ན་གཞོན་རྩོམ་པ་པོ་སྒྱིས་ཚང་སྟག་སྨྲིག་ལགས་ཟླ་འདིའི་ཕྱི་ཚེས་ ༡༥ ཉིན་ཀློད་གྲོལ་བཏང་ཡོད་འདུག སྒྱིས་ཚང་སྟག་སྨྲིག་ལགས་ཀྱིས་ཕྱི་ལོ་ ༢༠༠༩ ཟླ་ ༧ ཚེས་ ༡༨ ཉིན་༼ བོད་ལ་རང་དབང་མེད་པའི་སྐོར་གྱི་སྙན་ཞུ ༽ཞེས་པའི་བརྙན་འཁོར་འོད་སྡེར་ཞིག་བོད་ཕྱི་ནང་གཉིས་སུ་འགྲེམས་སྤེལ་བྱས་རྗེས། ལོ་གཅིག་ལྷག་རིང་ཁོང་ཡར་མར་བྲོས་བྱོལ་གྱིས་སྦེད་སྐུང་བྱས་བསྡད་ཀྱང་། མཐར་ ༢༠༡༠ ཟླ་ ༧ ཚེས་ ༢༧ ཉིན་རྒྱ་གཞུང་ཉེན་རྟོག་པས་འཛིན་བཟུང་བྱས་ཡོད། དུས་དེ་ནས་བཟུང་ནང་མི་གཉེན་འབྲེལ་སོགས་ཀྱིས་ཁོང་གར་ཡོད་ཅི་ཆགས་ཀྱི་གནས་སྟངས་ཟུར་ཙམ་ཡང་ཤེས་རྟོགས་མ་ཐུབ་ལྷག་ཡོད།
ཟླ་འདིའི་ཕྱི་ཚེས་ ༡༥ ཉིན་གློ་བུར་དུ་ཁོང་ཀློད་གྲོལ་བཏང་ཡོད་འདུག་ཀྱང་། ཁོང་ཀློད་གྲོལ་བཏང་བ་དེ་ཟླ་དྲུག་གི་རིང་ལྟ་རྟོག་འོག་ལ་ཚོད་ལྟ་བྱ་རྒྱུ་དང་། ད་ནས་བཟུང་ཁོང་གིས་ཆབ་སྲིད་ཀྱི་ལས་ཀ་བྱེད་མི་ཆོག་པ་མ་ཟད། ཁ་པར་གྱི་ཨང་གྲངས་བརྗེ་མི་ཆོག་པ་དང་། ཆབ་སྲིད་དང་འབྲེལ་བའི་ལས་དོན་སོགས་ཀྱི་མགོ་ཁྲིད་དང་མཉམ་ཞུགས་བྱ་མི་ཆོག་པ་སོགས་ཀྱི་ཆ་རྐྱེན་ཡང་བཞག་ཡོད་འདུག
ཕྱི་ཟླ་ ༩ ཚེས་ ༢༦ ཉིན་རྩོམ་པ་པོ་ཁོང་གི་ངོ་ཤེས་གྲོགས་པོ་འགའ་རེ་དང་སྒྱིས་ཚང་ས་གནས་ཀྱི་གཞོན་སྐྱེས་ ༤༠ ཙམ་རྨད་ཤེས་ཞང་སྲིད་གཞུང་དུ་ཕྱིན་ཏེ། ཁོང་གར་ཡོད་ཤེས་འདོད་ཡོད་པའི་རེ་འདུན་བཏོན་ཡོད་པ་མ་ཟད། ཁོང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྡོད་དམངས་ཤིག་ཡིན་པའི་ཆ་ནས་ང་ཚོར་བརྩད་གཅོད་བྱེད་པའི་ཐོབ་ཐང་ཡོད་སྐོར་དང་། དེ་ལུགས་སྲིད་གཞུང་ནས་ཀྱང་ལན་ཡག་པོ་ཞིག་གནང་རོགས། གལ་སྲིད་ཁོང་གར་ཡོད་ཤེས་ན་ཁོང་ལ་ཉལ་ཆས་དང་བཟའ་བཏུང་རེ་སྐྱེལ་འདོད་པ་དང་། ང་ཚོའི་ངོས་ནས་ད་ལྟ་སྐད་ཆ་ཡག་པོ་བཤད་དེ་ཞུ་བ་བྱེད་ཀྱིན་ཡོད་སོགས་བརྗོད་སྐབས། དེ་མ་ཐག་ཤང་སྲིད་གཞུང་གིས་ཁོང་ཚོ་ལ་ཁྱེད་ཚོ་ད་ལྟ་རང་སར་ལོགས་རྒྱུགས། ང་ཚོས་གང་མགྱོགས་ཡར་ཞུ་བྱས་ཏེ་བརྩད་གཅོད་བྱ་ངེས་ཡིན། ཁྱེད་ཚོ་ཡང་བསྐྱར་འདི་ལྟར་མ་ཡོང་། གལ་སྲིད་ཡོང་ན་ཡག་པོ་མེད་སྐོར་བཤད་འདུག
རྗེས་སུ་གནས་ཚུལ་ཤེས་རྟོགས་བྱུང་བ་ལྟར་ན། དང་ཐོག་ཁོང་འཛིན་བཟུང་བྱས་མ་ཐག་ལན་ཀྲུའུ་ཉེ་འཁྲིས་ཀྱི་བཀག་སྐྱིལ་ཁང་ཞིག་ཏུ་ཁྲིད་ཡོད་པ་དང་། དེའི་རྗེས་བཱ་ཚེ་དང་གཙོད་སོགས་ལ་བརྗེ་སྤོར་གྱིས་རྡུང་རྡེག་མནར་གཅོད་དང་། ཞི་དྲག་གི་འདྲི་བརྩད་ཐེངས་མང་བྱས་ཡོད་འདུག
ཐོག་མ་གངས་ཅན་པའི་དཔའ་རྒོད་སྒྱིས་ཚང་སྟག་སྨྲིག་ལགས་ལ་མཚམས་འདྲི་བཀྲིས་བདེ་ལེགས་དང་སྒྲགས་སྐུ་ཉིད་ཀི་སྐུ་གཟུགས་གསལ་ཐང་ཡིན་པའི་སྨོན་འདུན་ཞུ།
གངས་ཅན་ལྗོངས་ལ་བུ་རྒོད་ཁྱེད་དང་ཁྱེད་ལྟ་བུ་མང་པོས་རང་སྲོག་བློས་གཏོང་གྱིས་རང་མི་རིགས་ཀྱི་བདེ་བསྡུག་ཕྲག་དུ་ཁུར་ནས་རང་གི་སེམས་འདུན་དངོས་མ་དེ་ཕྱིར་མངོན་ཆེད་དེབ་དང་འོད་སྡེར་ཡང་ན་སྐད་འབོད་སོགས་ཐབས་ལམ་འདྲ་མིན་གྱི་སྒོ་ནས་གནས་ལུགས་བཤད་པ་ལ་ང་བོད་པའི་མིང་ཙམ་ཁུར་བའི་ཕྱི་སྡོད་པའང་བཙན་བྱོལ་བ་ཞིག་གིས་ཡི་རང་ཞུ་བཞིན་ཡོད། ཨ་མའི་བུ་རྒོད་ཤུ་རེ་བྱས་དང་ང་ཚོའི་འོད་སྣང་དེ་ཕྱིར་མངོན་ལ་ཉེ། ཡིན་ན་ཡང་སྲིན་བྱ་མགོ་སྒམ་དེ་དག་ལ་དོག་ཟོན་མཛོད།
ད་མུ་མཐུད་ཆབ་སྲིད་བཙོན་པ་ཚོ་ཀློད་གྲོལ་ཡོང་བའི་རེ་བ་ཡོད།
སྟག་སྨྲིག་ལགས་འཚམས་འདྲི་ཞུ།
སྒྱིས་ཚང་སྟག་སྨྲིག་ལགས་ཀླ་ཀློའི་ལག་དམར་བའི་མཚོན་འོག་ནས་གནས་སྐབས་མཐར་བར་མཚམས་འདྲི་དང་བཀྲ་ཤིས་ཡོད་ལ་སྐུ་ཉིད་ཀྱི་སྐུ་གཟུགས་ལ་ཀླ་ཀློའི་ནག་གྲིབ་རེ་ཡང་མ་ཕོབ་པའི་རེ་བ་ཡོད་ལ་དོན་རྐྱེན་དེས་སྐུ་ཉིད་ལ་སྔར་ལས་ལྷག་པའི་སེམས་ཤུགས་འཕར་རྒྱུར་སྐུལ་བཅག་ཞིག་ཀྱང་བྱུང་ངེས་ལགས། སླད་མར་ཡང་རྒྱ་དམར་བཤན་པ་ཚོས་དངོས་ལྐོགས་གཉིས་ཀྱིས་སྐུ་ཉིད་ལ་ཐུགས་བསུན་བཟོ་ངེས་ཡིན་པས་ལྷད་མེད་ཀྱི་སེམས་ཤུགས་སོགས་ལ་གཅེས་སྤྲས་གནང་རོགས།