ཟླ་འདིའི་ཕྱི་ཚེས་ ༡༣ ནས་ ༡༤ ཉིན་བར་པེ་ཅིན་ཀྲུང་དབྱིང་མི་རིགས་སློབ་གྲྭ་ཆེན་མོ་རུ། ༼ སྐབས་བརྒྱད་པའི་རྒྱལ་ཡོངས་སློབ་གྲྭ་ཆེན་མོའི་བོད་སྐད་ཡིག་དང་རྩོམ་རིག་ཆེད་ལས་བྱ་བའི་གྲོས་ཚོགས ༽ ཟེར་བ་དེ་ཚོགས་ཡོད་ཅིང་། ཚོགས་འདུའི་སྐུ་མགྲོན་གཙོ་བོར་ཀྲུང་དབྱིང་མི་རིགས་སློབ་ཆེན་གྱི་སློབ་གཙོ་གཞོན་པ་ཤེས་རབ་ཉི་མ་དང་བོད་རིག་པའི་མཁས་པ་ཝང་ཡུའུ། བོད་རིག་པའི་ཞིབ་འཇུག་ཁང་གི་གཙོ་འཛིན་ཚེ་རིང་ཐར་སོགས་ཕེབས་ཡོད་འདུག་ལ། ཚོགས་བཅར་བའི་ཁྲོད་དུ་ཀྲུང་དབྱིང་མི་རིགས་སློབ་ཆེན་དང་བོད་ལྗོངས་མི་རིགས་སློབ་ཆེན། ལྷོ་ནུབ་མི་རིགས་སློབ་ཆེན། ནུབ་བྱང་མི་རིགས་སློབ་ཆེན། མཚོ་སྔོན་མི་རིགས་སློབ་ཆེན། ཡུན་ནན་མི་རིགས་སློབ་ཆེན། ཟི་ཁྲོན་མི་རིགས་སློབ་གླིང་དང་མཚོ་སྔོན་དགེ་འོས་སློབ་གླིང་། མཚོ་སྔོན་གསོ་རིག་སློབ་གླིང་། ཀན་སུའུ་མི་རིགས་དགེ་ཐོན་སློབ་གླིང་བཅས་ཀྱི་བོད་རིགས་སྐུ་ཚབ་འཐུས་མི་ཉི་ཤུ་ཙམ་ཚོགས་ཞུགས་གནང་ཡོད་འདུག
ཚོགས་འདུ་དེའི་སྟེང་། བོད་སྐད་ཡིག་གི་སློབ་ཁྲིད་ཁྲོད་ཀྱི་མིང་བརྡ་གསར་པ་ཁག་གཅིག་ཚད་ལྡན་དུ་བསྒྱུར་བཅོས་བྱས་ཡོད་འདུག་ལ། བརྡ་འཕྲིན་དང་བསྙན་སྦྱོར་སོགས་ཀྱི་དེང་རབས་ཅན་གྱི་སློབ་ཁྲིད་ཡོ་བྱེད་དག་བོད་སྐད་ཡིག་གི་སློབ་ཁྲིད་ཁྲོད་ཇི་ལྟར་བཀོལ་སྤྱོད་བྱེད་ཕྱོགས། ད་ལྟ་བོད་སྐད་ཡིག་སློབ་ཁྲིད་དང་རྩོམ་རིག་ཆེད་ལས་སློབ་ཁྲིད་ཁྲོད་ཀྱི་དཀའ་ངལ་རིགས་སེལ་ཐབས་བྱེད་ཕྱོགས་བཅས་ཀྱི་ཐད་བགྲོ་གླིང་གནང་ཡོད་ཅིང་། གཞུག་ཕྱོགས་ཐེངས་འདིའི་གྲོས་ཚོགས་མཚན་བྱང་བཅོས་བསྒྱུར་བྱས་ཏེ། ༼ རྒྱལ་ཡོངས་སློབ་གྲྭ་ཆེན་མོའི་བོད་སྐད་ཡིག་སློབ་ཁྲིད་བྱ་བའི་གྲོས་ཚོགས ༽ ཞེས་གཏན་འབེབས་བྱས་ཡོད་འདུག
གསར་འགོད་པ། དོན་འགྲུབ་བཀྲ་ཤིས།
དོན་ངོ་མ་་བོད་ཀྱི་སྐད་ཡིག་དང་རྩོམ་རིག་སྐོར་གྱི་ཚོགས་འདུ་ཞིག་ཡིན་ན་བཀྲིས་བདེ་ལེགས་ཡོད
ཀྲུང་དབྱང་འབྲི་སྟངས་ཨ་ཁུ་དམུ་དགེ་ཚང་གིས་དགོངས་པ་དང་འགལ་འདུག
འདི་ལ་དོན་དག་ཡག་པོ་ཞིག་ངོས་འཛིན་ཐུབ་མ་སོང་།དགོངས་དག་ཞུ།