ཟླ་འདིའི་བོད་ཡིག་གི་འཕོ་འགྱུར་གཉིས་པ།

དེ་རིང་ཀྲུང་གོའི་བོད་ལྗོངས་དྲ་བས་གནས་ཚུལ་སྤེལ་བ་ལྟར་ན།  བོད་རིག་པའི་ཇོ་མོ་གླང་མའི་གླེང་སྟེགས་སྐབས་དང་པོ་ཞེས་པ་ཟླ་འདིའི་ཚེས་ ༢༣ ཉིན་གྱི་སྔ་དྲོར། པེ་ཅིན་གྱི་ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཟེར་བ་རུ་ཚོགས་ཡོད་པ་དང་། ཚོགས་ཐོག་དེར་རྒྱལ་ནང་གི་ཞིབ་འཇུག་སྡེ་ཁག་དང་མཐོ་རིམ་སློབ་ཆེན་བཅུ་ཕྲག་ཁ་ཤས་ནས་ཕེབས་པའི་ཆེད་ལས་མཁས་པ་བརྒྱ་ལ་ཉེ་བ་ཚོགས་འདུར་ཞུགས་ཏེ། ཆེད་ལས་མཁས་པ་ ༤༠ ཡིས་སྤྱི་ཚོགས་དཔལ་འབྱོར་ཞིབ་འཇུག་དང་། དེང་རབས་ཆབ་སྲིད་ཞིབ་འཇུག  ལོ་རྒྱུས་ཞིབ་འཇུག  ཆོས་ལུགས་ཞིབ་འཇུག  བོད་ཀྱི་གསོ་རིག་ཞིབ་འཇུག་བཅས་དང་འབྲེལ་ཏེ་གཏམ་བཤད་གནང་རྒྱུ་རེད་ཟེར།

ཚོགས་འདུའི་ཉིན་གསུམ་པ་སྟེ། དེ་རིང་ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཀྱིས་གཙོ་སྒྲུབ་གནང་སྟེ། ཉེ་ལམ་གསར་དུ་དུ་བཟོ་སྐྲུན་ལེགས་འགྲུབ་བྱུང་བའི་ཀུ་ཤུ་གློག་ཀླད་པར་གཞིའི་“ཇོ་མོ་གླང་མ”ཞེས་པའི་བོད་ཡིག་གི་ཡིག་གཟུགས་མ་ལག་ཅིག་དབུ་འབྱེད་དང་ཕྱིར་བསྒྲགས་བྱས་འདུག་ལ། དེ་ནི་“ཇོ་མོ་གླང་མ”ཞེས་པའི་བོད་ཡིག་གི་ཡིག་གཟུགས་ཞིབ་འཇུག་སྐོར་གྱི་ཐོད་བརྒལ་གསར་བ་ཞིག་ཡིན་ཟེར།

ཡིན་ནའང་། གསར་དུ་བཟོ་སྐྲུན་ལེགས་འགྲུབ་བྱུང་བའི་ཇོ་མོ་གླང་མ་ཞེས་པའི་བོད་ཡིག་ཡིག་གཟུགས་ཀྱི་ཁྱད་ཆོས་དང་བཀོལ་སྤྱོད། ནང་འཇུག་བྱེད་སྟངས་བཅས་ཀྱི་ཐད་དུ་འགྲེལ་བརྗོད་གང་ཡང་བྱས་མི་འདུག་མོད། འདི་ནི་ཟླ་འདིའི་ཕྱི་ཚེས་ ༡༥ ཉིན་གྲྭ་བློ་བཟང་སྨོན་ལམ་ལགས་ཀྱིས་སྨོན་ལམ་ཚིག་མཛོད་དང་སྨོན་ལམ་བོད་ཡིག་ ༣.༡ སྤྱི་ཚོགས་ཁྲོད་རིན་མེད་འགྲེལ་སྤེལ་གནང་རྗེས་ཏེ། ཟླ་འདིའི་ནང་གི་བོད་སྐད་ཡིག་གི་འཕོ་འགྱུར་གཉིས་པ་དེ་ཡིན་འདུག

བོད་རིག་པའི་ཇོ་མོ་གླང་མའི་གླེང་སྟེགས་ཞེས་པ་ནི་ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཀྱིས་ལོ་བཞིའི་ནང་ཐེངས་གཅིག་འཚོགས་པའི་པེ་ཅིང་བོད་རིག་པའི་བགྲོ་གླེང་ཚོགས་འདུ་དང་། ཀྲུང་གོའི་བོད་རིག་པ་ཞིབ་འཇུག་གི་ཇོ་མོ་གླང་མའི་བྱ་དགའ་དཔྱད་བསྡུར་གྱི་བྱ་འགུལ། རྒྱལ་ཡོངས་བོད་རིག་པའི་ལས་དོན་མཐུན་སྦྱོར་ཚོགས་འདུ་བཅས་ཀྱི་གཞུག་ནས་སྤེལ་བའི་བོད་རིག་པའི་ཁྱབ་ཁོངས་ཀྱི་བྱ་འགུལ་གཙོ་བོ་ཞིག་ཡིན་འདུག

གསར་འགོད་པ། ཨ་རིག་འགྱུར་མེད།