གཅན་ཚའི་སློབ་ཕྲུག་གི་སྐད་འབོད

ཕྱི་ལོ་ ༡༩༥༡ ལོའི་ཡར་སྔོན་ནས་བོད་ཀྱི་ཁམས་ཕྱོགས་ས་ཁུལ་དུ་རྒྱ་མིའི་བཙན་འཛུལ་དང་འཇིགས་སྐུལ་སླེབས་དུས་དབུས་གཙང་ཚོས་བལྟད་མོ་བལྟས།

དབུས་གཙང་དུ་བཙན་གནོན་སླེབས་དུས་ཨམ་མདོ་ཚོས་ཡང་བལྟད་མོ་བལྟས།

ཨམ་མདོར་བཙན་ཤེད་སླེབས་དུས་ཁམས་པས་བལྟད་མོ་བལྟས་ཏེ་ཆོལ་ཁ་གསུམ་གྱིས་གཅིག་ལ་རྒྱ་མིའི་བཙན་ཤེད་སླེབས་ཕྱོགས་ཚང་མས་མཉམ་རུབ་དང་གདུང་སེམས་མཉམ་སྐྱེད་ངང་བོད་ཆིག་བསྒྲིལ་མ་བྱས་པའི་ཉེར་ལེན་གྱིས་ང་ཚོས་རྒྱ་མིའི་བཙན་གནོན་མྱངས་དང་མྱོང་བཞིན་ཡོད།

ཕྱི་ལོ་ ༢༠༠༨ ནས་བཟུང་ད་ལྟ་བོད་རིགས་ཚང་མ་གཅིག་ཏུ་བསྒྲིལ་བའི་བོད་སྤྱིའི་རྩ་དོན་ལ་ཆིག་སྒྲིལ་གྱི་སྟོབས་ཤུགས་གཅིག་མངོན་བཞིན་ཡོད།

ཡིན་ནའང་ང་ཚོས་རྒྱ་མི་རིགས་ལ་གུས་བརྩི་དང་མཐུན་སྒྲིལ་བྱེད་དགོས་ལ་རྒྱ་ནག་གིས་གཡོན་ཐལ་ཆེ་བའི་སྲིད་ཇུས་དེ་དག་ལ་ཞི་བའི་ངོ་རྒོལ་ཕྱོགས་བཞི་མཚམས་བརྒྱད་དང་ཕྱི་ནང་བོད་རིགས་སྤྱི་ཡོངས་ཀྱིས་༸ གོང་ས་མཆོག་གི་བཀའ་དགོངས་སྤྱི་དང་མཐུན་པར་མི་རིགས་འདྲ་མཉམ་དང་སྐད་ཡིག་འདྲ་མཉམ་བེད་སྤྱད་དགོས་པའི་དགོས་འདུན་འདོན་དགོས།

སློབ་དགེ་ཚོས་རྒྱ་བོད་མི་རིགས་འདྲ་མཉམ་དང་། སྐད་ཡིག་འདྲ་མཉམ། མཐུན་སྒྲིལ་གྱི་གོང་བུ་ས་ཞིང་བརྟན་ཕྱིར་ཆེས་རླབས་ཆེན་གྱི་བྱ་གཞག་འདི་འདྲ་རྩོམ་བཞིན་ཡོད་པར་དེར་དགའ་བསུ་དང་འབྲེལ་བསྔགས་བརྗོད་ཀྱི་མེ་ཏོག་འཛམ་གླིང་ས་ཕྱོགས་གང་ས་ནས་གཏོར་བཞིན་ཡོད།

བོད་ནང་དུ་སློབ་ཕྲུག་དག་གིས་ལྷག་བསམ་ལ་དགའ་བའི་རྗེས་སུ་ཡི་རངས་ཞུ་བཞིན་ཡོད། འོན་ཀྱང་རྒྱ་ནག་གིས་ཆབ་སྲིད་ཀྱི་ངོ་བོར་བསྒྱུར་མི་ཡོང་ངམ་སྙམ་པའི་སེམས་ཁྲལ་ཞིག་རང་བཞིན་ཏུ་ཡོང་གི་འདུག དེ་བསྒྱུར་ན་གྲངས་ཉུང་མི་རིགས་དག་གི་སློབ་ཕྲུག་རྣམས་རྩ་མེད་བཏང་རྒྱུ་ལས་མེད་དོ།།

བོད་ཀྱི་སྐད་ཡིག་རྩ་མེད་དུ་གཏོང་བའི་རྒྱ་ནག་གི་༼སྐད་གཉིས་སློབ་གསོ་བཅོས་བསྒྱུར༽་ཟེར་བ་ལ་ངོ་རྒོལ་བྱེད་པའི་སྐད་འབོད་ཀྱི་ཚ་རླབས་དེ་གཅིག་རྗེས་གཉིས་མཐུད་ཀྱིས་བོད་ཁུལ་ཡོངས་སུ་ཁྱབ་ནས་མི་རིགས་ཀྱི་ལ་རྒྱ་དེ་མངོན་པར་བྱས་ཡོད། སྐད་གཉིས་སློབ་གསོ་ཟེར་བ་དེ་ནི་བོད་ཀྱི་སློབ་གྲྭ་ཆུང་འབྲིང་ཁག་གི་ནང་དུ་རྒྱའི་སྐད་ཡིག་བེད་སྤྱོད་བྱེད་པ་ལས་བོད་ཡིག་བཀོལ་སྤྱོད་མི་ཆོག་པ་དང་རིན་ཐང་མེད་པར་བཟོས་ཏེ་མི་རབས་རྗེས་མ་རྣམས་འཚར་ལོངས་བྱུང་པར་འགོག་རྐྱེན་བཟོ་ཡི་ཡོད་པས་ངོ་རྒོལ་གྱི་ཚ་རླབས་དེ་བྱུང་བ་རེད། ཡིན་ནའང་། བཙན་བྱོལ་སྤྱི་ཚོགས་ཁྲོད་ཀྱི་ཚོགས་སྡེ་ཁག་རྣམས་འགུལ་སྐྱོད་ཅི་ཡང་མེད་པར་ཞལ་བཙུམས་ནས་བཞུགས་དགོས་པའི་རྒྱུ་མཚན་ཅི་རེད། །
གཤམ་དུ་གསར་འགོད་པའི་དྲི་བ་ཞིག་ལ་ལྦང་ཡུ་པོས་ལན་འདེབས་བྱས་པ་ཞིག་དྲྭ་གྲོགས་ཤིག་གི་རེ་བ་ལྟར་བདག་གིས་རྒྱ་ཡིག་ནས་བོད་ཡིག་ལ་བསྒྱུར་ཡོད།
གསར་འགོད་པས། རང་ཞིང་གི་༼སྐད་གཉིས༽་སློབ་གསོ་བཅོས་བསྒྱུར་ལག་བསྟར་བྱེད་པའི་རྩ་བའི་རྩ་དོན་དེ་གང་ཡིན་ནམ།
ལྦང་ཡུ་པོས། ༼སྐད་གཉིས༽་སློབ་ཁྲིད་བཅོས་བསྒྱུར་གྱི་ཁ་ཕྱོགས་ངེས་གཏན་ཟིན་པ་ཡིན། ཡིན་ན་ཡང་། དེ་ལག་ལེན་དུ་བསྟར་བར་རིམ་བགྲོད་ཀྱི་གོ་རིམ་ཞིག་བརྒྱུད་དགོས་པ་སྟེ། འགྲུབ་སླ་བ་ཞིག་གཏན་ནས་མིན། བརྒྱུད་རིམ་དེའི་ཁྲོད་དུ་ངེས་པར་དུ་ཁ་ཕྱོགས་རྒྱུན་འཁྱོངས་དང་། ཁྲིམས་ལྟར་གོ་རིམ་ལྡན་པ། ཡུལ་བབ་དང་བསྟུན་པ། གོམ་པ་བརྟན་པོས་སྐུལ་འདེད། ཆོས་ཉིད་བརྩི་སྲུང་། རེ་འདུན་བརྩི་བཀུར། ཧུར་བརྩོན་གྱིས་སྣེ་ཁྲིད་པ། ཆ་རྐྱེན་བསྐྲུན་པ་བཅས་ཀྱི་རྩ་འཛིན་སྲུང་དགོས་ལ། དྲང་ངོས་ནས་སྣེ་ཁྲིད་པར་རྒྱུན་འཁྱོངས་བྱས་ཏེ། རིགས་སོ་སོའི་མི་དམངས་དང་དགེ་སློབ་ཚང་མས་༼སྐད་གཉིས༽་སློབ་གསོའི་བཅོས་བསྒྱུར་འཕེལ་རྒྱས་ཀྱི་གལ་གནད་ཤེས་རྟོགས་ཐུབ་པ་བྱེད་དགོས། དེར་མ་ཟད། བྱིས་པའི་དུས་ཀྱི་སྐད་ཡིག་སློབ་སྦྱོང་བྱེད་པའི་གོ་སྐབས་ཡག་པོ་དེ་བེད་སྤྱོད་ཀྱིས་རྒྱ་ཡིག་དང་མི་རིགས་ཀྱི་སྐད་ཡིག་སློབ་པར་ཤུགས་སྣོན་བརྒྱག་དགོས། རྨང་གཞི་དེའི་སྟེང་། ས་ཁུལ་མི་འདྲ་བའི་དངོས་ཡོད་གནས་ཚུལ་ལ་བསྟུན་ཏེ། བཅའ་ཁྲིམས་ལྟར་ནུས་པ་ལྡན་པ། བརྒྱུད་རིམ་ལྡན་པའི་སྒོ་ནས་སྐུལ་འདེད་བཅས་ཀྱིས་རང་ཞིང་གི་༼སྐད་གཉིས༽་སློབ་གསོར་བཅོས་བསྒྱུར་བྱེད་དགོས། སློབ་གསོའི་སློབ་ཁྲིད་ཀྱི་ཆོས་ཉིད་དང་སློབ་མའི་སློབ་སྦྱོང་གི་འཚར་ལོངས་དང་ལེན་བྱེད་དགོས། སློབ་མ་དང་ཁྱིམ་བདག་གི་བསམ་ཚུལ་དང་རེ་འདུན་ལ་གང་ལེགས་ཀྱིས་ཉན་པ་དང་བརྩི་འཇོག་ཞུ་དགོས། ཆ་རྐྱེན་འཛོམས་སར་བདེ་བླག་ངང་སྐུལ་འདེད་དང་། ཆ་རྐྱེན་མི་འཛོམས་སར་དངོས་ཡོད་གནས་ཚུལ་ལ་བརྩི་འཇོག་བྱས་ཏེ། གྲི་གཅིག་གིས་ཚང་མ་གཏུབ་པའི་མཁྲེགས་བཟུང་གི་ལྟ་བ་མི་འཛིན་པར་སྐུལ་འདེད་གཏོང་དགོས། དེ་དང་མཉམ་དུ་གྲངས་ཉུང་མི་རིགས་ཀྱི་སྐད་ཡིག་སློབ་ཁྲིད་ལ་ཤུགས་སྣོན་དང་མཐོར་འདེགས་གཏོང་དགོས། མ་རྩ་མང་དུ་གཏོང་བ་དང་ཆ་རྐྱེན་ལེགས་བཅོས། སློབ་གསོའི་སྤུས་ཚད་མཐོར་འདེགས་གཏོང་དགོས། །

ན་ཆུང་སློབ་ཕྲུག་ཁྱེད་ཅག་གི་སྙིང་སྟོབས་ནི། མ་འོངས་པའི་བོད་ཀྱི་སྙིང་སྟོབས་ཤིག་ཏུ་ངོས་འཛིན་ནམ་ཡང་ཡོད་ལ། ད་ཐེངས་ཀྱི་གནས་ཚུལ་འདི་དག་གི་ཐོག་ནས་ར་སྤྲོད་འདུག ཁྱེད་ཅག་ནི་རུལ་དྲི་མེད་པའི་མ་འོངས་བོད་ཀྱི་སོ་རྩ་སྐོར་ཞིག་རེད། ཁྱེད་ཅག་ལ་རེ་བ་ཡོད། སྨོན་ལམ་ཡང་བྱེད་ཀྱིན་ཡོད། ཁྱེད་ཅག་ཚེ་རིང་འོ་་་་་་་་་་་་་་་་

ད་ཐེངས་སྐད་འབོད་བྱས་པ་ཚང་མའི་ནང་ནས་གཅན་ཚ་དང་ཁྲི་ཀའི་གནས་ཚུལ་ནི་ཅུང་ཁ་གསལ་མེད་པ་ཞིག་རེད་འདུག་སྙམ། དེས་ན་ང་ཚོས་ཅིས་ཀྱང་ས་གནས་འདི་གཉིས་གཙོས་ས་གནས་གཞན་དག་ཏུའང་ལས་འགུལ་སྤེལ་ཡོད་མེད་སོགས་གནས་ཚུལ་གསལ་བོ་རྒྱུས་ལོན་ཐུབ་པ་དགོས་སྙམ།