འཛམ་གླིང་ཞི་བདེ་ཟེར་བ་དེ་ཡང་རྙོག་དྲ་མེད་པའི་དོན་མིན།

ཉི་ཧོང་པ་གཞོན་སྐྱེས་ཁྱེད་རང་ཚོས་དབྱིན་ཇི་སྐད་ལ་དོ་སྣང་བྱ་དགོས་ཀྱི་འདུག སྤྱིར་ངོས་རང་གིས་ཀྱང་དབྱིན་སྐད་ཡག་པོ་ཤེས་ཀྱི་མེད། དབྱིན་སྐད་དེ་ད་ཆ་འཛམ་གླིང་ནང་དར་རྒྱས་ཆེན་པོ་ཆགས་ཡོད། དབྱིན་སྐད་ཤེས་ཚེ་མི་སྣ་འདྲ་མིན་དང་འབྲེལ་བ་བྱ་རྒྱུ་ལས་སླ་པོ་ཡོད། ཅེས་༧གོང་ས་མཆོག་གིས་གསུངས་ཡོད།

ཉིན་འདི་འགར་སྤྱི་ནོར་༧གོང་ས་མཆོག་ཉི་ཧོང་ནང་མཛད་འཕྲིན་སྐྱོང་གིན་ཡོད་པ་ལྟར། ཁ་སང་ཕྱི་ཚེས་ ༧ ཉིན་གྱི་ཞོགས་པར་ཨོ་སི་ཁའི་རྒྱལ་སྤྱིའི་གཞོན་ནུའི་མཐུན་ཚོགས་ཀྱི་གོ་སྒྲིག་འོག ཨེན་ཊེ་ཟི་ཚོགས་ཁང་དུ་ཉི་ཧོང་གཙོས་པའི་རྒྱལ་ཁབ་ཁག་ ༢༩ ལྷག་གི་གཞོན་སྐྱེས་ཚོར་གསུང་བཤད་གནང་ཡོད་ཅིང་། སྐབས་དེར་༧གོང་ས་མཆོག་གིས་ཉི་ཧོང་བ་ཚོར་འཛམ་གླིང་ཞི་བདེ་བསྒྲུན་རྒྱུའི་ནུས་པ་ཡོད་སྐོར་གསུངས་དོན། འདས་པའི་ལོ་ངོ་སྟོང་ཕྲག་ཙམ་གྱི་སྔོན་ལ། མི་རྣམས་ཀྱིས་རང་གི་མངོན་འདོད་སྒྲུབ་རྒྱུར་སྨོན་ལམ་རྒྱག་རྒྱུ་ཙམ་ཡིན་ཡང་། ད་ཆ་ཚན་རིག་ལ་བརྟེན་ནས་རང་གི་མངོན་འདོད་རྣམས་སྒྲུབ་ཐུབ་ཀྱི་ཡོད། དུས་རབས་འདི་གང་འདྲ་ཆགས་མིན་དེ་ཁྱེད་ཚོར་རག་ལས་ཡོད།

འདུན་པ་ཡོད་པ་དང་སྨོན་ལམ་བརྒྱབ་པ་དེས་འཛམ་གླིང་ཞི་བདེ་བསྐྲུན་ཐབས་ཡོད་པ་མ་རེད། འཛམ་གླིང་ཞི་བདེ་ཡོང་བར་ཀུན་སློང་རྣམ་པར་དག་པའི་སྒོ་ནས་དངོས་སུ་ལག་ལེན་བསྟར་དགོས། འཛམ་ཞི་བདེ་ཟེར་བ་དེ་ཡང་རྙོག་དྲ་མེད་པའི་དོན་མིན། ཇི་སྲིད་མིའི་རྣམ་དཔྱོད་ཡོད་པ་དེ་སྲིད་དུ་བསམ་ཚུལ་མི་མཐུན་པ་དང་རྙོག་དྲ་ཡོང་གི་ཡོད། སེམས་ཅན་བྱ་བྱིའུ་ཚུན་ཆད་ཀྱིས་ཀྱང་འཚེ་བའི་ལས་བྱེད་ཀྱི་ཡོད་ཀྱང་དེ་ཙམ་ཚབས་ཆེན་པོ་བྱེད་ཐུབ་ཀྱི་མེད། བསམ་ཚུལ་དང་རྙོག་དྲ་དེ་དག་གྲོས་མོལ་དང་འཚེ་བ་མེད་པའི་ལམ་ནས་སེལ་དགོས། ཉི་ཧོང་པ་ཁྱེད་རང་ཚོར་དམག་ཆེན་གཉིས་པའི་སྐབས་རྡུལ་ཕྲན་མཚོན་ཆའི་འོག དཀའ་སྡུག་ཚད་མེད་མྱངས་ཡོད་སྟབས། ད་ཆར་ཁྱེད་ཚོར་འཛམ་གླིང་ཞི་བདེ་བསྐྲུན་རྒྱུར་ནུས་པ་ཡོད། ཞི་བདེ་ཟེར་བ་དེ་ཁྲོམ་ནས་ཉོ་མི་ཐུབ་ལ། འཛམ་གླིང་ཞི་བདེ་ཡོང་བར་ཤོག་ཟེར་ནས་མ་ཎི་ལྟར་བགྲངས་ཀྱང་འཛམ་གླིང་ཞི་བདེ་ཡོང་ཐབས་མེད། ཅེས་གསུངས་འདུག

ཡང་༧གོང་ས་མཆོག་གིས་ད་ཆར་འཛམ་གླིང་མི་དམངས་ཞི་བདེ་ལ་ཁ་ཅུང་ཙམ་ཕྱོགས་ཀྱི་ཡོད་སྐོར་གསུངས་དོན། དུས་རབས་ ༢༠ མཇུག་ཙམ་དུ་འཛམ་གླིང་ནང་ཞི་བདེར་དོན་གཉེར་བྱེད་མཁན་ཇེ་མང་དུ་ཕྱིན་ཡོད། ངོས་ལ་གྲོགས་པོ་འབྱོར་ལྡན་ཁ་ཤས་ཡོད། ཁོང་ཚོར་རྒྱུ་དངོས་པོ་སོགས་ཀྱི་དཀའ་ངལ་མེད་ནའང་སེམས་ནང་ཞི་བདེས་ཕོངས་བསྡད་པ་དང་སེམས་པ་མ་སྐྱིད་པ་ཡོང་གི་འདུག དངུལ་གྱིས་སེམས་ལ་དཀའ་ངལ་འཕར་མ་ཞིག་བཟོ་བཞིན་ཡོད་པས་སེམས་ལ་ཞི་བདེ་མེད་པ་དང་གཉིད་མ་ཁུག་པ། ཟས་ལ་ཡི་ག་མེད་པར་ཆགས་པ། ཁྲག་ཤེད་འཕར་བ་སོགས་ཀྱི་དཀའ་ངལ་འཕྲད་ཀྱི་ཡོད། དེ་དང་འདྲ་བར་ཡང་ཡང་སེམས་འཁྲལ་བྱེད་མཁན་མི་དེའི་ལུས་ཀྱི་ནད་འགོག་བྱེད་ཀྱི་ཟུངས་དེ་ཉམས་ཀྱི་ཡོད་པ་ཚན་རིག་པས་ཤེས་རྟོགས་ཐུབ་ཡོད། དུས་རབས་ ༢༠ པའི་མཇུག་ཙམ་ནས་མི་ཚོས་ཕྱི་དངོས་པོའི་ཡར་རྒྱས་ལ་ཚད་གཞི་ངེས་ཅན་ཞིག་ཡོད་པ་ཤེས་ཏེ། ད་ཆར་ཚན་རིག་པ་ཚོས་སེམས་ཚོར་དང་བསམ་བློའི་རྣམ་བཞག་ལ་དོ་སྣང་བྱ་མགོ་བཙུགས་ཡོད། སེམས་དང་། སེམས་ཚོར་ཟེར་བ་དེ་གང་འདྲ་རེད། མི་མཐུན་ཕྱོགས་ཀྱི་བསམ་བློ་དེ་ལྡོག་ཐབས་གང་འདྲ་བྱ་དགོས་པ་སོགས་ཀྱི་གནས་སྟངས་དེར་དམིགས་བསལ་གྱིས་དོ་སྣང་བྱ་མགོ་བཙུགས་ཡོད། ཁོང་ཚོས་ཆོས་ཀྱི་བསམ་བློའི་ཐོག་ནས་སེམས་ཀྱི་ཞི་བདེ་ལ་དོ་སྣང་བྱས་པ་ཞིག་མིན། ཉེ་ལམ་ངོས་རང་ཨ་རིར་བསྐྱོད་སྐབས། ཨ་རིའི་གཙུག་ལག་སློབ་གྲྭ་ཁག་གསུམ་ཙམ་གྱི་ནང་སེམས་ཚོར་གྱི་རྣམ་བཞག་ལ་དོ་སྣང་གསར་པ་ཞིག་བྱེད་མགོ་བཙུགས་འདུག་པ་མ་ཟད། གཙུག་ལག་སློབ་གྲྭ་སོ་སོའི་སློབ་ཚན་ནང་དུ་སེམས་ལ་སྦྱོང་བརྡར་སྤྲད་དེ་སེམས་ནང་ཞི་བདེ་བསྐྲུན་ཐབས་བྱེད་བཞིན་འདུག ཅེས་གསུངས་འདུག

དེ་བཞིན་ཉི་ཧོང་གི་གཞོན་སྐྱེས་ཚོས་དབྱིན་སྐད་སྦྱང་དགོས་སྐོར་གསུངས་དོན། ཉི་ཧོང་པ་གཞོན་སྐྱེས་ཁྱེད་རང་ཚོས་དབྱིན་ཇི་སྐད་ལ་དོ་སྣང་བྱ་དགོས་ཀྱི་འདུག སྤྱིར་ངོས་རང་གིས་ཀྱང་དབྱིན་སྐད་ཡག་པོ་ཤེས་ཀྱི་མེད། དབྱིན་སྐད་དེ་ད་ཆ་འཛམ་གླིང་ནང་དར་རྒྱས་ཆེན་པོ་ཆགས་ཡོད། དབྱིན་སྐད་ཤེས་ཚེ་མི་སྣ་འདྲ་མིན་དང་འབྲེལ་བ་བྱ་རྒྱུ་ལས་སླ་པོ་ཡོད། ཉི་ཧོང་ཡུལ་མི་གཅིག་པུ་ཙམ་མིན་པར་ཨ་ཧྥི་རི་ཀ་དང་། དེ་བཞིན་ཡུལ་ལུང་གཞན་གྱི་མི་དང་འབྲེལ་བ་བྱ་རྒྱུར་ཕན་ཐོགས་ཏན་ཏན་ཡོང་ཐུབ་ངེས་རེད། དབང་པོའི་ཤེས་པ་ཙམ་ལ་བརྟེན་པའི་བདེ་བར་འདོད་བློ་ཁེངས་ཏེ་སྡོད་རྒྱུ་མེད། གཙོ་བོ་སེམས་ནང་བདེ་བ་དགོས། བདེ་བ་ངོ་མ་དེ་དབང་ཤེས་ཀྱི་ཚོར་བ་ལ་མ་བརྟེན་པར་ཡིད་བློའི་བདེ་བ་དེ་ཡིན། ངོས་ཀྱིས་དུས་རྒྱུན་སོ་སོའི་ཆོས་བརྒྱུད་ཙམ་ལ་གཞི་མ་བཅོལ་བར་ཆོས་ལུགས་རིས་མེད་ཀྱི་བཟང་སྤྱོད་གོང་འཕེལ་གཏོང་རྒྱུར་འབད་བརྩོན་བྱེད་ཀྱི་ཡོད། ང་ཚོ་སོ་སོའི་ཉམས་མྱོང་དང་ཚན་རིག་གི་དཔྱད་པ་བྱས་པའི་གྲུབ་དོན་ལ་གཞི་བཅོལ་བའི་ཐོག་ནས་བཟང་སྤྱོད་དེ་དེང་སང་འཛམ་གླིང་ནང་གལ་ཆེན་པོ་ཆགས་ཡོད།

དེང་སང་དངོས་ཡོད་ཀྱི་གནས་སྟངས་དེ་ང་ཚོ་ཕན་ཚུན་གཅིག་ལ་གཅིག་བརྟེན་བྱ་དགོས་པ་ཆགས་ཡོད། འཛམ་གླིང་གི་རྙོག་དྲ་ཚང་མ་ང་ཚོ་དང་ཁྱེད་ཚོ་ཟེར་བ་ལས་ཡོང་གི་ཡོད་པར་བརྟེན། ང་ཚོ་དང་ཁྱེད་ཚོ་ཟེར་བའི་བསམ་བློ་དེ་དོར་ཏེ་ང་ཚོ་ཞེས་གཅིག་གྱུར་གྱི་བསམ་བློ་ཞིག་བསླེབ་ཐུབ་པ་བྱ་དགོས། ང་ཚོ་ཕྲུ་གུ་མ་འབྱར་གྱི་གནས་སྐབས་སུ་མཐའ་གཅིག་ཏུ་རང་གི་ཨ་མའི་བྱམས་བརྩེ་ལ་བརྟེན་ནས་འཚོ་དགོས། གྲོས་ཆོད་དང་ཡིག་ཆ་བཞག་པ་ལས་ཞི་བདེ་ཡོང་མི་ཐུབ། ཞི་བདེ་ཡང་དག་པ་ཞིག་ཡོང་བར་ཀུན་སློང་རྣལ་མ་ཞིག་དགོས། ང་ཚོའི་མི་རབས་དེ་ད་ཆར་འཐོན་ཕྱག་ཞུ་རྒྱུའི་དུས་ལ་བསླེབ་ཡོད། གཞོན་སྐྱེས་ཁྱེད་རང་ཚོས་མི་མཐུན་ཕྱོགས་ཀྱི་བསམ་བློ་དེ་ཇེ་ཉུང་དུ་གཏོང་ཐབས་བྱ་དགོས། ཞེས་གསུངས་ཡོད་འདུག

༧གོང་ས་མཆོག་དེ་རིང་སྔ་དྲོ་ཆོས་ཚོགས་ཁག་ཅིག་གི་གདན་ཞུ་ལྟར། ཉི་ཧོང་གི་གྲོང་ཁྱེར་ནཱ་ར་ཁུའུ་ཁ་ཨུ་ངྷོ་རུ་ཉི་ཧོང་དང་ཀོ་རི་ཡའི་ཆོས་ཞུ་བ་གྲངས་ ༢༨༠ ཙམ་ནང་ཆོས་དང་འབྲེལ་བའི་ཐོག་ནས་བཀའ་སློབ་གནང་ཞིང་། དེའི་རྗེས་ནང་པའི་ལྷ་ཁང་ཞིག་ཏུ་ཕེབས་ཏེ་དུས་རབས་བརྒྱད་པའི་སྐབས། རག་ལས་བཞེངས་པའི་སངས་རྒྱས་རྣམ་པར་སྙང་མཛད་ཀྱི་རྟེན་གཙོའི་མདུན་ནས་ཐུགས་སྨོན་མཛད་ཡོད་འདུག

༼ དོན་འགྲུབ་བཀྲ་ཤིས་ཀྱིས་བོད་གཞུང་དྲ་བ་ལས་བསྡུ་སྒྲིག་བྱས ༽