒྲོག་གི་སུག་དབར་ན་ཡོད་ཀྱང་། དོན་དམ་ཁོ་ཚོ་ནི་ནམ་ཡང་རྒྱལ་ཁའི་མི་བུ་ཡིན།
ཁོ་བ་ཚོའི་ལུས་སྡུག་མྱོང་། ་གཞན་དག་གིས་སྡུག་སྐད་རེ་ཕྱོགས་ཀུན་ལ་རྒྱབ། ད་ལས་དབང་ལ་ཁག་བཞགས་ནས་རང་སེམས་གསོ་ཐབས་རེ་བྱེད།
སྒྲོལ་མ་སྐྱབས་ཀྱི་སྐོར་ལ་ཞིབ་འཇུག་ཡག་པོ་ཞིག་བྱ་ཐུབ་ན་ཅི་མ་རུང་།
ཁོང་ནི་དུས་རབས་གསར་བའི་མཁས་དབང་དགེ་ཆོས་དེ་ཡིན་ནོ།།