གཉིད་ཀྱིས་དྲུད་དེ་མལ་སར་འགྲོ་ཟེར་ཡང་།།
སེམས་ཀྱིས་འཐེན་ནས་དྲ་ངོས་འཛུལ་རོགས་ཟེར།།
མཐའ་མར་་སེམས་ཀྱི་ཤུགས་ལ་དབང་བཙན་སྟབས།།
དྲ་ངོས་འདི་ལ་ལྷོད་ཀྱིས་ཞུགས་ཁུལ་བྱས།།
ཟིན་བྲིས་མ་ཀློག་ཉིན་མ་གཉིས་གསུམ་སོང་།།
ཟིན་བྲིས་མ་སྤེལ་ཉིན་གཉིས་གསུམ་བཞིའི་བར།།
ཟིན་བྲིས་སྐོར་ལ་བསམ་གཞིགས་བྱེད་ཐེངས་རེར།།
ཟིན་བྲིས་རང་གི་ཟ་བཏུང་ལྟ་བུ་རེད།།
མེད་ན་མི་སྐྱིད་སེམས་ཀྱི་ཟས་ཤིག་རེད།།
ཡོད་ན་དཀའ་ཡི་དུས་ཚོད་ཁོམ་ལོང་དཀོན།།
ཡོད་མེད་དགའ་སྡུག་བསྲེས་པའི་འཚོ་བའི་ནང་།།
གཉིས་ཀྱི་བར་མཚམས་ཤིག་ན་གསོན་ཙམ་རེད།།
བོད་ཀྱི་སྙིང་རྩ་ཡོད་པར་འདོད་ན་ཡང་།།
བོད་དོན་ཏུལ་འབྲུ་ཙམ་ཡང་མ་སྒྲུབ་པར།།
ཁ་དང་ལྟོ་བའི་ཆེད་དུ་ཕྱི་ལ་ཉུལ།།
ཕྱི་ཡི་གྲོང་ནས་གཞན་མིའི་བྲན་དུ་གྱུར།།
དངུལ་སྒོར་ཡོང་བབས་ཡོད་པ་བདེན་ན་ཡང་།།
ཟ་བཏུང་འགྲོ་འདུག་ཕྱོགས་ཀྱི་ཆ་རྐྱེན་ནི།།
ཡུལ་ལུང་རྒྱ་གར་དང་ཡང་བསྡུར་ཐབས་མེད།།
འགྲོ་འདུག་གང་ཅིའི་ཐད་ལ་སྟབས་བདེ་ཡིན།།
ཕྱི་ལ་འགྲོ་ན་མཛའ་མོའི་རླངས་འཁོར་ཡོད།།
ནང་དུ་བསྡོད་ན་འཕྲུལ་བཟོས་ཟས་རིགས་མང་།།
ཕྱི་ལ་གོམ་པ་རྒྱག་དགོས་དཀའ་ངལ་མེད།།
ནང་ལ་ཟས་གོས་མི་འདང་སེམས་འཁྲལ་མེད།།
ཕྱི་ཡུལ་སྐྱིད་རབས་བཤད་ན་འདི་འདྲ་རེད།།
ཕྱི་ཡུལ་བཟང་རབས་བཤད་ན་དེ་འདྲ་རེད།།
ཡིན་ཡང་རང་དབང་ཟེར་བའི་ལྷོད་ལྷོད་དང་།།
མི་དང་མི་ཡི་བར་གྱི་འདུ་ཤེས་ཤིག།
ཉེ་དུ་གྲོགས་པོ་འཛོམ་ནས་དགའ་སྐྱིད་དང་།།
སེམས་དང་བསམ་པ་བསྲེས་ནས་གླེང་མོལ་དང་།།
གཅིག་གྲོགས་གཅིག་གིས་བྱེད་པའི་གོམ་གཤིས་སོགས།།
འདི་ན་བཙལ་ཡང་རྙེད་པ་རི་བོང་རྭ།།
སྐར་ཆའི་རྗེས་སུ་སེམས་ཀྱིས་མ་ཆོད་པར།།
སེམས་ཀྱི་རྗེས་ལ་ལུས་པོའི་མ་གཉོབ་པར།།
ཉིན་མཚན་མེད་པར་མི་ཚེ་ཐུང་ཐུང་དེ།།
རྟག་དུ་བྲན་གཡོག་བྱེད་པ་ཨ་རེ་སྐྱོ།།
ཉིན་ཁ་ཤས་ཤིག་གི་རིང་ལ་གུང་གསེང་དུ་མཚོ་དམར་པོའི་འགྲམ་དུ་སོང་བ་ཡིན། དེར་འགྲོ་ཁར་མཛའ་མོའི་ང་ལ་རེ་སྐུལ་ཞིག་ཞུས་པ་དེ་ནི་ལག་ཁྱེར་གློག་ཀླད་མ་འཁྱེར་རོགས། ང་ཚོ་སོང་ནས་ལྷོད་ལྷོད་ཅིག་བསྡོད་ཟེར་བའི་ངོ་གདོང་ལ་བལྟས་དེ་བཞག་པ་ཡིན། དོ་ནུབ་ཕྱིར་སླེབས་དུས་དངོས་ནས་ཐང་ཆད་ཡོད་ཀྱང་། དྲ་ཐོག་གི་གནས་ཚུལ་དག་ཤེས་འདོད་ཀྱིས་འདྲུད་དེ་འོང་བའི་སྙན་ངག་འདི་གཉོབ་སྣང་དང་བཅས་དེ་བྲིས་པ་ཡིན།
བསྟན་འཛིན་ཚེ་འཚོ་ལགས། བདག་གིས་སྐད་ཆ་ཞིག་ཉིད་ལ་བཤད་ནོར་བྱས་པ་ལྟ་བུ་ཞིག་ཉིད་ནས་གསུངས་ཀྱི་འདུག གལ་སྲིད། ཉིད་ལ་ཚིག་དེ་འདྲ་ཞིག་གིས་འཕོག་ཐུག་འདྲ་ཤོར་ཡོད་ན་དགོངས་དག་ཞུས་པ་ཡིན། བདག་གིས་དུས་རྒྱུན་དུ་བུད་མེད་ཀྱི་ལས་དབང་ལ་མཐོང་ཆེན་དང་བརྩི་བཀུར་བྱེད་ཀྱི་ཡོད་པ་ལས། ནམ་ཡང་ངན་དུ་བལྟ་བ་དང་མཐོང་ཆུང་བྱེད་འདོད་མེད་ལགས། ཉིད་ནི་དངོས་ནས་བུད་མེད་ཅིག་ཡིན་ཚེ། དེ་བས་ཀྱང་དགའ་བསུ་ཡོད། ངེད་ཀྱི་ཟིན་བྲིས་སུ་ཡང་ཡང་ཕེབས་པ་དེར། ངས་དེ་ལྟར་ཞུ་དོན་ནི་དེང་སང་དྲ་ངོས་འདི་ན་སྐྱེ་བ་བུད་མེད་ཀྱི་མིང་འཁུར་མཁན་མི་ཉུང་བ་ཞིག་ཡོད་པས་ཡིན། དེ་མིན་གང་ཡང་མེད།
ཕུན་ཚོགས་ལགས། ཉིད་ནས་དེ་ལྟར་གསལ་བཤད་ལྷུག་པོར་བྱས་པ་སྐུ་དྲིན་ཆེ་ལགས། རྗེས་སུ་ཡང་དེ་ལྟར་ལམ་སྟོན་རེ་དང་བསམ་ཚུལ་ལྷུག་པོར་གསུང་དུ་ཕེབས་ཤོག་ཨ་་་ སྒོ་ཕྱེ་ནས་བཞག་ཡོད་
གྲོགས་བོད། ཤ་ཁྲག་རུས་གསུམ་ལགས། ཉིད་ཀྱིས་<མཚམས་རེར་ཉིད་ཀྱིས་སྐད་ཆ་བཤད་ཕྱོགས་སུ་བལྟས་ན་བུད་མེད་ཅིག་ལོས་ཡིན་བསམ་པ་ཞིག་གི་ཚོར་བ་སྟེར་གྱི་འདུག་>ཞེས་གསུངས་པ་དེ་ལ། ང་རང་ཅུང་ཐེ་ཚོམ་དང་ཡིད་མ་རངས་བ་ཞིག་བྱུང་། གང་ཡིན་ཟེར་ན་ཉིད་ནས་བུ་མོ་རྣམས་དྲ་ཐོག་ལ་ཡོང་དཀོན་པ་དང་། ཡང་ན་ཡོང་བའི་འཇོན་ཐང་མེད་པ། ཡོད་ཀྱང་ལབ་གླེང་གི་སྐད་ཆ་ཉུང་བ་ཞིག་ལ་གཞི་བཅོལ་ནས་ང་མོ་ཞིག་ཡིན་མེད་ཀྱི་དོགས་པ་སྐྱེ་བ་ཡིན་ནམ། འོ་ན་ལྟ་ཚུལ་གང་གི་ཐོག་ནས་ཐེ་ཚོམ་བྱེད་དགོས་པ་བྱུང་ངམ། གང་ལྟར་ཉིད་ནས་ཀྱང་བུ་མོ་ཚོ་ལ་ལྟ་ཚུལ་ཧ་ཅང་དམའ་བོ་ཞིག་བཟུང་འདུག སྐབས་འདིར་ངས་ང་བུ་མོ་ཞིག་ཡིན་ཞེས་དྲ་ཐོག་ལ་གསལ་བཤད་བྱེད་དགོས་པ་མིན་ནམ་སྙམ།
སེམས་ཀྱིས་དྲུད་དེ་ཟེར་དགོས་རྒྱུ་རེད་པ། སེམས་ཀྱིས་འདྲུད་དེ་ལབ་ན་ཅུང་བདེ་བོ་མི་འདུག་སྙམ། རྩོམ་བྱང་མཐོང་འཕྲལ་སྐད་འདི་བཞག་པ་ཡིན། དེ་མིན་དྲ་ཚིགས་ལ་ཞུགས་རྒྱུ་ཞེ་དྲག་དགའ་བོ་ཡོད་པ་ནི་སུས་ཀྱང་དགའ་བསུ་བྱ་དགོས་ས་དེ་ཡིན།
ནཱ་གྷཱ་རཀྵ་ལགས། ཉིད་རང་སྐུ་མགྲོན་ཐོག་མ་བྱས་དེ་ཕེབས་པ་དེར་དགའ་ཡོད་ལགས། རྗེས་སུ་ཡང་ཕེབས་རྒྱུ་མ་བརྗེད་ཅིག བསམ་ཚུལ་བཟང་ངན་གང་ཡིན་ཡང་ཡག་ཉེས་ཤིག་གསུང་རོགས་ཞུ།
ཨ་བཙན་པོ་ལགས། ཉིད་ཀྱིས་བརྡ་འཕྲིན་ཐུང་ཐུང་འདི་ཀློག་ཟིན་པ་ཡིན། བཀའ་དྲིན་ཆེ། རྒྱང་རིང་ས་ཞིག་ནས་ཡོད་དུས། ཚོགས་ཐོག་དངོས་ལ་འགྲོ་རྒྱུའི་བསྐལ་བ་མེད་ཀྱང་། དུས་ཚོད་དམ་འཛིན་གྱིས་དྲ་ངོས་ནས་ཀློག་ཐུབ་པར་ཡིད་ཆེས་ཡོད།
བསྟན་འཛིན་ཚེ་འཚོ་ལགས། མཚམས་རེར་ཉིད་ཀྱིས་སྐད་ཆ་བཤད་ཕྱོགས་སུ་བལྟས་ན་བུད་མེད་ཅིག་ལོས་ཡིན་བསམ་པ་ཞིག་ཚོར་བ་སྟེར་གྱི་འདུག ཡིན་ཡང་། ཉིད་ནས་བུད་མེད་ཀྱི་མིང་ཞིག་འཁུར་ནས་ངེད་ཀྱི་ཟིན་བྲིས་སུ་ཐེངས་མི་ཉུང་བ་ཞིག་ལ་ཕེབས་པ་དེར་དགའ་ནས་ཡོད། རྗེས་ཕྱོགས་ཀྱང་སྐྱེ་བ་དང་བུད་མེད་ཀྱི་བར་ལ་བཤད་འདོད་པའི་སྐད་ཆ་གོང་གི་དེ་འདྲ་ཡོད་ན་གསུང་རྐྱང་བྱོས། ངས་ཉན་ནས་འདུག
གྲོགས་ལགས། ངོ་མ་ཨ་ཐང་ཆད་འདུག དྲང་མོར་ཡིན་ཚེ་གྲོགས་ཀྱི་འདོད་ཕྱོགས་དང་བསྟུན་དགོས་པ་རེད། སྐྱེས་པ་ཚོ་ལ་ངན་ཞིག་དང་འཁྱོག་ཞིག་ཡོད་པ་ནི། རང་ཉིད་ཁོ་ན་ལ་བསམ་བློ་གཏོང་བ་ལས་ཚེ་ཡ་ལ་བསམ་ཞིབ་དེ་འདྲ་མི་བྱེད་པ་དེ་ཡིན། ད་ཐེངས་ཁྱོད་ཀྱིས་བསྒྲུབ་པ་འགྲིག་འདུག
དྲ་གྲོགས་ལགས་ཕྱི་ལོ་ 2010 ཟླ 9 ཚེས་ 26 རེས་གཟའ་ཉི་མའི་ཉིན་གྱི་ཕྱི་དྲོ་དུས་ཚོད་གཅིག་དང་ཕྱེད་ཀའི་སྟེང་བོད་གཞུང་ཟློས་གར་ཁང་དུ་སཱ་ར་མཐོ་སློབ་དང་། ནོར་གླིང་མཐོ་སློབ། སྨན་རྩིས་ཁང་མཐོ་སློབ་བཅས་ཀྱི་དང་བླངས་སློབ་མ་ཁག་གིས་མི་རབས་གསར་པའི་བཀའ་ཁྲིའི་བགྲོ་གླེང་ཞེས་པ་ཞིག་བཀོད་བསྒྲིགས་བྱས་འདུག ཞིབ་ཕྲའི་གནས་ཚུལ་ཤེས་འདོད་ན་གུས་པས་ཟིན་བྲིས་སུ་ཕེབས་པར་ཞུ། ཟིན་བྲིས་ཁ་བྱང་https://tibettimes.net/wordpress/blogs.php?id=305&post_id=11689
ཕྱིར་དྲ་ཐོག་ཡོང་བར་དགའ་ཡོད། ཁྱེད་རང་མེད་དུས་རྩོམ་ཡིག་ཀློག་རྒྱུར་ཇེ་ཉུང་ལ་སོང་བ་རེད། ཁྱེད་རང་ཡོད་དུས་རྩོམ་ཡིག་ཀློག་རྒྱུར་ཇེ་མང་ལ་སོང་བ་རེད། ང་རྩོམ་ཡིག་མང་པོ་ཀློག་རྒྱུར་དགའ་བོ་ཡོད། དེ་ཙང་ཕྱིར་སླེབས་པ་དགའ་ཡོད། གུང་སེང་སྐྱིད་ཞིག་བྱུང་ཡོད་པའི་སྨོན་མདུན་ཞུ།